Այսօր առավոտյան  նախագահ Սերժ Սարգասյանն այցելել է Մխիթար Հերացու անվան Երևանի պետական բժշկական համալասրանի թիվ 1 հիվանդանոցային համալիր, շրջայց կատարել վերաբացված նոր բաժանմունքներում և վերանորոգված վիրահատարաններում:

Համալիրում տեղադրված մոնիտորների միջոցով ուսանողներն այսուհետ հնարավորություն կունենան հետևելու վիրահատություններին, ինչը նրանց համար կդառնա բժշկական պրակտիկա:

Նախագահին ուղեկցում էին ՀՀ առողջապահության նախարար Հարություն Քուշկյանը, Կրթության և գիտության՝ մասնագիտությամբ բժիշկ նախարար Արմեն Աշոտյանը, Մխիթար Հերացու անվան Երևանի պետական բժշկական համալսարանի ռեկտոր Դերենիկ Դումանյանը:

Լրագրողների հետ զրույցում Դերենիկ Դումայանն ասել է. «Համալասանական հիվանդանոցի վերանորոգման վրա 421 միլիոն դրամ է ծախսվել՝ ամբողջը Բժշկական համալսարանի ֆինանսներից: Հիվանդանոցն այժմ կարող է տեղավորել շուրջ 180 մարդ»:

Այս բուժհաստատատությունում բուժումների մոտ 50 տոկոսը կատարվում է պետպատվերի շրջանակներում:

Դերենիկ Դումանյանը հավաստիացրել է, որ հիվանդանոցում բուժծառայությունների սակագները մատչելի են և որ վերանորոգումից հետո ևս դրանք կպահպանվեն: Ըստ նրա՝ողջ աշխարհում նման հիվանդանոցներն առավել էժան են, քանի որ բուժծառայությունները մատուցվում են բժշկական համալսարանի կողմից:

Թերթը գրում է, որ երեկ հետաքրքիր մանրամասներ է իմացել ՀՀԿ ցուցակից Մենուա Հարությունյանի դուրս մնալու մասին:
Պարզվում է` «slaq.am»-ի սեփականատեր Մենուային ցանկից դուրս է թողել անձամբ Հովիկ Աբրահամյանը, որը ժամանակին համարվում էր Մենուայի հովանավորը: Իսկ բանը եղել է այսպես, երբ Արգամիչը ցանկացել է վարչապետ դառնալ, Մենուայի կայքը սկսել է խփել վարչապետ Տիգրան Սարգսյանին` քարոզելով, որ Հովիկ Աբրահամյանն է ամենաճիշտ վարչապետը: Դրանից հետո Մենուային հրավիրել են նախագահական և «հանձնարարել» չանել դա: Ավելին` ասվել է, որ պետք է Տիգրան Սարգսյանին պաշտպանել: Եվ Մենուան էլ, երկրի նախագահին ու հարազատ կուսակցությանը հավատարիմ, սկսել է պաշտպանել գործող վարչապետին և հայտնվել է Հովիկ Աբրահամյանի «սև ցուցակում»: Արդյունքում` չնայած ծառայել է իշխանություններին և կատարել Սերժ Սարգսյանի ցանկությունը, սակայն, ի կատարումն Հովիկ Աբրահամյանի ցանկության, դուրս է մնացել ցուցակից:

«Օրինաց երկիր» կուսակցության մամուլի խոսնակ Սուսաննա Աբրահամյանն այլևս կուսակցության մամուլի պատասխանատուն չէ:

Tert.am-ի հետ զրույցում նա նշեց, որ այսօրվանից դադարեցրել է իր լիազորությունները և կուսակցության հարցերով չի զբաղվում:

Պատճառը, ըստ նրա, հասկանալի է. «Քանի որ որպես մամուլի պատասխանատու կուսակցության կողմից գնահատված չեմ ըստ արժանվույն»,- ասաց նա և պարզաբանեց, որ այդ եզրակացության է եկել, ՕԵԿ համամասնական ցուցակում իրեն հատկացված տեղից:

Նշենք, որ Սուսաննա Աբրահամյանը ՕԵԿ համամասնական ցուցակում 36-րդն է:
Կուսակցությունից դուրս գալու մասին նա դեռ չի հայտարարել, սակայն նշեց. «Բնականաբար, տրամաբանությունը դա է հուշում»:

tert.am

Թերթը գրում է, որ նախընտրական այս շրջանում, երբ շոու-բիզնեսի ներկայացուցիչներից, ինչպես նաեւ արվեստագետներից ոմանք երազում են իրենց տեղն ունենալ ԱԺ-ում, դիրիժոր Էդուարդ Թոփչյանից հետաքրքրվեցինք` ինչպե՞ս է նայում այդ «երեւույթին»: «Գիտակցելով, որ դա յուրաքանչյուրի իրավունքն է, այնուամենայնիվ, գտնում եմ, որ, օրինակ, բարձրարվեստ երաժշտին, իսկական արվեստագետին չպետք է ձգի ԱԺ-ն»,- ասաց դիրիժորը:  «Հիշեցնելով, որ տարբեր առիթներով դրական է արտահատվել երգչուհի Շուշան Պետրսյանի հասցեին, ով, ամենայն հավանականությամբ, կգնա ԱԺ, խնդրեցինք կոնկրետ արտահայտվել այս առիթով: «Շուշանին սիրում, հարգում եւ գնահատում եմ իբրեւ երգչուհի: Նա խելացի կին է: Ինձ նույնպես հետաքրքիր են նրա ծրագրերը ու առաջին իսկ հանդիպման ժամանակ կզրուցեմ այդ թեմայով»,- հայտնեց Թոփչյանը»,-գրում է «Առավոտ»-ը:

«Հայկական ժամանակ» օրաթերթի գլխավոր խմբագիր, Հայ ազգային կոնգրեսի կենտրոնական գրասենյակի անդամ Նիկոլ Փաշինյանը քիչ առաջ   մեծամասնական ընտրակարգով ԱԺ պատգամավորի թեկնածու  առաջադրվեց  Երևանի թիվ 7 ընտրատարածքում: Փաշինյանն իր կայքում տեղեկացրել է, որ առաջադրման կապակցությամբ  հանդես կգա հայտարարությամբ:

Հիշեցնենք, որ այս ընտրատարածքում առաջադրվել է ԱԺ պատգամավոր Սամվել Ալեքսանյանը և անկուսակցական Վարդան Վարդանյանը։

Այսօր լրագրողների հետ հանդիպման ժամանակ Կովկասի ինստիտուտի տնօրեն, քաղաքագետ Ալեքսանդր Իսկանդարյանը ասաց, որ իր կարծիքով մայիսի 6-ի խորհրդարանական ընտրություններից հետո Ազգային ժողովում կլինեն ՀՀԿ, ԲՀԿ, ՀԱԿ, ՀՅԴ, ՕԵԿ կուսակցություններն ու «Ժառանգություն»–«Ազատ դեմոկրատներ» դաշինքը:

Մնացած կուսակցությունները, ըստ նրա, ոչ մի հնարավորություն չունեն հաջողություն ունենալու և անցնելու խորհրդարան. «Այս 6 կուսակցությունները անկասկած կգնան խորհրդարան: Մնացածը չունեն լուրջ ցանկություն անցնելու, այլ ուղղակի նպատակ ունեն քաղաքակնության մեջ երևալ»,-նշեց քաղաքագետը:

Քաղաքագետը նշել է, որ, ճիշտ է, «ինքն անձամբ չի հաշվել, սակայն ըստ հաշվողների տվյալների», ներկայումս Հայաստանի Ազգային ժողովում կան մոտավորապես 76 օլիգարխներ. .«Ելնելով համամասնական ցուցակներից` հաջորդ գումարման խորհրդարանում նրանց թիվը կնվազի», — ավելացրել է Իսկանդարյանը, նշելով, որ ամենախոշոր գործիչներն, այնուամենայնիվ, կանցնեն խորհրդարան: Ըստ քաղաքագետի` խորհրդարանում օլիգարխի ներկայությունը բոլորովին մի բան է, իսկ նրա ներկայացուցչինը`այլ:

Նրա կարծիքով, կուսակցությունների միջև կա ակնհայտ մրցակցություն, որը կարող է և՛ քաղաքակիրթ ձևով դրսևորվել և՛ ոչ քաղաքակիրթ: Ինչ վերաբերում է գործարարների ներկայությանը Ազգային ժողովում, ապա Իսկանդարյանը կարծում է, որ նրանք քիչ կլինեն խորհրդարանում, բայց կընտրվեն օլիգարխներից ամենահայտնիները:

Նրա խոսքով, թեև իշխանություններն անկեղծորեն ուզում են արդար ընտրություններ անցկացնել, բայց ասելը մեկ բան է, անելը՝ մեկ այլ:

Բայց այնքան էլ կարևոր չէ այն, թե ընտրությունները որքան արդար կլինեն միջազգային կառույցների համար, որքան մեզ համար:

«Արայ» ընկերության սեփականատեր Արմեն Պետրոսյանի մոր` Կարինե Սուքիասյանի նկատմամբ հետախուզում է հայտարարվել և քրեական գործ հարուցվել քրեական  օրենսգրքի 167 հոդվածի հատկանիշներով` ծնողներից երեխային ապօրինի բաժանելու հատկանիշներով:  Կարինե Սուքիասյանը թոռնուհու` Կարինայի հետ Հայաստանից հեռացել է և նրա գտնվելու վայրը հայտնի չէ:

Այս մասին հայտնում են  ՀՀ ոստիկանության լրատվական ծառայությունից:

Իսկ  վերը նշված հոդվածի շրջանակներում անձը   պատժվում է տուգանքով՝ նվազագույն աշխատավարձի 100-ապատիկից 250-ապատիկի չափով կամ ազատազրկմամբ` առավելագույնը 5 տարի ժամկետով:

«Հայկական ժամանակ».  ԱԺ-ում հավատարմագրված լրագրողները երեկ խորհրդարանի միջանցքներում իրար պատմում էին, թե ինչպես է Աժ պատգամավոր Սամվել Ալեքսանյանը իրենց առաջարկել գրազ գալ, որ որևէ մեկը «իր դեմ» չի առաջադրվի Երևանի թիվ 7 ընտրատարածքում:

Լրագրողներից որևէ մեկը չի ընդունել Ալեքսանյանի գրազը` համարելով, որ տանուլ կտա: Ինքը` Ալեքսանյանն էլ առաջնորդվել է այդ կանխավարկածով, որովհետև երեկ նույն ընտրատարածքում «առաջադրվել է տվել» Մալաթիա-Սեբաստիա թաղապետարանի աշխատակից, անկուսակցական ոմն Վարդան Վարդանյանի: Թերթը հիշեցնում է, որ գործող Ընտրական օրենսգրքի համաձայն` ընտրությունների կայացման համար անհրաժեշտ է, որ գրանցված թեկնածուների թիվը լինի առնվազն երկուսը: Այսօր առաջադրումների ժամկետները սպառվում են: