Եթե ​​որեւէ մեկը ցանկանում է դրսից միջամտել իրավիճակին Ուկրաինայում եւ ռազմավարական բնույթի վտանգ ստեղծել, ապա հարվածները կայծակնային  կլինեն, հայտարարել է ՌԴ նախագահ Վլադիմիր Պուտինը, փոխանցում է «ՌԻԱ Նովոստի»-ն:

Նրա խոսքով՝ ռազմավարական անվտանգությանը վտանգի դեպքում այդպիսի հարվածների վերաբերյալ բոլոր որոշումներն ընդունված են։ Պուտինը նշել է, որ Ռուսաստանը իրեն սպառնացող վտանգի դեպքում ի պատասխան միջոցնր կօգտագործի, որոնք իր հակառակորդները դեռ չունեն։ «Մենք դրա համար ունենք բոլոր գործիքները, որոնցով հիմա ոչ ոք չի կարող պարծենալ: Իսկ մենք չենք պարծենա. անհրաժեշտության դեպքում պարզապես կօգտագործենք դրանք»,- հայտարարել է նա։

ՌԴ ղեկավարն ընդգծել է, որ Դոնբասում եւ Ուկրաինայում փետրվարի 24-ին մեկնարկած հատուկ ռազմական օպերեցիայի բոլոր առաջադրանքներն անվերապահորեն կկատարվեն՝ «պատմական հեռանկարում Դոնեցկի եւ Լուգանսկի Ժողովրդական Հանրապետությունների բնակիչների, ռուսական Ղրիմի եւ մեր ամբողջ երկրի համար խաղաղություն եւ անվտանգություն երաշխավորելու համար»։

ermenihaber.am-ի փոխանցմամբ՝ Աշխարհի ամենշատ վաճառվող թերթերից մեկի՝ New York Times-ի ապրիլի 25-ի համարում զետեղված գովազդում Մեծ Բրիտանիայի վարչապետ Բորիս Ջոնսոնին կոչ է արվել «արդարություն բերել Հայոց ցեղասպանության հարցում»: Շեշտվել է, որ 1915-1923 թվականներին ցեղասպանվել է 1․5 հայ։

Թերթի նշյալ համարի 5-րդ էջի ստորին հատվածում պատկերված է Ջոնսոնը, նրա վերևում՝ իր Օսմանյան Թուրքիայի վերջին շրջանում կրթության և ներքին գործերի նախարարի պաշտոնը զբաղեցրած Ալի Քեմալի նկարը, որը եղել է Ջոնսոնի հոր պապիկը:

Նկարների մեջտեղում էլ հետևյալ գրությունն է.

«Այս մեծ մարդը քո մեծ պապիկն է: Նա մի թուրք լրագրող ու քաղաքական գործիչ էր: Նրան դավաճան հայտարարեցին այն բանի համար, որ ցանկանում էր պատժել Հայոց ցեղասպանության պատասխանատուներին: Վերջում էլ փողոցում սպանեցին»:

Ներքևի աջ անկյունում էլ զետեղված է Ջոնսոնին ուղղված վերոհիշյալ կոչը՝ «Արդարություն բեր Հայոց ցեղասպանության հարցում»:

Ուշագրավ է, որ թեմային անդրադարձել են նաև թուրքական լրատվամիջոցները՝ նշելով, որ գովազդի պատվիրատուն հայ գործարար Րաֆֆի Մանուկյանն է:

Ոչ ոք չի ուզում, որ երրորդ համաշխարհային պատերազմի սկսվի, եւ Չինաստանը աջակցում է Ուկրաինայի հակամարտության կարգավորմանը դիվանագիտական ճանապարհով։ Այս մասին հայտարարել է Չինաստանի ԱԳՆ պաշտոնական ներկայացուցիչ Վան Վենբինը։

«Ոչ ոք չի ցանկանում, որ երրորդ համաշխարհային պատերազմ սկսվի։ Մենք հուսով ենք, որ համապատասխան կողմերը կկարողանան սառնասրտություն եւ զսպվածություն ցուցաբերել, կանխել լարվածության աճը, հնարավորինս շուտ հասնել խաղաղության եւ խուսափել Եվրոպայի ու աշխարհի համար ծախսերի ավելացումից։

Ներկա պայմաններում բոլոր կողմերը պետք է առաջին հերթին երկխոսություն ու բանակցություններ վարեն՝ հակամարտությունների ընդլայնումն ու երկարաձգումը կանխելու համար։ Միեւնույն ժամանակ, մենք պետք է մտածենք, թե ինչու Եվրոպան «սառը պատերազմի» ավարտից ավելի քան 30 տարի անց կրկին ներքաշվեց աշխարհաքաղաքական հակամարտությունների մեջ, եւ այն մասին, թե ինչպես կառուցել հավասարակշռված, արդյունավետ եւ կայուն եվրոպական անվտանգության ճարտարապետություն եւ ինչպես ամրապնդել անվտանգության կառավարման գլոբալ համակարգը»,- ասել է դիվանագետը։

Թուրքիայի միջերկրածովյան Հաթայ (նախկին Ալեքսանդրետ) նահանգում գտնվող միակ հայկական գյուղի՝ Վաքըֆլըի գյուղապետ Պերճ Քարթունը թուրքական լրատվամիջոցներին իր դժգոհությունն է հայտնել ԱՄՆ-ի նախագահ Ջո Բայդենի Հայոց ցեղասպանության տարելիցի կապակցությամբ հղած ուղերձից: Այս մասին գրում է ermenihaber-ը։

Ըստ թուրքական լրատվամիջոցների՝ Սիրիայի սահմանին գտնվող 120 հոգանոց գյուղական համայնքի հայ ղեկավարն ասել է, որ իրենք հանգիստ ու երջանիկ ապրում են ու համերաշխ են հարևան գյուղերի թուրքմեն, արաբ քրիստոնյա ու ալևի բնակիչների հետ և չեն ցանկանում խառնվել քաղաքականությանը:

Քարթունը դժգոհել է «ցեղասպանության հարցի քաղաքանանացումից» և ցանկություն հայտնել, որ «ժամ առաջ պատմաբաններն իրենց ձեռքը վերցնեն այս գործը»:

Հիշեցնենք, որ Թուրքիայի նախագահ Ռեջեփ Էրդողանը նախօրեին անդրադառնալով Բայդեի ուղերձին ասել էր. «Թուրք և հայ ժողովուրդների միջև թշնամանք հրահրելու համար ցուցադրվող այս կեղծավորության ամենամեծ վնասը հայ համայնքն է կրել և կրելու»։

Թուրքիայի ԱԳ նախարարությունն արձագանքել է ԱՄՆ նախագահ Ջո Բայդենի հայտարարությանը՝ այն որակելով միակողմանի։

Հիշեցնենք, որ այս տարի ևս Բայդենն իր ուղերձում օգտագործել էր «Հայոց Ցեղասպանություն» եզրույթը։

«1915 թ. ապրիլի 24-ին օսմանյան իշխանությունները ձերբակալել են Կոստանդնուպոլսի հայ մտավորականությանն ու հասարակական գործիչներին: Այդպես սկսվել է Հայոց ցեղասպանանությունը՝ 20-րդ դարի ամենասարսափելի, զանգվածային չարագործություններից մեկը: Այսօր մենք ոգեկոչում ենք մեկուկես միլիոն հայերի հիշատակը, որոնք տեղահանվել են, սպանվել բնաջնջման արշավի շրջանակում, եւ սգում ենք այդքան մարդկանց ողբերգական մահը:

 
Մտորելով Հայոց ցեղասպանության մասին՝ հաստատում ենք մեր խոստումը՝ պահպանելու զգոնությունն ատելության կործանարար ազդեցության նկատմամբ՝ դրա բոլոր դրսեւորումներում: Մենք կրկին պարտավորվում ենք խոսել եւ վերջ դնել չարագործություններին, որոնք անբուժելի սպիեր են թողնում աշխարհում: Եվ սգալով այն ամենի համար, ինչ կորսվել է «Մեծ Եղեռնի» ժամանակ, եկեք կրկնապատկենք մեր ջանքերն՝ ուղղված ապաքինմանն ու ավելի լավ, խաղաղ աշխարհի կառուցմանը, որը ցանկանում ենք մեր երեխաների համար: Աշխարհ, որում պահպանվում են մարդու իրավունքները, որտեղ մոլեռանդության եվ անհանդուրժողականության արատները չեն ընդգրկվում մեր առօրյայում եւ որտեղ կարող են ապրել արժանապատիվ ու անվտանգ:

Սա նաեւ հայ ժողովրդի ուժի եւ տոկունության մասին մտածելու պահն է: Վերապրելով Ցեղասպանությունը՝ հայ ժողովուրդը լի էր իր համայնքը եւ իր մշակույթը վերականգնելու վճռականությամբ, հաճախ նոր տներում եւ նոր հողում, այդ թվում՝ Միացյալ Նահանգներում:

Ամերիկահայերը Միացյալ Նահանգների հյուսվածքի կենսական կարեւոր մասն են կազմում: Նրանք մեր երկիրն ավելի ուժեղ ու դինամիկ են դարձնում, թեեւ շարունակում են կրել ողբերգական գիտակցումն այն բանի, թե ինչի միջով են ստիպված եղել անցնել իրենց նախնիները: Մենք ընդունում ենք նրանց ցավը եւ հարգում նրանց պատմությունը:

Այսօր՝ 107 տարի անց, ամերիկացի ժողովուրդը շարունակում հարգել բոլոր հայերին, որոնք զոհվել են Ցեղասպանության հետեւանքով»,- ասված է ԱՄՆ առաջնորդի ուղերձում:

Հայոց ցեղասպանության 107-րդ տարելիցին Թուրքիայի նախագահ Ռեջեփ Թայիփ Էրդողանն ուղերձ է հղել Պոլսո Հայոց պատրիարք Սահակ Մաշալյանին, որում հերթական անգամ խուսափել է պատմական իրողությունն իր իրական անունով կոչելուց և 20-րդ դարասկզբին Օսմանյան կայսրությունում հայերի դեմ իրականացված մեծագույն ոճրագործությունը ներկայացրել է որպես Առաջին աշխարհամարտի տարիներին տեղի ունեցած ցավալի իրողություն։

«Այսօր դուք հավաքվել եք Ստամբուլի Հայոց պատրիարքարանի հարկի տակ՝ ոգեկոչելու Առաջին համաշխարհային պատերազմի դժվարին պայմաններում իրենց կյանքը կորցրած օսմանցի հայերի հիշատակը։ Ես ևս մեկ անգամ հարգանքով ոգեկոչում եմ զոհված օսմանցի հայերին և իմ անկեղծ վշտակցություն հայտնում նրանց ողջ մնացած բարեկամներին»,- ասվում է Էրդողանի ուղերձում։

Ինչպես նախորդ տարիներին, այս տարի ևս Թուրքիայի նախագահը հայտարարել է, թե Առաջին աշխարհամարտի հետ համընկան Օսմանյան կայսրության վերջին տարիները, որոնք «միլիոնավոր օսմանցի զավակների համար տառապանքներով լի ժամանակաշրջան էին»:

Էրդողանը կոչ է արել «անցյալի վերքերը միասին բուժել և մարդկային կապերն էլ ավելի ամրապնդել» ու «միասին կառուցել ապագան»:

«Մեր հարևան Հայաստանի հետ այս նպատակով դրական գործընթաց ենք սկսել: Գիտեմ և շատ կարևորում եմ այն հանգամանքը, որ կարգավորման գործընթացին անկեղծորեն աջակցում են նաև մեր հայկական ծագումով քաղաքացիները, որոնք կողմ են 2 հարևան երկրների միջև սերտ համագործակցությանը»,- հայտարարել է Էրդողանը՝ ակնկալելով, որ Թուրքիայի հայ համայնքը ևս մասնակցություն կունենա այս գործընթացին։

Թուրքիայի խորհրդարանի Ժողովուրդների դեմոկրատական կուսակցության հայազգի պատգամավոր Կարո Փայլանը Հայոց ցեղասպանության 107-րդ տարելիցին ընդառաջ մեջլիսի քննարկմանն է ներկայացրել օրինագիծ, որը ենթադրում է ճանաչել Հայոց ցեղասպանությունը, սահմանել պատասխանատուներին, հանրային վայրերից հեռացնել ցեղասպանության մեղավորների անունները, փոխարենը այդ վայրերը անվանակոչել ցեղասպանությանը ընդդիմացած քաղծառայողների անուններով, տուժածներին և նրանց ընտանիքների անդամներին Թուրքիայի քաղաքացիություն շնորհել: Այս մասին հայտնում է «Ազատությունը»։

«Հայ ժողովրդի Մեծ Եղեռնը դրա իրագործման վայրում՝ Թուրքիայի մեջլիսում պետք է քննարկվի, անվանակոչվի և արդարություն հաստատվի: Եթե դա տեղի ունենա, ապա այլևս կարևոր չի լինի, թե այլ երկրների ղեկավարներն ու խորհրդարանները ինչ կասեն այս հարցի վերաբերյալ: Հայ ժողովրդի վերքը միայն թուրքական հասարակությունը կարող է ամոքել: Հայոց ցեղասպանությունը այս հողերում է իրականացվել, և արդարությունն էլ միայն այստեղ՝ Թուրքիայում կարող է հաստատվել»,- ասված է օրինագծում:

Մեծ Բրիտանիայի վարչապետն ասել է, որ «իրական հավանականություն» կա առ այն, որ Ուկրաինայում պատերազմը կարող է տևել մինչև 2023 թվականի վերջ, հայտնում է BBC-ն։

Նա նման կարծիք է հայտնել՝ պատասխանելով Նյու Դելիում լրագրողների այն հարցին, թե համաձա՞յն է արևմտյան հետախուզության այն գնահատականներին, որ ռազմական գործողությունները կարող են ձգվել մինչև հաջորդ տարվա վերջ։

«Պուտինն ունի հսկայական բանակ»,- ասել է Ջոնսոնը՝ նշելով, որ Ռուսաստանի առաջնորդը գտնվում է «բարդ քաղաքական իրավիճակում, քանի որ աղետալի սխալ է թույլ տվել»։

«Նա կարծես այլ ելք չունի, քան շարունակել մաշել ուկրաինացիներին անվերջ հրետանային ռմբակոծություններով»,- ասել է Մեծ Բրիտանիայի վարչապետը՝ հավելելով, որ Պուտինը չի կարողանա «կոտրել ուկրաինացի ժողովրդի ոգին»։

Իրանի Զինված ուժերի ցամաքային զորքերի հրամանատար, գեներալ Ամիր Քիոմարս Հեյդարին Բանակի օրվա կապակցությամբ հիշեցրել է Ղարաբաղյան պատերազմի ժամանակ տեղի ունեցած «Խայբերիի հաղթողները» իրանական զորավարժությունները՝ կրկնելով, որ Իրանը թույլ չի տա սահմանների փոփոխություն տարածաշրջանում. հայտնում է «Дневник иранского журналиста» հեռագրային ալիքը։

Գեներալ Հեյդարին նշել է. «Ղարաբաղյան պատերազմի օրերին, որը տեղի ունեցավ մեր հյուսիսարևմտյան և ռազմավարական սահմանների մոտ, տեղեկացանք, որ սիոնիստական ռեժիմի ուժերը ներկա են եղել հակամարտող երկրներից մեկում (Ադրբեջանում) և ձգտում են փոխել աշխարհաքաղաքական իրավիճակը տարածաշրջանում։ Ի պատասխան՝ Իրանի Իսլամական Հանրապետության զինված ուժերի գերագույն գլխավոր հրամանատարի հրամանով անցկացվել են «Խայբերի Հաղթանակներ» զորավարժությունները»։

Նա ասել է, որ Իրանը երկու պայման է առաջ քաշել։ Առաջինն այն է, որ տարածաշրջանի երկրների պետական սահմանների փոփոխությունն անընդունելի է Իրանի համար, երկրորդը՝ սիոնիստական ուժերը պետք է հեռանան տարածաշրջանից։

«Մենք տարածաշրջանում մնացինք այնքան ժամանակ, քանի դեռ այդ պահանջները չկատարվեցին։ Այնուամենայնիվ, մենք դեռ տեսնում ենք սիոնիստական շարժումներ տարածաշրջանում», — ասել է Հեյդարին:

Չեչնիայի ղեկավար Ռամզան Կադիրովը Ուկրաինա ներխուժումը ծրագրելիս ՌԴ նախագահ Վլադիմիր Պուտինին խոստացել էր վերացնել Վլադիմիր Զելենսկիին։ Այս մասին НВ ռադիոյին տված հարցազրույցում ասել է Ուկրաինայի ազգային անվտանգության և պաշտպանության խորհրդի քարտուղար Ալեքսեյ Դանիլովը։

«Մեր բարձրագույն ղեկավարության լուծարման վերաբերյալ. պլանը փետրվարի 3-ին ստացել է Կադիրովը՝ Պուտինին այցելելու ժամանակ։ Այս հանդիպման ժամանակ համաձայնեցվել է մեր նախագահի վերացման ծրագիրը, և Կադիրովն իր վրա է վերցրել պարտավորությունը, որ իր խումբը դա կանի»,- ասել է նա։