Կառավարության այսօրվա նիստն սկսվեց 1999թ. հոկտեմբերի 27-ի ահաբեկչության զոհերի հիշատակին հարգանքի տուրք մատուցելով: Վարչապետ Տիգրան Սարգսյանը մեկ առ մեկ հիշեց բոլոր զոհերի անունները, կառավարության անդամները մեկ րոպե լռությամբ հարգեցին նրանց հիշատակը:

«Տասներկու տարի առաջ այս օրը տեղի ունեցավ մեր նորագույն պատմության ամենամեծ ողբերգություններից մեկը: Տեղի ունեցած ստոր ոճրագործության արդյունքում մենք կորցրեցինք պետականաշինության երախտավորներին»,- ասաց գործադիր մարմնի ղեկավարը:

Հայաստանի ԱԳ նախարար Էդվարդ Նալբանդյանը, հոկտեմբերի 27-ին, կմեկնի Լյուքսեմբուրգ:

ԱԳՆ մամուլի ծառայությունից հայտնում են, որ այցելության ընթացքում Էդվարդ Նալբանդյանը կստորագրի Հայաստանի եւ Եվրոպական Միության միջեւ «Շարժունակության շուրջ գործընկերության համատեղ հռչակագիրը»:

Հաջորդ օրը` հոկտեմբերի 28-ին,  նախարար Էդվարդ Նալբանդյանը աշխատանքային այցով կլինի Բեռլինում:

Հոկտեմբերի 29-ին Փարիզում նախարար Նալբանդյանը ելույթ կունենա ՅՈՒՆԵՍԿՕ-ի 33-րդ գլխավոր կոնֆերանսին:

ՀՀ նախագահ Սերժ Սարգսյանն այսօր ընդունել է Փարիզի քաղաքապետ, Ֆրանկոֆոն քաղաքապետերի միջազգային ասոցիացիայի նախագահ Բերտրան Դելանոեին:

Սարգսյանը ողջունել է Բերտրան Դելանոեին՝ Ֆրանկոֆոն քաղաքապետերի միջազգային ասոցիացիայի գլխավոր վեհաժողովի տարեկան նիստը Երևանում գումարելու և այն նախագահելու կապակցությամբ:

Հանրապետության ղեկավարը նշել է, որ Հայաստանը սիրով է հյուընկալել այս միջազգային կարևոր հանդիպումը, որը համախմբում է ամբողջ աշխարհի ֆրանկոֆոն երկրների մայրաքաղաքների մեծ թվով քաղաքապետերի, և որը վկայում է այն կարևորությունը, որ Հայաստանը տալիս է Ֆրանկոֆոնիայի անդամ պետությունների հետ միջմշակութային երկխոսությանն ու տնտեսական և մշակութային հարաբերությունների զարգացմանը:

Փարիզի քաղաքապետ, Ֆրանկոֆոն քաղաքապետերի միջազգային ասոցիացիայի նախագահ Բերտրան Դելանոեն շնորհակալություն է հայտնել ջերմ ընդունելության և վեհաժողովի նիստը Երևանում անցկացնելու հնարավորության համար:

Անդրադառնալով հայ-ֆրանսիական հարաբերություններին՝ զրուցակիցները նշել են, որ հատկապես վերջին մեկ ամսում իրականացված բարձր մակարդակի փոխայցելությունները և դրանց շրջանակներում կազմակերպված միջոցառումներն ավելի են ամրապնդել երկու երկրների միջև բարեկամության առանց այդ էլ ամուր հիմքերը:

«Չենք լռելու» երիտասարդական նախաձեռնության` բանակում առկա խնդիրները վերհանելու խումբը նախօրեին անակնկալ այցելել է Երևանին մերձակա սերժանտների պատրաստման ուսումնական զորամասերից մեկը:

Խմբի անդամները առանձնազրույցներ են ունեցել ժամկետային մի խումբ զինծառայողների հետ: Վերջիններս նշել են, որ զորամասում առկա են խտրականության դեպքեր` կապված ազատ արձակումների տրամադրման, ինչպես նաև վերակարգի նշանակման հետ: Մնացած առումներով զինվորները գոհ են եղել զորամասից: Զինվորականության մեջ առկա, այսպես կոչված, «արժեքային համակարգի» պատճառով տղաները խնդրել են որևէ տեղ չնշել իրենց անունը։

Նախաձեռնության հաղորդագրությունում նշվում է, որ զորամասի հրամանատարը, ով «բավականին պատշաճ մարդու տպավորություն է թողել», հայտարարել է, թե տեղյակ չէ խտրականության դեպքերի մասին` մեղքը գցելով ստորադաս սպաների վրա: «Չենք լռելու»-ն հորդորել է առավել աչալուրջ գտնվել իր ենթակաների հանդեպ` հիշեցնելով, որ, ամեն դեպքում, զորամասում առկա արատավոր երևույթների համար պատասխանատու է հրամանատարը, իսկ թերությունները նրա ուշադրության պակասի հետևանք են: Այցելության արդյունքների մասին հաղորդվել է պաշտպանության նախարարությանը: Նախաձեռնությունը որոշ ժամանակ անց ևս մեկ անգամ անսպասելիորեն կայցելի նույն զորամաս` տեսնելու փոփոխությունները:

«Հարկ է նշել նաև, որ նյութատեխնիկական հագեցվածության իմաստով որևէ թերություն զորամասում չի հայտնաբերվել, սակայն զինվորների միջև առկա խտրականությունը լուրջ խոչընդոտ է նորմալ բարոյահոգեբանական մթնոլորտի ձևավորման համար»,- ասվում է հաղորդագրությունում:

Այցելության ընթացքում «Չենք լռելու»-ի անդամներին ապշեցրել է Հայաստանի և Արցախի անջատ (առանց ազատագրված տարածքների) քարտեզների պատկերով ցուցատախտակը: Հրամանատարը խոստացել է շտապ ուղղել սխալը` ավելացնելով ազատագրված տարածքները:

«Հայտնում ենք նաև, որ նախաձեռնությունում գործող թեժ գծին զորամասերից մեկում ծառայողներից մեկի մայրը ահազանգել է, որ հրամանատարները` հղվելով գլխավոր շտաբի պետի հրամանի բացակայության վրա, թույլ չեն տալիս զինվորներին ձմեռային հանդերձանք կրել, ինչի պատճառով նրանք մրսում են: «Չենք լռելու»-ն այդ մասին անհապաղ հայտնել է ՊՆ-ին, որը լուծել է խնդիրը»,- նշում են նախաձեռնության անդամները:

Նախաձեռնությանը կոչ է անում բոլորին, ովքեր ունեն կոնկրետ տեղեկություններ բանակում առկա խնդիրների մասին, զանգահարել (055) 211-529 հեռախոսահամարով կամ գրել chenqlrelu@gmail.com էլեկտրոնային հասցեով:

«Չենք լռելու»-ն ևս մեկ անգամ հորդորում է իր մարզային ներկայացուցիչներին և համախոհներին` հասցնել թեժ գծի հեռախոսահամարը և էլեկտրոնային փոստի հասցեն զինվորներին, նրանց հարազատներին և նոր զորացրվածներին:

Այսօր լրագրողների հետ հանդիպման Միավորված աշխատանքային կուսակցության ղեկավար, «Յունիքորն գրուպ» ընկերության սեփականատեր Գուրգեն Արսենյանը որոշել է բոյկոտել Երևանի քաղաքապետարանին և այլևս մայրաքաղաքում գովազդային վահանակներ չի տեղադրելու . «Լինելով ընկերության սեփականատեր, իմ արժանապատվությունից ցածր է աշխատել նման իշխանության հետ, ովքեր իրենց պատկերացնում են Երևանի նաչալնիկներ»:

Երևանի քաղաքապետարանը ապամոնտաժել էր նրա ընկերությանը պատկանող մեկ տասնյակից ավելի գովազդային վահանակներ, և Արսենյանը ինչպես նաև մեկ այլ ընկերություն` «Նուշիկյան ասոցիացիան» դատական հայց են ներկայացրել ընդեմ քաղաքապետարանի, պահանջելով հազարական դրամ`իրենց հաշվարկած 300 հազար դոլարի վնասի դիմաց:

«Եթե քաղաքապետարանն իր գործողությունները համաձայնեցներ երկու ընկերությունների հետ, այլ կերպ հարցը կլուծվեր: Մենք կողմ ենք քաղաքի էսթետիկական տեսքը բարելավելուն: Արդյունքում անհայտ կազմակերպության, անհայտ մարդիկ բարբարոսաբար ոչնչացրին մեր գույքը պատճառելով նյութական վնաս` մոտ 110 հազար դոլարի չափով»,- ասաց Արսենյանը:

«Իմ առարկությունը կապված է քաղաքապետարանի ընտրած մեթոդների եւ գործիքների ընտրության դեմ»,- ընդգծեց նա, այդպես էլ չբացելով փակագծերը, թե ինչպե՞ս է որ բյուջեն ցանկացած ձևով լցնելու պատրաստ իշխանությունները, իրենց թույլ են տալիս նման շռայլություն`նեղացնում երկու հարուստ գործարարների, հրաժարվելով նրանց «գովազդներից»: Սա հարիր չէ մեզանում հարցերը լուծելու պրակտիկային:

Արսենյանը տեղեկացրեց նաև, որ իրենց կուսակցությունը մասնակցելու է հերթական խորհրդարանական ընտրություններին:

Ըստ նրա` այն, ինչ տեղի ունեցավ մեկ տարի առաջ, ֆալսստարտ էր, սակայն այժմ քաղաքական ուժերը մտնում են ակտիվ փուլ. «ՄԱԿ-ի մասնակցությունը խորհրդարանական ընտրություններին լինելու է շատ լավ և գեղեցիկ: Ձեր դուրն էլ կգա»,- հավաստիացրեց բանախոսը:

Արսենյանի համոզմամբ` բոլորն էլ պարտականություններ ունեն երկրի առջև, և կապ չունի, թե ով կիրականացնի այդ պարտականությունները, բայց եթե  իրենք տեսնեն դեմ գործող համակարգերի, կկոշտացնեն իրենց դիրքորոշումները. «Մեր երկրում միշտ էլ կլինեն մարդիկ, որոնք իրենց խմբակային շահերը վեր կդասեն պետական շահերից, և եթե ձեզ թվում է, թե Հայաստանում տեղի է ունենում արտառոց բան, դուք սխալվում եք: Հայաստանում տեղի է ունենում իշխանությունների ձեւավորման հերթական փուլը»:

Երեկ  ժամը 14:45-ին հերթական ինքնասպանությունն է գրանցվել: Այս անգամ Չարենցավանում:  Ահազանգ է ստացվել, որ Չարենցավան քաղաքի 4-րդ թաղամասի թիվ 22 շենքի 30-րդ բնակարանի բնակիչը չի արձագանքում հեռախոսի և դռան զանգերին. Անհրաժեշտ է փրկարարների օգնությունը։ Հրշեջ-փրկարարների ուժերով, ոստիկանության աշխատակիցների ներկայությամբ բացվել է բնակարանի դուռը. Ննջասենյակում հայտնաբերվել է 1983թ. ծնված Գևորգ Հովհաննիսյանի մարմինը՝ առաստաղից կախված վիճակում:

Մեր ունեցած տեղեկություններով Գևորգը տարօրինակություններ է ունեցել. Նա հաճախակի անհետացել է տանից: Մի քանի անգամ մայրը հետախուզում է հայտարարել նրան գտնելու համար: Մեկ սենյականոց բնակարանում տղան մենակ է ապրել: Ընտանիքը սկզբում բնակվել է Աբովյան քաղաքում, որտեղից էլ բնակարանը վաճառելուց հետո, մայրն ու քույրը գնացել են ապրելու Բյուրեղավանում, իսկ Գևորգ Հովհաննիսյանը տեղափոխվել է Չարենցավան:

Այսօր լրագրողների հանդիպման ժամանակ ՀԱԿ անդամ Լևոն Զուրաբյանը ասուլիսին ներկայացավ ՀԱԿ ակտիվիստներ Վահագն Գևորգյանի, Դավիթ Քիրամիջյանի, Սահակ Մուրադյանի հետ: Վերջիններիս խոսքերով այսօր իրենց հրավիրել են քննչական գործողություններին մասնակցելու, որի ընթացքում իրենց հետ շատ վատ են վերաբերվել:

Վահագն Գևորգյանը, ով ճակատին վնասվածք ուներ, նշեց, որ քննիչ Գևորգ Գևորգյանն իրենց տեսնելուն պես՝ սկսել է հայհոյել, ինչի պատճառով իրենք հրաժարվել են քննությանը մասնակցել և ցանկացել են հեռանալ բաժանմունքից: Նա նաև հավելեց , որ քննիչը իրենց արգելել է դուրս գալ բաժանմունքից և հետ կանչելով՝ Վահագն Գևորգյանին բռնության է ենթարկել և վնասվածքներ պատճառել:

Ըստ Լևոն Զուրաբյանի`  ռեժիմը հերթական անգամ ցույց է տալիս իր դեմքը, և ՀԱԿ-ը ուսումնասիրելու է այս միջադեպը` հետագա պարզաբանումներ ներկայացնելու համար:

Զուրաբյանն այնուհետև ընթերցեց մի հայտարարություն, որտեղ ևս մեկ անգամ հիշատակվում էր իշխող քաղաքական ռեժիմի ապօրինի գործունեությունը և պատրաստակամության բացակայությունը

Ըստ բանախոսի` ՀԱԿ-ի գործունեությունն այսուհետ դառնում է ժողովրդի և հասարակության մոբիլիզացիան, քաղաքական լայն ճակատի ստեղծումն՝ ընդդեմ Սերժ Սարգսյանի. այն կպարտադրի Սերժ Սարգսյանի հրաժարականը: Այդ պայքարի մանրամասներին ու առաջիկա քայլերի ծրագրին ծանոթանալու համար Զուրաբյանը կոչ արեց մասնակցել հոկտեմբերի 28-ի ՀԱԿ հանրահավաքին:

ՀԱԿ անցած ուղին և պայքարի բոլոր եղանակները, մասնավորապես՝ Ազատության հրապարակի վերանվաճումը, քաղբանտարկյալների ազատ արձակումը, իշխանություններին երկխոսության սեղանի շուրջ նստեցնելը և հաջողված շուրջօրյա հանրահավաքները նրա կարծիքով արդեն մեծ առաջընթաց է. «Եթե այսքանին հասել ենք, Սերժ Սարգսյանի հրաժարականն ինչ է, որ չհասնենք»,-ավելացրեց նա:

Կոալիցիայի փլուզման հավանականության վերաբերյալ կանխատեսումներ Զուրաբյանը չարեց, բայց, ըստ նրա, մի բան պարզ է՝ պետական կառավարման ձախողումը և այն մարտահրավերները, որոնք ռեժիմը չի կարողանում իրագործել, առաջացրել է լրջագույն լարվածություն Սերժ Սարգսյանի քաղաքական հենարանում` հենց ռեժիմի ներսում. «Թե այդ պրոցեսներն ինչքան հեռու կգնան, ես դժվարանում եմ որևէ բան ասել»:

Հարցին`արդյո՞ք հնարավոր է ԲՀԿ-ի հետ համագործակցություն, Զուրաբյանը պատասխանեց, որ ցանկացած ուժ, որը հրաժարվում է այս ռեժիմին սատարելուց, սկսում է պայքարել ռեժիմի դեմ, ինքն այդ փաստով դառնում է ժողովրդի դաշնակիցը. «Մենք որևէ ուժ չենք առանձնացնում: Երբ մենք խոսում ենք համագործակցության մասին, մենք չենք ասում՝ միացեք մեզ, այլ բանակցելու ենք միայն այն ուղղությամբ, թե ինչպես կարելի է ազատվել այդ ռեժիմից»:

ՀԱԿ անդամի համոզմամբ` այդ համագործակցությունը վերաբերում է, ոչ թե կոնկրետ ինչ-որ թիմի, այլ բոլորին, ովքեր կկանգնեն ժողովրդի կողքին. «Ես կարծում եմ, որ ՀՀԿ-ի բոլոր այն սեգմենտները, որոնք դուրս կգան ռեժիմի դեմ, դա միայն կողջունվի ժողովրդի կողմից»:

Օլիգարխնե՞րն էլ կարող են դուրս գալ ռեժիմից և միանալ ՀԱԿ-ին հարցին էլ տրվեց հետևյալ պատասխանը . «Երբ Հայաստանում տիրի լեգիտիմ իշխանություն, ապա այդ օլիգարխները, բնականաբար, կզրկվեն մենաշնորհից և կհայտնվեն օրենքի դաշտում»:

Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը հիմնավորված է համարել  ՀՀ ոստիկանության Արաբկիրի բաժնի հետաքննության բաժանմունքի ավագ տեսուչին եւ տեսուչին` պաշտոնեական լիազորություններն անցնելու, պաշտոնեական լիազորությունները չարաշահելու համար նախաքննական մարմնի առաջադրած մեղադրանքները:

Դատարանում հետազոտված ապացույցների համաձայն` Հ. Սիմոնյանն աշխատել է ՀՀ ոստիկանության Երեւան քաղաքի վարչության Արաբկիրի բաժնի հետաքննության բաժանմունքում` որպես ավագ տեսուչ, իսկ Դ. Աթոյանը` ՀՀ ոստիկանության Երեւան քաղաքի վարչության Արաբկիրի բաժնի հետաքննության բաժանմունքում որպես տեսուչ, որի ղեկավար-դաստիարակի պարտականություններն իրականացրել է ավագ տեսուչ  Հ. Սիմոնյանը:

Դատարանը հավաստի է համարել մեղադրող դատախազների կողմից ներկայացված ապացույցները առ այն, որ 2008թ. նոյեմբերի 24-ի լույս 25-ի գիշերը Երեւան քաղաքի Բաղրամյան պողոտայում գտնվող «Պիոներ» գիշերային ակումբում տեղի ունեցած միջադեպի վերաբերյալ Հ. Վարդանյանի հաղորդման կապակցությամբ  Դ. Աթոյանը նյութեր է նախապատրաստել:

Այդ ընթացքում Հ. Սիմոնյանը դեպքի մասնակիցներից վերցրել է իրականությանը չհամապատասխանող, փաստական տվյալները էականորեն փոփոխված բովանդակությամբ բացատրություններ, որի հիման վրա հետաքննիչ Դ. Աթոյանի անունից որոշում է կայացվել քրեական գործի հարուցումը մերժելու մասին:  Կեղծ տեղեկություններ մտցնելով արձանագրության մեջ` Դ. Աթոյանը բաժնի պատասխանատու հերթապահի ստորագրմանն է ներկայացրել հանցագործության վերաբերյալ կեղծ տվյալներով ամփոփագիր` իբրեւ հանցագործության կատարման ընթացքում դանակ չի գործածվել:

Դ. Աթոյանն իր ստորագրությամբ վավերացրել եւ բաժնի պետի հաստատմանն է ներկայացրել Հ. Սիմոնյանի կազմած, իրենց ցանկալի բովանդակությամբ, փաստական աղավաղված տվյալներով քրեական գործի հարուցումը մերժելու մասին որոշումը:
Դ. Աթոյանը եւ Հ. Սիմոնյանն ընդունել են իրենց առաջադրված մեղադրանքը  եւ միջնորդել դատական քննությունն անցկացնել արագացված կարգով:

Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավճռով  Դ. Աթոյանը հանցավոր է ճանաչվել ՀՀ քրեական օրենսգրքի 308-րդ հոդվածի 1-ին մասով, իսկ Հ. Սիմոնյանը` 309-րդ հոդվածի 1-ին մասով եւ դատապարտել ազատազրկման` յուրաքանչյուրին երկու տարի վեց ամիս ժամկետով:

Հայաստանի վարչապետ Տիգրան Սարգսյանի որոշմամբ, Արմեն Եղիազարյանը նշանակվել է Հայաստանի Հանրապետության կառավարության աշխատակազմի «Օրենսդրության կարգավորման ազգային կենտրոն» ծրագրերի իրականացման գրասենյակ» պետական հիմնարկի տնօրենի պաշտոնակատար:

ՀՀ պաշտպանության նախարարին առընթեր հասարակական խորհրդի կողմից իրականացվող «Պատմության և մշակույթի էջեր» ծրագրի շրջանակում հոկտեմբերի 22 — 23-ը գիտության և մշակույթի անվանի 22 գործիչներ այցելել են ԼՂՀ ՊԲ զորամասեր: Այս մասին տեղեկացնում են պաշտպանության նախարարությունից:

Զորամասերում նրանք հանդիպումներ և զրույցներ են ունեցել զինծառայողների հետ, թվով 26 դասախոսություններ են կարդացել:

Մտավորականների խումբը հանդիպել է նաև ԼՂՀ ՊԲ հրամանատար, գեներալ-լեյտենանտ Մովսես Հակոբյանի հետ:

Հանդիպմանը քննարկվել են հասարակությանը հուզող բանակային հիմնահարցեր: