Ռուսաստանի դեմ ԵՄ-ի տնտեսական պատերազմը ոչնչով չի օգնում Ուկրաինայի անմեղ քաղաքացիներին, այդ անօրինական պատերազմի զոհերին։ Այս մասին ասել է Իռլանդիայից Եվրախորհրդարանի պատգամավոր Քլեր Դեյլին։

Նրա խոսքով՝ պատժամիջոցները Ռուսաստանի դեմ «ստիպում են տառապել ոչ թե օլիգարխներին, այլ ժողովրդին»։ «Ռուսաստանին դա չի վախեցնում, այն դեպքում, երբ ԵՄ-ի քաղաքացիները բախվում են աղետալի գնաճի, էներգիայի գների սրընթաց աճի եւ կենսամակարդակի պատմական նվազման խնդիրներին։ Սա խելահեղություն է…»։

«Պատերազմը խաղաղությո՞ւն է։ Ավելի՛ շատ զենք, պատժամիջոցներ, ավելի շատ ավերածություններ համընդհանուր կոչերը վերացնում են այս պատերազմին վերջ դնելու բոլոր շանսերը։ Եվրախորհրդարանի պատգամավոր Անգել Ջամբազկին, որը սրանից մեկ օր առաջ տուգանվել էր խորհրդարանում նացիստական ողջույնի համար, կասկածի տակ է դրել հակապատերազմական քաղաքականության բարոյախոսությունը։ Ես այդպես չեմ կարծում»։

Մոսկվայում Հայաստանի և Ռուսաստանի ԱԳ նախարարներ Արարատ Միրզոյանի ու Սերգեյ Լավրովի համատեղ մամուլի ասուլիսի ժամանակ Լավրովը լրագրողի խնդրանքով անդրադարձել է ԵԱՀԿ Մինսկի խմբի համանախագահների գործունեությանը՝ հայտարարելով, որ չգիտի՝ ինչպիսին կլինի դրա ապագան, քանի որ այդ խմբի շրջանակում այսպես կոչված «ամերիկացի և ֆրանսիացի գործընկերները», ռուսատյացության տենդով տարված, չեղարկել են նաև ԵԱՀԿ ՄԽ եռանախագահությունը՝ հայտարարելով, որ իրենք ՌԴ-ի հետ չեն շփվի այդ ձևաչափում:

«Դա նրանց իրավունքն է, եթե նրանք պատրաստ են զոհաբերել Ղարաբաղի և ամբողջ Անդրկովկասի կարգավորման հարցում շահերը, եթե պատրաստ են զոհաբերել տվյալ պարագայում հայկական կողմի շահերը, ապա դա իրենց ընտրությունն է։ Այս մոտեցումը համարում ենք անպատասխանատու, սակայն դա մեզ հունից չի հանի։ Մենք հավատարիմ ենք ղարաբաղյան իրավիճակի կարգավորմանը և այն բոլոր պայմանավորվածությունների իրականացմանը, որոնք ձեռք են բերվել եռակողմ ձևաչափով Հայաստանի, Ադրբեջանի և Ռուսաստանի Դաշնության ղեկավարների միջև։ Այս ընտրությունը մերը չէ։ Եթե Ֆրանսիան և Միացյալ Նահանգները որոշել են այդպես վարվել, Աստված նրանց դատավոր»,- ասել է Լավրովը:

Ռուսական բանակն ամբողջությամբ դուրս է բերվել Ուկրաինայի Կիևի և Չեռնիգովի շրջանների տարածքից. լրագրողներին հայտնել է Պենտագոնի խոսնակ Ջոն Քիրբին։

«Մենք չենք տեսնում ռուսական զորքերը Կիևում, Չեռնիգովում կամ երկու քաղաքների մոտ»,- նրան մեջբերում է BBC-ի ռուսական ծառայությունը։

Միևնույն ժամանակ, Ուկրաինայի գլխավոր շտաբը հայտնել է, որ այժմ Ռուսաստանի զինված ուժերի հիմնական ջանքերը կենտրոնացած են Ուկրաինայի արևելքում հարձակման նախապատրաստվելու վրա, որի նպատակն է լիակատար վերահսկողություն հաստատել Դոնեցկի և Լուգանսկի շրջանների տարածքների վրա։ 

Կրեմլը Կիևից զորքերի դուրսբերուը որակել է որպես բարի կամքի ժեստ՝ խաղաղ բանակցությունների համար բարենպաստ պայմաններ ստեղծելու համար։ Ըստ ՌԴ նախագահի մամուլի քարտուղար Դմիտրի Պեսկովի՝ զորքերը դուրս բերելու հրամանը տվել է անձամբ Վլադիմիր Պուտինը։

Պենտագոնի ներկայացուցիչները չեն բացառում, որ ապագայում ռուսական զորքերը կարող են վերադառնալ Կիև։ Նրանք Կիևի և Չեռնիգովի շրջաններից դուրս բերված զորքերի թիվը գնահատել են 24000 զինծառայող։

Չորեքշաբթի օրը Ռուսաստանի եւ Ուկրաինայի միջեւ ռազմագերիների փոխանակում տեղի չի ունեցել, Մոսկվան պատրաստ է եղել փոխանցել 251 մարդու, հայտարարել է ՌԴ Պաշտպանության ազգային կառավարման կենտրոնի ղեկավար գեներալ-գնդապետ Միխայիլ Միզինցեւը, փոխանցում է «Ինտերֆաքսը»։

«Կիեւի իշխանությունները երկար ժամանակ խափանում են ռազմագերիների փոխանակումը, ընդ որում՝ նախապես համաձայնեցված պայմաններով։ Ռազմագերիների այսօր նախատեսված փոխանակումը նույնպես խափանվել է ուկրաինական կողմից»,- ասել է Միզինցեւը։

Նրա խոսքով, օրվա ընթացքում փոխանակման համար հայտարարված 251 զինծառայողների ցուցակը բազմիցս ճշտվել է, հետագայում կրճատվել է մինչեւ 38 զինծառայող, իսկ այսօր «առավոտյան առանց բացատրության մերժվել է ուկրաինական կողմից»։

«Միեւնույն ժամանակ, Ռուսաստանի Դաշնության կողմից ուկրաինացի ռազմագերիների նախապատրաստումը 251 ուկրաինացի զինծառայողների մեծ ցուցակով իրականացվել է ամբողջությամբ՝ ներառյալ նրանց ուղարկումը նախնական տարածք՝ փոխանակման համար»,- ասել է նա։

Ադրբեջանի նախագահ Իլհամ Ալիեւը հաստատել է «Ադրբեջանի կառավարության եւ Իրանի կառավարության միջեւ փոխըմբռնման հուշագիրն Արեւելյան Զանգեզուրի տնտեսական շրջանի եւ Նախիջեւանի Ինքնավար Հանրապետության միջեւ Իրանի միջոցով հաղորդակցության նոր կապերի ստեղծման մասին», հայտնում են ադրբեջանական ԶԼՄ-ները:

Այսպիսով, Ադրբեջանի ղեկավարն «իրավական հիմք» է ստեղծում Հայաստանի նկատմամբ իր տարածքային պահանջների համար՝ միջպետական ​​փաստաթղթում ամրագրելով «Արեւելյան Զանգեզուր» անվանումը։ Հիշեցնենք, որ անվանումը ստեղծվել է 44-օրյա պատերազմից հետո՝ Հայաստանի Սյունիքի մարզով միջանցք ստանալու Ադրբեջանի փորձերի համատեքստում։

Բաքվի եւ Թեհրանի միջեւ փաստաթուղթը ստորագրվել է 2022 թվականի մարտի 11-ին՝ ադրբեջանա-իրանական տնտեսական, առեւտրային եւ հումանիտար համագործակցության միջկառավարական հանձնաժողովի 15-րդ նիստի արդյունքներով:

Նախագծի շրջանակներում նախատեսվում է չորս կամուրջ, երկու ճանապարհ եւ երկու երկաթուղի, ինչպես նաեւ կապի եւ էլեկտրամատակարարման ենթակառուցվածքներ կառուցել։ Ճանապարհի երկարությունը կկազմի 55 կմ։

Փաշինյան-Ալիև հանդիպմանը կարևոր հայտարարություն է սպասվում. այսօր հայտարարել է ՀՀ-ում Լեհաստանի դեսպան Պավել Չեպլակը:

Նրա կարծիքով՝ այդ հայտարարությունը կբարձրաձայնի Վիեննայից ԵԱՀԿ մամուլի քարտուղարը։ «Հուսով եմ՝ դրական կլինի, այս փուլում ինչ-որ բան խոստանալն անիրատեսական կլինի, սպասենք մամուլի քարտուղարի հայտարարությանը»,- նշել է դեսպանը։

Լեհաստանի դեսպանը լրագրողներին հայտնել է նաեւ, որ անձամբ է ներկա գտնվել վերջերս Երեւանում կայացած՝ Հայաստանի վարչապետի եւ Լեհաստանի արտգործնախարար Զբիգնեւ Ռաուի հանդիպմանը։ Դիվանագետի խոսքով՝ Փաշինյանը ցանկացել է առաջարկներ լսել լեհական կողմից և ստացել է հստակ պատասխան: Դեսպանը չհստակեցրեց, թե ինչ առաջարկներ են քննարկվել՝ միայն հավելելով, որ Հայաստանի եւ Ադրբեջանի հետ քննարկվել է ԵԱՀԿ Մինսկի խմբի ձեւաչափի վերականգնման հարցը։

Ադրբեջանի ու Իրանի սահմանին զինված միջադեպ է արձանագրվել, որի ժամանակ ադրբեջանցիները Իրանի քաղաքացու են սպանել։

Ադրբեջանի պետական սահմանային ծառայությունը ներկայացրել է դեպքերի զարգացման իր վարկածը՝ նշելով, թե 6 իրանցի փորձել են հատել Ադրբեջանի պետական սահմանը՝ պնդելով, թե նրանք զինված են եղել։

Միջադեպը տեղի է ունեցել Ջաբրայիլի շրջանի Շիհալիագալի գյուղ մոտ։

Ադրբեջանցիները պնդում են, թե սահմանը խախտողները չեն ենթարկվել «Կանգնիր» հրամանին, եւ սահմանապահ ջոկատը կրակ է բացել և վնասազերծել նրանցից մեկին։

Սպանվածը Իրանի քաղաքացի Բեհնամ Բալային է՝ ծնված 1996 թ.։ նրա մոտ հայտնաբերվել է «Կալաշնիկով» ինքնաձիգ, ինչպես նաև 32 կգ 270 գրամ թմրամիջոց։Ձերբակալվել է փոխհրաձգության ժամանակ փախուստի դիմածներից ևս մեկը՝ Իրանի քաղաքացի Մուհամմեդ Զարեհի Թագին։ Այն հայտնաբերվել է սահմանամերձ գոտում: Մյուս սահմանախախտների որոնողական աշխատանքները շարունակվում են։

Ղրղզստանի  նախագահ Սադիր Ժապարովը հորդորել է ղրղզ ժողովրդին դադարեցնել փողերը վատնել։
Նա այս մասին ասել է սոցիալական աշխատողների հանրապետական ժողովում ելույթի ժամանակ, գրում է ru.sputnik.kg-ն:

«Ես ուզում եմ բացեիբաց դիմել բոլոր ղրղզստանցիներին: Գիտեմ, որ իրավիճակը հիմա բարդ է: Գները բարձրացել են: Գործազրկությունը պահպանվում է: Առաջին անհրաժեշտության ապրանքները չեն բավարարում: Իրավիճակը, կապված վերջին համաշխարհային իրադարձությունների հետ, կարող է իրականում վատթարանալ: Մենք պետք է պատրաստ լինենք դրան»,- ասել է Ժապարովը։

Նա քաղաքացիներին խնդրել է «վերանայել ծախսերը, հետաձգել թանկարժեք իրեր գնելը, խնջույքներ չանցկացնել և դադարեցնել գումար վատնելը»։

«Դուք գիտեք, որ հրամանագրով ես խորհուրդ եմ տվել սահմանափակել անասունների զոհաբերությունը հուղարկավորության ծեսերի ժամանակ»,- ասել է նախագահը։

Ֆրանսիայի Սենատի անդամ, Ֆրանսիա-Հայաստան բարեկամական խմբի փոխնախագահ Վալերի Բուայեն Twitter-ի իր էջում հիշեցրել է, որ 2020 թվականի Արցախյան պատերազմի ընթացքում Ադրբեջանը Թուրքիայի օգնությամբ՝ թուրքական ռումբերի, սպիտակ ֆոսֆորի և ԱԹՍ-ների միջոցով կոտորածի է ենթարկել արցախահայությանը։

«Նրանց մեջ կենդանացել է ցեղասպանի ոգին։ Աշխարհը լուռ հետևում է: Ոտնձգությունները շարունակվում են անտարբերությամբ», – գրել է Վալերի Բուայեն։

Իր գրառումը ֆրանսիացի սենատորը կատարել է՝ կիսվելով ֆրանսիական հեղինակավոր «Le Figaro» ամսագրի փոխտնօրեն, լրագրող Ժան-Քրիստոֆ Բյուսոյի Twitter-յան գրառմամբ։ Բյուսոն անդրադարձել էր Ադրբեջանի կողմից Արցախի Փառուխ գյուղի օկուպացմանը։

«Հարյուրավոր գյուղացիներ, այդ թվում՝ երեխաները, դեռևս իրենց տնից հեռու են ապրում։ Իսկ ադրբեջանական բանակը հետ չի քաշում իր զորքերը, ավելին՝ դեռ ամրապնդում է իր դիրքերը», -գրել է Բյուսոն։

Առնվազն երկու ռուս զինծառայող է մահացել, ևս 28-ը գտնվում է վերակենդանացման բաժանմունքում այն բանից հետո, երբ Ուկրաինայի Խարկովի մարզի Իզյումսկի շրջանի բնակիչները նրանց համար թունավոր կարկանդակ են պատրաստել։ Այս մասին, ինչպես գրում է meduza.io կայքը, հայտարարել է Ուկրաինայի պաշտպանության նախարարության հետախուզության գլխավոր վարչությունը։

«Ուկրաինացիները բոլոր հնարավոր միջոցներով դիմադրում են զավթիչներին։ Ըստ առկա տեղեկությունների՝ Իզյումսկի շրջանի (Խարկովի մարզ) տեղի բնակիչները թունավոր կարկանդակներ են «հյուրասիրել» Ռուսաստանի Դաշնության 3-րդ մոտոհրաձգային դիվիզիայի ռուսներին»,- ասվում է հետախուզության հաղորդագրությունում:

ՌԴ ՊՆ-ն չի մեկնաբանել թունավորված զինվորների մասին ուկրաինական կողմի տվյալները։ Անկախ աղբյուրները դեռ չեն հաստատել այս տեղեկությունը։