Voanews.com  կայքի հաղորդմամբ, ԱՄՆ նախագահ Բարաք Օբաման կոնգրեսականներին 36 ժամ է տվել` պետական պարտքի շեմը բարձրացնելու շուրջ համաձայնության հասնելու համար: Հենց այդ որոշումից է կախված` օգոստոսի սկզբին ԱՄՆ-ը դեֆոլտ կհայտարարի՞ իր արտաքին պարտավորությունների մասով, թե՞ ոչ:

Moody’s-ի վարկանիշային գործակալության օրինակին հետևել է նաև միջազգային վարկանիշային Standard & Poor’s գործակալությունը` նույնպես հայտարարելով, որ մինչև հուլիսի վերջը կարող է իջեցնել ԱՄՆ-ի վարկային նիշը, եթե մինչև օգոստոսի 2-ը ձեռք չբերվի պետական պարտքի վերին շեմի բարձրացման համաձայնությունը։

Գործակալությունը նաև հայտարարել է, որ ԱՄՆ-ի վարկանիշը կնվազեցվի նաև այն դեպքում, եթե Կոնգրեսը և Սենատը չընդունեն ծախսերի կրճատման ծրագիրը, որը մշակել է նախագահ Բարաք Օբամայի վարչակազմը։

Այս ծրագրի ընդունման պարագայում Միացյալ Նահանգների բյուջեի ծախսերը առաջիկա 10 տարում կկրճատվեն 4 տրիլիոն դոլարով:

Այս պահին ԱՄՆ պետպարտքը գերազանցում է 14,29 տրլն-ը, ինչը խիստ բացասաբար է ազդում նախագահ Բարաք Օբամայի վրա: Հիշեցնենք, որ չորեքշաբթի Բարաք Օբաման «շրխկացրել է դուռը»՝ ընդհատելով դեմակրատների և հանրապետականների բուռն քննարկումը։ Նա հրաժարվել է ընդունել հանրապետականների մեծամասնության ղեկավար Էրիկ Կանտորի առաջարկը՝ վերին շեմի կարճաժամկետ բարձրացում (ընդամենը մի քանի հարյուր միլիարդով)։ Օբաման ցանկանում է Սենատում անցկացնել այնպիսի շեմ, որ մինչև ընտրություններն այլևս չանդրադառնան այդ հարցին։

Հանրապետականներին համոզելու համար որպես հիմնավորում նա ասել է նաև, որ օգոստոսի 3-ին կարող է դադարեցվել հաշմանդամների և պատերազմի մասնակիցների նպաստների վճարումը, քանի որ գանձապետարանում գումար չի լինի։

ԱՄՆ պետքարտուղար Հիրալի Քլինթոնը ժամանել է Թուրքիա։  Վերջինս  մասնակցելու է Ստամբուլում կայանալիք Լիբիայի հարցով կոնտակտային խմբի հանդիպմանը։

Այցի ընթացքում ԱՄՆ պետքարտուղարը հանդիպումներ է ունենալու Թուրքիայի նախագահ Աբդուլլահ Գյուլի, վարչապետ Ռեջեփ Թայիփ Էրդողանի, ինչպես նաև  արտգործնախարար Ահմեթ Դավութօղլուի հետ։

Ակնկալվում է, որ հանդիպումների ընթացքում կողմերը  կքննարկեն Լիբիային և Սիրիային վերաբերող հարցերը։

ԱՄՆ երկրաբանական ծառայությունը տեղեկացնում է, որ հուլիսի 14-ին 4,9 մագնիտուդով երկրաշարժ է տեղի ունեցել ճապոնական Հոնսյու կղզու արևելյան ափին:

Երկրաշարժի էպիկենտրոնը գտնվել է Հոնսյու կղզու Սենդայ քաղաքից 77 կմ դեպի հյուսիս-արեւելք, վթարային «Ֆուկուսիմա-1» ատոմակայանից 140 կմ հեռավորության վրա: Օջախը գտնվել է 73,3 կմ խորության տակ:

Զոհերի, ավերածությունների, ինչպես նաև  ցունամիի առաջացման վտանգի մասին տեղեկություններ դեռևս չկան:

«Բի–ԲԻ–Սի»– ն հաղորդում է, որ Լոնդոնի Գերագույն դատարանը հետաձգել է WikiLeaks–ի հիմնադիր Ջուլիան Ասանժին Շվեդիային արտահանձնելու գործով դատավճռի հրապարակումը: Հիշեցնենք, որ Ասանժին մեղադրում են մի շարք սեռական բնույթի հանցագործությունների, այդ թվում՝ բռնաբարության մեջ:

Ասանժի փաստաբանները խոստովանել են, որ իրենց պաշտպանյալի վերաբերմունքը երկու շվեդ կանանց նկատմամբ կարելի է «անհարգալից, կոպիտ ու վրդովեցուցիչ» անվանել, բայց ոչ անօրինական։ Բան այն է որ, Ասանժի դատապաշտպաների հավաստմամբ կանայք ըմբոստացել են, երբ Ասանժը հրաժարվել է պահպանակ օգտագործել, իսկ մինչ այդ կանայք դեմ չեն եղել սեքսին:Նիստի ընթացքում Ասանժը որևէ կերպ չի արտահայտել իր վերաբերմունքը:

Դատավոր լորդ Թոմասն այդպես էլ որոշում չի կայացրել և կողմերի փաստարկները քննարկելու համար ժամանակ է պահանջել:Նա ինչպես հաղորդում է «Բի–ԲԻ–Սի»– նշոկի մեջ է հայտնվել պաշտպանական կողմի սեքսուալ տեսարանների մանրամասն նկարագրություններից:

Հիշեցնենք, որ Ասանժը ազատ է արձակված 240 հազար ֆունտ ստեռլինգի դիմաց:

Reuters գործակալությունը տեղեկացնում է, որ  հուլիսի 13-ին Բրազիլիայում տեղի է ունեցել ավիավթար, որի հետևանքով զոհվել է 16 մարդ՝ 14 ուղևոր և անձնակազմի երկու անդամ:

Noar Linhas Aereas ավիաընկերությանը պատկանող ինքնաթիռը, որը  կատարում էր Ռեսիֆի-Նատալ ուղղությամբ չվերթը, թռիչքից անմիջապես հետո տեխնիկական խնդիրներ է ունեցել: Թռիչքից 10 րոպե անց օդաչուները փորձել են վայրէջք կատարել լողափերից մեկում, սակայն ինքնաթիռն ընկել է և այրվել:

France Presse գործակալության տվյալներով, օդաչուներին հաջողվել է սխրանք գործել, քանի որ վտանգը մեծ է եղել, որ ինքնաթիռը կընկնի խիտ բնակեցված շրջանի վրա:

Lenta.ru կայքը տեղեկացնում է, որ հոկտեմբերին Լիբիայում սննդի և ջրի պակաս կզգացվի: Նման հայտարարությամբ հանդես է եկել Ջամահիրիայի գյուղատնտեսության, անասնապահության և ծովային ռեսուրսների նախարար Աբդել ալ Գաուդը: Ըստ նրա, երկրում հավաքվել է միայն բերքի 20 տոկոսը, քանի որ քաղաքացիական պատերազմների մեջ մխրճված Լիբիայում գյուղտեխնիկայի համար վառելիք չի մնացել:

Նախարարը նաև ընդգծել է, որ պարենամթերքի պաշարների անբավարարության վրա բացասական ազդեցություն են ունեցել նաև միջազգային հանրության պատժամիջոցները:

Իսկ «Associated Press» գործակալության տվյալներով`  բնակչության 70%-ին ջրով ապահովող գործարանում վեց տուրբիններից աշխատում է միայն մեկը, քանի որ ոչ ոք չի զբաղվում շարքից դուրս եկած սարքավորումներով:

ՄԱԿ-ին և ՆԱՏՕ-ին նախարարը կոչ է արել հանել սահմանափակումը գործարանի սարքավորումների մատակարարման նկատմամբ:

Իտալիայի վարչապետ Սիլվիո Բեռլուսկոնիի սեքսուալ սկանդալների գլխավոր «հերոսուհի» Քարիմա ալ Մարուգը, որն առավել հայտնի է Ռուբի մականվամբ, հայտարարել է, որ հղի է։

Ըստ իտալական լրատվամիջոցների` հյուսիսաֆրիկացի պարուհին վստահ է, որ տղա է ունենալու:

Globalist.org.ua կայքի հաղորդմամբ, Ռուբին սկզբում ասել է, թե ապագա երեխայի հայրն իր ներկայիս զուգընկեր Լուկա Ռիցցոն է, սակայն որոշ ժամանակ հետո հավելել է, որ չի կարող  հստակ ասել, թե ով է իր ապագա երեխայի հայրը։ Ռուբիի խոսքով՝ հավանական հայրերից մեկը հենց Բեռլուսկոնին է։

Հիշեցնենք, որ Իտալիայի դատախազության տվյալներով՝ Ռուբին մասնակցել է Սիլվիո Բեռլուսկոնիի առանձնատանը տեղի ունեցած սկանդալային սեքս-երեկույթներին: Այդ ժամանակ պարուհին դեռևս անչափահաս էր:  Ընդ որում, 74-ամյա Բեռլուսկոնին առնվազն 13 անգամ ինտիմ հարաբերություն է ունեցել Ռուբիի հետ:

ԻՏԱՌ-ՏԱՍՍ գործակալության հաղորդմամբ, ճապոնական Ֆուկուսիմա նահանգից ոչ հեռու հուլիսի 13-ին 5,3 մագնիտուդով երկրաշարժ է տեղի ունեցել:

Ճապոնիայի ազգային օդերևութաբանական վարչությունը տեղեկացրել է, որ էպիկենտրոնը գտնվել է Խաղաղ օվկիանոսի ափամերձ հատվածում: Նախնական տվյալներով, զոհեր և ավերածություններ չկան, ցունամիի առաջացման վտանգի մասին նախազգուշացում չի արվել:

Վերջին օրերի ընթացքում սա արդեն երկրորդ երկրաշարժն է Հոնսյու կղզում: Սեյսմոլոգների կանխատեսմամբ` տարածաշրջանում սեյսմիկ ակտիվությունը կպահպանվի առաջիկա 6-12 ամիսների ընթացքում:

ԻՏԱՌ-ՏԱՍՍ գործակալության հաղորդմամբ,  «Թալիբան» շարժումը ստանձնել է Աֆղանստանի նախագահ Համիդ Քարզայի եղբոր` Ահմադ Վալի Քարզայի սպանության պատասխանատվությունը: Շարժման ներկայացուցիչներից  մեկը հայտնել է նաև մարդասպանի անունը, ում հանձնարարված է եղել վերացնել Ահմադ Վալի Քարզային:

Թալիբներն այս սպանությունը վերջին 10 տարվա ամենամեծ ձեռքբերումներից մեկն են անվանել:

Ավելի ուշ լրատվամիջոցները հայտնել են, որ Ահմադ Վալի Քարզային սպանել է սեփական թիկնազորի պետ Մոհամմադ Սարդարը: Նա Քարզայի վրա կրակել է Կալաշնիկովի ավտոմատից: Երկու գնդակ դիպել է նախագահի եղբոր կրծքին և որովայնին, ինչից հետո նա մահացել է: Կրակողին անմիջապես սպանել են մյուս թիկնապահները:

Ըստ France Presse գործակալության տեղեկությունների,  Աֆղանստանի Ղանդահար նահանգում սպանել են այդ երկրի նախագահ Համիդ Քարզայի հարազատ եղբորը՝ Ահմեդ Վալի Քարզային:

Տեղական լրատվամիջոցները տեղեկացրել են, որ անհայտ անձը կրակ է բացել ատրճանակից, ինչի հետևանքով Ահմեդ Վալի Քարզան տեղում մահացել է:

Հիշեցնենք, որ ԱՄՆ կենտրոնական հետախուզական վարչությունը պնդում էր, որ Աֆղանստանի նախագահի կրտսեր եղբայրը նարկոբարոն է: