Թուրքիայի քաղաքացիները, երբ իմանում են,  թե իրենց նախահայրերը  հայ, հույն կամ այլ ազգից են … տագնապ են ապրում։

Թուրքիայի կառավարությունը մի online ծառայություն է ստեղծել, որի միջոցով քաղաքացիները կարող են ընդամենը մի քանի րոպեի ընթացքում, տեղեկանալ, թե ովքեր են եղել իրենց նախնիները: Առաջին օրը դիմողների ահռելի թվաքանակի պատճառով ցանցը խափանվել է, սակայն որոշ ժամանակ անց կրկին շարունակել աշխատանքը:

Թուրքիայում տիրող մթնոլորտը և ԱՔՓ-ի կուսակցության սոցիալ-քաղաքական վիճակը քաջ գիտցողների համար այդ իրողությունը շատ բնական է: Միայն հեռվում գտնվող, ուստի ՝ քիչ տեղյակների համար է կարող է զարմանալի թվալ: Ահա թե ինչու էին իբր քեմալիստ, իբր Աթաթյուրքիստ (սրանց միջև տարբերություններ կան), իբրև աշխարհական (laik), հանրապետական, ազգայնական խմբակներն ատելությամբ լցված, այսպես ասած, կրակ թափում, այսինքն ՝ վախենում նրանց իշխանության գալուց, և այդ վախն իրականացավ…

Թուրքական Etat Nation, այսինքն՝ Ազգային պետության ռեժիմը, հավաքականությունը ամուր պահող (իբրև թե) միասնականությունը, այսինքն՝ երկրի անբաժանելիությունը ապահովող ցեմենտը «թրքությունն» էր, սակայն այնպիսի մի «թրքություն». որը մերժում էր կրոնական եղբայրությունը՝ թաքնվելով աշխարհիկ սկզբունքների ետևում: Սակայն այն արդեն կրոնական հակում ունեցողների կամքին հակառակ էր և անընդունելի: Ահա թե ինչու էր ծնվում հայ և այլ փոքրամասնությունների հակասական դիրքորոշումը՝ հանդեպ երկու (քեմալական, նաև այլ և կրոնական) գլխավոր խմբակների:

Հայ և այլ փոքրամասնությունների որոշ մասն իրենց ավելի մոտ էին զգում քեմալիստականներին, քանի որ արևմտամետ էին (աշխարհիկ, եվրոպամետ, ոչ թե մոլեռանդ իսլամիստ, արթի): Սակայն թաքնված կամ ոչ, թուրք ազգայնական կեցվածքը խանգարում էր: ԵՎ ուրեմն ի՞նչ անել…

Վերջին ժամանակներս հայ և այլ փոքրամասնություններ սկսեցին ավելի հակվել դեպի կրոնականները, ավելի մոտ զգալ նրանց, քանի որ իբր իրենց ոչ ազգային կեցվածքը և փիլիսոփայությունն ու մանավանդ կրոնը կարևորելը եկեղեցասեր թրքահայությանը դուր էր գալիս և հոգնած ՝ ազգայնական վերաբերմունքից, լռելյայն – չարձանագրված համաձայնություն էին կնքել իրենց հետ, ասելով՝ ”դու իմ կրոնին մի միջամտիր, ես էլ քո կրոնին չեմ միջամտի”…

Վերջին ժամանակներս, աշխուժացած ազգայնական, նույնիսկ քեմալիստասեր դրսևորումներին չպետք է խաբվել: Այս ամենի պատճառը միայն ու միայն 2019թ. սպասվելիք միանգամից երեք ընտրություններն են, ընտրարշավի մեկնարկը, քանի որ Էրդողանը ֆաթուլլահ Գյուլենի հետ իր կապերը խզելուց հետո իրեն աջակցողների պակասն ստիպված է լրացնել քեմալիստների ու ազգայնականներով:

Սակայն այդ ընթացքում չի մոռանում կամաց-կամաց իրականացնել իր թաքցրած բուն ծրագիրը՝ կատարելով տարաբնույթ քայլեր, որպեսզի մինչև օրս երկրում եղած բոլոր Քեմալիստական հասկացողությունները տապալվեն: Քանի, իսլամական մի երկիր ստեղծելու համար, արգելք են ՝ քեմալիստական ազգայնական և նման հասկացությունները:

Ուրեմն, Թրքահայությունը պիտի որոշե ՝ քեամլիստական, թե՞ կրոնական դրվածք։ Եթե այսպիսի հարցադրումը սխալ է, երկուսն էլ ո՛չ ուրեմն… Մնում է  քրդամետների խմբակը… Արդյո՞ք…

Համենայն դեպս, վերջին 96 ժամին, ինչ գործում է  Թուրքիայի կառավարության  նոր online ծառայությունը, որի շնորհիվ Թուրքիայի (մասնավորապես թուրք  քրդերը), քաղաքացիները, կարող են ընդամենը մի քանի րոպեի ընթացքում, տեղեկանալ, թե ովքեր են եղել իրենց նախնիները, դիմողների ահռելի թվաքանակի պատճառով ցանցը խափանվել է, սակայն որոշ ժամանակ անց կրկին շարունակել աշխատանքը:

Համացանցում կարողանում ենք կարդալ այն մարդկանց ունեցած տագնապային ապրումները, երբ իրենց հայտնում են, թե  իրենց նախնիները նույնիսկ  Հայ են…

Իհարկե նման ”տագնապներն” ավելի շատ ապրում են այն անհատները, որոնք  հասարականության մեջ հայտնի են  իբրեւ թուրք ազգայնամոլ …

Թուրքիայի Հանրապետության այն հիմնադիր կարգախոսը, որ ասում է. ”ԵՐԱՆԻ ՆՐԱՆ ՝ ‘ԵՍ ԹՈՒՐՔ ԵՄ’ ԱՍՈՂԻՆ”, ուրեմն արդյոք հարված է ստանում այս online ծառայությունից։ Ո՞վ գիտե ։

Րաֆֆի Հերմոն Արաքս

Ր. Հ.Ա.

Համացանցում են հայտնվել ռուսական Ան-148 ինքնաթիռի կործանման պահի կադրերը, այն ֆիքսել է Մերձմոսկովյան շրջանում գտնվող սեփական տներից մեկի անվտանգության համակարգի տեսախցիկը: Կադրերում երևում է օդանավի՝ գետնին բախվելու պահին տեղի ունեցած պայթյունի պահը:

Հիշեցնենք, որ Մոսկվայի մարզի Ռամենսկի շրջանում վթարի է ենթարկվել Մոսկվայի «Դոմոդեդովո» օդանավակայանից մեկնած և դեպի Օրսկ քաղաք ուղևորվող Ան-148 ինքնաթիռը:

Ինքնաթիռի կործանման պատճառը, նախնական տվյալներով, շարժիչներից մեկի խափանումն ու դրան հաջորդած բռնկումն է եղել: Կործանման հետևանքով մահացել է 71 մարդ, այդ թվում՝ երկու հայ: Զոհերի մարմինների ճանաչումը տեղի կունենա Մոսկվայի փորձաքննությունների բյուրոյում:

Զոհերի հոգեհանգստի արարողությունները կանցկացվեն Օրսկի թեմի բոլոր եկեղեցիներում 40 օրվա ընթացքում:

Մոսկվայի ժամանակով փետրվարի 11-ին, ժամը  14։21 «Դոմոդեդովո» օդանավակայանից դուրս գալուց 7 րոպե անց Ան–148 ինքնաթիռը կորել է ռադարների տեսադաշտից և կործանվել։Այն Մոսկվայից մեկնում էր Օրսկ։
Ինքնաթիռում 71 մարդ է եղել, որից 65–ը`ուղևոր։

«Մաշ» տելեգրամ ալիքը հաղորդում է, որ  կործանված Ան–148 ինքնաթիռի անձնակազմի անդամների ինքնությունը պարզվել է։ Անձնակազմի 6 անդամներն են.

Վալերի Գոուբանով` անձնակազմի ղեկավար,

Սերգեյ Ղամբարյան` 2–րդ օդաչու,

Անաստասիա Սլավինսկայա` բորտուղեկցորդուհի,

Վիկտորյա Կոբոլ` ուղեկցորդուհի,

Օլեգ Սերգեև` տեխնիկական աշխատող,

Անդրեյ Ռյաբինին` տեխնիկական աշխատող։

Հրապարակվել է զոհերի ամբողջական ցանկը, համաձայն որի, բացի երկրորդ օդաչուից, ազգությամբ հայ է նաեւ ուղեւորներից մեկը՝ Վարսիկ Սեւոյանը: Այսպիսով, ինքնաթիռում 2 հայ է եղել: Զոհվել են նաեւ 2 երեխաներ:

ԶԼՄ-ների փոխանցմամբ, ականատեսները հայտնել են, որ ինքնաթիռի թեւի հատվածում ինչ-որ բան է պայթել, այնուհետ օդանավն ընկել է: Որոնողական աշխատանքների վայրում սաստիկ ձյուն րէ, քամի ու վատ տեսանելիություն։
Ինչպես հաղորդում է «Արմենպրես»-ը, «Lenta.ru»-ի աղբյուրի խոսքով՝ օդանավի անկման վայրից ոչ հեռու գտնվել են այլ օդային ապարատի բեկորներ։ Մեկ այլ աղբյուր չի բացառել, որ դա ուղղաթիռ է, որին օդում կարող էր բախվել Ան-148-ը։

Ըստ ՏԱՍՍ-ի աղբյուրի՝ օդանավի կործանման պատճառ կարող էին լինել եղանակային պայմանները, ինչպես նաև անձնակազմի սխալը։ Մեկ այլ աղբյուրը հայտնել է, որ ինքնաթիռի վթարից հետո կենդանի մնացածներ չկան։

Ռուսաստանում այսօր՝ փետրվարի 12-ը ազդարարվել է սգո օր:

Իսրայելի ավիացիոն ուժերը հայտնել են, որ երկրի զգալի հատվածում փակել են օդային տարածքը: Երկրի գլխավոր օդանավակայանը, սակայն, շարունակում է աշխատել նորմալ ռեժիմով՝ չնայած իրանական անօդաչու թռչող սարքի հետ տեղի ունեցած միջադեպին և դրան հաջորդած ժամանակահատվածում Սիրիայի տարածքում իսրայելական օդուժի թռիչքներին: Ինչպես հաղորդում է «Արմենպրես»-ը, այս մասին հայտնում է «ՌԻԱ Նովոստի»-ն:
Տեղի իշխանությունները հայտնել են նաև, որ փետրվարի 10-ի առավոտյան՝ դեպքերի ամենաթեժ պահին, 15-20 րոպեով հետաձգվել են Թել Ավիվի միջազգային օդանավակայանից թռիչք և վայրէջք իրականացնող մի քանի ինքնաթիռների թռիչքներ:
«Ներկայում օդանավակայանն աշխատում է նորմալ ռեժիմով: Շֆաիմից հյուսիս ողջ օդային տարածքը փակ է բոլոր տեսակի թռիչքների համար»,- ասվում է Իսրայելի օդանավակայանների ղեկավարման գերատեսչության հայտարարության մեջ:
Ավելի վաղ Իսրայելի զինված ուժերից հայտնել էին, որ վերցրել են Սիրիայից այդ երկրի տարածք ներխուժած իրանական անօդաչու թռչող սարքի կառավարումը: Դրան ի պատասխան նրանք հարձակվել են Սիրիայի տարածքում իրանական թիրախների վրա:
Դրանից հետո, Իսրայելի զինված ուժերից տեղեկացրեցին երկրի հյուսիսում Սիրիայից օդային հարվածի հետևանքով իսրայելական F-16 ռազմական կործանիչի ընկնելու մասին: Ինքնաթիռի անձնակազմը ողջ էր մնացել:
Ուշագրավ է, որ սիրիական SANA գործակալության տվյալներով՝ իսրայելական կողմը հարձակվել է երկրի կենտրոնում պետական ռազմական օբյեկտների վրա, ինչին ի պատասխան սիրիական հակաօդային պաշտպանության համակարգերը հարվածներ են հասցրել իսրայելական ինքնաթիռներին:

Հոնկ Կոնգի հետազոտական դրամաշնորհների խորհուրդը արտերկրից ժամանելիք ուսանողներին առաջարկում է 230-ից ավելի կրթաթոշակ: Նախաձեռնության նպատակը՝ աշխարհի լավագույն ուսանողներին Հոնկ Կոնգյան բուհեր հրավիրելն է: Կրթաթոշակը ներառում է 3 տարվա համար նախատեսված օժանդակություն: Տարեկան 30,000 ԱՄՆ դոլար գումար՝ կեցության և ուսման ծախսերի համար, ինչպես նաև տարեկան 1,300 դոլար՝ հետազոտական գործուղումների համար: Հայտերի ընդունման վերջնաժամկետը տարբեր է (կախված համալսարանից):

Մանրամասներին կարող եք ծանոթանալ կազմակերպչի պաշտոնական կայքում:

Հայկական արվեստին տարբեր առիթներով հոտնկայս ծափահարել է ԱՄՆ-ի քաղաքական, տնտեսական եւ դիվանագիտական վերնախավը: Սակայն Միացյալ Նահանգների արդարադատության նախարարության հայտարարության համաձայն, որոշ անձինք հայկական մշակույթի պատրվակով օգնում են հայաստանցիներին կեղծ ճանապարհով ԱՄՆ-ի վիզաներ ստանալ. հայտնում է «Ամերիկայի ձայնը»:

Իրավապահների հաղորդմամբ՝ Նյու Յորքի Բրուքլին թաղամասի դատարանում մեղադրանք է ներկայացվել Հայաստանից Միացյալ Նահանգներ տեղափոխված, ներկայումս՝ ԱՄՆ-ի քաղաքացի 47-ամյա Ստելա Բոյաջյանին, ինչպես նաեւ Հայաստանի քաղաքացիներ 30-ամյա Հրաչյա Աթոյանին ու 41-ամյա Դիանա Գրիգորյանին: Հրաչյա Աթոյանն այժմ խախտելով իր վիզայի ժամկետը բնակվում է Գլենդելում առանց որեւէ իրավական կարգավիճակի, մինչդեռ Դիանա Գրիգորյանը, ում դատական թղթերում նաեւ «Դինա Ակոպովնա» են անվանում, այժմ Հայաստանում է:

Մեղադրանքի համաձայն, 2013-2014 թվականներին Ստելա Բոյաջյանն իր ղեկավարած Big Apple Music Awards Foundation ընկերության միջոցով Հայաստանից պարային եւ երաժշտական կեղծ խմբեր էր հրավիրում Միացյալ Նահանգներ: ԱՄՆ-ի օրենքների համաձայն՝ արվեստի գործիչների համար Միացյալ Նահանգներ P-3 մուտքի վիզա ստանալն ավելի հեշտ է, քան ավանդական զբոսաշրջիկների համար, ովքեր պետք է ապացուցեն, որ Հայաստան են վերադառնալու:

Իրականում, երաժշտական եւ պարային խմբերի փոխարեն Հայաստանից Միացյալ Նահանգներ էին ժամանում դրանց հետ որեւէ կապ չունեցող անձինք՝ ներկայանալով որպես երաժիշտներ եւ պարողներ: Յուրաքանչյուր անձից իրենց ապօրինի ծառայության համար մեղադրյալները ստանում էին 3000-15 000 դոլար, հաղորդում է ԱՄՆ-ի արդարադատության նախարարությունը:

Միացյալ Նահանգների հյուպատոսական ծառայությանը խաբելու նպատակով Հայաստանում կեղծ պարային համույթների անդամներին լուսանկարում էին ավանդական հայկական պարային զգեստներով, իսկ ԱՄՆ-ում կեղծ համերգներ կազմակերպում՝ պատրաստելով կեղծ ցուցանակներ եւ կեղծ թռուցիկներ:

Դրանից բացի, արդեն Միացյալ Նահանգներ իրենց օգնությամբ ապօրինի ժամանած քաղաքացիներին հավելյալ գումարով մեղադրյալներն օգնում էին երկարաձգել վիզաները՝ հայկական մշակույթի տարածման պատրվակով: Հատկանշական է, որ իրենց ապօրինի գործունեությունը եւ յուրաքանչյուր անձից ստացվող գումարի չափը մեղադրյալները քննարկել են նաեւ «Ֆեյսբուք» սոցցանցի միջոցով:

Թեեւ Big Apple Music Awards Foundation ընկերության կայքում նշված հեռախոսահամարն անջատված էր, «Ամերիկայի ձայն»-ին հաջողվել էր հեռախոսով կապվել մեղադրյալներից մեկի՝ Ստելա Բոյաջյանի հետ, ով հայտնեց, որ հերքում է բոլոր մեղադրանքները եւ խոստացավ իր դիրքորոշումն առավել մանրամասն հաղորդել պաշտպանի միջոցով, ով տեսանյութի եթեր դուրս գալու ժամին մեզ հետ այդպես էլ կապ չէր հաստատել:

Sputnik: Հայ գործարար Գևորգ Բազինյանին Ստավրոպոլի ոստիկանությունը փնտրում էր անցած տարվա աշնանից։ Կիրովսկի շրջանի անհետ կորած բնակչի դին հայտնաբերվել է Նովոպավլովսկ արդյունաբերական գոտում։

Ռուսաստանի քննչական կոմիտեի Ստավրապոլի քննչական վարչության մամուլի ծառայությունից հայտնել են, որ տղամարդու մարմնի վրա բռնության հետքեր են եղել։
Գևորգ Բազինյանը անհետ կորել էր 2017 թվականի հոկտեմբերին։ Նա իր սեփական մեքենայով դուրս էր եկել աշխատանքի վայրից ու անհետացել։ Դրանից հետո նրան ոչ ոք չէր տեսել։ Նույն օրը երեկոյան Բազինյանին պատկանող «ԳԱԶ 3302»-ը հայտնաբերվել էր անտառային գոտում՝ Նովոպավլովսկի քաղաքային աղբանոցից ոչ հեռու։

64-ամյա հայ գործարարի սպանության հանգամանքով քրեական գործ է հարուցվել։ Դեպքի վայրում քննիչներ են աշխատում։

Մահվանից առաջ տղամարդուն գլխատել են։ Ոստիկանները գտել են նրա մարմինը, բայց դեռ չի հաջողվել գտնել տղամարդու գլուխը։ Հիմնական վարկածը՝ պատվիրված սպանությունն է։

Գևորգ Բազինյանը մինչև 2017 թվականի նոյեմբերը զբաղեցրել է 2002 թվականին Նովոպավլոսվսկում գրանցված «Ապոլոնսկոե» ՍՊԸ-ի գլխավոր տնօրենի պաշտոնը։ Ձեռնարկությունը զբաղվում է խմելու ջրի ու ալկոհոլային թորած խմիչքների՝ վիսկիի, կոնյակի, ջինի, լիկյորի արտադրությամբ։

ԱՄՆ «Դեմոկրատական կուսակցության» Կալիֆորնիայի սենատոր Թեդ Լյուն հանդես է եկել հայամետ հայտարարությամբ։ Նա առաջարկել է Հայոց ցեղասպանությունը ճանաչող օրինագիծ մշակել՝ ի պատասխան Սիրիայում ԱՄՆ զորքերի դեմ թուրքական սպառնալիքների։

Թուրքական «Olay.com.tr» լրատվակայքի տեղեկացմամբ ԱՄՆ Կոնգրեսի ստորին պալատի նիստի ժամանակ քննարկվել է սիրիական հարցը։ Թուրքիան խստորեն քննադատվել է Աֆրինում սանձազերծած ռազմագործողությունների պատճառով։

Նիստին ելույթ ունեցած Թեդ Լյուն մասնավորապես ասել է․ «Մենք բոլորս պիտի հասկանանք, որ Հայոց ցեղասպանությունը տեղի է ունեցել։ Դա պատմական իրողություն է։ Եվ միակ պատճառը, որ այդ օրինագիծը չի հաստատվում, այն է, որ մենք ցանկանում ենք պահպանել Թուրքիայի հետ մեր հարաբերությունները։

Հիմա իսկական ժամանակն է այդ օրինագիծը հաստատելու և Թուրքիային ասելու․ «Հեյ, տես, եթե դու մեր նկատմամբ նման գործողություններ կատարես, մենք քեզ այնպիսի բաներ կանենք, որ քեզ բոլորովին դուր չի գա»:

Նիստը նախագահող Իլեանա Ռոս-Լեյտինենը և կոնգրեսական Դեյվիդ Չիչիլինեն ևս քննադատել են Աֆրինի գործողությունները՝ բնութագրելով դրանք որպես բռնություն ԱՄՆ-ի կողմից աջակցվող քրդերի և արաբների նկատմամբ։

Ուկրաինայի ազգային ոստիկանությունում անհանգստացած են տեղի քրեական շրջանակների վրա ադրբեջանցի «օրենքով գող» Նադիր Սալիֆովի (հայտնի որպես Լոտու Գուլի) աճող ազդեցությամբ, հաղորդում է «Sputnik Азербайджан»-ը։

Լրատվականի տեղեկություններով՝ 25 տարի բանտում պատիժն կրելուց հետո Նադիր Սալիֆովը բնակություն է հաստատել Թուրքիայում և սկսել է իր շուրջ հանցագործ շրջապատ հավաքել՝ զուգահեռ տարածելով իր ազդեցությունը նաև Ուկրաինայում։

«Բառացիորեն իր ազատ արձակումից անմիջապես Ուկրաինայի տարածքում բանջարեղենի շուկայում առևտրով զբաղվող տարբեր ազգության ներկայացուցիչներ էին առևանգվում (հայեր, ուկրաինացիներ)։ Նադիր Սալիֆովը շատ ժամանակակից հանցագործ է, որը փրկագինը ընդունում է բիթքոիններով»,-նշել է ուկրաինական ոստիկանության պետի առաջին տեղակալ Վյաչեսլավ Աբրոսկինը։

Ոստիկանը նշել է, որ Սալիֆովը փորձում է ԱՊՀ երկրներում վերցնել կանաչեղենի շուկաները, քանի որ դրա ետևում մեծ փողեր կան։

Աբրոսկինի խոսքով՝ Սալիֆովը գերիներին ազատ արձակելու համար պահանջում է մեկ միլիոն դոլար և բարձր։

Նրա ծրագրերում ոչ միայն սննդամթերքի շուկայում լիիրավ ազդեցություն ձեռք բերելն է, նա նաև ուզում է Ուկրաինայում իր կլանները ստեղծել, որոնց շնորհիվ իր ձեռքը կվերցնի հանցագործ աշխահի իշխանությունը։