ԱՄՆ իշխանությունները խստորեն քննադատել են Սիրիայի   կառավարությանը՝ հակակառավարական ցույցերի մասնակիցների հանդեպ ճնշումներ գործադրելու համար: ՄԱԿ-ի տվյալներով՝ Սիրիայից արդեն ավելի քան 10.000 մարդ է փախել Թուրքիա և Լիբանան:

Նախօրեին սիրիական կառավարական զորքերը օդային ուժերի և տանկերի միջոցով «հանել են» ապստամբներին Ջիսր էշ Շուհուր քաղաքից: Այս գործողությունների ընթացքում  ձերբակալվել են հարյուրավոր խաղաղ բնակիչներ:

Ի դեպ, Սիրիայի իշխանությունները շարունակում են պնդել, որ վերոնշյալ քաղաքում սպանվել են ավելի քան 120  ոստիկան և զինվոր:  Իրավապահ մարմինների տվյալներով` զոհվել են և՛ ցուցարարներ, և՛ զինվորներ:

Ճապոնիայի կառավարությունն այսօր հաստատել է ՙՖուկուսիմա՚-ի վթարի հետեւանքով տուժածներին հատուցում հատկացնելում վերաբերյալ օրենքի նախագիծը: Այս մասին հաղորդում Forbes-ը:

Ըստ նախագծի կստեղծվի հատուկ կազմակերպություն, որը կհավաքի միջոցներ ինչպես պետությունից եւ ներդրողներից, այնպես էլ երկրի այլ էներգետիկ կառույցներից: TEPCO ընկերությունը կհատուցի այդ կազմակերպության ծախսերը իր եկամուտներից: Ըստ ամենայնի, օրենքի նախագիծը կքննարկվի պառլամենտի առաջիկա նիստում:

Հիշեցնենք, որ ապրիլին TEPCO-ն հայտարարել էր կորուստների ռեկորդային թվի մասին` 1,247 տրլն յեն (15,28 մլրդ դոլար):

ԱՄՀ ղեկավարի պաշտոնի համար թեկնածություն ներկայացրած Իսրայելի Կենտրոնական բանկի ղեկավար Սթենլի Ֆիշերին հանել են հնարավոր թեկնաշուների ցանկից տարիքի պատճառով, հաղորդում է BBC-ն: Ըստ ԱՄՀ կանոնների այդ պաշտոնում կարող է լինել մինչև 65 տարեկան անձ, իսկ Ֆիշերը 67 տարեկան է:

Ինչպես հայտնի է, ԱՄՀ տնօրենների խորհուրդը կրճատել է թեկնածուների թիվը մինչև երկուսը: Ընտրական պայքարը կշարունակեն Ֆրանսիայի ֆինանսների նախարար Քրիստին Լագարդը և Մեքսիկայի Կենտրոնական Բանկի ղեկավար Աուգուստին Կարստենսը:

BBC-ի տեղեկացմամբ՝ ԱՄՆ կառավարությունը որոշել է ամբողջությամբ գաղտնազերծել Վիետնամի պատերազմի մասին, այսպես կոչված, «Պենտագոնի դոսյեն», որը բաղկացած է 7000 էջից։

1971 թ. հունիսի 13-ին ԱՄՆ ազգային անվտանգության խորհրդի նախկին աշխատակից Դանիել Էլսբերգն ամերիկյան The New York Times թերթին փոխանցեց Վիետնամի պատերազմի մասին պատմող գաղտնի փաստաթղթեր։ Վերոնշյալ նյութերի հրապարակումը թուլացրեց ամերիկյան հասարակության և միջազգային հանրության վստահությունն ԱՄՆ իշխանությունների հանդեպ։

Փաստաթղթերում մասնավորապես նշված էր, որ ԱՄՆ նախագահ Լինդոն Ջոնսոնի վարչակազմը կանխամտածված ռազմական գործողությունների աստիճանական ծավալման քաղաքականություն է իրականացրել, իսկ իշխանությունները շարունակ հայտարարում էին, թե չեն ձգտում ընդլայնել ռազմական գործողություններրը։

Էլսբերգին լրտեսության մեղադրանք ներկայացվեց: Նրան 115-ամյա ազատազրկում էր սպառնում, սակայն 1973-ի մայիսի 11-ին գործը կարճվեց, քանի որ պարզվեց՝ ԱՄՆ կառավարությունը Էլսբերգի դեմ կոմպրոմատներ հավաքելու նպատակով մի շարք  անօրինական մեթոդների էր դիմել։

Լիբիայի պետական «Ալ Ջամահիրիա» հեռուստատեսությունը երեկ ցուցադրել Է մի տեսագրություն, որտեղ Շախմատի միջազգային ֆեդերացիայի (ՖԻԴԵ) նախագահ Կիրսան Իլյումժինովը շախմատ է խաղում Լիբիայի առաջնորդ Մուամար Քադաֆիի հետ։
Շախմատ խաղալու ընթացքում երկրի առաջնորդը հայտարարել է, որ չի պատրաստվում լքել Լիբիան և վար դնել իր լիազորությունները: Ըստ Իլյումժինովի՝ Քադաֆին ասել է, որ ինքը ո՛չ վարչապետ է, ո՛չ նախագահ և ո՛չ էլ թագավոր: «Ես Լիբիայում ոչ մի պաշտոն չեմ զբաղեցնում, այդ իսկ պատճառով ես ոչ մի պաշտոնից չեմ կարող հրաժարվել»,- ասել է Լիբիայի առաջնորդը: ՖԻԴԵ-ի նախագահը նախօրեին պաշտոնական այցով ժամանել էր Լիբիա՝ քննարկելու երկրում շախմատի զարգացման հեռանկարները։ Իլյումժինովը շախմատ է խաղացել Լիբիայի առաջնորդի և նրա որդու հետ, որը ղեկավարում է երկրի Ազգային օլիմպիական կոմիտեն։

RBC գործակալությունը տեղեկացնում է, որ Լիբիայի առաջնորդ Մուամար Քադաֆիի դուստրը` Աիշա Քադդաֆին  հայց է ներկայացրել Փարիզի դատարան` ընդդեմ ՆԱՏՕ-ի կողմից կատարված ռազմական հանցագործությունների և իր հարազատների սպանության համար:

Քադդաֆիի դստեր բողոքն այս անգամ ուղղված է ոչ միայն Հյուսիսատլանտյան դաշինքի ուժերի, այլև Ֆրանսիայի  նախագահ Նիկոլա Սարկոզիի և այդ երկրի բանակի դեմ:

Աիշան պահանջել է պատասխանատվության ենթարկել Մուամար Քադաֆիի կրտսեր որդու` Սեյֆ ալ-Արաբի և  Լիբիայի առաջնորդի 3 թոռների սպանության մեղավորներին: Թոռներից մեկը Աիշայի որդին է եղել:

Նշենք, որ դա Աիշա Քադաֆիի արդեն երկրորդ հայցն է` կապված Լիբիայում ՆԱՏՕ-ի ռազմական գործողությունների հետ:

ԱՄՆ կոնգրեսը նամակ է ստացել Մուամմար Քադդաֆիի անունից: Վերջինս պատրաստակամություն է հայտնում  ԱՄՆ-ի միջնորդությամբ բանակցել ապսամբների հետ: Այս հատվածը Լիբիայի առաջնորդի նամակից մեջբերում է The Washington Post թերթը:

Հավանաբար այս նամակը ՄԱԿ-ի բանաձևի նոր մեկնաբանության արձգանքն էր: Հիշեցնենք, որ այս շաբաթ  ՆԱՏՕ-ի ներկայացուցիչները հայտարարել են, որ ՄԱԿ-ի Անվտանգության Խորհրդի կողմից ընդունված փաստաթուղթը չի բացառում Քադդաֆիի ֆիզիկական ոչնչացումը:

Նամակի ամբողջական  տեքստը թերթը ցավոք չի հրապարակել, սակայն մեջբերել է ևս մի հատված, որում նշվում է, որ Քադդաֆին  կոչ է անում ԱՄՆ-ին ևՆԱՏՕ-ին բանակցել, սակայն, միևնուն ժամանակ, չի խուսափում սպառնալուց:

Ըստ «ՌԻԱ Նովոստի» գործակալության Ֆրանսիայի էկոնոմիկայի եւ ֆինանսների նախարար Քրիստին Լագարդի նկատմամբ կարող է քրեական գործ հարուցվել:

Բանն այն է, որ Ֆինանսների նախարարին կասկածում են պաշտոնեական լիազորությունների չարաշահումների մեջ, որը տեղի է ունեցել  Բեռնար Տապիին 1993թ. Adidas ընկերության վաճառքի ժամանակ:

Լագարդը համարվում է Արժույթի միջազգային հիմնադրամի տնօրենի հիմնական թեկնածուն: Տնօրենի ընտրությունները տեղի կունենան հունիսի 30-ին:

Կարծիք կա, որ ֆրանսիական դատարանը կամ դադարեցնելու է հետապնդումը, կամ քրգործ է հարուցելու, կամ էլ լրացուցիչ տեղեկություններ է պահանջելու:

Առաջին անգամ ՆԱՏՕ-ն հայտարարել է Լիբիայի առաջնորդ Մուամար Քադաֆիին սպանելու իր իրավունքի մասին։ Ընդ որում՝ դաշինքի ներկայացուցիչները հավաստիացնում են, որ Ջամահիրիայի առաջնորդի սպանությունը համապատասխանում է ՄԱԿ-ի Անվտանգության խորհրդի ընդունած բանաձևում ներառված խնդիրներին, քանի որ լիբիացի գնդապետը երկրի «ռազմական ենթակառուցվածքի մաս է» կազմում, գրում է Взгляд-ը։

Հյուսիսատլանտյան դաշինքը, փաստորեն, Քադաֆիի սպանության հավանականությունն օրինականացրել է։ Մինչ այժմ, սակայն, ՆԱՏՕ-ն հերքում էր, որ Քադաֆին դաշինքի թիրախն է։

Եվրամիության 27 պետությունների արտգործնախարարները անժամկետ հետաձգել են Ռումինիայի և Բուլղարիայի` Շենգեն տարածք մուտք գործելու գործընթացը:

Հետաքրքիր է, որ հունիսի 8-ին Եվրախորհրդարանը քվեարկել էր Բուլղարիայի ու Ռումինիայի՝ Շենգեն տարածք մուտք գործելու օգտին: Որոշմանը կողմ էին քվեարկել 487, դեմ՝ 77, ձեռնպահ՝ 29 պատգամավոր:

Եվրախորհրդարանի որոշման հիմքում եղել է Եվրահանձնաժողովի զեկույցը, ըստ որի, Բուխարեստն ու Սոֆիան կատարել են Շենգեն տարածք մուտք գործելու համար բոլոր անհրաժեշտ պարտավորությունները:

Սակայն մեկ օր անց Բրյուսելում որոշ պետությունների պատվիրակությունների անդամներ, մասնավորապես Նիդերլանդներինը,  վաղ են համարել որոշում ընդունելն ու գտել որ անհրաժեշտ է ժամանակ:

Նիդերլանդների միգրացիոն հարցերով նախարար Գերտ Լեեռսը նշել է, որ հարցի հետագա քննարկման համար պարտադիր պայման պետք է լինի Բուլղարիայի և Ռումինիայի իշխանությունների կողմից իրավական լայնածավալ բարեփոխումների իրականացումը:

Նրա տեսակետը կիսում են  նաև Ֆրանսիան և Գերմանիան: Ավելի վաղ այս երկրների պատվիրակությունների անդամները ևս կարծիք էին հայտնել, որ թեկնածու երկրներում դեռևս մեծ են կոռուպցիայի ու կազմակերպված հանցավորության ծավալները: