Ի լրումն ս/թ.  հունիսի 17-ի իրազեկման՝ ՀՀ ոստիկանությունը մասնավոր պահնորդական ծառայություններ մատուցող բոլոր կազմակերպություններին տեղեկացնում է, որ «Պետական տուրքի մասին» ՀՀ օրենքի 19.5 հոդվածով սահմանված` «Մասնավոր պահնորդական գործունեություն իրականացնելու համար լիցենզիա տալու և դրա ժամկետը երկարաձգելու համար պետական տուրքի դրույքաչափերը» վճարելու համար բացված են հետևյալ գանձապետական հաշիվները.
1. Մասնավոր պահնորդական գործունեություն իրականացնելու լիցենզիա տրամադրելու համար` 9 0 0 0 0 5 1 6 8 5 2 2 (167)
2. Մասնավոր պահնորդական գործունեություն իրականացնելու լիցենզիան վերաձևակերպելու կամ կրկնօրինակը տալու համար ` 9 0 0 0 0 5 1 6 8 5 1 4 (167):
Ծանոթություն. Հաշվեհամարների վերջին (167) թիվը ստացողի` ՀՀ ոստիկանության կոդն է:

Հայաստանի ատոմային էլեկտրակայանը պլանային նորոգմամբ պայմանավորված սեպտեմբերի սկզբից սկսած 45 օրով կդադարեցնի աշխատանքը:

Ինչպես հայտնում է ՀՀ էներգետիկայի և բնական պաշարների նախարարության լրատվական ծառայությունը, հուլիսի 4-ին ՀՀ էներգետիկայի և բնական պաշարների նախարար Երվանդ Զախարյանն այցելել է Հայաստանի ատոմային էլեկտրակայան, որտեղ տեղի է ունեցել բաժնետերերի տարեկան հաշվետու ժողովը:

Ժողովի ընթացքում ներկայացվել է 2013 թվականին կատարված աշխատանքների հաշվետվությունը, ինչպես նաև, 2014 թվականի սեպտեմբերին նախատեսված վերալիցքավորման, տարեկան պլանային վերանորոգման, ինչպես նաև անվտանգության մակարդակի բարձրացման նպատակով միջոցառումների ներդրման համար իրականացվող աշխատանքների ընթացքը:

ՀԱԷԿ-ում կատարած շրջայցից հետո, լրագրողներին տված հարցազրույցի ժամանակ, նախարար Երվանդ Զախարյանը նշել է, որ Հայաստանի և Ռուսաստանի միջև կստորագրվի պայմանագիր, որի համաձայն Ռուսաստանը հայկական ատոմային էլեկտրակայանի շահագործման ժամկետը երկարացնելու աշխատանքների համար կտրամադրի 300 մլն դոլար վարկ: Նրա խոսքով` Ռուսաստանի հետ բանակցությունները մոտենում են ավարտին: «Խոսքը ցածր տոկոսադրույքով և երկարաժամկետ վարկավորման մասին է»,- ասել է նախարարը:

Անդրադառնալով ՀԱԷԿ-ի սեպտեմբերին սպասվող հերթական պլանային նորոգման աշխատանքներով պայմանավորված կայանի աշխատանքի դադարեցմանը՝ նախարարն ասել է, որ պետք է փորձեն հնարավորինս կրճատել այդ ժամկետները, քանի որ կայանի ժամանակավոր կանգնեցումը լուրջ հետևանքներ է ունենում:

«Իհարկե, դա չպետք է լինի անվտանգության հաշվին»,- ասել է նախարարը և վստահեցրել նաև, որ ՀԱԷԿ-ի պլանային վերանորոգումն ազդեցություն չի ունենա արդեն իսկ բարձրացված սակագների վրա, քանի որ Հանրային ծառայությունները կարգավորող հանձնաժողովը, սակագները բարձրացնելիս արդեն իսկ հաշվարկել էր նաև այդ աշխատանքները:

Երվանդ Զախարյանը հիշեցրել է, որ նախորդ տարի չնախատեսված կանգառների հետևանքով մոտավորապես 320 մլն կՎտ/ժամ էլեկտրաէներգիա քիչ էր արտադրվել ՀԱԷԿ-ում, ինչի հետևանքով ՀԷՑ-ն ավելի թանկ էլեկտրաէներգիա էր գնել «Հրազդան ՋԷԿ»-ից և Հրազդանի 5-րդ էներգաբլոկից:

Երվանդ Զախարյանի խոսքով՝ ՀԱԷԿ-ն այսօր ունի կուտակված ֆինանսական պարտավորություններ: «Դրանց ծավալը շուրջ 9-9,5 մլրդ դրամ է: Ֆինանսական պարտավորություններն առաջացել են փոխառությունների ու վարկային միջոցների կառավարման արդյունքում: Մենք պետք է կարողանանք հետագա տարիներին ավելի արդյունավետ կառավարում իրականացնել»,- ասել է նախարարը:

Նախարարն անդրադարձել է նաև նոր ատոմակայանի կառուցմանը՝ տեղեկացնելով, որ նոր բլոկի արժեքը կկազմի մոտ 4,5 մլրդ դոլար: «Դրա մի մասը Ռուսաստանի կառավարությունը կտրամադրի ապրանքների, սարքավորումների տեսքով, իսկ մյուս մասը մենք կլրացնենք այլ երկրների հետ բանակցություների արդյունքում ձեռք բերված ֆինանսական օժանդակությունների միջոցով»,- ասել է նա։

Երվանդ Զախարյանը նաև նշել է, որ ՀԱԷԿ-ի նոր էներգաբլոկի շինարարությունը նախատեսվում է սկսել 2018-2019 թվականներին:

Հանրային ծառայությունները կարգավորող հանձնաժողովն ամենադեմն է եղել էլեկտրաեներգիայի թանկացմանը. այս մասին այսօր, լրագրողների հետ հանդիպման ժամանակ նշել է «Հանրապետական» խմբակցության ղեկավար Վահրամ Բաղդասարյանը:

«Պատահական չէր, որ հանձնաժողովի նիստից առաջ շատ երկար քննարկում է եղել հանձնաժողովում, և ելքերն էին փնտրում: Հանձնաժողովը մինչև վերջ ընդդիմացել է, սակայն վերջնական արդյունքում համոզվեցին, որ այլընտրանք չկա, և եկան այն եզրակացությանը, որ այդ թանկացումը պետք է լինի այս փուլում»,- ասել է նա:

Այն հարցին, թե ՀՀԿ անդամները հնարավո՞ր է այսօր միանան մեկ ժամով էլեկտրաէներգիան անջատելու ակցիային, Վահրամ Բաղդասարյանը պատասխանել է.  «Եթե զգայինք, որ չհիմնավորված է թանկացումը, մենք առաջինը կմիանայինք ակցիային»:

Այսօր ՀՀ Սահմանադրության օրն է: 1995թ. հուլիսի 5-ին Հայաստանի պատմության մեջ առաջին անգամ անցկացվեց համաժողովրդական հանրաքվե` ՀՀ Սահմանադրության հաստատման համար, որն ընդունվեց գրեթե միաձայն:

Սահմանադրությամբ Հայաստանի Հանրապետությունը վերջնականապես  հռչակվեց ժողովրդավարական, սոցիալական, իրավական պետություն` հստակորեն տարանջատվեցին իշխանության երեք ճյուղերի (օրենսդիր, գործադիր և դատական) գործառույթները, մարդու և քաղաքացու իրավունքները և ազատություններն ամրագրվեցին երկրի մայր օրենքով:

Հայաստանի Հանրապետության տոների և հիշատակի օրերի մասին օրենքի համաձայն` 2001 թ. հուլիսի 24-ի որոշմամբ, հուլիսի 5-ը նշվում է որպես Սահմնադրության օր և հայտարարված է ոչ աշխատանքային:

Սերժ Սարգսյանի ուղերձը Սահմանադրության օրվա առթիվ.

Սիրելի՛ հայրենակիցներ,

Շնորհավորում եմ ձեզ Սահմանադրության օրվա կապակցությամբ:
Մեր երկրի Մայր օրենքն արտահայտիչն է մեր ժողովրդի ընտրած ուղու՝ ազատ, ժողովրդավարական հասարակություն և սոցիալական ու իրավական պետություն կառուցելու ճանապարհի: Անկախության ձեռքբերումից ի վեր կատարվել է հսկայական աշխատանք, մենք հասունացել ենք որպես հասարակություն, ամրացել որպես պետություն:

Երկրի քաղաքական կյանքում եղել են նույնիսկ ճգնաժամային իրավիճակներ, բայց անգամ այդ դեպքերում Սահմանադրությունը դրսևորել է իր կենսունակությունը և բացահայտել մարտահրավերները հաղթահարելու հնարավորությունները:

Այս ընթացքում հասունացել է նաև երկրում համակարգային փոփոխություններ իրականացնելու անհրաժեշտությունը: Առանց սահմանադրական նոր բարեփոխումների դրանք չեն կարող լինել ամբողջական և համընդգրկուն: Այսօր սահմանադրական բարեփոխումների նոր առաջարկներն ակտիվորեն քննարկվում են մասնագետների և շահագրգիռ անհատների ու կազմակերպությունների կողմից:

Սիրելի՛ հայրենակիցներ,

Կրկին շնորհավորում եմ ձեզ պետական նշանակալի տոնի առթիվ: Մաղթում եմ բոլորիս, որ Հայաստանի Հանրապետության Սահմանադրությունն ամեն օր իրականացվի սրբությամբ և անշեղորեն ծառայի քաղաքակիրթ ապրելակերպի ու զարգացման նպատակներին:

Սևանի հիվանդանոցում արտակարգ իրավիճակ է: Այսօր առավոտյան փոխմարզպետ Անդրանիկ Հակոբյանը, մարզպետարանի այլ պատասխանատուներ եկել էին հիվանդանոց՝ հորդորելու կոլեկտիվին չխաթարելու բուժհիմնարկի բնականոն աշխատանքը: Երեկ տնօրենի նոր ժամանակավոր պաշտոնակատարին ներկայացնելուց հետո, կոլեկտիվը  բոյկոտել էր աշխատանքը, և գնացել էր քաղաքապետի մոտ՝ բողոքելու:

Նրանք պնդում են, որ իրենց մեկուկես ամսվա համար  նոր ԺՊ պետք չի, իրենք գոհ են Մարգարյանից և սպասում են օգոստոսի 20 -ին կայանալիք մրցույթին:

Լաբորատորիայի  բժիշկ Գոհար Սահակյանն ասում է. «Նոր ԺՊ-ն ինչ պիտի անի, երբ կադրեր չկան, բուժսարքավորում չկա , Սևանը համարվում է խաչմերուկ, վտանգավոր գերծանրաբեռնված գոտի ամառվա սեզոնին, ընդունում ենք, բայց մեզ բուժսարքավորումներ ու բժիշկներ են պետք, թո՛ղ դրանք տրամադրեն պիկ սեզոնին, տնօրենն են տալիս, որ ինչ անի: Ուզում են օգնել, թող հիվանդանոցի ճանապարհը սարքեն, կտուրը քամին տարավ մոտ 8 մետր, հիմա ահավոր վիճակում է, ասում են ձեր միջոցներով արեք, թող դրա մասին մտածեն: Ամոթ է, որ այսօր մարզի ոչ մի հիվանդանոց պատրաստ չէ հիվանդ ընդունել, ամոթ է, երբ մարդիկ իրենց հիվանդներին տանում են Հրազդանի հիվանդանոց, մենք ոչ մեկից պակաս բժիշկ չենք, որ աշխատում ենք ահավոր պայմաններում»:

Արդեն 9 ամիս է (2013թվականի հոկտեմբերի 20-ից) Սևանի հիվանդանոցը ղեկավար չունի: Ժամանակավոր պաշտոնակատարը փոխտնօրեն Արսեն Մարգարյանն է, մինչև տնօրենի թափուր պաշտոնի համար մրցույթի անցկացումը, որ նշանակված է օգոստոսի 20 -ին, մեկ մրցույթ՝ ապրիլի 8-ին կայանալիքն արդեն հետաձգվել է: Քանի որ այդ օրը փոխմարզպետի առողջական վիճակը հանկարծակի վատթարացել է և քվորում չի ապահովվել, ինչը մի փոքր տարօրինակ է թվացել քանի որ ինչպես բուժաշխատողներն են պնդում , ինսուլտ տարած մարդը մեկ օր հետո աշխատանքի չէր կարող գնալ:

Մեր ունեցած տեղեկությամբ, ձգձգումը միտումնավոր է, մարզպետն ամենայն հավանականությամբ չի գտնում այն արժանավորին, որը կկարողանա ապահովել  իր պահանջմունքները, իսկ նրա« ախորժակի» մասին, մարզում բոլորը գիտեն: Ստացվում է այնպես, որ մի ամբողջ բուժհիմնարկի ճակատագիր կախված է մարզպետի քմահաճույքից:

Կաթվածահար վիճակում են Գավառի հիվանդանոցը, Մարտունու  հիվանդանոցը, որի տնօրենը չդիմանալով Ռաֆիկ Գրիգորյանի ինտրիգներին, թողել է պաշտոնը: Ճամբարակի հիվանդանոցը ևս այսօր տնօրեն չունի, թափուր են մարզի մի շարք ամբուլատորիաների տնօրենների պաշտոնները: Մարզի բուժհիմնակների աշխատանքը կաթվածահար արած մարզպետը , տարբեր պատրվակներով ԺՊ ների ժամկետները երկարաձգելով, անխռով սպասում է, միայն ինքը գիտե թե ինչի:

Կոլեկտիվը չի ընդունում մարզպետի կողմից ուղարկված գլխավոր բժշկի թեկնածուին՝ Պետրոս Մանուկյանին: Նոր թեկնածուն ՊՆ բուժվարչության պետն է եղել, Վարդենիսի հոսպիտալի նախկին գլխավոր բժիշկը, ներկայիս մարզպետի խորհրդականը, որն ինչ-որ պատմությունների պատճառով ուղարկվել է թոշակի: Այսօր կոլեկտիվը նրանից հետ է պահանջել կնիքն ու տնօրենի կաբինետի բանալիները, որը հանձնելուց հետո, Պետրոս Մանուկյանը հեռացել է հիվանդանոցից:

Բուժանձնակազմը վրդովված է. «Եթե մրցույթը կայանալու է օգոստոսի 20-ին, ինչու է մարզպետը Պետրոս Մանուկյանի հրամանը տվել մինչև հոկտեմբերի 22-ը: Մեզ հետ անազնիվ խաղ են խաղում»:

Բակում հավաքված Սևանի ավագանու անդամները, շարքային սևանցիներ, եկել էին հասկանալու թե ինչ է կատարվում: Նրանք դեմ են իրենց հիվանդանոցում ուրիշ բնակավայրից տնօրենի նշանակմանը:

«Երբ դանակահարություն կամ խեղդված էին բերում էլի սևանցիներն են միջամտում, որ շոկի մեջ հայտնված հարազատները մեր բժիշկներին չվիրավորեն, չծեծեն, երբ հարբած հանգստացողները հարձակվում են հիվանդանոցի վրա, էլի գիշերով մեր անձնակազմն է հավաքվում Մարգարյանին կանչում հիվանդանոց, էլի նախկին տնօրեն Նիկողոսյանն  է կարողանում իր հեղիկնակությամբ զսպել մարդկանց, հիմա Վարդենիսից ոնց եք նրան բերելու գիշերվա կեսին, կամ Մանուկյանը այն մարդն է, որ ինչ-որ բան կարո՞ղ է անել»,-հարցնում էին տարակուսած բժիշկները:

Մեր թղթակիցը զրուցել է Գեղարքունիքի փոխմարզպետ Անդրանիկ Հակոբյանի, նորանշանակ տնօրեն Պետրոս Մանուկյանի և Սևանի հիվանդանոցի ներկայիս տնօրենի ԺՊ Արսեն Մարգարյանի հետ:

***

Փոխմարզպետ  Հակոբյան.

-Ի՞նչ է  կատարվում այստեղ.

— Առանձնապես ոչինչ չի կատարվում, ընդամենն ամառային հանգստի հետ կապված քննարկում ենք: Գիտեք, որ ամռանը Սևանը ծանրաբեռնված է լինում՝ մասնավորապես շաբաթ-կիրակի օրերին ամբողջ հանրապետությունը Սևանի ափում է լինում: Որպեսզի բժշկական ծառայությունն արդյունավետ կազմակերպվի, քննարկում ունեցանք ժամանակավոր պաշտոնակատարի՝ Մարգարյան Արսենի հետ: Մրցույթն օգոստոսի 20-ին  է: Մինչ այդ անելիքներ կան. շտապօգնության մեքենաներից 2-ն են աշխատում, ասում եմ, պարոն Մարգարյան, ի՞նչ է նշանակում 2-ն են աշխատում, ասում է՝ ֆինանս չկա, միջոց չկա, Հարգելիս, նախահաշիվը հաստատված է բյուջեով, ինչի մասին է խոսքը: Ընդհուպ ասեմ, ժամանակավոր պաշտոնակատարը աշխատասենյակ չունի, մի փոքրիկ աշխատասենյակում է աշխատում, հիմա հետևությունները թողնում եմ ձեզ: Եթե նա գնացել է, նախորդը, բնականաբար, հանձնել է մինչև մրցույթը կայանալը, պարտավոր էր աշխատասենյակով հանձնել: Նիկողոսյանն էր տնօրենը, հիմա, քանի որ ժամկետը լրացել է, դրվել է փոխտնօրենի վրա, մի անգամ մրցույթը չկայացավ՝ հանձնաժողովների անդամների բացակայության պատճառով, մրցույթը կլինի օգոստոսի 20-ին:

Մարզպետին ներկայացվեց, որ իրականում այսպիսի վիճակ է, որ խնդիրը միգուցե ավելի ցավալի հետևանքներ ունենա, Պետրոս Մանուկյանը, որը մարզպետի խորհրդական է, ժամանակավորապես նշանակվեց մինչև մրցույթը, որպեսզի ամառային պիկն առանց ցնցումների, փորձանքների անցկացնի:

-Իսկ կոլեկտիվն ինչո՞ւ է բողոքում.

-Կոլեկտիվն  ի նկատի ունի, որ երևի բողոքելու է իրենց ղեկավարը.

-Ո՞վ Մարգարյանը.

-Չէ, չէ, Մարգարյանը սիրով համաձայն է,ասում է՝ ավելի լավ, ես հաշվետվությունները, իմ գործառույթները չեմ կարողանում հասցնել, նման բան չի եղել, էստեղ ցնցում չի եղել, ուրիշ բան է: Տեղիզմն է այստեղ, տարածքից լինի. Էդ մարդը ՝ խորհրդականը, եղել է հոսպիտալի պետ՝ Քելբաջարի, Վարդենիսի, եղել է ՊԲ բուժվարչության պետի տեղակալ, հիմա թոշակի անցած գնդապետ է: Իր փորձը կարևոր է, պիտի հաղթահարենք, մինչև տնօրեն գա: Առավոտյան անգամ ջուր չենք խմել, եկել, ասել ենք լցվեք ջերմությամբ սիրով, ծառայեք ժողովրդին:

-Այսինքն, կոլեկտիվն իրենց մարդն ունենալու համար մերժո՞ւմ է ձեր լավագույն առաջարկները.

-Կոլեկտիվը չի ասել, դա որոշ մարդկանց ուղղորդում է, մի քիչ խորանաք, դուք էլ կիմանաք, ես չեմ ուզում առանց ապացույցների, մարդու անուն տալ, չեմ ուզում մեղք գործեմ, իսկ ես՝ որպես քրիստոնյա, մեղք չեմ գործում: Ոչ նպատակ կա հրամցնելու, մենք առաջարկում ենք՝ հարգելի տարածաշրջանի ժողովուրդ, էնքան եմ խոսացել, պռոշներս չորանում է…

-Դուք որտեղի՞ց եք.

Գեղարքունիքի մարզպետի խորհրդական Պետրոս Մանուկյան

 Արսեն Մարգարյան

-Ինչ է եղել, բժիշկ Մարգարյան ասել եք, թե չեք կարողանում աշխատել, օգնական են բերե՞լ:

-Ես ոչ մի բանից տեղյակ չեմ եղել, երեկ, որ բերել են ներկայացրել են, այսօր էլ կոլեկտիվն էլ արդարացի պահանջ է ներկայացնում:

-Փոխմարզպետն ասում էր, տեղյակ եք եղել, դուք եք ասել, որ չեմ հասցնում:

-Բայց երեկ ես տեղյակ եմ եղե՞լ, չխոսալն ավելի լավ է, ես իմ գործն արել եմ 40 տարի:

-Դե փաստորեն գտել են, որ լավ չեք արել:

Վարչապետ Հովիկ Աբրահամյանն ընդունել է Վերակառուցման և զարգացման եվրոպական բանկի Արևելյան և Կովկասի երկրների գծով գլխավոր տնօրեն Ֆրենսիս Մալիժի գլխավորած պատվիրակությանը:
Ողջունելով հյուրերին կառավարությունում՝ Հովիկ Աբրահամյանը կարևորել է ՎԶԵԲ-ի հետ համագործակցության հետագա զարգացումն ու ամրապնդումը: Այս մասին հայտնում են Կառավարության լրատվական ծառայությունից:

«Հայաստանի կառավարությունը շահագրգռված է երկկողմ նոր ծրագրերի ներդրմամբ: Կառավարությունը հետևողական է լինելու յուրաքանչյուր ծրագրի հաջող իրականացման գործում»,- նշել է վարչապետը:

Ֆրենսիս Մալիժը նախ ներկայացրել է ՎԶԵԲ-ի կողմից մեր երկրում իրականացվող ծրագրերի ընթացքը և նշել, որ Եվրոպական բանկն առաջիկայում ևս պատրաստ է օժանդակել Հայաստանում բարեփոխումների իրականացմանը, այդ թվում ենթակառուցվածքների և էներգետիկ բնագավառների զարգացմանը: ՎԶԵԲ-ի Արևելյան և Կովկասի երկրների գծով գլխավոր տնօրենը ողջունել է ՀՀ նոր կառավարության գործունեությունը՝ ուղղված գործարար միջավայրի բարելավմանը, տնտեսական հավասար պայմանների ներդրմանը և մենաշնորհների դեմ պայքարին:
Միաժամանակ, Ֆրենսիս Մալիժը տեղեկացրել է, որ ՎԶԵԲ-ն առաջիկայում պետք է հաստատի Հայաստանի հետ համագործակցության նոր ռազմավարությունը, որում հայկական կողմի հետ փոխգործակցությամբ կսահմանվեն երկկողմ առաջնահերթությունները:

Տեղեկացվել է, որ արդեն իսկ հաստատվել է Հայաստանին նոր դրամաշնորհի տրամադրման ծրագիրը, որն ուղղված է լինելու վերականգնողական էներգետիկայի բնագավառին:
Ֆրենսիս Մալիժը հայտնել է նաև, որ ՎԶԵԲ-ը պատրաստ է ներդրումներ իրականացնել Հյուսիս-հարավ ավտոմայրուղու կառուցման, էներգաարդյունավետության բարձրացման և շրջակա միջավայրի բարելավման նպատակներով:
Վարչապետ Հովիկ Աբրահամյանն ընդգծել է համատեղ ծրագրերի իրականացման կարևորությունը, այնուհետև ներկայացրել գործարար միջավայրի բարելավման ուղղությամբ կառավարության մոտեցումներն ու ծրագրերը:

ՀՀ ճանապարհային ոստիկանության 1-ին սպայական գումարտակի հրամանատար, փոխգնդապետ Արսեն Արշակյանը ֆեյսբուքյան իր էջում գրել է.

«Դերասան Սեպուհ Սպիկյանն իր ֆեյսբուքյան էջում գրել է. «այսօր վերջնականապես հիասթափվեցի և էլ ինձ չեմ համարում Հայաստանի քաղաքացի եվ Հայաստանը այլեվս չեմ ուզում համարել իմ հայրենիքը… Անչափ «ցնցված» եվ «հիացած» մեծն Ճանապարհային Ոստիկանություն` «փոսի գայի» մականվամբ, վերաբերմունքից և աշխատանքից:
Նման գրառման պատճառը ՃՈ կողմից 200. 000 դրամի չափով տուգանվելու հանգամանքն է: Որպես Ճանապարհային ոստիկանության 1-ին սպայական գումարտակի հրամանատար չէի կարող անարձագանք թողնել դերասանի հայտարարությունը: Ամենևին չէի ցանկանա անդրադառնալ թեմային, բայց նկատի ունենալով Ս. Ապիկյանի անձը, կարծում եմ դա անհրաժեշտ է: Պարզաբանեմ հերթականությամբ.
Ցանկացած քաղաքացի, անկախ զբաղեցրած պաշտոնից, հասարակության շրջանում ճանաչում ունենալու հանգամանքից, օրենքի առաջ պատասխանատություն է կրում, եթե խախտել է այդ օրենքը: Պրն Ապիկյան, ստիպված եմ հասարակության լայն շրջանակի դատին հանձնել այն, ինչ իրականում տեղի է ունեցել ս.թ. մայիսի 23-ին 22.10-ի սահմաններում: Քանի որ ձեր գրառումը կարդացող յուրաքանչյուր մարդու մոտ թյուր կարծիք կձևավորվի ՃՈ հանդեպ:
Եվ այսպես. 23.05.2014 թ. քաղաքացի Ս. Ապիկյանը միանգամից մի քանի խախտում է թույլ տվել: Այն է՝ ոչ սթափ վիճակում, չունենալով վարորդական իրավունքի վկայական և չհաշվառված «ՄՏՌ» մակնիշի առանց հաշվառման համարանիշի մոտոցիկլետը վարել է Երևան քաղաքի Բագրևանդի փողոցով Քոչինյան փողոցի կողմից աջ մայթեզրից մեկ-երկու մետր հեռավորությամբ 40-ից 45 կմ/ժամ արագությամբ՝ Մոլդովական փողոցի ուղղությամբ՝ խախտելով ճանապարհային երթևեկության անվտանգության ապահովման մասին օրենքի 24 հոդվածի 7-րդ կետի «ա» ենթակետի, նույն օրենքի 18-րդ կետի «գ» ենթակետի, նույն օրենքի 13-րդ հոդվածի առաջին մասի պահանջները, մոտենալով թիվ 36 էլեկտրական սյան դիմաց Ս. Ապիկյանը թույլ է տվել ՃԵԿ-ի 65-րդ և 66-րդ կետերի պահանջները՝ այն է՝ մոտոցիկլետը վարել է հաշվի չառնելով ճանապարհի ծածկույթը, որը տվյալ պահին եղել է թաց և չի ընտրել այնպիսի արագություն, որ կարողանար լիարժեք կառավարել տրանսպորտային միջոցը: Կորցնելով տրանսպորտային միջոցի կառավարումը կողաշրջվել է և սահելով դուրս գալով դեպի հանդիպակաց ուղեմաս բախվել է դիմացից երթևեկող, բայց տվյալ պահին կանգնած վիճակում գտնվող Անդրանիկ Գրիգորյանի վարած ՎԱԶ 2107 32 DS 674 համարանիշի ավտոմեքանային՝ պատճառելով գույքային վնաս: Վերոգրյալը հիմնավորվել է վթարի վայրում կազմված սխեմայով, որը կազմվել է ընթերականների ներկայությամբ, տրանսպորտային միջոցների զննության արձանագրություններով, Սեպուհ Ապիկյանի և մյուս վարորդի բացատրությունեներով, բժշկական վկայարկման արձանագրությամբ և գործի նյութերով:
Հարգելի պրն Ապիկյան, բարեբախտաբար ձեր անպատասխանատու պահվածքը լուրջ հետևանքներ չի առաջացրել: Ինձ համար անհասկանալի և զարմանալի է, որ դուք խոսում եք հայրենիքից, հայրենասիրությունից և ասում թե հիասթափվել եք: Հայրենիքը բոլորինս է և սիրել այն, չի նշանակում միայն գեղեցիկ բառեր կամ նախադասություններ ձոնել: Հայրենիքը սիրել նախ և առաջ իմ պատկերացմամբ այդ հայրենիքի օրենքը, կարգ ու կանոնը հարգել է նշանակում: Նորից եմ կրկնում, բարեբախտաբար ծանր հետևանք չի ունեցել ձեր այսպես ասած «վոյաժը»: Հետևաբար տեղին չէ բարոյականության մասին ձեր շահարկումը: Հիմա այն մասին, թե ինչու եք տուգանվել 200. 000 դրամի չափով: Դուք օրենքի միանգամից երեք հոդված եք խախտել և դրանցից յուրաքանչյուրը վարչական պատասխանատվություն է նախատեսում առանձին առանձին: Օրենքով սահմանված կարգով ձեզանից արյան փորձանմուշ է վերցվել, արդյունքում հայտնաբերվել է 1.3 /գրամ-լիտր/ ալկոհոլ, մասնագետները կհասկանան, որ սա համարվում է 2-րդ աստիճանի հարբածություն և սահմանված տուգանքի չափը 150 .000 դրամ է: Բայց քանի որ առհասարակ վարելու իրավունք էլ չեք ունեցել օրենքը նախատեսում է տուգանք 200. 000 դրամի չափով: Ճանապարհային երթևեկության անվտանգության մասին օրենքի համաձայն մի քանի հոդվածով խախտում կատարելու դեպքում քաղաքացին պատասխանատվության է ենթարկվում առավելագույն տուգանքով՝ տվյալ դեպքում 200.000 դրամի չափով: Նույն այն հայրենիքի օրենսդրությունն է նախատեսում դա, որից պրն Ապիկյան, անարդարացիորեն հիասթափվել եք: Քանզի հայրենիքը հաստատ ձեզ չի խնդրել կամ դրդել ոչ սթափ վիճակում մեքենան վարել, խախտում կատարել: Հուսով եմ, պարզաբանումը առավել քան հստակ էր: Ձեր թույլ տված խախտումների և ՃՈ կիրառած տուգանքի համադրությամբ, պրն Ապիկյան ով է առավել մեղավոր դուք, որ առանց փաստաթղթի, ալկոհոլ օգտագործած վիճակում, առհասարակ վարորդական իրավունք չունենալով տրանսպորտային միջոց եք վարել ու բախվել այլ մեքենայի, թե Ճանապարհային ոստիկանությունը, որ վարչական պատասխանատվություն է կիրառել: Ձեր ասած «փոսի գայի» մականվամբ ՃՈ-ն ընդամենն առաջնորդվել է օրենքով: Մի դիտարկում էլ՝ «փոսի գայի» ձևակերպումն ամենևին էլ մականուն չէ, բնորոշումը Ձեր պես վարորդներն են տվել շատ վաղուց:
Հուսամ, պրն Ապիկյան, որ որ այսուհետ կպահպանեք երթևեկության կանոնները և առիթ չեք ունենա շփվելու Ճանապարհային ոստիկանության հետ, հակառակ դեպքում կրկին հիշեցնեմ, որ օրենքի առաջ բոլորն են հավասար: Մաղթում եմ Ձեզ անվտանգ երթևեկություն»:

Մայիսի 14-ին ՀՀ նորանշանակ վարչապետ Հովիկ Աբրահամյանը հանդիպում էր ունեցել մի քանի տասնյակ խոշոր գործարարների հետ, որի ընթացքում վարչապետը տեղեկացրել էր, որ այսուհետ խաղի կանոնները փոխվում են, գործարարները պետք է ստվերից դուրս գան, հարկեր ավելի շատ վճարեն և այլն:

Մեր տեղեկություններով, արդեն հուլիսի լույս 1-ի գիշերը, մի քանի հարկային-օպերատիվ խմբեր խոշոր գործարարներին պատկանող ձեռնարկություններ են մտել և ստուգումներ սկսել: Ստուգումները առ այսօր շարունակվում են և թափ են հավաքում։ Հենց դրանով պայմանավորված, որ վերջին օրերին խոշոր գործարարների ազդեցության տակ գտնվող բազմաթիվ լրատվամիջոցներ կայքեր աննախադեպ հարձակում են սկսել Հովիկ Աբրահամյանի դեմ՝ հրապարակելով վերջինիս կենսագրության տարբեր մութ էջեր, նրա ունեցվածքը, առանձնատների լուսանկարները և այլն: Հնարավոր է, որ Հայաստանում մեկնարկում է գործարարների և կառավարության միջև պայքարի թեժ փուլ:

Չորրորդ ինքնիշխանություն

 ‹‹Կառավարության այս նոր որոշումը ոչ մի կապ չունի բնապահպանական կամ ֆերմերների պահանջների հետ: Այս գործարքը զուտ փողի գործարք է: Ոչ ոք չի մտածում, որ պետք է նորմալ կառավարում անել››, — անդրադառնալով կառավարության հունիսի 26-ի որոշմանն, ասաց ‹‹ԷկոԼուր›› հասարակական  կազմակերպության  նախագահ Ինգա Զարաֆյանը:

‹‹Արարատյան դաշտի կատաստրոֆիկ իրավիճակը հայտնի է եղել կառավարությանը դեռ մի քանի տարի առաջ:
Երբ  արդեն պարզ էր, որ Արարատյան դաշտի ստորգետնյա ջրերը գերօգտագործվում, շահագործվում են և գնալով այդ վիճակը խորանում է:
‹‹Մաքուր էներգիա և ջուր›› ծրագրի շրջանակներում, որ սկսել են  USAID-ի հետ համատեղ, արվել են ուսումնասիրություններ: Միջազգային և հայ էքսպերտները արդյունքը տեսել են միանգամից և արդեն լուրջ քայլեր են ձեռնարկվել՝ ահազանգեր,   պարտադրումներ են ներկայացվել նախարարությանը և կառավարությանը››:

Մեզ հետ զրույցում տիկին Զարաֆյանը նշեց, որ կառավարությունն անհանգստացած էր դեռևս մոտ մեկ տարի առաջ. ‹‹Կառավարության որոշումները նոր բան չեն հայտնաբերել: Մենք ունենք օրենք, ըստ որի՝ եթե դու օգտագործում ես ջրային ռեսուրս, ապա պետք է ինչ-որ ձևով այն կարգավորած լինես : Պարզ չէ՞, որ մինչ այսօր անօրինական ձևով  ջուր են վերցնում: Ոչ մի նախարարություն, առաջին հերթին բնապահպանության նախարարությունը, միանգամից այդ հարցը չեն տվել. այդ ինչպե՞ս է, որ մարդիկ ջուրը գերօգտագործում, գերշահագործում են ու մենք ոչ մի բան չենք անում››:

‹‹Առաջին հերթին  այդ վերահսկողության համար, որը մեր օրենքով սահմանված է, պատասխանատվություն է կրում Բնապահպանության նախարարությունը, որը տալիս է ջրօգտագործման թույլտվություն  և վերահսկողություն պետք է կատարի: Սակայն չի կատարում: Դա հանցավոր գործարք է մեր ջրային պաշարների նկատմամբ. տալիս ես լիցենզիա,   պատշաճ վերահսկողություն չես իրականացնում և կորցնում ես քո պաշարները: Մինչ օրս որևէ մեկը պատասխան չի տվել դրա համար: Մյուս կարևոր հարցն է, թե ինչի՞ հիմնա վրա  են բաժանվում այդ լիցենզիաները: Այստեղ մեծ կոռուպցիոն ռիսկ ենք տեսնում, որի մասին կառավարությունը լռում է››,- նշեց  տիկին Զարաֆյանը:

Նա  պատմեց է, որ իրենք այցելել են Արարատյան մարզ և տեսել՝ ինչ է կատարվում այնտեղ.‹‹ Այցելել ենք այն գյուղեր, որոնք ընդհանրապես ջրի խնդիր չունեն: Այդ ինչպես է լինում որ որոշ գյուղերում  ջրի խնդիր չկա, մյուսներում՝ ցամաքած տարածքներ են: Կառավարությունն ի՞նչ ձևով է վերահսկում իրավիճակը:

Ի՞նչ է անում կառավարությունը.  վերանորոգում է պոմպակայանները, իսկ մարդը, որը ստանում է այդ ջուրը,  վճարվում է դրա համար: Փաստորեն, նրանք վերահսկողություն են անում ոչ թե ջրային պաշարների նորմալ կառավարման, այլ վերահսկում են, որպեսզի գումար ստանան››:
Տիկին Զառաֆյանը պատմեց նաև, որ գյուղերից մեկում (անունը չնշեց՝ գյուղապետի խնդրանքով) ձկնաբուծարանի տերն, հասկանալով, որ այստեղ շահերի բախում կա, առաջարկել է իր ձկնաբուծարանի ավելորդ ախտոտվող ջուրը, որը հոսում է դեպի Թուրքիա, իր հաշվին տալ գյուղացիներին, բայց կառավարությունը, քանի որ դրանից գումար չի ստանա, չէ՞ որ պոմպակայանները չեն աշխատի, այդ պատճառով երկու անգամ մերժեցին խնդրանքը.

Փոխանակ ձկնաբուծարանների ջուրը, Արաքս գետի ջրերից էլ կարող են վերցնել, տան գյուղացիներին, մի քանի խողովակ են անցկացնում ու վաշխառուի պես վաճառում են ջուրը» :

Էկոլոգը զարմացած է. «Եթե դու Արարատի մի մասը  վերցնում ես լճերի մեջ, իսկ մյուս մասը ցամաքացնում և ասում՝ ոչինչ, ցամաքած տարածքներում նոր հորեր կբացենք, որ բավարարենք ջրերի պահանջը, ի՞նչ է նշանակում: Վերցնում փակում են հորերը (մի հորի փակելը 2.5 միլիոն դրամ արժե), ինչի՞ համար, հետո նորից բացում են: Համակարգը խախտվում է: Փաստորեն փողերի լվացում է գնում››:

‹‹Այս հարցը կառավարությունում շատ լուրջ  քննարկվել է այս տարվա  մարտի 15-ին, որտեղ ներկա էին սկսած ՀՀ նախագահը, նախարարներ ու խնդրով մտահոգ քաղաքացիներ: Քննարկմանը եղել են պատճառաբանված, հիմնավորված ելույթներ, սակայն ոչ մի բան էլ չի փոխվել, արդյունք չկա››,-ասաց տիկին Զարաֆյանը:
Փաստորեն, Կառավարության նոր որոշումը ոչ թե ջրօգտագործման ծավալների նկատմամբ առցանց հսկողության իրականացումն ու շահառուների համար տեղեկատվության հասանելիությունն ապահովելն է, այլ հերթական վաշխառությունը:

Ստորև ներկայացնում ենք ուսումնասիրությունների արդյունքում որոշված գերշահագործման հետևանքները.

•530 կմ2 տարածքում ստորերկրյա ջրերի մակարդակի իջեցում,

•Դրական ճնշման նվազում և 31 համայնքներում ինքնաշատրվանող հորատանցքերի վերացում,

•Շահագործական հորերի հզորությունների նվազում,

•Սևջուր-Ակնալիճ աղբյուրների հոսքի նվազում մոտ 6 անգամ՝

17,8 մ3/վրկ-ից 3 մ3/վրկ,

•Բավարար ջուր չի ապահովվում Մեծամորի ատոմակայանի ռեակտորի սառեցման համար և վտանգված է 29 համայնքների ոռոգումը,

•Ձկնաբուծարաններից լրացուցիչ ջրաքանակների հեռացման պատճառով դրենաժային համակարգում ջրի մակարդակի բարձրացում՝ ինչը հանգեցնում է հողերի աղակալման,

•Ձկնաբուծարաններից հեռացվող ջրերի որակը պետք է վերահսկվի:
Ծրագրի շրջանակներում ներկայացվել է նաև մեծ կապիտալ ներդրումներ չպահանջող միջոցառումներ.

•Ոչ ծախսատար միջոցառումների իրականացում, ինչպիսիք են օրինակ, ինքնաշատրվանող հորերի վրա փականների տեղադրում, ջրաչափերով ջրի սպառման վերահսկում, լքված հորերի հետլիցք, Էջմիածնի ու Մասիսի տարածաշրջաններում ջրառի կրճատում, և այլն,

•Ձկնաբուծարաններից հեռացվող ջրի որակի հսկողություն,

•Կայուն ջրօգտագործման վերաբերյալ ձնկնարտադրողների վերապատրաստում,

•ՋԹ-ներ տրամադրող անձնակազմի վերապատրաստում,

•Հորատող կազմակերպություններին թույլատվությունների տրամադրում;

•Օրենսդրական դաշտի բարելավում՝ պարտավորեցնելու ջրօգտագործողներին և աղտոտողներին՝ իրականացնելու ստորերկրյա ջրերի մոնիտորինգ ու հաշվետու լինելու համապատասխան գերատեսչություններին;

•Ստորերկրյա ջրերի կառավարումը պետք է իրականացվի մեկ պետական լիազորված մարմնի կողմից:

Հռիսփսիմե Գալստյան

Ցավով եմ ասում. մեր հոգևորականները վախկոտ են

Եկեղեցու խնդիրները պարբերաբար լուսաբանելը, հուսով ենք կօգնի ինչ-որ բան շտկել, և հայ մարդը, որն այսօր հույսը միայն Աստծո վրա կարող է դնել, եկեղեցում էլ փնտրի — գտնի իր հարցերի պատասխանը:

Մեր զրույցը կարգալույծ արված հոգևորականի ՝Ռուսաստանի և Նախիջևանի թեմի նախկին առաջնորդ Տիրան Կյուրեղյանի հետ, փորձում է գտնել մի շարք հարցերի պատասխաններ:

— Ինչպե՞ս են ապրում ձեր շրջապատի մոսկվաբնակ հայերը:

— Դե տարբեր են նրանք, լավ ապրողներ էլ կան, բայց մի բան պարզ է. պետք է պայքարել, ապրել, ավելի շատ իմանալ, որպեսզի հայրենիքը հզորանա: Ուրիշ ճանապարհ չկա: Ամեն ինչ կփոխվի, սևն ու չարը երկար չի մնա, ես հավատացած եմ: Առայժմ անհույս է, դժբախտաբար: Այստեղ ապրում են, աշխատում են Հայաստանում մնացած հարազատներին օգնում են, բայց ահավոր վիճակ է. 80 տոկոսը վարձով է մնում: Իրենց աշխատածի զգալի մասը տան վարձ են տալիս, ապրում են, մի փոքր էլ կարողանում են հայրենիք ուղարկել: Այդ մի փոքր ուղարկվածից այդ օլիգարխ կոչվածը կողոպտում է: Ուզած պահի բարձրացնում կամ իջեցնում են դրամի փոխհարաբերությունը.

— Եկեղեցու իշխանություններից դժգոհողների պակաս չկա, սակայն հոգևորականները չեն բարձրաձայնում իրենց ասելիքը՝ վախենալով վերինների ոխակալությունից, հիմնականում անզոր լինելով փոխելու իրենց կյանքը՝ տղամարդավարի հեռանալու գաղջից ու ճահճից: Քիչ թե շատ խոսում են կարգալույծ արված հոգևորականները, եթե հեռացվելուց հետո, դեռ հետաքրքրված են մնում եկեղեցու կյանքով:

— Շատ լավ հոգևորականներ էլ կան Հայաստանում, բայց կարևորը ղեկավարությունն է և իրենց օրենքները: Ցավալի է, և ցավալին այն է, որ մի խումբ եկեղեցականներ միացած են, նույն կողոպտիչ աշխատանքն են կատարում: Կան լավ հոգևորականներ, որոնք իրոք եկեղեցուն ծառայություն են մատուցում, բայց ոչ առաջնորդները:

Օրինակ՝ Վանաձորի սրբազանը՝ Սեպուհ Չուլջյանը, լավ հոգևորականի աշխատանք է կատարում: Երբ ես սարկավագ էի, Վազգեն կաթողիկոսի ժամանակ, վեհարանում էի ծառայում՝ նրա հայրը ընտանյոք հանդերձ ծնկաչոք եկավ (այն ժամանակ Ղարսի գիծը բաց էր) կաթողիկոսի առաջ, թե՝ ինձ թողեք Հայաստան, հետ չգնամ Թուրքիա: Այսպես իր ընտանիքը եկավ: Լավ հոգևորական է Աբրահամ սրբազանը՝ Սյունիքի առաջնորդը: Լավ հոգևորական է Միքայել Աջապահյանը՝ Շիրակի թեմի առաջնորդը, չնայած վերջերս Գարեգինն իրեն էլ ճնշեց, ուզում էր հանել, հիմա մի քիչ փոխվել է: Մինչև վերջերս էլ իրավիճակը լարված էր: Նրան էլ երևի իշխանության կողմից ճնշում եղավ, հիմա փոխվել է՝ գովում է Գարեգինին: Չնայած Մոսկվայում եմ ապրում, բայց տեղյակ եմ բոլոր հարցերից: Կոտայքի թեմի  առաջնորդ Առաքել սրբազանն էլ վատը չէ: Վարդապետների մեջ շատ լավ տղաներ կան, բայց ինքը (Գարեգին Բ-ն-խմբ.) ճնշում է նրանց:

-Ի՞նչ ասել է լավ հոգևորական. նրանք իրենց ապրած կյանքով պետք է ապացուցեն դա, իսկ շատերը… 

-Լավ հոգևորական ասելով հասկանում եմ, որ եկեղեցին է սիրում, գիտի եկեղեցու կարգուկանոնը, նյութապաշտ չէ և ծառայում է ժողովուրդին: Ցավով եմ ասում, որ մեր հոգևորականները վախկոտ են:

— Եկեղեցին թե ձեր ժամանակ, թե այսօր, յուրահատուկ «մաֆիոզ» կառույց է, վերևներում հսկայական գումարներ են պտտվում մինչդեռ ներքևում ընտանիք պահող քահանաները մի կերպ են ապրում:

— Այո, այսօր արտասահմանից բազմաթիվ պոլսահայեր, Թուրքիայի հարուստ հայեր ուզում են իրեն օգտակար լինել ու գումարներ են տալիս այսինչ- այնինչ եկեղեցուն, հիվանդանոցին, ծերանոցին օգնելու համար: Գարեգինն ասում է, թե ինձ պետք է տաս: Մոտս մի անձ էր եկել, Սիբիրից,  մի հարուստ մարդ, որ հողամաս էր գնել իր գումարներով, որ պիտի կազմեր 2 միլիոն դոլարի նախահաշիվ՝ եկեղեցի կառուցելու համար: Հայաստանի առաքելական եկեղեցու առաջնորդը պիտի հաստատի: Առաջնորդը Գարեգինի եղբայրն է: Երկու-երեք ժամ բանակցել  են: Պատմում էր, որ Եզրասն ասել է ՝ «Դու չպետք է կառուցես, քո 2 միլիոնը մեզ տուր, մենք կկառուցենք», նա էլ ասում է՝ «Եղբա′յր, քո գործը չէ, պրոեկտը երկու միլիոնի է, ես եմ ծախս անելու», ասում է՝ չէ, ու այդպես էլ չհաստատեց, մարդն էլ թուղթը ճղեց գնաց: Ահա այսպես կամաց-կամաց հեռացնում են եկեղեցուց:

Չի կարելի որևէ հայի Էջմիածնից կտրել. Էջմիածինը համայն հայության խորհուրդն է: Էջմիածնի հետ խաղ մի արեք. Էջմիածինը հզոր նեցուկ է, լծակ փրկության, հզորացրեք Էջմիածինը: Էջմիածինը քարաշեն կառույց չէ, այն խորհուրդ է համայն հայության: Գարեգին Առաջինին գերեզման մտցնողն այդ քարերը եղան, որովհետև փաստը ցույց է տալիս, որ նա պայքարեց սուրբ Էջմիածնի դեմ և աշխարհով մեկ բաժանեց հայությանը և այդ քարերը նրան պատժեցին:

Ցավում եմ,որ մեր հոգևորականները վախենում են, մենք լավ ժողովուրդ ունենք, լավ երիտասարդություն կա,և հույս ունեմ որ այս ծանր վիճակը կհաղթահարենք: 20թ, մոխրացած էր Հայաստանը: 89-ից մինչև 91-ը մենք Երևան ստեղծեցինք՝ իր համալսարանով, իր ակադեմիայով, իր բուհերով, գործարաններով: Մեզ չեն կարող շատ ճնշել: Եկեղեցու վրա, եթե ժողովուրդը հույս դնի, ամեն ինչ կփոխվի, սակայն այժմ հույս դնելու չի:

Շարունակելի…

Ռուզան Ավոյան