Հայաստանում մեծ աղմուկ են բարձրացրել Կոմսոմոլսկայա պրավդա թերթի ռադիոյով Ռոսնեֆտի փոխնախագահ ու խոսնակ Լեոնտևի հայհոյախառն արտահայտությունները Հայաստանի մասին: Նա ասել է, որ հայերն իրենց գոյությամբ պարտական են ռուսներին, Հայաստանը ծանր բեռ է Ռուսաստանի համար, հայերի պատճառով Ռուսաստանը չի կարողանում լիարժեք հարաբերություն ստեղծել եղբայրական ադրբեջանական ժողովրդի հետ, և ընդհանրապես թող Հայաստանը «ռադ լինի» (այստեղ նա օգտագործել է ռուսական հայտնի հայհոյանքը):

Ռուսաստանի հայերի միությունը դիմել է ՌԴ գլխավոր դատախազություն՝ պատասխանատվության ենթարկելու Լեոնտևին, Մոսկվայում Հայաստանի դեսպանատունը հայտարարություն է տարածել որում սա համարել է հայերի հանդեպ թշնամանք սերմանելու փորձ:Իսկ Երևանում ՌԴ դեսպանատունը հայտարարել է, որ դա մասնավոր կարծիք է և չի արտահայտում ՌԴ պաշտոնական դիրքորոշումը, որը ձևակերպված է Պեսկովի ու Զախարովայի՝ Ռուսաստանի չմիջամտելու և ճգնաժամը սահմանադրական ճանապարհով հանգուցալուծելու վերաբերյալ հայտարարություններում: Ի դեպ, Զախարովան երկու անգամ հիացական հայտարարություններ է արել հայերի հասցեին:Հայաստանում մեկնաբանները նշում են, որ Լեոնտևը պատահական մարդ չէ ՌԴ իշխանության մեջ, հետևաբար սա այնքան էլ մասնավոր կարծիք չէ, և որ այն արտահայտում է Ռուսաստանի վերաբերմունքը Հայաստանում ժողովրդական հեղափոխության հանդեպ:

Հայկական շարժման հանդեպ վերաբերմունքը ռուսական քաղաքական-վերլուծական միջավայրում բավական հետաքրքիր ու բևեռացված էր՝ կոշտ գնահատականներից մինչև դրա քաղաքակրթական հենքի վերաբերյալ արձանագրումները: Մի բան ակնհայտ է, որ հայկական շարժման ազդեցությունը չի պարփակվում ներհայկական միջավայրում և լայն արձագանք ու ազդեցություն է ունեցել ողջ աշխարհում: Սա դեռ հետո է երևալու, բայց այս մասին արդեն լուրջ քննարկումներ ու հրապարակումներ են լինում համաշխարհային մամուլում:

Ամբողջությամբ՝ lragir.am

Ռուսաստանի Դաշնությունում Հայաստանի Հանրապետության դեսպան Վարդան Տողանյանը կոչ է անում Հայաստանում տեղի ունեցող իրադարձությունների վերաբերյալ ռուսաստանյան լրագրողական և փորձագիտական հանրության պատկերացումների մասին եզրակացություններ չանել, մեկ-երկու մարդու «կարծիքից» ելնելով, և միաժամանակ խստագույնս դատապարտելով Միխայիլ Լեոնտևի արտահայտությունները Հայաստանում տեղի ունեցող իրադարձությունների վերաբերյալ։
Դեսպան Վարդան Տողանյանը նշել է. «Չնայած դրան, ռուս հասակարության որոշ ներկայացուցիչներ, հասկանալի է՝ ինչ կողմերի աջակցությամբ, որոշել են գռեհիկ կերպով աղավաղել մեր երկրի ներքաղաքական իրադարձությունների էությունն ու ներկայացնել դրանք իրենց համար «լիովին շահավետ» կերպով՝ այսպիսով սեպ խրելով Հայաստանի ու Ռուսաստանի հարաբերությունների միջև։

Միխայիլ Լեոնտևն ու Միխայիլ Յուրևը, որոնք սխալմամբ իրենց հայ-ռուսական հարաբերությունների փորձագետ են համարում, իրենց խոսքում ոչ միայն հատել են թույլատրելիի սահմանը, այլև հանդգնել են ցինիկ ու վիրավորական արտահայտություններով խոսել մի ամբողջ ժողովրդի ու հայ-ռուսական հարաբերությունների մասին։

Մենք այդ խոսքերը գնահատում ենք որպես հայ ժողովրդի նկատմամբ ատելություն սերմանելու ու հայ-ռուսական բարեկամության ու երկու երկրների դաշնակցային հարաբերությունները վնասելու փորձ։

Անկասկած, կարելի է բոլոր այդ արտահայտություններին նույնքան անտաշ պատասխան տալ՝ էլ ավելի վիրավորական արտահայտություններ օգտագործելով, բայց, բարեբախտաբար, մենք «լեոնտևներ» ու «յուրևներ» չենք, որոնք դեռ պատասխան են տալու հայ ժողովրդի հասցեին ասված ամեն բառի համար։ Համոզված ենք, որ մեր ռուս գործընկերներն ու ՌԴ համապատասխան մարմինները, ուր արդեն դիմել ենք, այդ արտահայտություններին լիարժեք ու օբյեկտիվ գնահատական կտան», — նշված է հաղորդագրության մեջ։

Ռուսաստանի հայերի միությունը (ՌՀՄ) դիմել է Ռուսաստանի գլխավոր դատախազությանը՝ «Կոմսոմոլսկայա պրավդա» ռադիոկայանի եթերում հնչած այն արտահայտությունների կապակցությամբ, որոնք վերաբերել են Հայաստանում տեղի ունեցած իրադարձություններին։ Նշենք, որ «Կոմսոմոլսկայա պրավդա» ռադիոյի եթերում հեռարձակվող «ԳլավՏեմա» հաղորդումը` Միխայիլ Լեոնտևի, Իլյա Սավելևի և Միխայիլ Յուրևի մասնակցությամբ վրդովմունքի ալիք է բարձրացրել Հայաստանի ու հայերի մասին ցինիկ արտահայտությունների պատճառով: Անմասն չեն մնացել ոչ միայն շարքային քաղաքացիները, այլև Ռուսաստանի հայերի միությունն (ՌՀՄ) ու ՀՀ–ում ՌԴ դեսպանատունը։

Հիշեցնենք՝ ապրիլի 26-ին ու մայիսի 3-ին «Ռոստնեֆտի» փոխտնօրեն, քաղաքական վերլուծաբան Միխայիլ Լեոնտևն ու հաղորդավար Միխայիլ Յուրևը չափազանց տգեղ կերպով անդրադարձել էին Հայաստանում տեղի ունեցող իրադարձություններին «Կոմսոմոլսկայա պրավդա» ռադիոկայանի եթերում։ Ռուսաստանի հայերի միությունը արձագանքել է հնչած վիրավորանքներին ու դիմել ՌԴ Գլխավոր դատախազություն, մասնավորապես այն պատճառով, որ գնահատականները վերաբերում էին ոչ միայն բողոքի շարժմանը, այլ ընդհանրապես Հայաստանին ու հայերին։

https://www.youtube.com/watch?v=De5MMBiIF7w

Կրեմլում նախապատրաստում են ՌԴ նախագահ Վլադիմիր Պուտինի և Հայաստանում ցույցերի առաջնորդ, վարչապետի թեկնածու Նիկոլ Փաշինյանի հանդիպումը: Այս մասին Тelegram-ի իր ալիքում հայտնել է «Эхо Москвы» ռադիոկայանի խմբագիր Ալեքսեյ Վենեդիկտովը:

Նա նշել է, որ Պուտինի և Փաշինյանի հանդիպումն, ամենայն հավանականությամբ, կկայանա մյուս շաբաթ՝ մայիսի 14-ին, այսինքն, այն բանից հետո, երբ խորհրդարանը նրան վարչապետ կընտրի:

Հիշեցնենք, որ երեկ Ռուսաստանի և Ղազախստանի նախագահները քննարկել էին Հայաստանի իրավիճակը:

Մայիսի 2-ին Հայաստանը հեղափոխության վճռական փուլ մտավ: Աննախադեպ թվով մարդ դուրս եկավ փողոց, ողջ քաղաքի երթևեկությունը կաթվածահար եղավ: Գործող իշխանությունն արդեն չի տիրապետում ո՛չ իրավիճակին, ո՛չ երկրին: Մայիսի 8-ին ընդդիմության առաջնորդ Նիկոլ Փաշինյանն ամենայն հավանականությամբ կզբաղեցնի վարչապետի պաշտոնը: Այս մասին Երևանից հաղորդել է «Коммерсантъ» պարբերականի թղթակից Վլադիմիր Սոլովյովը:

Խորովածային հեղափոխություն

Մայիսի 2-ի վաղ առավոտյան Երևանը վերածվել էր հետիոտնային գոտում: Փողոց էին դուրս եկել տասնյակ հազարավոր մարդիկ, իսկ քաղաքի խաչմերուկները վերածվել էին պարահրապարակի. պարում էին բոլորը՝ ուսանողներ, դպրոցականներ, նրանց ուսուցիչները և նույնիսկ դեռ դպրոց չհաճախող երեխաները, փողոցներում մանղալներ էին դրել և միս էին խորովում ու հյուրասիրում բոլոր ցանկացողներին:

Վաղ առավոտից փակ էր նաև օդանավակայանի ճանապարհը: Նրանք, ովքեր պետք է մեկնեին Հայաստանից, մինչև օդանավակայան ոտքով էին գնում: Իսկ եթե Երևանով ինչ-որ տրանսպորտային միջոց էր երթևեկում, ապա դրոշներով և անդադար ազդանշաններով: Արդյունքում պատգամավորները չհասան իրենց աշխատավայր՝ Բաղրամյան փողոցում գնտվող Ազգային ժողով:

Մեկ գիշերում հանրապետականների դիմանկարները տպեցին և փակցրեցին ողջ քաղաքում, նույնիսկ դագաղ և ծաղկեպսակ բերեցին Արթիկում հանրապետականների գրասենյակի մոտ:

Հրապարակից՝ վարչապետ

Մինչ Երևանում զանգվածային ցույցեր էին անցկացվում, Հանրապետական կուսակցությունը մայիսի 1-ին խորհրդարանում կոշտ քննադատության ենթարկեց Նիկոլ Փաշինյանին: Օրվա երկրորդ կեսին խորհրդարանի խոսնակ, հանրապետական Արա Բաբլոյանը կոչ արեց դադարեցնել պատգամավորների ճանապարհի անօրինական փակումն ու զերծ մնալ նրանց անձնական կյանք ներխուժելուց: Իսկ ահա քիչ անց օրվա գլխավոր նորությունը հայտնվեց. ՀՀԿ խմբակցության ղեկավար Վահրամ Բաղդասարյանը հայտարարեց, որ մայիսի 8-ին կուսակցությունը կքվեարկի Նիկոլ Փաշինյանի օգտին: Միակ թեկնածուն կրկին կլինի Նիկոլ Փաշինյանը: Նրա օգտին քվեարկելու մասին հայտարարեց նաև պատգամավոր, հայ խոշոր գործարար Գագիկ Ծառուկյանը, ով գլխավորում է «Ծառուկյան» դաշինքը: ՀՀԿ-ի որոշման փոփոխությունը Փաշինյանին հաղթանակ է ապահովում:

Վերջին հույսի Նիկոլը

Նիկոլ Փաշինյանը փաստացի հերոսացավ: Հայաստանում այժմ նրա դիմանկարով վերնաշապիկներ են հագնում, նրա լուսանկարները փակցվում են մեքենաների վրա, ամենուր: Երբ Փաշինյանը փողոց է դուրս գալիս, նրա կողքին է հավաքվում երջանիկ ամբոխը: Նրանից ստորագրություն են խնդրում, սելֆիներ անում նրա հետ, փորձում ձեռքը սեղմել կամ գոնե դիպչել նրա հագուստին: Նրա հետ են կապում Հայաստանի ապագան:

Քաղաքագետ, Կովկասի ինստիտուտի ղեկավար Ալեքսանդր Իսկանդարյանը «Коммерсантъ»-ի հետ զրույցում բացատրել է Փաշինյանի ֆենոմենը.

«Նա տաղանդավոր և ստեղծարար մարդ է: Նա ստեղծեց ոչ բռնի ակցիաների գաղափարը: Իսկ ռեժիմը հենց սկզբից սխալ գործեց. նրանք կարծում էին, որ ցածր լեգիտիմությամբ կարելի է հավերժ ապրել: Ոչ, չի կարելի: Սխալ էր նաև Սերժ Սարգսյանի՝ իշխանության ղեկին մնալու ցանկությունը, քանի որ նա խոստացել էր այլևս չառաջադրվել: Եթե նա հեռանար, իսկ վարչապետ դառնար մեկ ուրիշն, ապա այս ամենը չէր լինի»: Սակայն, Իսկանդարյանի խոսքով, Նիկոլի համար հեշտ չի լինելու: Մեկ այլ՝ լուրջ խնդիր է քաղաքագետը նշել օլիգարխների խնդիրը: «Ահա Ծառուկյանը, նա ձայն է տալիս Նիկոլին, սակայն դրա դիմաց ինչ-որ բան է պահանջում, իսկ նրա ախորժակը մեծ է: Թե ինչպիսի՞ս կլինի ամենախոշոր օլիգարխի՝ Ծառուկյանի դեմ պայքարը, դժվար է պատկերացնել»:

Ռուսաստանի Լիբերալ-դեմոկրատական կուսակցության ղեկավար Վլադիմիր Ժիրինովսկին Հայաստանում տեղի ունեցող իրադարձությունները կապել է ԱՄՆ-ի ազդեցության հետ և նշել, որ ԱՄՆ-ը սկսել է խաղադրույք կատարել ոչ թե մտավորականության, այլ երիտասարդության վրա։ Այս մասին հայտնում է «ՌԻԱ Նովոստի»-ն։

«Երևանյան «մայդանը» ցույց է տալիս, որ Միացյալ Նահանգները սկսել են խաղադրույք կատարել ոչ թե մտավորականության վրա, ինչպես դա անում էին Ռուսաստանում և այլ երկրներում, որտեղ իրավիճակը սրելու փորձերը ձախողվեցին, այլ երիտասարդների վրա։  ԱՄՆ-ը հասկացել է, որ մտավորականությունն ավելի իներտ է և ոչ այնքան վճռական, հաճախ պատրաստ չէ կոշտ գործողությունների: Իսկ  երիտասարդները ցանկանում են, որ իրենց սերունդը զգա, թե ինչ է հեղափոխությունը և գործում են ավելի ագրեսիվ: Եվ դա արդյունքներ է տալիս»,- նշել է  Ժիրինովսկին:

«Հայաստանում ընթացող քաղաքական գործընթացը Հայաստանի ներքին հարցն է, հայ ժողովրդինը եւ նրանց խորհրդարանի անդամներինը»:«Ամերիկայի ձայն»-ի փոխանցմամբ, այս մասին է ասել ԱՄՆ-ի Պետդեպարտամենտի խոսնակը։

«Մենք վստահ ենք, որ նրանք այդ հարցը կլուծեն խաղաղ եղանակով եւ համաձայն սահմանադրության ու բոլոր կանոնների: Մենք, որպես Հայաստանի բարեկամ երկիր ու գործընկեր, միշտ խրախուսել ենք քաղաքական փակուղուց դուրս գալու նպատակով գնալ կառուցողական երկխոսության: Հիմա էլ հորդորում ենք նոր կառավարության խաղաղ ձեւավորում համաձայն բոլոր կանոնների եւ ի նպաստ բոլոր հայերի շահերի:

Հայաստանի կառավարությունն ու ժողովուրդը արժեքավոր գործընկերներ են: Եվ պատրաստ ենք երկու կողմերի համար հետաքրքրություն վայելող հարցերի շուրջ սերտորեն աշխատել նոր կառավարության հետ, երբ այն կազմավորվի»,- ասել է ԱՄՆ-ի Պետդեպարտամենտի խոսնակը:

Միխեիլ Սաակաշվիլին անդրադարձել է այսօր ՀՀ ԱԺ-ում ՀՀԿ պատգամավորներից մեկի ելույթին, ով վարչապետի թեկնածու Նիկոլ Փաշինյանին մեղադրել է իր հետ կապերի համար:

«ՀՀ ԱԺ-ում ինչ-որ ապուշներ Նիկոլ Փաշինյանին մեղադրել են իմ հետ կապերի համար, ես Փաշինյանին չեմ ճանաչում, իսկ այդ պատգամավորներին ցանկանում եմ ասել՝ դուք խնդիր ունեք ոչ թե միջազգային դավադրության, այլ սեփական ժողովրդի հետ, ում զզվեցրել է ձեր գողությունն ու ցինիզմը: Հայաստանն ազատ կլինի կաշառակերությունից և կլինի հաջողակ»իր ֆեյսբուքյան էջում գրել է Միխեիլ Սահակաշվիլին:

Ուկրաինական «Ձայնում» Սրբուհի Սարգսյանի ելույթի տեսահոլովակը ջնջվել է երաժշտական մրցույթի YouTube–ի ալիքից։ Շատերը կարծում են, որ պատճառը հայ երգչուհու ելույթի չափազանց քաղաքականացված լինելն է։

Ուկրաինական «Ձայնը» եզրափակչի տաղանդավոր հայ մասնակիցը կատարել է 2017 թվականի հիթերից մեկը` Rag’n’Bone – Human երգը։

Երգչուհու ելույթի ժամանակ նրա մեջքի հետևում գտնվող էկրանների վրա ցուցադրվում էին աշխարհի տարբեր երկրների ներքաղաքական կյանքի կադրերը։ Ելույթի կեսին կարելի էր տեսնել հատվածներ ուկրաինական «Մայդանի» հանրահավաքներից, ավելի ուշ հայտնվեցին հայկական դրոշն ու Հայաստանում «թավշյա հեղափոխության» կադրերը։

Մրցույթի կազմակերպիչները որոշել են տեսահոլովակի վերջում` Սրբուհու մեջքի հետևում պարզել Ադրբեջանի դրոշը։ Բացի այդ` նրա ելույթի վերջում հայտնվում է #human հեշթեգը, որը ներկված էր Ադրբեջանի դրոշի գույներով։

Օգտատերերը քննադատություններ են ուղղել ուկրաինական «Ձայնի» հասցեին` նշվելով, որ դա մտածված քայլ է, որ «Ուկրաինայից չէին սպասում», իսկ Սրբուհին հիանալի է ու մրցույթին մրցակիցներ չունի։

Իսկ օգտատեր Էդ Ավետիսյանը գրել է, որ տեսանյութը ջնջել են երգչուհու ելույթի ընթացքում հետևում ցուցադրված կադրերի պատճառով։

«Այնտեղ Մայդանի հանրահավաքներն էին ու վերջերս Հայաստանում եղած բողոքի ակցիաները, նաև «human» բառը, որը նշանակում է «մարդ», Ադրբեջանի դրոշի գույներով էր ներկված, – գրել է Ավետիսյանը։

Մրցույթի հաղթող է ճանաչվել Ելենա Լուցենկոն` Սերգեյ Բաբկինի թիմից։

։

Հայաստանում ընթացող հեղափոխության մասին գրում են արդեն ոչ միայն Եվրոպական եւ Ամերիկյան պարբերականները, այլ նաեւ Օվկիանիայի լրատվամիջոցները: Բացի ավստրալական եւ նորզելանդական մի շարք լրատվամիջոցներում տեղեկատվական բնույթի հաղորդագրությունների, օվկիանական մամուլում հնչում են նաեւ գնահատականներ հայկական իրադարձությունների մասին: Ավստրալական SBS NEWS-ը գրում է Հայաստանում շարունակվող բողոքի ցույցերի մասին՝ նշելով, որ վարչապետի հրաժարականից հետո քաղաքական վերնախավը հրաժարվում է զիջել իշխանությունը: SBS NEWS-ը անդրադառնում է նաեւ հայկական բողոքի անսովոր արտահայտմանը: Ավստրալական կայքը, ներկայացնելով քաղաքական ճգնաժամի պատճառները, գրում է, որ բողոքը յուրահատուկ կերպով է արտահայտվում: Բաց ձեռքերի պայքարը եւ համընդհանուր տոնական տրամադրությունը ցույց են տալիս բողոքի ակցիաների խաղաղ բնույթը:

SBS NEWS-ը անդրադառնում է նաեւ համաշխարհային կենտրոնների, մասնավորապես՝ Ռուսաստանի հայկական բողոքի ալիքի վրա ազդելու հավանականությանը: Հիմնվելով ռուսաստանցի պաշտոնյաների հայտարարությունների վրա, SBS NEWS-ը գալիս է եզրակացության, որ Ռուսաստանը, ամենայն հավանականությամբ, չի խառնվի հայկական հեղափոխությանը:

Ամերիկյան, եվրոպական եւ ռուսական փորձագետներն ու մամուլը եւս շարունակում են ձեռքը պահել հայաստանյան իրադարձությունների զարկերակին:

Գերմանական Deutche Welle-ն գրել է Սերժ Սարգսյանի 2008 թ. սկսած աստիճանաբար նվազող հեղինակության մասին: Ռուսաստանի համեմատաբար հանգիստ վերաբերմունքը Սարգսյանի հրաժարականին բացատրվում է նրանով, որ արտաքին հետքեր այս շարժման մեջ չկան: Ռուսաստանցի լրագրող Կոնստանտին Էգերտի կարծիքով՝ Կրեմլը թերագնահատել էր հայ ժողովրդի հիասթափությունը Սարգսյանից: Բացի դրանից, Էգերտի կարծիքով, երկարաժամկետ պլաններ ունեցող քաղաքական առաջնորդների խաղաղ անկումը անհանգստացնում է Մոսկվային:

Հայկական բողոքի ալիքի համատեքստում հայ-ռուսական հարաբերությունների հեռանկարին անդրադարձել է նաեւ Քարնեգի հիմնադրամի ավագ փորձագետ Թոմ դե Վաալը: BBC-ի ռուսական ծառայության հետ զրույցում նա կարծիք է հայտնել, որ Հայաստանի աշխարհաքաղաքական հիմքը չի փոխվի:

«Բողոքը Ռուսաստանի կողմից ապահովվող անվտանգության դեմ չէր, թեեւ այն, իհարկե, ռուսական մենաշնորհների դեմ էր»,- ասել է դե Վաալը:

Ամերիկայի ձայնի ռուսաստանյան ծառայության հետ զրույցում նման կարծիք է հայտնել շախմատի աշխարհի նախկին չեմպիոն Գարի Կասպարովը:

«Հայաստանը գտնվում է Պուտինի ուժեղ ազդեցության ներքո, եւ պարզ է, որ խոշոր ձեռնարկությունների մեծ մասը, այսպես թե այնպես կառավարվում է ռուսաստանցի օլիգարխների կողմից»,- ասել է Կասպարովը՝ հավելելով, որ դա կայացել է շատ երկար ժամանակի ընթացքում:

Նա նաեւ նշել է, որ Հայաստանի ժողովրդի կամքը երկրում փոփոխություններ կատարելու միակ առանցքային գործոնն է:

Կասպարովը փորձում է նաեւ աննկատ կերպով ակնարկել, որ հայաստանյան իրադարձությունների սցենարը կարող է կրկնվել Ռուսաստանում:

«Պատմությունը դեռ ավարտված չէ, սակայն կա մեկ կարեւոր դաս, որը մենք պետք է քաղենք. երբ մարդկանց շարունակաբար խաբում են՝ նրանք հոգնում են դրանից: Երբ մարդիկ սկսում են պայքարել ընտրելու սեփական իրավունքի եւ ազատության համար՝ իշխանությունն ընկրկում է»,- ասել է Կասպարովը, ապա հավելել,- «Դասը կայանում է նրանում, որ սա ազգի միասնության ցուցադրում է»:

Այդուհանդերձ, Կասպարովը կրկնում է մի արտահայտություն, որը շատ է հանդիպում օտարերկրյա մամուլում եւ որոշակի վտանգներ է պարունակում հետագայում համաժողովրդական միասնականությունը միջազգային հանրությանը ներկայացնելու տեսանկյունից:

«Կա ղարաբաղյան կլան, երեւանյան «կուսակցություն», այսինքն՝ շատ ու շատ կոնկրետ գործոններ, որոնք կապ չունեն Ռուսաստանի հետ»,- նշել է Կասպարովը:

Շարունակելով Ռուսաստանի հետ զուգահեռներ անցկացնել՝ Կասպարովը նշել է, որ «անցյալ վերադառնալու փորձերը» դատապարտված են հեղափոխության: Հայաստանը օրինակն է այն բանի, որ փոփոխություններն անխուսափելի են: Ողջ հարցը, ըստ գրոսմայստերի, նրանում է՝ որքանով խաղաղ ու ոչ բռնի կլինեն այդ փոփոխությունները:

«Հայաստանը խուսափեց ուժային լուծումներից եւ արյունահեղությունից մեծապես իր ազգային առանձնահատկությունների շնորհիվ: Որքանով է դա հնարավոր Ռուսաստանում՝ բարդ է ասել»,- նշել է Կասպարովը, հավելելով, որ անցնցում փոփոխությունների հնարավորությունը Ռուսաստանը կորցրել է 2011 եւ 2012 թվականներին:

Ինչեւէ, անկախ Հայաստանում դեպքերի զարգացումից Ռուսաստանի քաղաքական վերնախավը կանգնած է լուրջ մարտահրավերի առջեւ: Բանն այն է, որ մայիսի 5-ին ողջ Ռուսաստանով նախատեսվում են հակակառավարական բողոքի ակցիաներ, իսկ հայկական արդեն իսկ հաջողված փորձը կարող է ոչ միայն ոգեշնչել ռուսաստանցի ընդդիմադիրներին, այլեւ որոշակի առումով գործողությունների ձեռնարկ հանդիսանալ նրանց համար: Կրեմլում դա նույնպես հասկանում են եւ, առնվազն մինչեւ մայիսի 5-ը, փորձելու են «Հայաստանի ներքին գործերին» չխառնվելով ճնշում գործադրել թավշյա հեղափոխության վրա:

Վլադիմիր Մարտիրոսյան

Տպագրվել է «Հայկական ժամանակ» օրաթերթի ապրիլի 27-ի համարում: