Ամերիկացի հեռուստահաղորդավար և կատակերգակ Թրևոր Նոյն իր դժգոհությունն է հայտնել ԱՄՆ-ում հայ համայնքի վերաբերյալ՝ Daily Show հաղորդման ժամանակ օգտագործելով «կեղտոտ հայ» արտահայտությունը:

«Դա իսկապես ծիծաղելի է: Դա նույնն է, երբ ինչ-որ մեկն ասի. «Ես ամենահանդուրժող մարդն եմ. հարցրեք այն կեղտոտ հային»,- ասել է հաղորդավարը՝ մեկնաբանելով Դոնալդ Թրամփի խոսքն իր «կայուն հանճարեղության» մասին:

Հաղորդման եթերից հետո ԱՄՆ-ի փաստաբանների հայկական միությունն իր դժգոհությունն է հայտնել հաղորդավարի արարքի կապակցությամբ և պահանջել Daily Show-ից ներողություն խնդրել հայերի հասցեին վիրավորական արտահայտության համար:

Կալիֆորնիայում երեքշաբթի օրվա առատ տեղումներից առաջ եկած սողանքներն ավերել են Մոնթեսիթոյի հարյուրավոր տներ եւ բնակիչներին զրկել տները լքելու հնարավորությունից: Որոնողական աշխատանքները դեռ շարունակվում են: Այս մասին գրում է Ամերիկայի ձայնը:

Չորեքշաբթի օրը Կալիֆորնիայի փրկարարները, հաղթահարելով ցեխի հաստ շերտի պատնեշը, դուրս են բերել արտաքին աշխարհի հետ կապից զրկված մոտ 100 տան բնակիչների: Անցած ամիս Մոնթեսիթոյի անտառներում աննախադեպ հրդեհների հետեւանքով բազմաթիվ ծառեր էին այրվել, ինչի արդյունքում անձրեւներից փափկած հողը պահող ոչինչ չի եղել եւ այն սահել է դեպի բնակելի տարածք՝ անցնելով տների միջով կամ ամբողջովին ծածկել դրանք:

Տեղի իշխանությունները մարդկանց կարգադրել էին էվակուացնել տարածքը, սակայն նրանց ընդհամենը 15 տոկոսն է հեռացել:

Մոնթեսիթոյի բնակիչ Քարոլին Բեննեթը ասում է. «Երբ կարգադրեցին լքել տարածքը, մտածեցի պարզապես անձրեւ է տեղալու: Սակայն նման բան երբեւէ չէի տեսել»:

Սանտա Բարբարայի համայնքում են ապրում բազմաթիվ ազդեցիկ եւ հայտնի անձինք: Ինչպես օրինակ Օփրա Ուինֆրին, ում տունը նույնպես տուժել է սողանքների հետեւանքով:

Ինչպես նա է պատմում. «Այստեղ ցանկապատ կար: Իսկ հարեւանիս տունը քանդվել է»:

Մոտ 8000 հեկտար տարածություն փակ է երթեւեկության համար, որտեղ դեռ հարյուրավոր մարդիկ չեն կարողանում հեռանալ իրենց տներից: Առաջինն օգնության հասած ավելի քան 500 կամավոր շարունակում են որոնողական աշխատանքները՝ կենտրոնանալով այն տարածքների վրա որտեղ ամենից շատ են անհայտ կորած անձինք:

Հունվարի 8-ին Չինական ավիաուղիներին պատկանող Պեկին-Թբիլիսի չվերթն իրականացնող օդանավը, որում եղել է ազգությամբ հինգ հայ, որից երեքը՝ ՀՀ քաղաքացի, վայրէջք է կատարել Բաքվում։ Այս մասին Tert.am-ի հետ զրույցում ասաց օդանավի ուղևոր Իդա Մնացականյանը՝ ավելացնելով, որ հայերից մեկը 5-ամյա երեխա է եղել:

«Երեք օր առաջ Պեկին-Թբիլիսի չվերթն իրականացնող օդանավը մի քանի պտույտ տվեց, և ըստ օդանավի անձնակազմի բացատրության՝ չկարողացավ վայրէջք կատարել մառախուղի պատճառով: Մենք օդանավի անձնակազմին հայտնեցինք, որ չենք ցանկանում, որ օդանավը վայրէջք կատարի Բաքվի օդանավակայանում, որովհետև օդանավում հայեր կան և պետք է գտնել այլ այլընտրանքային տարբերակ: Սակայն մեզ չլսեցին և օդանավը վայրէջք կատարեց Բաքվում»,-ասաց Մնացականյանը:

Նա հայտնեց, որ բացի այն, որ օդանավը վայրէջք է կատարել Բաքվում, անձնակազմից իրենց չեն մոտեցել և արգելել են նրանց մնալ օդանավի մեջ:

«Մեզ մոտեցավ Բաքվի օդանավակայանի մեկ աշխատակից, ասաց, որ տեղյակ է, որ ազգությամբ հայեր ենք, հորդորեց ինքնաթիռում թողնել անձնագրերը և դուրս գալ չեզոք գոտի: Մենք այդպես էլ արեցինք, ամուսնուս և երեխայիս անձնագիրը թողեցինք օդանավակայանում, ես վերցրեցի իմ անձնագիրը, որովհետև ես և երեխաս ԱՄՆ քաղաքացիներ ենք, ամուսինս՝ Հայաստանի: 12 ժամ մնացինք Բաքվի օդանավակայանում։ Այն հատվածը, որը տրամադրել էին մեզ, միայն հայերով էինք գտնվում»,-ասաց Մնացականյանը:

Նա հայտնեց, որ այդ ընթացքում Չինական ավիաուղիների (գրասենյակ ունի Բաքվի օդանավակայանում) որևէ ներկայացուցիչ իրենց չի մոտեցել, իսկ մառախուղի պատճառով այդ օրը Թբիլիսի ժամանող ինքնաթիռները վայրէջք չեն կատարել Թբիլիսում, սակայն Բաքու ևս չեն ժամանել:

Մնացականյանը հայտնեց, որ Բաքվից անմիջապես կապ է հաստատել ՀՀ ԱԳՆ խոսնակ Տիգրան Բալայանի հետ, ով ազգությամբ հայ ԱՄՆ քաղաքացիների մասին միանգամից տեղեկացրել է Վաշինգտոնին:

«Չգիտեմ զուգադիպություն էր, թե ոչ, սակայն դրանից հետո Բաքվում մեր նկատմամբ վերաբերմունքը փոխվեց, սակայն չգիտեմ տրամադրվածությունից է, թե ոչ, նրանց տված հացն ու ջուրը կասկածելի էր»,-ասաց ուղևորը:

Նա պատմեց, որ կերակուրից ու ջրից ամուսինն ու երեխան օգտվել են և քնել, իսկ քանի որ նրանք քնել են, որոշել է ինքը ևս մի փոքր օգտվել, ինչից հետո գլխացավ է ունեցել:

Բաքվից Թբիլիսի տեղափոխվել են վայրէջքից 12 ժամ անց.«Նախքան այդ, երեք ադրբեջանցու ուղեկցությամբ չեզոք գոտուց գնացել ենք մինչև ինքնաթիռ երեխայիս ու ամուսնուս անձնագիրը վերցնելու: Ես գնացի, որովհետև միայն ես անձնագիր ունեի, իսկ դա էլ իր հերթին մեկ այլ վախ ու սթրես էր: Մյուս հայ զույգին այդքան ուշադրություն չէին դարձնում, որովհետև Բաքվում մտածեցին, որ մենք մի ամբողջ ընտանիք ենք»:

Իդա Մարտիրոսյանն ասաց, որ Բաքվում գտնվելուց հետո մինչև Թբիլիսի վերադարձը ՀՀ-ից իրենց հետ կապի մեջ են եղել և ուղղորդել են, խորհուրդներ են տվել: «Այժմ ես բողոքելու եմ Չինական ավիաուղիների դեմ իրենց անմակարդակին վերաբերմունքի, մեզնով չհետաքրքրվելու և մեր իրավունքները չպաշտպանելու համար: Ավիաընկերությունը պետք է պատասխան տա դրա համար»:

top-news.am

Հայոց ցեղասպանության ճանաչման դեմ ծավալած իր գործունեությամբ և հակահայ տրամադրություններով հայտնի թուրքական «Պայքար հայկական անհիմն պնդումների դեմ» միության (ASİMDER) նախագահ Գյոքսել Գյուլբեյը նոր հայտարարությամբ է հանդես եկել:

Թուրքական «Sondakika» լրատվական կայքի տեղեկացմամբ՝ Գյուլբեյը հայտարարել է, որ «Հայաստանի ազատության հայ գաղտնի բանակը»՝ ASALA-ն, որի գործուենության դադարեցման մասին հայտարարվել էր 1984 թվականին, կրկին բացվել է Վրաստանի Ջավախք շրջանում «Վիրք-երկիր» անվամամբ:

Ըստ Գյուլբեյի՝ «Վիրք-երկիր» միությունը ահաբեկչական կառույց է, որը տարածաշրջանում Ռուսաստանի քաղաքականությունը կյանքի կոչելու համար օգտագործում է Հայաստանում և այլ երկրներում բնակվող  հայերին: ASİMDER-ի ղեկավարի պնդմամբ՝ Ախալքալաքում գտնվող ռուսական ռազմաբազան հեռանալիս դյուրակիր զինատեսակները  թողել է «Վիրք-երկրի» անդամներին: Նա նշել է, որ կազմակարեպության նախկին ղեկավար Վահագն Չախալյանը 2008 թվականին ձերբակալվել էր անջատողական կազմակերպություն հիմնելու և զենքի առուվաճառքով զբաղվելու մեղադրանքով:

Անդրադառնալով Ջավախքի նորագույն պատմությանը՝ Գյուլբեյը հայտնել է, որ Ջավախքի խնդիրն առաջացել է Լեռնային Ղարաբաղի պատերազմի հետ միաժամանակ: Բայց քանի որ հայերը չեն կարողացել լուծել ղարաբաղյան խնդիրը, Ջավախքի հարցով որոշ պահանջներ առկախել են՝ չցանկանալով փակել աշխարհի հետ կապող միակ դարպասը, որն անցնում է Վրաստանով:

Հակահայ գործունեությամբ հայտնի գործչի պնդմամբ՝ Վրաստանում բնակվում է 600 հազար ադրբեջանցի թուրք, որոնցից Ջավախքի մոտակա գյուղերում և ավաններում ապրողների կյանքին վտանգ է սպառնում, քանի որ «Վիրք-երկրի» և ASALA-ի աշխարհայացքը նույնն են:

ermenihaber.am

Այն մասին, որ քանդակը պարզապես պատճեն է գրել է Արևիկ Գրիգորյանը` Սիմոնյանի թոռը: Facebook-ում նրա կատարած առաջին գրառումը, ինչպես նա է պնդում, ջնջվել էր: Այնուամենայնիվ, մեջբերենք սոցցանցում նրա կատարած գրառումը. «Խայտառակ, զայրացնող միջազգային մակարդակի իրադարձություն: Վատ բանագողություն: Առանց հեղինակային իրավունքները պահպանելու: Իջևանը Հռիփսիմե Սիմոնյանի քանդակի նողկալի կրկնօրինակը (ներկա պահին բնօրինակը գտնվում է Երևանի Արամ Խաչատրյանի տուն-թանգարանում) նվիրում է Ուրուգվային: Լրագրող ընկերներ, հեղինակային իրավունքի մասնագետներ (եթե այդպիսիք կան), խորհուրդ տվեք` ինչպես սրան արձագանքել: Հ.Գ. Նախորդ գրառումս, հավանաբար, ջնջել են»:

Արևիկ Գրիգորյանն իր գրառմանը կցել էր քանդակի բնօրինակի և Ուրուգվայ ուղարկած կրկնօրինակի լուսանկարները։ Անկասկած, հարավամերիկյան ափերին միանշանակ կրկնօրինակ է հասել, մի բան, որը նույնիսկ մեծ ցանկության դեպքում ինքնուրույն ստեղծագործություն անվանել հնարավոր չէ:

Sputnik Արմենիայի հետ զրույցում Գրիգորյանը պատմեց, որ վերջերս նրան դիմել էին` խնդրելով հենց այդ նպատակով (Ուրուգվային նվիրելու) տրամադրել «Հայ կին» քանդակը: Նա հրաժարվել էր նվիրել տատիկի աշխատանքի բնօրինակը (այն Գրիգորյանի սեփականությունն է), սակայն նշել էր մի քանդակագործի անուն, ով, նրա կարծիքով, կկարողանար հարավամերիկյան երկրի համար լավ կրկնօրինակ ստեղծել:

«Այսքանով,– ասում է Արևիկը, –ամեն ինչ վերջացավ, և մնացածի մասին արդեն տեղեկացա մամուլից»: Հատկապես նրան զայրացրել էր այն փաստը, որ ոչ թե կրկնօրինակի հեղինակությունն էր վերագրված Գոռ Դավթյանին, այլ հենց բնօրինակի: Այժմ նա խորհրդակցում է իրավաբանների հետ:

Եթե դա այդպես է, ապա ակնհայտորեն բավական տգեղ պատմություն է ստացվել: Եթե քանդակը Ուրուգվային նվիրել է Իջևանը, հավանաբար, քաղաքապետարանին կարող էին մոլորության մեջ գցել հեղինակության վերաբերյալ: Ցանկացած տարբերակ հնարավոր է, ընդհուպ մինչև այն, որ անգամ ինքը` Դավթյանը տեղյակ չէ կատարվածի մասին: Կամ գուցե, պարզապես սխալմունք է եղել:

Անհասկանալի է գլխավորը. Հռիփսիմե Սիմոնյանը հայտնի քանդակագործ է, և նրա աշխատանքները ներկայացնել որպես սեփական աշխատանք իմաստ չունի, քանի որ սուտն անմիջապես ջրի երես դուրս կգա: Առավել ևս, որ կոնկրետ այդ քանդակը, ցուցահանդեսից հետո պահպանվում է ոչ թե սովխոզի որևէ մոռացված ու լքված տեղում, այլ Խաչատրյանի թանգարանում:

Իհարկե, իրենց վճռական խոսքն այս հարցում կասեն իրավաբաններն ու հեղինակային իրավունքի մասնագետները:

Սակայն, եթե նույնիսկ պարզվի, որ ինչ-որ թյուրիմացություն է տեղի ունեցել, դրանից խնդիրը չի լուծվի: Ստացվում է, որ մեր պետական կազմակերպությունները, այս պարագայում` Իջևանի, քաղաքապետարանն իր պարտականությունները ոչ թե վատ է կատարում, այլ սարսափելի վատ: Եվ այդ տգեղ պատմությունը ոչ թե կվարկաբեկի Իջևանի քաղաքապետարանին կամ քանդակը (այս պարագայում դա քչերին է հետաքրքիր), այն հարված կհասցնի ողջ երկրի հեղինակությանը:

Եվ հանդգնում եմ ենթադրել, որ ինչպես միշտ, դրա համար որևէ մեկը պատասխան չի տա:

ԱՄՆ-ի նոր պատժամիջոցները Ռուսաստանի ռազմաարդյունաբերական ընկերությունների դեմ կարող են այլ երկրների զերծ պահել ռուսական զենքի գնումներից, «Ամերիկայի Ձայն»-ին ասել է Ամերիկայի արտաքին քաղաքականության խորհրդի վերլուծաբան Սթիվեն Բլանկը.

«Վատ չէր լինի, եթե ռուսական զենքերը դադարեին Հարավային Կովկաս գալ, միգուցե դա կողմերին կօգներ խաղաղության հասնել»:

Բլանկի խոսքով, թեեւ հավանաբար պետական մակարդակով ռուսական զենքի գնորդների համար որոշակի բացառություններ կարվեն, այնուամենայնիվ, Ռուսաստանից խոշոր քանակությամբ զենք գնողներըը, այդ թվում եւ Ադրբեջանն ու Հայաստանը, կարող են անակնկալների հանդիպել.

«Ընդհանրապես, հնարավոր է պատժամիջոցների ենթարկել ամբողջ մի կառավարություն»:

Ատլանտյան խորհրդի վերլուծաբան, նախկին դեսպան Ջոն Հերբսթը նույնպես փոքր է գնահատում պետական մակարդակով ռուսական զենքի գնորդների դեմ պատժամիջոցներ կիրառելու հավանականությունը, սակայն, ավելացնում է.

«Պատժամիջոցների ենթարկված ռուսական ընկերությունների հետ գործարքներ կնքողները պետք է պատրաստ լինեն որոշակի հետեւանքների»:

Հերբսթի կարծիքով, նոր պատժամիջոցներն անհրաժեշտ են, հաշվի առնելով Ռուսաստանի կողմից Խորհրդային Միության վերականգնման փորձերը.

«Եթե Պուտինը ցանկանում է վերանայել անցյալը, մեր գործն է թուլացնել նրան՝ նվազեցնելով ագրեսիվ գործողություններ իրականացնելու համար նրա ռեսուրսները»:

Վերլուծաբանների կարծիքով, պատժամիջոցներն իրականում թողնում են իրենց ազդեցությունը Ռուսաստանի վերնախավի վրա, նույնիսկ եթե պաշտոնական Մոսկվան դա չի ընդունում:

«Եկեք պարզ խոսենք, պատժամիջոցները նրանց կործանում են», — Սթիվեն Բլանկի խոսքով, Հայաստանի շահերից է բխում ձերբազատվել Մոսկվայի ճնշումներից եւ հավասար հարաբերություններ հաստատել բոլորի հետ.

«Կատարյալ կլիներ Հայաստանի համար, եթե այն կարողանար մազապուրծ լինել ռուսական տնտեսական ճիրաններից եւ ի վիճակի լիներ հավասարազոր համագործակցություն զարգացնել բոլորի՝ Ռուսաստանի, Եվրամիության, մյուսների հետ։ Սակայն դա տեղի չի ունենա, քանի դեռ կարգավորված չէ ղարաբաղյան խնդիրը, քանի որ Թուրքիան Հայաստանից շրջափակումը չի հանելու մինչեւ դա տեղի չունենա»:

Դեսպան Հերբսթն, ով եղել էր Հայաստանում դեռեւս խորհրդային տարիներին, հիշում է՝ Հայաստանը Խորհրդային Միության վերջին տարիներին ազատության եւ ինտելեկտի կղզյակներից էր.

«Խորհրդային տարիներին բոլորը գիտեին, որ ԽՍՀՄ-ում առավել դինամիկ վայրը Հայաստանն էր՝ թե՛ տնտեսապես, թե՛ ազատ արտահայտման եւ թե՛ մտավոր կյանքի տեսանկյունից: Հետխորհրդային ժամանակահատվածում դա այլեւս այդպես չէ, պատճառը՝ իշխանությունը խոնարհվել է Կրեմլի առջեւ»:

amerikayidzayn

Իսպանիայի բանտերից մեկի կալանավորը, ում բժիշկները մահացած էին համարել, անսպասելի «կենդանացել» է դիահերձումից առաջ, հայտնում է La Voz de Galicia պարբերականը:

Իրադարձությունը տեղի է ունեցել Աստուրիայի ուղղիչ կենտրոնում: Գողության համար պատիժ կրող Գոնսալո Մոնտոյա Խիմենեսը չի ներկայացել առավոտյան սովորական անվանականչին: Բանտի ծառայողները նրան հայտնաբերել են աթոռին անշարժ նստած, նրա զարկերակը չէր շոշափվում: Հրավիրված բժիշկները հայտնել են, որ նա մահացած է: Դատապարտյալի մահվան մասին իրազեկել են նրա ազգականներին:

Մարմինը տեղափոխել են դատական բժշկության ինստիտուտ, որտեղ բժիշկները պետք է դիահերձում կատարեին: Այդ պահին պարկից, որտեղ մարմինն էր, ձայներ են լսվել, տղամարդը ողջ էր:

Բանտարկյալի ազգականները հայտնել են, որ նա էպիլեպսիայով է հիվանդ: Նրանց կարծիքով՝ շնչառության անսպասելի կանգը կապված է դեղերը սխալ ընդունելու հետ: Դրանից զատ, նրանք կարծում են, որ խախտվել են բժշկական ուղեցույցները, քանի որ մահվան մասին եզրակացրած 3 բժիշկները չէին կարող միաժամանակ սխալվել: Ազգականները ենթադրում են, որ եզրակացությունը տվել է բժիշկներից միայն մեկը, իսկ մյուսները ստորագրել են՝ մարմինը չզննելով: Նրանք պատրաստվում են դատական հայց ներկայացնել:

Հիվանդն ուշքի է եկել եւ գտնվում է տեղական հիվանդանոցներից մեկում:

news.am

Գլենդելը Լյուդմիլա Աբրահամյանի կողմից քաղաքին ներկայացված դատական հայցով ոստիկանության նախկին լեյտենանտին վճարելու է 550 հազար դոլար:

Նա կարծում է, որ ռասայական եւ գենդերային խտրականության զոհ է դարձել, քանի որ չի ստացել կապիտանի պաշտոնը, չնայած նրան, որ նա լավագույն որակավորում ունեցող թեկնածուն էր, գրում է LATimes- ը:

Հայցում նշվում է, որ խտրականությունը թույլ է տրվել այն ժամանակվա ղեկավար Ռոբերտ Կաստրոյի կամքով:

Քաղաքի շահերը ներկայացնող փաստաբանի գլխավոր օգնական Էն Մաուրերը նշել է, որ կարգավորումը «քաղաքի կամ նրա աշխատակիցների կողմից որեւէ խախտման ճանաչում չի նշանակում»:

«Քաղաքի դիրքորոշումը կայանում է նրանում, որ խտրականության մասին պնդումները անհիմն են», — ասել է նա:

Կարգավորման համաձայնագրի համաձայն՝ 550 000 դոլարի գումարը ներառում է աշխատավարձի վճարում, զգացմունքային խանգարումների կամ ֆիզիկական հիվանդության փոխհատուցումը, փաստաբանի ծախսեր: Աբրահամյանը նույնպես համաձայնել է հեռանալ վարչությունից:

Թուրքիայի ներքին գործերի նախարար Սուլեյման Սոյլուն խոսել է Իրանի հետ սահմանին կառուցվող պատի շինարակական աշխատանքների ընթացքի, ինչպես նաև Հայաստանի և Վրաստանի  հետ  սահմանին իրականացվելիք անվտանգության միջոցառումների   մասին:

Ըստ «Borsagundem» լրատվական կայքի՝ Սոյլուի խոսքերով այս պահի դրությամբ թուրք-իրանական սահմանին կառուցվող 144կմ-ոց պատի գրեթե կեսը կառուցված է:  Նախարարը շեշտել է, որ նշյալ պատը պետք է կանխի ապօրինի սահմանահատումները, ինչպես նաև ահաբեկիչների մուտքը իրենց երկիր:

Անդրադառնալով հայ-թուրքական և թուրք-վրացական սահմանին իրականացվելիք անվտանգության միջոցառումներին՝ նա տեղեկացրել է, որ Թուրքիան պատրաստվում է այնտեղ տեղադրել էլեկտրոնային համակարգեր:

«Կարծում եմ  1 կամ 2 ամսվա ընթացքում Արդահանում նմանատիպ միջոցներ կձեռնարկենք: Այս պահի դրությամբ այնտեղ պատ չենք կառուցում, այնտեղ միայն կտեղադրենք նոր էլեկտրոնային համակարգեր»:

Հիշեցնենք, որ Թուրքիան ավելի վաղ սկսել էր հայ-թուրքական սահմանի Կարս նահանգի հատվածում տեղադրած տեսախցիկների փորձարկման աշխատանքները

ermenihaber.am

armeniasputnik.am Տաջիկստանի կառավարությունը հանձնարարել է նախարարություններին սկսել գործընթացը և վերջապես ուղիղ օդային հաղորդակցություն հաստատել Հայաստանի հետ։
Տաջիկստանի կառավարությունը հանձնարարել է համապատասխան գերատեսչություներին անհրաժեշտ միջոցներ ձեռնարկել Հայաստանի հետ օդային հաղորդակցություն հաստատելու համար, երկուշաբթի հաղորդում է News.tj —ը։

Տաջիկստանի կառավարության` օրերս ընդունած որոշմամբ հանձնարարվում է հաստատել Տաջիկստանի և Հայաստանի կառավարությունների միջև համաձայնագիրը, որ ստորագրվել է 2017թ-ի ապրիլի 14-ին Երևանում։

«Տաջիկստանի Հանրապետության արտաքին գործերի նախարարությանը հանձնարարվում է սահմանված կարգով ծանուցել հայկական կողմին Տաջիկստանի կողմից ներպետական ընթացակարգերի կատարման մասին, որոնք անհրաժեշտ են նշված համաձայնագիրը կյանքի կոչելու համար», — նշում է պարբերականը։

Հիշեցնենք, որ Հայաստանի ու Տաջիկստանի նախագահներ Սերժ Սարգսյանը և Էմոմալի Ռահմոնը պայմանավորվել են դիտարկել երկու երկրների միջև ավիաչվերթեր գործարկելու հնարավորությունը։

«Այդ նախագծի շրջանակում մենք պատրաստ ենք մեր տաջիկ գործընկերներին արտոնությունների փաթեթ տրամադրել, որոնք ձևավորվում են Հայաստանի «բաց երկնքի» քաղաքականության իրագործման շրջանակում», — հունիսի 14-ին տաջիկ գործընկերոջ հետ հանդիպումից հետո ասել է Սարգսյանը։

Տաջիկստանի Հանրապետության նախագահ Էմոմալի Ռահմոնը պաշտոնական այցով Հայաստան էր ժամանել հունիսի 14-ին։։ Նրան հրավիրել էր Հայաստանի նախագահ Սերժ Սարգսյանը։