Թուրքիայի նախկին ռազմական դատախազ Ահմեթ Զեքի Ուչոքը անդրադարձել է այն հարցին, թե ինչ կարող էր տեղի ունենալ, եթե 2016թ. հուլիսի 15-ի հեղաշրջման փորձը չձախողվեր: Թուրքական իշխանամետ «Yeni Akit» թերթի կայքի տեղեկացմամբ՝ Ուչոքը կարծիք է հայտնել, որ այդ դեպքում Թուրքիայում արյունահեղություն տեղի կունենար:

Թուրք դատախազի խոսքով, եթե հեղաշրջումը հաջողությամբ ավարտվեր, Թուրքիան կմասնատվեր. երկրի հարավարևելքում  քրդական, իսկ արևելքում՝ հայկական պետություններ կստեղծվեին: Միևնույն ժամանակ, Ուչոքը տեսակետ է հայտնել, թե այդ դեպքում Թուրքիան էլ կանցներ ԱՄՆ-ի մանդատի տակ:

Թուրքիայում ահաբեկչական խմբավորում համարվող Գյուլենական համայնքի (FETÖ) անդամների դեմ առաջին հետաքննությունը հարուցած դատախազը մասնավորապես ասել է.

«Թուրքիան կմասնատվեր, հետո երկրում մեծ կոտորածներ կսկսեին: Նրանք ոչ թե դատարանի առաջ կկանգնեցնեին, այլ հենց հեղաշրջման ընթացքում ուղղակի կսպանեին բոլոր նրանց, ում ընդդիմադիր կհամարեին: Իսկ հեղաշրջումից հետո իշխանության եկած նոր դեմքերը անկասկած կլինեին այն երկրների դրածոները, որոնց հետախուզական կառույցների հետ նրանք կապված են»:

ermenihaber.am

Ադրբեջանում հիստերիայի հերթական պոռթկում է Արցախում նախագահի ընտրությունների ֆոնին: Այս անգամ իրեն չի զսպել արտգործնախարարության խոսնակ Հիքմեթ Հաջիեւը:

«Ադրբեջանի տարածքներում» նախագահական ընտրությունների անցկացումը հերթական քաղաքական սադրանքն է»,- հայտարարել է Ադրբեջանի ԱԳՆ խոսնակը, գրում են ադրբեջանական լրատվամիջոցները:

«Ադրբեջանի օկուպացված տարածքներում ստեղծված ռեժիմի կողմից 2015-ի մայիսի 3-ին խորհրդարանի ընտրությունների անցկացումը եւ 2017-ի փետրվարի 20-ին Սահմանադրական փոփոխությունների հանրաքվեն մերժված են եւ միջազգային հանրության կողմից չեն ճանաչվում:

Անօրինական խորհրդարանում անօրինական նախագահական ընտրությունների անցկացումն ինքնախաբեություն է: Բոլորին հայտնի է, անօրինական ռեժիմի քրեական ղեկավարությանը եւ խորհրդարանի անդամներին նշանակում է Հայաստանի ռազմաքաղաքական ղեկավարությունը եւ միայն խամաճիկի գործառույթ են իրականացնում»,- ասել է Հաջիեւը:

Հուլիսի 19-ին Արցախում նախագահական ընտրություններ են կայանալու: Համաձայն 2017 թվականի փետրվարին ընդունված Սահմանադրության` առաջիկա երեք տարվա համար խորհրդարանական խմբակցությունների առաջարկով հանրապետության  նախագահ ընտրելու է Ազգային ժողովը: Առաջադրված թեկնածուներն են գործող նախագահ Բակո Սահակյանը եւ «Շարժում 88» կուսակցության նախագահ Էդուարդ Աղաբեկյանը:

Ստամբուլում սկսված հորդառատ անձրևները, որոնք համարվում են ամենաուժեղը վերջին տարիների ընթացքում, հեղեղել են մետրոյի մի քանի կայարան, քաղաքի տարբեր հատվածներում ավտոմեքենաները խրվել են ջրի մեջ և չեն կարողանում տեղաշարժվել:

Այս մասին հայտնում է թուրքական «Հուրիեթ»-ը:

Ստամբուլի որոշ շրջաններում անձրևաջրերը հեղեղել են բնակելի տների առաջին հարկերը, ինչի հետևանքով մի խումբ քաղաքացիներ մնացել են տանը արգելափակված: Միառժամանակ փակվել է Բոսֆորի տակով անցնող Եվրասիական թունելը:

Ստամբուլի նահանգապետարանը հանդես է եկել հայտարարությամբ՝ կոչ անելով քաղաքացիներին սեփական ավտոմոբիլային միջոցներով տանից դուրս գալ միայն անհրաժեշտության պարագայում:

Արտակարգ իրավիճակների կենտրոնից հայտնել են, որ տեղումների արդյունքում կա սողանքների մեծ վտանգ:

https://www.youtube.com/watch?v=zLFqK-WVQT4

Ադրբեջանի նախագահի՝ արտաքին քաղաքականության հարցերով օգնական Նովրուզ Մամեդովը հարցազրույց է տվել «ՌԻԱ Նովոստիին», որում խոսել է Արցախի հակամարտության և ռուս-ադրբեջանական հարաբերությունների մասին:
Մասնավորապես, Մամեդովը հայտարարել է, որ չնայած 25 տարի է՝ Արցախի հակամարտությունը ձգվում է, այնուամենայնիվ, խնդիրը ներկայացվում է որպես «սառեցված հակամարտությունը», ինչը արդյունք է աշխարհաքաղաքական խաղերի, ու քանի դեռ այդ խաղերը շարունակվում են, արդյունքը չի փոխվի:

«Վրաստանը, Մոլդովան և Ուկրաինան դրա վառ հաստատումն են»,- ասել է նա:

Մամեդովի կարծիքով՝ «սառեցված» հակամարտությունը կարող է ցանկացած պահի բռնկվել նոր ուժով:

«Միջազգային միջնորդները թեև հանդես են գալիս Ադրբեջանի տարածքային ամբողջականության պահպանման օգտին, բայց, չգիտես ինչու, նախընտրում են գրավել միանշանակ դիրք: Մենք համանախագահող կողմերից, ինչպես նաև միջազգային հանրությունից ակնկալում ենք կոնկրետ քայլեր հակամարտության արդարացի լուծման համար»,- ասել է նա:
Մամեդովը նաև նշել է, որ «չգիտես ինչու՝ Լեռնային Ղարաբաղի շուրջ հայ-ադրբեջանական հակամարտության արդարացի գնահատականը բախվում է խոչընդոտների»:

«Այսօր ստեղծվել է այնպիսի իրավիճակ, երբ մեկ պատերազմով ոչինչ չի որոշվի: Քանի որ հակամարտությունը կծնի նոր հակամարտություն, և գերտերությունները դրանում ակտիվ մասնակցություն են ունենում»,- ասել է նա:

Ադրբեջանի նախագահի օգնականը նաև հիշեցրել է, որ Արցախի հակամարտության խնդրով զբաղվում է ԵԱՀԿ Մինսկի խումբը, որի մեջ մտնում են հենց այն երկրները, «որոնք կարող են անհրաժեշտության դեպքում իրենց խոսքն ասել միջազգային հարթակում»:

Անդրադառնալով ռուս-ադրբեջանական հարաբերություններին՝ Մամեդովն ասել է, որ Ադրբեջանն իր արտաքին քաղաքականության մեջ հաշվի է առնում Ռուսաստանի շահերը և ցանկանում է ընդլայնել համագործակցությունը նրա հետ:
«Ադրբեջանն իր արտաքին քաղաքականության մեջ հաշվի է առնում իր ռազմավարական դաշնակիցների, այդ թվում Ռուսաստանի շահերը: Ռուսաստանն այն երկիրն է, որի հետ մենք կապված ենք հարյուրամյակներով: Երկիր, որի հետ մենք ունենք բարձր համագործակցության մակարդակ: Մեր ծրագրերի մեջ է մտնում Ռուսաստանի հետ համագործակցության ընդլայնում և ամրապնդում»,- ասել է Մամեդովը:

Խոսելով միջազգային թատերաբեմում Ադրբեջանի խնդիրների մասին՝ Մամեդովն ասել է, որ այժմ շատ բարդ ու դժվար է խոսել միջազգային հարաբերություններում հաջողությունների մասին, քանի որ աշխարհը չկարողացավ պահպանել արդարության սկզբունքները Վարշավայի պայմանագրի լուծարումից հետո:

aravot.am

Խորհրդային հայտնի վիդեոօպերատոր Սերգեյ Գրիգորյանի դուստրը՝ Russia beyond the headlines-ի խմբագիր Մարիա Գրիգորյանը պատմել է իր հոր Բաքու այցելության հետաքրքիր մանրամասներ, գրում են ադրբեջանական լրատվամիջոցները:

Ղարաբաղյան հակամարտության պատճառով, որը մինչև այսօր կարգավորված չէ, Ադրբեջանն իր տարածք չի թողնում հայկական ազգանունով մարդկանց: Առաջին ալիքի թղթակից Անտոն Վերնիցկին ինձ պատմել է, թե ինչպես է հորս հետ Բաքու գործուղման գնացել: Նրանք Ադրբեջան են թռել Վլադիմիր Պուտինի նախագահական պատվիրակության կազմում: Ինչ-որ մեկը ինչ-որ բան շփոթել էր: Ադրբեջան էին ուղարկել հայ Գրիգորյանին: Խնդիրները սկսվել են օդանավակայանում՝ ադրբեջանցի սահմանապահները խոսելու ունակությունը կորցրել էին, գրում է armtimes.com-ը:

Իսկ հայրս հանգիստ ասել է. «Եղբայրներ, ես Մոսկվայից եմ: Զեյնալովան և էլի մի քանի ադրբեջանցիներ իմ գործընկերներն են: Մենք միասին աշխատում ենք»: Զինված սահմանապահներն անհանգստ էին: Դա մեծ սկանդալ էր: Սակայն Պուտինի մամուլի ծառայությունը բավական սկզբունքային էր: Որպեսզի հանգստացնեն սահմանապահներին, հայրիկին բեյջ են տվել, որի վրա գրված էր «Վլադիմիր Պուտինի անձնական օպերատոր»:

Սերգեյ Գրիգորյանը մահացել է 72 տարեկան հասակում, այս տարի:

Մոսուլ քաղաքի արևմուտքում իրաքցի ուժայինների անցկացրած անվտանգության գործողություններից մեկի ժամանակ գաղտնի թունելներից մեկում հայտնաբերվել է «Իսլամական պետություն» (ԻՊ) ահաբեկչական խմբավորման գրոհայինների 25 կին:

Կանանցից 3-ը եղել են Թուրքիայի քաղաքացիներ, 5-ը՝ գերմանուհիներ, 3-ը՝ ռուս, 1-ը՝ չեչեն, 2-ը՝ կանադացի, մնացածը՝ Լիբիայի և Սիրիայի քաղաքացիներ, հաղորդում է գերմանական Deutsche Welle հեռուստառադիոընկերության թուրքալեզու ծառայությունը՝ հղում անելով Իրաքի անվտանգության ուժերի աղբյուրներին:

Իրաքում ահաբեկչության դեմ պայքարի վարչության պատասխանատուներից Հայդար ալ Արաժին լրատվամիջոցներին հայտնել է, որ կանայք կրել են մահապարտի գոտիներ, ինչպես նաև զենք են ունեցել իրաքյան ուժերի վրա հարձակվելու համար:

Փորձագետները կարծում են, որ Մոլսուլում պարտություն կրած ԻՊ-ականները, տարածքի անապատային հատված ետ քաշվելով, կփորձեն պարտիզանական պատերազմ վարել:

Հիշեցնենք, որ Իրաքի վարչապետը հուլիսի 10-ին հայտարարել էր Մոսուլի ազատագրման մասին:

Մոսուլը ԻՊ ահաբեկիչների ձեռքում է գտնվում 2014թ.-ից:

tert.am

««Ռոսգոսստրախ» ընկերությունների խմբի նախագահ, 45-ամյա միլիարդատեր Դանիլ Խաչատուրովն ամուսնանալու է Ռուսաստանում հայտնի ադրբեջանցի դերասանուհու՝ Սաբինա Ահմեդովայի հետ: Արդեն մի քանի տարի է, ինչ Խաչատուրովը, ում կարողությունն ըստ Forbes-ի կազմում է ավելի քան երկու միլիարդ դոլար, Ռուսաստանի ամենացանկալի փեսացուների թվում էր»,- տարփողում են ադրբեջանական ԶԼՄ-ները:

Արդեն մի քանի տարի է… և ահա… ինչ հպարտություն՝ աշխարհի ավելի քան 3,7 միլիարդ կանանցից՝ միլիարդատերն ընտրել է ադրբեջանուհու:

Նշվում է, որ 36-ամյա Սաբինա Գյուլբալայի Ահմեդովան երբեք ամուսնացած չի եղել, երեխաներ չունի, իսկ Ուլյանա Սերգեյենկոյի հետ 2008-ին ամուսնացած գործարարն ամուսնալուծվել է 2013-ին:

«Հաշվի առնելով Խաչատուրովի ընտանիքի կարողությունը, (նրա եղբայրները նույնպես միլիարդատերեր են), հարսանիքը պետք է որ շատ շքեղ լինի և ռեզոնանսային»,- նշում են ադրբեջանական թերթերը:

Ուշագրավ է այն փաստը, որ նեղմտությամբ տառապող ադրբեջանցիներն իրենց արյունակցին չեն մեղադրում ղարաբաղցու հետ ամուսնանալու համար:

Հետաքրքիր է՝ ի՞նչ կգրի ադրբեջանական մամուլը, երբ հաջորդ անգամ Դանիլն իր հայրենի Արցախ այցելի կնոջ հետ:

Նշենք, որ Սաբինան Սարիկ Անդրեասյանի «Երկրաշարժ» ֆիլմում հայուհու կերպար է մարմնավորել:

Աղբյուրը՝ Նյութ.am

Ադրբեջանն ու Տաջիկստանը պայմանավորվել են  Տաջիկստան Արցախի արտադրանքի ներմուծման ու վաճառքի արգելքի վերաբերյալ:

Այս մասին գրում է «Ռուսարմինֆո»-ն՝ մանրամասնելով, որ կողմերը հարցի շուրջ պայմանավորվել են Բաքվում անցկացված ադրբեջանա-տաջիկական միջկառավարական առևտրատնտեսական հարցերի հանձնաժողովի նիստում:

Ըստ աղբյուրի, Բաքուն և Դուշանբեն նաև պայմանավորվել են թույլ չտալ տաջիկական ընկերություններին Արցախում  որևէ տնտեսական գործունեություն ծավալել:

Այս տարվա փետրվարին Ադրբեջանը նման փաստաթուղթ ստորագրել էր Ուկրաինայի հետ:

Trend  գործակալությանը տված հարցազրույցում Ռուսաստանի Դաշնության նախագահի վստահված անձ, ՌԴ հանրային պալատի անդամ, քաղաքագետ Սերգեյ Մարկովն այսօր առավոտյան ասել է. «Հայաստանը կազատի Լեռնային Ղարաբաղի շրջակա տարածքը, և արդեն այս տարի ադրբեջանական առաջին ընտանիքները կվերադառնան հարազատ օջախներ»:

Նրա կարծիքով համաշխարհային առաջնորդների մասնավոր հանդիպումների և խաղաղ բանակցությունների արդյունքում ադրբեջանական տարածքները հնարավոր է հանձնվեն` հայկական սահմանների բլոկադայի վերացման դիմաց:

«Շուտով կողմերը պայմանագիր կկնքեն, քննարկվում են միայն կարգավորման որոշ դետալներ»,- ասել է Մարկովը:

Հավատա՞նք, սրանք իսկապե՞ս Մարկովի խոսքերն են:

Հայազգի գրող Սևան Նիշանյանը, ով 17 տարվա ազատազրկման է դատապարտվել, փախել է բանտից, որտեղ գտնվում էր 2014 թվականից:

Ինչպես հաղորդում է Asbarez-ը, Նիշանյանն ուրբաթ առավոտյան դուրս է եկել անվտանգության նվազագույն միջոցառումներ իրականացնող բանտից և չի վերադարձել:

Նշանյանի Twitter-ի էջում հայտնվել է հետևյալ գրառումը. «Թռչնակը թռավ. Նույնը մաղթում եմ մնացյալ 80 մլն-ին»:

Ինչպես հաղորդվում է, թուրք պատմաբան Թաներ Աքչամն արձագանքել է Նիշանյանի փախուստի մասին լուրին` գրելով. «Թռչնակը թռավ` հուսալով ազատ աշխարհ տեսնել բոլոր թռչունների համար»:

Հայազգի գրողին ձերբակալել և դատապարտել էին իր սեփական պարտեզում «անօրինական» շինարարություն իրականացնելու համար: Նույնիսկ թուրքական մամուլն էր նշում, որ նրա ձերբակալությունը երկրի իշխանությունների կողմից ձեռնարկված միջոց էր նրան լռեցնելու համար, քանի որ Նիշանյանը պարբերաբար քննադատում էր թուրքական ռեժիմին: