Գերմանական հետախուզության զեկույցը կասկածի տակ է դնում ԱՄՆ այն պնդումները, որ COVID-19-ն առաջացել է չինական լաբորատորիայում՝ նշելով, որ մեղադանքները հիվանդությունը զսպելու ԱՄՆ անընդունակությունից ուշադրությունը շեղելու փորձ են, հայտնում է Der Spiegel-ը:

ԱՄՆ պետքարտուղար Մայք Պոմպեոն կիրակի հայտարարել էր, որ «զգալի քանակությամբ ապացույցներ կան», որ կորոնավիրուսը հայտնվել է չինական լաբորատորիայում:

Der Spiegel-ի տեղեկություններով՝ գերմանական BND հետախուզական գործակալությունը խնդրել է ԱՄՆ գլխավորած «Հինգ աչք» հետախուզական դաշինքի անդամներին ներկայացնել մեղադրանքի օգտին ապացույցները: Դաշինքի անդամներից՝ ԱՄՆ, Մեծ Բրիտանիա, Կանադա, Ավստրալիա եւ Նոր Զելանդիա, ոչ մեկը չի ցանկացել աջակցել Պոմպեոյի մեղադրանքներին:

Հետախուզության զեկույցը , որը պատրաստվել է Գերմնաիայի պաշտպանության նախարար Անեգրետ Կրամպ-Կարենբաուերի համար, պնդում է, որ ԱՄՆ մեղադրանքները եղել են նախագահ Դոնալդ Թրամփի «անհաջողություններից» հանրության ուշադրությունը շեղելու կանխամտածված փորձ:

Թուրքիայի արտահանողների գլխավոր ասոցիացիաներից մեկը թուրք արտադրողներին նախազգուշացրել է, որ անհատական պաշտպանութան միջոցներ արտադրելիս հարկավոր է համապատասխանել չափանիշներին: Այս մասին հաղորդում է Reuters լրատվական գործակալությունը:

Բանն այն է, որ ապրիլին Մեծ Բրիտանիան Թուրքիայից գնել էր 400 հազար վիրաբուժական խալաթ, սակայն ստուգումից հետո պարզվել է, որ դրանք պիտանի չեն օգտագործման համար:

Մեծ Բրիտանիայի առողջապահության նախարարության խոսնակը CNN-ին հայտնել է, որ ապրանքը որակի ստուգման գործընթացը հաջողությամբ չի անցել, հետևաբար, չի բաժանվել բուժաշխատողներին:

Պաշտոնյան նաև հայտնել է, որ Բրիտանիայի կառավարությունը կպահանջի վերադարձնել գումարը, եթե արտադրողը չուղարկի ստանդարտին համապատասխանող խալաթներ:

Ի դեպ, Մեծ Բրիտանիայի կառավարությունը բազմիցս քննադատության է ենթարկվել հիվանդանոցներում անհատական պաշտպանության միջոցների պակասի պատճառով: Պարբերականը հաղորդում է, որ ապրիլի վերջին կատարված հարցման համաձայն՝ բրիտանացի բժիշկների մեկ երրորդից ավելին ասել է, որ չունի համապատասխան անհատական պաշտպանիչ միջոցներ:

Միացյալ Նահանգները 75.000-ից 100.000 մարդ կկորցնեն կորոնավիրուսի պատչառով, Fox News-ին տված հարցազրույցում հայտարարել է ԱՄՆ նախագահ Դոնալդ Թրամփը:
Ընդ որում, նա ընդգծել է ձեռնարկությունները բացելու եւ ամերիկացիներին աշխատանքի վերադարձնելու անհրաժեշտությունը` վիրուսի տարածումը դանդաղեցնելու նպատակով հայտարարված որոշակի միջոցների չեղարկման ճանապարհով: «Մենք 75-ից 100 000 մարդ կկորցնենք,- ասել է Թրամփը:- Դա սարսափելի է: Մենք չպետք է ոչ մի մարդ կորցնենք դրա պատճառով: Դա պետք է կանգնեցվեր Չինաստանում»:

Ըստ նրա` հասարակության պահվածքը (կարանտինային ժամանակահատվածում) «անհավատալի էր» եւ «մեր հաջողության պատճառներից մեկն էր»: «Եթե կարելի է 80 կամ 90.000 մարդու կորուստը հաջողություն անվանել: Բայց դա պատճառներից մեկն է, որ մենք օդանավի առաջին մասում ենք, ոչ թե հետեւի»: «Ավելի վաղ ես խոսում էի 65.000 մարդու կորստի մասին: Այժմ ես ասում եմ 80 կամ 90.000-ի մասին, եւ այդ թվերն արագորեն աճում են»,- խոստովանել է Թրամփը:

Ըստ նրա` որոշ նահանգներ ստիպված կլինեն ավելի երկար փակ մնալ, քան մյուսները: Ընդ որում, նա աջակցություն է հայտնել զբոսայգիների եւ լողափերի բացմանը, քանի դեռ այցելուները պատշաճ հեռավորություն են պահպանում:

Կիրակի երեկոյի դրությամբ ԱՄՆ-ում գրանցվել է կորոնավիրուսով վարակման ավելի քան 1.1 միլիոն հաստատված դեպք եւ ավելի քան 67.000 մահվան դեպք, վկայում են Հոփկինսի համալսարանի տվյալները:

Առողջապահության համաշխարհային կազմակերպության՝ COVID-19-ի հարցով ծրագրի տեխնիկական ղեկավար Մարիա Վան Կերխովը պատասխանել է հարցին, թե ինչն է պատճառը, որ կորոնավիրուսից առողջացած մարդկանց շրջանում նոր թեստը կրկնակի դրական արդյունք է ցույց տալիս, հաղորդում է BBC News-ը։

Նրա խոսքով՝ այն դեպքերում, երբ «թեթեւ» պացիենտներն ապաքինվում են, մնում են մեռած բջիջներ, որոնք եւ ցույց են տալիս դրական պատասխան թեստի արդյունքում՝ չնայած այդ մարդիկ կրկնակի չեն վարակվել։

Ընդ որում՝ փորձագետը նշել է, որ գիտնականները դեռեւս փորձում են հասկանալ, թե որքան ուժեղ իմունիտետ են ձեքբերում կորոնավիրուսով հիվանդացած մարդիկ։

Կերխովը հավելել է, որ կորոնավիրուսն ունի բնական ծագում չղջիկներից, սակայն միջանկյալ տեսակը, որը փոխանցում է վիրուսը մարդուն, դեռեւս հայտնի չէ։

Անցած ամսվա ընթացքում աշխարհում կորոնավիրուսով վարակվածների թիվն ավելացել է գրեթե երեք անգամ՝ 1 միլիոնից դառնալով 3.2 միլիոն մարդ: Սակայն վարակման նոր դեպքերի աճի արագությունը նվազում է արդեն չորս շաբաթ շարունակ. եթե ապրիլի սկզբում այդ թիվն աճում էր շաբաթական 200 տոկոսով, ապա այժմ միայն 21.5 տոկոսով, հաղորդում է ՏԱՍՍ-ը:

Աշխարհում յուրաքանչյուր 100 հազար մարդու շրջանում կա 41 վարակված (մեկ ամիս առաջ այդ թիվը 13 էր):

Ապրիլի ընթացքում կորոնավիրուսի հետեւանքով զոհերի թիվն աճել է շուրջ վեց անգամ՝ 50 հազարից մինչեւ գրեթե 300 հազար մահվան դեպք: Ընդ որում՝ մահացության պայմանական ցուցանիշն ավելացել է ոչ այնքան նշանակալի չափով՝ 5-ից 7.12 տոկոս:

Արագորեն աճում է նաեւ առողջացածների թիվը՝ ամսվա սկզբում առողջացել էր 200 հազար մարդ, իսկ այժմ արդեն ավելի քան 1 միլիոն:

Տվյալ պահին վիրուսը հայտնաբերվել է արդեն 173 երկրներում, անցած ամսի այդ թիվը կազմում էր 164:

Չինաստանն այլեւս առաջին տասնյակում չէ

Մեկ ամիս առաջ վարակվածների թվով առաջատարներն ԱՄՆ-ն էր, Իսպանիան, Իտալիան, Չինաստան ու Գերմանիան:

Միացյալ Նահանգները դեռեւս առաջին տեղում են. երկրում հաստատվել է վարակման ավելի քան 1 մլն դեպք (ապրիլի 3-ին այդ թիվը հինգ անգամ պակաս էր): Այնուհետեւ Իսպանիան է (230 հազար մարդ, մեկ ամսում թիվը քառապատկվել է) եւ Իտալիան, որտեղ կա 203 հազար վարակված (2.5 անգամ աճել է թիվը մեկ ամսում):

Չինաստանը, որն ապրիլի սկզբում զբաղեցնում էր չորրորդ տեղը (84.5 հազար), այժմ անգամ առաջին տասնյակում չէ եւ գտնվում է 11-րդ հորիզոնականում: Մեկ ամսում այդտեղ հայտնաբերվել է օրական մի քանի տասնյակ վարակակիր:

Անցած շաբաթ չորրորդ հորիզոնականում էր Ֆրանսիան, սակայն նրան գերազանցել է Մեծ Բրիտանիան, որը վեցերորդ տեղում էր: Այժմ թագավորությունում արդեն ավելի քան 171 հազար հաստատված դեպք կա:

169 հազար վարակակիրներ ունեցող Ֆրանսիան այժմ հինգերորդ տեղում է, որին հաջորդում է Գերմանիան (161 հազար):

Մեծ Բրիտանիան երրորդն է մահացության ցուցանիշով

Աշխարհում կորոնավիրուսային վարակի հետեւանքով մահացության մակարդակը կազմում է շուրջ 7,12 տոկոս, անցած շաբաթ այն գրեթե 7 տոկոս էր, իսկ մեկ ամիս առաջ՝ 5 տոկոս: Եթե ապրիլի սկզբում մահացել է յուրաքանչյուր 20-րդ վարակվածը, ապա այժմ՝ յուրաքանչյուր 14-րդն է:

Երեք շաբաթ շարունակ մահացածների թվով առաջատարն է ԱՄՆ-ը (60.1 հազար): Իտալիայում, որը տեւական ժամանակ զբաղեցնում էր առաջին տեղը, այդ ցուցանիշը երկու անգամ նվազել է (27.7 հազար): Մահվան դեպքերով երրորդ տեղում է Մեծ Բրիտանիան (26,8 հազար): Իսպանիայում եւ Ֆրանսիայում մահացել է 24,8 հազար եւ 24,3 հազար կորոնավիրուսով վարակված պացիենտ:

Ամենամեծ թվով վարակվածներ ունեցող երկրներում մահացության ամենացածր ցուցանիշները Ռուսաստանում են (1 տոկոս), Թուրքիայում (2.6 տոկոս), Գերմանիայում (4 տոկոս):

Օրեցօր ավելի շատ մարդ է առողջանում

Ապրիլին սրընթաց աճ է գրանցվել առողջացածների շրջանում. 200 հազարից մինչեւ 1 մլն մարդ: Այդկերպ, բուժվել է արդեն յուրաքանչյուր երրորդ վարակակիրը:

Բացի Չինաստանից, որտեղ դուրս է գրվել պացիենտների շուրջ 94 տոկոսը, այդ ցուցանիշով առաջատար է նաեւ Իրանն ու Գերմանիան (համապատասխանաբար՝ 79 եւ 78 տոկոս):

ԱՄՆ-ում բուժվել է վարակվածների դեռեւս 14 տոկոսը, Իտալիայում՝ 37 տոկոսը, իսկ Իսպանիայում՝ արդեն ավելի քան 57 տոկոսը:

Մեծ Բրիտանիայի վարչապետ Բորիս Ջոնսոնը նախազգուշացրել է վիրուսի երկրորդ բռնկման առավելագույն ռիսկի մասին, եթե կարանտինը շատ արագ հանվի, հայտնում է BBC-ն։

Ջոնսոնն աշխատանքի է անցնում կորոնավիրուսի բարդացումներից ապաքինվելուց հետո։ Հասարակությունն ու բիզնեսը համընդհանուր մեկուսացումից դուրս գալու եւ նորմալ կյանքին վերադառնալու պլան են սպասում իշխանություններից։

Ելույթ ունենալով Դաունինգ-սթրիթում իր նստավայրի առջեւ՝ Ջոնսոնը շնորհակալություն է հայտնել բրիտանացիներին համաճարակի դեմ միասնականություն եւ վճռականություն ցուցաբերելու համար։ Վարչապետը հայտարարել է, որ Բրիտանիան մոտեցել է Covid-19-ի դեմ պայքարում առաջին՝ առողջապահության համակարգը գերծանրաբեռնվածությունից պաշտպանելու առաջադրանքի կատարմանը։

Ջոնսոնը հավաստիացրել է, որ ինքը, ինչպես ոչ ոք, հասկանում է այն վնասը, որ կարանտինը հասցնում է տնտեսությանը, սակայն այժմ առաջնահերթ խնդիրը համընդհանուր մեկուսացման ձեռքբերումներն ամրապնդելն ու հիվանդության երկրորդ բռնկումից խուսափելն է։ «Զսպեք ձեր անհամբերությունը»,- բիզնեսների սեփականատերերին է դիմել վարչապետը։ Նա հասկացրել է, որ կարանտինից դուրս գալու որոշումը կընդունվի բոլոր քաղաքական ուժերի հետ խորհրդակցություններում եւ առավելագույնս թափանցիկ կդառնա։ «Եթե մենք պահպանենք միասնականության եւ վճռականության ոգին, ես չեմ կասկածում, որ կհաղթենք»,- ասել է Ջոնսոնը։

Երկուշաբթի վարչապետը կգլխավորի Covid-19-ի դեմ պայքարին նվիրված կառավարության նիստը։ Օրվա ընթացքում նա նաեւ առանձին կհանդիպի մի շարք նախարարների եւ այլ պաշտոնյաների հետ։

Ջոնսոնը կիրակի երեկոյան է վերադարձել Դաունինգ-սթրիթի իր նստավայր։

Թուրքիայի նախագահ Ռեջեփ Թայիփ Էրդողանը Հայոց ցեղասպանության 105-րդ տարելիցի օրը նամակ է հղել Պոլսի հայոց պատրիարք Սահակ արքեպիսկոպոս Մաշալյանին։ Այս մասին հաղորդում է Ermenihaber.am-ը։

Նամակի ամբողջական հայերեն թարգմանությունը ներկայացնում ենք ստորև․

«Թուրքիայի հայերի հարգելի՛ պատրիարք Սահակ Մաշալյան,

Հայ համայնքի շատ թանկագի՛ն անդամներ,

Ողջունում եմ ձեզ սիրով ու հարգանքով։

Այս դժվար օրերին, որոնց միջով ողջ աշխարհի հետ միասին անցնում ենք, մեր քաղաքացիների միջև համերաշխությունը շարունակվում է՝ էլ ավելի ուժեղանալով։ Բարձրյալից խնդրում եմ, որ վաղվա օրվան հասնենք իրար ավելի մոտ, միասնականության ու միության զգացումներով ավելի տոգորված։

Աշխարհի ժողովուրդներին մեծ ցավ պատճառած առաջին աշխարհամարտի ծանր պայմաններում մահացած օսմանցի հայերին հարգանքով հիշում եմ և նրանց թոռներին հղում իմ անկեղծ ցավակցությունները։

Այդ ժամանակահատվածում մահացած օսմանյան բոլոր քաղաքացիների համար ալլահի ողորմածությունն եմ հայցում։

Ոչ մի դեպքում թույլ չենք տվել և թույլ չենք տալու օտարացնել մեր որևէ մի քաղաքացու, հավատքի կամ ինքնության պատճառով վատ վերաբերմունքի արժանացնել։

Մեր բոլորի ընդհանուր նպատակն է անցյալից միայն բարեկամության ու մարդկային բարձրագույն իդեալի համար ուժ առնել և ապագա կառուցել միասին։

Բոլորիս համար ակնհայտ են այն շրջանակները, որոնք, անտեսելով Անատոլիայի խորքից ծնված մեր միասնականությունը, ցանկանում են պատմությունից թշնամություն բխեցնել։ Մեր ամենակարևոր ցանկությունն այն է, որ այլ նպատակներ հետապնդող շրջանակներին հնարավորություն չտանք, մանավանդ որ մենք միասնությամբ, բարեկեցությամբ ու խաղաղությամբ լեցուն ապագա ենք ցանկանում կառուցել։

Այս խոհերով ևս մեկ անգամ հարգանքով եմ հիշում առաջին աշխարհամարտում մեր կորցրած օսմանցի հայերին։ Ձեզ բոլորիդ մաղթում եմ շենություն»։

ԱՄՆ նախագահ Դոնալդ Թրամփը նախազգուշացրել է, որ Չինաստանը կարող է բախվել հետեւանքների հետ, եթե պարզվի, որ երկիրը կրում է գիտակցված պատասխանատվություն կորոնավիրուսի պանդեմիայի համար, գրում է The Guardian-ը։

«Դա (կորոնավիրուսը) կարող էր դադարեցվել Չինաստանում նախքան բռնկվումը, սակայն չդադարեցվեց, եւ ամբողջ աշխարհը տառապում է դրանից»,-հայտարարել է Թրամփը Սպիտակ տանը ճեպազրույցի ընթացքում։

«Եթե դա սխալ էր, ապա սխալը մնում է սխալ։ Սակայն եթե նրանք կրում են գիտակցված պատասխանատվություն, այո, ես հենց դա նկատի ունեմ, ապա, իհարկե, պետք է լինեն հետեւանքներ»,-ընդգծել է ԱՄՆ նախագահը։

Ընդ որում՝ նա չի հստակեցրել, թե ինչ հետեւանքների մասին է խոսքը։

Դոնալդ Թրամփը հավելել է, որ չինացիները «շփոթված» են, եւ այժմ ամբողջ հարցը կայանում է նրանում, թե արդյոք կորոնավիրուսը տարածվել է սխալի հետեւանքով, որը դուրս էր եկել հսկողությունից, թե դա արվել էր միտումնավոր։

ՌԴ-ում ՀՀ դեսպանությունը հայտարարություն է տարածել իր ֆեյսբուքյան էջում, որում տեղեկացնում է, որ մեծ թվով մեր քաղաքացիներ այս օրերին շարունակում են նախընտրել մնալ «Դոմոդեդովո» օդանավակայանում՝ առաջացնելով նաև կուտակումներ, որոնք ՌԴ կառավարության կողմից ներդրված առողջապահական անվտանգության միջոցառումների խախտում են։

Այս առնչությամբ այսօր դեսպանությանն է կրկին դիմել «Դոմոդեդովո» օդանավակայանի ղեկավարությունը՝ արձանագրելով, որ քաղաքացիների՝ օրեր շարունակվող կուտակումներն արդեն իսկ խնդրահարույց իրավիճակ են ստեղծել օդանավակայանի տարածքում՝ խախտելով ք․ Մոսկվայում և Մոսկվայի մարզում սահմանված կարանտինային ռեժիմի պահպանման կանոնները։