Ախալքալաքի Սուրբ Խաչ եկեղեցու հոգևոր հովիվ Տեր Տաթև քահանա Մարուքյանը այցելել է հայերով բնակեցված Չամդուրա գյուղ, որտեղ գյուղի երիտասարդների հետ միասին մաքրեց ու բարեկարգել են տեղի եկեղեցին: Դրանից հետո գյուղացիները մասնակցել են շաբաթօրյա երեկոյան ժամերգությանը: «Այսուհետեւ մեր այցելությունները Չամդուրայի Սբ. Գրիգոր Լուսավորիչ եկեղեցի կրելու են շարունակական բնույթ, քանզի հավատացյալները մեծ ոգևորությամբ ու սիրով ընդունեցին մեզ: Մենք ավելի հաճախակ կայցելենք ու այնտեղ Պատարագ կմատուցենք: Այս այցը շատ կարևոր էր հավատացյալների համար, որպեսզի նրանք ավելի ամուր կառչեն իրենց հավատքին ու մտածեն հայերեն»,- ասել է Տեր Տաթևը: Նշենք, որ Չամդուրա գյուղի Սբ. Գրիգոր Լուսավորիչ եկեղեցին վերջին անգամ վերանորոգվել էր 10 տարի առաջ:

Ռուսաստանի Ամուրի մարզի Բլագովեշչենսկ քաղաքում տեղի է ունեցել «Միսս Եվրասիա» միջազգային մրցույթը, որի ժամանակ հաղթող է ճանաչվել Հայաստանը ներկայացնող Ստելլա Կիրակոսյանը: Մրցույթին, ընդհանուր առմամբ, Բլագովեշչենսկում ապրող հետխորհրդային վեց երկրի՝ Հայաստանի, Ռուսաստանի, Ադրբեջանի, Վրաստանի, Ուբեկստանի և Մոլդավայի ներկայացուցիչներն են մասնակցել: Ինչպես հայտնում են ռուսական լրատվամիջոցները, նման «ձևաչափով» միջոցառում Հեռավոր Արևելքում առաջին անգամ է անցկացվել:

«Ամեն տարի մենք միջազգային ձևափաչի տարբեր նախագծեր ենք իրականցնում,- ասել է մրցույթի կազմակերպիչներից մեկը՝ Ամուրի մարզի հայկական համայնքի նախագահի տեղակալ Կարո Ժամկոչյանը և հավելել,- անցած տարի դա КВН-էր (Ուրախների և հնարամիտների ակումբ), իսկ այս տարի գեղեցկության մրցույթը: Նպատակը մեկն է՝ միավորել Ռուսաստանի տարածքում ապրող բոլոր ժողովուրդներին՝ անկախ նրանց դավանանքի, մշակույթի»:

«Միսս Եվրասիա» տիտղոսին արժանանալու համար աղջիկները մի քանի մրցութային փորձություն են անցել. ավանդական քայլքից և վիդեոներկայացումից բացի, նրանք մասնակցել են «տաղանդների մրցույթին», պատասխանել են ժյուրիի հարցերին, ներկայացրել են ազգային հագուստը և այլն: Փորձությունների արդյունքում երրորդ հորիզոնականը զբաղեցրել է Ադրբեջանը ներկայացնող Սաբինա Գիյանովան, երկրորդ հորիզոնականը՝ Ուզբեկստանը ներկայացնող Շահնոզա Մոթաևան, իսկ առաջին հորիզոնականը և գլխավոր մրցանակը՝ ադամանդե վզնոց, բաժին է ընկել Հայաստանը ներկայացնող Ստելլա Կիրակոսյանին, որը մասնագիտությամբ բժիշկ է: «Երբ ինձ առաջարկեցին մասնակցել այդ մրցույթին, մտածեիցի ինչու ոչ, նման միջոցառումներին մասնակցելու փորձ ունեցել եմ, բայց ամեն դեպքում, կասկածում էի»,- ասել է Ստելլան և շնորհակալություն հայտնել իր հարազատներն և հայկական համայնքին այն բանի համար, որ «իրեն վստահել են հայ աղջիկներին ներկայացնել այդ մրցույթում»:

Ժամկոչյանը հավելել է, որ որ իրենք նախատեսում են հաջորդ «Միսս Եվրասիա» մրցույթն անկացնել չինական Հոնկոնգ քաղաքում, կամ Չինաստանի  Հայնան կղզում՝ ավելի քան 30 երկրի ներկայացուցիչների մասնակցությամբ:

Երևանում երեկոյան հնարավոր է թույլ ձյուն, քամու ուժգնացում: Օդի ջերմաստիճանը ցերեկային ժամերին կլինի +5-+7, երեկոյան՝ 0-2 աստիճան:
Meteo-tv-ի փոխանցմամբ, այսօր օդի ջերմաստիճանը Հայաստանի արևելյան շրջաններում կսկսի նվազել 13-15, մյուս շրջաններում 6-8 աստիճանով: Ճանապարհների առանձին հատվածներում հնարավոր է մերկասառույց, լեռներում, լեռնանցքներում՝ բուք: Այսօր առանձին շրջաններում հնարավոր են տեղումներ: Առատ տեղումներ կդիտվեն արևեյան շրջաններում՝ Լոռիում, Տավուշում, Վայոց Ձորում, Սյունիքում, Արցախում: Հնարավոր է նաև քամու ուժգնացում:

Ոստիկանության Նոր Նորքի բաժնում նոյեմբերի 5-ին, ժամը 12.15-ին ահազանգ է ստացվել, որ Նոր Նորքի 7-րդ զանգվածի շենքերից մեկի մոտ գտնվող ավտոտնակում մի տղամարդ ինքնասպանություն է գործել:

Ոստիկանության մամուլի ծառայությունից հայտնեցին, որ դեպքի վայր մեկնած օպերատիվ-քննչական խումբը պարզել է, որ Նոր Նորքի 7-րդ զանգվածի 20 շենքի 22 բնակարանի բնակիչ, Քանաքեռ-Զեյթունի տարածքային հարկային տեսչության աշխատակից,  39-ամյա Արմեն Գալստյանը «Մակարով» ատրճանակով ինքնասպանություն է գործել շենքի հարևանությամբ գտնվող ավտոտնակում: Դեպքի վայրից հայտնաբերվել է «Մակարով» ատրճանակի մեկ պարկուճ:

Կատարվում է նախաքննություն:

Լոս Անջելեսի «Գիբսոն» համերգասրահում նոյեմբերի 1-ին մեկնարկել է «Never again»՝ ընդդեմ ցեղասպանությունների, հանուն խաղաղության համերգաշարը։ Հայոց Մեծ Եղեռնի 100-ամյակին ընդառաջ համախմբվել են համաշխարհային ճանաչում ունեցող երաժիշտները, որպեսզի աշխարհին հիշեցնեն Հայոց Եղեռնի մասին, և քարոզեն խաղաղություն։ Այս մասին այսօր հաղորդել է «Շանթ» հեռուստատեսության «Հորիզոն» լրատվականը։

«Ուզում ենք, որ այլևս չկրկնվի»,- նշել է համերգաշարի նախաձեռնող երգչուհի Ֆլորա Մարտիրոսյանը։

«Ժամանակին թուրքերի կողմից իրականացված պատմական իրողությանը պետք է հումանիստական գնահատակ տալ»,- ասել է երգչուհի Ալեքսիա Վալիսիուն։

«Փաստ է, որ հիմա էլ մարդկության հանդեպ տեղի են ունենում նման հանցանքներ, հայերի ցեղասպանության վրա ուշադրություն սևեռելով՝ ուզում ենք մարդկությանը սթափեցնել»,- ասել է երգիչ Էրիկ Բենեթը։

«Երաժշտության դերը մեծ-մեծ է նման դեպքերում։ Այսպես շատ բան կարող ես ասել, շատ բաների մասին՝ բարձրաձայնել,- ասել է երգիչ Մայքլ Սթոունը։- Շատ եմ լսել, երբ փողոցում մարդիկ երգել են իմ ու Ֆլորայի վավերագրական ֆիլմի երգը»։

Լեգենդար երաժիշտ՝ երգիչ, կոմպոզիտոր, դաշնակահար Սթիվի Ուանդերը նշել է. «Այստեղ ես եկել եմ՝ որպես խաղաղության դեսպան, որևէ ազգություն չեմ ներկայացնում։ Ես Սթիվի Ուանդեր անհատն եմ։ Ամբողջ կյանքում պայքարել եմ մարդկության խաղաղության համար, հանուն սիրո»։

Համերգը եզրափակվել է Սթիվի Ուանդերի կողմից ստեղծված և հովանավորվող մանկական մեծ երգչախմբի կատարմամբ։

Հովիկ Աբրահամյանի գլխավոր խորհրդական Վիկտոր Մնացականյանը աշխատանքից ազատման դիմում է ներկայացրել, ինչն ինքը համարում է տրամաբանական:

Մնացականյանը  կշարունակի դասախոսել, սպասելով ավելի լավ ժամանակների հուսալով, որ դրանք իր շեֆի համար չեն ուշանա:

ՀՀ գյուղատնտեսության նախարարության սննդամթերքի անվտանգության պետական ծառայության կողմից իրականացված ուսումնասիրության արդյունքում շուկայում իրացվող «Էյ-Էս-Բի-սոֆթ» ՍՊԸ-ի «ARMFOOD» ապրանքանիշի այծի կաթում հայտնաբերվել են աղիքային ցուպիկի խմբի մանրէներ և ստաֆիլակոկի բակտերիաներ:

ՀՀ ԳՆ ՍԱՊԾ-ի կողմից տրվել է տվյալ ապրանքանիշի կաթնամթերքի իրացման կասեցման կարգադրագիր: Մինչ ամբողջ խմբաքանակի շուկայից դուրս բերումը Ծառայությունը կոչով դիմում է ազգաբնակչությանը լինել աչալուրջ և զերծ մնալ «ARMFOOD» ապրանքանիշի կաթնամթերքի ձեռքբերումից:

ՀՀ ԳՆ սննդամթերքի անվտանգության պետական ծառայության տեղեկատվության և հասարակայնության հետ կապերի բաժին

Ամերիկացի սենատոր Դայան Ֆայնշթեյնը, անցած հինգշաբթի օրը Մոնթեբելլոյի (Քալիֆորնիա) Բիքնել զբոսայգում Հայոց ցեղասպանության զոհերի հուշարձանին ծաղիկներ դնելու  արարողության ժամանակ,  Թուրքիային կոչ է արել ճանաչել Հայոց ցեղասպանությունը` «որոշ չափով փոխհատուցելով»  այն ողբերգությունը, որ ապրել են հայերը: Այս մասին հաղորդում է  «Asbarez»-ը:

Սենատոր Ֆեյնշթեյնին հուշարձանի մոտ դիմավորել են ԱՄՆ հայ եկեղեցու եւ հայկական համայնքի առաջնորդները:

Ծաղիկներ դնելուց հետո սենատորը բոլոր հավաքվածներին պաշտոնական մեկնաբանություն է տվել, ոչ պաշտոնական քննարկումներ անցկացրել հայ-ամերիկյան քաղաքացիական եւ հասարակական առաջնահերթությունների վերաբերյալ, նաեւ հարցազրույց է տվել  հայկական «Հորիզոն» հեռուստատեսությանը:

Բժշկական համալսարանի երկու ուսանողուհիներ Մոսկվայի արեւմուտքում գտնվող տան պատուհանից ցած են նետվել, հայտնում է «Ինտերֆաքսը»: Ողբերգությունը կատարվել է նոյեմբերի 2-ի գիշերը:

18-ամյա ուսանողուհիները իրար ձեռք բռնած նետվել են ցած:  Նրանցից մեկը տեղում մահացել է, մյուսը ծայրահեղ ծանր վիճակում տեղափոխվել է հիվանդանոց:

Հիշեցնենք, հոկտեմբերի 30-ին Սանկտ Պետերբուրգում 9-րդ դասարանի երկու աշակերտուհիներ 10-րդ հարկում գտնվող բնակարանի պատուհանից ցած էին նետվել: Ստացված վնասվածքներից 15-ամյա աղջնակները տեղում մահացել էին: Նրանք երկուսն էլ գրություն էին թողել իրենց անպատասխան սիրո մասին` նշելով այն տղաների անունները, ովքեր իրենց տառապանքների մեղավորներն էին: