Հայաստանի նախագահ Սերժ Սարգսյանն այսօր` հոկտեմբերի 18-ին, ընդունել է Լեհաստանի Ազգային անվտանգության բյուրոյի ղեկավար Ստանիսլավ Կոզեյին:

Նախագահի մամուլի գրասենյակից  հայտնում են, որ ընդգծելով, որ  վերջին տարիներին երկու երկրների միջեւ հարաբերությունները կանոնավոր զարգացում են ապրում, Սերժ Սարգսյանը նշել է, որ Հայաստանը խորապես շահագրգռված է երկու ժողովուրդների շահերից բխող այդ հարաբերությունները շարունակաբար զարգացնելու: «Մենք բարձր ենք գնահատում «Քաղաքացիական պլատֆորմ» կուսակցության տարած հաղթանակը խորհրդարանական ընտրություններում: Այդ առիթով, խնդրում եմ, շնորհավորանքներս փոխանցել նախագահ Կոմորովսկիին եւ վարչապետ Տուսկին: Պարոն նախագահի հետ այս տարի հանգամանորեն խոսել ենք մեր հարաբերությունների ապագայի մասին: Իսկ վարչապետ Տուսկի հետ վերջերս առիթ ունեցանք շփվելու Վարշավայում կայացած ԵՄ արեւելյան գործընկերության գագաթնաժողովի ժամանակ»,-ասել է Սերժ Սարգսյանը` նկատելով, որ երկկողմ շփումների հաճախականությունը եւ արդյունավետ քննարկումները նոր դինամիկա եւ բովանդակություն են հաղորդում երկկողմ հարաբերություններին:

Լեհաստանի Ազգային անվտանգության բյուրոյի ղեկավարը այցի շրջանակներում ՀՀ ազգային անվտանգության քարտուղարի հետ ունեցած քննարկումներն ու փոխայցելությունները համարել է արդյունավետ` նշելով, որ ձեռք են բերվել համագործակցության շատ որոշակի պայմանավորվածություններ: «Նախագահ Կոմորովսկին, ինչպես եւ Դուք`  շատ բարձր է գնահատում հայ-լեհական սերտ հարաբերությունները եւ խնդրել է եւս մեկ անգամ  իր   շնորհակալությունը փոխանցել Լեհաստանում կազմակերպված ԵՄ գագաթնաժողովին մասնակցության համար»,-ասել է Ստանիսլավ Կոզեյը եւ ընդգծել, որ իր երկիրը պատրաստակամ է զարգացնելու հարաբերությունները ինչպես երկկողմ, այնպես էլ Հայաստան-ԵՄ համագործակցության շրջանակներում` հնարավորինս օժանդակելով Հայաստանի բարեփոխումներին:

Այսօրվա ասուլիսի ժամանակ ՀՀԿ պատգամավոր Գագիկ Մելիքյանը կարծում է , որ ՀԱԿ-ը առաջիկայում հրաժարվելու է նախագահի հրաժարականի իր պահանջից։ Չտեսնելով ՀԱԿ-ի հետ համագործակցության եզրեր՝ Մելիքյանը չի բացառում, որ քաղաքականության ցանկացած համագործակցություն հնարավոր է, եթե այն կառուցողական լինի և բխի ժողովրդի շահերից:
Ըստ Մելիքյանի`առաջիկայում ձևավորվող խորհրդարանում կլինեն «Հանրապետական, Հանրապետական և կրկին Հանրապետական», նոր հետո միայն ԲՀԿ-ին, ՕԵԿ-ին, Դաշնակցությանը:
«Եթե ՀԱԿ-ը շատ ակտիվ աշխատի, կանցնի խորհրդարան, բայց չեմ կարծում, որ վերջին հանրահավաքային մարտավարությունը դա ակտիվություն էր, որը բոլորս էլ տեսանք՝ հարվածեց ՀԱԿ-ի վարկանիշին: Առհասարակ առողջ որակով ընդդիմությունը ինքը պայքարով պետք է գա իշխանության, ոչ թե մենք պետք է տանենք մեզ հետ»,- ավելացրեց Մելիքյանը՝ընդգծելով, որ լուրջ ընդդիմությունը մայրաքաղաքում պետք է հավաքեր գոնե 200 հազար մարդ.
Սակայն այս ամենն այնքան էլ արդյունավետ չէ. «ՀՀԿ-ն կարող է մարդ հավաքել, որ ՀԱԿ-ը գա ու միտինգ անի, բայց դա իմաստ չունի։ Ինչ վերաբերում է բազմաթիվ երիտասարդների՝ Ազատության հրապարակում ներկա գտնվելուն, ապա ասեմ, որ պարելը կապ չունի նստացույցի հետ»,-ասաց պատգամավորը:

Այսօր լրագրողների հետ հանդիպմանը Հայաստանի հավաքականի և Երևանի «Փյունիկի» գլխավոր մարզիչ Վարդան Մինասյանը, ամփոփելով ազգային հավաքականի ելույթները «Եվրո-2012»-ի ընտրական փուլում, ասաց, որ հավաքականի գլխավոր ձեռքբերումն ազգային հավաքականի երիտասարդներից ձևավորված կորիզ ունենալն է ևփորձը, որը տվեց ընտրական մրցաշարը:
Մինասյանն ընդհանուր առմամբ գոհ է վերջնական արդյունքից, սակայն Իռլանդիայի հետ խաղում գրանցված արդյունքը համարել գոհացուցիչ հնարավոր չէ: Ռուսաստանին և Իռլանդիային Հայաստանի հավաքականը զիջել է փորձով, իսկ խաղով լավագույնն է եղել, կարծում է Վարդան Մինասյանը:
Մեր հավաքականի համար ամեն ինչ դեռ առջևում է և 2014թ. աշխարհի առաջնության ընտրական մրցաշարում Հայաստանի խումբն ավելի ուժեղ է, քան Եվրո-2012-ի B ընտրական խումբը:
Դանիան ու Իտալիան արդեն նվաճել են Եվրոպայի առաջնության եզրափակիչ մրցաշարի ուղեգիր, իսկ Չեխիան կխաղա անցումային հանդիպումներում, Մալթան էլ Անդորայից ուժեղ է: Ըստ Մինասյանի`դա կարող է ավելի լավ լինել Հայաստանի համար, քանի որ ազգային հավաքականն այժմ ավելի փորձառու է:
2012թ. սեպտեմբերին մեկնարկելիք աշխարհի առաջնության ընտրական մրցաշարին ազգային հավաքականը կնախապատրաստվի չորս ընկերական հանդիպումներով, որոնք տեղի կունենան փետրվարին, մայիսին և օգոստոսին:

Հայաստանի նախագահ Սերժ Սարգսյանն այսօր` հոկտեմբերի 17-ին, հրամանագիր է ստորագրել դատավորներ նշանակելու մասին:
Նախագահի մամուլի գրասենյակից հայտնում են, որ ղեկավարվելով ՀՀ Սահմանադրության 55-րդ հոդվածի 11-րդ կետով եւ հիմք ընդունելով Արդարադատության խորհրդի 2011 թվականի սեպտեմբերի 30-ի եզրակացությունները, ՀՀ նախագահը որոշել է՝
Գագիկ Ավետիսյանին նշանակել Հայաստանի Հանրապետության վերաքննիչ քրեական դատարանի դատավոր` դադարեցնելով նրա` Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավորի լիազորությունները.
Կարինե Ղազարյանին նշանակել Հայաստանի Հանրապետության վերաքննիչ քրեական դատարանի դատավոր` դադարեցնելով նրա` Երեւան քաղաքի Շենգավիթ վարչական շրջանի ընդհանուր իրավասության դատարանի դատավորի լիա-զորությունները.
Էդուարդ Ամալյանին նշանակել Երեւան քաղաքի Ավան եւ Նոր Նորք վարչական շրջանների ընդհանուր իրավասության դատարանի դատավոր.
Ռուբեն Բունիաթյանին նշանակել Երեւան քաղաքի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր.
Սարգիս Երիցյանին նշանակել Հայաստանի Հանրապետության Լոռու մարզի ընդհանուր իրավասության դատարանի դատավոր.
Գայանե Խաչատրյանին նշանակել Երեւան քաղաքի Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր.
Լիլիթ Խաչատրյանին նշանակել Հայաստանի Հանրապետության Շիրակի մարզի ընդհանուր իրավասության դատարանի դատավոր.
Դավիթ Հարությունյանին նշանակել Երեւան քաղաքի Ավան եւ Նոր Նորք վարչական շրջանների ընդհանուր իրավասության դատարանի դատավոր.
Արթուր Մարգարյանին նշանակել Հայաստանի Հանրապետության Արագածոտնի մարզի ընդհանուր իրավասության դատարանի դատավոր.
Արմեն Չիչոյանին նշանակել Երեւան քաղաքի Շենգավիթ վարչական շրջանի ընդհանուր իրավասության դատարանի դատավոր.
Էդգար Սեդրակյանին նշանակել Հայաստանի Հանրապետության Կոտայքի մարզի ընդհանուր իրավասության դատարանի դատավոր:

«Մեր քաղաքը» քաղաքացիական նախաձեռնության անդամները,տեղեկացնում են որ Նալբանդյան 102 շենքի բակում այս պահին ակտիվորեն ընթանում են ավտոտնակների ապամոնտաժման և զուգահեռաբար՝ ծառահատման աշխատանքներ: «Նախաձեռնությունն» իր ֆեյսբուքային էջում տեղադրել է տեսանյութ, որում երևում է, թե ինչպես են կտրում խաղողի բազմամյա որթը:
Նյութը նրանք տեղադրել են նաև քաղաքապետ Կարեն Կարապետյանի էջում և սպասում են արձագանքի:
Հետաքրքիր է որ չնայած այսօր ժամը 15:30-ին Երևանի Կենտրոն և Նորք-Մարաշ ընդհանուր իրավասության դատարանում տեղի կունենա Սայաթ Նովա պողոտայի, Թումանյան, Նալբանդյան և Ավագ Պետրոսյան փողոցների բնակիչների հայցի քննությունն ընդդեմ բակի կառուցապատող «Ավագ Շին» ՍՊԸ-ի, աշխատանքները չեն դադարում:Այս ՍՊԸ-ն, ըստ նախաձեռնող խմբի, չունի ճարտարապետահատակագծային առաջադրանք, միջավայրի վրա ազդեցության փորձաքննության դրական եզրակացություն և մի շարք այլ անհրաժեշտ իրավական փաստաթղթեր, սակայն Նալբանդյան 106/1 հասցեում 2010 թվականից շինարարություն էր սկսել: Օրեր առաջ բակում վերսկսվել է բուռն աշխատանքներ և այսօրվա գործողություններից կարելի է եզրակացնել, որ կառուցապատող ընկերության համար առանձնապես կարևոր չէ թե ինչ վճիռ է լինելու, կամ էլ նախապես գիտեն, որ դա իրենց օգտին է լինելու, հանգիստ շարունակում է իր գործունեությունը:
Շրջակա շենքերի բնակիչները արդեն տևական ժամանակ է պահանջում են դադարեցնել ապօրինի շինարարական աշխատանքներն իրենց բակում և հիմնովին վերանայել քաղաքաշինական ծրագիրը:

Նախագահ Սերժ Սարգսյանի հոկտեմբերի 17-ի հրամանագրով Ավստրիայի Հանրապետությունում Հայաստանի Հանրապետության արտակարգ և լիազոր դեսպան Արման Կիրակոսյանը, համատեղության կարգով, նշանակվել է Վիեննայում Միավորված ազգերի կազմակերպության գրասենյակում և այլ միջազգային կազմակերպություններում Հայաստանի Հանրապետության մշտական ներկայացուցիչ։

Մարզերի բնակիչների բողոքի հիման վրա լրատվամիջոցները տարբեր հրապարակումներով անդրադարձել էին, Երևան-Գավառ-Երևան երթուղով ուղևորափոխադրում իրականացնող «Գավառտրանս» ընկերությանը, որը լիցենզիաների տրամադրման մրցույթում նշված երթուղու ուղետոմսի համար առաջարկել է 500 դրամ արժեք, շահել է մրցույթը, սակայն, փաստացի ուղևորափոխադրումներ է իրականացրել 1000 դրամով:

Հանձնաժողովը ուսումնասիրել է երթուղու գործունեությունը: Արդյունքում պարզվել է, որ «Գավառտրանս» ընկերությունը սպասարկում է ընդհանուր առմամբ 3 երթուղի՝ Երևան-Գավառ-Երևան (համար 303), Երևան-գ.Սարուխան-Երևան (hամար 313) և Գավառ-Երևան-Գավառ (համար 326): Ընդ որում, ընկերությունը պարտավորվել է 313 և 326 համարի երթուղիները սպասարկել 1000, իսկ Երևան-Գավառ-Երևան ուղղությունը՝ 500 դրամով, որն էլ ըստ էության հանդիսանում է բոլոր 3 երթուղիներից հիմնականը:
Հանձնաժողովը պարզել է, որ «Գավառտրանսը» ունի գերիշխող դիրք, քանի որ այն հանդիսանում է Գավառը և հարակից գյուղերը սպասարկող միակ երթուղին: Իր գործունեությամբ նա խոչընդոտել է առավել բարեխիղճ ընկերությունների մուտքը շուկա, քանի որ մրցութային փաթեթում առաջարկել է անհամեմատ ցածր գին, ինչն էլ մրցույթը շահելու հիմնական պատճառներից մեկն է հանդիսացել:
Փաստորեն, «Գավառ տրանսը» չի կատարել պայմանագրով նախատեսված իր պարտավորությունները և սպառողներին առաջարկել է ծառայությունների մատուցման այլ պայմաններ՝ ոտնահարելով նրանց իրավունքները:

ՏՄՊՊՀ դիտարկմամբ, տնտեսվարողի նման վարքագիծը գերիշխող դիրքի չարաշահում է, որի համար Հանձնաժողովի որոշմամբ ընկերության հանդեպ կիրառվում է 10 միլիոն դրամ տուգանք:

Հանձնաժողովը «Գավառտրանս» ընկերությանը հանձնարարեց հնգօրյա ժամկետում վերացնել խախտումը, «Երևան-Գավառ-Երևան երթուղու ուղևորներից գանձել 500 դրամ, հակառակ դեպքում հրաժարվել լիցենզիայից՝ հնարավորություն տալով այլ տնտեսվարողների աշխատել բարեխիղճ և օրենքի դաշտում:

Հ.Գ. Հետաքրքիր է, որ տարիներ շարունակ այս ընկերությունը ունենալով օլիգարխիկ տանիք տնավարի սպասարկել է մի հսկայական վարչական տարածք, զբաղեցնելով մենաշնորհային դիրք, սակայն չգիտես ինչու միայն հիմա է հանձնաժողովն անդրադառնում այս հարցին: Հարց է ծագում` տանի՞քն է դարձել խախուտ, թե անպայման պետք է դանակը ոսկորին հասնի, որ ազգաբնակչությունը բողոքի ու նոր հանձնաժողովը հասկանա, որ ստուգում է անհրաժեշտ ու պարզի ակնհայտը, ինչը «Գավառտրանսը» չի էլ թաքցրել` օրը ցերեկով հանգիստ սահմանել է իր ուզած գինը:

Սերժ Սարգսյանի հոկտեմբերի 17-ի հրամանագրով Վիգեն Սարգսյանն ազատվել է Հայաստանի Հանրապետության Նախագահի աշխատակազմի ղեկավարի տեղակալի պաշտոնից: Նախագահի մեկ այլ հրամանագրով Վիգեն Սարգսյանը նշանակվել է Հայաստանի Հանրապետության Նախագահի աշխատակազմի ղեկավար:

Սերժ Սարգսյանն այսօր հրավիրած խորհրդակցության ժամանակ աշխատակազմին ներկայացրել է նոր ղեկավարին և մաղթել հաջողություններ՝ վստահություն հայտնելով, որ Վիգեն Սարգսյանը կկարողանա հաջողությամբ իրականացնել իր առջև դրված խնդիրները և առավելագույնս արդյունավետ կազմակերպել աշխատակազմի գործունեությունը:

Զրպարտության և վիրավորանքի վերաբերյալ ՀՀ քաղաքացիական օրենսգրքի դրույթների հակասահմանադրականության խնդրով ՀՀ Սահմանադրական դատարան դիմած Մարդու իրավունքների պաշտպանը, ով էլ հենց ժամանակին  հեղինակել է այդ փաստաթուղթը
հայտարարել է, որ դիմումի նպատակը ոչ այնքան օրենքը հակասահմանադրական ճանաչելն է, որքան՝ այդ օրենքում հստակություն մտցնելը, ինչն ի զորու է անել Սահմանադրական դատարանը, «որը կօգնի և ազատ խոսքի, և անձի արժանապատվության հավասարակշռված պաշտպանությանը մեր երկրում»։

Կարեն Անդրեասյանն այս մասին խոսել է  «Արմենիա» հեռուստատեսության «Կիրակնօրյա ժամը» հաղորդմանը տված հարցազրույցում` նշելով. «այսինքն, անկախ Սահմանադրական դատարանի վերջնական որոշումից՝ ես վստահ եմ, որ այդ որոշումը կօգնի Հայաստանում ազատ խոսքի պաշտպանությանը»:
Հիշեցնելով, որ  ըստ Մարդու իրավունքների Եվրոպական դատարանի պաշտոնյան պետք է հանդուրժող լինի լրատվամիջոցներով իր նկատմամբ տարածվող քննադատության նկատմամբ, օմբուդսմենը վստահություն է հայտնել, որ եթե Սահմանադրական դատարանը որոշման մեջ կրկնի թեկուզ այն, ինչ ասել է Եվրոպական դատարանը, արդեն կլինի  մի լրացուցիչ քայլ առաջ:

ՄԻՊ-ի  դիտարկմամբ՝ օրենքում առկա անհստակություններն են թույլ տալիս դատարաններին կիրառել առավելագույն պատիժներ և եթե Սահմանադրական դատարանը, նույնիսկ մերժելով իր դիմումը գոնե հաստատի ևս մեկ անգամ, որ տուգանքները պետք է լինեն համաչափ, որ չի կարելի սննկացնել լրատվամիջոցին (ինչը նշված է  ՀՀ համապատասխան օրենքում), ազատ խոսքը վտանգված չի լինի:

«Յունիքորն Գրուպ» ընկերությունը 14 տարբեր ընկերություններից գովազդների պատվերներ էր ստացել, այդ վահանակներից 10 ապամոնտաժվել են նախօրեի գիշերը: «Յունիքորն Գրուպի» սեփականատեր Գուրգեն Արսենյանն դիմել է Վարչական դատարան` վիճարկելով Երեւանի քաղաքապետի որոշումը, որի հիման վրա ապամոնտաժվել են իր ընկերությանը պատկանող գովազդային վահանակները: Ըստ Արսենյանի Երեւանի քաղաքապետը իրենց 5 օր ժամանակ է տվել, որպեսզի ապամոնտաժեն Մաշտոցի պողոտայում գտնվող իր ընկերության գովազդային վահանակները` վարձակալության պայմանագրի բացակայության հիմքերով: Ավելի վաղ Երեւանի քաղաքապետարանը հայտնել էր, որ որոշել է Երեւանը մաքրել «ոչ էսթետիկ եւ քաղաքի տեսքը խաթարող» գովազդային վահանակներից:

Այդ դեպքում ի՞նչ կապ ունի վարձակալության պայմանագիրը, եթե նախապես որոշվել է, մի շարք ընկերությունների` մոտ 50 վահանակ ապամոնտաժելու Մաշտոցի պողոտայում, Ֆրանսիայի հրապարակից մինչեւ Բաղրամյան 1-2 հասցեներ եւ Տերյան խաչմերուկ:

Քաղաքապետարանը նոր պայմանագրով կարող էր և վահանակների տերերից պահանջել համապատասխան, մայրաքաղաքի տեսքը չխաթարող դիզայն և քաղաքի բյուջեն կլցվեր: Սակայն լավ մենեջեր Կարեն Կարապետյանը գերադասել է երրորդ վարկածը. «Յունիքորն Գրուպ» ընկերության ունեցվածքը ապամոնտաժվել է բարբարոսաբար` ոչնչացնելով, եռակցման սարքերի կիրառմամբ, ընկերության գույքին հասցվել է էական վնաս: Տարվել են անհայտ ուղղությամբ, կարող ենք դիտարկել, որ ինչ-որ մեկը որոշել է հափշտակել, ու՞ր է ընկերության գույքը»,- ասել է Արսենյանը: