Դեկտեմբերի 20-ին ՀՀ Կառավարությանն առընթեր Ազգային անվտանգության աշխատակիցները նշեցին իրենց  մասնագիտական տոնը: Մասնագիտական օրվա առթիվ,Ազգային  անվտանգության  ծառայությունում  տեղի ունեցավ հանդիսավոր նիստ. ՀՀ նախագահ Սերժ Սարգսյանի ուղերձը ներկայացրեց  ՀՀ վարչապետ Տիգրան Սարգսյանը: Ուղերձում, շնորհավորելով Ազգային անվտանգության աշխատակիցներին, ՀՀ նախագահը պատգամել էր <<շարունակել  հաղթահարել  բոլոր դժվարությունները և պատվով լուծել հետախուզության, հակահետախուզության, սահմանադրական կարգի պահպանության, ահաբեկչության  դեմ պայքարի,  պետական սահմանի  պահպանության խնդիրները`  համարժեք  արձագանքելով առկա  մարտահրավերներին>>:

Հանրապետության նախագահի հրամանագրով  մի շարք ծառայողներ արժանացել էին պետական բարձր  պարգևների և զինվորական կոչումների, որոնք  հանձնեց վարչապետ Տ. Սարգսյանը:

Հանդիսավոր նիստին  ելույթ  ունենալով, ԱԱԾ տնօրեն  գեներալ-գնդապետ Գ. Հակոբյանը նշեց, որ  մասնագիտական  տոնը  Ազգային անվտանգության ծառայության  անձնակազմը  դիմավորում է  գործունեության  ոլորտներում արձանագրված  ակնառու  ձեռքբերումներով: Ելույթում գեներալ-գնդապետ Գ. Հակոբյանը  հատուկ ընդգծեց  Ադրբեջանի  հետախուզության կողմից Թուրքիայում  հավաքագրված Հայաստանի  քաղաքացիներ հանդիսացող  գործակալների  բացահայտումը: Անվտանգության ծառայության հակահետախուզության  գլխավոր  վարչության  աշխատակիցները այդ անձանց  օպերատիվ մշակումները իրականացրել են հատուկ ծառայությունների գործելաոճի դասական կաններով,  օպերատիվ հնարքների ճկուն և հնարամիտ կիրառմամբ,  ապահովելով լրտեսական գործունեության սպառիչ, ամբողջական և անհերքելի ապացույցների ստացում: ԱԱԾ  տնօրենի հավաստմամբ, կատարված աշխատանքների բարձր պրոֆեսիոնալիզմը պատիվ կբերեր  ցանկացած  երկրի հատուկ ծառայությանը:

ԱԱԾ տնօրեն Գ. Հակոբյանը  շնորհավորելով աշխատակիցներին քաջառողջություն, ուժ, եռանդ ու հաջողություն մաղթելով, նաև նշեց, որ  <<Հայաստանի  հատուկ ծառայությունները  գոյություն ունեն  արդեն 91 տարի: Հայաստանի երեք հանրապետությունների ժամանակ էլ նրանք գործել են Հայրենիքի անմնացորդ նվիրումով, երկրի հաջող ապագայի հավատքով,  պետության կայացման  դժվարին  ճանապարհի ձեռքբերումները պահպանելու, բազում նոր հաջողություններով  ամրագրելու մղումով: Համոզված եմ, որ կանցնեն շատ տարիներ, սակայն մեզ հաջորդող սերունդները  նույն հպարտությամբ, ոգևորությամբ  և արժանապատվորեն կշարունակեն տոնել այս օրը, հավատարիմ կմնան մեր պատգամներին, կկարողնան պահպանել  անցած  դժվարին ճանապարհի ձեռքբերումները,  և ի զորու կլինեն  մեր երկրին ու ժողովուրդը զերծ պահել հնարավոր վտանգներից ու սպառնալիքներից>>:

Մասնագիտական տոնի առթիվ  ԱԱԾ մի շարք աշխատակիցների շնորհավորեցին և  գերատեսչական  պարգևներ հանձնեցին նաև  ÐÐ àստիկանության պետ  գեներալ-լեյտենանտ  Վլադիմիր Գասպարյանը, գլխավոր դատախազ Աղվան Հովսեփյանը, ԶՈՒ գլխավոր շտաբի պետ, գեներալ-գնդապետ Յուրի Խաչատուրովը:

ԱԱԾ տնօրեն գեներալ-գնդապետ Գ. Հակոբյանի  հրամանագրերով  մի շարք աշխատակիցներ պարգևատրվեցին մեդալներով, թանկարժեք նվերներով և պատվոգրերով:

Վարչապետ Տիգրան Սարգսյանի որոշմամբ` 2011թ. աշխարհի և Եվրոպայի առաջնություններում առավել բարձր ցուցանիշների հասած հանրապետության 106 մարզիկներին, նրանց մարզիչներին (անձնական մարզիչներ, հավաքականի ավագ մարզիչներ, երկրորդ մարզիչներ), բժիշկներին ու մարզական կազմակերպություններին շնորհվել են դրամական մրցանակներ:Այս մասին տեղեկացնում են ՀՀ կառավարության մամլո ծառայությունից:

Պարգևատրվող մարզիկների թվում են` ծանրամարտիկ, Եվրոպայի առաջնության երկրորդ մրցանակակիր Արայիկ Միրզոյանը, կանանց ծանրամարտի Եվրոպայի առաջնության արծաթե մեդալակիր Հռիփսիմե Խուրշուդյանը, հունա-հռոմեական ոճի ըմբշամարտիկներ, աշխարհի չեմպիոն Ռոման Ամոյանը, աշխարհի առաջնության երրորդ մրցանակակիր Արսեն Ջուլֆալակյանը, Եվրոպայի առաջնության բրոնզե մեդալակիր Յուրի Պատրիկեևը, աշխարհի երիտասարդական առաջնության չեմպիոններ Նարեկ Խաչատրյանը և Ռաֆիկ Մանուկյանը, սպորտային մարմնամարզության Եվրոպայի մեծահասակների առաջնության երրորդ մրցանակակիր Հարություն Մերդինյանը:

Դրամական մրցանակների արժանացածների թվում են նաև շախմատի աշխարհի թիմային առաջնության չեմպիոնի կոչումը նվաճած Հայաստանի հավաքականի անդամները` Լևոն Արոնյանը, Սերգեյ Մովսիսյանը, Վլադիմիր Հակոբյանը, Ռոբերտ Հովհաննիսյանը, Գաբրիել Սարգսյանը, շախմատի աշխարհի մինչև 18 տարեկանների չեմպիոն Սամվել Տեր—Սահակյանը և այլ մարզաձևեր ներկայացնող մարզիկներ, ովքեր այս տարի Եվրոպայի և աշխարհի առաջնություններում բաձր են պահել Հայաստանի մարզական պատիվը:

Այսօր երեկոյան «Ֆլորենցիա» ռեստորանային համալիրում իր դստեր նշանադրության արարողությունը կնշի «Օջախ» ցանցի սեփականատերը: Օջախի Երեմը որոշել է իր ընտանեկան արարողությունը կազմակերպել վերջերս մոդայիկ դարձած` Հրազդանի կիրճում գտնվող «Ֆլորենցիա» ռեստորանային համալիրում, հետ չմնալով նախկին քաղաքապետ Կարեն Կարապետյանից, որն իր աղջկա հարսանիքով կատարեց սեփական օբյեկտի բացումը, Կաթողիկոսից, որն այստեղ նշեց իր ծննդյան տարեդարձը:

Նշանադրության արարողությանը հրավիրված են քաղաքական և գործարար վերնախավի ոչ քիչ թվով ներկայացուցիչներ:

Ի դեպ Երեմի տղան, որի հարսանիքին անգամ հայրը նման շռայլություն թույլ չտվեց իրեն, ամուսնացած է,Գեղարքունիքի նախկին մարզպետ Ստեփան Բարսեղյանի աղջկա հետ:

Քիչ առաջ Երեւանում, Կարեն Դեմիրճյանի անվան մարզահամերգային համալիրում ավարտվեց« Նիգ-Ապարան հայրենակցական միության 5-րդ համագումարը։

Ի դեպ դահլիճը լեփ-լեցուն է եղել, սակայն բավականին ցուրտ:

Համագումարում միությունը նոր նախագահ է ընտրել` Ազգային ժողովի պատգամավոր, հայտնի գործարար Սամվել Ալեքսանյան:

Նա այս պաշտոնում կփոխարինի Երեւանի ֆիզմաթ դպրոցի տնօրեն Հայկազ Նավասարդյանին:

Հիշեցնենք, որ Նիգ-Ապարան հայրենակցական միությունն ունի 2 պատվավոր նախագահ` ՀՀ գլխավոր դատախազ Աղվան Հովսեփյանը եւ Տիգրան Մեծ հրատարակչության սեփականատեր Վրեժ Մարկոսյանը:

Համագումարից հետո նիգ –Ապարանցիների ընտրյալ մասը իրենց հյուրերի հետ հրավիրվել են տոնական ընթրիքի:

ՀՀ Տնտեսական մրցակցության պաշտպանության պետական հանձնաժողովն այսօր խոշոր չափի տուգանքի ենթարկեց  «Աշտարակ կաթ», «Դուստր Մարիանա» և «Անի կաթ» ընկերություներին, կաթնամթերքի շուկայում թույլ  տված ակնհայտ չարաշահումների համար:

Երեկ «Հայկական Վարկածին» այս մասին տեղեկացրել էր Սննդի անվտանգության պետական տեսչությունը, որի կատարած ստուգումների արդյունքում, ևս հայտնաբերվել էր չարաշահումներ:

ՏՄՊՊՀ նիստին նախագահ Արտակ Շաբոյանը ասաց,  որ այս ընկերությունները իրենց որոշ ապրանքատեսակներում օգտագործել են բուսական յուղ, այն է` կոկոսի յուղ, ինչը կենդանական յուղից երկուսուկես անգամ ավելի էժան է, ավելին` ըստ ուսումնասիրությունների` կոկոսի յուղը նույնիսկ բացասական ազդեցություն ունի մարդու օրգանիզմի վրա:Կոկոսի յուղը միակ արգելված հավելանյութը չէ, որ ընկերությունները օգտագործել են: Նրանք կաթնամթերքի արտադրության մեջ օգտագործել են նաև կաթի փոշի, սակայն չեն մակնշել:

«Այս ձևով ընկերությունները ստեղծել են անբարեխիղճ մրցակցային դաշտ, խաբել սպառողներին և ստացել գերշահույթ»,- ասաց Շաբոյանը:

Հանձնաժողովն ապացուցված համարելով այս բացահայտումները և հաշվի առնելով, որ նշված ընկերությունները նախկինում մեկ անգամ արդեն հայտնվել են հանձնաժողովի տեսադաշտում և զգուշացվել էին ձեռնպահ մնալ օրենսդրության խախտումներից, նրանց նկատմամբ կիրառեց օրենքով նախատեսված առավելագույն պատժաչափ`  տուգանք նախորդ տարվա հասույթի 1 տոկոսի չափով: Ըստ այդմ` «Աշտարակ կաթ» ՓԲԸ-ին տուգանվեց 50 մլն դրամի չափով, «Անի կաթը»` 5մլն դրամի և «Դուստր Մարիանա» ընկերությանը` 20մլն դրամի չափով:

Հ.Գ.Ինչ խոսք, տնտեսական ճգնաժամի պայմաններում, այս մեթոդը բյուջե լցնելու արդյունավետ միջոցներից մեկն է, սակայն լավագույնը չէ: Եթե տնտեսվարողները վերջնականապես չսննկացան ու չփակեցին իրենց բիզնեսը, ապա իրենց վճարած միլիոնները հանելու են ժողովրդի գրպանից, իսկ թե ինչ մեխանիզմով, վերահսկողները կտեղեկանան արդեն հաջորդ ստուգումների ընթացքում:

ՀՀ ՊՆ հասարակայնության հետ կապերի պատասխանատուն տեղեկացնում է, որ դեկտեմբերի 14-ին, ժ. 07:20-ի սահմաններում ԼՂՀ N զորամասի ճաշարանի պետ, ենթասպա Արմեն Լավրենտի Թովմասյանն, իր կողմից տրված հանձնարարությունը կատարելուց հրաժարվելու պատճառով, զորամասի ճաշարանում մեկ անգամ ձեռքով, մեկ անգամ իր ձեռքին գտնվող երկաթյա շղթայով հարվածել է նույն զորամասի ժամկետային զինծառայող Նարեկ Ավետիսյանի դեմքի շրջանին` պատճառելով մարմնական վնասվածք` աջ ակնագնդի ջնջխմամբ, վերին կոպի հեմատոմայի տեսքով:

Փաստի առթիվ ԼՂՀ Ստեփանակերտի ՌՈ բաժնի կողմից նախապատրաստած նյութերով, ՀՀ ՊՆ Քննչական ծառայության երրորդ կայազորային քննչական բաժնում ՀՀ Քրօր-ի 375 հոդվածի առաջին մասով նախատեսված հանցագործության հատկանիշներով այսօր հարուցվել է քրեական գործ, կատարվում է նախաքննություն:

Նշենք որ այս միջադեպին անդրադարձել է «Հայկական Ժամանակ» օրաթերթը. Ըստ որի նախօրեին ԼՂՀ ՊԲ «Եղնիկներ» զորամասում հերթական միջադեպն է տեղի ունեցել, որի հետևանքով երեկ Երևանի Մալայանի անվան ակնաբուժական կլինիկայում հեռացվել է այս տարվա գարնանային զորակոչին Էջմիածնից զորակոչված 18-ամյա ժամկետային զինծառայող, շարքային Նարեկ Ավետիսյանի աջ աչքը:

Վրաստանի գազատրանսպորտային ընկերությունը պաշտոնապես տեղեկացրել է «ՀայՌուսգազարդ» ՓԲԸ-ին դեկտեմբերի 16-ին` ժամը 10:50-ից Հայաստան բնական գազի մատակարարումը ժամանակավորապես դադարեցնելու մասին:

«ՀայՌուսգազարդի» պաշտոնական կայքէջում տեղադրված հաղորդագրությունից տեղեկանում է, որ վրացական ընկերությունը նախատեսում է վթարավերականգնողական աշխատանքներ իրականացնել Հյուսիսային Կովկաս-Անդրկովկաս 1000 մմ մայրուղային գազատարի 67-68-րդ կմ հատվածում:

Վրացական կողմը հավաստիացնում է, որ աշխատանքները կիրականացվեն ամենասեղմ ժամկետներում:

Հանրապետության սպառողների գազամատակարարումը կիրականացվի առանց սահմանափակումների:

Չայկինայի 5-րդ փողոցի Նապոլեոն Ազիզյանի տանը երեկ, ժամը 20.25-ին վիճաբանություն է տեղի ունեցել, որի մասին ահազանգ է ստացվել ոստիկանության Երևան քաղաքի վարչության հերթապահ մաս:

Դեպքի վայր մեկնած ոստիկանները պարզել են, որ նույն օրը, ժամը 20.00-ին, Սիսվանի փողոցի թիվ 57 տան դիմաց, 30-ամյա Ահարոն Վ.-ն, 20-25 րոպե տևողությամբ հայհոյանքներ է տվել Նապոլեոն Ազիզյանի և նրա ընտանիքի անդամների հասցեին, աղմկել է և կոպիտ կերպով խախտել հասարակական կարգը, վիճաբանել է հասարակական կարգի խախտումը խափանելու փորձ կատարող 25-ամյա Նարեկ Հ.-ի, 38-ամյա Արթուրիկ Ն.-ի և Վարդան Ազիզյանի հետ, հրել և վայր գցել վերջինիս՝ ձախ ձեռքի ափի շրջանում պատճառելով վնասվածք:

Բացի այդ հարձակվել է վիճաբանությունը դադարեցնելու փորձ կատարող ոստիկանության ծառայողի վրա, քաշքշել նրան, պոկել համազգեստի փողկապը, բռունցքներով հարվածնել նրա կրծքին և ուսին: Ահարոն Վ.-ն բերման է ենթարկվել բաժին:
Վարդան Ազիզյանին և ոստիկանության ծառայողին տրվել են դատաբժշկի ուղեգրեր: Հանգամանքները պարզվում են: Կատարվում է հետաքննություն: Սա ոստիկանության տարածած հաղորդագրությունն է:

Պարզվել է, որ Ահարոնը նախկինում Ազիզյանի բնակարանում վերանորոգման աշխատանքներ է իրականացրել, և վիճաբանության առիթն էլ այդ աշխատանքների դիմաց վարձատրության հետ կապված պարտքերի վերադարձի պահանջն է եղել:

Բուռնաշն էլ փողը չի տվել

Հ.Գ. Ի դեպ պարզվում է հենց մեծահարուստները «քցելու» հատկություն ունեն. Մեկ երկու տարի առաջ մեր տունը վերանորոգող վարպետը,անընդհատ անհանգստանում էր ու խոսում վճարելիք գումարի մասին, մի օր էլ նեղված հարցրեցի, թե ինչու է այդքան շատ դժգոհում ու խոսում, ասաց`«Բա ինչ անեմ, Բուռնաշի տունը ռեմոնտ արեցի, վերջում փողի կեսը չտվեց: Նա, որ էդքան փողի մեջ տենց արեց աշխատավոր մարդու հետ, էլ ում հավատաս»:

Ռուզան Ավոյան

Վաղը` Դեկտեմբերի 16-ին ժամը 12:00‑ին, «Վարկած» (Տիգրան Մեծ հրատարակչություն, 4-րդ հարկ, 422 սենյակ) ակումբի հյուրն է ՆԺԿ ղեկավար Արամ Կարապետյանը:
Թեման` Արտաքին քաղաքական զարգացումները և դրանց ազդեցությունը ներքաղաքական կյանքի վրա:

Քաջարան համայնքի  ղեկավար Ռաֆիկ Աթանյանը հրաժարական է տվել։

Խմորումները, որ տեղի են ունենում այս տարածքում նոր չեն, սակայն տրամաբանական  լուծում չեն գտնում.

Երեկ Աթանյանը ասել էր, որ գտնվում է անելանելի վիճակում, իսկ այսօր հայտարարել թե`հարկադրված է եղել հրաժարական տալ: Ի դեպ Ռաֆիկ Աթանյանը հրաժարվել է նաև ՀՀԿ անդամությունից:

Աթանյանը նախընտրել է ազատել պաշտոնը, քան պատասխանատվություն վերցնել ժողովրդի տարահանման հարցում: Ըստ նրա, Քաջարանի բնակիչները մարտական են տրամադրված ու չեն ուզում լքել բնակավայրը:

Ըստ նրա`տեղական իշխանությունները իր վրա ճնշումներ են գործադրել ` ստիպելով նրան ստորագրել Քաջարանի հողերից 27 հա Զանգեզուրի պղնձամոլիբդենային կոմիբինատին հանձնելու համաձայնագիրը:

Հիշեցնենք, որ քաջարանցիները պայքարում են ՀՀ Կառավարության 2011թ. ապրիլի 28-ի թիվ 627-Ն որոշման դեմ, ըստ որի, Սյունիքի մարզի վարչական սահմաններում, գյուղատնտեսական նշանակության հողերից 181,7 հա տարածք ճանաչվել է բացառիկ՝ հանրային գերակա շահ, այն Զանգեզուրի պղնձամոլիբդենային կոմիբինատին տրամադրելու նպատակով, որը ենթադրում է Քաջարանի բնակչության տարահանում: