ՀՀ ԳԱԱ Բուսաբանական այգին իր ոդիսականի արդյունքում կորցրել է  իր բույսերի հավաքածուները: Բուսաբանական այգու խնդիրները բազմազան են ուստի ուրախալի է, որ այս տարածքում ինչ որ դրական բան է կատարվում: Մայիսի 17-ին Բուսաբանական այգում տեղի կունենա վերականգնված Վարդերի կոլեկցիոն հողամասի հանդիսավոր բացումը:

ՀՀ ԳԱԱ տեղեկատվական վերլուծական կենտրոնի` հողամասի վերականգնումը հնարավոր է դարձել Հայաստանում Շվեյցարիայի դեսպան պարոն Կ. Օբոլենսկու անմիջական մասնակցության և դեսպանատան 6000 եվրո (3 մլն դրամ) չափի դրամական աջակցության շնորհիվ:

5000 քառ մետր տարածքի վրա, որն ընդգրկում է նաև վարդանոցի հարակից տարածքները, կատարվել են կոճղերից և մացառներից մաքրման աշխատանքներ, բարելավման նպատակով անցկացվել է հողի երեքանգամյա փորում և ստեղծվել է ոռոգման ցանց:

Տնկվել են վարդի 20 սորտերի 1100 տնկիներ, իսկ շրջապատող լանդշաֆտը ձևավորվել է բարձր գեղազարդ և գեղեցիկ ծաղկող բույսերով: Այցելուների համար տեղադրվել են մագլցող բույսերով ձևավորված տաղավարներ, նստարաններ և ցայտաղբյուր:

1990-ական թվականներին տնտեսական և էներգետիկ ճգնաժամի հետևանքով Բուսաբանական այգու տարբեր դենդրոհավաքածուները, այլ կանաչ տնկարկների հետ ունեցան լուրջ կորուստներ, իսկ վարդերի հավաքածուն գրեթե ամբողջովին ոչնչացվել էր:

Մայիսի 15-ին, ժամը 15.00-ին, ոստիկանության  քրեական հետախուզության գլխավոր վարչության ծառայողները Մոսկվա-Երևան չվերթի ինքնաթիռով  ՀՀ են տեղափոխել 41-ամյա Նորիկ Մ.-ին, որը 2010 թ. հուլիսի 17-ից ոստիկանության Թալինի բաժնի կողմից հետախուզվում էր խարդախության մեղադրանքով:

Նորիկ Մ.-ն կալանավորված է:

Կատարվում է քննություն

Մայիսի 16-ին հիվանդանոցից ոստիկանության Իջևանի բաժնում հաղորդում է ստացվել, որ գիշերը ավտովթարի հետևանքով ստացած վնասվածքներով իրենց մոտ է տեղափոխվել 25-ամյա Վիգեն Ա.-ն և 26-ամյա Աղասի Չիբուխչյանի  դիակը:

Պարզվել է, որ մայիսի 15-ին, ժամը 23.00-ի սահմաններում, Ենոքավան գյուղից դեպի «Սպարտիկի աղբյուր» կոչվող տարածքում Ա. Չիբուխչյանին պատկանող «ԳԱԶ-66» մակնիշի ավտոմեքենան շրջվել է, ինչի հետևանքով ուղևորը ստացել է մարմնական վնասվածք, իսկ Ա. Չիբուխչյանը` տեղում մահացել:

Հանգամանքները պարզվում են:

Կատարվում է քննություն:

Մայիսի 15-ին ոստիկանության Գուգարքի բաժնում հաղորդում է ստացվել, որ ժամը 06.00-ի սահմաններում 50-ամյա Արսեն Կիրակոսյանի վարած «ԳԱԶ-3110» մակնիշի ավտոմեքենան Ալավերդի-Վանաձոր ճանապարհի 32-րդ կմ-ին դուրս է եկել երթևեկելի մասից և ընկել Փամբակ գետը:

Պատահարի ընթացքում վարորդն ավտոմեքենայից դուրս է ցատկել և նույն օրը, ժամը 09.50-ին, ներկայացել ոստիկանության Թումանյանի բաժին, իսկ 4 ուղևորները մնացել են ավտոմեքենայի մեջ:

Որոնողական աշխատանքների շնորհիվ, Ձորագետ համայնքի սկզբնամասում`  Փամբակ գետում, հայտնաբերվել են  2 ուղևորների՝ Ալավերդի քաղաքի բնակիչներ, 41-ամյա Արմեն Ասրյանի և 43-ամյա Մարատ Շախկուլյանի դիակները:

Ձեռնարկվում են միջոցառումներ մյուս ուղևորներին՝ 54-ամյա Վահան Երիցյանին և 45-ամյա Հարություն Երզնկյանին  հայտնաբերելու ուղղությամբ:

Կատարվում է նախաքննություն:

Այսօր մայիսի 13-ն է՝ շաբաթվա 5-րդ օրը, և ինչպես ընդունված է ասել՝ Սատանայի օրն է:

Ուրբաթի և 13 թվի զուգակցման նկատմամբ մարդիկ վախի զգացում ունեն:

Ըստ ասքերի, ուրբաթ օրը 12 վհուկ հավաքվում է խնջույքի, նրանց միանում է սատանան, ու դառնում են 13:

Աստվածաշնչյան որոշ մեկնաբանությունների համաձայն, Եվան ու Ադամը արգելված պտուղը համտեսել  են հենց ուրբաթ 13-ին: Կայենը սպանել է Աբելին ուրբաթ օրը։

13 թվի նկատմամբ վախն է պատճառը, որ մի շարք երկրների բարձրահարկ շենքերում բացակայում է 13-րդ հարկի ցուցանակը կամ ինքնաթիռներում չկա 13-րդ կարգ: Որոշ կինոթատրոններում էլ 13 թվով համարակալված նստատեղն է բացակայում:

Այս առումով ամենասնահավատն ամերիկացիներն են: Նրանք նույնիսկ այդ օրն աշխատում են տնից դուրս չգալ և ցանկացած անհաջողություն կապում են օրվա խորհրդի հետ: Սակայն կան երկրներ, որտեղ բնակիչները սնահավատությանը տուրք չեն տալիս, նույնիսկ հակառակն էլ կա. օրինակ՝ հնդկացիները, ռուսները 13-ը համարում են ամենաբարեբեր թիվը:

Աստղագուշական կանխատեսումներում այդ օրերին հաճախ են նշվում դրական միտումները:

Ի դեպ, այս տարվա երիտասարդների  օրհնության օրն ուրբաթ էր, ամսաթիվն էլ՝ փետրվարի 13-ը: Սա ոչ միայն զուգադիպություն էր, նաև քրիստոնեության վերաբերմունքն էր սնոտիապաշտությանը:

Լեգենդար ծանրամարտիկ Յուրի Վարդանյանն արդեն դուրս է գրվել հիվանդանոցից: Օլիմպիական չեմպիոնի վիճակը հիմա ավելի քան լավ է` համեմատած այն դրության հետ, որում հայտնվեց Վարդանյանը` ավտովթարից հետո ոտքի մեջ տեղադրված ձողի կոտրվելու հետևանքով:

Էրեբունի բժշկական կենտրոնում կատարված վիրահատության շնորհիվ Վարդանյանի ոտքին ամրացվել է Ելիզարովի ապարատը, որի շնորհիվ Վարդանյանն արդեն ոտքի վրա է. ինքնուրույն նստում է, կանգնում, շարժվում: Ուղեղի սնուցման խանգարման հետևանքով առաջացած մտահոգությունը ևս մնացել է հետևում. չեմպիոնը լիովին վերագտել է իրեն, կարողանում է երկար զրուցել բարեկամների, ընկերների հետ:

ԼՂՀ ՊԲ մամուլի ծառայությունը տարածել է տեղեկատվություն,ըստ որի Մայիսի 11-ին ղարաբաղա-ադրբեջանական հակամարտ զորքերի շփման գծում հակառակորդի գնդակից քաղաքացիական անձ է զոհվել:

Շփման գծի  հարավարեւելյան սահմանահատվածում ժամը 18:05-ի սահմանում տրակտորով աշխատելիս, հակառակորդի կողմից արձակված գնդակից գլխի շրջանում ստանալով հրազենային մահացու վիրավորում` Հադրութի քաղաքացիական հիվանդանոց տեղափոխվելու ճանապարհին ժամը 19:20-ին մահացել է Հադրութի շրջանի Քյուրաթաղ գյուղի բնակիչ, 33-ամյա Արայիկ Նելսոնի Բալասանյանը:

Ադրբեջանական բանակի առաջապահ ուժերը շփման գծի տարբեր ուղղություններում շարունակում են պարբերաբար խախտել հրադադարի պահպանման ռեժիմը:

Միայն վերջին երկու օրերի ընթացքում հակառակորդը տարբեր տրամաչափի զինատեսակներից ՊԲ դիրքերը գնդակոծել է ավելի քան 400 անգամ, տեղեկացնում է մամուլի կենտրոնը:

Միջադեպի հետ կապված մանրամասները ճշտվում են:

Սփյուռքի նախարարն այսօր Երևանի պետական համալսարանում լրագրողների հետ հանդիպմանը կարծես արդարանում էր մեկնաբանելով թուրքական «Հյուրիեթ» օրաթերթի հրապարակումը. «Ես իմ խոսքի մեջ ներկայացրել եմ «պոլսահայ համայնք, Հայաստանից դուրս ապրող հայրենակիցներ, բառակապակցությունները»:

Մինչդեռ «Հյուրիեթ» -ն, անդրադառնալով սփյուռքի նախարարի Ստամբուլ կատարած այցին, գրել էր, որ պոլսահայ համայնքի բազմաթիվ ներկայացուցիչներ են վրդովված նախարարի այցից. «նախարարը նրանց համարել է սփյուռքահայ, մինչդեռ պոլսահայերը իրենց չեն համարում սփյուռքահայ, քանի որ ապրում են իրենց նախնիների երկրում»:

Նախարարը հետաքրքիր մոտեցում ուներ. փորձելով հասկանալ թե ինչ են մտածել թուրքական պարբերականում. «Հյուրիեթը» երևի մտածել է, թե ինքը՝ որպես սփյուռքի նախարար, կարող էր պոլսահայերին դիմելիս օգտագործել «սփյուռք» բառը:

Տիկին նախարարը չափազանց լավատես է. «Դա միակ հնարավոր պրովոկացիան է, որ կարող էին անել»,- նշեց Հակոբյանը:

«Սփյուռքը Հայկական լեռնաշխարհից դուրս ապրող հայերն են, և այստեղ մենք անպայման առանձնացրել ենք, որ պոլսահայերն ու Արևմտյան Հայաստանի տարածքում ապրողները հազարավոր տարիներ ապրում են իրենց հողի վրա, որոնք Սփյուռք չեն համարվում: Սա թուրքական պետական քաղաքականություն է, որը փորձում է սեպ խրել հայրենիքի և հայրենիքից դուրս ապրող հայերի միջև»,- փորձել է երևույթը բացատրել Հրանուշ Հակոբյանը:

Նա նաև ապացույցներ կարող է ներկայացնել.ասենք ինչպես տիեզերագնաց տղայի դիպլոմները. «Ստամբուլ կատարած այցին մասնակցել են նաև հայ լրագրողներ, իմ բոլոր հանդիպումներն ու խոսակցությունները տեսագրված և ձայնագրված են»:

Նախարարը նաև տեղեկացրել է, որ ինքը քաջ գիտի թե ինչ ասել է սփյուռք: Նա ասել է, թե Հայրենիք-Սփյուռք հայեցակարգը մշակելիս իրենք արդեն որոշակիորեն քննարկել և ճշգրտել են, թե ինչ է իրենից ներկայացնում Սփյուռքը:

Մայիսի 11-ին Իսպանիայի հարավարևելյան շրջաններում տեղի է ունեցել 2 երկրաշարժ, մահացել է առնվազն 10 մարդ: Ըստ ԱՄՆ երկրաբանական ծառայության հաղորդման, երկրաշարժի էպիկենտրոնում ուժգնությունը կազմել է 5.1-5.3 բալ: Նման ուժգնությամբ երկրաշարժ վերջին անգամ Իսպանիայում գրանցվել էր 50 տարի առաջ:

Երկրաշարժի հետևանքով ամենաշատը տուժել է Լորկա քաղաքը: Այնտեղ բազմաթիվ շենքեր են փլուզվել:

Ոստիկանները փակել են քաղաքի պատմական կենտրոնը: Իսպանիայի իշխանությունները զոհերի և վիրավորների վերաբերյալ պաշտոնական տեղեկություններ դեռևս  չեն հաղորդել:

Ի դեպ, երեկ Իտալիայի մայրաքաղաքը լքել էին հազարավոր մարդիկ, քանի որ տասնյակ տարիներ առաջ ինքնուս սեյսմոլոգ Ռաֆայել Բենդանդին 2011 թ. մայիսի 11-ին հզոր երկրաշարժ էր «կանխագուշակել» Հռոմում: Բազմաթիվ իտալացիներ հավատում էին նրա «կանխատեսումներին», քանի որ 1976 թ. Վենետիկում տեղի ունեցած երկրաշարժը նույնպես նա էր «կանխագուշակել»: Փաստորեն այս անգամ Բենդանդին «մի քիչ» սխալվել էր՝ երկրաշարժը հարևան պետությունում տեղի ունեցավ:

Մայիսի 6-ին Ֆրանսիայի Նիցցա քաղաքի Ֆրանսուա Գրոսսո փողոցում հայազգի սպանված «օրենքով գողի»` Էդվարդ Մարգարյանի անվան հետ է  կապվում Նիցցայի նախկին հոգևոր հովիվ Տեր Վաչեի գործունեությունը, որն այժմ պաշտոնավարում է Ստրասբուրգում: Ըստ լուրերի միաբանը լայն կապեր է ունեցել Նիցցայի ոչ միայն բիզնեսմենների, այլև քրեական աշխարհի հետ:

Մայր Աթոռից տեղեկացրեցին, որ իրոք հոգևորականը ձերբակալված է եղել նշված սպանության հետ առնչվելու կասկածանքով, սակայն ներկայումս ազատ է արձակվել հանցակցության ապացույցների անբավարարության պատճառով: Չնայած դրան, գործի նախաքննությունը շարունակվում է: Մայր Աթոռից ասացին նաև, որ միջադեպը որևէ կերպ չի կարող  խոչնդոտել, որ Տեր հայրը շարունակի պաշտոնավարել Ստրասբուրգում:

News.am –ի փոխանցմամբ, Սպանվածը քրեական շրջանակներում հայտնի է որպես «Հոկտեմբերյանցի Էդո»: 39-ամյա  էդոյի հետ նույն պահին սպանվել է նաեւ քրեական հեղինակություն Աբդուլա Էրզանուկաեւը` «Ավստրիացի Աբդուլա» մականունով:

Նախնական տեղեկություններով` սպանությունը տեղի է ունեցել Սուխումիի բնակիչ 40-ամյա Անդո Սարգսյանի տանը: Տանտիրոջ և հյուր եկած Մարգարյանի ու Էրզանուկաեւի միջեւ վեճ է ծագել: Հարեւանները, լսելով աղմուկ եւ կրակոցներ, ոստիկանություն են կանչել: Դեպքի վայր ժամանած ոստիկանության աշխատակիցները ձերբակալել են տնից դուրս եկած մի տղամարդու, ով եղել է երկու երեխաների հետ: Ոստիկանական բաժանմունքում ձերբակալված քաղաքացին  հայտնել է, որ վեճի ժամանակ նյարդերը տեղի են տվել եւ նա կրակել է իրեն հյուր եկած երկու անձանց վրա:

Մեկ այլ վարկածի համաձայն, Սարգսյանն ի վիճակի չէր լինի միանգամից երկու մարդ սպանել, եւ չի բացառվում, որ «օրենքով գողի» եւ քրեական հեղինակության սպանության հարցում երրորդ անձ է ներգրավված եղել:

Մարգարյանի մարմնից հանվել է 22 մմ-անոց տրամագծով փամփուշտ, սակայն չի պարզվել` արդյոք երկու զոհերն էլ միեւնույն զենքի՞ց են սպանվել, թե` ոչ:

Ըստ տեղեկությունների, սպանված ղազախական ծագմամբ չեչեն գործարար Աբդուլլա Էրզանուկաեւը մի քանի տարի առաջ Ֆրանսիայում քաղաքական ապաստան է ստացել: Նա ապրել է Նիցցայում, եւ պարբերաբար ճամփորդությունների մեջ է եղել: Նա Ֆրանսիայի չեչենական համայնքում ազդեցիկ դեմք էր համարվում եւ հանդես էր գալիս որպես «հարց լուծող»:

Ինչ վերաբերում է «Հոկտեմբերյանցի Էդոյին», ապա, ըստ շրջանառվող լուրերի, նա թագադրվել է 1997 թվականին  հայ «օրենքով գող» Օգանով եղբայրների երաշխավորությամբ, ովքեր այդ ժամանակ հակասության մեջ էին «Դեդ Հասանի» հետ:

Էդվարդ Մարգարյանը երկար ժամանակ ապրել է Բարսելոնայում: Նա Նիցցա էր եկել` կնոջն ու երեխաներին տեսակցելու համար: Որոշ տեղեկությունների համաձայն, «օրենքով գողը» հին վեճ է ունեցել չեչենական խմբավորումների հետ: Նախանցած տարի Էդոն դաժան ծեծի է ենթարկվել նրանց կողմից, սակայն նրան հաջողվել է ողջ մնալ:

Առաջիկա օրերին Էդվարդ Մարգարյանի դին կտեղափոխվի Հայաստան:

«ՄաՄաՍյու»՝ կանանց վերարտադրողական ֆունկցիայի օրգանների քաղցկեղի կանխարգելման ու դրա բուժման համար անհրաժեշտ թանկարժեք դեղորայքի մատչելիության բարձրացման ու դրա ձեռքբերմանն անհրաժեշտ միջոցներ հայթայթելու համար ստեղծված բարեգործական հիմնադրամը շարունակում է իր տասնօրյա ակցիաների շարքը:

Ալի Անսարի, Անահիտ Հայրապետյան, Աննա Հակոբյան, Արփի Ադամյան, Լուսինե Խանդիլյան, Կարեն Մինասյան, Հայկ Բիանջյան, Մհեր Ազատյան, Նազիկ Արմենակյան, Սնեժաննա Ջհանգիրյան, Օկեան:

Այս արվեստագետագետների աշխատանքներն այսօր, ժամը 17.00-ից ներկայացվել են վաճառքի Նորարարական փորձարարական արվեստի կենտրոնում՝ Փավստոս Բուզանդ 1/3:

Օկեանն ասում է. «Ինձ առաջարկել են մասնակցել ցուցահանդեսին, ես միայն ուրախ կլինեմ, եթե աշխատանքներս վաճառվեն, ու դրանով գոնե իմ ներդումն ունենամ մարդու կյանքի փրկության հարցում: Ամեն մարդ պետք է օգնի դիմացինին՝ ինչով կարողանում է: Ես ունեմ միայն իմ աշխատանքները»:

Մասնակիցներից Մհեր Ազատյանն այսպես մեկնաբանեց իր մասնակցությունը. «Եթե հնարավորություն ունենայի ինչ-որ կերպ ռեալ գումարով օգնել, ավելի լավ կլիներ, բայց քանի որ չեմ կարող, ներկայացրել եմ իմ աշխատանքները՝ հուսալով, որ ինչ-որ բան կվաճառվի, ու գոնե մի փոքր կթեթևացնի հոգսերը: Ես ընդհանրապես չեմ սիրում էդ «օգնել» բառը՝ ճիշտն ասած»:

Արփի Ադամյանը, որն իր աշխատանքը ներկայացրել է վաճառքի՝ գնահատելով 350000 դրամ, պարզաբանում է. «Էսքան ժամանակ իմ գործերը ցուցադրվել են, ու երբեք չեմ վաճառել, միայն մի անգամ: Նպատակն է կարևոր, չէ՞ որ սա տեղի է ունենում մի ֆոնդի համար, որը խնդիր ունի գումար հավաքելու: Սա սովորական ցուցահանդես չի, ակցիա է, որը ծառայում է  կոնկրետ նպատակի: Ու չեմ կարծում, որ էդ գումարը շատ մեծ է արվեստի գործ առնելու համար, չեմ կարծում, որ որևէ զարմանալի բան կա դրա մեջ, զարմանալի է  հակառակը, երբ արվեստի գործը գնահատվում է  5-10 հազար դրամ: Դրա փոխարեն կարելի է ձրի տալ: Իսկ եթե վաճառքն ու գումարը որոշակի բանի պետք է ծառայեն, ապա արժեքը արդարացված է առավել ևս»:

«Իմ հիշելով սա առաջին դեպքն է, քանի որ նախաձեռնությունը կոնկրետ մարդու կյանքը փրկելու համար է, շատերը բերել են իրենց լավագույն աշխատանքները:

Ցուցահանդեսը, որն արտիստական նպատակ չունի, շատ-շատերից ավելի հաջողված եմ համարում»,- ասում է ցուցահանդեսը համակարգող արվեստաբան Սեդա Շեկոյանը:

Երբ մենք հայտնվում ենք մի իրավիճակում, որ մեզ պետք է լինում օգնություն խնդրել՝ շփոթվում ենք, համարում ենք, որ «ուզողություն» կամ մուրացկանություն ենք անում: Բայց երբ այդ օգնությունը մեզ առաջարկում են ամեն կողմից, ով ինչպես կարող է, մենք մեզ մենակ չենք զգում… Իսկ արվեստագետները, որ փող չունեն օգնելու, էս ճանապարհն են ընտրել:

Փրկենք մեկ կնոջ` ձևավորենք բարեգործության մշակույթ:

Հ.Գ. ՆՓԱԿ-ում ցուցահանդես-վաճառքը բաց է մինչև մայիսի 13-ը:

Մայիսի 13-ին, Ավանգարդ ֆոլկ-ակումբում` Պուշկինի 3 ա, 19.00-ին տեղի կունենա «Երաժշտություն հանուն կյանքի» ռոք-փառատոնը, որին կմասնակցեն Tha Bambir, Dogma, Road Movie, Vordan Karmir, Suren Arustamyan Trio Blues Band, Pink City Blues Band, Unknown Artist, An Gordonach խմբերը: Կլինի Red-Bull հյուրասիրություն:
Իսկ 00:00-ից after-party է լինելու DJ Kret-ի և Giorgio Attolli-ի մասնակցությամբ:

Մայիսի 20-ից «Հայկական վարկած» էլեկտրոնային թերթի (armversion.com կամ armversion.am) շրջանակներում գործելու է «Ընտրություն» մամուլի ակումբը:
Ակումբի աշխատանքները համակարգելու եմ ես, ինչպես նաև` վարելու եմ ասուլիսներն ու բանավեճերը:
Պատահական չեն ընտրված ոչ ակումբի անունը և ոչ էլ բացման օրը:
Չնայած քսանամյա գոյությանը` մեր պետությունը կանգնած է ընտրության առաջ, հասարակությունը նույնպես կողմնորոշումների փուլում է:
Ընտրությունը գլոբալ հասկացություն է և վերաբերում է թե՛ երկրի ընթացքին, թե՛ յուրաքանչյուրիս կողմնորոշումներին:
Բայց ընտրությունը նաև կոնկրետ դրսևորում է, եթե նկատի ունենանք, որ 2012-2013 թթ.-ը մեր երկրի համար ընտրական են: Բնականաբար, այդ գործընթացը գտնվելու է մեր նորաստեղծ ակումբի ուշադրության կենտրոնում:
Մայիսի 20-ն էլ պատահական ամսաթիվ չէ. 21 տարի առաջ այդ օրը, դեռևս Խորհրդային Հայաստանում, անցկացվեցին առաջին այլընտրանքային խորհրդարանական ընտրությունները: Հենց դրա մեջ է ընտրության իմաստը, փիլիսոփայությունը:
Մեր ակումբում հյուրընկալվելու են պետական, քաղաքական, հասարակական հայտնի գործիչներ, փորձագետներ, վերլուծաբաններ, լրագրողներ:

Մենք պատրաստ ենք պատասխանելու ցանկացած հարցի, որ մեր ընթերցողը կհասցեագրի ակումբին: Յուրաքանչյուր ասուլիսից կամ բանավեճից մի քանի օր առաջ «Հայկական վարկած» կայքէջում կներկայացնենք հյուրին, կստանանք ձեր հարցերը, իսկ ասուլիսից հետո մեր կայքում կարող եք ընթերցել ձեզ հուզող հարցերի պատասխանները: