Արաբական «Ալդուալիա» կայքը հաղորդում է, որ Լիբիայի նախկին առաջնորդ Մուամար Կադաֆին խեղդամահ է արվել։

Կայքի տեղեկություններով՝ Կադաֆին ձերբակալվել է Սիրթ քաղաքի նվաճման ժամանակ, երբ նա արդեն երկու ոտքից, ինչպես նաև գլխից վիրավոր էր։ «Վիրավորված լինելով հանդերձ՝ Կադաֆին, թաքնվելու նպատակով, կարողացել էր սողալով Սիրթ քաղաքի թունելին հասնել»,–գրում է կայքը։

Կայքի աղբյուրը հայտնել է, որ Կադաֆիի ձերբակալողները նրան կենդանի են բռնել, ապա խեղդամահ արել։

Երեկ համաշխարհային լրատվամիջոցները տեղեկություն տարածեցին, թե Լիբիայի նոր իշխանությունների ուժերի կողմից Սիրթ քաղաքը նվաճելու ժամանակ Կադաֆին գերեվարվել է, ապա ստացած վնասվածքներից մահացել։ Այդ լուրն ավելի ուշ հաստատեց Լիբիայի անցումային խորհրդի զինվորական առաջնորդ Աբդելհաքիմ Բելհաջը։

Կադաֆիի կողմակիցները, սակայն, պնդում են , որ Կադաֆին ողջ է, իսկ համացանցում  տարածված նրա մահվան լուսանկարները պատրաստված են եղել դեռ հոկեմբերի 19-ին:

Վենեսուելայի նախագահ Ուգո Չավեսը բուժվել է քաղցկեղից: Այս մասին հայտարարել է ինքը` նախագահը` Կուբա կատարած այցի ժամանակ.
«Բուժզննման արդյունքների համաձայն, իմ օրգանիզմում այլևս չկան քաղցկեղային բջիջներ»,- նշել է Չավեսը: Վերջինս վիրահատվել էր չորս ամիս առաջ և ստիպված էր տևական ժամանակ քիմիոթերապիայի կուրսեր անցնել,- տեղեկացնում է ИТАР-ТАСС-ը:

«Վենեսուելա է վերադառնում նոր Չավես»,- գրում են Վենեսուելայի լրատվամիջոցները:

Reuters գործակալությունը նոր հաղորդագրություն է տարածել. Ըստ դրա ստացած վնասվածքներից մահացել է Լիբիայի առաջնորդ Մուամար Քադաֆին: Այս մասին, Reuters –ին հայտնել է Լիբիայի նոր իշխանությունների` Անցումային ազգային խորհրդի պաշտոնական ներկայացուցիչը: Պարզվել է, որ նա նաեւ գլխի վնասվածք է ստացել:
Այսօր ժամեր առաջ Անցումային ազգային խորհրդի նախագահ Մուստաֆա Աբդել Ջալիլը ասել էր, որ Լիբիայի տապալված առաջնորդ Մուամար Քադաֆին վիրավորվել է երկու ոտքերից եւ գերի է ընկել:

Դիարբեքիրում( Տիգրանակերտ) Սուրբ Կիրակոս եկեղեցու վերաբացման առթիվ կազմակերպվելիք համերգները չեղյալ է հայտարարվել Պոլսո Հայոց պատրիարքարանի կողմից:
Պոլսո Հայոց պատրիարքարանի կայքը հաղորդում է, որ համերգները չեղյալ է հայտարարվել ի հիշատակ հոկտեմբերի 19-ին քուրդ զինյալների կողմից սպանված 24 թուրք զինվորականների:
Հիշեցնենք, որ «Սուրբ Կիրակոսի» վերանորոգումը իրականացվել է Տիգրանակերտցի հայերի եւ Դիարբեքիրի քաղաքապետարանի աջակցությամբ.Այն Մերձավոր Արեւելքի ամենամեծ եկեղեցիներից մեկն է և վերաբացվելու է որպես գործող եկեղեցի:
Սուրբ Կիրակոսի վերաբացումն ու օծումը տեղի կունենա հոկտեմբերի 22-ին, որից հետո` հոկտեմբերի 23-ին կմատուցվի առաջին պատարագը:

Բանակում տիրող վիճակի ու սպանությունների դեմ պայքարող ՀԿ-ներն ու զոհված զինվորների ծնողները հայտարարություն են տարածել, որտեղ նշում են, որ իշխանությունները բանակում կատարվող հանցագործությունները բացահայտելու փոխաներ փորձում են լռեցնել հանցագործությունների մասին բարձրաձայնող անձանց:

Հայտարարությունում ասվում է.

«Վերջին շաբաթվա ընթացքում Հայաստանի Հանրապետության իշխանությունները, հիմնականում ի դեմս Հայաստանի պաշտպանության նախարարի տեղակալ գեներալ-լեյտենանտ Վլադիմիր Գասպարյանի, ակտիվ հարձակում են ծավալել քաղաքացիական խմբերի դեմ, որոնք սեպտեմբերի 1-ից սկսած` ակցիաների, հայտարարությունների եւ այլ իրավական միջոցներով իրենց բողոքն են արտահայտում հայկական բանակում սպանությունների ու բռնությունների եւ ընդհանուր առմամբ անառողջ բարոյա-հոգեբանական մթնոլորտի դեմ:

Քաղաքացիական հասարակության կառույցների եւ հասարակական գործիչների դեմ սանձազերծված գրոհը իր հերթական դրսեւորումը ստացավ իշխանությունների խոսափողը ծառայող հանրային հեռուստաընկերության ս.թ. հոկտեմբերի 16-ի «Հայլուր» թողարկման ընթացքում: Վերջինիս ընթացքում, մասնավորապես, հիշատակելով երկու իրավապաշտպան կազմակերպության` «Ժուռնալիստների «Ասպարեզ» ակումբ» եւ «Հելսինկյան քաղաքացիական ասամբլեայի Վանաձորի գրասենյակ» հասարակական կազմակերպությունների ֆինանսավորման աղբյուրներն ու ղեկավարներին, հաղորդման հեղինակը փորձում էր վարկաբեկել նրանց գործունեությունը, իսկ գեներալ-լեյտենանտ Վ.Գասպարյանը սպառնում էր, որ նրանց կողմից բանակի առնչությամբ ակտիվ գործունեությունը շարունակվելու դեպքում կդիտարկվի որպես ոտնձգություն բանակի նկատմամբ եւ դրանց կտրվեն իրավական լուծումներ: Հարկ է նշել, որ Հայաստանի Հանրապետությունում ամենամեծ արտաքին ֆինանսական աջակցությունն, այդ թվում` դրամանաշնորհները, ստանում է հենց Հայաստանի Հանրապետության Կառավարությունը («ՀՀ 2010թ. պետական բյուջեի մասին» ՀՀ օրենքի համաձայն պետական բյուջեի պակասուրդի ֆինանսավորման արտաքին աղբյուրներից ներդրումը կազմում է շուրջ 94 միլիարդ դրամ), մինչդեռ նրա կողմից կատարված ծախսերը եւ արդյունքները նույնքան թափանցիկ չեն:

Ցավալի է, որ պատերազմական վիճակում գտնվող մեր երկրի իշխանությունները  անվտանգությանը սպառնացող երեւույթներին համարժեք արձագանքելու, բանակային հանցագործությունները վերացնելու ու մեղավորներին բացահայտելու եւ պատժելու ուղղությամբ քայլեր ձեռնարկելու փոխարեն փորձում են լռեցնել հանցագործությունների մասին բարձրաձայնող անձանց, ինչը կասկածի տակ է դնում բանակում առկա խնդիրները կարգավորելու քաղաքական կամքի առկայությունը:

Իշխանությունների կողմից հնչեցված սպառնալիքները գնահատում ենք որպես իրավապաշտպան կազմակերպություններին եւ «Բանակն իրականում» քաղաքացիական շարժմանն ուղղված սպառնալիք եւ դրանով իսկ մարդու արտահայտվելու ազատության ու միավորումների ազատության սահմանադրական իրավունքների կոպիտ ոտնահարման դրսեւորում: Դա սպառնալիք է ուղղված նաեւ անձամբ մեզ ու Հայաստանի Հանրապետության մյուս քաղաքացիներին եւ ոտնձգություն մեր երկրի ազգային անվտանգության նկատմամբ»:

Հայտարարությունը ստորագրել են.

Հասարակական միավորումներ.

«Բանակն իրականում» նախաձեռնող խումբ

Սոնա Այվազյան, «Թրանսփարենսի Ինթերնեշնլ հակակոռուպցիոն կենտրոն» ՀԿ

Նատալյա Մարտիրոսյան, «Հելսինկյան քաղաքացիական ասամբլեայի հայաստանյան գրասենյակ» ՀԿ

Իզաբելլա Սարգսյան, «Երիտասարդությունը հանուն ժողովրդավարության» ՀԿ

Ժաննա Ալեքսանյան, «Լրագրողները հանուն մարդու իրավունքների» ՀԿ

Սեդա Մելիքյան, «Փաստաբանները հանուն մարդու իրավունքների» ՀԿ

Ավետիք Իշխանյան, «Հայաստանի հելսինկյան կոմիտե» ՀԿ

Լալա Ասլիկյան, «Հույս» ՀԿ

Արփինե Գալֆայան, «Մարդու իրավունքների եւ ժողովրդավարության ինստիտուտ» ՀԿ

Մարինե Մանուչարյան, «Քաղաքացիական ֆորում» ՀԿ

Միքայել Դանիելյան, «Հելսինկյան ասոցիացիա» ՀԿ

Զոհված զինծառայողների հարազատներ.

Ծովինար Նազարյան, ՀՀ ԶՈՒ զոհված սպա Արտակ Նազարյանի քույր

Հասմիկ Հովհաննիսյան, ՀՀ ԶՈՒ զոհված սպա Արտակ Նազարյանի մայր

Նանա Մուրադյան, ՀՀ ԶՈՒ զոհված զինծառայող Վալերի Մուրադյանի մայր

Անահիտ Մկրտչյան,  ՀՀ ԶՈՒ զոհված զինծառայող Արայիկ Ավետիսյանի մայր

Գոհար Սարգսյան, ՀՀ ԶՈՒ զոհված զինծառայող Տիգրան Օհանջանյանի մայր

Սուրեն Օհանջանյան, ՀՀ ԶՈՒ զոհված զինծառայող Տիգրան Օհանջանյանի հայր

Թուրքիայի Սիիրթ քաղաքում մարմանվաճառության կասկածանքով ձերբակալվել է Հայաստանի քաղաքացի Ռ.Կ.–ն։

Ինչպես տեղեկացնում է «Անադոլու» գործակալությունը, 37-ամյա Ռ.Կ.–ի հետ միասին ձերբակալվել են նաև Ադրբեջանի քաղաքացի Է.Ռ.–ն (28) և Ուկրաինայի քաղաքացի Տ.Ջ.–ն (26)։

Իրավապահների կողմից իրականացված գործողության ընթացքում կավատության կասկածանքով ձերբակալվել են նաև Բ.Բ.–ն և Ս.Բ.–ն։

Ձերբակալված երեք կանայք առաջիկայում կարտաքսվեն Թուրքիայից։

Գյումրիում, այսօր՝ հոկտեմբերի 19-ին, ժամը 10.45-ի սահմաններում, Տերյան փողոցում խոշոր ավտովթար է տեղի ունեցել: Վթարվել է 5 ավտոմեքենա, տուժածների եւ վիրավորների մասին չի հաղորդվում:

Նախնական տվյալների համաձայն, հիմնական պատճառը եղել է զինծառայողներ տեղափոխող «ՈՒՐԱԼ» մակնիշի մեքենան, որը  չի հասցրել արգելակել եւ բախվել է ավտոտեխսպասարկման դիմաց կայանած մեքենաներին: Սկզբում հարվածել է «ՎԱԶ 24» մակնիշի մեքենային, որի հետեւանքով ուժգին  հարվածից մոտ տասը մետր մեքենան առաջ է գլորվել: Այնուհետեւ «ՈՒՐԱԼ»-ը բախվել է նաեւ մյուս մեքենաներին:

Դեպքի վայրում աշխատել են ինչպես ճանապարհային ոստիկանները, այնպես էլ ռազմական ոստիկանության ներկայացուցիչները: Դեպքի վայր այդպես էլ չեն ժամանել ապահովագրական ընկերությունների տեղի պատասխանատուները:

«ՈւՐԱԼ» մակնիշի մեքենայում գտնվող զինծառայողները բարեբախտաբար չեն տուժել, վնասը միայն նյութական է եղել, իսկ հարցը լուծվել է ներքին կարգով, դեպքի վերաբերյալ պարզաբանումներ տալ հրաժարվել են ինչպես տեղում աշխատող ճանապարհային ոստիկանները, այնպես էլ ռազմական ոստիկանության աշխատակիցները:

Հոկտեմբերի 19-ին, ժամը 00.20-ի սահմաններում, Մարտունի-Վարդենիս ճանապարհի 21-րդ կմ-ին «ՈւԱԶ-452» մակնիշի ավտոմեքենան դուրս է եկել հանդիպակաց գոտի և բախվել «ՎԱԶ-2106» մակնիշի ավտոմեքենայի, ապա` «ԳԱԶ-24» մակնիշի ավտոմեքենայի:

Ինչպես հայտնում են   ոստիկանությունից, «ՎԱԶ-2106»-ի վարորդը` 1979 թ. ծնված Մհեր Օհանյանը, ուղևորները` 1989 թ. ծնված Արկադի Թադևոսյանը, 1986 թ. ծնված Արա Թադևոսյանը, 1966 թ. ծնված Կարեն Բադալյանը և «ՈւԱԶ-452»-ի ուղևոր, 1984 թ. ծնված Սարգիս Պողոսյանը տեղում մահացել են, իսկ «ՈւԱԶ-452»-ի վարորդը և ուղևորը, «ՎԱԶ-2106»-ի ուղևորը մարմնական վնասվածքներով տեղափոխվել են հիվանդանոց:

Կատարվում է քննություն:

System of A Down խմբի երգիչ, երաժիշտ եւ կոմպոզիտոր Սերժ Թանկյան հանդես է եկել «Գրավիր Wall Street-ը» շարժման աջակցությամբ. «Ես հույս ունեմ, որ «Գրավիր Wall Street-ը» շարժումը կդառնա քաղաքական ուժ, որը դեմոկրատներին կտանի ձախ, ինչպես «Թեախմության շարժումը» (Tea Party movement) ստիպեց հանրապետականներին անցնել աջ կողմ»,- գրել է երաժիշտը Facebook-ում:
Թանկյանը նաև նշել է, որ այսօրվա հետարդյունաբերական, կապիտալի հիմքով, գլոբալիստական քաղաքականությունը չի հաջողում, քանի որ կառուցված է անհավասարության վրա: Այդ պատճառով լայն հասարակությունը կորցրել է հավատը այդ քաղաքականության նկատմամբ:
«Գրավիր Wall Street-ը» շարժումը սկսվել է ԱՄՆ-ում, սակայն արդեն տարածվել է այլ երկրներում: Հանգստյան օրերին նմանատիպ բողոքի ցույցեր են տեղի ունեցել Մեծ Բրիտանիայում, Իտալիայում, Ավստրալիայում: Մարդիկ բանկերին մեղադրում են գերշահույթներ կորզելու, անարդարության, ազգերի զարգացմանը խոչընդոտելու դեմ: Շարժմանը միացել է նաև WikiLeaks-ի հիմնադիր Ջուլիան Ասանժը:

ԱԻՆ-ից հայտնում են, որ հոկտեմբերի 18-ին`ժամը 04.16-ին ահազանգ է ստացվել, որ Գեղարքունիքի մարզի Ծովակ գյուղում այրվում է տուն և ավտոտնակ:

Դեպքի վայր է մեկնել երկու մարտական հաշվարկ:

Հրդեհը մեկուսացվել է ժամը 05.45-ին:

Այրվել են Վ.Ալեքսանյանին պատկանող տան (8×13մ) տանիքը, տանը կից ավտոտնակը (14×4մ) և ներսում կայանված «Միցուբիշի Պաջերո» մակնիշի 24 ՏՕ 806 պետհամարանիշի «ՎԱԶ-2101» մակնիշի առանց պետհամարանիշի ավտոմեքենաներն` ամբողջությամբ: