Ժամը 19:31-ին կապ է հաստատվել ՌԴ Բաշկորտոստանի Ճգնաժամային Կառավարման Կենտրոնի օպերատիվ հերթապահի հետ, ով հաղորդել է, որ տեղական ժամանակով ժամը 12:18-ին դիտահորում աշխատանքներ կատարելիս մահացել են ՀՀ քաղաքացիներ՝ Կամո Գերասիմի Պետրոսյանը (1983 թ.), Մերուժան Սերգեյի Աֆանիկովը (1962 թ.), Սուրիկ Ժորայի Աֆանիկովը (1981 թ.), Ռոբերտ Գուրգենի Հակոբյանը (1962 թ.) և Ռաֆիկ Գագիկի Գրիգորյանը (1989 թ., ՌԴ քաղաքացի), իսկ Ռուստամ Ռոբերտի Մելքոնյանը (1973 թ.) հոսպիտալացվել է Ուֆայի քաղաքային հիվանդանոց:

Բժիշկները տուժածի առողջական վիճակը գնահատել են միջին ծանրության:

Սիրիայի կառավարությունն այժմ իր լիակատար վերահսկողությունն է հաստատել Դոումայում, որտեղ ըստ կասկածների, շաբաթ օրն իրականացվել էր քիմիական հարձակում։ Այստեղից դուրս է բերվել ավելի քան 41 հազար մարդ, այդ թվում 3 հազար 300 ապստամբ։ Այսինքն՝ Սիրիայի նախագահ Բաշար ալ Ասադի դիրքերն ավելի են ամրապնդվում, երբ ԱՄՆ-ի նախագահ Դոնալդ Թրամփը նրան «Գազով խեղդող անասուն» է անվանում։ Իսկ Թվիթերում Թրամփի գրառումներն էլ հուշում են Սիրիայում ռուսական ուժերի հետ առճակատման հնարավորության մասին։

Ինչպես նախկին դիվանագետ Ջերալդ Ֆայըրստայնն է ասում, Սիրիայում իրադրությունը չափից շատ է սրվում։ «Հակասություններ Իրանի ու Իսրայելի միջեւ։ ԱՄՆ-ի ու Ռուսաստանի միջեւ ռազմական առերեսման հնարավորություն։ Սիրիայում Հեզբուլլահի վերահսկողության տակ գտնվող տարածքների ընդլայնում։ Եվ իհարկե բախումներ Թուրքիայի ու քրդերի միջեւ, որը հակասում է ԱՄՆ-ին շահերին»։

 Սպիտակ տունը չորեքշաբթի օրը հերքեց այն լուրերը, թե ԱՄՆ-ը ունի դեպի Սիրիա հրթիռներ արձակելու հստակ ծրագիր։ Սակայն խոսնակ Սառա Սանդերսը հաստատեց, որ Թրամփը Ռուսաստանին է համարում պատասխանատու Սիրիայում իրականացվող վայրագությունների համար։

«Նրանք երաշխավորել էին, որ քիմիական զենքեր այլեւս չեն կիրառվի Սիրիայում։ Սակայն խոստումը չկատարեցին ու բացի այդ, Ասադին օգնելու նպատակով վետոյի ենթարկեցին ՄԱԿ-ի 6 բանաձեւ»։

Իսկ ԱՄՆ-ի պաշտպանության նախարար Ջիմ Մեթիսը հայտարարում է, թե «Պատրաստ կանգնած ենք, նախագահի որոշման դեպքում ռազմական տարբերակներ ներկայացնելու համար»։

Ռուսաստանն ու Սիրիան սակայն հերքում են այստեղ շաբաթ օրը թունավոր գազ կիրառելու մասին մեղադրանքները։ Ռուս վերլուծաբաններից շատերն էլ կարծում են, որ Մոսկվան անպայման կտա պատասխան, եթե ամերիկյան կողմից լինի հրթիռային գրոհ։ Նրանցից Ֆյոդոր Լուկյանովն ասում է. «Սիրիային հարված հասցնելու ԱՄՆ-ի նախագահի հրամանը Ռուսաստանում կարող է համարվել ծայրահեղ թշնամանքի դրսեւորու»։

Մեկ տարի առաջ ԱՄՆ-ը իրականացրեց գրոհ ընդդեմ այն բազայի, որտեղից, ըստ ստացված տեղեկությունների, իրականացվել էր քիմիական հարձակում։ Սակայն այս տարի, ասում են փորձագետները, իրադրությունն այլ է։ Իրադրությունն այստեղ չափազանց լարված է։

«Իսլամական պետություն» ահաբեկչական խմբավորումը սպառնացել է, որ Ռուսաստանի նախագահ Վլադիմիր Պուտինը «կվճարի մահմեդականներին սպանելու համար»՝ հրապարակելով Ֆուտբոլի աշխարհի առաջնությունը թիրախավորող պաստառ, գրում է The Daily Mail-ը:

Պաստառում ջիհադականը պատկերված է պայթյունի ֆոնին՝ ձեռքին AK-47, իսկ հետևի ֆոնին՝ ֆուտբոլային մարզադաշտ: Լուսանկարի ձախ հատվածում կարելի է տեսնել ՌԴ նախագահ Վլադիմիր Պուտինին՝ նշանակետի տակ:

Սպառնալիքը հավանաբար կապված է ԻՊ-ի դեմ պայքարում Սիրիայի նախագահ Բաշար ալ Ասադին Պուտինի աջակցության հետ:

Ավելի վաղ ահաբեկչական խմբավորումը մի շարք այլ պաստառներ է տարածել՝ Ֆուտբոլի աշխարհի առաջնության ընթացքում ահաբեկչական հարձակումներով սպառնալով:

Հռոմի Ֆրանցիսկոս պապը Վատիկանի պարտեզներում կօծի հայ մշակույթի հերոս, Տիեզերական եկեղեցու վարդապետ, Արևելքի և Արևմուտքի իսկական կամուրջ և էկումենիզմի խորհրդանիշ Սուրբ Գրիգոր Նարեկացու բրոնզաձույլ արձանը։

«Արմենպրես»-ին Սուրբ Աթոռի մամուլի ծառայության գրասենյակից տեղեկացրել են, որ օծման արարողությունը տեղի կունենա ապրիլի 5-ին՝ ժամը 12:00-ին, Հայաստանի Հանրապետության նախագահ Սերժ Սարգսյանի, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, և Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսի ներկայությամբ։

Ստեղծագործության հեղինակը քանդակագործ Դավիթ Երևանցին է։ Բրոնզե արձանը պատրաստվել է Չեխիայի Հանրապետության ձուլարաններից մեկում՝ շնորհիվ Սուրբ Աթոռում Հայաստանի Հանրապետության արտակարգ և լիազոր դեսպան Միքայել Մինասյանի և Արթուր Ջանիբեկյանի ֆինանսական աջակցության։ Արձանի երկու օրինակ է ձուլվել, որոնցից մեկը Վատիկանի պարտեզների, իսկ մյուսը՝ Էջմիածնի վեհարանի համար։ Այսպիսով, արվեստի միջոցով մի ուղերձ է փոխանցվում, որն ի զորու է սերտացնել հարաբերությունները քույր եկեղեցիների միջև։

Մի քանի ժամ առաջ Վրաստանի խորհրդարանը 93 կողմ ձայներով հաստատել է Իզաբելլա Օսիպովայի թեկնածությունը ՎՀՀ հոգաբարձուների խորհրդում երկրի օմբուդսմենի գրասենյակի կողմից։

«Վրաստանի ժամանակակից պատմության մեջ դա ազգային փոքրամասնությունների առաջին իրական հաղթանակն է այդքան կենսական կարևոր հարցում։ Սա նաև Վրաստանի ազգային փոքրամասնությունների ներկայացուցիչների համատեղ ջանքերի արդյունք է, և այս հարցում հաջողությունը նույնպես նշանակալի իրադարձություն է», — Sputnik Արմենիային է հայտնել Վրաստանի եզդիների համայնքի ներկայացուցիչ, ներգրավվածության և զարգացման կենտրոնի ղեկավար Ագիտ Միրզոևը։

Նա վստահ է, որ սա ազգային փոքրամասնությունների վերջին ձեռքբերումը չէ, քանի որ միահամուռ կարելի է հաղթահարել ցանկացած արգելք։ Ազգային փոքրամասնությունները` ի դեմս Օսիպովայի, խոսափող կունենան ՎՀՀ հոգաբարձուների խորհրդում, ասաց Միրզոևը։

Ազգային փոքրամասնությունների համայնքային կազմակերպությունների ներկայացուցիչները վստահ են, որ Օսիպովան ընտրվել է այդ պաշտոնում իրենց ակտիվ մասնակցության շնորհիվ։

Վրաստանի ազգային փոքրամասնությունների համայնքային կազմակերպությունների գրեթե 60 ներկայացուցիչ, որոնց շարքում հինգ ադրբեջանցիներ կան, մի քանի շաբաթ կոչ են արել Լոմջարիային աջակցել Օսիպովայի թեկնածությանը, որն առաջադրվել է այդ պաշտոնում չորրորդ անգամ։

Ռուսաստանի քննչական կոմիտեն Կեմերովոյի «Զիմնյայա Վիշնյա» առևտրային կենտրոնի հրդեհի նոր տեսանյութ է հրապարակել: Ինչպես հաղորդում է «Արմենպրես»-ը, այս մասին հայտնում է «ՌԻԱ Նովոստին:

Տեսանյութի կադրերում ներկայացված են 64 մարդու կյանք խլած հրդեհի առաջին րոպեները: Երևում է, թե ինչպես են շփոթված մարդիկ փորձում լքել մանկական գոտին, որտեղ բռնկվել է հրդեհը:

Տեսախցիկները ֆիքսել են, որ շենքում հրդեհի բռնկվելուց մի քանի վայրկյան անց անջատվել են լուսավորությունը, և առևտրային կենտրոնի այցելուները  ստիպված են եղել ելքեր փնտրել մթության մեջ:

Կեմերովոյի 4 հարկանի առևտրային կենտրոնում հրդեհը բռնկվել էր մարտի 25-ին: Այն սկսվել է վերևի հարկից, որտեղ գտնվել են կինոսրահները և խաղային սրահները:

Առաջին քննչական գործողությունների արդյունքում պարզվել է, որ ողբերգությունից մեկ շաբաթ առաջ անջատել են առևտրային կենտրոնի ավտոմատ ազդանշանային համակարգը:

Ողբերգության պատճառները բացահայտելու աշխատանքներն իրականացնում է ՌԴ քննչական կոմիտեի կենտրոնական ապարատի քրեագետների խումբը: Քննչական խումբը ղեկավարում է ՌԴ քննչական կոմիտեի ղեկավար Ալեքսանդր Բաստրիկինը: Հրդեհի պատճառների վերաբերյալ ամբողջական փորձաքննությունը կտևի մինչև երեք ամիս:

Մարդու իրավունքների Եվրոպական դատարանը վարույթ է ընդունել «Գրիգոր Նարայանն ու մյուսներն ընդդեմ Ադրբեջանի գործը, որը վերաբերվում է 2016թ. դեկտեմբերին Տավուշի մարզի Չինարի համայնքում ադրբեջանական զինուժի ձեռնարկած դիվերսիոն ներթափանցման փորձի ժամանակ երեք հայ զինծառայողի սպանությանը:

Գործն առնչվում է Մարդու իրավունքների եվրոպական կոնվենցիայի 2-րդ հոդվածին, որի առաջին մասը կյանքի իրավունքի խախտումն է:

ՄԻԵԴ-ին դիմել են զոհված զինծառայողներ՝ 1995 թվականին ծնված Էդգար Նարայանի, 1996-ին ծնված Էրիկ Աբովյանի և 1990-ին ծնված Շավարշ Մելիքյանի ծնողներն  ու քույր-եղբայրները:

Նրանց շահերը ՄԻԵԴ-ում ներկայացնում են Արտակ Զեյնալյանն ու Արա Ղազարյանը:

Ռուսաստանը պատրաստվում է Կասպիական նավատորմիղի նավերն ու անձնակազմը Աստրախանից վերատեղակայել Դաղստանի տարածքում: Այս մասին այսօր հայտարարել է Ռուսաստանի պաշտպանության նախարար Սերգեյ Շոյգուն:

Նրա խոսքով, Կասպիական նավատորմիղի հիմնական բազան դառնալու է Մախաչկալայից հարավ գտնվող Կասպիյսկ քաղաքը:

Ռուսաստանի պաշտպանության նախարարի խոսքով Կասպիսյկում ծառայող սպաների և նավաստիների թիվը կավելանա մի քանի անգամ:

«Կասպիյսկում նաև լայնածավալ շինարարություն է մեկնարկելու, կառուցվելու են բնակելի շենքեր, նոր նավամատույցներ և ռազմանավերի սպասարկման կետեր», — հայտարարել է Շոյգուն:

Կասպիական նավատորմիղի նոր բազան գտնվելու է Ադրբեջանի հետ սահմանից ընդամենը 140 կիլոմետրի վրա:

Երեկ «Ավանգարդն» անդրադարձել էր Հռոմի պապ Ֆրանցիսկոսի աղմկահարույց հարցազրույցին, որում հովվապետը հայտարարել էր, թե դժոխք գոյություն չունի, իսկ չապաշխարող մեղավորների հոգիներն ուղղակի անմահությունից զրկվում և անէանում են: Նույն աղբյուրի տեղեկացմամբ՝ դրան Վատիկանում վատ նախանշան է հաջորդել:

Համաշխարհային ԶԼՄ-ներն իսկույն աշխարհով մեկ տարփողել են թե՛ Ֆրանցիսկոսի պնդումը, թե՛ նախանշանի հայտնվելը: Չէ՞ որ նման պնդման հեղինակը ոչ թե ինչ-որ աղանդավոր է, այլ Կաթոլիկ եկեղեցու առաջնորդը, և նրա խոսքերից հետո հավատացյալների միլիարդանոց համայնքն ու բազմաթիվ քահանաներն ուղղակի սարսափի են մատնվել:

Պապի բարձրագոչ հայտարարությունից բառացիորեն ժամեր անց, ինչպես պնդում են լրագրողները, Սուրբ Պետրոսի բազիլիկ եկեղեցու գմբեթից հանկարծ սվաղ է թափվել: Հատկանշական է, որ դա տեղի է ունեցել կաթոլիկական Զատկին նախորդող՝ Չարչարանաց ավագ շաբաթվա ընթացքում, երբ տաճարը լի է եղել հավատացյալներով և ակնկալվում է, որ այս օրերին նրանց հոսքը Վատիկանում  5 միլիոնի կհասնի: Ընդ որում՝ սվաղը թափվել է հենց եկեղեցու գլխավոր մուտքի կողմից, և ստիպված են եղել այն արագ փակել:

Ասում են՝ աշխարհում պատահական ոչինչ չի լինում: Իսկ երբ խոսքը Ֆրանցիսկոս պապին է վերաբերում, ապա նման անհաճո նախանշանը Վատիկանին ոչ մի լավ բան չի խոստանում: Հետաքրքիր է, եթե Պապի այդ հայտարարությունը չլիներ, սվաղը չէ՞ր թափվելու…

Համենայնդեպս՝ դա որպես նախանշան ընկալվել, և լրագրողները հիշել են երեք տարի առաջ տեղի ունեցած դեպքը, երբ Ֆրանցիսկոս պապը ճերմակ աղավնիներ է երկինք արձակել և Ուկրաինային մաղթել խաղաղություն ու բարգավաճում: Երկնքում ուղղակի հրաշքով ագռավ ու ճայ են հայտնվել և հարձակվել աղավնիների վրա: Այն հանգամանքը, որ այսօր Ուկրաինայում ո՛չ խաղաղություն կա, ո՛չ էլ բարգավաճում, կարծես թե հուշում է, որ աղավնիների հետ կապված միջադեպը պապական մաղթանքի համար վատ նախանշան էր:

Ո՞վ կարող է հաստատապես պնդել, թե եկեղեցու առաստաղի ծեփը պոկվել է այն պատճառով, որ Հռոմի պապն անդրշիրմյան կյանքի մասին այդքան ազատ է արտահայտվել: Մենաբանները, սակայն, մատնանշում են, որ դա տեղի է ունեցել պապի աղմկահարույց խոսքերից անմիջապես հետո և  հենց Չարչարանաց ավագ շաբաթվա օրերին, ուրեմն պետք է վատ նշան համարել և նախազգուշացում, որ անախորժությունների, իսկ գուցե և իսկական փորձությունների Վատիկանում պետք է սպասել արդեն մոտ ապագայում:

avangard.am

Ստամբուլում Թուրիքայի իշխող «Արդարություն և զարգացում» կուսակցության  Շիշլիի շրջանային կառույցի նախաձեռնությամբ Սուրբ Հարության տոնին ընդառաջ պահքի ընթրիք է մատուցվել։ Միջոցառումը կազմակերպվել է Ստամբուլի Շիշլի շրջանում բնակվող հայ համայնքի ներկայացուցիչների համար։

Ընդունելությանը ներկա են եղել ԱԶԿ-ական հայ պատգամավոր Մարգար Եսայանը, պատգամավոր Ահմեթ Համդի Չամալըն, Բեյօղլու շրջանի ղեկավար Ահմեդ Միսբահ Դեմիրջանը, Պոլսո հայոց պատրիարքի փոխանորդ Արամ արքեպիսկոպոս Աթեշյանը, Թուրիքայի հայ կաթոլիկ եկեղեցու առաջնորդ Լևոն Զեքիյանը, հայ բողոքական եկեղեցու առաջնորդ Գրիգոր Աղաբաբաօղլուն, Շիշլի շրջանի մուֆթին, հայ համայնքի հասարակական կառույցների և սպորտային ակումբների ներկայացուցիչներ, եկեղեցականներ։

Միջոցառման ընթացքում ելույթ է ունեցել ԱԶԿ-ի Շիշլիի շրջանային կառույցի ղեկավար Օմեր Ֆուաթ Գյունդայը։ Նա նշել է, որ դարեր շարունակ այս տարածաշրջանը եղել է տարբեր կրոնների, դավանանքների ու մշակույթների կենտրոն, ինչը հպարտություն է ներշնչել այդ հողերի զավակներին:

«Այսօր էլ մենք ենք կարողանում միասին լինել՝ առանց կրոնի, լեզվի, ռասայի և  դավանանքի խտրականություն դնելու»։

Ermenihaber-ի փոխանցմամբ,ելույթ է ունեցել նաև Պոլսո հայոց պատրիարքի փոխանորդ Արամ Աթեշյանը՝ ընդգծելով, որ կրոնական տոները սիրով, միասնականությամբ և համերաշխությամբ ապրելու կոչ են։ Աթեշյանը երախտագիտության խոսքեր է ասել թուրքական բանակի, Թուրքիայի առաջնորդների հասցեին. «Այսօր, երբ աշխարհի մի շարք վայրերում արտասուք է հոսում, և մեր թուրքական բանակը, մեր զինվորները խաղաղություն ապահովելու համար իրենց կյանքն են զոհում, մենք նրանց շնորհիվ այսօր տոնք ենք նշում։ Երախտապարտ ենք նրանց և մեր պետության առաջնորդներին»։