Չեչնիայի ղեկավար Ռամզան Կադիրովը հայտնել է Կիևը գրավելու և Ուկրաինայի նախագահ Վլադիմիր Զելենսկիին հարցաքննության նկուղում նստեցնելու ցանկության մասին։ Այդ մասին նա ասել է Telegram ալիքում։

«Ես մասնակցել եմ, մասնակցում եմ և մասնակցելու եմ հատուկ ռազմական գործողությանը։ Եվ ես կազատեմ այն մարդկանց, որոնց դուք տանջել եք այս տարիների ընթացքում։ Եթե ինձ մնար, ես վաղուց կվերցնեի Կիևը։ Իսկ Զելենսկին և նմանները կգտնվեին նկուղում՝ հարցաքննությունների համար: Այնպես որ շնորհակալություն հայտնիր Պուտինին, որ թույլ չի տալիս վերցնել Կիևն ու քեզ տեղը տեղին հարցաքննել»,- ասել է Կադիրովը:

Այսպես, Կադիրովը պատասխանել է Ուկրաինայի անվտանգության ծառայության կողմից առաջադրված մեղադրանքներին։ Գործակալությունը նրան մեղադրել է 2022 թվականի փետրվար-մարտին Ուկրաինայի տարածքում ռազմական գործողությունների պլանների մշակմանը մասնակցելու համար։

Օգոստոսի 18-ին Ադրբեջանը դիմել էր Մարդու իրավունքների եվրոպական դատարան (ՄԻԵԴ)՝ խնդրելով պարտավորեցնել Հայաստանին անմիջապես եւ անվերապահ պարտավորեցնելու իր վերահսկողության տակ գտնվող ուժերին եւ կառույցներին դադարեցնելու Բերձոր քաղաքի եւ շրջակա գյուղերի գույքի ոչնչացումը, ներառյալը տների այրումը, եւ տրամադրելու տեղեկատվություն ձեռնարկված միջոցառումների վերաբերյալ:

Միջազգային իրավական հարցերով ՀՀ ներկայացուցչի գրասենյակը հայտնում է, որ օգոստոսի 22-ին ՄԻԵԴ-ը մերժել էր Ադրբեջանի դիմումը եւ արձանագրել, որ բացակայում է նոր միջանկյալ միջոց կիրառելու անհրաժեշտությունը:

Միացյալ Նահանգները նախազգուշացրել է թուրքական ձեռնարկություններին չաշխատել ռուսական ընկերությունների եւ անհատների հետ, որոնք արգելափակող պատժամիջոցների են ենթարկվել, գրում է «Ինտերֆաքս»-ը՝ վկայակոչելով The Wall Street Journal-ը։

Թուրքական ընկերությունները, որոնք համագործակցում են SDN List-ի ռուս ֆիգուրանտների հետ, կարող են իրենք հայտնվել պատժամիջոցների ցուցակում։ Այս մասին ասվում է ԱՄՆ ֆինանսների փոխնախարար Ուոլլի Ադեյեմոյի՝ Թուրքիայում Ամերիկյան Առեւտրային պալատին ուղղված նամակում, որը հայտնվել է WSJ-ի տրամադրության տակ։ Համանման բովանդակությամբ փաստաթուղթ ուղարկվել է թուրքական խոշորագույն TUSIAD բիզնես ասոցիացիային։
Մասնավորապես, նախազգուշացրել է Ադեյեմոն, սահմանափակումների տակ կարող են հայտնվել այն բանկերը, որոնք թղթակցային հարաբերություններ են պահպանում  SDN List-ից ռուսական վարկային հաստատությունների հետ։

ԱՄՆ իշխանությունների գրավոր նախազգուշացումը Թուրքիայի վրա ճնշումների նոր մակարդակ է, որը կոշտ պատժամիջոցների սահմանումից հետո «անվտանգ ապաստարան է դարձել է ռուսական կապիտալի համար»։

Անցյալ ուրբաթ ԱՄՆ գանձապետարանը հաղորդագրություն էր տարածել Ադեյեմոյի՝ թուրք գործընկերոջ հետ ունեցած զրույցի մասին, որում ոչ միայն նշվում է, որ քննարկվել է պատժամիջոցների օրակարգը, այլ նաեւ ուղղակի քննադատություն է պարունակվում Անկարայի հասցեին, նշում է պարբերականը։ «Ադեյեմոն մտահոգություն է հայտնել առ այն, որ ռուս իրավաբանական եւ ֆիզիկական անձինք փորձում են օգտագործել Թուրքիան՝ ԱՄՆ-ի եւ 30 այլ երկրների կողմից սահմանված պատժամիջոցները շրջանցելու համար», — նշել է ֆինանսների նախարարությունը։

WSJ-ի տվյալներով՝ ԱՄՆ իշխանություններն այժմ ջանքեր են գործադրում ընդհանուր առմամբ արդյունավետությունը բարելավելու եւ Ռուսաստանի դեմ պատժամիջոցների ռեժիմում առկա բացերը փակելու, ինչպես նաեւ սահմանափակումներ մտցնելու համար նրանց նկատմամբ, ովքեր նպաստում են պատժամիջոցներից խուսափելուն։

Քաղաքագետ, միջազգայնագետ Սուրեն Սարգսյանը գրում է.

«Նոյեմբերի 8-ին ԱՄՆ-ում միջանկյալ ընտրություններ են: Կոնգրեսն այժմ ամբողջությամբ դեմոկրատների ազդեցութան տակ է: Նոյեմբերի 8-ի ընտրությունները կենաց մահու կռիվ է լինելու հանրապետականների և դեմոկրատների միջև, քանի որ դրանց արդյունքները լուրջ հիմքեր են դնելու 2024թ. նախագահական ընտրութունների համար՝ այդ թվում Թրամփի վերադարձի առումով:

Հայ ընտրողներն ԱՄՆ-ում շուրջ 1 միլիոն են:

Դեմոկրատական վարչակազմն ու օրենսդիրը յուրաքանչյուր հայկական ձայնի համար պայքարելու է: Գալու են մեր դուռը՝ ձայն խնդրելու: Հիշեցնելու են Ցեղասպանության ճանաչման փաստը, տալու են նոր խոստումներ:

Եվ առաջինը Նենսի Փելոսին է գալու»։

Ուկրաինայում ԱՄՆ դեսպանատունը տարածել է հաղորդագրություն, որում ասվում է, որ Պետքարտուղարությունը տեղեկություններ ունի, որ Ռուսաստանն ուժեղացնում է ջանքերը՝ առաջիկա օրերին Ուկրաինայի քաղաքացիական ենթակառուցվածքներին և կառավարական օբյեկտներին հարվածներ հասցնելու ուղղությամբ։ 

«Ուկրաինայում ռուսական հարվածները շարունակական սպառնալիք են խաղաղ բնակչության և քաղաքացիական ենթակառուցվածքների համար: ԱՄՆ դեսպանատունը կոչ է անում ԱՄՆ քաղաքացիներին այժմ լքել Ուկրաինան՝ օգտագործելով մասնավոր ցամաքային տրանսպորտային միջոցները, եթե դա անվտանգ է», — ասվում է հաղորդագրությունում:

ՌԴ Անվտանգության դաշնային ծառայությունը բացահայտել է լրագրող Դարիա Դուգինայի սպանությունը, հաղորդում է ծառայության Հասարակայնության հետ կապերի կենտրոնը։

«Հաստատվել է, որ հանցագործությունը նախապատրաստել և կատարել են ուկրաինական հատուկ ծառայությունները։ Հանցագործն Ուկրաինայի քաղաքացի Նատալյա Վովկն (Շաբան) է՝ ծնված 1979 թ.»,- ասվում է հաղորդագրությունում։

ԱԴԾ-ն պարզաբանել է, որ Վովկը 12-ամյա դստեր հետ հուլիսի 23-ին ժամանել է Ռուսաստան և բնակարան է վարձել այն տանը, որտեղ ապրում էր Դուգինան՝ նրա մասին տեղեկություններ հավաքելու համար։ Դուգինային հետևելու համար հանցագործություն կատարողը Mini Cooper է օգտագործել։ Ռուսաստանը մտնելիս ավտոմեքենան ունեցել է ԴԺՀ պետհամարանիշեր՝ E982ХН DPR, Մոսկվայում՝ Ղազախստանի՝ 172AJD02, իսկ ՌԴ-ից ելքի ժամանակ՝ ուկրաինական՝ AH7771IP։

Սպանության օրը Վովկն ու նրա դուստրը եղել են «Ավանդույթ» գրական-երաժշտական փառատոնում, որտեղ Դուգինան ներկա է եղել որպես պատվավոր հյուր, իսկ երեկոյան Վովկը կառավարելի պայթյուն է իրականացրել լրագրողի վարած Toyota Land Cruiser Prado-ում։ Դրանից հետո Վովկն ու աղջիկը Պսկովի շրջանով մեկնել են Էստոնիա։

Նախաքննության նյութերը փոխանցվել են ՌԴ Քննչական կոմիտե։

RaHDit խմբավորման հաքերները պնդում են, որ Նատալյա Վովկն ազգայնական Ազովի գնդի ծառայող է։ Որպես հաստատում, նրանք իրենց կայքում հրապարակել են նրա անձը հաստատող փաստաթուղթը:

Դարիա Դուգինը ռուս փիլիսոփա, քաղաքագետ, հրապարակախոս Ալեքսանդր Դուգինի դուստրն է։ 2015 թվականի մարտից Ալեքսանդր Դուգինն ուկրաինական իրադարձությունների պատճառով ԱՄՆ պատժամիջոցների ցուցակում է։ Բացի այդ, Կանադան և Ավստրալիան պատժամիջոցներ են սահմանել Դուգինի դեմ։

Հիշեցնենք, որ օգոստոսի 20-ին Մոսկվայի Մոժայսկոե խճուղում պայթեցրել են ռուսաստանցի հասարակական գործիչ Ալեքսանդր Դուգինին պատկանող Land Cruiser ավտոմեքենան, որը վարելիս է եղել նրա 30-ամյա դուստրը՝ Դարյա Դուգինան։ Վերջինս տեղում մահացել է:

Եթե լրագրող եւ քաղաքագետ Դարյա Դուգինայի սպանության գործում «Ուկրաինական հետքի» մասին վարկածը հաստատվի իրավասու մարմինների կողմից, ապա խոսքը կարող է վերաբերել Կիեւի կողմից պետական ահաբեկչության քաղաքականությանը, կիրակի օրը հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

Դիվանագետը նշել է, որ նման ենթադրության իրավաչափությունը հաստատող փաստերը բավարար են. «բռնության քաղաքական կոչերից մինչեւ Ուկրաինայի ղեկավարության եւ պետական կառույցների մասնակցությունը հանցագործություններին»:

Շաբաթ երեկոյան Մերձմոսկվայի Օդինցովի շրջանի Մոզայսկի խճուղում մեքենան ընթացքի մեջ բռնկվել է, որի ղեկին, քննչական մարմինների տվյալներով, եղել է լրագրող եւ քաղաքագետ Դարյա Դուգինան, նա վերադառնում էր փառատոնին մասնակցելուց հետո: Հայտնի հասարակական գործիչ Ալեքսանդր Դուգինի դուստրը մահացել է։ Աշխատել է մեքենայում տեղադրված պայթուցիկ սարքը։

Գործը հարուցվել է ընդհանուր վտանգավոր եղանակով սպանության հոդվածով։ Դեպքի վայրը ստուգել են պայթյունատեխնիկները, արդյունքում կնշանակվեն մի շարք փորձաքննություններ, այդ թվում՝ պայթյունատեխնիկական։

Ռուսաստանի և Ֆրանսիայի նախագահներ Վլադիմիր Պուտինը և Էմանուել Մակրոնը հեռախոսով քննարկել են Ուկրաինայի շուրջ ստեղծված իրավիճակի տարբեր ասպեկտներ:

Ինչպես հաղորդում է Կրեմլի մամուլի ծառայությունը, հեռախոսազրույցը կայացել է ֆրանսիական կողմի նախաձեռնությամբ:

«Վլադիմիր Պուտինը, մասնավորապես, ընդգծել է, որ Ուկրաինայի զինվորականների կողմից Զապորոժիեի ատոմային էլեկտրակայանի տարածքի պարբերական գնդակոծությունները մեծ աղետի առաջացման վտանգ են ստեղծում, որը կարող է հանգեցնել լայնատարած ճառագայթային վարակման»,- ասված է հաղորդագրության մեջ:

Նշվում է, որ նախագահները կարևորել են ՄԱԳԱՏԷ-ի առաքելության շուտափույթ ուղարկումը Զապորոժիեի ԱԷԿ. առաքելությունը կկարողանա տեղում գնահատել իրական վիճակը: Ռուսական կողմը հաստատել է գործակալության տեսուչներին անհրաժեշտ աջակցություն ցուցաբերելու պատրաստակամությունը։

«Վլադիմիր Պուտինը նաև հիշեցրել է ՄԱԿ-ի քարտուղարությանը և Կարմիր Խաչի միջազգային կոմիտեի փորձագետներին ուղղված՝ Ելենովկայում գտնվող քննչական մեկուսարան այցելելու հրավերի մասին, որտեղ Ուկրաինայի ԶՈւ-ի հրթիռային հարվածի հետևանքով զոհվել են այնտեղ պահվող մեծ թվով ուկրաինացի ռազմագերիներ»,- հայտնել են Կրեմլում:

Ուկրաինայի ղեկավարությունը կորցրել է իրականությունը սթափ գնահատելու կարողությունը և, հանուն իր քաղաքական շահերի, պատրաստ է երկրորդ Չեռնոբիլ իրականացնել, անդրադառնալով Զապորոժիեի ատոմակայանի հետ կապված խնդրին՝ «Россия-1»-ի եթերում ասել է ՌԴ ԱԳ փոխնախարար Սերգեյ Ռյաբկովը։

«Անխոհեմությունը, որը մեր հակառակորդները ցուցաբերում են միջուկային անվտանգության նկատմամբ, սպառնալիք է ստեղծում Եվրոպայում խոշորագույն միջուկային օբյեկտի համար, պոտենցիալ ռիսկեր առաջացնում հսկայական տարածքի համար՝ գտնվող ոչ միայն այս կայանի հարևանությամբ, այլև ուկրաինական սահմաններից բավականին հեռու՝ Ուկրաինայից արևմուտք և այլն։ Խնդրին այսպիսի թեթևությամբ մոտենալը վկայում է, որ մարդիկ ամբողջովին կորցրել են իրականության զգացողությունը և, հանուն իրենց քաղաքական ու աշխարհաքաղաքական նպատակների, պատրաստ են երկրորդ Չեռնոբիլ իրականացնել»,- ասել է Ռյաբկովը։

Նրա խոսքով՝ այս սցենարի՝ իրականություն չդառնալու երաշխիքն է ռուս զինվորականների ներկայությունը, որոնք իրականացնում են Զապորոժիեի ատոմակայանի հսկողությունը։

Թուրքիայի առևտրի փոխնախարար, մաքսային վարչության պետ Ռեզա Թունա Թուրագայը հայտարարել է, որ Անկարայի և Բաքվի միջև առևտրային հարաբերությունների ընդլայնման կարևորագույն հարցերից մեկը «Զանգեզուրի միջանցքի» (չակերները՝ Tert.am) բացումն է:

«Այս «միջանցքի» (չակերները՝ Tert.am) բացումը մեզ առավելություն կտա Ադրբեջան, իսկ այնտեղից Կենտրոնական Ասիայի երկրներ մուտք գործելու առումով՝ ավելացնելու առևտրի ծավալները։ Շարունակվում են Ռուսաստանի հետ բարձր մակարդակով բանակցությունները «Զանգեզուրի միջանցքի» (չակերները՝ Tert.am) բացման շուրջ: Մենք ակնկալում ենք, որ «միջանցքը» (չակերները՝ Tert.am) կբացվի շատ մոտ ապագայում»,- նրա խոսքերն է մեջբերում APA-ն:

Օրերս Հայաստանի վարչապետ Նիկոլ Փաշինյանը կառավարության նիստում հանձնարարել էր Ազգային անվտանգության ծառայության տնօրենին և Պետական եկամուտների կոմիտեի նախագահին ապահովել, որ ադրբեջանական կողմը կարողանա անարգել անցնել Հայաստանի տարածքով դեպի Նախիջևան: Միաժամանակ, Փաշինյանը ընդգծել էր, որ դա պիտի լինի Հայաստանի Հանրապետության օրենսդրությամբ սահմանված կարգով:

«Մենք այս ընթացքում ամեն օր էլ պատրաստ ենք այդ կապն ապահովել, Ադրբեջանի արևմտյան շրջանի և Նախիջևանի միջև կապն ապահովելու: Մենք ամեն օր էլ պատրաստ ենք այդ կապն ապահովել, այդ Ադրբեջանն է, որ չի օգտվում մեր ընձեռած հնարավորություններից: Մենք այսօր էլ ասում ենք` Հայաստանի Հանրապետության օրենսդրությամբ սահմանված կարգով, ինչպես կարգն է, եկեք, հատեք Հայաստանի սահմանը, գնացեք Նախիջևան: Հենց այսօր», — նշել էր նա: