Տավուշի մարզում հոկտեմբերի 2-ի երեկոյան տեղի ունեցած խոշոր սողանքի գոտում ստեղծվել է ՀՀ ԱԻՆ օպերատիվ շտաբ` ԱԻ նախարար Արմեն Երիցյանի գլխավորությամբ:

Քիչ առաջ ԱԻՆ օպերատիվ շտաբից տեղեկություն ստացվեց, որ շտապ անհրաժեշտ է գտնել սողանքային գոտում հայտնված մեծ, կցորդով բեռնատարների (фуры) վարորդներին:

ԱԻՆ օպերատիվ շտաբը խնդրում է վերոնշյալ վարորդներին և բոլոր նրանց, ովքեր գիտեն նրանց գտնվելու վայրը կամ ունեն որևէ տեղեկություն սողանքային գոտում հայտնված մեծ, կցորդով բեռնատարների (фуры) վարորդների վերաբերյալ, շտապ զանգահարել ՀՀ ԱԻՆ ճգնաժամային կառավարման կենտրոնում գործող թեժ գծի հեռախոսահամարներով` 911, 010-52-96-90 , 010-36-02-97 , 060­44­02­38:

Երկօրյա պետական այցով, հոկտեմբերի 6-ին, Հայաստան կժամանի Ֆրանսիայի նախագահ Նիկոլա Սարկոզին:

Նախագահի մամուլի գրասենյակից  հայտնում են, որ այցի շրջանակներում Ֆրանսիայի նախագահը հանդիպումներ կունենա նախագահ Սերժ Սարգսյանի, Գարեգին Բ կաթողիկոսի հետ, կայցելի Մեծ եղեռնի հուշահամալիր եւ հարգանքի տուրք կմատուցի Հայոց ցեղասպանության զոհերի հիշատակին:

Երեւանում Նիկոլա Սարկոզին Սերժ Սարգսյանի հետ միասին կմասնակցի նաեւ Շառլ Ազնավուրի տուն-թանգարանի բացմանը, ներկա կգտնվի Օգյուստ Ռոդենի հեղինակած Ժյուլ Բաստիեն Լըպաժի արձանի նվիրաբերության արարողությանը:

Քանդակը Ֆրանսիայի Հանրապետության նվերն է Հայաստանի Հանրապետությանը:

Այսօր Սևանից մայրաքաղաք եկող միկրոավտոբուսները ժամը 13:00-ից հետո չեն աշխատել. «Արդեն մեկ շաբաթ է`  էս վիճակն է», — ասաց ավտոկայանի դիմաց կանգնած մի երիտասարդ, հետո մեկնաբանեց`  «դե միտինգներ են»: Ի դեպ, շատ հետաքրքիր կլիներ լսել կոնկրետ Սևան – Երևան գծատիրոջ`ԱԱԾ նախկին պետ Կառլոս Պետրոսյանի եղբոր որդու`  ԱԺ նախկին պատգամավոր Խաչիկ Պետրոսյանի և էլի Սևանցի մի գործարարի` ոմն Սմբատյանի որդու մեկնաբանություններն իրենց  «գծի» աշխատանքի վերաբերյալ:

Չնայած դատելով Ճանապարհային ոստիկանության ակտիվությունից` կարելի է եզրակացնել, որ այդ գործառույթը նրանց է վստահված. սեպտեմբերի 30 -ից ՀԱԿ-ի հանրահավաքներին մարդկանց մասնակցությունը խոչնդոտելու համար  արգելում է մարզային տրանսպորտի մուտքը մայրաքաղաք, իսկ ավելի կոնկրետ` Գեղարքունիքից ժամը 13.00-ից հետո որևէ հասարակական տրանսպորտ Երևան չի մտնում: Լոռու և Շիրակի մարզերից էլ ազգաբնակչությանը լավագույն դեպքում հասցնում են Աշտարակ:

Ազգային ժողովի  այսօրվա նիստին  պատգամավորներից ոմանք չէին կարողանում գրանցվել` քարտերից օգտվել չկարողանալու պատճառով:

Այդ իսկ պատճառով Ազգային Ժողովի  նախագահ Հովիկ Աբրահամյանը ՀՀԿ-ական  պատգամավոր Տիգրան Արզաքանցյանին խորհուրդ  է տվեց գրանցվել կարողանալու համար նիստերին հաճախ մասնակցել` ասելով. «Պարոն Արզաքանցյան, դրա համար խորհրդարանի նիստերին շուտ-շուտ եկեք»:

ԼՂՀ իշխանությունների հետ նախօրոք ձեռք բերված պայմանավորվածության համաձայն’ այսօր ԵԱՀԿ առաքելությունը Լեռնային Ղարաբաղի և Ադրբեջանի զինված ուժերի շփման գծի պլանային դիտարկում է անցկացրել Մարտակերտի ուղությամբ:
ԼՂՀ Պաշտպանության բանակի դիրքերից դիտարկումն իրականացրել են ԵԱՀԿ գործող նախագահի անձնական ներկայացուցչի (ԳՆԱՆ) դաշտային օգնականներ Անթալ Հերդիչը (Հունգարիա), Ուիլյամ Պրայորը (Մեծ Բրիտանիա) և բարձր մակարդակի պլանավորման Խմբի ներկայացուցիչ Մայքլ Օ’Քոննորը (Իռլանդիա):

Շփման գծի հակառակ կողմից դիտարկման խմբում էին ԵԱՀԿ գրասենյակի համակարգող Իմրե Պալատինուսը (Հունգարիա), ԳՆԱՆ դաշտային օգնական Խրիստո Խրիստովը (Բուլղարիա), ինչպես նաև բարձր մակարդակի պլանավորման Խմբի ներկայացուցիչ Վլադիմիր Ռեզնիկովը (Ռուսաստանի Դաշնություն):

ԼՂՀ ԱԳՆ-ից հայտնում են, որ դիտարկումն անցել է ըստ նախատեսված ժամանակացույցի: Դիտարկման ընթացքում կրակի դադարեցման ռեժիմի խախտումներ չեն արձանագրվել:

Դիտարկման առաքելությանը ղարաբաղյան կողմից ուղեկցել են ԼՂՀ Արտաքին գործերի նախարարության և Պաշտպանության նախարարության ներկայացուցիչները

Հոկտեմբերի 3-ին, Մայր Աթոռ Սուրբ Էջմիածնում, Գարեգին Բ Ամենայն Հայոց Կաթողիկոսն ընդունել է ՀՀ-ում Լիբանանի Հանրապետության գործերի ժամանակավոր հավատարմատար Զիադ Աթթալային:

Զրույցի ընթացքում անդրադառնալով Հայաստան-Լիբանան հարաբերություններին` Վեհափառ Հայրապետը գոհունակությամբ նշել է, որ դրանք մշտապես աչքի են ընկել իրենց առանձնահատկությամբ:

Իր հերթին, Լիբանանի ժամանակավոր հավատարմատարը հավաստիացրեցլ է, որ ամեն ջանք գործադրելու է երկու երկրների հարաբերությունների առավել սերտացման և ամրապնդման, ինչպես նաև տնտեսական համագործակցության առավել զարգացման ուղղությամբ: Խոսելով Լիբանանի կառուցման գործում լիբանանահայերի մեծ վաստակի մասին` Աթթալան հատկապես կարևորել է հայության գործուն մասնակցությունը Լիբանանի տնտեսական կյանքում:

Վարչապետ Տիգրան Սարգսյանն այսօր ընդունել է «Հազարամյակի մարտահրավեր» կորպորացիայի (ՀՄԿ) ՀՄՀ ծրագրերի իրականացման հարցերով փոխնախագահ Փաթրիք Ֆայնին: Հանդիպմանը ներկա էր նաև Հայաստանի Հանրապետությունում ԱՄՆ գործերի ժամանակավոր հավատարմատար Բրյուս Դոնահյուն:
Շնորհակալություն հայտնելով արդյունավետ համագործակցության համար` կառավարության ղեկավարը բարձր է գնահատել 2006 թ. սեպտեմբերից մեկնարկած «ՀՄՀ-Հայաստան» 5-ամյա ծրագրի ընթացքը և արդյունքները. «Այս ծրագրին առնչվել են հարյուր հազարավոր մարդիկ` շահառուներ, շինարարներ, կազմակերպիչներ, վարկատուներ, վարկառուներ, դասախոսներ: Այս ընթացքում մենք հանդիպել ենք շահառուների այս բոլոր խմբերին, և բոլորի կողմից տեսել ենք դրական վերաբերմունք ծրագրի նկատմամբ: Ցանկանում եմ Հայաստանի Հանրապետության կառավարության անունից շնորհակալություն հայտնել ԱՄՆ մեր գործընկերներին այս օժանդակության համար: Մենք բարձր ենք գնահատում դա և լի ենք համագործակցությունը շարունակելու վճռականությամբ, կանենք ամեն ինչ, որ Հայաստանի Հանրապետության չափանիշները համապատասխանեն «Հազարամյակի մարտահրավեր» կորպորացիայի չափանիշներին»: Վարչապետը, մասնավորապես, գոհունակությամբ է խոսել ծրագրի շրջանակում ոռոգման ենթակառուցվածքների վերականգնման ու հզորացման, գյուղատնտեսության զարգացման և ֆերմերների վերապատրաստման ուղղությամբ իրականացված աշխատանքների մասին և կարևորել ծրագրի դերը նոր մտածողության ձևավորման գործում:
Իր հերթին Փաթրիք Ֆայնը նշել է, որ առաջին անգամ է մեր երկրում և տպավորված է Հայաստանով: Նա շնորհակալություն է հայտնել վարչապետին ՀՀ կառավարության կողմից կատարված լավ աշխատանքի համար և փոխանցել «ՀՄՀ-Հայաստան» 5-ամյա ծրագրի արդյունքների վերաբերյալ թվային ու բովանդակային տվյալներ պարունակող ձեռնարկ (հայերեն և անգլերեն): Նա ընդգծել է, որ ձեռնարկը «Հազարամյակի մարտահրավեր» կորպորացիայի պորտֆելի 25 երկրների շարքում ծրագրի արդյունքները ներկայացնող լավագույն օրինակն է, ինչը վկայում է Հայաստանում աշխատած թիմի կարողությունների մասին:
Զրուցակիցները քննարկել են «ՀՄՀ-Հայաստան» ծրագրի շարունակականության հեռանկարները: Այդ համատեքստում ՀՄՀ ծրագրերի իրականացման հարցերով փոխնախագահը նշել է, որ ծրագրի շարունակության կարևոր գործոններ են առաջին ծրագրի արդյունքները և երկրի համապատասխանությունը «Հազարամյակի մարտահրավեր» կորպորացիայի կողմից միջազգայնորեն ընդունված ցուցանիշներին, ինչպիսիք են տնտեսական ազատությունները, արդարացի կառավարումը, ժողովրդի համար կատարվող ներդրումները և կոռուպցիայի վերահսկումը:
Քննարկվող հարցի առնչությամբ Տիգրան Սարգսյանը ներկայացրել է ՀՀ կառավարության գերակայությունները: Նա ընդգծել է, որ Հայաստանում կոռուպցիայի հաղթահարման և ժողովրդավարական արժեքների ներդրման կարևոր գործոնը միջին խավի ձևավորումն է և այդ գործում կարևորել «ՀՄՀ-Հայաստան» ծրագրի նշանակությունը: Շահառու ֆերմերները, կառավարության ղեկավարի դիտարկմամբ, գոհ են ծրագրի ընթացքից, որքանով այն նրանց հնարավորություն է ընձեռել ճանաչել իրենց իրավունքներն ու հնարավորությունները, ինչպես նաև ավելացնել սեփական եկամուտները:
Անդրադառնալով կոռուպցիայի դեմ պայքարի ուղղությամբ ՀՀ կառավարության ձեռնարկած քայլերին` վարչապետ Սարգսյանը տեղեկացրել է, որ 2012 թ. հունվարի 1-ից կգործի նոր օրենք, համաձայն որի` 500 պաշտոնատար անձինք պետք է հրապարակային հայտարարագրեր ներկայացնեն գույքի, եկամուտների և իրենց փոխկապակցված անձանց մասին: Նա նաև կարևորել է պաշտոնատար անձանց էթիկայի հանձնաժողովի ձևավորումը, որը պետք է ստուգման առարկա դարձնի բարձրաստիճան պաշտոնատար անձանց գույքի վերաբերյալ տեղեկությունները։ Ըստ Տիգրան Սարգսյանի` հասարակության նման վերահսկողությունը կնպաստի պաշտոնատար անձանց գործունեության հրապարակայնությանն ու թափանցիկությանը, արդյունքում` կոռուպցիոն ռիսկերի նվազեցմանը:
Հանդիպման ավարտին կողմերը փոխադարձաբար շնորհակալություն են հայտնել արդյունավետ համագործակցության համար և բարձր գնահատել ծրագրի իրականացման գործում ներգրավված բոլոր շահագրգիռ կողմերի, պետական գերատեսչությունների, ինչպես նաև ՀՄԿ հայաստանյան գրասենյակի թիմի աշխատանքը:

***
Հնգամյա ծրագրի շրջանակում (2006 թ. սեպտեմբեր – 2011 թ. սեպտեմբեր) «ՀՄՀ-Հայաստանը» նպաստել է Հայաստանի շուրջ 350 համայնքներում բնակվող ավելի քան 420 հազար գյուղաբնակ շահառուների կենսամակարդակի բարելավմանը` վերականգնելով ոռոգման մայր ջրանցքների վնասված հատվածներ, մի շարք պոմպակայաններ, կառուցելով ոռոգման ինքնահոս համակարգեր և երրորդ կարգի ջրանցքներ, վերականգնելով Արարատյան հարթավայրի դրենաժային համակարգի որոշ հատվածներ: Վերապատրաստվել է շուրջ 45 հազար ֆերմեր, տեխնիկական աջակցություն է տրամադրվել ջուր մատակարարող կառույցներին: Ընդհանուր առմամբ «Հազարամյակի մարտահրավեր կորպորացիայի» կողմից Հայաստանի ոռոգման և գյուղատնտեսության բնագավառներում կատարվել է շուրջ 177 մլն ԱՄՆ դոլարի ներդրում:

Հոկտեմբերի 2-ին Տավուշի մարզում տեղի ունեցած սողանքի գոտում որոնողական աշխատանքները շարունակվում են: Չնայած պատահարի հենց առաջին ժամերից դեպքի վայրում են գտնվել նաև Պաշտպանության նախարարության և մասնավոր ընկերությունների տրամադրած քարշակներն ու այլ ծանր տեխնիկան, մինչև հիմա, եղանակային պայմանների և սողանքային գոտու շարունակվող ակտիվության պատճառով, փրկարարներն ու կամավորներն աշխատել են բացառապես ձեռքի ուժով` բահերի և այլ փրկարարական գործիքների օգնությամբ:

Ինչպես տեղեկանում ենք ԱԻՆ կայքից, ներկայումս մշակվում են տարբերակներ` որոնողական աշխատանքներում ինժեներական ծանր տեխնիկա կամ օդուժ ներգրավելու համար: Բանակցություններ են վարվում հողազանգվածի տակ հայտնված մեքենաները «Հարավկովկասյան երկաթուղու» կռունկների և Պաշտպանության նախարարության ուղղաթիռների օգնությամբ դուրս բերելու վերաբերյալ:

Ներկա դրությամբ սողանքային գոտին բաժանված է 5 տեղամասի, որտեղ աշխատում են տարբեր մարզերից ներգրավված փրկարարներ` մի քանի հերթափոխով:

Հիշեցնենք, որ հոկտեմբերի 2-ին, ժամը 19:03-ին M6 միջպետական մայրուղու 83-րդ կիլոմետրում` Վանաձոր-Բագրատաշեն հատվածում` Այրում երկաթուղային կայարանի կամրջի մոտ (Լճկաձոր գյուղի հատվածում) տեղի է ունեցել սողանք: 130 մ երկարությամբ և 60 մ բարձրությամբ հողազանգվածը լցվել է ավտոճանապարհին և այն ամբողջովին դարձրել անանցանելի:

ողազանգվածի տակ է մնացել տարբեր մակնիշի և բեռնատարողության ավտոմեքենա: Սողանքի փլվածքի տակ հայտնված 35 մեքենայից 24-ն է տեսանելի։

Անհետ կորած է համարվում 5 մարդ։

Հայաստանում Գերմանիայի դեսպան Հանս Յոհեն Շմիդտն  այսօր այցելել է Ազատության հրապարակ, որտեղ շուրջօրյա հանրահավաքներ է անցկացնում ՀԱԿ-ը: Նա հանդիպել է Հայաստանի առաջին նախագահ Լևոն Տեր-Պետրոսյանին:

Նախկինում ևս Գերմանիայի դեսպանն այցելել է ՀԱԿ-ի հանրահավաքներին, ինչը տարբեր մեկնաբանությունների առիթ էր տվել քաղաքական շրջանակներում:

Ուշագրավ է, որ օրերս Սիվիլիթաս հիմնադրամի կազմակերպած քննարկումների ժամանակ Հանս Յոհեն Շմիդտը հայտարարել էր, որ Հայաստանում ներկա բարդ իրավիճակը Լևոն Տեր-Պետրոսյանից ստացած ժառանգություն է:Ըստ նրա` այն գործընթացները, որոնք հանգեցրել են տնտեսության օլիգոպոլիզացման, ծնվել են հենց այն տարիների քաղաքականության արդյունքում:

«Ես հաճախ եմ Հայաստանի առաջին նախագահի հանրահավաքներում լսել, թե նա ինչպես ա է քննադատում բոլոր ընտրությունները եւ բոլոր իշխանություններին: Ես նրա խորհրդատուներից մեկին հարցրեցի, թե ինչ կասի այն ընտրությունների մասին, որոնց մասնակցել է Տեր-Պետրոսյանը, թե ինչ կասի 1994-97 թթ դեպքերի մասին, ինչին նա պատասխանեց, որ ես սխալ տեղեկություններ ունեմ: Այդուհանդերձ, պետք է այնքան անկեղծ լինել, որ ընդունել քննադատությունը»,- նշել է դեսպանը:

Սակայն այսօրվա նրանց զրույցը, ըստ ներկաների, ջերմ տպավորություն է թողել, թեև որոշ ականատեսներ էլ նշում են, որ ՀՀ առաջին նախագահը խիստ է խոսել դեսպանի հետ:

Հայաստանի պաշտպանության նախարար Սեյրան Օհանյանը եռօրյա աշխատանքային այցով, սեպտեմբերի 29-ից հոկտեմբերի 1-ը, գտնվում էր Արցախում:

Ըստ ՊՆ մամուլի ծառայության`  այցի ընթացքում պաշտպանության նախարարը ԼՂՀ պաշտպանության բանակի հրամանատար Մովսես Հակոբյանի հետ այցելել է պաշտպանության բանակի կենտրոնական, հյուսիսարևելյան եւ հյուսիսային ուղղությամբ տեղակայված մի շարք զորամասեր եւ ստորաբաժանումներ: Շրջայցի ընթացքում Սեյրան Օհանյանը հանդիպումներ է ունեցել զինանձնակազմի հետ, այցելել հակամարտ զորքերի շփման գծի որոշ հատվածներ, հետաքրքրվել զինվորների մարտական և ծառայողական առօրյայով, ծանոթացել նրանց սոցիալ-կենցաղային պայմաններին:

Վերջին օրերին զինված ուժերի տարբեր ստորաբաժանումներ է այցելել պաշտպանության նախարարության և զինված ուժերի գլխավոր շտաբի ամբողջ ղեկավար կազմը` Զինվորական կարգապահության կտրուկ բարձրացմանը եւ արտակարգ դեպքերի ու պատահարների կանխարգելմանն ուղղված պաշտպանության նախարարի ցուցումները զինված ուժերի ողջ անձնակազմին հասցնելու համար:Պաշտպանության բանակում զինանձնակազմի հետ հանդիպումների ժամանակ պաշտպանության նախարարը նշել է, որ թեեւ բանակն իր առջեւ դրած մարտական խնդիրները գերազանց է կատարում, այդուհանդերձ մերթընդմերթ արձանագրվող արտակարգ պատահարները և արատավոր երևույթները փորձում են ստվերել բանակի հեղինակությունը: Նախարարը աններելի է համարել ոչ մարտական պայմաններում մարդկային կորուստները և նշել, որ արդարացված է հասարակության պահանջը, որ բանակում արատավոր երեւույթները պետք է հասցվեն նվազագույնի:

Պաշտպանության նախարարընշել է, որ. «Բոլոր հրամանատարները պետք է հասկանան, որ սա մեզ համար պատասխանատվության եւ պատվի հարց է: Զինվորական կարգապահությունը զորքերի մարտունակության ապահովման հիմնարար գործոններից է եւ մարտական ոգու հիմնաքարը»:

Նախարարի հավաստմամբ  անձնակազմի հետ աշխատանքները և արատսովոր երև ույթների դեմ պայքարը լինելու է զինված ուժերի ղեկավարության ամենօրյա ուշադրության կենտրոնում, որպեսզի հայկական բանակի հիմքում դրվեն այնպիսի արժեքներ, ինչպիսիք են մարդկային հարաբերությունների գերադասումը, հրամանատարի անձնական օրինակը, հավասար և արդար վերաբերմունքը զինվորի հանդեպ, բանակային ընկերականությունը եւ ամենակարեւորը` երիտասարդին բանակ ընդունել ծնողի հոգատարությամբ եւ կատարել նրա պարտականությունները: