Ադրբեջանական եւ թուրքական զինված ուժերի մասնակցությամբ մարտավարական զորավարժություններն իրականացվում են միջազգային նորմերի խախտմամբ: Այս մասին NEWS.am-ի հետ զրույցում հայտարարել է ՀՀ պաշտպանության նախարարի մամուլի խոսնակ Արծրուն Հովհաննիսյանը:

«Սա սա այս տարվա իրենց երկրորդ լայնամասշտաբ զորավարժությունն է, եւ երկուսի դեպքում էլ միջազգային հանրությունը Վիեննայի համաձայանագրի համաձայն իրազեկված չէ: Հերթական անգամ փաստում ենք, որ Ադրբեջանը հերթական անգամ արհամարհում է ցանկացած բնույթի միջազգային պարտավորություն»,-ասել է Արծրուն Հովհաննիսյանը:

Ըստ ադրբեջանական լրատվամիջոցների՝ հունիսի 12-16 Նախիջեւանում ադրբեջանական եւ թուրքական զինված ուժերի մասնակցությամբ մարտավարական զորավարժություններ են իրականացվել: Ադրբեջանի պաշտպանության նախարարությունը հայտնում է, որ զորավարժությունների նպատակն է զինված ուժերի միջեւ փորձի փոխանակմամբ զորքերի համակարգման զարգացումը:

Մեր խորին ցավակցությունն ենք հայտնում երեկ և այսօր Արցախի և Ադրբեջանի միջև շփման գծում ադրբեջանական զինված ուժերի կողմից իրականացրած զինադադարի կոպտագույն խախտումների հետևանքով զոհված զինծառայողների հարազատներին և ծառայակիցներին։

ԵԱՀԿ Մինսկի խմբի համանախագահները իրենց վերջին հայտարարության մեջ դատապարտեցին զինադադարի խախտումները` մատնանշելով, որ Ադրբեջանն է առաջինը կրակ բացում: Ադրբեջանը այսպիսի սադրանքներով է արձագանքում այդ հասցեական հայտարարությանը` ի ցույց դնելով իր ողջ արհամարհանքը:

Բաքու համանախագահների այցի նախաշեմին, առանց միջազգային պարտավորություններին համապատասխան ծանուցման լայնածավալ զորավարժությունների անցկացումը, 1994-1995 թթ. զինադադարի եռակողմ անժամկետ համաձայնագրերի շարունակական խախտումները, իրավիճակի սրմանն ուղղված նոր քայլերը, Ադրբեջանի բարձրագույն ղեկավարության կողմից միջազգային հանրությանը, առաջին հերթին Մինսկի խմբի համանախագահ երկրներին նետած հերթական մարտահրավերն է, որին համարժեք արձագանքի բացակայությունը կարող է ընկալվել Ադրբեջանի կողմից որպես նոր արկածախնդրությունների խրախուսում։

Ակնհայտ է, որ Բաքուն, չկարողանալով խաղաղ կարգավորման գործընթացը տանել իր նախընտրած ուղիով, փորձում է առավելության հասնելու պատրանք ստեղծել առաջնագծում, որը նույնպես դատապարտված է ձախողման, և հղի է անկանխատեսելի հետևանքներով, առաջին հերթին իրավիճակի լարումը նախաձեռնող կողմի համար:

ՀՀ ԱԳՆ

Վերջին 2 օրերի ընթացքում հայ-ադրբեջանական սահմանագծին հակառակորդի կրակոցից զոհվել են 4 և վիրավորվել 2 ժամկետային զինծառայողներ: Ի՞նչն է հակառակորդի ակտիվացման պատճատը, ի՞նչ պետք է անի հայկական կողմը հակառակորդին զսպելու համար: Այս և այլ հարցերի պատասխանները ստանալու նպատակով Globnews.am-ը զրուցեց քաղաքագետ Գագիկ Համբարյանի հետ:

«Ոչ ոք չի կարող որևէ կոնկրետ երաշխիք տալ, որ սա՝ որպես ադրբեջանական կողմի սադրանք, վերջինը կլինի, այնպես որ՝ պետք է պատրաստ լինենք դիմակայելու: Պատերազմը չի ավարտվել, պարզապես լինում են օրեր, երբ հակառակորդն էլ ավելի է ակտիվանում»,- նշեց Համբարյանը:

Մեր զրուցակիցն Ադրբեջանի ակտիվացումը կապում է երկրում առկա արտաքին և ներքին բազում խնդիրների հետ. «Ադրբեջանը փորձում է սեփական հասարակության ուշադրությունը շեղել երկրի ֆինանսական ոլորտում տեղի ունեցող վայրիվերումներից: Իսկ մենք անընդհատ պետք է պաշտպանողական դիրքերից հանդես գանք, ինչն ուղղակիորեն անընդունելի է»:

Համբարյանի խոսքով, հակառակորդը կիրառում է ահաբեկչական գործողություններին բնորոշ քայլեր, իսկ ահաբեկիչների դեմ պայքարը մեկն է. «Մենք պետք է կիրառենք Իսրայելի օրինակը, այն է՝ հակառակորդի խաղաղ բնակավայրերի զանգվածային ռմբակոծություն: Խաղաղ բնակչությունը պետք է ինքը պայքարի իր տարածքում գործող ահաբեկչական կազմավորումների դեմ, քանի որ վերջիններս վտանգում են իրենց կյանքը»:

«Հայկական կողմին մնում է ընդամենը մեկ բան՝ ադրբեջանական բնակավայրերը շեշտակի ռմբակոծել: Այդ դեպքում տեղի բնակչությունը կպարտադրի դադարեցնել ահաբեկչական գործողությունները: Այլ տարբերակ չկա: Եթե նկատում եք, հայկական կողմը միշտ ադրբեջանական քայլերին համապատասխան հակաքայլեր է արել, և հակառակորդը մեծաքանակ զոհեր է տվել: Սակայն դա ոչինչ չի փոխել, քանի որ Ալիևի համար իր զինվորի կյանքը ոչինչ է»:

Ինչ վերաբերում է դիվանագիտական քայլերին, Համբարյանը նշեց, որ պաշտոնական Բաքուն հաշվի չի նստում ոչ մեկի հետ: «Իրենց վերջին հայտարարության մեջ Մինսկի խմբի համանախագահները նշեցին, որ Բաքուն զինադադարը խախտում է, և դրանից հետո ադրբեջանական կողմը նորից դիմեց սադրանքների»,- եզրափակեց Համբարյանը:

«Մենք պատերազմի մեջ ենք, մեր պատերազմը շարունակվում է, և որևէ մեկը չի կարող ասել, որ պատերազմն ավարտվել է: Ադրբեջանը փորձում է ամեն օր մեզ վնաս պատճառել, և, եթե ստացվում է հնարավորություն, օգտագործում է այդ հնարավորությունը: Իսկ մենք պետք է փոխենք մեր մարտավարությունը և կանխենք ցանկացած հնարավորություն, պետք է` դրա համար նախահարձակ ենք լինում, պետք է` այլ իրավիճակ ենք օգտագործում՝ թույլ չտալով, որ Ադրբեջանը որևէ հնարավորություն ունենա իրավիճակը սրելու կամ լարելու»,- Արցախից 168.am-ի հետ զրույցում հայտարարեց ԱԺ նախկին պատգամավոր Թևան Պողոսյանը` մեկնաբանելով այս օրերին Ադրբեջանի կողմից ձեռնարկվող հարձակողական գործողությունների փորձերը:

Թե ի՞նչ արձագանք կտան Ադրբեջանի գործողություններին ԵԱՀԿ Մինսկի խմբի համանախագահները, որ տարածաշրջանային այցի շրջանակներում Բաքվում հանդիպումներ են ունենալու առաջիկա երկուշաբթի օրը, Թ.Պողոսյանը պատասխանեց.

«Չգիտեմ՝ ինչ արձագանք կլինի, թող իրենք նայեն: Արձագանքը, եթե լիներ, պետք է երեկ լիներ: Իսկ քանի որ երեկ չի եղել, այսօր էլ չգիտեմ` կլինի՞, թե՞ ոչ: Բայց մենք պետք է գիտակցենք, որ այդ արձագանքներն Ադրբեջանի վրա չեն ազդում, որովհետև դրանցում չկա իրական սանկցիաների կարգավիճակ, և միակ կողմը, որ հնարավորություն ունի պարտադրելու Ադրբեջանին հարգելու զինադադարի պայմանագիրը, դա Արցախի պաշտպանության բանակն է, կամ հայկական զինված ուժերը:

Այնպես որ, մենք բոլորս պետք է մեր խնդիրը լավ գիտակցելով, որ ինքներս ենք դա անելու, չփորձենք մեր ուշադրությունը դարձնել միայն նրան, թե կլինե՞ն արձագանքներ Մինսկի խմբից կամ միջազգային հանրությունից, այլ տեղում սաստենք, որովհետև մեր տղաներն են այդ գծում կանգնած»:

Անդրադառնալով շրջանառվող լուրերին, որ Ադրբեջանը թիրախավորել է այն վայրը, ուր երեկ ՀՀ խորհրդարանական պատվիրակությունն է այցելել, Թ.Պողոսյանը նշեց, որ կարելի է նաև այդ տեսանկյունից մեկնաբանել, որ Ադրբեջանն այլևս հետևում է հայկական լրահոսին, փորձում է օգտագործել իր հետախուզական հնարավորությունները, և որտեղ այցելություններ կամ միջոցառումներ են լինում, փորձում է թիրախավորել դրանք.

«Բայց իրականում, եթե թիրախավորել են, ուրեմն հնարավորություն է եղել: Այստեղ է գալիս իմ առաջին դիտարկումը, որ որտեղ հնարավորություն տեսնում են, այնտեղ թիրախավորում են, և ուրեմն պետք է թույլ չտալ, որ այդ տեղերում այդ հնարավորությունները լինեն»:

168.am

Ինչպես արդեն տեղեկացրել էինք, Արցախում երեկ՝ հունիսի 16-ին, հակառակորդի կրակոցից վիրավորում ստացած երկու զինծառայողներին Լեռնային Ղարաբաղի զինվորական հոսպիտալից տեղափոխել են Երևանի կենտրոնական կլինիկական զինվորական հոսպիտալ:

Araratnews.am-ին Լեռնային Ղարաբաղի զինվորական հոսպիտալից տեղեկացրին, որ երկու զինծառայողներն էլ գտնվում են ծանր վիճակում: Նշենք, որ նրանցից մեկը ժամկետային զինծառայող 1997 թվականին ծնված Արմեն Վարդանյանն է, իսկ մյուսը` պայմանագրային զինծառայող 1984 թվականի ծնված Մյասնիկ Հովհաննիսյանը:

araratnews.am

Արցախի Հանրապետության պաշտպանության բանակի մամուլի խոսնակ Սենոր Հասրաթյանը հերքում է Ադրբեջանի պաշտպանության բանակի հայտնած լուրերն այն մասին, որ հայկական կողմից երեկ երեկոյան 5 զինվոր է զոհվել:

«Այն, ինչ մենք հայտնել ենք, դա է իրականությունը, մնացածն իրականությանը չի համապատասխանում»,- ի պատասխան մեր հարցին՝ ասաց Հասրաթյանը:

Հիշեցնենք՝ երեկ երեկոյան Արցախ ՊԲ-ն հայտնեց, որ  ժամը 18:05-ի սահմաններում հակառակորդը հաստոցավոր հակատանկային նռնականետներից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997 թ.), Վիգեն Ժիրայրի Պետրոսյանը (ծնված 1997 թ.) և Վարդան Ծովակի Սարգսյանը (ծնված 1997 թ.):

Ադրբեջանի ՊՆ մամուլի հաղորդագրության համաձայն, մինչդեռ, հայկական կողմն ունի ոչ թե 3, այլ 5 կորուստ. այս մասին հաղորդում է Trend գործակալությունը: Աղբյուրի փոխանցմամբ՝ ծանր վիրավորներից երկուսը մահացել են ավելի ուշ:

Ըստ տեղեկության՝ կա նաև մի քանի վիրավոր, որոնք հոսպիտալացվել են:

Արցախի պաշտպանության բանակի մամուլի խոսնակը հրաժարվեց վիրավորների մասին որևէ տեղեկատվություն տրամադրելուց:

Տեղեկացնենք, որ երկու վիրավորի մասին շրջանառվող լուրերը մեզ հետ զրույցում հաստատել է ազատամարտիկ Վահան Բադասյանը, վստահեցնելով, որ նրանց վիճակը գնահատվում է բավարար:

araratnews.am

Արցախա-ադրբեջանական հակամարտ զորքերի շփման գծում հունիսի 16-ին հակառակորդի կողմից ձեռնարկված նախահարձակ գործողության արդյունքում արձանագրված մահվան ելքով դեպքերից հետո, հունիսի 17-ի առավոտյան ադրբեջանական կողմը հյուսիսային ուղղությամբ դիմել է հերթական սադրանքի, որի հետևանքով ժամը 09.40-ի սահմաններում մահացու հրազենային վիրավորում է ստացել ՊԲ զինծառայող, 1997թ. ծնված Նարեկ Տիգրանի Գասպարյանը:

Այս մասին  տեղեկացարին Արցախի Հանրապետության պաշտպանության նախարարության լրատվական ծառայությունից:

«Արցախի Հանրապետության պաշտպանության նախարարությունը կիսելով կորստյան ծանր վիշտը, իր զորակցությունն է հայտնում զոհված զինծառայողի ընտանիքի անդամներին, հարազատներին ու ծառայակիցներին և հավաստիացնում, որ միջազգային համապատասխան կազմակերպությունների անհասցե հայտարարություններից ոգևորված հակառակորդի դարանակալ գործողությունների պատասխանը լինելու է թիրախային և անհամարժեք»,- ասված է ՊԲ հաղորդագրության մեջ:

Հունիսի 16-ին՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.):

Դեպքի մանրամասները պարզելու համար կատարվում է քննություն:

Արցախի Հանրապետության պաշտպանության նախարարությունը կիսում է կորստյան ծանր վիշտը և իր զորակցությունը հայտնում զոհված զինծառայողների ընտանիքների անդամներին, հարազատներին ու ծառայակիցներին:

ԱՀ ՊՆ մամուլի ծառայություն

Հանդբոլի Հայաստանի հավաքականը Բուլղարիայում ընթացող «Զարգացող երկրների տղամարդկանց հավաքականների առաջնությունում» 39:21 հաշվով պարտություն կրեց Ադրբեջանից:

Պետք է նշել, որ հանդիպումն անցավ առանց միջադեպերի:

Հիշեցնենք, որ մրցաշարի շրջանակում անցկացրած նախորդ 3 խաղերում Հանդբոլի Հայաստանի հավաքականը, որն ընդգրկված էր D խմբում, պարտվել էր՝ զիջելով Մոլդովայի (13:46), Չինաստանի (12:43) և Ֆարերյան կղզիների (6:44) հավաքականներին:

ԱՀԿ Մինսկի խմբի նախկին համանախագահ, Ադրբեջանում Միացյալ Նահանգների նախկին դեսպան Մեթյու Բրայզան Բաքվում հայտարարել է, թե Լեռնային Ղարաբաղի հակամարտությունը տարածաշրջանում տնտեսական զարգացման և անվտանգության գլխավոր խոչընդոտն է։

Ինչպես հաղորդում է «Ազատություն» ռադիոկայանը, ադրբեջանական APA լրատվական գործակալության հետ զրույցում ամերիկացի նախկին դիվանագետը կարծիք է հայտնել, թե ո՛չ Ադրբեջանը, ո՛չ Հայաստանը հետաքրքրված չեն պատերազմով:

«Ղարաբաղյան հակամարտության գոտում պատերազմական գործողություններ կարող են սկսվել այն ժամանակ, եթե Ադրբեջանի կամ Հայաստանի կառավարությունները այդ հարցով որոշում ընդունեն», — պնդել է Բրայզան՝ կարծիք հայտնելով, որ նման գործողություններով ո՛չ Ադրբեջանը, ո՛չ Հայաստանը հետաքրքրված չեն:

Նախկին միջնորդի համոզմամբ՝ ղարաբաղյան հակամարտությունը չի լուծվի այնքան ժամանակ, քանի դեռ ԱՄՆ-ն և Ռուսաստանը այդ հարցով համաձայնության չեն եկել:

«Ներկայումս այդ երկրների միջև, կարելի է ասել, կապեր չկան: Համանախագահները կգան, կարգավորման ուղիներ կփնտրեն, բանակցություններ կանցկացնեն: Բայց առաջընթաց չի լինի մինչև վերը նշվածը տեղի չունենա», — ասել է Բրայզան:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։

Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։