Հուլիսի 27-ին Բրյուսելում կայանալիք Հյուսիսատլանտյան Խորհրդի  28+1 ձեւաչափով նիստին մասնակցելու նպատակով Բելգիա կմեկնեն ՀՀ ԱԳ նախարար Էդվարդ Նալբանդյանը եւ պաշտպանության նախարար Սեյրան Օհանյանը:

Հյուսիսատլանտյան Խորհրդի նիստի ընթացքում կքննարկվեն Հայաստան-ՆԱՏՕ համագործակցությունը եւ Անհատական գործընկերության գործողությունների ծրագրի կատարման ընթացքը:

ՀՀ վարչապետ Տիգրան Սարգսյանը ցավակցական ուղերձ է հղել Նորվեգիայի թագավորության վարչապետ Յենս Ստոլտենբերգին և Նորվեգիայի կառավարությանը՝ Օսլոյում և Ուտոյա կղզում տեղի ունեցած ողբերգական իրադարձությունների կապակցությամբ: Ուղերձում մասնավորապես ասված է. «Խստորեն դատապարտում ենք անհանդուրժողականության և ահաբեկչության ամեն մի դրսևորում և այս ծանր պահին կիսում ենք բազմաթիվ անմեղ զոհերի համար նորվեգացի բարեկամ ժողովրդի վիշտը»:

Լրատվամիջոցները տարածել էին «Արմինֆո» գործակալության այն տեղեկատվությանը, թե միայն վերջին տարում Մայր Աթոռ Սուրբ Էջմիածինը Հայաստանում ճապոնական Toyota կոնցեռնի ներկայացուցչություններից մեկում` Toyota-Yerevan ընկերությունում, ձեռք է բերել 309 հազար ԱՄՆ դոլար ընդհանուր արժողությամբ 7 ավտոմեքենա: Այս մասին իր բացատրությունն ուներ Մայր Աթոռ Սուրբ Էջմիածնի տեղեկատվական համակարգի պատասխանատու տեր Վահրամ քահանա Մելիքյանը. «Շուրջ երկու տարի առաջ ազգային բարերար Սամվել Կարապետյանի կողմից այդ մեքենաները նվիրաբերվել են Մայր Աթոռ Սուրբ Էջմիածնին, և Մայր Աթոռը ինքը այդ գնումները չի կատարել, ուղղակի նվիրատվություն է կատարվել։ Հիշատակվող մյուս մեքենան՝ Toyota HiAce–ը, նվիրաբերել է Էջմիածին եկած հոլանդացի մի ուխտավոր, և Մայր Աթոռը որևէ միջոց դրա համար չի վատնել»:

Ստացվում է, մեր «աստղերին» մեքենաներ ու բնակարաններ նվիրող Սամվել Կարապետյանը չի մոռացել նաև հոգևոր հայրերին, գովելի բարեպաշտություն է:Միայն թե մարդիկ այդ մասին միայն հիմա են իմանում թե չէ, ֆեյսբուքյան մի քննարկում էլ դրա հետ կապված կլիներ: Դե հոլանդացի ուխտավորն էլ, հավանաբար ինչ որ մեկի սանիկն է:

«Բացի այդ՝ ծիծաղելի է մտածել,-ասել է տեր հայրը,- որ վեց հազար աշխատակից ունեցող հաստատության համար, ինչպիսին Մայր Աթոռ Սուրբ Էջմիածինն է, ունենալ մի քանի մեքենաներ, որոնք այսօր փողոցում երթևեկող մեքենաների համեմատ ճոխ չեն և զեխություն չեն… Այլևս գնահատականները Ձեզ եմ թողնում: Նվիրատվությունները մարդիկ կատարում են իրենց ցանկությամբ, և դրա մեջ որևէ անպատշաճություն չեմ տեսնում»:

Տեր Վահրամի խոսքով, իրենց մեքենաների պարկը մեծ չէ. «Այդ Տոյոտաներն են ու մի քանի խորհրդային տարիներին արտադրված մեքենաներ ու Վեհափառ Հայրապետին սպասարկող մեքենան»:

Նա օրինակ բերելով,Վրաստանը պատմեց, որ ինքը տեսել է, թե ինչպես է նախագահն անձամբ հոգևոր դասին բարձրակարգ մեքենաներ նվիրաբերել։

Տեր Վահրամի խոսքով՝ Մայր Աթոռ Սուրբ Էջմիածնի եկամուտները գոյանում են. Մայր Աթոռի բյուջեի շուրջ 17–18 տոկոսը` եկեղեցիներում իրականացվող մոմավաճառությունից, եկեղեցիների գանձանակներում արված նվիրատվություններից, նաև գրականության վաճառքից, իսկ մնացյալ գումարները տալիս են անհատ բարերարները և ազգային կառույցներն ու կազմակերպությունները, որոնք իրենց նվիրատվությունն են անում Մայր Աթոռի գործունեության, հատկապես՝ առանձին ծրագրերի իրականացման համար:

Հայաստանի վարչապետ Տիգրան Սարգսյանն այսօր Արագածոտնի մարզ կատարած այցի շրջանակներում Օշականի դպրեվանքում հանդիպել է Հայաստանի գրողների միության նախագահության և մտավորականների հետ: Հանդիպմանը ներկա են եղել ՀՀ մշակույթի նախարար Հասմիկ Պողոսյանը և Գրողների միության նախագահ Լևոն Անանյանը:

Կառավարության ղեկավարն անդրադարձել է արտագաղթի թեմայով մի խումբ մտավորականների մտահոգություններին, պատասխանել նրանց հուզող հարցերին:

ՀՀ վարչապետի խոսքով՝ միգրացիան մշտապես գտնվում է կառավարության ուշադրության կենտրոնում, քանի որ սկսած 1991 թվականից մեր երկրում գոյություն ունի լրջագույն ժողովրդագրական խնդիր: «ՀՀ-ում մշտապես բնակվող մարդկանց թիվն այսօր կազմում է 3 մլն, իսկ արտերկրում ներկայում ունենք երկու անգամ ավելի շատ թվով հայրենակից: Սա նաև մեր ազգի մոբիլության վկայությունն է, այսինքն մեր քաղաքացիները կարողանում են ազատորեն տեղաշարժվել, քանի որ դրա համար առկա են բարենպաստ պայմաններ: Պետք է ընդգծել նաև, որ արտագաղթին նպաստող մյուս գործոնն էլ աշխատատեղերի անբավարար թիվն է: Մեր բոլոր ուսումնասիրությունները ցույց են տալիս, որ թիվ մեկ գործոնը արտագնա աշխատանքի մեկնելու՝ աշխատատեղերի բացակայությունն է: Այսինքն, արտագաղթի երկու հիմնական խնդիրները սրանք են»,— նշել է Տիգրան Սարգսյանը:

Ըստ նրա՝ տարեկան միգրացիոն բացասական հոսքերի ամենամեծ ցուցանիշն արձանագրվել է 1991-1995 թվականների ընթացքում՝ հասնելով տարեկան 200 հազարի: «Սա օբյեկտիվ և հասկանալի է՝ պայմանավորված երկրի այն ժամանակվա սոցիալ-տնտեսական իրավիճակով, երբ երկրում կտրուկ կրճատվում էին աշխատատեղերը, ինչի արդյունքում մեր քաղաքացիները ստիպված լքում էին հայրենիքը՝ իրենց սոցիալական խնդիրները հոգալու համար: 1996-97 թթ.-ից հետո, երբ երկրում ապահովվեց մակրոտնտեսական կայունություն, սկսվեցին գրանցվել տնտեսական աճի ցուցանիշներ՝ երկիրը լքողների բացասական սալդոն հասավ տարեկան 50-60 հազարի: Իսկ 2004-2006 թթ-ին այն հասավ զրոյական մակարդակի,   նույնիսկ արձանագրվեց միգրացիոն հոսքերի դրական սալդո: 2007-ից կրկին  արձանագրվել է բացասական սալդո՝ տարեկան կտրվածքով այդ ցուցանիշը տատանվելով 4-5 հազարի շրջանակներում»,- ասել է վարչապետը:

Ըստ նրա՝ համաշխարհային տնտեսական ճգնաժամի ազդեցությունն ակնառու է եղել արտագնա աշխատանքի մեկնողների թվաքանակի պարագայում, քանի որ 2009 թ. մեր երկիրը գրեթե չի ունեցել այդ նպատակով մեկնողներ: «Սա կապված էր Ռուսաստանում աշխատանքի բացակայության հետ: 2010 թ. ՌԴ-ում իրավիճակի բարելավման հետևանքով կրկին վերսկսվել են նման հոսքերը, կտրուկ ավելացել արտագնա աշխատանքի մեկնողների թիվը: Մեր ուսումնասիրությունները ցույց են տալիս, որ ներկայում տարեկան կտրվածքով մեր երկրից արտագնա աշխատանքի մեկնողների թիվը հասնում է 60 հազարի: Այս տարվա առաջին 6 ամիսների ընթացքում արձանագրել ենք, որ այս առումով վերականգնվել է 2007 թ. ցուցանիշը», — նշել է վարչապետը:

Ըստ նրա՝ վիճակագրության հետ աշխատելիս պետք է զգուշավոր լինել և հաշվի առնել արտագնա սեզոնային աշխատանքի մեկնելու երեույթը: «Վերը նշված դինամիկան որոշակի թյուրիմացության մեջ է գցել նաև որոշ զանգվածային լրատվական միջոցների, որոնք ահազանգում են, թե այս տարի արտառոց արտագաղթ է տեղի ունենում: Սակայն միգրացիոն ծառայության ուսումնասիրությունները ցույց են տալիս, որ այդ դինամիկ երևույթները կապված չեն հայրենիքը մշտապես լքողների հետ: Դա առաջին հերթին պայմանավորված է ժամանակավոր աշխատանքի մեկնողների՝ 2007-2008 թվականների ցուցանիշի վերականգնման հետ: Ամեն դեպքում, նույնիսկ եթե խոսքը գնա տարեկան մեր երկիրը լքող 2500-3000 մարդու մասին՝ այս երևույթը մեզ մտահոգող լրջագույն խնդիրը կրկին կհանդիսանա»,- ընդգծել է կառավարության ղեկավարը:

ՀՀ կառավարությունը 2010-ի դեկտեմբերին հաստատել է միգրացիոն քաղաքականության ռազմավարությունը, որտեղ հստակ ֆիքսվել են կառավարության թիրախները և նպատակները: «Առաջին հերթին միգրացիոն քաղաքականությունը պետք է ծառայի ազգագրական և ժողովրդագրական խնդիրների լուծմանը: Մենք պետք է կարողանանք կասեցնել միգրացիոն բացասական սալդոն և հասնենք  դրական ցուցանիշների: Այդ նպատակին է միտված նաև Սփյուռքի նախարարության ձևավորումը, որը մշակել է մի քանի տասնյակ ծրագրեր, որոնց նպատակն է՝ ամրապնդել սփյուռքահայության հետ կապը, ստեղծել աշխատատեղեր և համապատասխան պայմաններ, որպեսզի մեր հայրենակիցները հնարավորություն ունենան ժամանել Հայաստան: Այդ նպատակով կառավարությունը մշակել և Ազգային ժողովին է ներկայացրել հայրենադարձության վերաբերյալ օրենք, որով պետությունն ստանձնելու է պարտավորութուններ՝ մեր հայրենակիցների նկատմամբ՝ ստեղծել այնպիսի միջավայր, որպեսզի նրանց ադապտացումը մեր երկրի պայմաններին լինի հնարավորին չափ հեշտ և կարճ ժամկետում»,- ասել է Տիգրան Սարգսյանը:

Անդրադառնալով սահմանամերձ շրջաններին՝ վարչապետը նշել է, որ դրանք ևս կառավարության մշտական ուշադրության կենտրոնում են, և այդ տեսանկյունից տարածքային համաչափ զարգացումը ծրագրային գերակա ուղղություններից է: «Ֆինանսական միջոցները բաշխելիս նախապատվությունը պետք է տանք ոչ թե Երևանին, խոշոր քաղաքներին, այլ համայնքներին: Բանկերը ցածր տոկոսադրույքներով՝ արտոնյալ պայմաններով և պետության սուբսիդավորմամբ հիփոթեքային վարկեր պետք է տրամադրեն առաջին հերթին անապահով համայնքներին»,- ասել է վարչապետը:

Խոսելով ծնելիության խթանման վերաբերյալ՝ Տիգրան Սարգսյանը փաստել է, որ վերջին 5 տարիների ընթացքում այս բնագավառում պետության կողմից իրականացվել են լրջագույն ծրագրեր: ՙԾննդօգնությունը Հայաստանում դարձել է անվճար, իսկ կոռուպցիոն ռիսկերը հասցվել են նվազագույնի: «Մենք այստեղ ունենք լրջագույն հաջողություն, որն արձանագրել են հանրապետությունում կոռուպցիոն ռիսկերը գնահատող միջազգային կազմակերպությունները: Ավելացվել են նաև երեխաներին հատկացվող նպաստները՝ նույնիսկ տնտեսական ճգնաժամի ժամանակ», — նշել է վարչապետը:

Գրողները վարչապետին են դիմել հանրապետությունում գրախանութների թվի նվազման, ժամանակակից հայ գրականության շուրջ առկա խնդիրների վերաբերյալ: Տիգրան Սարգսյանը կարևորել է դրանց լուծմանն ուղղված համատեղ աշխատանքների իրականացումը: Միաժամանակ, վարչապետը հորդորել է մշտապես ընթերցել գրականություն՝ սեփական ինտելեկտը և գիտելիքները բարձրացնելու նպատակով:

Նշենք, որ «Ես գրքի բարեկամն եմ» խորագրով անցկացված հեռուստամարաթոնին աջակցելու համար Տիգրան Սարգսյանը Հայաստանի գրողների միության նախագահ Լևոն Անանյանից ստացել է «Գրական բարերար»-ի դիպլոմ:

Հուլիսի 22-ին ԱԳ նախարար Էդվարդ Նալբանդյանն ընդունեց Մեծ Բրիտանիայի լորդերի պալատի անդամ բարոնուհի Քերոլայն Քոքսի գլխավորած պատվիրակությանը:

Ողջունելով հյուրին` արտգործնախարարը բարձր գնահատեց Քերոլայն Քոքսի Հայաստանին եւ Արցախին մշտապես ցուցաբերվող աջակցությունը եւ նշեց որ բարոնուհու գործունեությունը գնահատվում է հայ ժողովրդի կողմից:

Բարոնուհի Քոքսը, շնորհակալություն հայտնելով ջերմ խոսքերի համար, նշեց, որ, մշտապես առանձնահատուկ վերաբերմունք է տածել Հայաստանի նկատմամբ, եւ վստահեցրեց, որ շարունակելու է իր գործունեությունն՝ ի նպաստ հայ-բրիտանական հարաբերությունների առավել ամրապնդման:

Հանդիպման ընթացքում զրուցակիցներն անդրադարձան հայ-բրիտանական հարաբերությունների ներկա փուլին եւ հեռանկարներին: Այդ համատեքստում բարոնուհի Կոքսը կարեւորեց նախարար Նալբանդյանի` անցյալ շաբաթ Լոնդոն կատարած այցելությունը. հանդիպումը ՄԹ արտգործնախարար Ուիլյամ Հեյգի  եւ Եվրոպայի հարցերով նախարար Դեվիդ Լիդինգտոնի հետ, ելույթը Ռազմավարական ուսումնասիրությունների միջազգային կենտրոնում՝ նշելով, որ դա լավ հնարավորություն էր բրիտանացի փորձագետների համար՝ առաջին ձեռքից ծանոթանալու Հայաստանի արտաքին քաղաքականությանը:

Զրույցի ընթացքում քննարկվեցին երկկողմ միջխորհրդարանական համագործակցությանը վերաբերող հարցեր:

Քերոլայն Քոքսի խնդրանքով Էդվարդ Նալբանդյանը ներկայացրեց արցախյան հիմնախնդրի կարգավորման գործընթացի վերջին զարգացումները:

Նախագահ Սերժ Սարգսյանին այսօր` հուլիսի 22-ին իր հավատարմագրերն է հանձնել Հայաստանում Թաիլանդի Թագավորության նորանշանակ դեսպան Չալերմպոլ Թանչիտը (նստավայրը՝ Մոսկվա):

նախագահը շնորհավորել է դեսպանին` մեր երկրում դիվանագիտական առաքելությունն սկսելու կապակցությամբ եւ մաղթել հաջողություններ: Սերժ Սարգսյանը վերահաստատել է Հայաստանի շահագրգռվածությունը` Թաիլանդի հետ բազմաբնույթ հարաբերությունները զարգացնելու եւ ամրապնդելու գործում: «Մեր երկու երկրները շուրջ 20 տարի է դիվանագիտական հարաբերություններ ունեն, եւ այդ ընթացքում եղել են բարձր մակարդակի  փոխայցելություններ, որոշակի աշխատանք է իրականացվել երկկողմ կապերն ամրապնդելու ուղղությամբ:  Մենք պատրաստակամ ենք եւ  շահագրգիռ` շարունակելու զարգացնել Թաիլանդի Թագավորության հետ քաղաքական երկխոսությունը, հարաբերությունները` տնտեսության, առեւտրի եւ մշակույթի ոլորտներում»,-ասել է Սերժ Սարգսյանը:

Երկուստեք կարեւորվել է անհրաժեշտ իրավապայմանագրային դաշտի ձեւավորումը, որը կխթանի հարաբերությունների զարգացումը ոչ միայն կառավարական մակարդակով, այլ նաեւ` մասնավոր հատվածում:

Դեսպան Չալերմպոլ Թանչիտը նշել է, որ հաջորդ այցը Երեւան նախատեսում է սեպտեմբերին` Հայաստանի անկախության 20-ամյակի տոնակատարությանը մասնակցելու առիթով եւ մտադիր է այցելել իր երկրի մշակույթի ոլորտի ներկայացուցիչներից կազմված պատվիրակության հետ միասին ու արդեն իսկ որոշակի քայլեր ձեռնարկել այդ ոլորտում համագործակցության ուղղությամբ:

Այս մասին հայտնում են ՀՀ նախագահի մամուլի գրասենյակից:

22-ը հուլիսի, 2011թ., Երեւան, Հայաստան.  Այսօր ՀՀ առողջապահության նախարարությունում տեղի ունեցավ ՀՀ առողջապահության նախարար Հարություն Քուշկյանի եւ ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանի մամուլի համատեղ ասուլիսը` նվիրված շտապ բժշկական օգնության գործակարգավարական (դիսպետչերական) համակարգի արդիականացմանը, որի առանցքային բաղադրիչներից մեկն իրականացվում է պետություն-մասնավոր սեկտոր համագործակցության շրջանակներում: Հայաստանում արդյունավետ գործակարգավարական (դիսպետչերական) համակարգի արդիականացման նպատակով 2011-2012 թթ-ին ՎիվաՍել-ՄՏՍ-ը ընդհանուր առմամբ կտրամադրի 85 միլիոն դրամի աջակցություն` թվային կապի համար անհրաժեշտ սարքավորումներ ձեռք բերելու, ինչպես նաեւ` դիսպետչերական ծառայության համար անհրաժեշտ թվային ռադիոկապի համակարգի ստեղծման նպատակով: Բացի այդ՝համակարգի անխափան աշխատանքն ապահովելու նպատակով ՎիվաՍել-ՄՏՍ-ը կտրամադրի իր`Հայաստանում ամենաընդարձակ եւ զարգացած 3G/3.5G ցանցը:

Շտապ բուժօգնության արդիականացման ռազմավարությունը հաստատվել է ՀՀ կառավարության համապատասխան որոշմամբ դեռեւս 2010 թվականին: Վերանորոգվել է 1-03 ծառայության գործակարգավարական կենտրոնը, տեղադրվել են գլոբալ նավիգացիոն համակարգ, Երեւանի քարտեզով նավիգատորներ, համակարգչային եւ զանգերի ձայնագրման սարքավորում, կենտրոնի ու ենթակայանների միջեւ ստեղծվել է լուսամանրաթելային կապ եւ այլն:

Շտապ բուժօգնության արդիականացման շրջանակներում ստեղծվել է արբանյակային վերահսկողության եւ դիսպետչերական համակարգ, որն իրականացնում է շտապօգնության մեքենաների համակողմանի վերահսկողություն`ներառյալ ավտոմատ կերպով կանչի գրանցումը, մեքենայի տեղ հասնելն ու հիվանդին համապատասխան բուժկենտրոն տեղափոխելը: Նախª GPS արբանյակների միջոցով որոշվում է մեքենայի աշխարհագրական դիրքը, որից հետո կատարվում է տվյալների հավաքագրում բուժխմբի զբաղվածության, ինչպես նաեւ խմբի տեսակի վերաբերյալ: Մեքենայից ՎիվաՍել-ՄՏՍ-ի 3G/3.5G ցանցերի միջոցով այդ տվյալներն ուղարկվում են կենտրոնական սերվերին: Կանչը ստանալուն պես, գրանցվում են բոլոր տվյալները: Դիսպետչերը, մոնիտորին նայելով, որոշում է ազատ  մեքենան եւ այն ուղղորդում կանչը սպասարկելու: Ընթացքում GPS եւ 3G/3.5G միջոցով կատարվում է կանչի մոնիթորինգ: Մեքենաներում տեղադրված նավիգատորները թույլ են տալիս վարորդին լուծել հասցեին ամենակարճ ճանապարհով մոտենալու խնդիրը`ինչը թույլ է տալիս նվազագույնի հասցնել շտապօգնությունը ՙդիմավորելու՚ անհրաժեշտությունը: Քարտեզի վրա բուժհաստատությունների նախապես նշված լինելը թույլ է տալիս արագ որոշել, թե որ հիվանդանոցն է առավել նպատակահարմար հիվանդի համար: Այս համակարգի ներդրումը նպաստում է կանչի իրականացման օպտիմալացմանը, հիվանդին տեղ հասցնելու ժամանակի կրճատմանը, բուժխմբերի աշխատանքի որակի բարձրացմանը, ինչպես նաեւ թույլ է տալիս էականորեն նվազեցնել վառելիքի ծախսը:

«ՎիվաՍել-ՄՏՍ-ը մեծապես կարեւորում է Հայաստանի բնակչությանը մատուցվող ծառայությունների որակի բարելավումը` այդ թվում նաեւ առողջապահական ոլորտում: Որպես Հայաստանում երրորդ սերնդի ամենաընդարձակ եւ հուսալի  ցանցն ունեցող օպերատոր, ընկերությունը պատրաստակամ է աջակցելու առողջապահական ժամանակակից ծառայությունների ներդրմանը թեիր կապուղիները տրամադրելով, եւ թե նորարարական լուծումներով»,-նշեց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Առողջապահության նախարարությունը բարձր է գնահատում միշտ ժամանակին եւ ճիշտ տեղում լինելու ՎիվաՍել-ՄՏՍ-ի որդեգրած մոտեցումը: Հայաստանի առաջատար բջջային օպերատորի գործունեությունը պետության հետ մասնավոր հատվածի համագործակցության հրաշալի օրինակ է, որի հիմքում մարդասիրությունն է, մեր երկրում նոր մշակույթ ձեւավորելու ցանկությունը, նորարարություններին ու ոլորտի զարգացմանն ընդառաջելու մղումը: ՎիվաՍել-ՄՏՍ-ը առողջապահության համակարգի կողքին է տեւական ժամանակ: Բավական է նշել ճանապարհային անվտանգության իրազեկման քարոզարշավը, հանրապետության տարբեր մարզերի եւ կենտրոնական հիվանդանոցներին, ծննդատներին եւ ուռուցքաբանության ազգային կենտրոնին ցուցաբերած աջակցությունը, միջազգային բժշկական համաժողովների հովանավորությունը եւ նորարարական լուծումներով` համակարգի արդիականացմանը նպաստելու պատրաստակամությունը: Գնահատելի են առողջ հասարակություն ունենալու հարցում ՎիվաՍել-ՄՏՍ-ի ներդրած ջանքերը:

Սպասեք ավելին: ՎիվաՍել-ՄՏՍ… Ավելին, քան օպերատոր:

ՎիվաՍել–ՄՏՍ-ը (Ղ-Տելեկոմ ՓԲԸ) Հայաստանի շարժական կապի առաջատար օպերատորն է, որն ունի ամենահզոր 2G/3G ցանցը եւ տրամադրում է ձայնային եւ տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, ՎիվաՍել–ՄՏՍ-ը կարճ ժամանակամիջոցում կարողացել է ստեղծել համահանրապետական ցանց եւ բաժանորդների մեծ բազա: ՎիվաՍել–ՄՏՍ-ը նորարարությունների առաջատարն է եւ հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի:

Վարչապետ Տիգրան Սարգսյանն այսօր այցելել է ՀՀ ոստիկանության անձնագրային և վիզաների վարչության Աշտարակի անձնագրային բաժանմունք: Վերանորոգված և նորագույն  տեխնիկայով կահավորված բաժանմունքի վերաբացման արարողություներից հետո կառավարության ղեկավարը ՀՀ ոստիկանապետ Ալիկ Սարգսյանի ուղեկցությամբ շրջել է անձնագրային բաժանմունքով` ծանոթացել վերջինիս պայմաներին, քաղաքացիների սպասարկման հնարավորություներին:

Նորաբաց անձնագրային բաժանմունքում տեղադրվել է անձնագրային ծառայությունների մատուցման համար նախատեսված պետական տուրքերը, վարչական տուգանքները և այլ վճարներն ընդունող էլեկտրոնային վճարային տերմինալ, ինչի շնորհիվ քաղաքացիների սպասարկումը զգալիորեն արագացել է, բաժանմունքը համալրվել է նաև նոր համակարգիչներով` քաղաքացիների սպասարկումն առավել քաղաքակիրթ, արդյունավետ և թափանցիկ իրականացնելու համար:

Նախկինում այստեղ անձնագրավարները գործառույթներն իրականացրել են  ըստ իրենց կողմից սպասարկվող տարածքների, իսկ այժմ բաժանմունք դիմած  քաղաքացիները սպասարկվելու են ըստ իրենց անհրաժեշտ ծառայությունների` ավելի արագ և առանց ավելորդ քաշքշուկների: Անձնագրային բաժանմունքում աշխատանքները կազմակերպվել են դահլիճի սկզբունքով` ապակեպատ աշխատանքային խցիկներով`  քաղաքացիների սպասարկման թափանցիկությունն ապահովելու նպատակով:

Վերոհիշյալ բարեփոխումների արդյունքում զգալիորեն կբարձրանա քաղաքացիների  սպասարկման մակարդակը և կբացառվեն կոռուպցիոն ռիսկերը:

Բաժանմունքի վերանորոգման և տեխնիկական վերազինման նպատակով ներդրվել է 11 մլն դրամ` ՀՀ ոստիկանության  անձնագրային և վիզաների վարչության արտաբյուջետային միջոցների հաշվին:

Նշենք, որ ներկայում ընթանում են ԱՎ վարչության Մաշտոցի անձնագային բաժանմունքի նոր մասնաշենքի կապիտալ շինարարության նախապատրաստական աշխատանքները: 2011թ. ընթացքում արտաբյուջետային միջոցների հաշվին նախատեսվում է  կապիտալ վերանորոգել Ավանի անձնագրային  ծառայությունը:

ՀՀ Արտաքին գործերի նախարարի տեղակալ Կարինե Ղազինյանը կնշանակվի  Մեծ Բրիտանիայում Հայաստանի արտակարգ և լիազոր դեսպան։

Կարինե Ղազինյանը 2001-2009 թթ. զբաղեցրել է Գերմանիայի Դաշնային Հանրապետությունում ՀՀ արտակարգ և լիազոր դեսպանի պաշտոնը։ 2009 թ. մարտին նա վերադարձավ Հայաստան և զբաղեցրեց ՀՀ ԱԳ փոխնախարարի պաշտոնը: Ղազինյանը նաև գլխավորում է Հայաստան-ԵՄ ասոցացման համաձայանագրի բանակցությունները։

Հիշեցնենք, որ Վահե Գաբրիելյանի՝ Հայաստան վերադառնալուց հետո դեսպանի պաշտոնը թափուր էր մնացել։

Այսօր լրագրողների հետ հանդիպման ժամանակ ՀՀ ոստիկանապետի տեղակալ Արթուր Օսիկյանը հայտարարեց, որ ճանապարհների և խաչմերուկների վրա տեսանկարահանող կամ լուսանկարահանող սարքերի տեղադրման արդյունքում ճանապարհային ոստիկանության պարեկային ծառայության աշխատակիցների մի մասը ավտոմատ կկրճատվի: Սակայն, ըստ Օսիկյանի, ազատված ավտոտեսուչները գործազուրկ չեն մնա և, ամենայն հավանականությամբ, համակարգում այլ աշխատանք կստանան:

Առանց դրա էլ բարեփոխումների արդյունքում ավտոտեսուչները գրեթե անգործ են մնացել: Նրանք, որպես կանոն, չեն կատարում իրենց հիմնական գործը. չգիտես ինչու, մեզանում ընդունված է, որ ՃՈ աշխատակիցները միայն խախտումեր արձանագրելու կամ տուգանելու համար են: Իսկ փողոցում երթևեկության կարգուկանոն հաստատելիս կամ խափանված մեքենայի օգնելիս, և այլ խնդիրների պահին նրանք անտարբեր են կամ անհետանում են զարմանալի արագությամբ:

Օսիկյանը տեղեկացրեց, որ սարքերի տեղադրման աշխատանքները իրականացնելու է շվեդական Sensis Trafik կազմակերպությունը` սեփական միջոցներով, և այս կազմակերպության մասնագետներն էլ իրականացնելու են սպասարկումը:

Պայմանագիրը կնքված է 25 տարով, ներդրումների չափը կկազմի 9.8 մլն եվրո: Այսինքն` սարքը կֆիքսի ավտոմեքենայի համարը, խախտման տեսակը ու բոլոր տվյալները կուղարկի համապատասխան տեսուչին, որն էլ կտրոնը կներկայացնի խախտումն իրականացրած ավտոմեքենայի տիրոջը: Այսպիսով, ըստ Օսիկյանի, կոռուպցիոն ռիսկերը գործնականում կվերանան:

Պայմանն այնպիսին է, որ շվեդական ընկերությունը որպես փոխհատուցում կստանա գանձված տուգանքների 70 տոկոսը` մինչև ներդրումների գումարը ամբողջությամբ վերադարձվի: Այնուհետև բյուջեի հետ հարաբերությունները կկարգավորվեն 50/50 սկզբունքով: Ըստ Օսիկյանի` դատելով այսօրվա պրակտիկայից, իրենք հույս ունեն, որ լավագույն դեպքում տուգանքների ընդհանուր չափը կկազմի տարեկան 200 մլն դրամ: Ստացվում է, որ ինչքան շատ տուգանեն, այնքան շուտ կմարեն պարտքը: