«Վերլուծությունները փաստել են, որ զոհված ազատամարտիկը չէր կարող 2001, 2002, 2003 թվակականներին երեխա ունենալ: Շուրջ 4 հազար 500 երեխա ծնվել է 2000թ. հետո: Վերլուծությունները ցույց են տվել, որ դրանք զոհված ազատամարտիկների երեխաներ չեն, այլ նրանց հարազատների»,- այսօր նման հայտարարությամբ հանդես եկավ սոցապնախարար Արթուր Գրիգորյանը:

Այսօր Կառավարության նիստում փոփոխություն կատարվեց Հայաստանի պաշտպանության ժամանակ կամ ծառայողական պարտականությունները կատարելիս զոհված զինծառայողի ընտանիքին տրվող դրամական օգնությունների չափերում: Գործադիրի որոշմամբ` Հայրենական մեծ պատերազմի և այլ պետություններում մատական գործողություններին մասնակցության հետևանքով հաշմանդամ դարձած շուրջ 4 հազար անձի տրվող դրամական օգնության չափը բարձրացվեց 5 հազար դրամով: Հայրենականի վետերանների ամենամսյա պատվովճարը բարձրացվեց ևս 5 հազար դրամով` դառնալով 25 հազար դրամ:

Մինչ այս ընտանեկան նպաստի համակարգում ընդգրկված տվյալ կատեգորիայի ընտանիքներին առանց կարիքավորության գնահատականը հաշվի առնելու տրվում էր ընտանեկան նպաստ:

Կատարված փոփոխությամբ առանձնացվել է այդ կատեգորիան ընտանեկան նպաստի համակարգից և կատարվել են հավելումներ օգնությունների չափերին: Ինչպես նիստին հաջորդած ճեպազրույցում նշեց աշխատանքի և սոցիալական հարցերի նախարար Արթուր Գրիգորյանը, եթե գործող կարգով երեխա չունեցող յուրաքանչյուր ընտանիքին տրվում էր 23 հազար 500 դրամ, երկու երեխայի առկայության դեպքում` 38 հազար 500 դրամ: Կատարված փոփոխությամբ բազային նպաստի չափը դարձել է 30 հազար դրամ, իսկ յուրաքանչյուր երեխայի հավելումը՝ 20 հազար դրամ: Բարձրացումը կազմում է 75 տոկոս:

Նախարարը պարզաբանեց, որ բարձրացումը կատարվել է խորը վերլուծության արդյունքում: Շուրջ 5 հազար 100 ընտանիք, որոնց կազմում հաշվառված էին 5 հազար 800 երեխաներ, ստանում էին ընտանեկան նպաստ: Օգնությունը, սակայն, տրվում է ազատամարտիկի ընտանիքին, և 1300 երեխաներ ներառող այդպիսի ընտանիքների օգնությունը բարձրացվել է նաև վերահաշվարկի արդյունքում:

Նախարարի գնահատմամբ` ավելացումները տեղին էին և ժամանակին, և հայրենիքի նկատմամբ պարտքը կատարած անձանց նկատմամբ վերաբերմուքը պետք է լինի շարունակական:

Հ.Գ. Հետաքրքիր է, պատժվելո՞ւ են նպաստների գումարները վատնող չինովնիկները:

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը։ Նիստից առաջ վարչապետը կառավարության անունից շախմատի Հայաստանի հավաքականի անդամներին շնորհավորել է աշխարհի չեմպիոն հռչակվելու կապակցությամբ։ «Մեր հավաքականը փայլուն հաղթանակ է տարել աշխարհի առաջնությունում և ապացուցել, որ լավագույնն է աշխարհում», — նշել է վարչապետը։
Ավելացվում է զոհված զինծառայողների ընտանիքներին տրվող դրամական օգնության չափը

Իր նախկին որոշումներից երկուսում կատարելով համապատասխան փոփոխություններ և լրացումներ, ՀՀ կառավարությունը բարձրացրել է զոհված զինծառայողների շուրջ 5 հազար 300 ընտանիքներին տրվող դրամական օգնության չափը` 10 հազար դրամի փոխարեն սահմանելով 30 հազար դրամ, որին լրացուցիչ կավելացվի յուրաքանչյուր երեխայի (շուրջ 1300 երեխա) համար 20 հազար դրամ։ Միաժամանակ 2011թ. սեպտեմբեր ամսից Հայրենական մեծ պատերազմի և այլ պետություններում մարտական գործողություններին մասնակցելու հետևանքով հաշմանդամ դարձած շուրջ 4000 անձի տրվող դրամական պարգևի չափը կբարձրացվի 5000 դրամով։ Վարչապետ Տիգրան Սարգսյանն անհրաժեշտ է համարել այս որոշումը հանգամանորեն ներկայացնել զանգվածային լրատվական միջոցներին։ «Այս որոշմամբ մենք մեր սոցիալական քաղաքականությունը դարձնում ենք ավելի նպատակային և ավելացնում ենք այն վճարները, որոնք իրականացնելու ենք պետական բյուջեից, — հավելել է վարչապետը։ — Նաև պետք է հավաստիացնենք զոհված ազատամարտիկների ընտանիքներին, որ այս որոշման արդյունքում նրանք պետություն կողմից ստանալու են ավելի մեծ ֆինանսական օժանդակություն, ինչպես նաև պատերազմի մասնակիցները 5000 դրամով ավելի կստանան և պատերազմական գործողություններում հաշմանդամ դարձած անձինք նույնպես ֆինանսական օժանդակություն են ստանալու»։
ՀՀ կառավարությունը հավանություն է տվել ինտեգրված սոցիալական ծառայությունների տրամադրման համար անհրաժեշտ շենքերի (տարածքների), այդ թվում միասնական ընդունարանների տեղակայման առաջարկվող վայրերին։ Որոշմամբ առաջարկվում է սոցիալական ծառայություն տրամադրող կառույցները, ինչպես նաև նոր ստեղծվող միասնական ընդունարանները տեղակայել պետական կամ համայնքային սեփականություն հանդիսացող շենքերում և շինություններում, ինչը կնպաստի ծառայությունների որակի բարելավմանը և արդյունավետության մեծացմանը։ Վարչապետ Տիգրան Սարգսյանի դիտարկմամբ սա մեր սոցիալական բարեփոխումների կարևորագույն տարրերից է։ «Ներդնելով ինտեգրված սոցիալական ծառայության մատուցման ինստիտուտը, մենք էապես հեշտացնելու ենք մեր քաղաքացիների կյանքը, քանի որ նրանք պետությունից սոցիալական օժանդակություն ստանալու համար ստիպված չեն լինելու տարբեր գերատեսչություններ այցելել, — ասել է վարչապետը։ — Ավելին, ամբողջ տեղեկատվությունը կկուտակվի այդ կենտրոններում, և մենք ամբողջական պատկերացում կունենանք սոցիալապես անապահով ընտանիքների մասին, կկարողանանք տեղում որակյալ ծառայություն մատուցել նրանց։ Այլևս բյուրոկրատական քաշքշուկ չի լինի, կոռուպցիոն ռիսկերն էապես կնվազեն, և կունենանք միասնական տվյալների բազա նախարարությունում, որն էլ կլինի տվյալների բազայի ճշգրտումների իրականացման միակ իրավասու մարմինը, որպեսզի տարբեր չարաշահումներ չլինեն։ Սա բավական լուրջ բարեփոխման սկիզբ է»։ Երկու այլ որոշումներից մեկով գործադիրը սահմանել է «Կամավոր կենսաթոշակային ֆոնդերի ակտիվների ֆինանսական գործիքներում ներդրման քանակական և արժութային սահմանափակումները», որոնց նպատակն է ակտիվների ներդրումների արդյունավետ դիվերսիֆիկացումը և ռիսկերի նվազեցումը, մյուսով` «ՀՀ կենսաթոշակային բարեփոխման ծրագրի» չափանիշները համապատասխանեցրել միջազգային լավագույն փորձին։
Կառավարության որոշմամբ հիմնվել է «Կենսաթոշակային համակարգի իրազեկման կենտրոն» հիմնադրամ, որն զբաղվելու է բնակչության շրջանում կենսաթոշակային բարեփոխումների հանրային իրազեկման և հանրային կրթության մեծածավալ ծրագրի իրականացմամբ։ Դրա նպատակն է բարձրացնել բնակչության տեղեկացվածության մակարդակը, ինչն իրականացվող բարեփոխման հաջողության գրավականն է։

Կատարվել են հարկային մուտքերի պարտավորությունները

Վարչապետ Տիգրան Սարգսյանն անդրադարձել է գյուղատնտեսության վարկավորմանը ևս 7,5 մլրդ դրամ հատկացնելու որոշմանը և նշել, որ վարկավորումը կատարվելու է նույն մեխանիզմով, ինչ որ գարնանը։ «Դա նշանակում է, որ ֆինանսների նախարարությունը պահուստային ֆոնդից պետք է պլանավորի սուբսիդավորման գումարներ` 7,5 միլիարդի համար առնվազն 4 տոկոս, որով սուբսիդավորվելու են վարկերի տոկոսադրույքները։ 125 առավել անապահով սոցիալական խնդիրներ ունեցող համայնքներում վարկերը սուբսիդավորվելու են 6 տոկոսով, որպեսզի վարկերը գյուղացիներին հասնեն 8 տոկոսով և 10 տոկոսով», — ասել է վարչապետը։
Նիստի ընթացքում ճշտելով, որ անցած վեց ամսում հաջողությամբ կատարվել են նաև հարկային մուտքերի պարտավորությունները, վարչապետը ՀՀ ֆինանսների նախարարության ղեկավարությանը հանձնարարել է համապատասխան պարզաբանում տալ զանգվածային լրատվամիջոցներին։ Այնուհետև Տիգրան Սարգսյանն ասել է. «Երկրորդ հարցը, հարգելի գործընկերներ, այն է, որ սեպտեմբերը ծանրաբեռնված ամիս է լինելու, ունենալու ենք բազմաթիվ միջոցառումներ` նվիրված Հայաստանի Հանրապետության անկախության 20-ամյակին։ Որպեսզի մենք մեր բյուջեի կատարողականի հետ խնդիր չունենանք և 2012 թ. բյուջեն ժամանակին կարողանանք ծրագրել, անհրաժեշտ է, որպեսզի դուք նախագծերը ֆինանսների նախարարություն ներկայացնեք ոչ թե օգոստոսի 6-ին, այլ օգոստոսի 2-ին։ Դրա համար հանձնարարվում է բոլոր նախարարություններին` 4 օր ավելի շուտ ներկայացնել նախագծերը ֆինանսների նախարարություն, որպեսզի մենք բյուջեի նախագծի աշխատանքն սկսենք մի փոքր շուտ, որպեսզի սեպտեմբերին բյուջեի քննարկման հետ կապված խնդիր չունենանք։
Երրորդը` մենք բյուջեի ծախսային մասով մշտապես ունենում ենք խնդիրներ, ամբողջությամբ ծախսերը չենք կատարում, և այդ առումով 2011թ. առաջին եռամսյակը և կիսամյակը բացառություն չէին։ Մենք 40 մլրդ դրամից ավելի ծախսեր չենք կատարել։ Դա ունի նաև օբյեկտիվ պատճառ, քանի որ կատարում էինք կառուցվածքային փոփոխություններ` ԾԻԳ-երի գործունեությունն էինք կանոնակարգում, միավորում էինք ԾԻԳ-երը, կրճատումներ իրականացնում, ՊՈԱԿ-ներն էինք միավորում։ Արդյունքում մենք 2011 թ. առաջին կիսամյակում ունենք որոշակի հետաձգված ծախսեր, որոնք կատարելու ենք երկրորդ կիսամյակում։ Որպեսզի 2012 թ. բյուջեն ծախսային մասով կատարենք ավելի սահուն ըստ եռամսյակների, անհրաժեշտ է 2011թ. նոյեմբերին արդեն հայտարարել մրցույթներ բյուջեի այն նախագծի շրջանակում, որն օգոստոսին կքննարկվի կառավարությունում և սեպտեմբերին կհաստատվի, այսինքն` նոյեմբերին պետք է ունենանք արդեն հայտարարված մրցույթներ։ Այդ պրակտիկան մենք կիրառել ենք մի քանի տարի, քանի որ մրցութային պայմանագրերում ամրագրվում է, որ դրանք ուժի մեջ են մտնում այն պահից, երբ հաստատվում է պետական բյուջեն, և հատկացվում են ֆինանսական միջոցներ։ Մեր տնտեսվարող սուբյեկտներն այս ռեժիմներին ծանոթ են և պատրաստ են այս ռեժիմներում մեզ հետ աշխատել։ Արդյունքում ֆինանսների նախարարությունը մեր առջև դնում է հետևյալ խնդիրը. որպեսզի մենք բարձրացնենք բյուջեի կատարողականի կարգապահությունը, 2012թ. ներդնելու ենք հետևյալ ռեժիմը. եթե ըստ եռամսյակների ծախսային հոդվածները չեն կատարվում 15 տոկոսից ավելի, ապա այդ գումարներն անհապաղ ֆինանսների նախարարությունը փոխանցում է պահուստային ֆոնդ։ Սա բավական խիստ ռեժիմ է լինելու, և դրա համար է անհրաժեշտ, որ մենք ձեզ հետ միասին 2011 թ.-ից արդեն ունենանք տեխնիկական առաջադրանքի պայմանները, մրցութային բոլոր փաստաթղթերը և արդեն 2011 թ. հայտարարենք 2012 թ. մեր ծախսային ծրագրերը»։

Վերականգնվում է Մինաս Ավետիսյանի ևս երկու որմնանկար

Հիմք ընդունելով «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքի պահանջները և նկատի առնելով Մինաս Ավետիսյանի որմնանկարներն իրենց կողմից վերականգնելու վերաբերյալ Գյումրու քաղաքապետի և «ԱԳ և ԱԱ Բաղդասարյաններ» ՍՊԸ առաջարկները, ՀՀ կառավարությունը որոշել է թույլատրել Գյումրու քաղաքապետարանի միջոցների հաշվին իրականացնել Շիրակի մարզի պատմության և մշակույթի անշարժ հուշարձանների պետական ցուցակում ընդգրկված և պետական սեփականություն հանդիսացող, Գյումրի քաղաքի «Քարմշակմեքենա» ՓԲԸ նախկին ճաշարանի շենքում գտնվող Մինաս Ավետիսյանի «Հայկական հովվերգություն» որմնանկարի տեղափոխման աշխատանքները։ Որոշման հաջորդ կետով թույլատրվել է «ԱԳ և ԱԱ Բաղդասարյաններ» ՍՊԸ միջոցների հաշվին իրականացնել քաղաքի «Էլեկտրատեխնիկական գործարան» ՓԲԸ նախկին շենքում գտնվող «Գորգ են գործում» որմնանկարի տեղափոխումը։ Վերականգնումից հետո «Հայկական հովվերգություն» որմնանկարը տեղադրվելու է Գյումրու քաղաքապետարանի նորակառույց շենքի նիստերի դահլիճում, «Գորգ են գործում» որմնանկարը` Գյումրու Աբովյան փողոցի N 218 հասցեում գտնվող Շիրակի մարզի պատմության և մշակույթի անշարժ հուշարձանների պետական ցուցակ ներառված շենքի սրահում։ Տեղեկանալով, որ մարզում դեռևս կա Մինաս Ավետիսյանի հեղինակած չորս որմնանկար, ինչպես նաև այլ արվեստագետների կատարած մոտ երկու տասնյակ աշխատանք, վարչապետը նշել է խնդրի նկատմամբ գյուրեցիների ցուցաբերած մեծ ուշադրությունը։ «Հասարակական կազմակերպություններին պետք է խնդրենք, որպեսզի այդ որմնանկարները փրկելու նոր առաջարկներ ներկայացնեն, — ասել է Տիգրան Սարգսյանը։ — Որմնանկարները ցանկացած գնով պետք է փրկել, և եթե այդ հասարակական շարժումն օգնի մեզ գտնել այնպիսի տնտեսվարող սուբյեկտների, որոնք ի վիճակի են ներդրումներ կատարել և փրկել որմնանկարները, ապա մենք մնացած չորսի վերաբերյալ նույնպես պատրաստ ենք կայացնել որոշումներ, որպեսզի դրանք մնան Գյումրիում կամ Շիրակի մարզում»։
Առաջնահերթը դպրոցաշինության ծրագրերն են

Վերաբաշխում կատարելով 2011թ. պետբյուջեում, լրացումներ և փոփոխություններ` ավելի վաղ ընդունած որոշումներից մեկում, կառավարությունը որոշել է վթարավտանգ վիճակում գտնվող Կապանի N 2 ավագ դպրոցի փոխարեն, որը ենթակա է քանդման, մեկ այլ ընտրված տարածքում կառուցել համանման` մոտավորապես 1350 քմ մակերեսով նոր դպրոց։ 1960-ական թթ. կառուցված շենքի մի մասը վերջերս փլուզվել է, շինությունը դարձել է հետագա շահագործման համար ոչ պիտանի։
ՀՀ կառավարությունը վերաբաշխում է կատարել 2011 թ. պետբյուջեում, լրացումներ և փոփոխություններ` իր նախկին որոշումներից մեկում և համապատասխան ֆինանսական միջոցներ տրամադրել Արարատի մարզի Վարդաշենի դպրոցի շինարարությանը։ Քանի որ դպրոցի ուսումնական մասնաշենքի տեխնիկական վիճակը գնահատվել է վթարային, անհրաժեշտություն է առաջացել մինչև առաջիկա ուսումնական տարվա սկիզբը շահագործման հանձնել նոր կառուցվող դպրոցի մի մասը` այն բավարար մակարդակի հասցնելու պայմանով։ Նույն ընթացակարգով ընդունված մեկ այլ որոշման համաձայն հիմնանորոգվելու է Երևանի Հովհ. Շիրազի անվան N 169 դպրոցը, կառուցվելու է կաթսայատուն։ Գործադիրը հաստատել է նաև Գյումրի քաղաքի Մուշ-2 թաղամասի նոր դպրոցի կառուցման աշխատանքի ձեռքբերման մրցույթի արդյունքը` 1 մլրդ 980 մլն 492 հազար 175 դրամ պայմանագրային արժեքով մրցույթի հաղթող ճանաչելով համատեղ գործունեության պայմանագրով «Ախուրյանի Կոոպշին», «Մ և ԱԱ», «Ռուսլան Համբարյան» ՍՊ, «Անդրեաս և ընկերներ» ՓԲ ընկերությունները։
Կառավարությունն իր նախկին որոշումներից մեկում կատարել է լրացում, որով նախատեսվում է շինարարական (վերակառուցման, հիմնանորոգման, ուժեղացման) աշխատանքի կատարողական փաստաթղթերի կազմմանը մասնակից դարձնել նաև տվյալ օբյեկտը շահագործող կազմակերպության ներկայացուցչին։ Շահագրգիռ անձի ներկայությունը լրացուցիչ հնարավորություն է տալիս ապահովելու պատշաճ հսկողություն, ինչը կնպաստի կատարվելիք շիննորոգման աշխատանքի որակի բարձրացմանը։ Հաջորդ որոշմամբ շահագործող կազմակերպության ներկայացուցիչը հնարավորություն է ստանում մասնակցելու նախագծանախահաշվային ճարտարապետաշինարարական փաստաթղթերի և շինարարական աշխատանքների գնման առարկայի բնութագրերի կազմմանը։ Որոշումը նաև նպատակ ունի մեծացնել գնահատող հանձնաժողովների պատասխանատվությունը, կարգավորել գնման հայտերի մերժմանը հաջորդող գործընթացը։
Կառավարության ընդունած մեկ այլ որոշում միտված է քաղաքաշինության ոլորտի գործարար միջավայրի բարելավմանն ուղղված նախկին որոշման պահանջների կատարմանը, այն է` տեխնիկական պայմանների տրամադրման ժամկետների տարբերակմանն ըստ նախատեսվող շինօբյեկտների ռիսկայնության աստիճանի։ Կոռուպցիոն ռիսկերի նվազեցման և կառուցապատման ընթացակարգերի վերաբերյալ հանրամատչելի տեղեկատվության ապահովման նպատակով 500-ական օրինակ տպաքանակով հրատարակվելու են «Կառուցապատողի ուղեցույցը» և միասնական ճարտարապետական լուծումներով միջավայրի ձևավորմանն ուղղված կատալոգը։
Կարդիականացվի «Ավիացիայի մասին» ՀՀ օրենքը

ՀՀ կառավարությունը հավանություն է տվել «Ավիացիայի մասին» ՀՀ օրենքում լրացումներ և փոփոխություններ կատարելու օրենքի նախագծին, որը պայմանավորված է քաղաքացիական ավիացիայի բնագավառում կատարված ուսումնասիրության և առաջացած գործնական խնդիրների լուծման, ինչպես նաև «Ավիացիայի մասին» ՀՀ օրենքն արդի պահանջներին համապատասխանեցնելու, ՀՀ միջազգային պայմանագրերից բխող նոր պահանջները ՀՀ քաղավիացիայի բնագավառում ներդնելու և կիրառելու անհրաժեշտությամբ։
Կառավարության հավանությունն է ստացել «Ճանապարհային երթևեկության անվտանգության ապահովման մասին» ՀՀ օրենքում լրացումներ և փոփոխություններ կատարելու օրինագիծը, որի ընդունմամբ կապահովվեն լիզինգի պայմանագրով վարձակալության իրավունքի պետական գրանցման գործընթացում լիզինգառուների իրավական երաշխիքները։
Գործադիրը հավանություն է տվել «ՀՀ քրեական օրենսգրքում» փոփոխություններ և լրացումներ կատարելու օրենքի նախագծին, որի շնորհիվ կբարձրանա թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառության, ինչպես նաև ապօրինի ծառահատման դեմ պայքարի արդյունավետությունը։
Իր նիստում կառավարությունը քննության է առել ՀՀ Ազգային ժողովի մի խումբ պատգամավորների` օրենսդրական նախաձեռնության կարգով ներկայացրած «Աուդիտորական գործունեության մասին» ՀՀ օրենքում լրացումներ կատարելու օրենքի նախագիծը, որը բովանդակում է աուդիտ իրականացնող անձանց արտոնագրման պայմաններն ու պահանջները և պատասխանատվության միջոցներն էականորեն խստացնելու դրույթներ, որոնց գործադիրը պատրաստ է անդրադառնալ մեկ տարի անց։ Արձանագրելով այս իրողությունը, կառավարությունը պատրաստակամություն է հայտնել նախագիծը լրամշակելու հարցում համագործակցել հեղինակների հետ։ Նիստում քննարկվել է «Սևանա լճի մասին» ՀՀ օրենքում լրացում կատարելու օրինագիծը, որն օրենսդրական նախաձեռնության կարգով ներկայացրել են ԱԺ մի խումբ պատգամավորներ։ Կառավարությունը նույնպես մտահոգված է Սևանա լճի էկոհամակարգի պահպանման խնդրով և արել է համապատասխան առաջարկություն, որն ընդունելու դեպքում ընդունելի կհամարի օրենքի նախագիծը։
Վերը նշված օրենքների նախագծերը և ՀՀ կառավարության եզրակացությունները սահմանված կարգով կներկայացնեն ՀՀ Ազգային ժողով։

Այլ որոշումներ

Գործադիրը հավանություն է տվել Դանիայի Թագավորությունում ՀՀ դեսպանություն ստեղծելու ՀՀ նախագահի հրամանագրի նախագծին։ Դանիայում դեսպանություն բացելը բխում է այդ երկրում Հայաստանի շահերի առավել ծանրակշիռ ներկայացվածություն ապահովելու, հատկապես երկկողմ առևտրատնտեսական կապերը սերտացնելու անհրաժեշտությունից։
Իր որոշմամբ կառավարությունը սահմանել է, որ 2011 թ. օգոստոսի 13-21-ը կայանալիք 5-րդ համահայկական խաղերին մասնակցելու նպատակով Հայաստան ժամանող օտարերկրյա քաղաքացիներն ազատվում են մուտքի արտոնագրի տրամադրման համար նախատեսված պետական տուրքի վճարումից։
Կառավարությունն ընդունել է Լոռու մարզի Ալավերդու քաղաքային համայնքի ղեկավարի լիազորությունները վաղաժամկետ դադարեցնելու, համայնքի ղեկավարի և Շիրակի մարզի Լեռնագյուղի գյուղական համայնքի ավագանու անդամների արտահերթ ընտրություններ նշանակելու, անցկացնելու և ընտրությունների նախապատրաստման ու անցկացման ծախսերը ֆինանսավորելու որոշումներ։
Կառավարությունն իր նիստում Գեղարքունիքի մարզի Ձորավանքի գյուղական համայնքի հողերի օգտագործման ժամանակավոր սխեմայում կատարել է փոփոխություն՝ փոքր հիդրոէլեկտրակայանի և օժանդակ կառույցների շինարարության համար։
Գործադիրը «Էկոպրոտեկտ» ՍՊԸ-ին տվել է վտանգավոր թափոնների վերամշակման, վնասազերծման, պահպանման, փոխադրման և տեղադրման արտոնագիր։
Կառավարությունը պարտադիր զինվորական ծառայության զորակոչից տարկետում է տվել չորս անձի։
Ս.թ. հուլիսի 28-ից իր դիմումի համաձայն ազատելով Լոռու նախկին մարզպետին` կառավարությունը որոշել է Արթուր Նալբանդյանին նշանակել Լոռու մարզպետ։ Տիգրան Սարգսյանը, դրական բնութագրելով Արթուր Նալբանդյանի աշխատանքային գործունեությունը, շնորհավորել է նորանշանակ մարզպետին, նրան մաղթել արդյունավետ աշխատանք։

Հուլիսի 30-ին, 31-ին և օգոստոսի 1-ին Հայաստանում գրանցվելու է 40 աստիճան շոգ,  այսօր լրագրողների հետ հանդիպմանը հայտարարեց Հայպետհիդրոմետ ծառայության օպերատիվ հիդրոօդերևութաբանական կանխատեսումների կենտրոնի պետ Զարուհի Պետրոսյանը` հավելելով որ այս ամառվա ամենաշոգ օրերն են։

Ըստ նրա՝ դա և դրանից ավելին արդեն համարվում է վտանգավոր, ինչը կարող է հիմք հանդիսանալ, որ կառավարության որոշմամբ` համապատասխան գերատեսչություններ փակվեն, և այդ օրերը ոչ աշխատանքային հայտարարվեն:

Ըստ Զարուհի Պետրոսյանի` Հայաստանում 40 աստիճանից ավելի գրանցվել է միայն երկու անգամ, վերջինը 43 աստիճան՝ 2002-ին, սակայն եղանակային այլ շեղումներ ևս դիտարկվել են։

«Մեծացել է կարկուտի չափը»,- հավելեց Պետրոսյանը` նշելով, որ դա կարող է պայմանավորված լինել նախկինում կիրառվող հակակարկտային կայանների արդյունավետությամբ, սակայն նման պաշտոնական հայտարարության համար համապատասխան ուսումնասիրություն է անհրաժեշտ։

Պետրոսյանը խորհուրդ տվեց կրել ճերմակ կամ բաց գույնի հագուստ, քիչ շարժվել, օգտագործել շատ հեղուկ և հնարավորինս խուսափել արևի ուղղահայաց ճառագայթներից։

«Ադրբեջանական լրատվամիջոցների համար սովորույթ է դարձել տեղեկություններ տարածել, թե իբր հայկական կողմից արձակած կրակի հետևանքով զոհվել կամ վիրավորվել է ադրբեջանցի քաղաքացիական կամ զինվորական անձ»,- այպես է արձագանքել ՀՀ պաշտպանության նախարարի մամուլի քարտուղար Դավիթ Կարապետյանը ադրբեջանական նոր տեղեկատվությանը: Ըստ դրա` ադրբեջանական կողմում 22-ամյա կին է վիրավորվել :

«Ադրբեջանական լրատվամիջոցները ճիշտ կանեին, եթե հրապարակեին Ադրբեջանի կողմից հրադադարի ռեժիմի խախտման վիճակագրությունը, որը ամիս առ ամիս կտրուկ աճ է արձանագրում և պատճառում նորանոր վնասներ: Օրինակ, բոլորովին վերջերս` հուլիսի 26-ին, ժամը 18.20-ին Հայաստանի զինված ուժերի պայմանագրային զինծառայողներ Կարեն Ղուկասյանը (ծնված` 1976թ.) և Մանվել Վանեսյանը (ծնված` 1987թ.), գտնվելով Տավուշի մարզի սահմանային մարտական դիրքերից մեկում, ադրբեջանական կողմի կրակահերթի հետևանքով մարտական հենակետի բետոնե պատի բեկորների անդրադարձից ստացել են մարմնական վնասվածքներ:

Հայկական կողմը շարունակում է պահպանել հրադադարի ռեժիմը և միայն ծայրահեղ անհրաժեշտության դեպքում է պատասխան գործողությունների դիմում: Եթե Ադրբեջանի կողմից հրադադարի ռեժիմը խախտելու դեպքում հայկական կողմի պատասխան գործողությունների հետևանքով տուժում է Ադրբեջանի որևէ քաղաքացի, ապա դրա ողջ պատասխանատվությունն ընկնում է Ադրբեջանի վրա: Ի դեպ, ադրբեջանական կողմը կարող է նաև դիմել միջազգային համապատասխան կառույցին` հետաքննություն իրականացնելու համար»,-ասված է ՀՀ ՊՆ մամլո հաղորդագրության մեջ:

Սույն թվականի հունիսի 2-ին ձեռնադրված հոգևորականները, ավարտելով իրենց քառասնօրյա պահեցողության շրջանը, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ ծառայության են կոչվել Հայաստանյայց Առաքելական Ս. Եկեղեցու տարբեր թեմերում և Մայր Աթոռի կառույցներում:

Օգոստոսի 1-ից Տ. Մերուժան քահանա Սողոյանը հոգևոր իր ծառայությունն է իրականացնելու Գուգարաց թեմում, Տ. Կոմիտաս քահանա Տիգրանյանը` Սյունյաց թեմում, Տ. Ստեփանոս քահանա Հովհաննիսյանը` Երևանի Սբ. Գրիգոր Լուսավորիչ մայր եկեղեցում:  Տ. Զաքարիա քահանա Անանյանը և Տ. Սիմեոն քահանա Մովսիսյանը կսպասավորեն ՀՀ Զինված Ուժերի հոգևոր առաջնորդությունում, իսկ Տ. Թովմա աբեղա Խաչատրյանը և Տ. Համբարձում աբեղա Արաբյանը կշարունակեն իրենց ծառայությունը Մայր Աթոռ Ս. Էջմիածնում:

Կառավարության այսօրվա նիստում գործադիրը որոշեց Լոռու մարզպետ նշանակել Ալավերդու նախկին քաղաքապետ Արթուր Նալբանդյանին: Նա երկու անգամ ընտրվել է Ալավերդու քաղաքապետ և, ըստ վարչապետ Տիգրան Սարգսյանի, վայելում է քաղաքի բնակիչների հարգանքը: «Այսօր էլ մեր մոնիտորինգը ցույց է տալիս, որ պարոն Նալբանդյանը մեր լավագույն քաղաքապետերից է: Կատարողականները բարվոք են, և նա կարող է իր վրա վերցնել ծանր խնդիրների լուծումը, նաև բնակչությունն է գոհ: Նա իր աշխատանքով ապացուցել է, որ կարող է մարդկանց համախմբել իր շուրջ, և դա հույս է ներշնչում, որ կարող է կատարել նաև մարզպետի պատասխանատու աշխատանքը»,- ասաց գործադիրի ղեկավարը:

Ավելի վաղ տեղեկացվել էր, որ հունիսի 14-ին կառավարությունը Լոռու մարզպետին ազատել է աշխատանքից, սակայն որոշումն ի կատար կածվի օգոստոսի 12-ից` մարզպետի արձակուրդից վերադառնալուց հետո: Սակայն այսօր կառավարությունը վերանայեց իր այդ որոշումը եւ Քոչարյանին աշխատանքից ազատեցին հուլիսի 28-ից:

Հուլիսի 27-ին ՀՀ սփյուռքի նախարարի տեղակալ Ստեփան Պետրոսյանն ընդունեց իրաքահայ համայնքի Ազգային կենտրոնական վարչության ատենապետ Պարույր Հակոբյանին, Բաղդատի Ազգային մանկապարտեզի տնօրեն Անահիտ Թուրաբյանին եւ մի խումբ իրաքահայ ուսուցիչների, որոնք Հայաստանում են գտնվում սփյուռքահայ ուսուցիչների վերապատրաստման ծրագրի շրջանակներում:

Ողջունելով հյուրերին` ՀՀ սփյուռքի նախարարի տեղակալը կարեւորեց իրաքահայ ուսուցիչների մասնակցությունը սփյուռքահայ ուսուցիչների վերապատրաստման ծրագրին:

Հանդիպման ընթացքում քննարկվեցին Իրաքի հայ համայնքի կրթական, մշակութային, երիտասարդության հիմնախնդիրներին առնչվող հարցեր: Ս.Պետրոսյանը նշեց, որ ՀՀ սփյուռքի նախարարությունը հատուկ ուշադրություն է դարձնում Իրաքի հայ համայնքի հիմնախնդիրներին եւ բազմաթիվ ծրագրեր է իրականացնում դրանց լուծման նպատակով: Նա ընդգծեց նաեւ Հայաստանում բնակվող իրաքահայերի ինտեգրման կարեւորությունը` նշելով այդ ուղղությամբ ՀՀ սփյուռքի նախարարության կողմից իրականացվող քայլերը:

Անդրադառնալով երիտասարդության դերակատարությանը Հայաստան-Սփյուռք գործակցության զարգացման գործում` Ս.Պետրոսյանն ուրախությամբ նշեց, որ ՀՀ սփյուռքի նախարարության «Արի տուն» ծրագրին այս տարի առաջին անգամ մասնակցում է տասնմեկ իրաքահայ երիտասարդ:

Նախագահ Սերժ Սարգսյանն այսօր ընդունել է «Հանիել գրուպ» ընկերության պատվիրակությանը, որի կազմում ընդգրկված են «Եվրոդրեսս», «Հեսս Նատուռ», «ՎԿՍ» և հայաստանյան «ՎԿՍ Արմենիա» մասնաճյուղերի ներկայացուցիչները:

Նախագահը ողջունել է «Հանիել գրուպ»-ի գործունեությունը մեր երկրում, նշելով, որ օրեր առաջ է ներկա գտնվել ընկերության Ամասիայի նորակառույց կարի ֆաբրիկայի բացման արարողությանը և կարևորում է ինչպես մայրաքաղաքում, այնպես էլ մարզերում ներդրումային ծրագրերի իրագործումը: Հանրապետության ղեկավարն ընդգծել է, որ պետական քաղաքականության շրջանակում գործարար միջավայրի բարելավման և ներդրումների խրախուսման ուղղությամբ զգալի աշխատանք է իրականացվել, և այսուհետ էլ երկրի տնտեսության զարգացմանն ու նոր աշխատատեղերի բացմանն ուղղված այդ քաղաքականությունը շարունակվելու է:

Երկուստեք հեռանկարային են համարվել Հայաստանում տեքստիլ արդյունաբերության ոլորտում ներդրումները, կարևորվել է մասնագետների վերապատրաստման, որակավորման բարձրացման ուղղությամբ աշխատանքը: Նախագահ Սերժ Սարգսյանը և «Հանիել գրուպ» ընկերության ներկայացուցիչները քննարկել են տեքստիլ արդյունաբերության ոլորտում համաշխարհային շուկայում տեղի ունեցող ներկա զարգացումներն ու կառուցվածքային տեղաշարժերը, դիտարկել` Հայաստանի շուկայական դիրքավորման հնարավորությունները:

«Հանիել գրուպ»-ի ներկայացուցիչները շնորհակալություն են հայտնել Հանրապետության ղեկավարին` մեր երկրում իրենց ծրագրերին աջակցության պատրաստակամության համար և ընդգծել, որ ընկերությունը Հայաստանում համագործակցության և առաջընթացի ամուր հիմքեր է տեսնում, որը հեռանկարային զարգացման ծրագրերի իրագործման լավ հնարավորություն է:

Կառավարությունում այսօր տեղի է ունեցել Հայաստանի Հանրապետության փոքր և միջին ձեռնարկատիրության զարգացման խորհրդի անդրանիկ նիստը` վարչապետ, խորհրդի նախագահ Տիգրան Սարգսյանի գլխավորությամբ: Խորհրդի կազմում ընդգրկվել են պետական մարմինների, գործարար համայնքի, միջազգային կազմակերպությունների, ինչպես նաև  ոլորտի շահերը ներկայացնող հասարակական կազմակերպությունների ներկայացուցիչներ:

Ողջունելով ներկաներին` Տիգրան Սարգսյանը նշել է. «Փոքր և միջին բիզնեսի զարգացումը մեզ համար ունի տնտեսական, քաղաքական և սոցիալական լուրջ բովանդակություն: Հայաստանի Հանրապետության կառավարության համար փոքր և միջին բիզնեսի զարգացումը մշտապես դիտարկվել է որպես գերակա խնդիր: Այս 3 տարիների ընթացքում մենք ձեռնարկել ենք միջոցառումներ, որոնց նպատակն է եղել ստեղծել բարենպաստ պայմաններ փոքր և միջին բիզնեսի զարգացման համար: Փոքր և միջին բիզնեսի զարգացումը նաև նպատակ ունի ստեղծել Հայաստանի Հանրապետությունում միջին խավ, որը կունենա էական դերակատարություն քաղաքական, տնտեսական բարեփոխումների համար: Գաղտնիք չէ, որ հենց միջին խավն է, որ հանդիսանում է ցանկացած հասարակության կարևորագույն շարժիչ ուժը: Մարդիկ, ովքեր պատասխանատվություն են ստանձնում իրենց տնտեսական ապագայի համար, ինքնուրույնաբար կայացնում են տնտեսական որոշումներ և հանդիսանում են պատասխանատու քաղաքացի երկրի համար: Համաշխարհային փորձը ցույց է տալիս, որ բարեփոխումների հիմնական շարժիչ ուժը եղել է և մնում է միջին խավը: Քաղաքացիական հասարակության ձևավորման տեսակետից նույնպես մենք գտնում ենք, որ առանց փոքր և միջին բիզնեսի հնարավոր չէ ունենալ լուրջ հաջողություններ: Չնայած այն միջոցառումների, որ իրականացվել են վերջին 3 տարիների ընթացքում, դեռևս առկա են բազմաթիվ խնդիրներ, խոչընդոտներ փոքր և միջին բիզնեսի զարգացման համար և համագործակցության այս ձևաչափը, որ մենք ստեղծում ենք, հնարավորություն է տալու մեզ մշտապես լինելով երկխոսության մեջ, ժամանակին բացահայտել խնդիրները և գտնել լուծումներ այդ խնդիրներին, ընդ որում, այնպիսի լուծումներ, որոնք ընդունելի լինեն նաև փոքր և միջին բիզնեսի համար: Մենք ձեզ հետ միասին պետք է ձևավորենք աշխատանքների օրակարգ, մշտապես այդ օրակարգը պետք է թարմացվի առաջին հերթին փոքր և միջին բիզնեսի ներկայացուցիչների կողմից:

Մի կողմից` մենք պետք է հստակ պատկերացնենք այն ռազմավարությունը, որն ընկած է լինելու մեր քաղաքականության ներքո և այդ ռազմավարությունը պետք է անպայման ձեզ հետ համաձայնեցված լինի, հասկանալի: Մյուս կողմից` այդ ռազմավարությունն իրականացնելու ընթացքում մենք պետք է կարողանանք օպերատիվ հարցեր քննարկել ձեզ հետ, և այդ օպերատիվ հարցերը մեզ հնարավորություն են տալու պատկերացնել, թե իրական իրավիճակն ինչպիսին է և ինչ հոգսերով են ապրում փոքր և միջին բիզնեսի ներկայացուցիչները: Համագործակցության այսպիսի ձևաչափեր` խորհուրդներ, մենք ունենք մի քանի ոլորտներում` տեղեկատվական տեխնոլոգիաների, բիզնես-միջավայրի բարելավման և այլն, և այսպիսի ձևաչափերն իրենց արդարացնում են: Այն հանգամանքը, որ խորհուրդը ղեկավարում է Հայաստանի Հանրապետության վարչապետը, հնարավորություն է տալիս որոշ խնդիրներ լուծելու համար օպերատիվ ձևավորել միջգերատեսչական աշխատանքային խմբեր, տալ հստակ հանձնարարականներ, այդ միջգերատեսչական աշխատանքային խմբերում ընդգրկել նաև բիզնեսի ներկայացուցիչներին, որպեսզի լուծումները լինեն հավասարակշռված և հաշվի առնեն բոլորի շահերը:

Հաշվի առնելով, որ այս դրական փորձն առկա է, համոզված եմ, որ նաև մեր նորաստեղծ` փոքր և միջին բիզնեսի զարգացման հարցերով զբաղվող խորհուրդը դրական արդյունքներ կտա: Ցանկանում եմ շնորհակալություն հայտնել խորհրդի անդամներին, որոնք ներկայացնում են ոչ պետական հատվածը, որ համաձայնվել են ընդգրկվել խորհրդի կազմի մեջ և մեզ հետ միասին կատարել այս չափազանց կարևոր և պատասխանատու առաքելությունը»,- ասել է Տիգրան Սարգսյանը:

Անցնելով օրակարագային հարցերին` խորհուրդը հաստատել է իր աշխատակարգը և կառուցվածքը, ապա խորհրդի քարտուղար, ՀՀ էկոնոմիկայի նախարարի առաջին տեղակալ Կարինե Մինասյանը ներկայացրել է խորհրդի գործարար համայնքը ներկայացնող անդամներին:

Այնուհետև խորհրդի անդամները բարձրացրել են ոլորտին առնչվող մի քանի մի շարք խնդիրներ, որոնց վերաբերյալ տրվել են պարզաբանումներ` համապատասխան գերատեսչությունների կողմից:

Ամփոփելով խորհրդի առաջին նիստի աշխատանքները` վարչապետն ընդգծել է, որ ակնկալվում է խորհրդի անդամների ակտիվ աշխատանքը: «Մեզ համար չափազանց կարևոր է, որպեսզի մեր քննարկումներն այս ձևաչափով չսահմանափակվեն: Մեր  քննարկումների ոգին և տրամաբանությունը դուք պետք է փոխանցեք ձեր կազմակերպությունների անդամներին, շահագրգիռ այլ մարմիներին, քանի որ լրջագույն խնդիր է տեղեկատվության ներկայացումը: Շատ հաճախ մենք տեսնում ենք, որ մարդիկ տեղեկացված չեն այս կամ այն նորմի, օրենքի վերաբերյալ: Ուստի խորհուրդը լինելու է այն խողովակը, որի  միջոցով շահագրգիռ մարմիններն ու  անձինք տեղյակ կպահվեն նորմատիվային և այլ փոխությունների մասին»,— դիմելով ներկաներին` ասել է վարչապետը:

Նշենք, որ նախատեսվում է հիմնել խորհրդի կայքէջը և էլեկտրոնային հասցեն, որի միջոցով շահագրգիռ մարմինները հնարավորություն կունենան ներկայացնել իրենց մտահոգող խնդիրներն ու առաջարկությունները` փոքր և միջին ձեռնարկատիրության զարգացման նպատակով:

Վարչապետ Տիգրան Սարգսյանն այսօր ընդունել է «Հանիել գրուպ» ընկերության պատվիրակությանը, որի կազմում ընդգրկված էին ընկերության «Եվրոդրեսս», «Հեսս Նատուռ» և հայաստանյան «ՎԿՍ Արմենիա» մասնաճյուղերի ներկայացուցիչները:
Կառավարության ղեկավարը ողջունել է ընկերության գործունեությունը մեր երկրում` ընդգծելով, որ Հայաստանը շահագրգռված է ներդրող ընկերությունների համար բարենպաստ պայմանների ստեղծման հարցում:
Շնորհակալություն հայտնելով ընդունելության համար` հյուրերը վարչապետին են ներկայացրել «Հանիել գրուպ» ընկերության կողմից Հայաստանում իրականացվող ծրագրերի ընթացքը, ինչպես նաև անդրադարձել հետագա անելիքներին: Մասնավորապես, քննարկվել են թեթև արդյունաբերության ոլորտում ներդրումային նոր ծրագրերի իրականացման հեռանկարները:
Ընկերության ներկայացուցիչները բարձր են գնահատել մարդկային ներուժի դերը ծրագրերի արդյունավետ իրականացման գործում: Այդ համատեքստում կարևորվել է մասնագետների վերապատրաստման ուղղությամբ քայլերի ձեռնարկումը:

«Հանիել գրուպ» ընկերությունը Հայաստանում ներդրումներ է իրականացնում «ՎԿՍ Արմենիա» ՍՊԸ-ի միջոցով: Մեր երկրում ընկերության գործունեությունն իրականացվում է եվրոպական չափանիշների հիման վրա, ունի որակյալ մասնագետներ և ապահովված է ժամանակակից տեխնոլոգիաներով: «ՎԿՍ Արմենիա» ՍՊԸ-ի հիմնական արտադրաշուկան Երևանն է, ինչպես նաև Վանաձորը: Ընկերության մասնաճյուղ է բացվել նաև Ամասիա քաղաքում: