Թշնամիները վախեցած են եւ գտնվում են մարտական պատրաստության մեջ ՝ շարունակելով հաղորդագրություններ ուղարկել տարբեր երկրների միջոցով։ Այս մասին հայտարարել է ԻՀՊԿ գլխավոր հրամանատար գեներալ-մայոր Հոսեյն Սալամին, հաղորդում է Mehr-ը։

«Մենք հարվածներ ենք հասցրել իրաքյան Քուրդիստանի շրջանում հակահեղափոխական խմբավորումներին, հրթիռակիրներ ենք փորձարկել, Bawar 373 հակահրթիռային պաշտպանության համակարգի հեռահարությունը հասցրել 300 կմ-ի եւ, վերջապես, երեկ հայտարարել ենք հիպերսոնիկ հրթիռի ստեղծման մասին, որին չի կարող դիմակայել ՀՕՊ ոչ մի համակարգ»,-ասել է նա։

«Մենք թշնամիներին ասել ենք, որ կխախտենք նրանց հանգստությունը։ Մենք անպայման կանենք դա։ Նրանք գտնվում են մարտական պատրաստության վիճակում»,-նշել է նա։ Բացի այդ, նա ասել է, որ թշնամիները վախենում են եւ շարունակում են հաղորդագրություններ ուղարկել մի քանի երկրների միջոցով»

«Իրանցի ժողովուրդը փոխում է թշնամու հաշվարկները»,- շարունակել է ԻՀՊԿ հրամանատարը՝ հայտարարելով, որ անկարգություններ հրահրելու միջոցով երկրի դեմ թշնամիների դավադրությունները ձախողվել են:

Իրանի դեսպան Սեյիդ Աբաս Մուսավին այսօր կանչվել է Ադրբեջանի արտաքին գործերի նախարարություն, հայտնում է haqqin.az-ը։

Նշվում է, որ «հանդիպման ընթացքում դժգոհություն և մտահոգություն է արտահայտվել Իրանի հակաադրբեջանական քարոզչության, Իրանի բարձրաստիճան քաղաքական և ռազմական գործիչների զրպարտչական արշավի և սպառնալից հռետորաբանության առնչությամբ, որոնք չեն համապատասխանում երկու երկրների հարաբերությունների ոգուն»։

Ասվել է նաև, որ «Իրանի դեսպանատներում Ադրբեջանում անջատողականություն հրահրող և այլ երկրներում քրեական հետապնդումից խուսափող անձանց ընդունելությունը ոչ բարեկամական քայլ է»։

Հիշեցնենք, որ Իրանի արտաքին գործերի նախարարությունը կանչել է Թեհրանում Ադրբեջանի Հանրապետության դեսպանին՝ բողոքի նոտա հանձնելու այդ երկրի պաշտոնյաների և լրատվամիջոցների կողմից Իրանի դեմ իրականացվող քարոզչական արշավի կապակցությամբ։

Իրանի ԱԳՆ-ն իր խիստ բողոքն է հայտնել ադրբեջանական բարձրաստիճան պաշտոնյաների «ոչ բարեկամական արտահայտությունների» և այդ երկրի լրատվամիջոցների հակաիրանական արշավի կապակցությամբ՝ կոչ անելով անհապաղ դադարեցնել նման գործողությունները և ձեռնարկել արդյունավետ միջոցներ՝ կանխելու նման միտումի կրկնությունը։

Ադրբեջանի դեսպանը ափսոսանք է հայտնել ստեղծված իրավիճակի համար և խոստացել Իրանի բողոքն անհապաղ փոխանցել Բաքվի իշխանություններին։

Հիշեցնենք, որ ԱՄՆ պետքարտուղարության մամուլի քարտուղար Նեդ Փրայսը ճեպազրույցի ժամանակ անդրադարձել է Իրան-Ադրբեջան հարաբերություններին այն համատեքստում, որ վերջերս Թեհրանը հայտարարել էր, որ Իրանում ահաբեկչություն իրականացրած անձանցից մեկն Ադրբեջանի քաղաքացի է:

Լրագրողը հետաքրքրվել է՝ արդյոք Միացյալ Նահանգները կկարողանա՞ կանգնել և պաշտպանել հարևան երկրներին, եթե Իրանը շարունակի իր հռետորաբանությունը նրանց դեմ։

«Աճող հռետորաբանություն կա նաև Իրանից դեպի հարևան երկրներ, ինչպիսին է Ադրբեջանը: Նրանք սպառնում են վերջերս: Նրանք նաև մի հայտարարություն են արել՝ մեղադրելով Ադրբեջանին Իրանի տարածքում ահաբեկչություն իրականացնելու համար։ Կկարողանա՞ Միացյալ Նահանգները կանգնել և պաշտպանել այդ հարևան երկրներին, եթե Իրանը շարունակի իր հռետորաբանությունը նրանց դեմ», — հետաքրքրվել է լրագրողը։

«Մենք շատ պարզ ասել ենք, որ Իրանը սպառնալիք է տարածաշրջանի համար: Մենք կշարունակենք կանգնել մեր գործընկերների կողքին, աջակցել նրանց և, ի վերջո, դիմակայել այն ապակայունացնող ազդեցությանը, որը ներկայացնում է Իրանը և իր տարածաշրջանում և գուցե դրանից դուրս», — ասել է Փրայսը:

«Դոմոդեդովո»  օդանավակայանում Բիշքեկից ժամանածների վրա հարձակված զինված անձինք գումարի հետ առևանգել են նաև մի քանի հոգու։ Այս մասին ՏԱՍՍ գործակալությանը հայտնել են Ռուսաստանի ՆԳՆ Կենտրոնական դաշնային շրջանի տրանսպորտի վարչության մամուլի ծառայությունում։

Նախնական տվյալներով՝ մի խումբ մարդիկ «ավտոմատ զենք հիշեցնող առարկաներով» օդանավակայանի բակում հարձակվել են Բիշքեկ-Մոսկվա չվերթի ուղևորների վրա։

Ըստ ոստիկանության հաղորդագրության՝ անհայտ անձինք դիմակներով մի քանի հոգու նստեցրել են ավտոմեքենաներ և նրանց հետ փախել դեպքի վայրից։ Ավելի ուշ ոստիկանությունն առևանգվածներին հայտնաբերել է անտառային գոտում՝ երկու լքված արտասահմանյան մեքենաների կողքին։

Ինչպես հաղորդում է Baza Telegram ալիքը, զինված անձինք հարձակվել են Ղրղզստանի քաղաքացիների վրա՝ գողանալով 4 միլիոն դոլար ընդհանուր գումարով մի քանի պարկ։

Մենք վատ ենք վերաբերվում ցանկացած ապակառուցողական քարոզչությանը, լինի դա ԶԼՄ-ներում, թե քաղաքական բնույթի։ Կարեւոր չէ, թե ինչին է դա վերաբերում։ Այսպես է ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել Արցախում ռուս խաղաղապահների հասցեին Ադրբեջանի կողմից քննադատությունն ու հարձակումները։

«Ինչ վերաբերում է ռուս խաղաղապահների դերին (Ղարաբաղում) եւ նրանց գործունեության գնահատականին, երեք երկրների ղեկավարները Սոչիում կայացած գագաթաժողովում նշել են ռուսական զորախմբի առանցքային ներդրումը տեղակայման գոտում անվտանգության ապահովման գործում եւ ընդգծել տարածաշրջանում իրավիճակը կայունացնելու ջանքերի անհրաժեշտությունը, որն արձանագրվել է համատեղ հայտարարության մեջ։ Ինչ վերաբերում է կեղտին, որը դրա շուրջը հայտնվում է, ապա ցանկացած դրական, կառուցողական ու ստեղծագործ նախաձեռնություն միշտ բացասական ալիք է առաջացնում։ Դա, ցավոք, մեր աշխարհի օրենքն է»,- ասել է նա:

Մենք այցելել ենք Ջերմուկի սահմանային հատվածներ, մեր աչքով ենք տեսել այն, ինչ կա ու հետևում ենք սահմանային աշխատանքներին։ Այս մասին լրագրողների հետ զրույցում ասաց իշխող խմբակցության պատգամավոր Արմեն Խաչատրյանը։

«Տեղեր կան, որ թշնամու դիրքերը երևում են և՛ հեռադիտակով, և՛ անզեն աչքով, այո, դիտողականություն կա, բայց այն հատվածից, որտեղ սահմանը ավարտվում է։ Բոլոր տեղերից էլ երևում են, Խոզնավարում տեղ ունենք, որտեղ դիրքերի տարբերությունը մի քանի մետր է, զինվորների դեմքերը երևում են»,- ասաց Խաչատրյանը։

Անդադառնալով Բերձորում Ադրբեջանի կողմից ռազմաբազա կառուցելուն և հնարավոր սպառնալիքներին, Խաչատրյանը ասաց․

«Սպառնալիքներ միշտ էլ կան, Ադրբեջանը այսօր այնպիսի ռազմական առավելություն ունի,  որ արդեն սպառնալիք է ՀՀ-ի համար, ռազմաբազայի կառուցումը մեծ բան չի փոխում, ռազմական հավասարակշռությունը ի սկբանե խախտված է»։

Արմեն Խաչատրյանը նկատեց, որ հայ-ադրբեջանական սահմանին դիտորդական առաքելություն իրականացնող ԵՄ դիտորդները արձանագրել են, որ Ադրբեջանի կողմից օկուպացիա է եղել, ինչը կունենա իրավական հետևանք։

Ադրբեջանի նախագահ Իլհամ Ալիևը բռնազավթված Շուշիում, ելույթ ունենալով զինծառայողների առջև, նոր սպառնալիքներ է հնչեցրել՝ ուղղված հայկական կողմին։ Նա նշել է, որ հայ-ադրբեջանական սահմանի ուղղությամբ՝ սեպտեմբերի 13-14-ը տեղի ունեցած գործողությունից հետո, Ադրբեջանի զինված ուժերը տեղակայված են հիմնական ռազմավարական բարձունքներում։

«Այսօր այդ ռազմավարական բարձունքներից կարող ենք տեսնել Կապանը, Գորիսը, Ջերմուկը, մեր տեսադաշտում է նաև Սևանա լիճը»։ Ալիևն ասել է, որ հայակական կողմը պետք հասկանա, թե դա ինչ է նշանակում։

Ալիևը անդրադարձել է նաև Արցախում տեղակայացված ռուս խաղաղապահներին։

«Ռուս խաղաղապահներն այնտեղ ժամանակավորապես են տեղակայված։ Նրանց տեղակայման ժամկետը հստակ նշված է 2020 թվականի նոյեմբերի 10-ի համաձայնագրում, և եթե նրանք որևէ մեկի հետ դեռ հույս են կապում, ապա միևնույն է, նոր ողբերգության կբախվեն»,- հայտարարել է Ալիևը։

Ֆրանսիայում բնակվող 80-ամյա թոշակառու ինժեներ Ֆիլիպ Բոննոն, որն արդեն տևական ժամանակ է իր տան պատուհանից տեսնում է ռուսաստանցի օլիգարխին պատկանող, սակայն պատժամիջոցների պատճառով կալանքի տակ գտնվող գերշքեղ զբոսանավը, առաջարկել է այն ուկրաինացի փախստականներին տալ:

Ինչպես հայտնում է Bloomberg-ը, ֆրանսիացին առցանց ստորագրահավաք է սկսել՝ կոչ անելով զբոսանավն որպես հյուրանոց օգտագործել Ֆրանսիայում մշտական վերաբնակեցմանը սպասող ուկրաինացի փախստականների համար:

«Հավաքվել է գրեթե 29 000 ստորագրություն։ Ես զայրացած եմ, քանի որ իմաստ չունի զբոսանավի այնտեղ լինելը, եթե այն չի օգտագործվում», — ասել է խնդրագրի հեղինակը:

Աղբյուրը մանրամասնում է, որ միլիարդատեր Իգոր Սեչինի 88 մետր երկարությամբ 120 միլիոն դոլար արժողությամբ զբոսանավը՝ Amore Vero-ն, բռնագրավվել է Ֆրանսիայի իշխանությունների կողմից Լա Սիոտատ նավահանգստում:

«Ռոսնեֆտ»-ի ղեկավարի զբոսանավը կալանված է մարտից ի վեր:

Ռուսաստանը Հայաստանին եւ Ադրբեջանին կոչ է անում ձեռնպահ մնալ այնպիսի քայլերից, որոնք կարող են ապակայունացնել իրավիճակը երկու երկրների միջեւ, լրագրողներին ասել է ՌԴ նախագահի մամուլի քարտուղար Դմիտրի Պեսկովը, տեղեկացրել է «ՌԻԱ Նովոստի»-ն։

«Մենք նախկինի պես կոչ ենք անում երկու երկրներին ձեռնպահ մնալ որեւէ գործողությունից եւ քայլից, որոնք կարող են հանգեցնել լարվածության խորացման»,- ասել է Պեսկովը՝ պատասխանելով այն հարցին, թե ինչպես են Կրեմլում արձագանքել Հայաստանի եւ Ադրբեջանի միջեւ վերսկսված փոխհրաձգության մասին լուրին։

Մինչ այդ Հայաստանի պաշտպանության նախարարությունն ադրբեջանական ԶՈւ-ին մեղադրել էր երկուշաբթի գիշեր սահմանին հայկական դիրքերը գնդակոծելու մեջ։

G7 երկրների ԱԳՆ ղեկավարները հայտարարել են, որ Ուկրաինային պաշտպանելու իրենց հակվածությունն «անսասան» է, քննադատել են Չինաստանին եւ Իրանին։

Վերջիններս համատեղ հայտարարություն են տարածել, որում շարադրված է Ուկրաինայի, Ռուսաստանի, Չինաստանի, Իրանի հարցով ընդհանուր դիրքորոշումը։

«Մենք հաստատում ենք, որ մենք վճռական ենք՝ ֆինանսական, մարդասիրական, պաշտպանական, քաղաքական, տեխնիկական եւ իրավական աջակցություն ցուցաբերելու Ուկրաինային»,-ասվում է հաղորդագրության մեջ։

Նախարարները Ռուսաստանին մեղադրել են Ուկրաինայի տարածքային ամբողջականությունն ու ինքնիշխանությունը խախտելու եւ բնակչությանը վախեցնելու փորձերի մեջ։

Նրանք նաեւ նշել են «Մերձավոր Արեւելքում եւ դրա շուրջ Թեհրանի շարունակվող ապակառուցողական գործունեությունը»։

Նախարարները հայտարարել են, որ ձգտում են «Չինաստանի հետ կառուցողական համագործակցության» այնպիսի ոլորտներում, ինչպիսիք են կլիմայի փոփոխությունը, մաքուր էներգիան եւ առողջությունը, սակայն զգուշացրել են, որ Պեկինը «պետք է պահպանի գլոբալ կանոնները, հատկապես՝ Թայվանի հարցում»։

Բելառուսի նախագահ Ալեքսանդր Լուկաշենկոն հայտարարել է, որ Մինսկը և Մոսկվան տիեզերքում արբանյակների համատեղ խմբավորում կստեղծեն, այդ թվում՝ ռազմական նպատակներով, հայտնում է ԲԵԼՏԱ-ն։

«Ռուսաստանն ահռելի է: Եվ մենք կարողացանք մտնել այս ծրագրի մեջ և ռուսների հետ ստեղծում ենք արբանյակների այս խմբավորումը։ Այսօր մենք ունենք արբանյակ, որը կարողանում է 500-600 կիլոմետր բարձրությունից ուսումնասիրել  35 սանտիմետրանոց օբյեկտը: Ուստի մենք այստեղ վիթխարի քայլեր ենք անում»,- ասել է Բելառուսի ղեկավարը։