Երեկ ՀՀԿ ԳՄ-ի նիստից հետո կուսակցության մամլո խոսնակ Էդուարդ Շարմազանովն ասել է, որ արդեն հաջորդ շաբաթվանից սկսելու են Հայաստանի նախագահի թեկնածուի շուրջ ներկուսակցական քննարկումները: ԱԺ փոխնախագահը շեշտել է, որ հանրապետության նախագահի պաշտոնում առաջադրելու են թեկնածուի, ով կունենա լուրջ կենսագրություն և բարձր հեղինակություն: Հայաստանում լուրջ կենսագրություն ունենալը հարաբերական հասկացություն է, որովհետև նույնանում է բացառապես պետական ծառայության հետ, որտեղ մարդիկ նշանակվում են ամենևին էլ ոչ իրենց մասնագիտական կամ բարոյական հատկանիշների շնորհիվ: Ինչ վերաբերում է բարձր հեղինակությանը, ապա Հայաստանում հազիվ թե գտնվի այդպիսի որակ ունեցող գործիչ, ով առնչություն ունի այսօրվա իշխանության հետ: Մյուս կողմից` հեղինակավոր որևէ գործիչ անհարմար կզգա նախագահ ընտրվել խորհրդարանական այսօրվա գորշ մեծամասնության կողմից, առավել ևս` նախագահի պաշտոնը զբաղեցնել գործող քրեա-օլիգարխիկ համակարգում` հատկապես, որ խորհրդարանական կառավարման պարագայում նախագահի պաշտոնն արարողակարգային է և լուրջ ազդեցություն չունի երկրում որակապես նոր վիճակ ձևավորելու հարցում:

Այնուամենայնիվ, Շարմազանովի ասածները հարաբերականորեն համարենք որպես նշաձող և անդրադառնանք նախագահի հնարավոր թեկնածուներին:

ԳԱԳԻԿ ՀԱՐՈՒԹՅՈՒՆՅԱՆ

Մամուլում ամենից շատը քննարկվել է ՍԴ նախագահ Գագիկ Հարությունյանի թեկնածությունը, մանավանդ, որ մարտի 23-ին նա բոլորում է իր 70-ամյակը ու պետք է հրաժեշտ տա այսօրվա պաշտոնին: Սակայն միայն այդ հանգամանքը չէ, որ խոսում է Հարությունյանի օգտին: Ավելի կարևոր է այն փաստը, որ բոլոր երեք նախագահների պաշտոնավարման շրջանում Գագիկ Հարությունյանը եղել է իշխանության օլիմպոսում, սակայն հակադրության մեջ չէ համակարգի որևէ սեգմենտի հետ: Հայաստանի իշխանության էլիտայում դժվար է գտնել ավելի կոմպրոմիսային ֆիգուր, քան` Գագիկ Հարությունյանն է: Ընդ որում` եթե խնդիրը դիտարկենք անգամ Սերժ Սարգսյան-Կարեն Կարապետյան իրական կամ մտացածին հակադրության ֆոնին, ապա Հարությունյանի ֆիգուրը ձեռնտու է թե՛ Սարգսյանի, թե՛ Կարապետյանի համար: Գագիկ Հարությունյանը բազմիցս է դրսևորել իր հավատարմությունը Հայաստանի գործող նախագահի հանդեպ, իսկ Կարապետյանի հետ Հարությունյանների ընտանիքին կապում են խնամիական հարաբերությունները (Կարեն Կարապետյանի դուստրը Գագիկ Հարությունյանի եղբոր հարսն է):

Սակայն վերջերս Գագիկ Հարությունյանը շատերի համար անակնկալ հայտարարեց, թե նախագահ դառնալու մտադրություն չունի: Հարցին, թե ՀՀ նախագահի պաշտոնում ՀՀԿ-ն դիտարկո՞ւմ է ՍԴ նախագահ Գագիկ Հարությունյանի թեկնածությունը, Շարմազանովը պատասխանել է. «Գագիկ Հարությունյանը հերքել է, որ նման ցանկություն ունի, իսկ մենք հարգում ենք նրա որոշումը»։

Կարելի է ենթադրել, որ Գագիկ Հարությունյանի թեկնածությունը դուրս է եկել օրակարգից: Կամ Սերժ Սարգսյանը Հարությունյանին չափազանց ինքնուրույն է համարում և կասկածներ ունի նրա հավատարմության վրա այն պարագայում, երբ գործող նախագահը ֆորմալ ստատուս չի ունենա նոր իշխանության մեջ, կամ էլ` Հարությունյանի համար իսկապես նախատեսվել է նորաստեղծ Բարձրագույն դատական խորհրդի նախագահի պաշտոնը:

ԷԴՎԱՐԴ ՆԱԼԲԱՆԴՅԱՆ

Հայաստանի ԱԳ գործող նախարարը համարվում է ապագա նախագահի ամենահավանական թեկնածուներից մեկը, մանավանդ, որ ֆորմալ առումով համապատասխանում է սահմանադրական պահանջներին, չի անդամակցում կամ նույնանում որևէ կուսակցության հետ: Բացի այդ` Նալբանդյանը կարգապահ կատարող է, այսինքն` կերպարային առումով ամբողջովին բավարարում է Սերժ Սարգսյանի չափանիշներին ու նաև որոշակի ընկալում ունի միջազգային կառույցներում: Պակաս կարևոր չէ այն հանգամանքը, որ ԱԳ նախարարի պաշտոնում Նալբանդյանը «հոգնած» է և ակնհայտորեն փոխարինման կարիք ունի` հատկապես, որ չի տեղավորվում նոր իշխանության մասին Սերժ Սարգսյանի պատկերացումներում:

Էդվարդ Նալբանդյանի նախագահական հեռանկարին խանգարում է այն հանգամանքը, որ նրա նշանակումով Սերժ Սարգսյանը չի կարողանում լուծել որևէ համակարգային կամ քաղաքական խնդիր:

ԱՐԿԱԴԻ ՂՈՒԿԱՍՅԱՆ

Արդեն ունենք նախադեպ, որ ԼՂՀ նախկին նախագահը դառնում է Հայաստանի ղեկավար: Ռոբերտ Քոչարյանի նախադեպը ոչ մի լավ բան չտվեց Հայաստանին, սակայն ներհայկական հարաբերություններում և միջազգային ձևաչափերում էապես հարվածեց Ղարաբաղի սուբյեկտությանը: Այս խնդիրները, սակայն, Սերժ Սարգսյանին բացարձակապես չեն հուզում, և Արկադի Ղուկասյանի թեկնածությունը կարող է լրջորեն քննարկվել` որպես փոխհատուցում ԼՂՀ նախագահի պաշտոնին վերադառնալու նրա անհագ ցանկության: Իսկ որ Ղուկասյանը նման ցանկություն ունի ԼՂՀ 2020թ-ի նախագահական ընտրությունների կտրվածքով` չի թաքցրել անգամ անցած տարվա սեպտեմբերի 2-ին «Առաջին լրատվական»-ին տված հարցազրույցում:

Սակայն Սերժ Սարգսյանը կարող է և նպատակահարմար չհամարել Արկադի Ղուկասյանի թեկնածությունը: Նախ` նա զուրկ է որևէ խարիզմայից, բացի այդ` Սերժ Սարգսյանի իշխանության տարիներին գոնե արտաքուստ տեղի է ունենում իշխանության «դեղարաբաղիզացիա»: Սա այն կարևոր գործոններից մեկն է, որի շնորհիվ Սերժ Սարգսյանը փորձում է տարբերվել Ռոբերտ Քոչարյանից:

ՎԱԶԳԵՆ ՄԱՆՈՒԿՅԱՆ

Գուցե պարադոքսալ թվա, բայց Հանրային խորհրդի նախագահ Վազգեն Մանուկյանն այս պահին նախագահի ամենահավանական թեկնածուն է` հենց Շարմազանովի ներկայացրած չափանիշների համատեքստում:

Նախ` Մանուկյանն ինտեգրված չէ գործող համակարգին և նրա նախագահությունը չի կարող ուժեղացնել կամ թուլացնել համակարգի սեգմենտներից որևէ մեկին: Մյուս կողմից` Մանուկյանը, ինչքան էլ տարօրինակ է, այսօրվա` Հոկտեմբերի 27-ի ոճրագործության ծնունդ համակարգի հիմնական «գաղափարախոսն» է, որովհետև առաջինը Վազգեն Մանուկյանը ահաբեկիչներին «կնքեց» «ռոմանտիկ» բառով` բացառելով կազմակերպիչների վարկածը:

Մյուս կողմից` համակարգը Վազգեն Մանուկյանին պարտք է 1996-ի նախագահական ընտրությունների համար: Սերժ Սարգսյանը` իր և Լևոն Տեր-Պետրոսյանի ու Ռոբերտ Քոչարյանի կողմից Վազգեն Մանուկյանին կարող է վերադարձնել այդ պարտքը` նրա մոտ վերացնելով 96-ի բարդույթը: Իհարկե, Սերժ Սարգսյանը նաև անձնական պարտք ունի Վազգեն Մանուկյանին` 2008-ի նախագահական ընտրություններում նրա «ճիշտ» պահվածքի համար:

Այս պահին չկա որևէ տեսանելի պատճառ, որը կարող է խոցելի դարձնել Վազգեն Մանուկյանի թեկնածությունը, մանավանդ, որ Սերժ Սարգսյանը խնդիր ունի ցույց տալ, որ իր շրջապատը բաղկացած չէ միայն հաստավիզ օլիգարխներից, օդիոզ երկրապահներից ու նժդեհացած կոմսոմոլներից:

1in.am

Հանրապետության տարածքում հունվարի 12-ի ցերեկը եւ 13-ի ցերեկը սպասվում է առանց տեղումների եղանակ: 13-ի գիշերն առանձին շրջաններում ժամանակ առ ժամանակ սպասվում են տեղումներ, առանձին վայրերում՝ քամու ուժգնացում՝ 15-20 մ/վ արագությամբ: Քամին՝ հարավ-արեւմտյան՝ 3-8 մ/վ արագությամբ: Օդի ջերմաստիճանն էապես չի փոխվի:

«Հայպետհիդրոմետ»-ի տեղեկացմամբ՝ Երեւանում հունվարի 12-ի ցերեկը եւ 13-ի ցերեկը սպասվում է առանց տեղումների եղանակ: 13-ի գիշերը հնարավոր են տեղումներ, գիշերային ժամերին՝ թաց ձյան տեսքով: Մայրաքաղաքում գիշերը կդիտվի 0-2, ցերեկը՝ +8+10 աստիճան տաքություն: Ջերմաստիճանը մարզերում՝

Շիրակում՝ գիշերը` -5-10, ցերեկը` 0+5,

Կոտայքի լեռներում՝ գիշերը` -5-10, ցերեկը` 0+5,

Կոտայքի նախալեռներում՝ գիշերը` 0-2, ցերեկը` +6+8,

Գեղարքունիքում՝ գիշերը` -5-10, ցերեկը` 0+5, Լոռիում՝ գիշերը` -4+1, ցերեկը` +7+11,

Տավուշում՝ գիշերը` -1+4, ցերեկը` +9+12,

Արագածոտնի լեռներում՝ գիշերը` -5-10, ցերեկը` 0+5,

Արագածոտնի նախալեռներում՝ գիշերը` 0-2, ցերեկը` +7+10,

Արարատում՝ գիշերը`0-2, ցերեկը` +7+10, Արմավիրում՝ գիշերը` 0-2, ցերեկը` +7+10,

Վայոց ձորի լեռներում՝ գիշերը` -5-10, ցերեկը` 0+5,

Վայոց ձորի նախալեռներում՝ գիշերը` 0-2, ցերեկը` +7+10

, Սյունիքի հովիտներում՝ գիշերը` -1+3, ցերեկը` +10+14,

Սյունիքի նախալեռներում՝ գիշերը` -3+1, ցերեկը` +8+11,

Արցախում՝ գիշերը` 0+3, ցերեկը՝ +7+10:

Այսօր լրացավ Գյումրու Արցախ թաղամասի Մյասնիկյան փողոցի 188 տանը բնակվող Ավետիսյանների 7 հոգանոց ընտանիքի սպանության երրորդ տարին։ Ավետիսյանների հարազատներն այսօր ողբով, լացով բացեցին կողպված տան դռները։ Չնայած սենյակներից հանված են արյունոտ անկողինները, մաքրված են արյան հետքերը, սակայն ներս մտնել հնարավոր չէ․ փտել է հատակը, քայլելն անհնար է․ ամեն վայրկյան ոտք ու ձեռք կոտրվելու վտանգ կա։ Խոհանոցի ու հյուրասենյակի պատերին դեռ ամանորյա նմուշներից զարդարանք կա․ ներս մտնողին դիմավորում է անգլերեն լեզվով, գունեղ տառերով փակցված «Ուրախ Սուրբ Ծնունդ» արտահայտությունը, հյուրասենյակում էլ ընտանիքի 7 անդամների լուսանկարների դիմաց՝ նրանց հայացքների ներքո կախված են Ձմեռ պապն ու Ձյունանուշը՝ «Շնորհավոր Նոր Տարի» արտահայտությամբ։
Տանտիրուհու՝ Հասմիկ Ավետիսյանի քույրերը՝ Ռիտա Պետրոսյանն ու Ջուլիետա Ջալալյանը, որոնք իրենց քրոջ ընտանիքի սպանությունից հետո լքել են Հայաստանը, վերադառնում են նրանց մահվան տարելիցին, նեղվեցին, որ տունն արդեն կիսավեր է։ «Մենք մեղք չե՞նք, ամեն ինչը ծածկադմփոց եղավ, փակվեց, պրծավ գործը, մյուս տարի որ գանք, այս տունն էլ չի լինի, մենք ո՞ւր պիտի գանք, էլ ոչ մի տեղ չկարողանանք գալ, հա՞՛․․․ Գանք այդ փողոցների վրա կանգնենք, գնանք, հա՞, գոնե հատակը սարքեն քաղաքապետարանի միջոցներով, քաղաքապետ ունենք վերջը», -նեղվեց Ռիտա Պետրոսյանը։

.aravot.am

Ի պատասխան վերջին օրերին սեղմված բնական գազի, դիզելային վառելանյութի և բենզինի գնային բարձրացումների վերաբերյալ ՀՅԴ Բյուրոյի տնտեսական հետազոտությունների կենտրոնի կողմից իրականացված ուսումնասիրությունների, ՀՀ տնտեսական մրցակցության պաշտպանության պետական հանձնաժողովը պարզաբանում է.

ՀՀ հարկային օրենսգրքով, որը ուժի մեջ է մտել 2018 թվականի հուվարի 1-ից, սահմանվել է դիզելային վառելանյութի ակցիզային հարկի նվազեցում՝ մասնավորապես նախկին օրենսդրությամբ 1 տոննա դիզելային վառելանյութի համար վճարվում էր 10% ակցիզային հարկ, բայց ոչ պակաս, քան 1 տոննայի համար 35 000 դրամ, իսկ գործող նոր օրենսդրությամբ 1 տոննա դիզելային վառելանյութի համար սահմանված է 13 000 դրամ ակցիզային հարկ՝ հետևաբար 1 տոննա դիզելային վառելանյութի համար ակցիզային հարկի գումարը նվազել է առնվազն 22 000 դրամով: Սակայն, դիզելային վառելանյութի 1 տոննայի համար ակցիզային հարկի 22 000 դրամով նվազեցումը չի ենթադրում, որ 1 լիտր դիզելային վառելանյութի վաճառքի գինը կնվազի 22 դրամով, քանի որ որոշ տնտեսագետներ և վերլուծաբաններ հաշվի չեն առել բենզինի և դիզելային վառելանյութի խտության գործակիցը: Այսպես. դիզելային վառելանյութի և բենզինի ձեռքբերումները, փոխադրումը, հարկերի հաշվարկը իրականացվում է տոննայով, իսկ մանրածախ շուկայում այն վաճառվում է լիտրով՝ հետևաբար ճշգրիտ հաշվարկներ իրականացնելու համար անհրաժեշտ է տոննայից կամ կիլոգրամից անցում կատարել լիտրի: 1 տոննա բենզինը համարժեք է 1320-1335 լիտրի, 1 տոննա դիզելային վառելանյութը համարժեք է 1195-1210 լիտրի: Հետևաբար, 1 լիտր դիզելային վառելանյութի մասով ակցիզային հարկի նվազեցումը 22 դրամի փոխարեն կազմում է շուրջ 18 դրամ (22 000/1 200):

Մյուս կողմից անհրաժեշտ է հաշվի առնել այն խիստ կարևոր փաստը, որ մինչև 2018 թվականի հունվարի 1-ը դիզելային վառելանյութի ներմուծումը և իրացումը ԱԱՀ-ով չի հարկվել, իսկ դրանից հետո, ՀՀ նոր հարկային օրենսգրքով սահմանված փոփոխություններով պայմանավորված, դիզելի ներմուծումը և իրացումը հարկվում է ԱԱՀ-ով: Եթե այս ապրանքատեսակի վաճառքի նախկին գինը կազմում էր 380-390 դրամ, որից 18 դրամի չափով նվազեցվում է ակցիզային հարկը՝ այսինքն կազմում է մոտ 372 դրամ (390-18), ապա ձևավորված նոր գնին նաև պետք է ավելացնել ԱԱՀ՝ 20%-ի չափով, որի արդյունքում կստացվի մոտ 446 դրամ (372+20%):

Հանձնաժողովի կողմից մշտապես կատարվող ուսումնասիրությունների արդյունքները փաստում են, որ բացի վերոնշյալ գործոններից, դիզելային վառելանյութի և բենզինի գնագոյացման վրա ազդում են նաև արտարժույթի փոխարժեքի տատանումները, ձեռքբերման գների և տեղափոխման գների փոփոխությունները: Հանձնաժողովի կողմից բենզինի և դիզելային վառելանյութի շուկաներում իրականացված ուսումնասիրություններով ոլորտում գործունեություն իրականացնող տնտեսվարող սուբյեկտների միջև հակամրցակցային համաձայնության դեպքեր չեն բացահայտվել:

Բենզինի և դիզելային վառելանյութի շուկայում ներկայումս գործունեություն են իրականացնում «Ֆլեշ» ՍՊԸ, «Սի ՓԻ ԷՍ Օիլ Քորփորեյշն» ՍՊԸ և «Մաքս Պետրոլ» ՓԲ ընկերությունները: Նշյալ ընկերությունները բենզինի և դիզելային վառելանյութի ձեռք են բերում ՌԴ-ից, (հիմնականում «Ռոսնեֆտ» և «Լուկօիլ» ընկերություններից), Բուլղարիայից և Թուրքմենստանից, այսինքն ներկրման երկրների աշխարհագրությունը հիմնականում նույնն է:

Երևան քաղաքում գործող բենզալցակայանների մեծ մասը պատկանում է «Ֆլեշ» և «Սի Փի Էս» ընկերություններին՝ հետևաբար նույն երկրից, նույն մատակարարներից և մոտավորապես համադրելի ծախսեր իրականացնող ընկերությունների բենզալցակայաններում հեղուկ վառելիքի սակագինը թանկանում է համադրելի ժամանակահատվածներում: Մյուս կողմից մայրաքաղաքում գործունեություն իրականացնող այլ բենզալցակայանները բենզինը և դիզելային վառելանյութը ձեռք են բերում հիմնականում վերոնշյալ երկու ընկերություններից և գործում են տվյալ ընկերությունների առևտրային նշանի ներքո: Հարկ է նաև նշել, որ մայրաքաղաքում առկա են որոշ բենզալցակայաններ, որոնք բենզինը և դիզելային վառելիքը գերիշխող ընկերությունների կողմից իրացվող գնից ավելի թանկ կամ ավելի էժան գնով են վաճառք իրականացնում: Մարզերում պատկերը այլ է. որոշ մարզերում գները համապատասխանում են Երևան քաղաքի գներին, որոշ մարզերում էլ գինը թանկ է՝ հաշվի առնելով առաքման ծախսերը: Հետևաբար այն պնդումը, որ բոլոր բենզալցակայաններում բենզինի և դիզելային վառելանյութի վաճառքի գները նույնն են և այստեղ հակամրցակցային համաձայնության տարրեր կան, հիմնավորված չեն և չեն համապատասխանում իրականությանը:

ՀՀ ՏՄՊՊՀ

Հունվարի 19-ին «Ելք» դաշինքը երթ է կազմակերպում՝ ընդդեմ թանկացումների: Օրերս իր հարցազրույցներից մեկում «Ելք» խմբակցության պատգամավոր Էդմոն Մարուքյանը նշել էր՝ չի բացառվում, որ ցույցերը լինեն շարունակական։

Թեմայի շուրջ Haynews.am-ը զրուցել է Երևանի ավագանու «Ելք» խմբակցության անդամ Անի Սամսոնյանի հետ։
«Սա սոցիալական ուժեղ թեմա է, քանի որ թանկացումները վերաբերում են բոլորին․ այն հարված կհասցնի բոլորի գրպաններին, հետևաբար մարդիկ պետք է շահագրգռված լինեն, որ դրանք կանխվեն։ Մենք ներկայացնելու ենք հստակ պահանջներ՝ ակցիզային հարկի վերացում, եկամտահարկի վերաբերյալ Հարկային օրենսգրքում կատարված օրենքի փոփոխությունների վերացում։ Մենք կներկայացնենք մեր պահանջները և երթի ընթացքում ավելի հստակ կխոսենք այդ մասին»,- նշեց Անի Սամսոնյանը։

Վերջինս շեշտեց՝ նախատեսվում է, որ երթը շարունակական բնույթ կկրի։

«Չի կարելի հույս ունենալ, թե իշխանությունները միանգամից կփորձեն ինչ-որ բան փոխել․ այդպիսի հույսեր ունենալն ուղղակի միամտություն կլիներ, այդ իսկ պատճառով կարծում եմ՝ երթը շարունակական կլինի»,- նշեց Անի Սամսոնյանը՝ շեշտելով՝ եթե ժողովուրդը փողոց դուրս գա, իշխանություններն անպայման որոշակի քայլեր կկատարեն։

«Դա լինելու է համաժողովրդական պահանջ։ Այս պահին առկա թանկացումները՝ հատկապես վառելիքի շուկայում, կհանգեցնեն շղթայական թանկացումների, քանի որ տնտեսությունը սերտորեն կապված է նաև վառելիքի շուկայի հետ։ Այս վիճակը գնալով խորանալու է։ Դա նաև ենթակառուցվածքների աշխատանքին է վնաս հասցնելու՝ հատկապես տրանսպորտի աշխատանքին։

Որոշ միջհամայնքային տրանսպորտային գծեր հրաժարվում են աշխատել, իրենք տրանսպորտի սակագինը թանկացրել են։ Ապարանի բնակիչներից արդեն ահազանգեր ենք ստացել՝ Ապարնում կան տրանսպորտային գծեր, որոնք արդեն չեն աշխատում կամ ուղևերներից ավել գումար են պահանջում, այսինքն՝ սակագինն են թանկացրել»,- եզրափակեց Անի Սամսոնյանը։

haynews.am

Կառավարության առաջիկա նիստի օրակարգում ընդգրկված է «Աշխատանքային օրենս­գրքում լրացում կատարելու մասին օրենք­ի նա­խագծի վերա­բեր­­յալ Հայաս­տա­նի Հան­րա­­­­­պե­տու­թյան կա­ռա­վարության առա­­ջար­­­կության նախագծի մասին» հարցը: Դրանով նախատեսվում է «Աշխատանքային օրենսգրքում» հաշմանդամության զին­­վորական կենսաթոշակի իրավունք ունեցող նախկին զինծառայողներին և զոհված (մա­հա­ցած) զինծառայողների ընտանիքների անդամներին հաստիքների կրճատման դեպքում աշ­­խատանքում մնալու նախապատվություն տալ՝ հավասար որակավորման դեպքում:

Ըստ այդմ, նոր մաս է ավելանում, ըստ որի նախապատվություն է տրվելու ՀՀ պաշտպանության ժամանակ կամ ծառայողական պարտականությունները կատարելիս զոհված, 1-ին կամ 2-րդ խմբի հաշմանդամություն ունեցող զինծառայողի ընտանիքի անդամներին` ծնողին, կնոջը, երեխային, ինչպես նաև ընտանիքի անդամ հանդիսացող քրոջը և եղբորը, եթե նրանց ընտանիքում ինքնուրույն վաստակով այլ աշխատող չկա»:

Նախագիծը վաղը կառավարության հա­վանությանն արժանանալուց հետո կներկայացվի Ազ­գա­յին ժողովի քննարկմանը:

Հայաստանի Հանրապետության քաղաքացիությունից հրաժարված անձանց թիվը վերջին տարիներին շեշտակի աճել է։ Ոստիկանության անձնագրային եւ վիզաների վարչությունից NEWS.am–ին տրամադրված տվյալների համաձայն՝ 2017 թվականի դրությամբ ՀՀ քաղաքացիությունից հրաժարվելու վերաբերյալ ոստիկանության անձնագրային եւ վիզաների վարչություն դիմում է ներկայացրել 3823 քաղաքացի։ Այսպիսով 2012 թվականին 968 դիմում է ստացվել, 2013–ին՝ 1461, 2014–ին՝ 2407, 2015–ին՝ 2487, 2016–ին՝ 3863, 2017–ի դեկտեմբերի մեկ դրությամբ՝ 3823 դիմում։ Այսինքն՝ 2012 թվականի ընտրություններից մինչեւ 2017 թվականի ընտրությունները, երբ իշխանության է եկել կրկին Հանրապետական կուսակցությունը, ՀՀ քաղաքացիությունից հրաժարվել է 15009 քաղաքացի։ Քաղաքացիությունը դադարեցրած անձանց սեռի եւ տարիքի մասին ոստիկանությունը տվյալներ չի փոխանցել՝ հիմնավորելով, որ այդպիսի վիճակագրություն չեն իրականացնում։ Աժ ՀՀԿ խմբակցության պատգամավոր, նախկին ոստիկանապետ Ալիկ Սարգսյանը կարծում է, որ սա լուրջ ցուցանիշ է, եւ իշխանությունը պետք է այն ընդունի որպես երկրի առջեւ ծառացած թիվ մեկ խնդիր։ Նախկին ոստիկանապետը չի ժխտում, որ այս ցուցանիշի զգալի հատվածը բանակից խուսափելու պատճառով է հրաժարվել քաղաքացիությունից։

«Սա շատ մեծ թիվ է մեր երկրի համար։ Յուրաքանչյուն իր պատճառն ունի երկրից գնալու։ Իմ կարծիքով, իմ տպավորությամբ, մի մասը բանակից խուսափելու պատճառով է, ինչն ուղղակի անընդունելի է։ Բայց ես տեղեկություն չունեմ պատճառների մասին, պարզապես ինձ այդպես է թվում, մի մասն էլ սոցիալական պատճառով, քանի որ դրսում աշխատանք կա, լավ են վարձատրվում եւ ապագայում ինչ–որ բանի հասնելու հույս ունեն, թողնում գնում են։ Ես համոզված եմ, որ այս մարդկանց մի մասը հետ է գալու շատ շուտ, դա իմ համոզմունքն է, մի քիչ որ տնտեսական վիճակը բարելավվեց, մարդիկ կարողանան աշխատել ապրել, կվերադառնան հայրենիք։ Անպայման իշպխանությունը պետք է համարի թիվ մեկ խնդիր երկրի համար, որը լուծման կարիք ունի»։ Դիտարկմանը՝ ՀՀԿ–ի իշխանության վերջին հինգ տարիների ընթացքում է այս թիվը աճել, եթե շարունակում է իշխանության մնալ ՀՀԿ–ն, արդյո՞ք դա չի նշանակում, որ միտումն ավելանալու է, պատգամավորն արձագանքեց. «Դուք գտնո՞ւմ եք, որ եթե այլ ուժ իշխանության լիներ, այդ պրոցեսը դադարելո՞ւ էր, մարդիկ չէին գնալո՞ւ։ Քանի որ զուգադիպել է ՀՀԿ իշխանության հետ, ուրեմն վերագրում եք իշխանությա՞նը։ Ես չեմ կարծում, որ դա պայմանավորված է ՀՀԿ–ի մեղքով»։ Ըստ Ալիկ Սարգսյանի՝ այս հոսքը հնարավոր է կանխել մի դեպքում, եթե մարդկանց բացատրեն, որ ներդրումներ պիտի արվեն, աշխատատեղեր բացվեն։ Ալիկ Սարգսյանը ոգեշնչվել է նման հայտարարություններից, բացատրություններից եւ հավատում է, որ այս տարվանից ինչ–որ բան կփոխվի տնտեսական ոլորտում, աճի ցուցանիշները կկրկնապատկվեն։ Ալիկ Սարգսյանին հիշեցրինք, որ արդեն մեկ ցուցանիշի աճ արձանագրվել է՝ սպառողական ապրանքների գները։

Հելսինկյան Քաղաքացիական Ասամբլեայի Վանաձորի գրասենյակը ներկայացնում է 2017թ. ընթացքում ՀՀ Զինված ուժերում և ԼՂՀ Պաշտպանության բանակում արձանագրված մահացության դեպքերի վերաբերյալ տեղեկանք:

Տեղեկանքում ներկայացված են 2017 թ.-ին զանգվածային լրատվամիջոցներով և պաշտոնական աղբյուրներով տարածված, ինչպես նաև մահացած զինծառայողների հարազատների կողմից տրամադրված տեղեկությունները:

ՀՔԱ Վանաձորի գրասենյակի ուսումնասիրությունները ցույց են տվել, որ նշված ժամանակահատվածում արձանագրվել է մահացության 60 դեպք, 55-ով հարուցվել են քրեական գործեր:

Դրանցից միայն 50-ի դեպքում է առաջնային տեղեկատվություն տարածվել պաշտոնական աղբյուրներով, 10 դեպքի մասին տեղեկություն է տարածվել նախ լրատվամիջոցներով, ապա 9 դեպքում տեղեկատվությունը հաստատվել է պաշտոնատար անձանց կողմից:

1 դեպք լուսաբանվել է միայն լրատվամիջոցներով:

2017-ին արձանագրված մահացության դեպքերի գերակշիռ մասը՝ 38 դեպք, արձանագրվել է Լեռնային Ղարաբաղում:

Հրադադարի ռեժիմի խախտման հետևանք են եղել արձանագրված դեպքերից 22-ը:

2016 թ.-ի համեմատ՝ 2017 թ.-ին հարադադարի ռեժիմի խախտման հետեւանքով մահվան դեպքերը նվազել են 13-ով, դժբախտ պատահարների հետեւանքով մահվան դեպքերը նվազել են 5-ով, սպանության դեպքերը նվազել են 5-ով, ինքնասպանության կամ ինքնասպանության հասցնելու պատճառով մահվան դեպքերը նվազել են 5-ով: Դրան հակառակ՝ 1-ով աճել է առողջական խնդիրների հետևանքով մահվան դեպքերի թիվը:

Վերջին 7 տարիների կտրվածքով ոչ հրադադարի ռեժիմի խախտման հետևանքով մահացության դեպքերի թիվը նվազել է 2014 և 2015 թթ.-ին, իսկ 2016-ին ու 2017-ին կտրուկ աճել է:

ՀՔԱՎ զեկույցն ամբողջությամբ՝ այստեղ

armtimes.com — ն իր խմբագրականում գրում է.

Երեկ հերթական ողբերգական լուրը եկավ սահմանից: Արցախի Հանրապետության Պաշտպանության նախարարության մամուլի ծառայությունը հաղորդագրություն տարածեց, որտեղ ասվում էր, որ  «հունվարի 7-ին՝ ժամը 13:20-ի սահմաններում, ՊԲ հյուսիսարեւելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու վիրավորում է ստացել ՊԲ զինծառայող, 1998թ. ծնված Վաչե Նվերի Չիլինգարյանը»:

Հաղորդագրությունն այլ տեղեկություններ եւ մանրամասներ չէր պարունակում: Այստեղ չկար նաեւ որեւէ տեղեկություն վիրավորների մասին: «Հայկական Ժամանակ»-ի թղթակիցը, սակայն պարզեց, որ նույն միջադեպի ժամանակ եւս երկու զինծառայող վիրավորվել է: Դա տեղի ունեցավ հետեւյալ կերպ: Զոհված զինծառայողը Գեղարքունիքի մարզի Շորժա գյուղից էր, եւ ահա Շորժայի գյուղապետին դեպքի մասին հարցեր տալով պարզվել է, որ գյուղում տարածված խոսակցությունների համաձայն՝ Վաչեն գնացել է վիրավոր ընկերոջը օգնելու եւ այդ ժամանակ է զոհվել: Գյուղապետը հայտնել է, որ իրենց տեղեկություններով ունեցել ենք մեկ զոհ երկու վիրավոր:

Սա տարօրինակ էր, որովհետեւ ԱՀ ՊՆ հաղորդագրության մեջ վիրավորների մասին որեւէ խոսք չկար: «Հայկական ժամանակ»-ի թղթակցի բոլոր փորձերը՝ պաշտոնական հաստատում ստանալ երկու վիրավորների մասին, երկար ժամանակ ապարդյուն էին անցնում: Եւ միայն գյուղապետի խոսքերի հրապարակումից հետո ԱՆ ՊՆ-ն հաստատեց վիրավորների փաստը, իսկ արդեն օրվա ընթացքում ՀՀ ՊՆ ԶՈՒ ԳՇ պետ Մովսես Հակոբյանը Կենտրոնական հավաքակայանում լրագրողների հետ զրույցում մանրամասներ ներկայացրեց դեպքից: «Փաստ է միայն, որ զինծառայողը խոցվել է հակառակորդի դիպուկահարի կողմից, սակայն թե դա ինչպես է ստացվել, դեռևս պետք է պարզենք: Զինծառայողին օգնություն ցուցաբերելու համար մեկնած հրամանատարը վիրավորվել է: Դեպքի վայր մեկնած օպերատիվ խմբի ավտոմեքենան ևս հայտնվել է հակառակորդի կրակի տակ, և զինվորներից մեկը վիրավորում է ստացել: Վիրավորների վիճակը շատ թեթև է»,- ասել է Մովսես Հակոբյանը:

Այսինքն, եթե գյուղապետը պատահմամբ չհայտներ, որ բացի մեկ զոհից ունենք նաեւ երկու վիրավոր, հնարավոր է՝ այդ մասին այդպես էլ չիմանայինք: Ինչո՞ւ: Այս հարցին կարող են լինել բազում բազմաթիվ պատասխաններ: Սակայն ՊՆ-ի ոչ պաշտոնական բացատրությունն այն է, որ թեթեւ վիրավորում ստացած զինվորների մասին հատուկ հաղորդագրություն չի տարածվում: Համենայնդեպս, այսպես են բացատրում իրավիճակը ՊՆ պաշտոնյաները մասնավոր զրույցներում:

Սա կարող էր բավարարող բացատրություն լինել: Սակայն բոլոր հիմքերը կան կասկածելու, որ տվյալ բացատրությունն իրականության հետ կապ չունի: Իրականում սահմանային դեպքերը թաքցնելու հատուկ միտում է նկատվում, եւ սա սկսվել է դեռեւս այն պահից, երբ որոշում կայացվեց սահմանային վիճակի մասին տեղեկատվություն տրամադրել ոչ թե ամենօրյա ռեժիմով, այլ՝ շաբաթը մեկ անգամ:

Բանն այն է, որ երեկ «Հայկական ժամանակ»-ի լրագրողը բոլորովին այլ պատահականությամբ պարզեց, որ հունվարի 4-ին նույնպես պատահար է գրանցվել Արցախում: Մասնավորապես՝ Արցախի ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասում ականապայթյունից երկու զինծառայող է վիրավորում ստացել: Զինծառայողներից մեկը դեռեւս գտնվում է Ստեփանակերտի հոսպիտալում. նրա աջ ոտքն անդամահատել են, վիճակն այժմ գնահատվում է միջին ծանրության, կյանքին վտանգ չի սպառնում: Մյուս զինծառայողին տեղափոխել են ՀՀ ՊՆ Կենտրոնական զինվորական հոսպիտալ, անդամահատել են նրա ձախ ոտքը: Այս դեպքի մասին, սակայն նույնպես որեւէ պաշտոնական տեղեկատվություն չի տարածվել: Այնինչ, երկու հոգու ոտքի անդամահատումով ավարտված դեպքը լավագույն ցանկության պարագայում անգամ հնարավոր չէ թեթեւ վիրավորում համարել: Այս դեպքի մասին հանրությունն այդպես էլ չէր իմանա, եթե «ՀԺ»-ի լրագրողները դուրս չգային ականապայթյունից վիրավորած զինվորների հետքի վրա:

Ինչո՞ւ է ՊՆ-ն որոշել թաքցնել սահմանային դեպքերը՝ այդ թվում ծանր վիրավորներին: Ո՞ւմ է խաբում, ինչո՞ւ է խաբում, ո՞ւմ աչքին է ուզում թոզ փչած լինել: Իմաստը ո՞րն է, ընդհանրապես: Եթե այս մարտավարության համար ինչ-որ գիգանտ բացատրություններ ունեն անգամ, դա չի կարող գոհացնել հանրությանը միայն այն պարզ պատճառով, որ այս գործելաոճով ՀՀ-ն եւ Արցախն ընդօրինակում են Ադրբեջանին, որտեղ բանակում կատարվածի մասին ոչ մի հավաստի պաշտոնական տեղեկատվություն գոյություն չունի:

Հայաստանի հանրությունը մինչ այժմ մեծամասամբ վստահել է պաշտոնական աղբյուրներին, եւ դրա շնորհիվ էր նաեւ, որ ապրիլյան պատերազմի օրերին ՊՆ-ին հաջողվեց տեղեկատվական դաշտում փայլուն առավելություն գրանցել: Դժվար է ասել, թե այդ ինչ նպատակ կարող է լինել, որն արդարացնի հանրության վստահությունը հետեւողականորեն կորցնելու այս քաղաքականությունը: Եթե այսպես շարունակվի, երկու պաշտպանական գերատեսչությունների խոսքը զոհերի, վիրավորների եւ դեպքերի ու հանգամանքների մասին գրոշի արժեք չի ունենա, եւ մարդիկ՝ հատկապես լրագրողները ստիպված կլինեն սեփական հետաքննություններն իրականացնել, պարզելու համար՝ արդյո՞ք այսինչ օրը սահմանում զոհ կամ վիրավոր ունեցել ենք, թե՞ ոչ:

armlur.am. Դեռևս նախորդ տարվա նոյեմբերից հանրապետությունում շրջանառվում են գրիպի հարուցիչներ՝ գրիպ B, գրիպ A։ Առավել խոցելի են երեխաները:

ArmLur լրատվականը եղավ Մուրացան հիվանդանոցային համալիրում, որտեղից պարզ դարձավ, որ այստեղ սուր շնչառական վարակով բուժում են ստանում 120-130 հիվանդներ, որից 74-ը մինչև մեկ տարեկան երեխաներն են։ Հիվանդանոցային համալիրի գլխավոր բժիշկ Բագրատ Բավեյանը ArmLur.am-ի հետ զրույցում նշեց, որ այս պահի դրությամբ ունեն սուր շնչառական վարակիներով հիվանդացության բարձրացում և դիմելության ավելացում։

Նրա խոսքով, նախատոնական և տոնական օրերին եղել է հիվանդության պիկը, սակայն թվերը դրանից այնքան էլ մեծ տատանումներ չեն ունեցել։ Գլխավոր բժիշկը վստահեցրեց, որ այս տարի ծանր դեպքեր չեն եղել։

ArmLur.am-ի հետ զրույցում նույն հիվանդանոցային համալիրի մանկաբուժական կլինիկայի ղեկավար Կարինե Սիմոնյանը հայտնեց, որ կլինիկան ունի 48 հիվանդի սպասարկելու հնարավորություն, սակայն սպասարկում են 75-ի։

ArmLur լրատվականը ֆիքսեց, որ բուժկենտրոնի միջանցքներում հիվանդների հերթեր են գոյացել: Եվ ակնհայտ է, որ հիվանդերի թիվը օրեցօր ավելանում է:

Մանրամասները` ArmLur.am-ի տեսանյութում:

https://www.youtube.com/watch?v=1Vr1LPfp3XE