Վրաստանում վթարի ենթարկված ՀՀ քաղաքացիներից  14-ամյա տղա երեխայի վիճակը ծայրահեղ ծանր է: Այս մասին հայտնում են վրացական լրատվամիջոցները:

«Տուժաներից մեկի վիճակը կայուն է, որևէ բժշկական միջամտություն չի պահանջվել։ Մնացած երկու տուժածներից մեկի՝ 14–ամյա տղայի վիճակը ծայրահեղ ծանր է։ Գլխուղեղի ծանր վնասվածք ունի։ Արհեստական շնչառություն ենք տվել»,- լրագրողներին ասել է բժիշկ Դավիթ Ղազաիշվիլին:

Թբիլիսիի Լեսելիձե մագիստրալի մոտ տեղի ունեցած վթարի հետևանքով  երեք մարդ է զոհվել՝ մի կին և երկու երեխա: Վթարից տուժել է 5 մարդ։ Նրանց տեղափոխել են Գորիի և Թբիլիսիի հիվանդանոցներ։ Այս պահին Գորիի տարածքային հիվանդանոցում երեք վիրավոր կա, որոնցից մեկի վիճակը ծայրահեղ ծանր են գնահատում։ Մահացածները և տուժածները ՀՀ քաղաքացիներ են։ ՆԳ նախարարության տեղեկատվության համաձայն, հայկական համարանիշերով մեքենան ճանապարհից շեղվել է, շրջվել է, և մեքենան հրդեհվել է։

Անցկացվում է հետաքննություն։

Ավելի վաղ հայտնել էինք, որ Վրաստանում վթարից տուժածները երկու հայ ընտանիքի անդամներ են: Ընտանիքներից մեկը Արագածոտնի մարզի Օշական գյուղից է, մյուսը՝ Երեւանից:

Ադրբեջանի նախագահ Իլհամ Ալիեւը ԱՄՆ նախագահ Դոնալդ Թրամփին շնորհավորել է Անկախության օրվա կապակցությամբ:

«Մենք մեծ հույսեր ենք կապում որպես ԵԱՀԿ Մինսկի խմբի համանախագահող երկիր ԱՄՆ-ի եւ Ձեզ հետ՝ պարոն նախագահ՝ կապված Լեռնային Ղարաբաղի հակամարտության խաղաղ եւ արդարացի, միջազգային իրավունքների նորմերին համապատասխան եւ մեր երկրի տարածքային ամբողջականության շրջանակում կարգավորման հետ»,- ասվում է շնորհավորական տեքստում, որը մեջբերում են ադրբեջանական ԶԼՄ-ները:

Ալիեւը նշել է, որ Ադրբեջանին ու ԱՄՆ-ին կապում են բարեկամական եւ գործընկերային հարաբերությունները:

«Մի շարք ոլորտներում համագործակցությունը ռազմավարական գործընկերության բնույթ է կրում: Մենք մտադիր ենք շարունակել ահաբեկչության դեմ պայքարի եւ միջազգային անվտանգության ապահովման հարցերով բազմակողմ ջանքերը: «Հարավային գազային միջանցք» ծրագիրը, որը հաջող կերպով իրականացվել է, մեծ ներդրում ունի Եվրոպայի էներգետիկ անվտանգության ապահովման համար: Եվ ԱՄՆ-ի կողմից մեր ծրագրերի աջակցությունը մեզ համար մեծ նշանակություն ունի»,- նշել է Ալիեւը:

Մոսկվայի քաղաքապետարանը վերջնականապես մերժել է Խաչատուրյան քույրերի աջակցության երթը: Այս մասին Facebook-ում հայտնել է ակտիվիստ Ալյոնա Պապովան, հաղորդում է Lenta-ն:

Ծրագրվում էր «Քույրերի երթն» անցկացնել հուլիսի 6-ին Մոսկվայի կենտրոնում, սակայն քաղաքային իշխանություններն առաջարկել են Լյուբլինոյի հրապարակը: Երթի նախաձեռնողները չեն ընդունել այդ տարբերակը, նրանք գրավոր մերժում են ուղարկել, որից հետո կոռուպցիայի դեմ հակազդեցության եւ անվտանգության բաժինը հայտնել է, որ «հանրային միջոցառումներ անցկացնելու իրավունք չունի»:

Երթի նախաձեռնողների մեկը՝ Դարյա Սերենկոն պատմել է, որ ակտիվիստները սպառնալիքներ են ստացել Արսեն Խաչատուրյանից՝ Միխայիլ Խաչատուրյանի զարմիկից:

Հիշեցնենք, որ երեք քույրեր՝ Քրիստինան, Անգելինան եւ Մարիան, սպանել են իրենց հորը 2018 թվականի ամռանը: Աղջիկները պնդում են, որ հայրը դաժան վերաբերմունք էր ցուցաբերում եւ բռնություն գործադրում նրանք նկատմամբ: Քույրերի պնդմամբ՝ Միխայիլը պահում էր նրանց որպես անձնական ստրկուհիներ: Հետմահու հոգեբուժական փորձաքննությունը ցույց էր տվել ընտանիքի հոր մոտ հոգեկան խանգարումներ: Հանցանքի պահին նրանք 17, 18 եւ 19 տարեկան էին:

Անցած տարվա օգոստոսի 2-ին Մոսկվայի Օստանկինյան դատարանը ձերբակալել էր նրանց։ Սեպտեմբերի 27-ին Բասմանյան դատարանը փոխել էր նրանց խափանման միջոցը՝ կալանքից դարձնելով որոշակի գործողությունների արգելք, նրանք ազատ էին արձակվել դատարանի դահլիճից։

Պաշտոնական Բաքուն ԵԱՀԿ Մինսկի խմբի համանախագահներից առաջարկների է սպասում Լեռնային Ղարաբաղի կարգավորման հարցով Ադրբեջանի և Հայաստանի արտաքին գործերի նախարարների մոտ հանդիպման ժամկետների շուրջ։

Այս մասին այսօր, ըստ Minval.az-ի, հայտարարել է Ադրբեջանի արտաքին գերատեսչության ղեկավար Էլմար Մամեդյարովը։

«Ես Նոստրադամուսը չեմ, որ ասեմ, թե երբ կլինի նոր հանդիպումը. որքան շուտ, այնքան լավ։ Համանախագահները կասեն, թե երբ հնարավոր կլինի նոր հանդիպում անցկացնել»,- նրա խոսքերն է մեջբերում «Ինտերֆաքսը»։

Նրա խոսքով՝ Ադրբեջանի և Հայաստանի ԱԳ նախարարների` հունիսի 20-ին Վաշինգտոնում տեղի ունեցած վերջին հանդիպումն ավելի քան 3 ժամ է տևել։

«Այդ հանդիպման դրական կողմն այն է, որ միջնորդները մեզ առաջարկներ են ներկայացրել քննարկման համար։ Դրանք հի՞ն, թե՞ նոր փաստաթղթեր են։ Մենք դրանք քննարկում ենք վերջին 15 տարիներին»,- ասել է Մամեդյարովը։

Նա հավելել է, որ Ադրբեջանի դիրքորոշումն անփոփոխ է մնում. հայկական զորքերը դուրս պետք է բերվեն օկուպացված ադրբեջանական տարածքներից։

Նրա խոսքերով` հիմնական բանակցությունները կարող են սկսվել միայն օկուպացված տարածքներից հայկական զորքերի դուրսբերումից հետո։

«Ինչ վերաբերում է այլ հարցերին, դրանք քննարկվում են։ Բայց հիմնականը հայկական զորքերի դուրսբերումն է»,- հավելել է նա։

Միևնույն ժամանակ՝ Մամեդյարովը նշել է, որ Ադրբեջանը «սուբստանտ բանակցությունների ներմուծման» կողմնակից է։

Մամեդյարովը շեշտել է՝ «Մոտակա 2-3 ամիսներին մենք կդիտարկենք համանախագահների առաջարկները»։

«Հայկական կողմն ամեն անգամ բարձրացնում է հարցը, որ իրենց պետք է կարգավիճակ և անվտանգություն։ Այդ հարցը քննարկվել է նաև Վաշինգտոնում։ Ինչ վերաբերում է անվտանգության հարցերին և միջազգային խաղաղապահ ուժերի տեղակայման հարցերին, ապա համանախագահները պետք է ավելի շատ ճշգրտեն իրենց առաջարկներն ու հանդես գան դրանցով։ Համանախագահներն ասում են, որ մենք պետք է աշխատենք այդ հարցի վրա»,- եզրափակել է Մամեդյարովը։

Ոստիկանությունը կանգնեցրել է ավտոբուսը, որը դեպի քաղաքի կենտրոն արտաթորանքից պատրաստված 200 «ռումբեր» էր տեղափոխում:

Վրացական տարբեր ԶԼՄ-ների 31 աշխատակիցներ տուժել են երեկ Թբիլիսիի կենտրոնում հանրահավաքի ժամանակ, որտեղ հատուկջոկատայինները արցունաբեր գազ եւ ռետինե փամփուշտներ էին կիրառել: Այս մասին նշվում է Վրաստանի լրագրողական էթիկայի խարտիայի հայտարարությունում, հաղորդում է Վրաստան Online-ը:

Հինգշաբթի զանգվածային հակակառավարական ակցիայի ժամանակ Վրաստանի ՆԳՆ-ն արցունաբեր գազ եւ ռետինե փամփուշտներ էր կիրառել ցուցարարների դեմ, որոնք փորձում էին ներխուժել խորհրդարան:

Կեսգիշերին Ռուսթավելի պողոտայում ակցիան սկսել էին ցրել հատուկջոկատայինները, ջրցաններ էին կիրառվել: Ընդհանուր առմամբ  հանրահավաքին տուժել է 240 մարդ, այդ թվում 80 ոստիկան:

Խարտիայի տեղեկություններով՝ բոլոր տուժած լրագրողները վիրավորվել էին ռետինե փամփուշտներից: Օրինակ՝ Civil.ge հրատարակության լուսանկարչի վրա 11 ռետինե փամփուշտներ էին արձակել,  «Ռուսթավի 2»-ի լրագրող Թամար Բաղաշվիլիի մոտ ուսի կոտրվածք էր հայտնաբերվել եւ նրան վիրահատություն էր պահանջվել: «Ռուսթավի 2»-ի անվտանգության ծառայության անդամ Գեորգի Սուլաշվիլին կորցրել է աչքը, կոտրվել է նրա ծնոտը եւ նրան նույնպես  անհապաղ վիրահատություն է պահանջվել:

Գործարարը մեղադրվում է 10 մլն դոլար արժողությամբ երեք հողամասերի յուրացման մեջ:

Մոսկվայի Տվերսկոյ դատարանը տնային կալանք է սահմանել «Օպտիմա» ծխախոտային ընկերության սեփականատեր Ալբերտ Խուդոյանի հանդեպ, որը մեղադրվում է խոշոր չափերի խարդախության մեջ: Mash-ի խոսքերով, կալանքը ուժի մեջ կլինի երկու ամիս:

Գործարարն իրեն մեղավոր չի ճանաչում և ձերբակալման պատվիրատու է համարում Պետդումայի նախկին մի պատգամավորի:

Ավելի վաղ Life-ը գրել էր, որ Խուդոյանին մեղադրանք է առաջադրվել ընկերություններից մեկից երեք հողամաս յուրացնելու մեջ: Վնասի չափը գնահատվում է 10 միլիոն դոլար:

Թուրքիայի նախագահ Ռեջեփ Թայիփ Էրդողանի գլխավոր խորհրդական Յալչըն Թոփչուն արձագանքել է Ամերիկայի հայ դատի հանձնախմբի (ANCA) թվիթերյան գրառմանը, որով կոչ էր արվում Ստամբուլը նորից վերածել Կոստանդնուպոլսի։ Այս մասին հայտնում է Ermenihaber-ը:

ANCA-ն իր էջում հրապարակել էր Այա Սոֆա տաճարի (Սուրբ Սոֆիայի) լուսանկարը, որում երևում էին Հայաստանի և Հունաստանի պետական դրոշները։ Իսկ լուսանկարին կից արված էր գրառում.

«Ստամբուլը կրկին դարձնենք Կ. Պոլիս»։

Ի պատասխան այդ գրառման` Թոփչուն Twitter-ի իր էջում գրել է.

«Հնարավոր չէ, որ դուք դա իրականացնեք։ Ասենք թե դա արեցիք, բայց նույնիսկ այդ ժամանակ էլ բացառվում է, որ դուք դա կարող եք տեսնել, որովհետև ձեզնից ոչ մեկի ուսերին գլուխ չի լինի»։

ANCA-ի հրապարակումը բավական մեծ արձագանք է գտել համացանցի թուրքական տիրույթում։ Թեմային արձագանքել էր նաև Թուրքիայի իշխող «Արդարություն և զարգացում կուսակցությունը» (ԱԶԿ-AKP) ներկայացնող պոլսահայ պատգամավոր Մարգար Եսայանը, ասելով, որ. «Ստամբուլը հավերժ է լինելու»:

ՌԴ Պետդումայի ԱՊՀ, եվրասիական ինտեգրացիոն և հայրենակիցների հարցերի հանձնաժողովի նախագահ Լեոնիդ Կալաշնիկովը Ռուսարմինֆոյի հետ զրույցում անդրադարձել է Ղազախստանում Փաշինյանի և Պուտինի չկայացած հանդիպմանը:

Կալաշնիկովը նշել է, որ Պուտինը սովորաբար անում է այն, ինչը պլանավորված է, իսկ եթե հանդիպումը տեղ չի ունեցել, ուրեմն կա ինչ-որ հանգամանք, ինչը թույլ չի տվել դրա տեղի ունենալուն: Նա հորդորել է որևէ դավադրություն չփնտրել տեղի ունեցածում. «Ամենայն հավանականությամբ, ուղղակի այդպես է ստացվել; Առավել ևս պետք չէ մոռանալ, որ հոկտեմբերին կայանալու է Պուտինի այցը Հայաստան: Չեմ կարծում թե միտում է եղել»:

Կալաշնիկովը նաև նշել է, որ տեղի ունեցածը չի ազդելու հայ-ռուսական հարաբերությունների վրա և պետք չէ այն թշնամական ակտ դիտարկել Ռուսաստանի նախագահի կողմից: