«Տեղական ինքնակառավարման մարմինների հարգելի աշխատակիցներ, շնորհավորում եմ Տեղական ինքնակառավարման օրվա առթիվ:

ՏԻՄ-երը առանցքային դեր են խաղում մեր երկրի մարզերի, տարածաշրջանների ու համայնքների զարգացման գործում: Անցած տարիների ընթացքում համակարգը կարողացել է հաջողությամբ կայանալ եւ բավականին հիմնավոր կերտել իր պատմությունը:

Տեղական ինքնակառավարումն առաջին քարն է կառավարման բարդ համակարգի հիմքում: Թե հասարակությունը, թե իշխանությունը շահագրգռված են, որ այդ հիմքը լինի հուսալի, որպեսզի ամուր լինի նաեւ դրա վրա վստահորեն կառուցվող տունը՝  Հայաստանի Հանրապետությունը:

Այն, որ պետությունն ուժեղ է իր համայնքներով, իրականությունից կտրված գաղափար չէ, այլ փորձված ճշմարտություն: Եւ գերտերությունների, եւ փոքր երկրների կայունությունը հիմնվում է նաեւ համայնքների զարգացվածության ու կազմակերպվածության վրա, որովհետեւ տեղական ինքնակառավարումը, որպես պետության կարեւորագույն ինստիտուտներից մեկը, քաղաքացիների իրավունքների իրացման, կարեւորագույն հարցերին նրանց մասնակցության, նրանց մեջ ինքնակազմակերպում եւ նախաձեռնողականություն զարգացնելու իրական հնարավորություն է: Համոզված եմ, որ քաղաքացիական հասարակության կայացման եւ ժողովրդավարության ամրապնդման համապատկերում տեղական ինքնակառավարման դերն ու նշանակությունը մեր պետության կյանքում տարեցտարի ավելի են մեծանալու:

Տեղական ինքնակառավարման մարմինների հարգելի աշխատակիցներ, եւս մեկ անգամ շնորհավորելով Տեղական ինքնակառավարման օրվա առթիվ՝ մաղթում եմ ձեզ առողջություն, լավատեսություն, բարեկեցություն եւ հաջողություններ ու նոր ձեռքբերումներ՝ ի բարօրություն մեր երկրի համայնքների եւ Հայաստանի Հանրապետության»:

Նոյեմբերի 8-ին ՀՀ պաշտպանության նախարար Սեյրան Օհանյանը պատվոգրերով, գերատեսչական մեդալներով և արժեքավոր նվերներով խրախուսել է 2014թ. ընթացքում միջազգային հեղինակավոր մրցահարթակներում նշանակալի հաջողություններ արձանագրած մի շարք մարզիկ-զինծառայողների:

ՀՀ պաշտպանության նախարության վարչական համալիրում կայացած հանդպմանը ներկա էին նաև ՊՆ, ԶՈՒ, ԶՈՒ ԳՇ ղեկավար կազմի և մարզական ասպարեզի ներկայացուցիչներ:

Միջոցառմանը բացման խոսքով հանդես եկավ պաշտպանության նախարարության ՏՀԿ վարչության պետ Վարդան Ավետիսյանը, ով վստահաբար արձանագրեց, որ 2014-ը Զինված ուժերի համար եղել է ոչ միայն մարտական պատրաստության և սահմանների պաշտպանության գործում, այլև միջազգային հեղինակավոր մրցասպարեզներում փայլուն հաղթանակների տարի:

ՀՀ ԶՈՒ մարտական պատրաստության վարչության ֆիզիկական պատրաստության բաժնի պետ, գնդապետ Արամ Գրիգորյանն իր խոսքում հպարտությամբ փաստեց, որ տարբեր սպորտաձևեր ներկայացնող հայ մարզիկ-զինծառայողներն այսօր լուրջ հաջողություններ են արձանագրում աշխարհի, Եվրոպայի առաջնություններում և միջազգային այլ մրցաշարերում: Պաշտպանության նախարության հավաքական թիմերի փայլուն հաջողությունների վկայությունն էլ միայն այս տարի նրանց կողմից նվաճված 55 ոսկե, 26 արծաթե և 17 բրոնզե մեդալներն են: Ավելին` 3 մարզիկ զինծառայողների շնորհվել են միջազգային սպորտի վարպետի, երկուսին էլ` միջազգային գրոսմայստերի կոչումներ:

Ողջույնի և երախտիքի խոսքերով հանդես եկան նաև Հայաստանի հունա-հռոմեական ըմբշամարտի ազգային հավաքականի գլխավոր մարզիչ, օլիմպիական չեմպիոն Լևոն Ջուլֆալակյանն ու պարտադիր ժամկետային զինծառայող, ԱՄՆ-ում կայացած Միջազգային ռազմամարզական խորհրդի զինծառայողների ըմբշամարտի առաջնության չեմպիոն Կարապետ Չանլյանը:

Հայրենիքի մարզական պատիվը միջազգային մրցահարթակներւմ բարձր պահելու համար պաշտպանության նախարար Սեյրան Օհանյանը պատվոգրեր, գերատեսչական մեդալներ և արժեքավոր նվերներ հանձնեց ԱՄՆ-ում կայացած Միջազգային ռազմամարզական խորհրդի զինծառայողների ըմբշամարտի և Սեուլում անցկացված սամբոյի աշխարհի երիտասարդների առաջնություններում մրցանակային տեղեր գրաված մարզիկներին:

Հանդիսավոր միջոցառումը եզրափակվեց պաշտպանության նախարարի ամփոփիչ ելույթով: Կարևորելով սպորտի և ֆիզիկական պատրաստության դերը զինված ուժերում և զինծառայողների ընդհանուր պատրաստության գործընթացում` պաշտպանական գերատեսչության ղեկավարը մարզիկ զինծառայողներին մաղթեց նորանոր հաջողություններ ու ձեռքբերումներ:

Սեյրան Օհանյանը հույս հայտնեց նաև, որ արձանագրված հաջողություններն ու խրախուսումները պարտավորեցնող կլինեն և 2015թ. ընթացքում հայկական դրոշը կշարունակի ծածանվել միջազգային մրցաշարերում:

Վարչապետ Հովիկ Աբրահամյանն ընդունել է Արագածոտնի մարզի Եղնիկ և Շղարշիկ համայնքների ներկայացուցիչներին: Հանդիպմանը ներկա էին ՀՀ Արագածոտնի մարզպետ Սարգիս Սահակյանը և ՀՀ տարածքային կառավարման նախարարության ջրային տնտեսության պետական կոմիտեի նախագահ Վահե Հակոբյանը:
Համայնքների բնակիչները վարչապետին են ներկայացրել իրենց գյուղերի ջրամատակարարման հետ կապված խնդիրները և առաջարկել ստեղծել հանձնաժողով՝ առկա խնդիրներն ուսումնասիրելու նպատակով:
Ամփոփելով գյուղացիների առաջարկությունները՝ կառավարության ղեկավարը հանձնարարել է ձևավորել համապատասխան հանձնաժողով, որը կուսումնասիրի նշված համայնքներում խմելու ջրի պահանջարկը, և արդյունքների մասին զեկուցել իրեն:

Նախագահ Սերժ Սարգսյանն այսօր ընդունել է Ռուսաստանի Դաշնության առողջապահության նախարար Վերոնիկա Սկվորցովային և նրա գլխավորած պատվիրակությանը, որը Հայաստան է ժամանել հայ-ռուսական առողջապահական առաջին համաժողովին մասնակցելու նպատակով:

Նախագահը ողջունել է հյուրերին, կարևորել հայ-ռուսական առողջապահական առաջին համաժողովի անցկացումը և հույս հայտնել, որ այն երկուստեք օգտակար ու արդյունավետ կլինի: Սերժ Սարգսյանի խոսքով՝ համաժողովը, հիմք դնելով առողջապահության ոլորտում համագործակցության նոր ձևաչափի, անկասկած, կհարստացնի հայ-ռուսական դաշնակցային գործընկերությունը և կնպաստի երկու երկրների միջև ռազմավարական հարաբերությունների առավել ամրապնդմանը:

Հանրապետության Նախագահն ընդգծել է, որ առողջապահության խնդիրները բազմաթիվ են և առնչվում են յուրաքանչյուր մարդու, շոշափում՝ երկրների և ժողովուրդների սոցիալ-տնտեսական կյանքի բոլոր կողմերը: Այդ խնդիրները, Նախագահի համոզմամբ, սահմաններ չեն ճանաչում, ուստի չափազանց կարևոր է միավորել բոլոր պետությունների ջանքերը ՝ մեծ, թե փոքր, հարուստ ու զարգացած, թե զարգացող: Էբոլա համաճարակի օրինակը, որը լուրջ մարտահրավեր է ոչ միայն աֆրիկյան պետությունների համար, Սերժ Սարգսյանի խոսքով, ասվածի լավագույն վկայությունն է:

ՌԴ առողջապահության նախարարը համակարծիք է եղել, որ աշխարհում առողջապահության առջև բազմաթիվ մարտահրավերներ կան, որոնք առանց ջանքերի համատեղման, միմյանց աջակցության, ժամանակակից գիտական ձեռքբերումներին հաղորդակից դառնալու և փորձի փոխանակման, հնարավոր չի լինի հաղթահարել:

Վերոնիկա Սկվորցովան իր գլխավորած պատվիրակության անունից շնորհակալություն է հայտնել Նախագահ Սերժ Սարգսյանին՝ ընդունելության և առողջապահության խնդիրների նկատմամբ մշտական ուշադրության համար: Նա նշել է, որ բոլոր մասնակիցները երևանյան համաժողովին պատրաստվել էին մանրազնին, ինչն ունեցավ իր հստակ արդյունքները. ստորագրվեցին ոլորտի զարգացման համար զգալի նշանակություն ունեցող և հեռանկարային մի շարք փաստաթղթեր, սերտ կապեր հաստատվեցին ՀՀ առողջապահության նախարարության և Երևանի պետական բժշկական համալսարանի առաջատար պրոֆեսորների հետ, պայմանավորվածություններ ձեռք բերվեցին համաժողովին պարբերական բնույթ հաղորդելու և դրա շրջանակներում շարունակելու խորացնել առողջապահության ոլորտում երկու երկրների համագործակցությունը: Ըստ այդմ, հաջորդ համաժողովը նախատեսված է անցկացնել Մոսկվայում:

Այս տարվա հունվարի մեկից խաղատները դուրս բերվեցին Երևանի և Հայաստանի այլ քաղաքների վարչական տարածքներից: Բացառություն կազմեցին միայն Ծաղկաձոր, Սևան, Ջերմուկ և Մեղրի քաղաքները- Այս քաղաքներում խաղատուն բացելու լիցենզիա ստանալու համար պետք է վճարել պետական տուրք 30-ից մինչև 150 միլիոն դրամ տարեկան: Այլ վայրերում խաղատուն բացելու համար պետական տուրքը կազմում է տարեկան 4.5 միլիարդ դրամ:

Սակայն այս տարվա ապրիլի վերջին Սևանի ափին գտնվող «Ախթամար» համալիրում մեծ շուքով բացվեց «Գոլդեն Փալաս» խաղատունը: Այն գործում է արդեն մի քանի ամիս: Բայց ըստ ՀՀ ֆինանսների նախարարության պաշտոնական կայքէջում տեղադրված տեղեկանքի, «Ախթամարը» խաղատան լիցենզիան ստացել է միայն այս տարվա սեպտեմբերի 10-ին: Այսինքն ամիսներ շարունակ այնտեղ գործել է ապօրինի խաղատուն: Ընդ որում, գործել է ոչ թաքուն՝ Սևանի մայրուղու վրա դեռ ամռանը տեղադրված էին խաղատան գովազդ-պաստառները:

Ու ընդհանրապես այս հյուրանոց-ռեստորան-խաղատուն համալիրի հետ կապված պատմությունը չափազանց հետաքրքիր է: Այն ցույց է տալիս, թե ինչպես է մեր կառավարությունը «հոգ տանում» խոշոր բիզնեսի մասին, պահում ու փայփայում է: «Ախթամար» համալիրը դեռ այս տարվա սկզբին գտնվում էր Ծովագյուղ համայնքի վարչական սահմաններում: Մայիսի 19-ին փոփոխություն կատարվեց «Վարչատարածքային բաժանման մասին» ՀՀ օրենքում և Սևան քաղաքից տասնյակ կիլոմետրեր հեռու գտնվող այս «օբյեկտը» բարակ «վզիկով» սահուն միակցվեց Սևան քաղաքին: Ինչո՞ւ: Որովհետև եթե «Ախթամարը» գտնվում է Ծովագյուղի վարչական տարածքում, ապա այդտեղ խաղատուն բացելու համար տարեկան տուրքը 4.5 միփարդ դրամ է: Իսկ եթե Սևանի վարչական տարածքում է՝ տուրքը ընդամենը 120 միլիոն դրամ է։

Հայկական Ժամանակ

Նոյեմբերի 4-5-ը ԼՂՀ կատարած պաշտոնական այցի շրջանակում ՀՀ քաղաքաշինության նախարարության պատվիրակությունը Ստեփանակերտի քաղաքապետարանում ԼՂՀ քաղաքաշինության նախարար Կարեն Շահրամանյանի և Ստեփանակերտի քաղաքապետ Սուրեն Գրիգորյանի, ճարտարապետական արվեստանոցների ներկայացուցիչների մասնակցությամբ մանրամասն քննարկել էին Ստեփանակերտ քաղաքի գլխավոր հատակագծի արդիականացմանն առնչվող խնդիրներ: Բանն այն է, որ Ստեփանակերտում վերջին տասնամյակում քաղաքաշինական փոփոխություններ են կատարվել, որոնք իրենց արտացոլումը չեն գտել հատակագծի մեջ: Քննարկման ընթացքում ՀՀ քաղաքաշինության նախարար Նարեկ Սարգսյանը առաջարկել է ԼՂՀ քաղաքաշինության նախարարին և Ստեփանակերտի քաղաքապետին`ներկայացնել Ստեփանակերտի իրենց տեսլականը` նախանշելով առկա բոլոր հիմնախնդիրները և հաշվի առնելով քաղաքի հեռանկարային զարգացումը:

Լսելով ԼՂՀ քաղաքաշինության նախարարի և Ստեփանակերտի քաղաքապետի կողմից բարձրացված հարցերը` Ստեփանակերտի գլխավոր հատակագծի վերանայում և արդիականացում, կենտրոնի գոտևորում և բեռնաթափում, և այլն, ՀՀ քաղաքաշինության նախարար Նարեկ Սարգսյանը հավաստիացրել է, որ նախարարության և <<Հայնախագիծ>> ինստիտուտի պատասխանատուների հետ անդրանիկ այցը Արցախ միտված է տեղում լինելով ծանոթանալ հիմնահարցերին և նպաստել դրանց լուծմանը: Այս առումով նախարարը կարևորել է Երևանի և Ստեփանակերտի ներկայացուցիչներից կազմված աշխատանքային խմբի ստեղծումը, ապա նաև` համագործակցության հուշագրի ստորագրումը` Ստեփանակերտի քաղաքաշինական խնդիրներին և զարգացման ծրագրերին խթանելու համար:

Մարզային այցելության շրջանակներում քաղաքաշինության նախարարության պատվիրակությունը աշխատանքային խորհրդակցություն է անցկացրել ՀՀ Սյունիքի մարզի Գորիսի քաղաքապետարանում: Խորհրդակցությանը մասնակցում էին նախարար Նարեկ Սարգսյանը, նախարարի տեղակալ Արմեն Ղուլարյանը, Սյունիքի մարզպետ Սուրիկ Խաչատրյանը, Գորիսի քաղաքապետ Վաչագան Ադունցը, այլ պաշտոնատար անձինք:

Խորհրդակցության ընթացքում քննարկվեցին Գորիս քաղաքի քաղաքաշինական հիմնախնդիրների, կառուցապատման ու բարեկարգման, ինչպես նաև Գորիսի պատմական կենտրոնի վերակառուցման (արտաքին ճակատների հարդարում, մանր ճարտարապետական դետալների վերստեղծում),Գորիս գյուղի պատմական արգելոցի բարեկարգման և տուրիզմի զարգացմանը նպաստող պատմական միջավայրի վերստեղծմանն ուղղված հարցեր։

Անդրադառնալով Գորիսի քաղաքաշինական հիմնահարցերին, նախարար Սարգսյանը կարևորել է Գորիսը որպես պատմաճարտարապետական նկարագիրը պահպանած քաղաք ` առաջարկելով նախ` համատեղ աշխատանքի շնորհիվ կյանքի կոչել քաղաքի նոր գլխավոր հատակագիծը, ապա, նաև`քաղաքաշինական, բարեկարգման ծրագրեր առաջարկել, որոնց իրականացմանը լրջորեն կաջակցի քաղաքաշինության նախարարությունը:

Քննարկման ընթացքում անդրադարձ է եղել նաև ՄԱԿ-ի քաղաքներ, կանաչ ճարտարապետություն նախատիպ որպես` իր աշխարհագրական դիրքի, բնակլիմայական պայմանների և քաղաքաշինական ենթակառուցվածքների շնորհիվ` հենց Գորիսն է ընտրվել:

Նախարարը նաև շրջայց է կատարել` տեղում ուսումնասիրելով Գորիսի քաղաքապետի կողմից առաջարկվող բարեկարգման անհրաժեշտություն ունեցող մի քանի հատվածներ:

ՀՀ ԱԻ նախարարությունը տեղեկացնում է, որ նոյեմբերի 7-ի ժամը 13.00-ի դրությամբ ՀՀ տարածքում բոլոր ավտոճանապարհները հիմնականում անցանելի են:

Դժվարանցանելի է Գեղարքունիքի մարզի Սոթք-Քարվաճառ ավտոճանապարհը:

ՀՀ ԱԻ նախարարությունը խորհուրդ է տալիս երթևեկել ձմեռային անվադողերով:

Վրաստանի ՆԳՆ ԱԻ դեպարտամենտից ստացված տեղեկատվության համաձայն Ստեփանծմինդա — Լարս ավտոճանապարհը շուրջօրյա բաց է բոլոր տեսակի ավտոմեքենաների համար:

ԼՂՀ ԱԺ նախագահ Աշոտ Ղուլյանն ու ՀՀ ԱԺ-ի եւ ԼՂՀ ԱԺ-ի միջեւ համագործակցության միջխորհրդարանական հանձնաժողովի անդամները նոյեմբերի 7-ին ՀՀ ԱԺ փոխնախագահ Հերմինե Նաղդալյանի եւ ՀՀԿ խմբակցության ղեկավար Վահրամ Բաղդասարյանի ուղեկցությամբ այցելել են Ծիծեռնակաբերդի հուշահամալիր։

Արցախի խորհրդարանականները ԼՂՀ իշխանությունների անունից ծաղկեպսակ են դրել 1915 թվականի Հայոց մեծ եղեռնի հուշակոթողին եւ ծաղիկներ խոնարհել մեկուկես միլիոն անմեղ զոհերի հիշատակը հավերժացնող անմար կրակի մոտ։

ԼՂՀ ԱԺ նախագահ Աշոտ Ղուլյանը նշել է, որ Հայոց ցեղասպանության զոհերի հիշատակը հարգելը յուրաքանչյուր հայի սուրբ պարտականությունն է։

Նա նաև նշել է, որ Հայոց ցեղասպանության 100-ամյա տարելիցն առիթ է ազգային միասնական ծրագրեր իրականացնելու համար։

Արդեն մեկ շաբաթ է դադարեցված են Հյուսիս–հարավ ավտոմայրուղու Տրանշ–1 Երևան Արտաշատ ճանապարահատվածի բետոնապատման աշխատանքները, քանի որ շինարարությունն իրականացնող կազմակերպությանը գումարներ չեն փոխանցվել և ֆինանսական դժվարություններ կան։ Ի պատասխան լրատվամիջոցների հարցին «Հյուսիս հարավ ճանապարհային միջանցքի ներդրումային ծրագրի իրականացման կազմակերպություն» ՊՈԱԿ–ի տնօրեն Արթուր Սարգսյանը նշել է.

«Շինարարությւոնը չի դադարեցվել, Կառանները անում են կողնակների գործերն են անում։ Բետոնի հետ կապված կարող է ջերմաստիճանը չի բավարարել, կամ քամոտ եղանակ է եղել։ Այսօր պետք է, որ սկսեին, որովհետև քամի չկա։ Իսկ ինչ վերաբերում է ֆինանսական խնդիրներին, փոխանցումները իրենք ժամանակին կատարում են ներկայացված կատարողականներով, եթ եիհարկե կատարողականները ընդունվում են»: Հյուսիս–հարավ մայրուղու Երևան–Արտաշատ ճանապարհահատվածը նախատեսված է շահագործման հանձնել դեկտեմբերի 23-ին:

Չորրորդ իշխանություն