ՌԴ Կրասնոդարի երկրամասի Արմավիր քաղաքում՝ չգործող սրճարանի տարածքում, հոկտեմբերի 19-ի երեկոյան ժամը 21.00-ի սահմաններում, 42 և 43 տարեկան երկու հայ կրակ են բացել երիտասարդների ուղղությամբ։ Դրա հետևանքով երկու երիտասարդ զոհվել է, մեկը՝ վիրավորվել։

kuban.kp.ru-ն ՌԴ Քննչական կոմիտեի Կրասնոդարի երկրամասի քննչական վարչությանը հղումով նշում է, որ  կրակ բացելուց հետո տղամարդիկ նստել են Hyundai Solaris մեքենան ու փախել դեպքի վայրից։ Վարկածներից մեկի համաձայն՝ կրակողը եղել է սնանկացած գործարար, որն այդ քայլով փորձել է լուծել խնդիրները։

27-ամյա Միսակը գլխին ստացած հրազենային վնասվածքից մահացել է տեղում, 28-ամյա Ռուսլանը մահացել է հիվանդանոցում, իսկ 38-ամյա Ռուսլանին ծնկի շրջանում հրազենային վնասվածքով տեղափոխել են հիվանդանոց և վիրահատել, այժմ նրա կյանքին վտանգ չի սպառնում։

Կասկածյալների հանդեպ հետախուզում է հայտարարվել։ Որոնվում են 1975 թվականին ծնված Սերգեյ Սահակի Ելիզարյանցն ու 1974 թվականին ծնված Գագիկ Հենրիկի Եսայանը։ Հետագայում կասկածյալների թվին է ավելացել նաև Դենիս Շևչենկոն։

Նշվում է, որ Սերգեյ Ելիզարյանցը գլխավորել է անշարժ գույքի վարձակալությամբ զբաղվող ընկերություն և ունեցել հարկերի վճարման հետ կապված պարտքեր։

Գագիկ Հենրիկի Եսայանը

Սերգեյ Սահակի Ելիզարյանցը

Վիրտուալ տիրույթում հրապարակվել է տեսանյութ, որն արվել է երեկ ուկրաինական Խարկով քաղաքում՝ Lexus մեքենայի կողմից ամբոխին վրաերթի ենթարկելու դեպքի ժամանակ:

Խարկովում 20-ամյա աղջիկ վարորդը Lexus-ով մեծ արագությամբ մխրճվել է անցորդների մեջ. կա 5 զոհ, 6 վիրավոր, այդ թվում՝ հղի կին։Դեպքը տեղի է ունեցել Սումսկի և Մեչնիկովի փողոցների խաչմերուկում։

Պարզվել է, որ «Lexus»-ը պատկանում է աղջկա հորը:

Հայտնի է, որ ավելի վաղ ևս Lexus-ը խախտել էր ճանապարհային երթևեկության կանոնները:

Ուկրաինայի ներքին գործերի նախարարի խորհրդական Անտոն Գերաշչենկոն հայտնել է, որ այդ մեքենան նախկինում բազմիցս տուգանվել է երթևեկության կանոնները խախտելու համար։

20-ամյա աղջիկը ձերբակալված է։

https://www.youtube.com/watch?v=n0Cycpi5qz0

Սոչիում՝ երիտասարդության և ուսանողների XIX համաշխարհային փառատոնի շրջանակում քննարկումների ժամանակ ՌԴ Պետդումայում Ռուսաստանի ազատական-ժողովրդավարական կուսակցության խմբակցության ղեկավար Վլադիմիր Ժիրինովսկին՝ ելույթ ունենալով ասել է, որ Լեռնային Ղարաբաղի խնդիրը լուծում չունի, Ադրբեջանը դեռ երկար ստիպված կլինի հաշտվել այդ խնդրի առկայության հետ:

Ժիրինովսկին հավելել է, որ դա բարդ խնդիր է և անլուծելի: «Խոսելով Ադրբեջանի ու Հայաստանի մասին՝ պետք է հասկանանք, որ ԼՂ հարցն անհնար է լուծել: Չկա լուծում»,-ասել է նա, գրում է «Sputnik Ազերբայջանա» լրատվականը: Ըստ նրա, երկու երկիրն էլ Ղարաբաղն իրենցն է համարում:

Պատգամավորը ԼՂ հակամարտության հարցը համեմատել է պաղեստինա-իսրայելական խնդրի հետ:

«Ադրբեջանը դեռ երկար ստիպված կլինի հաշտվել ԼՂ խնդրի առկայության հետ: Երուսաղեմի խնդիրը հնարավո՞ր է լուծել: Ոչ: Հրեաները համարում են, որ դա իրենց մայրաքաղաքն է, արաբները՝ որ իրենցը»,-ասել է Ժիրինովսկին:

Առաջին անգամ Ադրբեջանը ցուցադրեց իր Ս-300ՊՄՈւ-2 «Ֆավորիտ» զենիթահրթիռային համակարգերը 2011թ․ հունիսի 26-ին՝ Բաքվում զորահանդեսին։ Այն ժամանակ ցուցադրվեցին արձակման 5П85ТЕ2 երեք կայաններ, տեղափոխման և լիցքավորման 5Т58 երկու կայաններ ու լուսավորման և ուղղորդման 30Н6Е2 մեկ ռադիոլոկատոր։

Ըստ ռուսական «Զենքի միջազգային առևտրի վերլուծության կենտրոնի» (ЦАМТО) տվյալների` Ադրբեջանը Ռուսաստանից գնել է Ս-300ՊՄՈւ-2 «Ֆավորիտ» ԶՀՀ 2 դիվիզիոն, յուրաքանչյուրում 8-ական արձակման կայան։ Շուրջ 300 մլն դոլար արժողությամբ գործարքը կնքվել է 2007թ․, իսկ մատակարարումները սկսվել են 2011թ․։ Համանման տվյալներ է հաղորդում նաև «Խաղաղության խնդիրների հետազոտման Ստոկհոլմյան ինստիտուտը» (SIPRI) այն տարբերությամբ, որ գործարքի կնքման տարեթիվ է նշվում 2010 թվականը։

Ադրբեջանական Ս-300-ների տեղակայման վայրը որոշ ժամանակ անհայտ էր։ Ենթադրվում էր, որ դրանք կտեղակայվեն Բաքվի մերձակայքում՝ պաշտպանելու համար Ադրբեջանի մայրաքաղաքը, նավթային ու ռազմական ենթակառուցվածքները հայկական հրթիռներից։ Չէր բացառվում նաև, որ Ֆավորիտները կփոխարինեն խորհրդային Ս-200 ԶՀՀ-ներին և համապատասխանաբար կտեղակայվեն Բաքվում ու Մինգեչաուրում։

Զորահանդեսից մեկ տարի անց՝ 2012 թ․ արված արբանյակային լուսանկարներում Ս-300ՊՄՈւ-2 մեկ դիվիզիոն հայտնաբերվեց Բաքվից մոտ 45 կմ հյուսիս-արևմուտքում, որտեղ նախկինում Ս-75 ԶՀՀ լքված դիրք էր։ Դիվիզիոնը բաղկացած էր երկու մարտկոցից, յուրաքանչյուրում՝ 4-ական արձակման կայան։ Հարկ է նշել, որ այդ տարածաշրջանը հագեցած է արդյունաբերական ու ռազմական նշանակության օբյեկտներով։ Մոտակայքում են գտնվում Ադրբեջանի հիմնական ռազմական ավիաբազաներից մեկը՝ «Նասոսնայա» ավիաբազան, «Սիթալ-չայի» ավիաբազան, ռազմամթերքի Գիլյազիի ռազմավարական ու Նասոսնիի շրջանային պահեստները ևն։

Սակայն արդեն 2014 թ․ լուսանկարներում այդ դիրքերը դատարկ են։ Այդ և ավելի ուշ արված արբանյակային լուսանկարներում չեն երևում ոչ միայն արձակման կայանները, այլև ռադիոլոկատորներն ու անգամ դիզելային գեներատորները, թեպետ, դիրքի ինժեներական կառույցները պահպանվում են։ Այդ դիրքի հետագա ճակատագիրը դեռևս պարզ չէ։ Հնարավոր է, որ այն դիտարկվում է որպես պահուստային դիրք կամ նախատեսվում է ընդլայնվել։

2013 թ․ ապրիլից Բաքվի Սուրախանի շրջանում տեղակայված զենիթահրթիռային բրիգադի տարածքում, որտեղ նախկինում գտնվում էին հնացած Ս-75 ԶՀՀ արձակման կայաններ և այլ հանգույցներ, սկսվում են կատարվել ինժեներական աշխատանքներ։ Բրիգադի տարածքում տեղ է հատկացվում ԶՀՀ մարտկոցի համար, իսկ արդեն 2014 թ. երկրորդ կեսին այդ վայրում հայտնվում է Ս-300ՊՄՈւ-2 ԶՀՀ երկու մարտկոց՝ արձակման 4-ական մեքենայով։ Մարտկոցների այդ տեղը ժամանակավոր էր ու ինժեներական առումով լիարժեք կահավորված չէր։ Մարտկոցներից մեկը 2015-ի հունիսից հետո այլևս այդ տեղում չի երևում:

Նույն 2014 թ. լուսանկարներում երևում է, որ բրիգադի տարածքում վերակառուցման աշխատանքներ են ընթանում, որոնց հիմնական մասը 2015 թ․ կարծես թե ավարտվում է։ Ներկայումս այդ տարածքում կառուցված է Ս-300ՊՄՈւ-2 ԶՀՀ մեկ մարտկոցի մարտական դիրք, որում տեղակայված են արձակման 4 կայան։

Զուգահեռաբար, նույն 2014թ․, Բաքվից արևմուտք ընկած Հյոքմելի բնակավայրին կից բլուրի վրա սկսվում է կառուցվել ԶՀՀ նոր տեղակայման վայր: 2015 թվականի մայիսի վերջից արբանյակային լուսանկարներում արդեն երևում է Ս-300ՊՄՈւ-2 ԶՀՀ-ի մեկ մարտկոց: Սա որոշակի հիմք է տալիս ենթադրելու, որ Հյոքմելիում տեղակայվել է հենց Սուրախանիից «կորած» երկրորդ մարտկոցը։

2011-2015թթ. ընթացքում Ադրբեջանը Բաքվի Ղարադաղի շրջանում տեղակայված ՀՕՊ բրիգադի տարածքում սկսում է կառուցել նոր խոշոր զորամաս՝ հարևանությամբ գտնվող Ադրբեջանի ռազմածովային ուժերի բազայի համար։ Սակայն ՌԾՈւ նորակառույց զորամասի հարևանությամբ դեռևս որոշակի շինարարական անավարտ աշխատանքներ կան, և հնարավոր է, որ այս տարածքում հետագայում դեռ հայտնվեն ՀՕՊ մարտկոցներ, այդ թվում՝ միգուցե նաև Ս-300ՊՄՈւ-2։

Առանձին քննության է արժանի Ադրբեջանում Ս-300ՊՄՈւ-2-ների քանակի հարցը։

Ինչպես նշվեց, զենքի առևտրի հետազոտությամբ զբաղվող ռուսական ЦАМТО ու շվեդական SIPRI կազմակերպությունները համարում են, որ Ադրբեջանը գնել է 2 դիվիզիոն՝ ընդհանուր 16 արձակման կայանով։ Սակայն արբանյակային լուսանկարներում ժամանակի նույն պահին միաժամանակ երևում է ոչ ավել քան 8 արձակման կայան՝ բաշխված երկու մարտկոցներում։

Ինչպես տեսանք վերևում, սկզբում 2 մարտկոց տեղակայվել էր Բաքվից 45 կմ հյուսիս-արևմուտք, ապա դրանք հեռացվեցին այնտեղից, որից հետո 2 մարտկոց տեղակայվեց Սուրախանիում, ապա 1 մարտկոցն այնտեղից «անհետացավ», ինչից հետո 1 մարտկոց հայտնվեց Հյոքմելիում։

Եթե այս փաստն ընդունենք որպես հիմք, ապա կարելի է ենթադրել, որ Ադրբեջանն իրականում ձեռք է բերել ոչ թե 2 դիվիզիոն, այլ 2 մարտկոց, չնայած ЦАМТО-ի և SIPRI-ի զեկույցների:

Ադրբեջանի Ս-300ՊՄՈւ-2 ԶՀՀ-ների տեղակայման վայրերը՝ այստեղ:

razm.info

ՌԴ Ուլյանովսկի շրջանում ձերբակալել են մի կնոջ, որը ներկայացել էր որպես ՀՀ դեսպանատան աշխատակից և ցանկացողներին առաջարկում էր ռուսական անձնագրեր պատրաստել։

Այս տարվա մարտին մեղադրյալը իր ծանոթի միջոցով դուրս էր եկել մի աղջկա հետքի վրա, որն ուզում էր իր կողակցի համար ՌԴ քաղաքացու անձնագիր ձևակերպել։ Կինը զանգել էր տուժածին և ներկայացել որպես ՀՀ դեսպանատան աշխատակցուհի՝ ասելով, որ իր պետը 2 շաբաթվա ընթացքում անձնագիր կձևակերպի, սակայն որոշակի պարգևի դիմաց։ Դրանից հետո նա տուժածից գումար էր կորզել իբր թե թղթերը ձևակերպելիս առաջացած խնդիրները լուծելու համար։ Ընդհանուր առմամբ աղջիկը «դեսպանատան աշխատակցին» 79 500 ռուբլի էր վճարել, սակայն խոստացած անձնագիրն այդպես էլ չէր ստացել։

Բանակցություններն ընթացել էին հեռախոսով, որոնք գաղտնալսվել էին ԱԴԾ աշխատակիցների կողմից։

Մեղադրյալի մասին հայտնի է այն, որ նա 51 տարեկան է, ոչ մի տեղ չի աշխատում։ Բարիշայում նրան գիտեն որպես մարդու, որը զբաղվում է կեղծ միգրացիոն փաստաթղթերի ձևակերպմամբ։ 2014 թվականին կնոջն արդեն քրեական պատասխանատվության էին ենթարկել ապօրինի միգրացիա կազմակերպելու համար և պայմանական ազատազրկման դատապարտել։ Այն ժամանակ նա կեղծել էր Մոսկվայի կենտրոնում գնած անձնագիրը։

Կնոջը տուժածի հետքի վրա դուրս հանած հանցակիցը փախուստի է դիմել։ Նրան փնտրում են։

Ահաբեկչական խմբավորումները ահաբեկչական խոշոր գործողություններ են նախապատրաստում ԱՄՆ-ում: Ինչպես հայտնել Է The Daily Mail-ը` այս մասին հայտնել է ԱՄՆ-ի ներքին անվտանգության նախարարի պաշտոնակատար Էլեյն Դյուքը հոկտեմբերի 18-ին Լոնդոնում ԱՄՆ-ի դեսպանատանն ունեցած ելույթի ընթացքում:

«Ահաբեկչական խմբավորումները՝ լինի դա «Իսլամական պետությունը» կամ ուրիշներ, ցանկանում են իրականացնել խոշոր պայթյուն, ինչպես որ եղավ սեպտեմբերի 11-ին: Նրանք պատրաստվում են օգտագործել ինքնաթիռ. հետախուզությունը դրանում համոզված է»,-հայտարարել է Դյուքը:

Նրա խոսքով՝ բեռնատարների ու սառը զենքի օգտագործմամբ գործողությունները ահաբեկիչներին հարկավոր են սարսափի մթնոլորտ ստեղծելու, իրենց զինյալներին անգործ չթողնելու և խմբավորման ֆինանսական միջոցներն ապահովելու համար, քանի որ նրանք ինքնաթիռի օգտագործմամբ 2001 թ. սեպտեմբերին տեղի ունեցած վայրագությունների նման այլ «մեծ պայթյուն» են նախատեսում:

«Ահաբեկիչներն ուժեղ են, նրանք շատ արագ են ամեն ինչին հարմարվում, և ահաբեկչության սպառնալիքն այժմ ամենամեծն է սեպտեմբերի 11-ից ի վեր: Մենք պետք է հնարավոր ամեն ինչ անենք կանխելու այդ ամենը»,-ասել է պաշտոնյան:

Սոչիում անցկացվող Երիտասարդների և ուսանողների փառատոնին ադրբեջանցիները սկանդալ են հրահրել։

Ինչպես հայտնում է «Коммерсант»–ը, ադրբեջանական պատվիրակության անդամները ներխուժել են փառատոնի շտաբ` պահանջելով հեռացնել ցուցադրափեղկից հայկական պատվիրակության քարտեզը, որի վրա Լեռնային Ղարաբաղը պատկերված է որպես Հայաստանի մաս։

Կազմակերպիչները երկար բանակցություններ են վարել Ադրբեջանի պատվիրակության հետ և առաջարկել են նրանց իրենց քարտեզը կախել, որում Լեռնային Ղարաբաղը կներկայացվի որպես Ադրբեջանի մաս։ Որքան էլ դա տարօրինակ թվա, բայց ադրբեջանական կողմը հանգստացել է և ընդունել է այդ առաջարկը։

ՌԴ Մոսկվայի մարզում իրավապահները ձերբակալել են տաքսու հայ վարորդի, որը կասկածվում է հաճախորդներին թունավորելու համար: Այդ մասին «Մոսկվա» քաղաքային նորությունների գործակալությանը հայտնել է իրավապահ մարմիններում աղբյուրը:

Ձերբակալվածը Հայաստանի Հանրապետության քաղաքացի Վահագն Կարապետյանն է, որը տաքսու վարորդ է աշխատել: Ինչպես պատմել է գործակալության զրուցակիցը, բնակության վայրի խուզարկության ընթացքում առգրավվել է 20 բջջային հեռախոս, 190 կլոզապինի հաբ, բջջային հեռախոսի 71 պատյան և 98 ձեռքի ժամացույց:

Նրա խոսքով՝ 29-ամյա Կարապետյանը ձերբակալվել է Մոսկվայում Նալչիկի բնակչին թունավորելու մեջ ներգրավվածության կասկածանքով, որի մարմինը հայտնաբերվել էր 2017 թվականի ապրիլին Դվինցև փողոցում: Ինչպես պարզել է դատաբժշկական փորձաքննությունը՝ տղամարդը մահացել է էթիլային սպիրտի և կլոզապինի թունավորումից:

Ինչպես գրում է life.ru-ն, տաքսիստի զոհերից մեկը հայտնի հաղորդավար Արթուր Բիտովն է եղել: Ապրիլին Դվինցև փողոցում հայտնաբերել են 51-ամյա լրագրողի մարմինը: Հետաքննությունը պարզել է, որ լրագրողը դարձել է հարձակման զոհ, նրան թունավորել են և թալանել, ինչից հետո նա այդպես մնալով սառել է ու մահացել փողոցում:

Ավելի վաղ Telegram-ի Mash էջը հայտնել էր, որ ձերբակալված Կարապետյանին կասկածում են մայրաքաղաքի տարածքում մոտ 100 սպանության ներգրավվածության համար: Միևնույն ժամանակ, ուժային կառույցներում «Մոսկվա» գործակալության աղբյուրը հերքել է այդ տեղեկությունը:

«Իրականում զոհերը շատ ավելի քիչ են եղել»,- ասել է գործակալության զրուցակիցը:

Նախնական տեղեկությունների համաձայն՝ տղամարդը վարձակալել է «Մերսեդես» մակնիշի ավտոմեքենա, որով մարդկանց տեղափոխել է: Դրանից հետո նա թունավորել է հաճախորդներին և թալանել, կարծում են իրավապահները:

https://www.youtube.com/watch?v=QDrhw98n_PY