Հայաստանի ոստիկանապետ, ոստիկանության գեներալ-լեյտենանտ Ալիկ Սարգսյանը հրաման է ստորագրել ոստիկանության գնդապետ Արսեն Գալստյանին  Ճանապարհային ոստիկանության պետի պաշտոնում նշանակելու մասին:

Ոստիկանապետի մեկ այլ հրամանով Արսեն Գալստյանն ազատվել է ոստիկանության ներքին զորքերի N զորամասի հրամանատարի պաշտոնից:

Մեր ունեցած տեղեղեկություններով, ՃՈ –ի պետի թեկնածուի փնտրտուքը շարունակվում է, օրեր առաջ ամենահավանականը համարվում էր Քանաքեռի ՄՌՈՒ –ի պետի` նշանակումը սակայն այսօր շրջանառվում է մեկ այլ վարկած` ի թիվս այլոց հավանական է համարվում ՄՀՈՋ-ի վետերանների միության նախագահ Գրիշա Սարգսյանի(Ժարիտ Գրիշ) նշանակումը:

«Հազարամյակի մարտահրավեր» հիմնադրամ — Հայաստան ՊՈԱԿ-ի գլխավոր գործադիր տնօրեն Արա Հովսեփյանն ասուլիս  էր հրավիրել`ամփոփելու 2006 թվականից մինչ այսօր հիմնադրամի կատարած աշխատանքները, խոսելու դրանց  արդյունավետության և ծրագրի ավարտի մասին:

Նա տեղեկացրեց, որ օգոստոսի 31-ի դրությամբ՝ ծրագրով 146 միլիոն դոլար է ծախսվել, նախատեսվում է ևս 30 միլիոն դոլարի ծախս, և սա շինարարական ծախսերի համար նորմալ կարգ է:
Հովսեփյանը նախ նշեց, որ վերջերս Նոյեբերյանի պոմպակայանի բացմամբ, որին  մասնակացեց նաև Սերժ Սարգսյանը,մեկնարկեց ավարտական փուլի բացումների շարքը:

Ըստ Հովսեփյանի իրականացվել է ծրագրի 90  տոկոսից ավելին, մնում է հինգ-վեց տոկոս շինարարական աշխատանքները, որոնք կհասցնեն ավարտին:

Արա Հովսեփյանը նաև ասաց, որ «Հազարամյակի մարտահրավեր» հիմնադրամի ծրագրի շրջանակներում` վեց մայր-ջրանցքներ են վերանորոգվել, թեև այս պահին ոռոգում չի իրականացվում, բայց ամեն ինչ պատրաստ է դրա համար:

Հաջորդ ծրագիրը, որ իրականացվել է հինգ ինքնահոս ջրանցքների վերականգնումն է և նորերի կառուցումը:

Մյուս ծրագիրը, որի մասին խոսվեց. Արարատյան դաշտավայրի դրենաժային (մաքրման) համակարգի աշխատանքներն են, որոնք դարձյալ իրականացվել են:

Ծրագրերից մեկն էլ , երրորդ կարգի ջրանցքների վերականգնումն է:

Ամամենամեծ ծրագիրը` 17 պոմպակայանների վերականգնումն է՝ հարակից բոլոր պահանջված աշխատանքներով, ինչպես նաև 61 պոմպեր տեղադրումը:
Հարցին, թե` հարևան Վրաստանը երկրորդ գրանտը ստացավ ՀՄՀ-ից, իսկ Հայաստանի ֆինանսավորումը 2009-ին մասնակիորեն կասեցվեց, Ձեր կարծիքով, ի՞նչն է պատճառը, Արա Հովսեփյանն ասաց. «Հայաստանի ֆինանսավորումը կասեցվել է մասամբ, այլ ոչ թե ամբողջությամբ դադարեցվել, գյուղական ճանապարհների վերականգնման ֆինանսավորման մասին է խոսքը, այսինքն՝ ծրագրի մեկ քառորդը կասեցվեց: Իսկ Վրաստանը, որքանով ես տեղյակ եմ, պաշտոնապես չի ստացել ֆինանսավորում, այլ ներկայացվել է, բայց ֆինանսավորում չի տրամադրվել: Առհասարակ առաջին և երկրորդ ծրագրերի հետ կապ գոյություն չունի, շարունակություն չի լինում, այսինքն, մինչև չավարտվի առաջինի իրականացումը, չի լինի երկրորդը»:

Հովսեփյանը տեղեկացրեց, նաև, որ նոյեմբեր-դեկտեմբերին մեր երկրի ինդիկատորների աղյուսակները կկազմվեն, և, եթե մենք բավարարել ենք մեր ծրագիրի իրականացումը` ապա հնարավորություն կունենանք նաև դիմել արդեն երկրորդ ծրագրի համար:

Նախագահ Սերժ Սարգսյանն այսօր այցելել է ՀՀ արտակարգ իրավիճակների նախարարություն (ԱԻՆ), ներկա գտնվել՝ Հայաստանում արտակարգ իրավիճակների համակարգի կազմավորման 20-ամյա հոբելյանին և արտակարգ իրավիճակների աշխատողի օրվան նվիրված տոնական շքերթին և շնորհավորել համակարգի բոլոր աշխատողներին՝ մասնագիտական տոնի առթիվ:

ՀՀ նախագահի հրամանագրով ՀՀ արտակարգ իրավիճակների նախարարության Հայաստանի փրկարար ծառայության տնօրենի տեղակալ Աստվածատուր Պետրոսյանը տոնի առթիվ պարգևատրվել է «Հայրենիքին մատուցած ծառայությունների համար» 1-ին աստիճանի մեդալով, իսկ համակարգում ներդրած անձնական մեծ ավանդի համար «Քաղաքացիական պաշտպանություն առանց սահմանների» ոչ կառավարական կազմակերպության նախագահ, ֆրանսիացի հրշեջ-փրկարար Բերնար Ժաննինը՝ Պատվո շքանշանով:

ՀՀ արտակարգ իրավիճակների նախարարությունում Նախագահ Սերժ Սարգսյանին ներկայացվել է ռադիոմոդեմային հեռակառավարվող գազագեներատորային շարժական կայանը, որը կիրառելի է կարկտի դեմ պայքարի, մառախուղի և ցածր ամպամածության ցրման, ինչպես նաև հորդառատ ու երկարատև տեղումների դադարեցման աշխատանքներում: Հատուկ փրկարարական ջոկատը ներկայացրել է ցուցադրական վարժանքներ:

Նախագահն այցելել է նաև նախարարության նորաբաց ճգնաժամային կառավարման կենտրոն և 911 ծառայության սրահ, որտեղ ներկայացվել են արտակարգ իրավիճակների կառավարման հնարավորությունները՝ ծրագրային արդիական լուծումներով:

Երկրի ղեկավարը ծանոթացել է նաև նախարարության նոր կառուցվող իննը հարկանի շենքի համար նախատեսվող աշխատանքային պայմաններին:

Մայրաքաղաքի արտաքին տեսքով մտահոգված քաղաքապետարանի չինովնիկներին զարմանալիորեն չի հետաքրքրում, որ «Տաշիր» առևտրի կենտրոնի հարևանությամբ, ավելին` ավտոկանգառի դիմաց` մայթերը փակել են ձմերուկի կույտերը: Դրանց շուրջ թափթփված է զանազան ծածկոցներ ու հնամաշ առարկաներ, որոնք, տհաճ են, եթե ոչ հակահիգենիկ: Քանի որ ձմերուկ վաճառողները մնում են մինչև կեսգիշեր,այստեղ մի ամբողջ «տնտեսություն» են ստեղծել: Եթե պայքար է փողոցային առևտրի դեմ, ուրեմն բոլորի նկատմամբ հավասար վերաբերմունք է պետք:

Սակայն զարմանալի է, որ քաղաքապետարանը չի տեսնում, կամ չտեսնելու է տալիս փողոցային առևտրի այս տեսակը.տեսնես ո՞ւմ է պատկանում ձմերուկի բիզնեսը, որ հայտնվել է այսպիսի արտոնյալ վիճակում, Երևանի կենտրոնի մայթերը անպատիժ ու անարգել վերածելով արևելյան շուկայի:

Սեպտեմբերի 2-ին տեղի ունեցած մամուլի ասուլիսին «Սարդարապատ» նախաձեռնող խմբի անդամ, կինոռեժիսոր Տիգրան Խզմալյանի խոսքը դառնացած էր. «Այն, ինչ այսօր ունենք մենք, չանկախացած եւ անկախանալու հնարավորությունները կորցնող 20-ամյա պետություն է։ Դա անհրաժեշտ է հասկանալ, որովհետեւ եթե չհասկանանք, որ անկախ չենք, չենք կարող անկախանալ։ Այդ է պատճառը, որ այսօր մենք պետք է նշենք ոչ թե անկախության 20-ամյակը, այլ չանկախացման տարելիցը»:

Կինոռեժիսորի համոզմամբ, Հայաստանն անկախություն ձեռք բերելուց 20 տարի անց էլ շարունակում է մնալ սեփական բռնակալների գաղութը:

«Հայաստանի Հանրապետության 20-ամյա անկախությունը նման է բանակում խոշտանգված, նվաստացված ու ծեծված 20-ամյա պատանու, կամ արյան, ցավի ու արցունքի մեջ լքված 20-ամյա երիտասարդ կնոջ, ով չի կարող ծննդաբերել, քանի դեռ բժշկուհին բուրդ է չփխում»,- ասաց Խզմալյանը:

Խզմալյանը սկզբունքորեն դեմ է  իշխանությունների հետ ցանկացած համագործակցությանը. ի նկատի ունենալով կոալիցիա-ՀԱԿ երկխոսությունն, ասաց. « Կուզեք երկխոսություն ասեք, կուզեք`բանավեճ, քծնանքը  ծառայում է միայն եւ միայն իշխանությունների ամրապնդմանը։ Համակարգափոխության հասնելու համար քաղաքացիական անհնազանդություն, բարոյական անհանդուրժողականություն է անհրաժեշտ»:

Ըստ նրա` «Հայաստանի անկախ պետությունում 20 տարի անց էլ տիրում է կոմսոմոլ-ԿԳԲ-ական պահպանված եւ ոչ մի կերպ չկործանվող մնացորդը։ Մենք գիտակցում ենք, որ մեր պետականության համար ամենամեծ վտանգը ոչ ադրբեջանական սպառնալիքներն են, ոչ էլ թուրքական շրջափակումը, այլ նախեւառաջ տեղական բռնապետերը։ Հայաստանը մի քանի կլանների համար սեփական հարստացման աղբյուր է։ Իր անկախության 20 տարիներին Հայաստանը ոչ այլ ինչ է, եթե ոչ իրենց իշխանություն հռչակած մի քանի կլանների կողմից զավթված տարածք»:

Խզմալյանը պատմեց, թե իրեն երկու շաբաթ առաջ Լոնդոնից, «Բի Բի Սի» ընկերությունից զանգահարել են՝ անկախության քսանամյակի արդյունքների մասին հարցազրույց վերցնելու նպատակով. «Ես պատասխանի ընթացքում հասկացա, որ գոնե Հայաստանում Խորհրդային Միությունը չի կործանվել, կամ գոնե չի կործանվել նրա ժառանգությունը»:

Հայաստանի ԿԳ նախարար Արմեն Աշոտյանը սեպտեմբերի 1-ի եւ Գիտելիքի օրվա կապակցությամբ շնորհավորական խոսք է ուղղել աշակերտներին, ուսանողներին, ուսուցիչներին.

«Սիրելի’ դպրոցականներ, ուսանողներ, մանկավարժներ, կրթության բնագավառի ներկայացուցիչներ,

Շնորհավորում եմ Ձեզ սեպտեմբերի մեկի` նոր ուսումնական տարվա  եւ Գիտելիքի օրվա կապակցությամբ:

Այսօր մեկնարկում է անկախ Հայաստանի 20-րդ ուսումնական տարին, եւ լավագույն առիթն է ընձեռված` մեկ անգամ եւս հետ նայել, արձանագրել ձեռքբերումներն ու բացթողումները եւ հաստատակամորեն քայլել առաջ:

Կրթության բնագավառում իրականացվող բարեփոխումներն իրենց հիմքում երկու հիմնական միտումներ ունեն` դիմակայելով համաշխարհային տեղեկատվական հոսքերին ու համահարթեցմանը` պահպանել մեր ազգային ինքնությունն ու ամուր պահել ազգային դպրոցի հիմքերը եւ լինելով եվրոպական ընդհանուր կրթական տարածքի մաս` ապահովել Հայաստանի կրթական համակարգի զարգացումը, մրցունակությունն ու միջազգայնացումը: Այս գործընթացներում հաջողության հասնելու գրավականը մեզանից յուրաքանչյուրի նվիրումն ու հետեւողական աշխատանքն է:

Ժամանակակից աշխարհում տնտեսության եւ հասարակության զարգացման անկյունաքարը դարձել է գիտելիքը: Մեր երկիրը եւս պետականորեն որդեգրել է այդ մոտեցումը, եւ արդեն առկա են դրա վառ օրինակները: Մեր` կրթության ոլորտի ներկայացուցիչների խնդիրն է դառնում նպաստել գիտելիքի վերարժեւորմանն ու հասարակական գիտակցության մեջ դրա արմատավորմանը:

Յուրաքանչյուր մեկնարկ լի է հույսերով եւ ակնկալիքներով: Ցանկանում եմ, որ այս նոր ուսումնական տարում իրականություն դառնան յուրաքանչյուրիս նպատակները` ի շահ մեր ընտանիքների ու մեր երիտասարդ պետության:

Մեկ անգամ եւս շնորհավորելով Հայաստանի, Արցախի եւ Սփյուռքի բոլոր դպրոցականներին, ուսանողներին, մանկավարժներին, դասախոսներին, կրթության բնագավառի բոլոր ներկայացուցիչներին նոր ուսումնական տարվա  ու Գիտելիքի օրվա կապակցությամբ` մաղթում եմ նորանոր ձեռքբերումներ եւ նվաճումներ»:

Այսօր ՀՀ կառավարության նիստից հետո, ինչպես միշտ  ՀՀ ոստիկանապետ Ալիկ Սարգսյանը դուրս եկավ կենտրոնական մուտքից և հայտնվեց լրագրողների և քաղաքացիների շրջափակման մեջ: Շենքի մոտ հավաքված քաղաքացիներից մեկը գոռաց` «Ամոթ»:

Ալիկ Սարգսյանի երկխոսությունը մարդկանց հետ սկսեց հարցից ` «Ինչի՞` ամոթ», և մոտեցավ մարդկանց ու սկսեց զրուցել նրանց հետ:

Նախ որևէ կանխատեսում չցանկացավ անել ՀՀ Ճանապարհային ոստիկանության պետ, առանձնակի խոշոր հափշտակումների մեջ մեղադրվող Մարգար Օհանյանի ձերբակալության վերաբերյալ. «Այս պահին, գիտեք, Մարգար Օհանյանը ձերբակալված է, քննություն է կատարվում, ես որևիցէ բան մեկնաբանել, կանխատեսել չեմ կարող»:

Ոստիկանապետը կտրականապես հերքեց շրջանառվող լուրերը, թե` ինքը համատեղ բիզնես ունի Օհանյանի հետ. «Ես երբեք նրա հետ բիզնեսով չեմ զբաղվել, թե էդ ովքե՞ր են նման բաներ հորինել չգիտեմ»,-ասել է նա:

Հարցին, թե արդյո՞ք նախորդ շաբաթ ՀՀ նախագահի նստավայրում կայացած դատաիրավական համակարգի ղեկավարների հետ հանդիպման ժամանակ Սերժ Սարգսյանը հրահանգել է «մաքրել շրջապատը», ՀՀ ոստիկանապետն ասաց.

«Ոչ, էդպիսի կոչ ինձ չի եղել, ես իմ գործը գիտեմ, հատուկ կոչեր պետք չեն, էդ կոչը հնչել է շատ վաղուց, երբ հայտարարվեց պայքար էս երևույթի դեմ: Ես իմ գործը նորմալ կատարում եմ այս պահին: Նման դեպքերում ես նույնիսկ ընկերոջ չեմ խնայի, նույնիսկ բարեկամի, ոչ մեկ իրավունք չունի դրանով զբաղվելու, չեմ խնայի ու չեմ խնայելու հետո, թող բոլորն իմանան, թող իրանց նորմալ պահեն: Էսօր երկրում էն վիճակն է, որ դրանով զբաղվելը իսկական հանցագործություն է և քրեորեն պատժելի արարք»:

Նա ասաց, որ դժվարանում է ճանապարհային ոստիկանության նոր պետի ընտրության հարցում.այս պահին կադրերի ընտրություն է կատարվում, 8-10 թեկնածուի անձնական գործերը մանրամասն ուսումնասիրվում են: Հաշված օրերի ընթացքում նշանակումը կլինի. «Աշխատելու եմ ընտրել մարդ, որը կիրականացնի իր վրա դրված իսկական գործառույթները և ուրիշ ոչինչ: Ճանապարհային ոստիկանությունը կլինի իմ անմիջական հսկողության տակ. ճանապարհային ոստիկանության նոր պետը մի քիչ այլ ստատուսով հանդես կգա այսուհետ` մշտապես համազգեստով, մշտապես ծառայության կողքին և ուղղակի կզբաղվի ճանապարհային ոստիկանության ծառայության որակի բարձրացման գործով»:

Ոստիկանապետը հավատացրեց նաև իր հրաժարականի վերաբերյալ մամուլում շրջանառվող տեղեկություններին, երբեք լուրջ չի վերաբերել նման, բայց եթե նախկինում դրանց հումորով էր վերաբերում, ապա ներկայումս` անտարբերությամբ. «Չգիտեմ ինչից հետո եք եզրակացնում, որ ամեն պահի, նշանակման օրիցս ուղիղ 3 օրից հետո խոսում եք իմ հրաժարականի մասին: Հասկանում եմ` այս ամենի հետեւում ինչ-որ ուժեր կան, ինչ-որ մարդիկ կան, որ փորձում են ավելորդ տրամադրություն ստեղծել առաջինը` մեր համակարգում, եւ հետո` հասարակության շրջանում»: Նա կարծում է որ «ինչ որ մութ ուժեր, որոնք ներքին կարգով դավեր են նյութում», չեն կարող ոչնչի հասնել.  հանրապետության ղեկավարությունը պետք է որոշի իր պաշտոնանակման հարցը: «իմ հեղինակությունը փորձում են ինչ-որ կերպ խաթարել, սակայն ես կարծում եմ` դրանով չի իմ հեղինությունը խաթարվելու, հրաժարական տալը դեռեւս մարդու հեղինակության մասին չի խոսում», — համոզված է Ալիկ Սարգսյանը:

Հայաստանի Ոստիկանությունում սեպտեմբերի 1-ին հաղորդագրություն է ստացվել, որ քաղաքի կենտրոնում ռումբ է տեղադրված։Առավոտյան ժամը 07:00-ի սահմաններում ոստիկանություն ահազանգ է ստացվել, որ Օպերայի եւ բալետի թատրոնում ռումբ է տեղադրված։ Ժամը 9-ի դրությամբ պարզվել է, որ ահազանգը կեղծ է։ Հանգամանքները պարզվում են։

Երևանի քաղաքապետ Կարեն Կարապետյանը սեպտեմբերի 1–ի առիթով շնորհավորական ուղերձ է հղել.

«Սիրելի՜ դպրոցականներ, մանկավարժներ ու ծնողներ,

Շնորհավորում եմ բոլորիդ Գիտելիքի և դպրության օրվա կապակցությամբ։
Կրթության հազարամյա պատմություն ունեցող մեր ժողովուրդը առանձնահատուկ հոգատարություն ունի դպրոցի և ուսուցչի հանդեպ։ Գիտելիքի և կրթության ձգտումը հայի ազգային բնավորության բաղկացուցիչն է, երկրի զարգացման ու հզորացման կարևորագույն գրավականը։

Այսօր գիտելիքն ու կրթությունը ամենաթանկ կապիտալն ու մարդկային առաջընթացի ամենակարևոր նախապայմաններն են։ Պետության վաղվա օրը երաշխավորված է, եթե հասարակությունը կրթված է։ Մենք բոլորս քաղաքացիական բարձր պատասխանատվություն ունենք մասնակցելու հայրենասեր, բանիմաց ու կիրթ հասարակության կայացմանը։

Սիրելի՜ դպրոցականներ, այս հանդիսավոր օրը ողջունելով բոլորիդ, լիահույս եմ, որ ուսման մեջ ունեցած ձեռքբերումներով ու հաջողություններով դուք կկառուցեք մեր վաղվա օրը, մեր երկրի ապագան։

Սիրելի՜ մանկավարժներ, ծնողներ, շնորհավորում եմ Ձեզ և շնորհակալություն հայտնում՝ Հայաստանի վաղվա քաղաքացուն դաստիարակելու պատասխանատու առաքելությունը պատվով կատարելու համար»: