Թուրքիայի արտգործնախարարության խոսնակ Համի Աքսոյը արձագանքել է Հայաստանի ԱԳՆ խոսնակի այն հայտարարությանը, որով հայկական կողմը անդրադարձել էր Անկարայի կողմից բազմիցս շահարկվող արխիվների բացման  կոչերին:

Այս մասին տեղեկացնում ermenihaber.am-ը:

Աքսոյը մասնավորապես նշել է. «Հայաստանի խոսնակի ոճը և օգտագործած եզրույթները ցույց են տալիս, որ այդ երկիրը դեռևս չունի պետական ավանդույթներ»։

Հղում անելով «Դողու Փերինչեքն ընդդեմ Շվեյցարիայի» գործով եվրադատարանի որոշմանը՝ նշել է, որ ըստ այդ որոշման՝ հայկական թեզերը թուրքերին պարտադրելն անհամատեղելի է խոսքի ազատության իրավունքի հետ:

Թուրքիայի ԱԳՆ խոսնակը հայտարարել է, թե հայկական կողմի այն պնդումը, որ արխիվները բաց են, իրականությանը չի համապատասխանում: Շեշտել է, թե իբր բաց է Հայաստանի արխիվների այն հատվածը միայն, որն «ապացուցում է հայկական պնդումները»:

Աքսոյը նաև անդրադարձել է Ֆրանսիայի կողմից ապրիլի 24-ը Հայոց ցեղասպանության հիշատակի ազգայի օր հռչակելու որոշմանը՝ նշելով, որ Ֆրանսիան չի գիտակցում իր քայլի վտանգավորության աստիճանը: Միևնույն ժամանակ Աքսոյը մեդադրել է Ֆրանսիայինն մեկ դար առաջ հայերին զինելու համար և թուքերի սպանության պատասխանատվությունը բարդել նաև Ֆրանսիայի վրա: Դատապարտելով Ֆրանսիայի վարչապետ Էդուարդ Ֆիլիպի՝ Թուրքիային ուղղված քննադատական խոսքերը, Աքսոյը նշել է, որ նման պահվածքը անպատասխան չի մնալու:

Հիշեցնենք, որ ՀՀ ԱԳՆ խոսնակ Աննա Նաղդալյանը Հայոց ցեղասպանության տարելիցին ընդառաջ մեկնաբանել էր Թուրքիայի կառավարության այն հայտարարությունը, թե իբր Հայաստանը վախենում է բացել 1915թ․ իր արխիվները:

«Մենք այս ողջ ժամանակահատվածում ականատես ենք եղել Թուրքիայի կողմից Հայոց ցեղասպանության ժխտման տարբեր ձևերի։ Հաճախ գործի են դրվում ուղղակի կեղծիքներ, ինչպես, օրինակ, մեր արխիվների փակ լինելու դրույթը, երբ ցեղասպանությամբ զբաղվող բոլոր մասնագետները գիտեն, որ Հայաստանի արխիվները բաց են։ Ժխտողական մտքի այս վայրիվերումները վկայում են ճշմարտության դեմ դրանց անզորության մասին, իսկ Հայոց ցեղասպանության ճշմարտությունը ճանաչված իրողություն է միջազգային համայնքում։

Ցեղասպանությունը ժխտողականության քողի ներքո արդարացնելը ամոթալի և վտանգավոր երևույթ է: Այն խրախուսում է մարդկության և քաղաքակրթության դեմ նոր հանցագործություններ, ինչի դեմ պայքարը միջազգային համայնքի առաջնային պարտավորությունն է»,- ասել էր ՀՀ ԱԳՆ խոսնակը:

Թուրքիայի քրդական «Ժողովուրդների դեմոկրատական» կուսակցության հայ պատգամավոր Կարո Փայլանը  1919-1922 թվականներին հայ ժողովրդի դեմ իրականացված հանցանքների համար երիտթուրքերի դեմ դատավարության փաստաթղթերի գտնվելու վայրի հետ կապված գրավոր հարցադրում է ուղղել նախագահի օգնական Ֆուաթ Օքթային։

Ինչպես տեղեկացնում է Ստամբուլի հայկական «Ակոս»-ը, Կարո Փայլանը, հիշեցնելով, որ ապրիլի 24-ի իր սկանդալային հայտարարության մեջ Էրդողանը խոսել է թուրքական արխիվների բաց լինելու մասին, Կարո Փայլանը շեշտել է, թե շատ ուսունասիրողների չեն տրամադրվել  հայ ժողովրդի դեմ հանցանք գործելու մեղադրանքով 1919-1922 թվականներին երիտթուրքերի դատավարության հետ կապված արխիվային փաստաթղթերը։

Փայլանի հարցադրման մեջ շեշտվել է հետեւյալը․

1.Դատական գործի հետ կապված փաստաթղթերը գտնվո՞ւմ են արխիվում։

2.Նշված դատական գործի փաստաթղթերը երբ են արխիվ մտել, ե՞րբ ու ո՞ր բաժնում են գտնվել։

3. Եթե իրականությանը չեմ համապատասխանում այն պնդումները, թե դատավարության փաստաթղթերը չկան կամ անհասանելի են, ապա դրանք որտե՞ղ են հիմա։

4. «Իրականությունը իմանալ ցանկացող» ուսումնասիրողները ինչպե՞ս կարող են ձեռք բերել հիշյալ փաստաթղթերը։

Նշենք, որ հենց թուրքական դատարանը Հայոց ցեղասպանությունը կազմակերպած պաշտոնյաներին մեղավոր է ճանաչել եւ դատապարտել տարբեր պատիժների։

Ավստրալիայի վարչապետ Սքոտ Մորիսոնը սենսացիոն խոստովանություն է կատարել՝  հայտարարելով, որ «ցեղասպանություն» տերմինից խուսափում է Թուրքիայի ճնշման պատճառով: Այս մասին հայտնում է Ավստրալիայի Հայ դատի հանձնախումբը:

«The Sydney Morning Herald»-ը հաղորդում է, որ Մորիսոնն այս փաստը հիշատակել է՝ պատասխանելով լրագրողների հարցերին:

Հայոց ցեղասպանության 104-րդ տարելիցին նվիրված հայտարարության մեջ երկրի վարչապետը իրադարձությունները բնորոշել էր որպես «…սարսափներ, որոնք Օսմանյան կայսրության վերջին կատարվել են հայ ժողովրդի հետ»:

Սա կտրականապես հակադրվում է 2011 թվականի մայիսի 26-ին խորհրդարանում նրա ելույթին, երբ նա ընդդիմության շարքերում էր: Այդ ժամանակ նա նշել էր, որ «հայերի ցեղասպանությունը եղել է մարդկության դեմ մեծագույն հանցագործություններից մեկը»:

Մորիսոնը լրագրողնեորին ասել է, որ չնայած «անցյալում որպես մասնավոր անձ» օգտագործել է «ցեղասպանություն» բառը, վարչապետը «ներկայացնում է երկրի տեսակետը»: Ինչպես նշված է Ավստրալիայի Հայ դատի հանձնախմբի հայտարարության մեջ, նա, հավանաբար, մոռացել է, որ այդ ժամանակ էլ հանդես էր գալիս որպես խորհրդարանի անդամ:

Ոչ պակաս սենսացիոն է այն, որ նա «ցեղասպանություն» տերմինը չօգտագործելու որոշումը կապել է Գալիպոլիի ճակատամարտի զոհերի հիշատակման օրվա հետ: «Մենք սերտորեն համագործակցում ենք Թուրքիայի կառավարության հետ, որպեսզի ապահովենք շարունակվող ամուր հարաբերությունները, որոնք ավստրալացիներին եւ նորզելանդացիներին թույլ են տալիս կատարել այդ ուխտագնացությունը»,- ասել է Մորիսոնը:

Ավստրալիայի Հայ դատի հանձնախմբի գործադիր տնօրեն Հակ Քայսերյանը հայտարարությունը «խայտառակություն» է անվանել:

ԱՄՆ նախագահ Դոնալդ Թրամփի ուղերձը ապրիլի 24-ին՝ Հայոց ցեղասպանության 104-րդ տարելիցի կապակցությամբ ցեղասպանության հերքմանը վերջ դնելու բաց թողնված հնարավորություն է։ Այս մասին ասված է Ամերիկայի հայկական համագումարի հայտարարությունում։

«Հայոց ցեղասպանությունն ուղիղ ճանաչելուց  խուսափելն արտացոլվում է ոչ միայն նախագահի այս տարվա հայտարարության մեջ, այլ նախորդ վարչակազմերի ժամանակ, ինչը ժխտողականության մթնոլորտ է ստեղծում եւ ավտորիտար ռեժիմներին հնարավորություն է տալիս հետապնդել քրիստոնյաներին եւ այլ փոքրամասնություններին: Ցեղասպանության ժխտումն անարդար վերաբերմունք է բոլոր հետապնդվողների նկատմամբ»,–նշել է Ամերիկայի հայկական համագումարի գործադիր տնօրեն Բրայան Արդունին։

Հիշեցնենք, որ Թրամփը ապրիլի 24-ի կապակցությամբ հայտարարություն էր տարածել, մասնավորապես, նշելով. «Այսօր մենք հարգանքի տուրք ենք մատուցում Մեծ Եղեռնի զոհերի ու բոլոր նրանց հիշատակին, որոնք տառապել են 20-րդ դարի ամենասարսափելի զանգվածային կոտորածների պատճառով: 1915 թվականից սկսած՝ Օսմանյան կայսրության վերջին տարիներին մեկ ու կես միլիոն հայեր աքսորվեցին, սպանվեցին կամ մահվան երթի ուղարկվեցին: Հիշատակի այս օրը մենք կրկին միանում ենք Ամերիկայի ու ողջ աշխարհի հայերին եւ սգում բազմաթիվ զոհերի հիշատակը»:

Ավստրալիայի հայ համայնքը պատրաստվում է ապրիլի 24-ին` Հայոց ցեղասպանության 104-րդ տարելիցի հիշատակի արարողությանն իր զայրույթը հայտնել երկրի վարչապետ Սքոթ Մորիսոնին, ով խուսափում է հստակ ձևակերպումներ ու գնահատականներ տալ Ցեղասպանության վերաբերյալ:

The Sydney Morning Herald-ը հայտնում է, որ հայկական համայնքի ղեկավարները հրաժարվել են հիշատակի միջոցառմանն ընթերցել վարչապետի հայտարարությունը: Իսկ հայտարարությունում Մորիսոնն ասում է, որ միանում է հայկական սփյուռքին՝ «սգալու և հիշելու այն սարսափները, որը տեղի է ունեցել հայ ժողովրդի հետ Օսմանյան կայսրության վերջին տարիներին»:

Ավստրալիայի հայ դատի հանձնախմբի ղեկավար Հայկ Կայսերյանը, ով հրաժարվել է կարդալ վարչապետի հայտարարությունը, ասել է. «Նրա այս պահվածքը վիրավորական է Ավստրալիայի հայ համայնքի շուրջ 50 հազար անդամների համար, ովքեր մեծամասամբ Հայոց ցեղասպանության վերապրածների սերունդներ են»: Կայսերյանը նշել է, որ նման ձևակերպումներով Ավստրալիան Հայոց ցեղասպանությունը «հավասարեցրել է ավտովթարի»:

Թեպետ Ավստրալիան մինչ օրս չի ճանաչել Հայոց ցեղասպանությունը, սակայն երկրի խոշորագույն նահանգները՝ Նոր Հարավային Ուելսը և Հարավային Ավստրալիան ճանաչել են պատմական փաստը:

Ապրիլի 24-ին Սիդնեյում Հայոց ցեղասպանության 104-րդ տարելիցին նվիրված խոշոր միջոցառման գլխավոր բանախոսը լինելու է Նոր Հարավային Ուելսի հայազգի վարչապետ Գլեդիս Բերեջիքլյանը:

Վլադիմիր Զելենսկին ամրապնդում է իր դիրքերը արձանագրությունների 90, 25 տոկոսի տվյալների ամփոփումից հետո: Ուկրաինայի Կենտրոնական ընտրական հանձնաժողովի տվյալներով՝ երկրի նախագահի ընտրությունների երկրորդ փուլում նա ստանում է ընտրողների ձայների 73,18 տոկոսը։

Հանրապետության գործող նախագահ Պյոտր Պորոշենկոյին աջակցություն է հայտնել ընտրողների միայն 24,49 տոկոսը: Քվեաթերթիկների 2.32 տոկոսն անվավեր է ճանաչվել:

Զելենսկու արձանագրած արդյունքը կարելի է աննախադեպ համարել Ուկրաինայի պատմության մեջ. դեռ երբեք ոչ մի նախագահ չի ստացել երկրի քաղաքացիների նման բարձր վստահություն:

Ընտրությունների երկրորդ փուլը տեղի է ունեցել ապրիլի 21-ին: Ուկրաինայի ՆԳ նախարարությունում եւ ԿԸՀ-ում հայտնել են, որ առայժմ զանգվածային խախտումներ չեն գրանցվել, որոնք կարողանային ազդել քվեարկության արդյունքների վրա:

Ինչպես վկայում է ԿԸՀ-ի տեղեկատվությունը, Զելենսկին առաջատարն է Ուկրաինայի բոլոր տարածաշրջաններում, բացի Լվովի մարզից: Նախագահական մրցավազքի առաջատարն ամենամեծ աջակցությունն ստացել Է Օդեսայի մարզում,Դնեպրոպետրովսկի, Զապորոժեի, Խարկովի եւ Լուգանսկի մարզերում: Կիեւում Զելենսկու օգտին քվեարկել է ընտրողների 60,25 տոկոսը:

Նորընտիր նախագահի պաշտոնակալման արարողությունը պետք է տեղի ունենա մայիսի 31-ից ոչ ուշ, հաղորդել է ՏԱՍՍ գործակալությունը:

2019 թվականի ապրիլի 16-ի որոշմամբ Եվրոպական դատարանը մերժել է Մանվել Գրիգորյանի գործով ներկայացված միջանկյալ միջոց ձեռնարկելու պահանջը:

Այս մասին հայտնում են Մարդու իրավունքների Եվրոպական դատարանում ՀՀ ներկայացուցչությունից:

Հիշեցնենք՝ Մանվել Գրիգորյանի փաստաբանը, դիմելով Եվրոպական դատարան, խնդրել էր, որ վերջինս, Դատարանի կանոնակարգի 39-րդ կանոնի համաձայն, միջանկյալ միջոց ձեռնարկի` պարտավորեցնելով ՀՀ իշխանություններին Մանվել Գրիգորյանին անհապաղ տեղափոխել քաղաքացիական հիվանդանոց՝ համապատասխան բժիշկ մասնագետների հսկողության տակ, ինչպես նաև նրան անհապաղ տեղափոխել Ֆրանսիայի Հանրապետությունում գտնվող իր կողմից մատնանշված բուժհաստատություն հետագա ստուգման և բուժման նպատակով:

Եվրոպական դատարանում ՀՀ կառավարության լիազոր ներկայացուցիչը, համագործակցելով իրավասու մարմինների հետ, սահմանված ժամկետում ՀՀ կառավարության դիրքորոշումը ներկայացրել էր Եվրոպական դատարան՝ մատնանշելով և տրամադրելով համարժեք բուժօգնության տրամադրման փաստը հաստատող բոլոր անհրաժեշտ տվյալները:

Մասնավորապես նշվել էր, որ Մ. Գրիգորյանը կալանքի ողջ ընթացքում ստացել էր համապատասխան բժշկական օգնություն, ավելին՝ պարբերաբար ստուգվել և ստացիոնար բուժում էր ստացել քաղաքացիական հիվանդանոցներում:

Հիմք ընդունելով ներկայացված տեղեկատվությունը և բավարար համարելով ՀՀ կառավարության ձեռնարկած քայլերը՝ Եվրոպական դատարանը մերժել է միջանկյալ միջոց կիրառելու պահանջը:

Բրիտանական Daily Mail պարբերականը հրապարակել է ուշագրավ տեսանյութ, որում ներկայացված է՝ ինչպես են Փարիզի բնակիչները ծնկի գալիս ու երգում «Ավե Մարիա» երգը հրդեհվող Փարիզի Աստվածամոր տաճարի ֆոնին:

Լուսադեմին արված հուզիչ տեսանյութն արագորեն տարածվել է համացանցում: Ֆիքսված կադրերում երևում է՝ ինչպես են կրակի ագահ լեզուները կուլ տալիս պատմական շինությունը, մինչդեռ հավաքված ամբոխը շարունակում է երգել:

«Ես հաճախ եմ այստեղ գալիս և ներս եմ մտնում նույնիսկ, եթե ներսում պատարագ չի մատուցվում: Սա արտասովոր վայր է, Ֆրանսիայի պատմության անքակտելի մասնիկը: Այն Ֆրանսիայի քաղաքական, մտավոր և հոգևոր խորհրդանիշն է»,-նշել է ներկաներից մեկը:

Պարբերականը մանրամասնում է, որ Ֆրանսիայի նախագահ Էմանուել Մակրոնը խոստացել է «աշխարհի մեծագույն տաղանդների օգնությամբ վերակառուցել 850-ամյա տաճարը»: Բացի այդ, նա համազգային դրամահավաք է հայտարարել:

Մակրոնն առանձնահատուկ շնորհակալական խոսք է ասել «աներևակայելի քաջ» և «պրոֆեսիոնալ» հրշեջներին, որոնց ջանքերի շնորհիվ հաջողվել է փրկել տաճարը:

Երկուշաբթի ուշ երեկոյան հրշեջ ծառայության ղեկավարը հայտնել էր, որ կառույցը կարելի է փրկված համարել: Մինչդեռ երեքշաբթի առավոտյան հայտարարվել է, որ կրակը վերահսկման տակ է առնված և մասամբ մարվել է:

Հիշեցնենք, որ երեկ Փարիզի Աստվածամոր տաճարում խոշոր հրդեհ էր բռնկվել, որի հետևանքով փլվել էր տաճարի աշտարակը: Դեպքի վայր էին ժամանել Ֆրանսիայի նախագահն ու վարչապետը: Հրդեհաշիջման աշխատանքներին շուրջ 400 հրշեջ է մասնակցել: Հրդեհի հետևանքով տաճարը մեծապես տուժել է:

Ֆրանսիական լրատվամիջոցների տվյալներով՝ հրդեհը կարող է կապված լինել տաճարում վերանորոգման աշխատանքների հետ:

Հռոմի Պապ Ֆրանցիսկոսը Վատիկանում տեղի ունեցած ընդունելության ժամանակ ծնկի է իջել՝ համբուրելու Հարավային Սուդանի նախկինում պատերազմող 3 առաջնորդների ոտքերը՝ կոչ անելով խաղաղություն պահպանել և չվերադառնալ քաղաքացիական պատերազմին։