BBC հեռուստաալիքը  տեղեկացնում է, որ ԱՄՆ պետքարտուղարությունը  կոչ է արել Ռուսաստանին համատեղ աշխատանք սկսել ՄԱԿ-ի Անվտանգության խորհուրդ ներկայացված Սիրիայի հարցով բանաձևի շուրջ:

Պետքարտուղարության պաշտոնական ներկայացուցիչ Վիկտորյա Նուդանդի խոսքերով  Հիլարի Քլինթոնը երեկ հեռախոսազրույց է ունեցել ՌԴ արտգործնախարար Սերգեյ Լավրովի հետ, որի ընթացքում քննարկվել է հենց վերոնշյալ  հարցը: Նուդանդն ընդգծել է, որ Քլինթոնը փորձել է  աշխատեցնել ՄԱԿ-ին ներկայացված բանաձևը, որը  դատապարտում է  Սիրիայի իշխանությունների գործողություններն ընդդեմ խաղաղ բնակիչների:

Հիշեցնենք, որ Սիրիայում չեն դադարում բախումները կառավարական զորքերի և հակակառավարական ցույցերի մասնակիցների միջև: Երեկ տեղի ունեցած բողոքի ակցիաների ժամանակ կրկին գրանցվել են զոհեր:

Reuters գործակալության տեղեկությունների համաձայն զոհվել է առնվազն 16 մարդ:

Ադրբեջանական APA գործակալությունը տեղեկացնում է, որ   ՆԱՏՕ-ի գլխավոր քարտուղար Անդերս Ֆոգ Ռասմուսենը հանդիպել է ՆԱՏՕ-ին կից Ադրբեջանի ներկայացուցչության ղեկավար, դեսպան Խազար Իբրահիմին։
Ռասմուսենը հանդիպման ընթացքում նշել է, որ բարձր է գնահատում ՆԱՏՕ-ի ու Ադրբեջանի ակտիվ համագործակցութունը՝ մասնավորապես Աֆղանստանում Միջազգային անվտանգության աջակցության ուժերի (ISAF) գործողություններում Ադրբեջանի ներդրումը։
Ռասմուսենը ցանկություն է հայտնել, որ ՆԱՏՕ-ի ու Ադրբեջանի գործընկերությունը հետագա զարգացում ունենա։
Հիշեցնենք, որ հունիսի 9-ին Ադրբեջանի պաշտպանության նախարար, գեներալ-գնդապետ Սաֆար Աբիևը Բրյուսելում գտնվող ՆԱՏՕ-ի շտաբ-կայանում մասնակցել էր ՆԱՏՕ-ի անդամ երկրների պաշտպանության նախարարների համաժողովին, որին մասնակցել են նաև ՆԱՏՕ-ի անդամ չհանդիսացող, սակայն Աֆղանստանում ISAF-ի գործողություններում ներդրում ունեցող երկրների պաշտպանության նախարարները։

Reuters գործակալության տեղեկություններով, Գերմանիայի և Ֆրանսիայի առաջնորդները համատեղ ասուլիսում հայտարարել են, որ Հունաստանը կրկին շտապ ֆինանսական օգնության կարիք ունի, հակառակ դեպքում եվրոպական արտարժույթի անկում կդիտվի:

Գերմանիայի կանցլեր Անգելա Մերկելի և Ֆրանսիայի նախագահ Նիկոլա Սարկոզիի համատեղ մամուլի ասուլիսին հաջորդել են  երկկողմ բանակցությունները Բեռլինում: Երկու երկրների նախագահները նշել են, որ ԵՄ-ն նաև ակնկալում է մասնավոր ներդրողների օգնությունը Աթենքին տրամադրվող փաթեթի համաձայնեցման ժամանակ:

Հիշեցնենք, որ Հունաստանի կառավարությունը  պաշտոնապես հայտարարել է տեղափոխությունների և հրաժարականների մասին: Վերոնշյալ քայլերը պայմանավորված են երկրում աճող դժգոհություններով, ինչպես նաև բախումներով, որ պարբերաբար տեղի են ունենում երկրի տարբեր մասերում:

France Presse գործակալությունը, ինչպես նաև Սաուդյան Արաբիայի իշխանությունները  տեղեկացնում են, որ Եմենի նախագահ Ալի Աբդալլահ Սալեհը, ով բուժման նպատակով գտնվում է Էր Ռիյադում, չի պատրաստվում վերադառնալ հայրենիք:

Հիշեցնենք, որ հակակառավարական ցույցերը Եմենում շարունակվում են փետրվարի սկզբից: Հատկապես այս  շաբաթ լուրջ բախումներ են տեղի ունեցել  կառավարական ուժերի և ապստամբների միջև:

Հունիսի 3-ին Սանայում` նախագահական նստավայրի մերձակայքում գտնվող մզկիթի ռմբահարման ժամանակ Սալեհը վիրավորվել էր և տեղափոխվել Սաուդյան Արաբիա:

РБК-ն տեղեկացնում է, որ ՅՈՒԿՕՍ-ի նախկին ղեկավար Միխայիլ Խոդորկովսկուն Վոլոգդայի շրջանի մեկուսարանից տեղափոխել են Կարելիայի Հանրապետություն։ Այս տեղեկությունը լրատվամիջոցը ստացել է Պատիժների իրականացման դաշնային ծառայության շրջանային վարչության աղբյուրից:

Այս լուրերը պաշտոնապես չեն հաստատվել: Ի դեպ, նման լուրերի տարածումը հնարավոր է միայն դատապարտյալի համաձայնությամբ:

Associated Press-ի հաղորդմամբ, Ալ Քաիդայի առաջնորդ Ուսամա բեն Լադենի սպանությունից հետո կազմակերպության ղեկավարը դարձել է նրա նախկին տեղակալ, եգիպտացի Այման ալ Զավահիրին:

Ըստ Սաուդյան Արաբիայի «Ալ Վաթան»  թերթի, չի բացառվում, որ Այման ալ Զավահիրին աջակցած լինի աշխարհի թիվ մեկ ահաբեկչի վերացման գործին, քանի որ նրանց միջև վերջին շրջանում բազմաթիվ  տարաձայնություններ էին ծագել:

Մինչ Ալ Քաիդայի հիմնադրումը՝ ալ Զավահիրին «Իսլամական ջիհադ» խմբավորման ղեկավարն է եղել: ԿՀՎ-ի տվյալներով, Զավահիրին է կազմակերպել 1998 թ. Տանզանիայում ու Քենիայում ԱՄՆ դեսպանատների պայթեցումը, ինչի հետևանքով առնվազն 200 մարդ զոհվեց:

Այման ալ Զավահիրիի գտնվելու վայրը հայտնելու դիմաց ԱՄՆ-ն 25 մլն դոլար պարգև է խոստացել:

ՌԻԱ Նովոստի գործակալությունը տեղեկացնում է, որ Լիբիայի մայրաքաղաք Տրիպոլիում՝ նախագահ Մուամար Քադաֆիի նստավայրի մերձակայքում այսօր առավոտյան հզոր պայթյունների շարք է որոտացել:

Նստավայրի վերևում տեսանելի է եղել ծխի բարձրացող սյունը։ Պայթյունների պատճառը դեռևս անհայտ է: Նախնական տվյալներով, Տրիպոլիիի կենտրոնին հարվածել են ՆԱՏՕ-ի ուժերը։

Հիշեցնենք, որ ՆԱՏՕ-ի օդային ուժերն առաջին  անգամ չէ, որ ավիահարձակումներ են գործում Տրիպոլիի կենտրոնում տեղակայված Քադաֆիի նստավայրի վրա։

Լիբիական հակամարտության կողմերիից ոչ մեկը դեռևս չի մեկնաբանել այս միջադեպը։

Պակիստանի հատուկ ծառայություններին հաջողվել է ձերբակալել այն անձանց, ովքեր մի քանի ամիս շարունակ տեղեկություններ են տրամադրել ամերիկյան հատուկ ծառայությանը, ինչի շնորհիվ վնասազերծվեց «Ալ Քաիդայի» ղեկավար Ուսամա Բեն Լադենը, գրել է The New York Times թերթը:

Ամերիկացի պաշտոնյաները հայտարարել են, որ ձերբակալվել է 5 մարդ, որոնց մեջ է նաև Պակիստանի բանակի մի սպա, որը  ԿՀՎ-ին հայտնում էր այն մեքենաների պետհամարանիշերը, որոնք այցելում էին Աբոթաբադում գտնվող Բեն Լադենի տուն: Մնացած ձերբակալվածների մասին դեռևս տեղեկություն չկա:
Թերթի տեղեկություններով՝ ԿՀՎ-ի հետ համագործակցողների ճակատագիրը դեռևս հայտնի չէ:

Պաշտոնական Վաշինգտոնը Պակիստանի հատուկ ծառայությունների այս քայլը համարում է տարիների ընթացքում «Ալ Քաիդա»-ի դեմ պայքարի երկարատև համագործակցության վերջնական խզում:
Հիշեցնենք, որ ԱՄՆ-ը Պակիստանից գաղտնի էր պահում մայիսի 2-ին Բեն Լադենի դեմ ծրագրած օպերացիան: Վաշինգտոնը բազմիցս մեղադրել է Իսլամաբադին՝ ահաբեկիչներին թաքցնելու համար, և հենց այդ պատճառով համարում էր, որ պակիստանցիներին տեղեկացնելու դեպքում օպերացիան կտապալվեր:

Աֆղանստանի Վարդակ նահանգի ոստիկանության ուսումնական կենտրոնում պայթյուն է տեղի ունեցել: Նախնական  տվյալներով, տուժածներ չկան:

Ինչպես հայտնում է տեղի հեռուստաալիքը, այդ պահին շենքում գտնվում էին Աֆղանստանի փոխնախագահ Կարիմ Խալիլին և Ներքին գործերի նախարար Բիսմիլլա Մոհամմադին: Միջադեպից անմիջապես հետո նրանք դուրս են եկել շենքից:

Ենթադրվում է, որ հրթիռն արձակվել է հեռավոր տարածությունից և պայթել շենքի մոտակայքում:

Ղազախստանի նախագահ Նուրսուլթան Նազարբաեւը հրամանագիր է ստորագրել օգոստոսի 19-ին սենատի պատգամավորների ընտությունների վերաբերյալ:

Ըստ երկրի օրենսդրության, պատգամավորների թեկնածուների առաջադրման գործընթացը կսկսի ընտրությունների հայտարարման հաջորդ օրվանից եւ կավարտվի հուլիսի 19-ին:

Նշենք, որ Ղազախստանի սենատը ներառում է 47 պատգամավոր, որից 32-ը ընտրում է հանրապետության 16 շրջաններից, իսկ 15-ը նշանակում է երկրի ղեկավարը: