ՆԱՏՕ-ն Ուկրաինային կտրամադրի քիմիական, կենսաբանական և միջուկային զենքից պաշտպանվելու, ինչպես նաև կիբերպաշտպանության միջոցներ։ Այս մասին հինգշաբթի հայտարարել է ՆԱՏՕ-ի գլխավոր քարտուղար Ենս Ստոլտենբերգը Բրյուսելում դաշինքի արտակարգ գագաթնաժողովի արդյունքներով կայացած մամուլի ասուլիսում։

«Մենք որոշել ենք ավելի շատ աջակցություն ցուցաբերել Ուկրաինային, այդ թվում՝ կիբեր սպառնալիքներից, կենսաբանական, քիմիական և միջուկային զենքերից պաշտպանվելու համար», — ասել է նա:

Ստոլտենբերգը պնդում է, որ Ռուսաստանը փորձում է պատրվակ ստեղծել Ուկրաինայում քիմիական զենքի կիրառման համար։

«Մենք մտահոգված ենք, որովհետև տեսնում ենք Ռուսաստանի հռետորաբանությունը, որը փորձում է պատրվակ ստեղծել Ուկրաինայի և ՆԱՏՕ-ի հասցեին քիմիական զենք կիրառելու համար: Նման պատրվակի ստեղծում մենք նախկինում էլ ենք տեսել»,- ասել է նա:

Ստոլտենբերգի խոսքով՝ Ուկրաինայում քիմիական զենքի կիրառումը «ամբողջությամբ կփոխի հակամարտության բնույթը եւ կունենա համատարած հետևանքներ»։

Ռուսաստանը կհրաժարվի բնական գազի մատակարարումների համար վճարումներն ընդունել իրենց վարկաբեկած արժույթներով, ներառյալ դոլարով և եվրոյով, և կանցնի ռուբլով վճարումների։ Այս մասին չորեքշաբթի կառավարության հետ հանդիպմանը հայտարարել է ՌԴ նախագահ Վլադիմիր Պուտինը, գրում է ՏԱՍՍ-ը։

«Ես որոշել եմ մի շարք միջոցառումներ իրականացնել՝ այսպես կոչված անբարյացակամ երկրներին մատակարարվող մեր բնական գազի դիմաց վճարումները ռուսական ռուբլու հնարավորինս արագ անցման վերաբերյալ»,- ասել է նա։

Այսինքն, պարզաբանել է Պուտինը, նման հաշվարկներում նախատեսվում է հրաժարվել բոլոր «վարկաբեկված» արժույթներից։

Նախագահը նշել է, որ Ռուսաստանը կշարունակի գազ մատակարարել այլ պետություններին ավելի վաղ կնքված պայմանագրերով նախատեսված ծավալների և գների համաձայն։

Երկրի ղեկավարն ընդգծել է, որ անբարյացակամ երկրների հետ գազային պայմանագրերի ապագա փոփոխությունները կազդեն միայն վճարման արժույթի վրա՝ այն կփոխվի ռուսական ռուբլու։

«Ես խնդրում եմ կառավարությանը համապատասխան հրահանգ տալ «Գազպրոմին» գործող պայմանագրերի փոփոխության վերաբերյալ, միևնույն ժամանակ, բոլոր օտարերկրյա սպառողներին պետք է հնարավորություն տրվի կատարել անհրաժեշտ գործողությունները», — կարգադրել է Պուտինը։

ԱՄՆ պաշտպանության նախարարությունը «ապացույցներ է հավաքում» Ուկրաինայում Ռուսաստանի կողմից իրականացված ենթադրյալ ռազմական հանցագործությունների մասին, ասել է Պենտագոնի խոսնակ Ջոն Քիրբին։

«Մենք, անշուշտ, տեսնում ենք հստակ ապացույցներ, որ ռուսական զորքերը ռազմական հանցագործություններ են կատարում», — ասել է Քիրբին «Ամերիկայի Ձայն»-ի հարցին ի պատասխան:

«Կատարվում է հետաքննություն, որը կշարունակվի, և մենք պատրաստվում ենք նպաստել այս հետաքննությանը։ Թե ինչ կստացվի դրանից, սա Պենտագոնի ղեկավարության որոշումը չէ»,- պնդում է Քիրբին:

Ավելի վաղ Սպիտակ տան մամլո խոսնակ Ջեն Փսակին ասել էր, որ պետքարտուղարությունը ուսումնասիրում է Ուկրաինայում «պատերազմական հանցագործությունների» դեպքերը՝ շարունակական «իրավական գործընթացի» շրջանակներում։

Նրա խոսքով, հետաքննության ընթացքում ԱՄՆ վարչակազմի կողմից հավաքագրված տեղեկատվությունը «կփոխանցվի միջազգային մարմիններին, որոնք նախկինում քրեական պատասխանատվության են ենթարկել ռազմական հանցագործներին»:

Փսակին հավելել է, որ Միացյալ Նահանգները միայն տեղեկատվություն է հավաքում, իսկ «դրանցով կզբաղվեն միջազգային կառույցները»։

Հոդվածը պատրաստվել է Ամերիկայի ձայնի ռուսական ծառայության նյութի հիման վրա

Ուկրաինայում ակտիվ ռազմական գործողությունները ռուսական զորքերի հետ կարող են ավարտվել երկու-երեք շաբաթից. հեռուստամարաթոնի ժամանակ հայտարարել է ՈՒկրաինայի նախագահի աշխատակազմի ղեկավարի խորհրդական Ալեքսեյ Արեստովիչը։

Նրա խոսքով, ակտիվ ռազմական գործողությունները շուտով կարող են ավարտվել, քանի որ ռուսական զորքերը ոչինչ չեն ունենա նրանց դեմ կռվելու համար։

«…Նրանք առաջ կգնան, մինչև վերջանան, և շատ արագ կսպառվեն, ես երկու-երեք շաբաթ ժամանակ եմ տալիս ակտիվ ռազմական գործողությունները դադարեցնելու համար, քանի որ ոչինչ չի մնալու կռվելու համար: Այն, ինչ տեղի է ունենում հինգ օրվա ընթացքում, փոքր մոդել է, թե ինչ է լինելու երեք շաբաթվա ընթացքում. օպերատիվ դադարի ժամանակ կլինի… Երեք շաբաթից ամենուր այսպես կլինի, իսկ երբ կանգնեն, մեզ ավելի հարմար կլինի ոչնչացնել նրանց»,- Արեստովիչի խոսքերն է մեջբերում РБК-Украина-ն։

Ուկրաինայի զինանոցին «Կինժալ» գերձայնային հրթիռով հարվածը ավելի քան 1000 կմ հեռահարությունից է հասցվել, լրագրողներին հայտնել է ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը, փոխանցում է «ՌԻԱ Նովոստին»։

Նրա խոսքով՝ գերձայնային հրթիռի թռիչքի ժամանակը 10 րոպեից էլ քիչ է եղել։

Նա հավելել է, որ «գերձայնային արագության եւ գերբարձր կինետիկ էներգիայի հաշվին «Կինժալ» համակարգի հրթիռի մարտագլխիկը ոչնչացրել է լեռնային տարածքում գտնվող պաշտպանված ստորգետնյա զինանոցը, որը կառուցվել է դեռեւս խորհրդային տարիներին՝ հատուկ զինամթերք եւ հրթիռներ պահելու համար»:

Մեծ Բրիտանիայի վարչապետ Բորիս Ջոնսոնը հայտարարել է, որ Ուկրաինայի նախագահ Վլադիմիր Զելենսկու հետ քննարկել է ռուսական ռազմական գործողության պատճառով իր տարհանման հնարավորությունը։

«Մենք վաղուց քննարկել ենք այս ամենը: Առաջին թեմաներից մեկը այն հարցն էր, թե ինչ կլինի, եթե ամեն ինչ սխալ ընթանա: Պետք է ասեմ, որ Վլադիմիր Զելենսկին միշտ շատ պարզ է եղել. նա ասել է, որ պարտք է ուկրաինացիներին, նա պատրաստվում է մնալ այնտեղ՝ նրանց մասին հոգ տանելու»,- ՏԱՍՍ գործակալության հաղորդմամբ՝ այս մասին ասել է բրիտանական կառավարության ղեկավարը The Sunday Times-ին տված հարցազրույցում, որը հրապարակվել է կիրակի օրը։

Ջոնսոնը չի բացառել իր այցը Կիև՝ չնայած Ուկրաինայում շարունակվող ռազմական գործողությունների։ «Ես շատ ցանկանում եմ որևէ կերպ աջակցել Զելենսկիին: Չգիտեմ, արդյոք այս այցը արդյունավետ միջոց կլինի իմ աջակցությունը ցույց տալու համար, բայց ռազմավարական, քաղաքական, տնտեսական և բարոյական տեսանկյունից դա չափազանց կարևոր է, որպեսզի Ռուսաստանի նախագահ Վլադիմիր Պուտինը ձախողի, իսկ Զելենսկին՝ հաջողի»,- հավելել է նա։

Ուկրաինայում պատերազմի պատճառով մատակարարումների խափանումները լուրջ կլինեն եւ կարող են հանգեցնել նոր հակամարտությունների առանց այդ էլ խոցելի երկրներում։ Այս մասին հայտարարել է Գերմանիայի արտգործնախարար Աննալենա Բերբոքը՝ ներկայացնելով ազգային անվտանգության նոր ռազմավարությունը, հաղորդում է Reuters-ը։

Նա ընդգծել է, որ Գերմանիան պետք է կապեր պահպանի ավտորիտար ռեժիմների հետ, նույնիսկ եթե դրանք չեն կիսում նրա արժեքները, եւ չլռի տնտեսական կամ էներգետիկ շահերի հետ կապված հարցերում։

Նա ընդգծել է, որ «անվտանգության քաղաքականությունն ավելին է, քան ռազմականը, դրան գումարած դիվանագիտությունը»: «Ինձ համար որոշիչ են հստակ դիրքորոշումը, գործելու ավելի ուժեղ կարողությունը, արտաքին ու անվտանգության քաղաքականության ավելի սուր գործիքները»,- ասել է արտգործնախարարը։

Բերբոքը նշել է Գերմանիայի «հատուկ պատասխանատվությունը», որը բխում է նրա պատմությունից եւ մեղքը՝ Երկրորդ համաշխարհային պատերազմի վայրագությունների համար: «Մեր պարտքն է աջակցել նրանց, ում կյանքը, ազատությունն ու իրավունքները վտանգված են»,- ասել է նա։

«ԵՄ-ն այսօր առաջին անգամ է ձեւավորում անվտանգության քաղաքականության ընդարձակ ռազմավարություն»,- նշել է նա։ «Այս պատերազմը եւս մեկ անգամ ցույց է տալիս, որ Եվրոպայի անվտանգությունը կախված է ՆԱՏՕ-ի հավաքական պաշտպանությունից»,- հավելել է Բերբոքը՝ պնդելով, որ Գերմանիայի անվտանգությունը պետք է լրացնի ԵՄ-ի եւ ՆԱՏՕ-ի անվտանգության քաղաքականությունը։

«Մեր զորավարժությունները պետք է արտացոլեն նոր իրողություններ, եւ մենք պետք է հաշվի առնենք, որ դաշինքի արեւելյան թեւը գտնվում է նոր վտանգի տակ, ուստի մեզ անհրաժեշտ է ՆԱՏՕ-ի ավելի մեծ ներկայություն Հարավարեւելյան Եվրոպայի երկրներում»,- ասել է նա։

Դիվանագետը կոչ է արել ստեղծել ապագային միտված անվտանգության նոր ռազմավարություն՝ ներառյալ կենտրոնացումը կիբեռանվտանգության վրա: «Մենք տեսնում ենք, որ կիբեռհարձակումները ժամանակակից պատերազմի անբաժանելի մասն են»,- ընդգծել է Բերբոքը։

Նա նաեւ հայտարարել է, որ Բեռլինը կմշակի Չինաստանի նկատմամբ նոր ռազմավարություն՝ անվտանգության նոր ռազմավարության հետ մեկտեղ։

Ռուսաստանը կարծում է, որ Ուկրաինայի տարածքում կենսաբանական զենքի բաղադրիչներ էին ստեղծվում։ Այս մասին հայտարարել է ՌԴ Զինված ուժերի ճառագայթային, քիմիական եւ կենսաբանական պաշտպանության զորքերի ղեկավար Իգոր Կիրիլովը, փոխանցում է ՏԱՍՍ-ը։

Նրա խոսքով՝ Ուկրաինայի պաշտպանության նախարարության լաբորատորիաները Կիեւում, Օդեսայում, Լվովում եւ Խարկովում 32 միլիոն դոլարի ֆինանսավորում են ստացել ԱՄՆ-ից։ Նա ասել է, որ Միացյալ Նահանգները 1.6 միլիոն դոլար է ներդրել՝ չղջիկների միջոցով մարդկանց հիվանդությունների փոխանցումն ուսումնասիրելու համար:

«P-781 նախագծի՝ չղջիկների միջոցով մարդկանց փոխանցման ուղիների հետազոտման վերաբերյալ փաստաթղթերի ուսումնասիրությունը ցույց է տվել, որ աշխատանքներն իրականացվել են Խարկովի լաբորատորիայի հիման վրա՝ Թբիլիսիի սկանդալային Լուգարի կենտրոնի հետ միասին։ Ուկրաինայում եւ Վրաստանում դրա իրականացման համար Պենտագոնի ընդհանուր ծախսերը 1.6 մլն դոլար են կազմել, որի մեծ մասը ստացել է Ուկրաինան՝ որպես հիմնական կապալառու»,- ասել է Կիրիլովը։

Նրա խոսքով՝ ՌԴ ԶՈւ-ն ունի փաստաթուղթ, որը հաստատում է Պենտագոնի անմիջական մասնակցությունն Ուկրաինայում ռազմական կենսաբանական նախագծերի ֆինանսավորմանը։

«Պատահական չէ, որ նշված կենսալաբորատորիաներն ընտրվել են ԱՄՆ պաշտպանության նախարարության սպառնալիքների նվազեցման գրասենյակի (DTRA) եւ կապալառու Black and Witch-ի կողմից՝ որպես UP-8 նախագծի կատարողներ, որոնք ուղղված են Կոնգո-ղրիմյան հեմոռագիկ տենդի, լեպտոսպիրոզի եւ հանտավիրուսիների հարուցիչների ուսումնասիրմանը»,- ասել է Կիրիլովը։

Կիրիլովը նշել է, որ ուկրաինական կենսաբանական լաբորատորիաները շարունակում են ոչնչացնել կենսաբանական նյութերը եւ վտանգավոր վիրուսների հետազոտման փաստաթղթերը։ «Այդ լաբորատորիան համագործակցում է Օդեսայի Մեչնիկովի անվան հետազոտական ​​հակաժանտախտային ինստիտուտի հետ, որը հետազոտություններ է իրականացնում ժանտախտի, սիբիրախտի, խոլերայի, տուլարեմիայի եւ արբովիրուսների վերաբերյալ»,- ասել է նա:
Կիրիլովը հայտարարել է, որ Ռուսաստանի Զինված ուժերը փաստաթղթեր ունեն, որոնք հաստատում են Ուկրաինայից երրորդ երկրներ, այդ թվում՝ Գերմանիա, Մեծ Բրիտանիա եւ Վրաստան, կենսանմուշների տեղափոխումը։

«Անհրաժեշտ է նշել մի շարք փաստաթղթեր, որոնք հաստատում են Ուկրաինայում վերցված կենսաբանական նմուշների տեղափոխումը երրորդ երկրների տարածք, այդ թվում՝ Գերմանիա, Մեծ Բրիտանիա, Վրաստան։ Ձեր առջեւ պաշտոնական փաստաթղթեր են, որոնք հաստատում են ուկրաինացի քաղաքացիների արյան շիճուկի 5000 նմուշների տեղափոխումը Պենտագոնին առընթեր Լուգարի կենտրոն Թբիլիսիում, 773 կենսավերլուծություն փոխանցվել է Մեծ Բրիտանիայի ռեֆերենս լաբորատորիա: Պայմանագիր է ստորագրվել Գերմանիայի Լեֆլերի ինստիտուտ անսահմանափակ քանակությամբ վարակիչ նյութերի դուրս բերման համար»,- ասել է Կիրիլովը։

Նրա խոսքով՝ «ստացված տեղեկատվության վերլուծությունը ցույց է տալիս, որ ուկրաինացի մասնագետներին հայտնի չէ կենսանյութերի տեղափոխման հնարավոր ռիսկերի մասին, եւ նրանք, փաստորեն, փակ աչքերով են գործում եւ պատկերացում չունեն իրականացվող հետազոտությունների իրական նպատակների մասին»:

Արևմուտքը չի ներում Ռուսաստանին իր անկախ կուրսի համար և կփորձի ճնշել նրան և խախտել նրա տարածքային ամբողջականությունը, սակայն ԱՄՆ-ին և նրա դաշնակիցներին դա չի հաջողվի: Այս մասին ասել է Վլադիմիր Պուտինը, գրում է «Ռիա Նովոստի»-ն:

«Ամենայն անկեղծությամբ ուզում եմ ասել՝ այսպես կոչված հավաքական Արևմուտքի երկերեսանի խոսակցությունների և այսօրվա գործողությունների հետևում աշխարհաքաղաքական թշնամական նպատակներ կան, նրանց ուղղակի պետք չէ ուժեղ և ինքնիշխան Ռուսաստան»,- ասել է նա։

ՌԴ նախագահն ընդգծել է, որ Ուկրաինայի ապառազմականացման և ապաազգայնացման հատուկ գործողությունը կիրականացվի մինչև վերջ։ 

«Եթե ռուսական զորքերը գործեին միայն Դոնբասում, դա չէր հանգեցնի վտանգի վերացմանը, այնտեղ նոր առաջնագիծ կանցկացվեր»,- ասել է պետության ղեկավարը։

ՌԴ նախագահը նշել է, որ Արեւմուտքը Կիեւի իշխանություններին մղում է արյունահեղության՝ մատակարարելով զենք ու վարձկաններ։

Պուտինը հավելել է, որ Կրեմլն առաջարկել է Ուկրաինայի զինված ուժերին դուրս բերել ստորաբաժանումները Դոնբասից։ «Առաջին անգամ եմ ուզում ասել. հատուկ գործողության հենց սկզբում, արյունահեղությունից խուսափելու համար, Կիևի իշխանություններին խնդրել են չմասնակցել ռազմական գործողություններին, այլ պարզապես դուրս բերել իրենց զորքերը Դոնբասից։ Սա իրենց որոշումն է»,- ընդգծել է Պուտինը:

Բելառուսի նախագահ Ալեքսանդր Լուկաշենկոն ասել է, որ երկրի ուղղությամբ արձակվել է «Տոչկա-Ու» հրթիռ։ Այս մասին Լուկաշենկոն խոսել է զինվորականների հետ հանդիպման ժամանակ, հայտնում է պետական ԲելՏԱ գործակալությունը։

Լուկաշենկոն չի հստակեցրել, թե որտեղից և ով է արձակել հրթիռը Բելառուսի ուղղությամբ, սակայն ասել է, որ «իրենք ու ռուսները» երկու օր առաջ այն որսացել և ոչնչացրել են Պրիպյատի շրջանում։ Իսկ այս օրերին լռության պատճառն այն էր, որ փորձում էին «հասկանալ՝ ինչ է այնտեղ կատարվել»։

«Ես ձեզ զգուշացրել էի, որ մեզ մղելու են դեպի այդ գործողությունը, այդ պատերազմը, բառացիորեն երկու օր առաջ հերթական «Տոչկա-Ու» հրթիռի արձակումը մեր Բելառուսի տարածքում, հարված մեր տարածքին, որը մենք հաջողությամբ կասեցրինք ռուսների հետ։ Մի հրթիռո՞վ են ուզում ռմբակոծել Բելառուսը: Դա չի աշխատի: Այդ հրթիռը մեզ ուղղակի չի հասնի։ Բայց ինչո՞ւ է դա արվում։ Որպեսզի մեզ գրգռեն, և որ մենք սկսենք արձագանքել: Բայց մենք այդքան էլ պարզամիտ չենք: Եթե պատասխանենք, արդեն տեղը-տեղին կպատասխանենք։ Այնպես, որ բոլորը զգան: Առայժմ մենք դա հանդուրժում ենք»,- ասել է Լուկաշենկոն։

Միաժամանակ նա ընդգծել է, որ չի պատրաստվում ներքաշվել այն գործողության մեջ, որը Ռուսաստանը իրականացնում է Ուկրաինայում։

«Սրա կարիքը չկա… մենք այնտեղ անելիք չունենք»,- ասել է Լուկաշենկոն՝ հավելելով, որ ավելին, բելառուսներին այնտեղ չեն հրավիրում։