Ի կատարումն Հայաստանի Հանրապետության և Ռուսաստանի Դաշնության պաշտպանության նախարարների կողմից հաստատված երկկողմ համագործակցության 2014թ. պլանի, հոկտեմբերի 15-ին Հայաստան են ժամանել ՌԴ ԶՈւ ԳՇ Կազմզորահավաքային գլխավոր վարչության մասնագետները` արդարադատության գնդապետ Ա. Մարչենկուի ղեկավարությամբ:

Պատվիրակությունը ժամանել է զինված ուժերի համալրվածության կազմակերպման և դրա առանձնահատկությունների, նախազորակոչային տարիքի քաղաքացիների հաշվառման, ինչպես նաև զորահավաքային պատրաստության ոլորտի հարցերի համատեղ քննարկման նպատակով:

Այս մասին տեղեկանում ենք ՀՀ ՊՆ լրատվական ծառայությունից

Հայաստանի Հանրապետության և Ռուսաստանի Դաշնության պաշտպանության նախարարների կողմից հաստատված երկկողմ համագործակցության 2014թ. պլանի համաձայն` ս.թ. հոկտեմբերի 13-ին Հայաստան է ժամանել ՌԴ զինված ուժերի ինժեներական զորքերի պետ, գեներալ-լեյտենանտ Յու.Ստավիցկու գլխավորած պատվիրակությունը` ինժեներական ապահովման ոլորտում աշխատանքային քննարկումներին մասնակցելու և ՀՀ ԶՈՒ ինժեներական զորամասեր այցելելու նպատակով: Պատվիրակության այցը կավարտվի ս.թ. հոկտեմբերի 15-ին:
Հոկտեմբերի 14-ից 17-ը Հայաստանում է գտնվելու նաև Ռուսաստանի Դաշնության զինված ուժերի ռադիացիոն, քիմիական և կենսաբանական պաշտպանության զորքերի վարչության աշխատանքային խումբը` ՌՔԿՊ ոլորտում երկկողմ հետաքրքրություն ներկայացնող հարցերի քննարկան նպատակով:

Այս տարի դպրոցներում աշնանային արձակուրդը սկսվելու է հոկտեմբերի 20-ից.

1-ին դասարանցիների համար արձակուրդը կտևի հոկտեմբերի 20-ից նոյեմբերի 2-ը, իսկ 2-12-րդ դասարանցիների համար՝ հոկտեմբերի 20-26-ը:

Հայաստանի բասկետբոլի ֆեդերացիան տեղեկացնում է, որ ըստ

ՖԻԲԱ-ի հրապարակած  վարկանիշային աղյուսակի 3×3 բասկետբոլի ազգային հավաքականների կազմում Հայաստանի տղամարդկանց հավաքականը զբաղեցնում է 65-րդ հորիզոնականը:

Հիշեցնենք, որ Հայաստանի հավաքականը Հունգարիայում հուլիսին մասնակցեց Եվրոպայի առաջնության ընտրական փուլին, որտեղ ունեցած հաջողությունների արդյունքում ընդգրկվել է վարկանիշային աղյուսակում:

Ղարաբաղա-ադրբեջանական հակամարտ զորքերի շփման գծի հարավային ուղղությամբ տեղակայված զորամասերից մեկի պահպանության տեղամասի մարտական հենակետում հոկտեմբերի 13-ին՝ ժամը 16:15-ի սահմաններում հակառակորդի կողմից արձակված անկանոն կրակահերթի հետևանքով ծնկի շրջանում վիրավորում է ստացել զինծառայող, 1995թ. ծնված Հովհաննես Անդրանիկի Թադևոսյանը:

Այս կապակցությամբ տարածած հաղորդագրության մեջ ասվում է. «Հուլիս-օգոստոսյան աննախադեպ լարվածության անկումից հետո, որը հնարավոր եղավ ապահովել ՊԲ-ի վճռական գործողությունների շնորհիվ, սա առաջնային գծում հակառակորդի կողմից սադրված հերթական միջադեպն է, որից կարելի է եզրակացնել, որ ադրբեջանական կողմը նորից որդեգրել է իրավիճակի միտումնավոր ապակայունացմանն ուղղված անհեռատես ճանապարհը: Վերջին օրերին հակառակորդը հրադադարի ռեժիմի խախտման դեպքերը քառապատկել է:

ԼՂՀ պաշտպանության նախարարությունը կոչ է անում ադրբեջանական կողմին զերծ մնալ իրավիճակի հետագա սրմանն ուղղված գործողություններից և քայլեր ձեռնարկել շփման գծում իրավիճակը կայունացնելու ուղղությամբ: Առաջնագծում իրադրության հետագա սրման դեպքում պաշտպանության բանակը կձեռնարկի անհրաժեշտ բոլոր միջոցները հակառակորդին լռեցնելու համար»:

Այս մասին հայտնում են ԼՂՀ ՊՆ մամուլի ծառայությունից։

Հոկտեմբերի 13-ին Երևանում մեկնարկեց «Աղետների ռիսկի նվազեցումը Հայաստանում» ծրագիրը: Այն իրականացնում են ՄԱԿ-ի մանկական հիմնադրամի (ՅՈՒՆԻՍԵՖ) հայաստանյան գրասենյակը, Հայկական Կարմիր խաչի ընկերությունը, ՕՔՍՖԱՄ Հայաստան և «Սեյվ դը չիլդրեն» կազմակերպությունները` ՀՀ արտակարգ իրավիճակների, կրթության և գիտության, աշխատանքի և սոցիալական հարցերի, տարածքային կառավարման նախարարությունների և Աղետների ռիսկի նվազեցման ազգային պլատֆորմի հետ համագործակցությամբ:

Ծրագրի նպատակն է բարձրացնել բնական աղետներին ենթակա բնակավայրերում երեխաների և համայնքների դիմակայունությունը և դարձնել նրանց պակաս խոցելի: Այն ֆինանսավորվում է Եվրոպական միության կողմից:

Բացման խոսքում ԱԻ փոխնախարար Հ. Մխիթարյանը մասնավորապես ասաց.
— ԱԻ նախարար Ա. Երիցյանի անունից ողջունում եմ այս շնորհանդեսի բոլոր մասնակիցներին: Պիտի նշեմ, որ Հյոգոյի գործողությունների ծրագրին միանալուց ի վեր Հայաստանը էական ձեռքբերումներ է գրանցել ԱՌՆ ոլորտում: Ձևավորվել է ԱՌՆԱՊ հիմնադրամը և կյանքի կոչվել ԱՌՆ ազգային ռազմավարությունը: Արդեն բարի ավանդույթ են դարձել մեր գործընկերներ հետ համատեղ իրականացվող ծրագրերը: ԻՆչպես գիտեք աղետների դեմ պայքարը չի կարող որևէ կառույցի, այդ թվում նաև` ԱԻՆ, մենաշնորհը լինել: Երկիր կայուն զարգացումը պահանջում է բոլոր կառույցների ներգրավվածությունը: Դրան են ուղղված նաև այս ծրագիրը և օրերս ՀՀ կառավարության կողմից հավանության արժանացած ՀՀ տարածքում հասարակական, կամավորական փրկարարական շարժման ձևավորման և զարգացման հայեցակարգը: Սրանք մեզ հնարավորություն կտան ավելի շատ մարդ ուսուցանել և ներգրավել ԱՌՆ գործընթացներում: Մաղթում եմ ձեզ ամենայն բարիք և հաջողություններ բոլոր նախաձեռնություններում:

ՀՀ ԿԳ փոխնախարար Մ. Մկրտչյանն ընդգծեց, որ սա այն հազվագյուտ ծրագրերից է, որտեղ բոլորը համագործակցում են, այլ ոչ թե մրցակցում:

ՀՀ աշխատանքի և սոցիալական հարցերի փոխնախարար Ֆ. Բերիկյանի խոսքերով` եթե նախկինում նման ծրագրեր լինեին, ապա Սպիտակի երկրաշարժից զոհեր ու տուժածների թիվն այդքան մեծ չէր լինի:

Հանդիպմանը ներկա ԵՄ ներկայացուցիչ Խոսե Մարիա Մեդինա Նավարոն նշեց, որ չնայած վտանգները հիմնական հնարավոր չէ կանխել, սակայն նման ծրագրերի օգնությամբ հնարավոր է նվազեցնել դրանց բացասական հետևանքները:

ՄԱԿ-ի մանկական հիմնադրամի հայաստանյան գրասենյակից Ռադոսլավ Ռժեհակը շեշտեց, որ ուրախ է Հայաստանում տեսնել աղետների ռիսկի նվազեցմանն ուղղված ջանքերի նման համախմբում.

— Հայաստանն այս առումով կարող է լավ օրինակ լինել շատ երկրների համար,- ասաց Ռադոսլավ Ռժեհակը:

Հանդիպմանը ողջույնի խոսքով հանդես եկան նաև Հայկական Կարմիր խաչի ընկերության, ՕՔՍՖԱՄ Հայաստան և «Սեյվ դը չիլդրեն» կազմակերպությունների ներկայացուցիչները, որոնք այնուհետև ավելի հանգամանալից ներկայացրեցին ծրագրի էությունը:

«Աղետների ռիսկի նվազեցումը Հայաստանում» ծրագիրը կիրականացվի Շիրակի, Լոռու, Արագածոտնի, Գեղարքունիքի, Վայոց ձորի, Տավուշի մարզերում և Երևանում: Միջոցառումները կիրականացվեն երեք հիմնական ուղղություններով՝

• տեղական համայնքների կարողության հզորացում առավել խոցելի բնակչության կարիքների բացահայտման ու արձագանքման գործում,

• խոցելի երեխաների (ներառյալ` հատուկ կարիքներով) իրավունքների արտացոլում ԱՌՆ քաղաքականության մեջ,

• վտանգների հանդեպ զգայուն տարածքներում երեխաների և դպրոցների կարողությունների ամրապնդում՝ ավելի լավ պաշտպանված լինելու, մեղմացնելու և աղետներին արձագանքելու գործում:

Այս մասին տեղեկանում ենք ՀՀ Արտակարգ իրավիճակների նախարարության լրատվական ծառայությունից:

Աշխարահռչակ  սոպրանո Մոնսերատ Կաբալիեն հոկտեմբերի 12-ին այցելել է Արցախ:ԼՂՀ մշակույթի և երիտասարդության հարցերի նախարարության մամուլի ծառայությունը տեղեկացնում է, որ հոկտեմբերի 14-ին Ստեփանակերտի Վերածննդի հրապարակում տեղի կունենա երգչուհու բացառիկ համերգը` նվիրված Արցախում զինադադարի հաստատման 20-ամյակին:

Ստեփանակերտի Սայաթ-Նովայի անվան երաժշտական քոլեջում արցախցի երիտասարդ օպերային երգիչներին դասավանդելու է Մոնսերատ Կաբալիեն: Ծրագրված է Մ.Կաբալիեի հանդիպումները Արցախի Հանրապետության նախագահ Բակո Սահակյանի և հոգևոր առաջնորդ Պարգև արքեպիսկոպոս Մարտիրոսյանի հետ:

Մոնսերատ Կաբալիեն Արցախ է ժամանել իր հարազատների, իսպանացի տենորի և նվագակցողի հետ:
Այցի ծրագիրն իրականացվում է ԼՂՀ մշակույթի և երիտասարդության հարցերի նախարարության և «Ստարմուս» ընկերության համագործակցությամբ: Համերգի գլխավոր հովանավորն է «Կոնվերս Բանկ» ՓԲԸ–ը: Հովանավոր՝ «Աֆինա Պալլադա ՓԲԸ–ը:

Մոնսերատ Կաբալիեն առաջին անգամ Արցախ է այցելել 2013թ. հունիսին։ Նույն թվականի դեկտեմբերի 12-ին Փարիզում տեղի է ունեցել նրա «Հայաստան և Արցախ. քրիստոնեության կղզյակ» ալբոմի շնորհանդեսը: Հենց Փարիզում էլ ճանաչված երգչուհին խոստացել է կրկին գալ Արցախ:
Մոնսերատ Կաբալիեն՝ Արցախի Հանրապետության Նախագահ Բակո Սահակյանին ուղղված նամակում գրում է,- «…Վերադառնում եմ Արցախ և այս անգամ երգելու համար: Ձեզ հետ, Ձեր փոքրիկ, բայց ուժեղ երկրում կտոնեմ զինադադարի կնքման 20-ամյակը: Հուսով եմ տեսնել Ձեզ Ստեփանակերտում, հանդիպել իմ հին ընկերներին և երգել նրանց համար` հանուն խաղաղության և Արցախի բարգավաճման»:
Մոնսերատ Կաբալիեն ծնվել է 1933թ., Բարսելոնայում (Իսպանիա): Համարվում է 20-րդ դարի լավագույն սոպրանոներից մեկը: 1974 թվականին ճանաչվել է Միացյալ Ազգերի Կազմակերպության պատվավոր դեսպան, 1991-ին՝ Խաղաղության դեսպան, 1994-ից ՅՈՒՆԵՍԿՕ-ի Բարի կամքի դեսպան է:

Հոկտեմբերի 11-12-ին նշվում է Երևանի 2796-ամյակը։ Տոնի կարգախոսն է «Երևան՝ իմ տուն»:

Ձեզ ենք ներկայացնում «Էրեբունի-Երևան 2796» տոնակատարության ծրագիրը.

Հոկտեմբերի 11

«Էրեբունի» պատմահնագիտական արգելոց-թանգարանին հարակից տարածք` Էրեբունու փողոց

• 14.00 Ժողովրդական արվեստի գործերի, ազգային տարազի, խոհանոցի ցուցադրություն
• 15.00 Ազգային խաղերի մեկնարկ
• 16.00 «Պատանի երաժիշտների Երևանը» համերգ
• 16.30 Լարախաղացների մրցույթ
• 17.00 Ազգային և ժողովրդական երգարվեստի համերգ
• 19.00 Համերգային ծրագիր «Երևանում տոն է…» («Էրեբունի» պատմահնագիտական արգելոց-թանգարանի հրապարակ)

Հոկտեմբերի 12

• 10.00 Ջրցան մեքենաների շքերթ Երևանի փողոցներում
• 10.30 Երևան ԱՐՏ (Սարյան պուրակ)
• 11.00 Երևան քաղաքի հուշարձանների լվացում
• 12.00 «Երևանյան էսքիզներ» քաղաքաշինական նախագծերի էքսպո (Թամանյանի արձանի հարևանությամբ)
• 13.00 Մանկապատանեկան ստեղծագործությունների բացօթյա ցուցադրություն (Հենրիկ Իգիթյանի անվան գեղագիտության ազգային կենտրոնին հարակից տարածք, Աբովյան 13)
• 14.00 Տոնական շքերթ (Երևանի քաղաքապետարանից Հանրապետության հրապարակ)
• 14.30 Մարաթոնյան վազք՝ 2796մ (Մատենադարանից Սայաթ-Նովայի պողոտա, Աբովյան փողոց, Հանրապետության հրապարակ)
• 15.00 «Իմ հին ու նոր Երևան» խորեոգրաֆիկ պատկեր (Հանրապետության հրապարակ)
• 15.00 Մանկական տոնական ծրագրեր (Կիրովի անվան մանկական զբոսայգի — տիկնիկային ներկայացումներ, զվարճալի խաղեր, ծաղրածուներ, խաղավարներ, աճպարարներ և հեքիաթների հերոսներ)
• 15.00 Ուսանողական հարթակ (Կոնսերվատորիայի պուրակ)
• 15.00 «Տոնական զբոսանք» թատերական և կրկեսային ներկայացումներ (Հյուսիսային պողոտա)
• 15.00 Մարզական ցուցադրական ելույթներ (Ազատության հրապարակ)
• 15.00 «Երեք ժամանակներ» լուսանկարչական տաղավարներ — (Օպերայի և բալետի ազգային ակադեմիական թատրոնի ծառայողական մուտք)
• 15.30 Ողջույն աշխարհի ազգերից (Հայաստանում բնակվող ազգային փոքրամասնությունների և էթնիկ համույթների կատարումներ (Ստ. Շահումյան հրապարակ)
• 15.30 Ազգային և ժողովրդական երգարվեստի համերգ (Մաշտոց-Բուզանդ խաչմերուկ)
• 15.30 Երևանյան բակային խաղերի մրցույթներ (Անգլիական այգի)
• 15.30 Էստրադային համերգ (Ստ. Շահումյան հրապարակ)
• 15.30 Կարաոկե (Շ. Ազնավուրի հրապարակ)
• 16.00 Առագաստային սպորտի ցուցադրական ելույթներ — (Կարապի լիճ)
• 16.30 Հեծանվավազք (Արգիշտի փողոց — Իտալիայի փողոց — Հանրապետության հրապարակ — Նալբանդյան փողոց — Սայաթ-Նովայի պողոտա — Մաշտոցի պողոտա — Իսակովի պողոտա՝ մինչև հեծանվահրապարակ)
• 17.00 Դասական երաժշտության համերգ (Կոնսերվատորիայի պուրակ)
• 17.30 Շախմատի մրցույթ անվանի շախմատիստների մասնակցությամբ (Շ. Ազնավուրի հրապարակ)
• 18.00 Ջազ համերգ (Կասկադ համալիր, Գաֆէսճեան հիմնադրամ)
• 18.00 Էստրադային համերգ (Ստ. Շահումյան հրապարակ)
• 18.30 Բառդ երաժիշտների երեկո (Մոսկովյան պուրակ)
• 19.30 «Երևան՝ իմ տուն» գալա համերգ (Հանրապետության հրապարակ)
• 20.00 Ռոք համերգ (Ազատության հրապարակ)
• 22.00 Երիտասարդական դիսկոտեկ (Հանրապետության հրապարակ)

Սյունիքի մարզում, մեղմ ասած, խայտառակ բարքեր են տիրում: Սյունիքի գյուղերի դպրոցներում սկսել են փակցնել մարզպետի՝ Լիսկա մականունով հայտնի Սուրիկ Խաչատրյանի լուսանկարը:

Սրանով տեղի իշխանությունները Սյունիքի մարզի երեխաների համար նոր իդեալ են կերտում՝ ի դեմս նախկինում տարբեր հանցանքների համար երեք անգամ դատապարտված Լիսկայի:

Երեկ համացանցում տարածվել էր Գեղի գյուղի դպրոցից լուսանկար, որտեղ երևում էր դպրոցի միջանցքում փակցված Լիսկայի լուսանկարը: «ՉԻ» հետ զրույցում Գեղիի գյուղապետ Վասիլ Գրիգորյանը հայտարարեց, թե լուսանկարը փակցված է մարզպետի անկյունում:

«Իմ սենյակում էլ մարզպետի նկարը կա»,- հպարտացավ գյուղապետը:

Իսկ հարցին, թե որոշել եք երեխաներին դաստիարակել երեք անգամ դատապարտվածի օրինակով, գյուղապետը պատասխանեց. «Ոչ, Սուրիկ Խաչատրյանն ամենալավ մարզպետն է, որ մենք ունեցել ենք: Որ ինքը չկար, մենք անտերության մեջ էինք»:

Չորրորդ ինքնիշխանություն