Փարիզի քաղաքապետի ընտրություններում որպես թեկնածու առաջադրված Ռաշիդա Դաթին սերտ կապեր ունի Ադրբեջանի իշխանությունների հետ: Այս մասին Marianne օնլայն հարթակում հրապարակված հոդվածում ահազանգում են Ֆրանսիայի հայկական կազմակերպությունների համակարգող խորհրդի նախագահ Մուրադ Փափազյանը, «Nouvelles d’Arménie» ամսագրի գլխավոր խմբագիր Արա Թորանյանը և Իլ դե Ֆրանսի քաղաքային խորհրդի անդամ Պատրիկ Կարամը:

Հոդվածում նշվում է, որ Դաթին հայտնի է ավտորիտար և ոչ ժողովրդավար Ադրբեջանի իշխանության հետ իր սերտ կապերով: Նա եղել է Ադրբեջանի բարեկամների ասոցիացիայի անդամ, որը համարվել է Ֆրանսիայում «խավիարային դիվանագիտության» գլխավոր գործիքը:

«Արժե՞ հիշեցնել, որ մադամ Դաթին, որը հայտարարում է Բաքվին իր սատարման մասին, դեմ է արտահայտվել 2017թ. Եվրախորհրդարանում հետաքննությանը` եվրոպացի քաղաքական գործիչների վրա Ադրբեջանի կողմից անօրինական միջոցներով ճնշում գործադրելու հարցով»,- նշված է հոդվածում:

Ռաշիդայի մտերմությունն Ալիևի ռեժիմի հետ վառ արտահայտվել է նրա կողմից 2011թ. Ադրբեջանի առաջին տիկին Մեհրիբան Ալիևայի պատվին կազմակերպված մեծ խնջույքի ընթացքում: Փարիզի քաղաքապետի թեկնածուն հատկապես 2016թ. Ադրբեջանի կողմից սանձազերծված ապրիլյան պատերազմից հետո հանդես է եկել Լեռնային Ղարաբաղում բնակվող հայերի դեմ հայտարարություններով:

Հոդվածի հեղինակները հույս են հայտնել, որ Ռաշիդա Դաթին կդադարեցնի Ադրբեջանի իշխանությունների հետ իր արտոնյալ հարաբերությունները:

Ռուսաստանի մայրաքաղաքի իր բնակարանում իրավապահներն այսօր հայտնաբերվել են հայազգի բժիշկ Լալա Օգանեսյանի դին։ Բժիշկ-սրտաբանը 47 տարեկան էր։ Այս մասին հայտնում է RusArminfo կայքը։

Ոստիկանները բնակարան են ժամանել բժշկուհու որդու կանչով։ 19-ամյա երիտասարդը ոստիկանություն է ահազանգել, որ ծնողները չեն բացում դռան դուռը, իսկ մայրը չի պատասխանում զանգերին։ Տեղ հասած ոստիկանները կոտրել են տան դուռը, ներս մտել և հայտնաբերել կնոջը՝ մահացած վիճակում։

Տան մյուս սենյակում եղել է նրա ամուսինը, որ շտապօգնության ծառայության բժիշկ է։ Նա փորձել է ինքնասպանություն գործել, սակայն դա նրան չի հաջողվել։ Տղամարդուն ծանր վիճակում տեղափոխել են բուժհիմնարկ։

Իրավապահ մարմինները քրեական գործ են հարուցել, և սպանության հիմնական կասկածյալ է դիտարկվում հենց բժշկուհու ամուսինը։

Ռուսական «Կոմերսանտ» պարբերականն անդրադարձել է ՀՀ երկրորդ նախագահ Ռոբերտ Քոչարյանի վերաբերյալ դատական գործընթացին:

Աղբյուրը հիշեցնում է, որ մարտի 3-ին դատարանը չկարողացավ որոշում կայացնել Քոչարյանի պաշտպանական թիմի` քրեական գործի փակման մասին միջնորդության վերաբերյալ: Դատավորն ընդմիջում է վերցրել ուսումնասիրելու բոլոր հանգամանքներն ու ապացույցները: Իշխանության չարաշահման համար մեղադրվող Քոչարյանի փաստաբաններն ու ազգականները ենթադրում են, որ միջնորդությունը կմերժվի, իսկ շուրջ երկու տարի առաջ սկսված դատավարությունը ևս մի քանի տարի կձգձգվի:

Պարբերականը նկատում է, որ հետապնդումը Քոչարյանի նկատմամբ, ում հետ ընկերական հարաբերությունները չի թաքցնում ՌԴ նախագահ Վլադիմիր Պուտինը, դառնում է հայ-ռուսական հարաբերությունների գլխավոր սրող հանգամանքը:

«Սահմանադրական կարգը խախտելու վերաբերյալ քրեական գործը, որով Քոչարյանից բացի անցնում են նաև ՀԱՊԿ նախկին գլխավոր քարտուղար Յուրի Խաչատուրովը, Հայաստանի պաշտպանության նախկին նախարար Սեյրան Օհանյանը, ինչպես նաև նախագահի աշխատակազմի նախկին ղեկավար Արմեն Գևորգյանը, ընթանում է Շենգավիթի առաջին ատյանի դատարանում: Մարտի 3-ի դատական նիստին, ինչպես և նախկին նիստերին, եկել էին Քոչարյանի ինչպես կողմնակիցները, այնպես էլ հակառակորդները»,-նշում է աղբյուրը:

Նիստի ընթացքում դատավոր Աննա Դանիբեկյանը պետք է քններ Քոչարյանի պաշտպանական թիմի միջնորդությունը` քրեական հետապնդումը դադարեցնելու վերաբերյալ: Նման պահանջներ հնչել էին նաև մյուս մեղադրյալների փաստաբաններից: Սակայն Դանիբեկյանը նախընտրեց ոչ մի որոշում չկայացնել:

«Հետաձգել պաշտպանական թիմի միջնորդության վերաբերյալ որոշումը մինչև գործի բոլոր հանգամանքների պարզումն ու ապացույցների ուսումնասիրությունը»,-հայտարարել է Դանիբեկյանը:

Ըստ աղբյուրի՝ Քոչարյանի պաշտպանական թիմը հույս չունի, որ իր միջնորդությունները արդյունք կտան: Ավելին, փաստաբան Արամ Վարդևանյանը չի բացառում,  որ 2018 թվականին սկսված ընթացակարգը կարող է տևել շատ երկար ժամանակ:

«Հնարավոր է՝ ձգձգվի ամենաքիչը երկու տարի: Պետք է հաշվի առնել, որ մեղադրող կողմը` դատախազությունն ու հետաքննությունը, այնպիսի մասշտաբային գործ են ներկայացրել, որ գործը կարճ ժամանակում քննելու հնարավորություն չկա»,-տեղեկացրել է փաստաբանը ռուսական պարբերականին:

Պարբերականի  հետ զրույցում նախկին նախագահի որդին` Լևոն Քոչարյանը, նշել է, որ մեղադրող կողմը գործի շրջանակում ներկայացրել է ավելի քան 800 վկա, որոնց բոլորին պետք է լսել, ինչն էլ իր հերթին ազդեցություն կունենա դատական գործի տևողության վրա:

Նշվում է, որ Քոչարյանի նկատմամբ գործը չի հանդիսանում բացառապես Հայաստանի ներքին հարցը: Մոսկվան հենց սկզբից ուշադիր հետևում է քաղաքական գործչի շուրջ ծավալվող իրադարձություններին: Երբ 2018 թվականին սկսվեց գործընթացը, ՌԴ արտգործնախարար Սերգեյ Լավրովը հայտարարել էր, որ այդպիսի գործողությունները «հակասում են Հայաստանի նոր իշխանությունների այն հայտարարություններին, որ իրենք մտադիր չեն քաղաքական հետապնդում իրականացնել իրենց նախորդների նկատմամբ»:

Հատկանշական է, որ Քոչարյանի նկատմամբ քրեական գործի հարուցումից հետո ՌԴ նախագահը զանգահարել էր նրան և շնորհավորել էր ծննդյան տարեդարձը: Անցյալ տարվա հոկտեմբերին, երբ Երևանում անցկացվում էր Եվրասիական տնտեսական միության բարձրագույն խորհրդի նիստը, Ռուսաստանի ղեկավարը հանդիպել էր ՀՀ նախկին նախագահի կնոջ` Բելլա Քոչարյանի և որդու` Լևոն Քոչարյանի հետ: Հանդիպումը տեղի էր ունեցել Երևանում ՌԴ դեսպանատանը, և բոլորը դա բնորոշել էին որպես աջակցություն ՌԴ նախագահի կողմից:

«Այդպիսի մարդը, մեծագույն երկրի նախագահը, երբ հորս շնորհավորում է ծննդյան  օրվա, Նոր տարվա կապակցությամբ, հանդիպում է մեզ հետ՝  հաստատ իմանալով, որ մեր իշխանություններին դա դուր չի գա… դա խոսում է այն մասին, թե նա ինչ մարդ է և ինչպիսի ընկեր»,-պարբերականի հետ զրույցում ասել է Լևոն Քոչարյանը:

Անդրադարձի վերջում պարբերականը, հղում անելով իր աղբյուրին, գրում է նաև, որ ռուսական կողմը Հայաստանի երկրորդ նախագահի նկատմամբ սկսված գործընթացը քաղաքական է համարում:

Ստամբուլում ձերբակալել են Sputnik Թուրքիայի գլխավոր խմբագիր Մահիր Բոզտեպեին, հաղորդում է ՌԻԱ Նովոստի-ն:

«Թուրքիայի ոստիկանության աշխատակիցներն այսօր ժամանել են Sputnik-ի գրասենյակ Ստամբուլում եւ պահանջել հանդիպում գործակալության ներկայացուցիչների հետ: Այդ ժամանակ գրասենյակում գտնվել են միայն հերթապահ աշխատակիցները: Ոստիկանները հայտարարել են, որ չեն հեռանա գրասենյակից, քանի դեռ նրանց հետ չեն հանդիպել գործակալության ներկայացուցիչները»,-հայտնել են գործակալությունում:

«Ներկայում Ստամբուլում Sputnik-ի գրասենյակում սկսվել է գործակալության ներկայացուցչության ղեկավար Մաքսին Դուրնյովի հանդիպումը գործակալության փաստաբանների,  Ստամբուլում Ռուսաստանի գլխավոր հյուպատոսության եւ թուրքական ոստիկանության աշխատակիցների հետ»,-հավելել են Sputnik-ում:

Շաբաթ Թուրքիայի քաղաքացի հանդիսացող Sputnik Թուրքիայի աշխատակիցների բնակարաններ են ներխուժել ագրեսիվ տրամադրված ցուցարարներ, որոնք վանկարկել են սպառնացող կարգախոսեր: Լրագրողներին վախեցրել են ֆիզիկական հաշվեհարդար տեսնելու սպառնալիքով, պահանջել դադարել մասնագիտական գործունեությունը: ՌԴ ԱԳՆ հաղորդմամբ՝ երեկոյան լրագրողները տեղափոխվել են Թուրքիայի ուժային կառույցներ եւ դեռեւս նրանց հետ չի հաջողվել կապ հաստատել:

ՌԴ ԱԳՆ-ն կոչ է արել Թուրքիայի իշխանություններին միջամտել իրավիճակին, ապահովել լրագրողների անվտանգությունն ու աջակցել տեղի ունեցածի բոլոր մանրամասները պարզելու գործում: ԶԼՄ-ների ազատության հարցերով ԵԱՀԿ ներկայացուցիչ Արլեմ Դեզիրը դատապարտել է լրագրողների վրա հարձակումն ու նրանց հասցեին հնչած սպառնալիքները:

Ամերիկյան Foreign Policy հանդեսում լույս տեսած հոդվածում նշվում է, որ փետրվարի 27-ին սիրիական Իդլիբում թուրքական բանակին ուղղված Սիրիայի կառավարական ուժերի ավիահարվածը կարող է իրավիճակի լուրջ սրման հանգեցնել:

Ըստ հանդեսի տվյալների, ի պատասխան սիրիական ավիահարվածի, որի հետևանքով 33 թուրք զինծառայող է զոհվել, թուրքական բանակն այսօր սպանել է Սիրիայի 16 զինծառայողի, իսկ թուրքական անօդաչուներն ու հրետանին մշտական կրակի տակ են պահել սիրիական բանակի դիրքերն Իդլիբի նահանգի ամբողջ տարածքում: Այս լարվածությունը կարող է կտրուկ փոխել հակամարտության ընթացքը, որը վերջին շրջանում վերածվել էր Մոսկվայի, Դամասկոսի և Անկարայի միջև առճակատման:

Հոդվածում նշվում է, որ եվրոպական պետություններն ու ԱՄՆ-ն կարող են օգնել այս հումանիտար ճգնաժամի մեղմման գործում, և որ սա հենց այն գործն է, որը պահանջում է Եվրոպական միության և ՆԱՏՕ-ի համատեղ ջանքերը:

Ռուսատանը դարձել է ԽՍՀՄ-ի իրավահաջորդը եւ իր վրա է վերցրել նախկին Խորհրդային Միության բոլոր հանրապետությունների պարտքերի վճարման պարտականությունը՝ արտասահմանում բաժնետոմսերի փոխանակման դիմաց, սակայն ոչ բոլոր կրկին ձեւավորված երկրներն են դրանք փոխանցել ՌԴ-ին, հայտարարել է Ռուսաստանի նախագահ Վլադիմիր Պուտինը, հայտնում է ՌԻԱ Նովոստին։

«Գործող Սահմանադրության նախաբանում հստակ ասվում է հազարամյա պատմության մասին՝ դա ակնհայտ է, եւ այն, որ մենք իրավահաջորդներ ենք, նույնպես ակնհայտ է։ Ամեն դեպքում, բոլորը համաձայնել են, որ մենք իրավահաջորդ ենք, երբ պետք էր վճարել եւ վերադարձնել նախկին Խորհրդային Միության հանրապետությունների վարկերը։ Մենք, կարծեմ, միայն Ուկրաինայի համար 16 մլրդ ենք վճարել»,- ասել է Պուտինը՝ Սահմանադրության մեջ փոփոխություններ կատարելու հարցով աշխատանքային խմբի հետ հանդիպման ժամանակ՝ մեկնաբանելով այն առաջարկությունը, թե հիմնական օրենքում պետք է ամրագրել, որ Ռուսաստանը ԽՍՀՄ-ի եւ Ռուսական կայսրության իրավահաջորդն է։

Հանդիպման մասնակիցները առաջարկել են գրանցել վճարած պարտքերը, սակայն նախագահն այդ գաղափարին հավանություն չի տվել։

«Դա պետք չէ գրանցել։ Սակայն ամբողջ աշխարհը շատ երջանիկ էր, երբ մենք ասացինք՝ այո, մենք իրավահաջորդ ենք եւ այդ պատճառով մեզ վրա ենք վերցնում նախկին Խորհրդային Միության հանրապետությունների բոլոր պարտքերը՝ արտասահմանում բաժնետոմսերի դիմաց։ Ահա մենք վարկերը բոլորի փոխարեն մարել ենք, իսկ արտասահմանում բաժնետոմսերը ոմանք, կրկին նախկին Խորհրդային Միության տարածքում ձեւավորված պետությունները, մեզ այդպես էլ չեն փոխանցել»,- հավելել է Պուտինը։

Կորոնավիրուսի տարածման սպառնալիքի հետ կապված՝ Թուրքիան փակել է ոչ միայն Իրանի, այլեւ Նախիջեւանի Ինքնավար Հանրապետության հետ սահմանները, հայտնում է Turan-ը։

Հետաքրքիր է, որ Իրանը, որից բխում է սպառնալիքը, նույնպես փակել է Նախիջեւանի հետ սահմանը։ Արդյունքում ինքնավար հանրապետությունը, որը ուղիղ ցամաքային կապ չունի Ադրբեջանի եւ Հայաստանի հետ, հայտնվել է լիակատար ցամաքային բլոկադայի մեջ։ Միակ կապը արտաքին աշխարհի հետ իրականացվում է Բաքվի հետ ավիահաղորդակցության միջոցով։

Ինչպես Turan-ին հայտնել են տեղի աղբյուրները, ճանապարհների արգելափակման պատճառով Նախիջեւանում աճել են մթերային ապրանքների գները։ Տեղի բնակիչները խանութներից մեծ քանակի նպարեղեն եւ այլ մթերքներ են գնում։ Իշխանություններն առայժմ մթերքների վաճառքի սահմանափակումներ չեն մտցրել։

Նախօրեին Թուրքիայի առողջապահության նախարարը հայտարարել էր, որ երկիրը փակում է Իրանի հետ սահմանը։

Ֆահրեթին Կոջայի խոսքերով՝ Իրանի հետ ավիահաղորդակցությունը նույնպես կդադարեցվի։ Երկու երկրների միջեւ ավտոմոբիլային եւ երկաթուղային փոխադրումները կդադարեցվեն, ցամաքային ճանապարհը նախիջեւանի հետ նույնպես կփակվի։

Չինաստանում մշակել են պատվաստանյութ կորոնավիրուսի դեմ, որն արդեն նախնական արդյունքներ է տվել: Այս մասին հայտնել է Ռուսաստանում Չինաստանի դեսպան Չժան Խանխուեյը:

Սակայն պատվաստանյութը դեռևս փորձարկումների փուլում է, այն դեռ պետք է կատարելագործվի:

Դեսպանը նաև հայտնել է, որ հայտնաբերվել է այս հիվանդության դեմ պաքարի դեղամիջոցը: Չինական դեղերի ընդհանուր արդյունավետությունը գնահատվում է 85%, որոշ շրջաններում՝ անգամ 90%, տեղեկացրել է դեսպանը:

Նա նաև հայտնել է, որ քլորոխին ֆոսֆատը, որը կիրառվում է մալարիայի բուժման համար, նույնպես արդյունավետություն է դրսևորում կորոնավիրուսի դեմ պայքարում:

Ավելի վաղ Չինաստանը հայտնել էր, որ խորհրդային հակավարակային «Արբիդոլ» դեղամիջոցը՝ ումիֆենովիր գործող նյութով, արդյունավետ է COVID-19 կորոնավիրուսի դեմ պայքարում: