ՀՀ ԳՆ սննդամթերքի անվտանգության պետական ծառայության պետի 2014թ. մայիսի 30-ի որոշումով արգելվել է «ԹԱՄԱՐԱ» ՍՊԸ-ի կողմից «Քսան կոպեկ», «Կարմեն» և «Թթվասեր 200գր.» արտադրատեսակների արտադրությունը:

«ԹԱՄԱՐԱ» ՍՊԸ-ում իրականացված ստուգման ընթացքում վերոնշյալ արտադրատեսակների արտադրության փուլում հայտնաբերվել է վտանգավոր սննդամթերքի թողարկում. ստուգման ընթացքում պարզվել է, որ «ԹԱՄԱՐԱ» ՍՊԸ-ի կողմից արտադրված «Քսան Կոպեկ», «Կարմեն» և «Թթվասեր 200գր.» արտադրատեսակների նմուշները, համաձայն «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ի լաբորատոր փորձաքննության արդյունքների, չեն համապատասխանում «ՀՀ կառավարության 2006 թվականի դեկտեմբերի 21-ի Կաթին, կաթնամթերքին և դրանց արտադրությանը ներակայացվող պահանջների տեխնիկական կանոնակարգը հաստատելու մասին» N 1925-Ն որոշմամբ սահմանված պահանջներին:

Կազմակերպությանը տրվել է հանձնարարական՝ վերացնելու հայտնաբերված խախտումները, արտադրության տեխնոլոգիական գործելակարգը և տեխնոլոգիական գործընթացն իրականացնել տվյալ արտադրանքի համար հաստատված տեխնոլոգիական հրահանգին համապատասխան:

ՀՀ ԳՆ սննդամթերքի անվտանգության պետական ծառայություն

Նախագահ Սերժ Սարգսյանն այսօր Արմավիր քաղաքում ներկա է գտնվել Սուրբ Գրիգոր Նարեկացի եկեղեցու օծման արարողությանը: Այս մասին հայտնում են ՀՀ Նախագահի աշխատակազմի hասարակայնության և տեղեկատվության միջոցների հետ կապերի վարչությունից։

Արմավիրի մարզկենտրոնում գտնվող միակ բազիլիկ այդ եկեղեցու հիմնարկեքը տեղի է ունեցել 2012թ.՝ Հայ Առաքելական Եկեղեցու Արմավիրի թեմի առաջնորդ Տեր Սիոն եպիսկոպոս Ադամյանի հանդիսապետությամբ: Այն կառուցվել է ճարտարապետ Միքայել Մկրտչյանի նախագծով, բարերար Կարեն Մկրտչյանի հովանավորությամբ:

Մոտ մեկ տարի է` կանաչ-կարմիր թևկապավորներին մայրաքաղաքի փողոցներում փոխարինում են կարմիր գծանշումներով վճարովի ավտոկայանատեղերը, որոնք հազարավոր վարորդների դժգոհությունն են հարուցում: Նրանցից շատերն արդեն իսկ անկախ իրենց կամքից, հասցրել են տուգանվել 5000 դրամով:

Տուգանքը գործում է այն դեպքում, երբ վարորդը 5 րոպեից ավելի է կայանում կարմիր գծերից ներս և չի վճարում ավտոկայանատեղից օգտվելու սահմանված վճարը: Կարելի է ասել, որ շուտով Երևանի փողոցներում վարորդը ավտոմեքենա կայանելու համար անվճար տեղ չի գտնելու;

Առավոտ

«Մեկն էլ քո աղջիկն էր, որ ամուսնացրեցինք հենց այդ ծրագրի արդյունքում», դիմելով հանրապետական պատգամավոր Կարինե Աճեմյանին ասել է Սփյուռքի նախարար Հրանուշ Հակոբյանը՝ նկատի ունենալով «Արի տուն» ծրագիրը:

«ՉԻ» — Չէ, եկեք իրար հասկանանք: Եթե հանրապետական պատգամավորի դուստրը մտադիր է ամուսնանալուց հետո մեկնել երկրից, ապա ծրագիրը պիտի կոչվի ոչ թե «Արի տուն», այլ «Գնա՛ տնից», իսկ եթե նորաստեղծ ընտանիքը (որին, ի դեպ, երջանկության ենք մաղթում) մտադիր է ապրել Հայաստանում, այդ դեպքում մեզ օրենսդրական փոփոխություններ են պետք: Մասնավորապես՝ պետք է օրենք ընդունել, որ այսուհետ պատգամավոր կարող են ընտրվել առնվազն երեք դուստր ունեցողները, ինչն էապես կխթանի հայրենադարձության գործընթացը:

Ամեն դեպքում՝ ուրախալի է, որ վերջապես Սփյուռքի նախարարի գործունեության գոնե մի դրական արդյունք արձանագրվեց:

Չորրորդ ինքնիշխանություն

Անդրեաս Ղուկասյանը ֆեյսբուքյան իր էջում գրել է.

«2008 թ. փետրվարին Արամ Կարապետյանը ՀՀ դատախազություն ներկայացրեց տեղեկություն, համաձայն որի 2001 թ-ին Քի Վեսթում Ռոբերտ Քոչարյանը համաձայնություն է տվել Հայաստանի և Ադրբեջանի միջև տարածքների փոխանակման առաջարկին: Ըստ Արամ Կարապետյանի, այդ արարքով Ռոբերտ Քոչարյանը կատարել է պետական դավաճանություն: Ռ. Քոչարյանը հերքեց Ա Կարապետյանի պնդումը և 2008 թ. փետրվարի 24-ին վերջինս ձերբակալվեց սուտ մատնություն տալու մեղադրանքով:

2014 թվականին ՀՀ ԱԳ նախարար Է. Նալբանդյանը հայտարարեց, որ «Բաքվի հետքայլերի, միակողմանի առավելություն կորզելու փորձերի պատճառով հնարավորություն չի ընձեռնվել առաջընթաց արձանագրել 2011թ. հունիսին` Կազանի, 2011թ. մարտին` Սոչիի, 2010թ. հոկտեմբերին` Աստրախանի, 2010թ. հունիսին` Սանկտ-Պետերբուրգի գագաթաժողովներին, չնայած կողմերը մոտ են եղել համաձայնությունների։ Հիշեցնեմ, որ Բաքուն նույն հետքայլերն է կատարել նաև նախկինում, օրինակ՝ Կազանից տասը տարի առաջ, 2001թ.»:

Այսպիսով, ԱԳ նախարարը պաշտոնապես հայտնեց, որ 2001 թվականին Ռ. Քոչարյանը տարածքային փոխանակման առաջարկին տվել էր իր համաձայնությունը, իսկ «Բաքուն հետքայլ է արել նախապես ձեռք բերված համաձայնություններից»:

Ստացվում է 2008 թ. Ռ. Քոչարյանը գիտակցաբար, սխալ տեղեկություն է հայտնել ՀՀ իրավապահ մարմիններին, ինչը պատճառ դարձավ Ա. Կարապետյանին սուտ մատնության մեջ մեղադրելու համար:

Կարծում եմ, որ այսօր Արամ Կարապետյանը պետք է նորից դիմի ՀՀ դատախազությանը՝ պահանջելով վերանայել իր դեմ 2008 թ-ին հարուցված քրեական գործը: Ենթադրում եմ, որ այդ դեպքում պետք է առաջանա Ռ. Քոչարյանի պատասխանատվության հարցը՝ 2008 թվականին ՀՀ իրավապահ մարմիններին սուտ ցուցմունքներ տալու համար»:

Երկրի 60%-ը միշտ կողմ է եղել Մաքսային Միությանն անդամակցելուն. այս մասին այսօր, լրագրողների հետ հանդիպման ժամանակ, ասաց սոցիոլոգ Ահարոն Ադիբեկյանը:

Այս հանգամանքը սոցիոլոգը բացատրեց նրանով, որ շատերի բարեկամներն են բնակվում Ռուսաստանում, որոնք օգնում են իրենց այստեղի ազգականներին:

«Բացի այդ շատերն են իրենց ապրանքը արտահանում Ռուսաստան, արտադրողների զգալի մասը հումք է ստանում Ռուսաստանից, իսկ Եվրամիություն մտնելուն դեմ են արտադրողները, քանի որ մեր ապրանքները անմրցունակ են և համապատասխան չեն նրանց ստանդարտներին»,- պարզաբանեց Ահարոն Ադիբեկյանը:

Ըստ նրա ներկայացրած տվյալների՝ ՄՄ-ին միանալուն կողմ են ՀՀ քաղաքացիների 64,5%-ը, դեմ՝ 7,4%, իսկ ԵՄ մտնելուն կողմ են 16,2%, դեմ՝ 23,2%:

ՀՀԿ-ից 4-ը կողմ են, 1-ը՝ դեմ,

ԲՀԿ-ից 3-ը կողմ են,1-ը՝ դեմ,

ՀՅԴ-ից  3-ը կողմ են,1-ը՝ դեմ,

«Ժառանգության» ձայները կիսվել են՝ 1 կողմ, 1 դեմ:

«ՄՄ կողմնակիցները մեծաքանակ են, այդ է պատճառը, որ այստեղ «ԴԵՄ ԵՄ» — ի կողմնակիցներն ավելի քիչ եղան»,-նշեց սոցիոլոգը:

Ադիբեկյանի կարծիքով՝ Մաքսային Միություն մտնելը մեզ ավելի շատ օգուտ կարող է տալ, քան վնաս:

2014 թվականի մայիսի 14-ին Բագրատաշենի սահմանային հսկիչ կետով ԱՄՆ-ից բարեգործական նպատակներով փորձ է արվել ներմուծել «SIMILAC» ապրանքանիշի 2787,84 կգ սոյայի հիմքով մանկական սնունդ (խմբաքանակի համար՝ 36234RE, պիտանի է մինչև 01.07.2015թ.), որը մեզոֆիլ աէրոբ և ֆակուլտատիվ անաէրոբ մանրէներ (ՄԱՖԱՄ) և խմորասնկեր ցուցանիշների մասով չի համապատասխանել ՀՀ առողջապահության նախարարի 2010 թվականի մարտի 10-ի N06-Ն հրամանով հաստատված մանկական սննդամթերքի սննդային արժեքին և անվտանգությանը ներկայացվող հիգիենիկ պահանջներին: Մանկական սննդի ներմուծումը չի թույլատրվել:

ՀՀ ԳՆ սննդամթերքի անվտանգության պետական ծառայություն

Վարշամ- Յուրա Ղարիբյանը օրերս հերքել է, թե վաճառել է «Երևան» հեռուստաընկերությունը:

Մեր ունեցած տեղեկությամբ, նա չի վաճառել միայն հեռուստաընկերության տարածքը, ավելին՝  այն տրվում է վարձակալությամբ, իսկ TV հաճախականությունը՝ «Երևան TV» ընկերությունը, վաճառվել է, որի գնորդը Արթուր Բաղդասարյանն է:

Մոտ մեկ շաբաթ առաջ գրել էինք, որ «Նաիրիտ» գործարանում տարբեր կոնստրուկցիաների ու խողովակների վաճառքը վերսկսվել է և, մեր աղբյուրների համաձայն, գործարանում ապամոնտաժվում է բութադիենի արտադրամասից դեպի ացետիլենի արտադրամաս գնացող 400 մմ տրամագիծ ունեցող խողովակը, որը նախատեսում է անտերության մատնված քիմիական հսկայի տնօրինությունը բավականին էժան գներով օտարել:

Մինչդեռ, «Նաիրիտի» վերագործարկման ժամանակ այն շատ անհրաժեշտ է լինելու:

Մեր տեղեկություններով՝ այս հրապարակումից հետո էներգետիկայի և բնական պաշարների նախարար Երվանդ Զախարյանը միջամտել է խնդրին ու կանխել խողովակների թալանը: Դրանք այժմ, թեև ապամոնտաժված, բայց դեռ շարունակում են մնալ գործարանի սեփականությունը:

Միաժամանակ, Ե. Զախարյանն իր մոտ է հրավիրել գործարանի հաշվապահին և պահանջել, որպեսզի հաշվետվություն ներկայացվի գործարանի վարչական կազմի ու նրանց ստացած աշխատավարձերի չափի մասին:

Հարկ է նշել, որ այս խնդրին նախարարի ուշադրությունը խիստ անհրաժեշտ և, կարելի է ասել, լավ լուր է նաիրիտցիների համար: Հնարավոր է, ինչպես ժողովուրդն է ասում՝ «սայլը տեղից շարժվի», և գործարանի վրա «լույս բացվի»:

Գործարանի աշխատավարձի ֆոնդն ամսական կազմում է շուրջ 560 մլն դրամ՝ մոտ 1.3 մլն դոլար: Ու չնայած 2010-ից ի վեր «Նաիրիտն» արտադրանք չի տալիս, պետությունը ուշացումներով, մաս-մաս, բայց վճարել է այդ գումարը, և ներկայումս էլ գործարանն աշխատակիցներին պարտք է մոտ 15 ամսվա աշխատավարձ: Խնդիրն այն է, որ գործարանի բանվորներն ու ոչ ղեկավար պաշտոններ զբաղեցնող աշխատակիցներն ամսական ստանում են ընդամենը 60-80 հազար դրամ, իսկ ահա ղեկավարների աշխատավարձը աստղաբաշխական թվեր է կազմում:

168 ժամ

ԿԳ նախարար Արմեն Աշոտյանը կառավարությունից 60 մլն դրամ է ուզում ԵԿՄ «Պատանի երկրապահ» ակումբի մարտավարական, կրակային և շարային գործընթացը բնականոն կազմակերպելու համար: Կառավարությունը պատրաստվում է բավարարել խնդրանքը: Նախագծի հիմնավորման մեջ նշված է, որ 2014-ի հունվարի 1-ի դրությամբ «Պատանի երկրապահ» ակումբը ունի 60 մլն դրամի չափով պարտավորություններ. որոնք ի վիճակի չէ կատարել և դրա արդյունքում ակումբի հետագա գործունեությունը անհնար է:

Դատելով նախագծում նշված, Ֆինանսների և Արդարադատության նախարարությունների դրական եզրակացություններից՝ նախագիծը այսօրվա նիստում կհաստատվի: Նախագծի համաձայն, այս տարվա երկրորդ եռամսյակում «Պատանի երկրապահին» կհատկացվի 30 մլն դրամ, ևս 15 միլիոնական դրամ էլ երրորդ և չորրորդ եռամսյակներում: Գումարը կձևակերպվի որպես նվիրատվություն:

Հայկական ժամանակ