Երկու օր առաջ ՀՀ դատախազությունն Ազգային ժողով է ուղարկել ՀՀ դատախազության 2014 թվականի գործունեության մասին ՀՀ դատախազ Գևորգ Կոստանյանի ծավալուն, ավելի քան 70 էջանոց զեկույցը կամ հաշվետվությունը:

Բացի թվային տվյալներից, ՀՀ գլխավոր դատախազը գնահատականներ է ներկայացնում նաև ՀՀ ոստիկանության, ՀՀ քննչական կոմիտեի և ՀՔԾ-ի գործունեության վերաբերյալ: Գնահատականներում նկատելի է մեղմ քննադատություն: Այսպես, ըստ ՀՀ գլխավոր դատախազի հաշվետվության, հանցագործության դեպքերի բացահայտումները նվազել են:

Ահա մեկ հատված հաշվետվությունից, որը հրապարակվել է armtimes.com կայքում:

«Անհանգստացնող է հետաքննության մարմինների կողմից ծանր և առանձնապես ծանր հանցագործություններով իրականացվող օպերատիվ-հետախուզական միջոցառումների ցածր որակն ու անարդյունավետությունը: Հանցագործությունների բացահայտման աշխատանքներում տեղ գտած նշված թերությունները խոչընդոտում են երկրում պատշաճ քրեական քաղաքականության իրականացմանը, նվազեցնում հանցագործությունների կանխարգելմանն ուղղված ջանքերի արդյունավետությունը, նպաստավոր պայմաններ ստեղծում նոր հանցագործությունների կատարման համար: Լուրջ անելիքներ կան հետախուզման մեջ գտնվող մեղադրյալների գտնվելու վայրը պարզելու, նախորդ տարիներին կատարված հանցագործությունները բացահայտելու, հանցավոր խմբերի բոլոր անդամներին և անչափահասներին հանցավոր գործունեության ներգրավողներին ի հայտ բերելու, հանցագործությունների կատարմանը նպաստող պայմաններն ու պատճառները քննությամբ պարզելու և ներգործության համարժեք միջոցներ ձեռնարկելու գործում»:

Հիմնվելով իր մատնանշած խնդիրների վրա՝ Կոստանյանը հիշյալ զեկույցով առաջարկել է նաև վերանայել «Դատախազության մասին» ՀՀ օրենքը, լրացումներ կատարել, որը թույլ կտա ՀՀ դատախազությանն ավելացնել լիազորությունների շրջանակը: Առաջարկում է դատախազությանը վերապահել իրավապահ մարմինների գործունեության համակարգումը, իսկ հանցավորության դեմ պայքարի ոլորտում իրավապահ մարմինների գործունեության համակարգման կազմակերպաիրավական ձևերը կսահմանվեն ՀՀ գլխավոր դատախազի հրամանով:

Նիկոլայ Բաղդասարյան

ՀՀ փաստաբանական պալատի անդամ, փաստաբան Նիկոլայ Բաղդասարյանը, կայքի խնդրանքով անդրադառնալով Գևորգ Կոստանյանի՝ ԱԺ ներկայացրած զեկույցին, կարծիք հայտնեց՝ ասելով. «Անկեղծ ասած՝ չեմ կարծում, որ կա մի պետություն, որտեղ հնարավորություն չլինի հնչեցնել քննադատություն ոստիկանության կամ այլ իրավապահ կառույցների աշխատանքների հասցեին, քանի որ այդ մարմինները խնդիր են ունենում բացահայտելու հանցագործությունները, չեք գտնի մի պետություն, որտեղ հանցագործություններ չլինեն կամ հանցագործությունները 100 տոկոսով բացահայտվեն, հետևաբար միշտ կարելի է գտնել պատճառ՝ ինչու քննադատել ոստիկանությանը: Սակայն ես կուզենայի, որ զեկույցում ոչ թե առաջնահերթ քննադատության ենթարկվեր ոստիկանությունն ու այլ իրավապահ մարմինների աշխատանքները, այլ Կոստանյանն առաջնահերթ քննադատություն ներկայացներ հենց դատախազության աշխատանքի վերաբերյալ»: Փաստաբանի կարծիքով՝ ՀՀ-ում առաջնահերթ խնդիրն այն է, որ նաև դատախազության սխալ աշխատաոճի արդյունքում է, որ ՀՀ քաղաքացիները կորցրել են այն հնարավոր հույսը, որ Հայաստանում գործում է քրեական արդարադատություն, որ հանցագործություն կատարած անձը կենթարկվի պատասխանատվության, իսկ անմեղ մարդը պաշտպանված կլինի:

«Այսօր, որպես փաստաբան, ես կարող եմ ասել և հիմնավորել, որ ՀՀ-ում բացարձակապես չի գործում քրեական արդարադատությունը: Կարող եմ օրինակներով ներկայացնել մի շարք քրեական գործեր, որոնց հիման վրա կարելի է եզրահանգել, որ իրականում Հայաստանում դատավարությունները կրում են ձևական բնույթ, անկախ նրանից, թե դատավարության կողմերն ինչպիսի ապացույցներ են ներկայացնում դատական նիստի ժամանակ, միևնույն է, գործի ելքն ի սկզբանե կանխորոշված է: Այսինքն, ամբաստանյալը, որը մտնում է դատական պրոցես, ինքը գիտի, որ կանխորոշված է գործի ելքը և հույս չունի դատական համակարգի նկատմամբ: Այ դրա մասին պետք է մտահոգվի առաջնահերթ պարոն Կոստանյանը: Եթե գլխավոր դատախազը չի կարողանում ձեռնարկել որևէ քայլ, որպեսզի հասարակության վստահությունը դեպի քրեական արդարադատությունը բարձրանա, այլ հակառակը, եղածն էլ վերացել է, ապա այդ փաստը պետք է մտահոգի ԱԺ պատգամավորներին, ինչո՞ւ ստեղծված վիճակը որևէ փոփոխության չի ենթարկվում, և ինչո՞ւ գնալով ամեն ինչ ավելի վատթարանում է: Մեր հասարակության գրեթե բոլոր ներկայացուցիչների մոտ ձևավորվել է հստակ տպավորություն, որ այս կամ այլ գործի ելքը նախօրոք որոշված է, և դա հաճախակի պայմանավորված է ոչ թե արդարադատություն իրականացնող մարմնից, այլ քաղաքական ուժերից, քաղաքական գործիչներից, օլիգարխներից, հանցավոր աշխարհի ներկայացուցիչներից: Ցավոք սրտի, այդ անձանցով է պայմանավորված՝ ինչպիսի դատական ակտ կկայացվի, այլ ոչ թե դատավորից: Սրա մասին առաջնահերթ պետք է մտահոգվեր Կոստանյանը»:

Ն. Բաղդասարյանը որպես օրինակ մատնանշում է Վրաստանի փորձը: Ըստ նրա՝ Վրաստանում ժամանակին նույն վիճակն էր, նույն կոռումպացված դատական համակարգն էր, սակայն այսօր լիովին այլ պատկեր ունեն այնտեղ: Պետք է բոլորն ունենան կամք և առերեսվեն ճշմարտության հետ, ընդունեն, որ հնչեղություն ունեցող հանցագործությունների բացահայտումներն այնքան էլ պայմանավորված չեն ոստիկանության անգործությունով, ավելի շատ կախված են իշխանության կամարտահայտությունից: «Երբ պետության ներսում իշխանություններն ամեն ինչ ձեռնարկում են, որպեսզի հանցագործությունները բացահայտվեն, ապա դրանք շատ արագ բացահայտվում են: Երբ որ ամեն ինչը դրված է աշխատանքային հարաբերությունների, այլ ոչ թե ամբիցիաների վրա, գործընթացը շատ նորմալ գնում է և ի նպաստ հասարակությանը, ի նպաստ տվյալ պետությանը: Իսկ երբ ամբողջը դրված է քաղաքական տարբեր գործիչների անձնական շահերի, ամբիցիաների վրա՝ ոնց թե, ես ասացի, դու չհասկացար, ես քեզանից վերև եմ, իմ պաշտոնը քեզանից բարձր է, ես քեզանից խելոք եմ, ինչն այսօր մենք կարող ենք դիտարկել, ապա այս պայմաններում դրական արդյունք ակնկալել հնարավոր չէ»:

Արթուր Սաքունց

ՀՔԱ Վանաձորի գրասենյակի համակարգող, իրավապաշտպան Արթուր Սաքունցն, իր հերթին անդրադառնալով Գ. Կոստանյանի հաշվետվությանն ու գնահատականներին, դրանք նախ որակեց «տարօրինակ»:

«ԱԱԾ աշխատակիցների կողմից վերաբերմունքի քննության փաստը խոսում է, որ կան բավարար մտահոգող պայմաններ: Գլխավոր դատախազը պետք է իմանա, որ ամենախոցելի և ռիսկային կառույցը մարդու իրավունքների տեսանկյունից ԱԱԾ-ն է իր քննչական բաժնի հետ միասին»:

Ուստի Սաքունցի համար տարօրինակ է, որ ԱԱԾ-ին չի անդրադառնում դատախազը, և հետո, ըստ նրա, Կոստանյանը պետք է նաև հաշվետվությունում «անհանգստանար» կամ էլ պատասխան տար, թե ինչու Մարտի մեկի բացահայտման գործում որևէ քայլ չի արել դատախազությունը.

«Մարտի մեկի հանցագործության ուղղությամբ ի՞նչ գործ է կատարել ինքը և զինված ուժերում մահացության դեպքերի երկար ժամանակ չբացահայտված գործերի քննության իրականացման հետ կախված ի՞նչ է արել:

Կան կոնկրետ բնագավառներ և կոնկրետ հարցեր, որ հենց գլխավոր դատախազության ներկայիս լիազորություններն առավել քան բավարար են գործողություններ իրականացնելու համար»:

Սաքունցն առանձին անդրադարձավ նաև Գյումրիում Ավետիսյանների ընտանիքի սպանության գործի բացահայտման ուղղությամբ Գ. Կոստանյանի աշխատանքին ու դերակատարությանը: Եվ երկու հարց հղեց Գևորգ Կոստանյանին.

«Պերմյակովին ՀՀ կողմին փոխանցելու պահանջի վերաբերյալ ի՞նչ է արել ինքը: Եվ երկրորդ՝ քննությանը խոչընդոտելու փաստի հիման վրա ռուսական ռազմաբազայի ղեկավարությամբ սահմանապահ ծառայության ղեկավարների նկատմամբ քրեական հետապնդում իրականացնելու տեսակետից ի՞նչ է մտածում անել գլխավոր դատախազը»:

galatv.am

ՀՀ Նախագահի աշխատակազմը տեղեկացնում է, որ Նախագահ Սերժ Սարգսյանը հրամանագիր է ստորագրել, որով Հնդկաստանի Հանրապետությունում, Շրի Լանկայի Ժողովրդավարական Սոցիալիստական Հանրապետությունում, Նեպալի Դաշնային Ժողովրդավարական Հանրապետությունում և Մալայզիայում Հայաստանի Հանրապետության արտակարգ և լիազոր դեսպան Ա. Հակոբյանի ազատել է պաշտոնից։
«Ղեկավարվելով Հայաստանի Հանրապետության Սահմանադրության 55-րդ հոդվածի 8-րդ կետով` ո ր ո շ ու մ ե մ.

Արա ՀԱԿՈԲՅԱՆԻՆ ազատել Հնդկաստանի Հանրապետությունում, Շրի Լանկայի Ժողովրդավարական Սոցիալիստական Հանրապետությունում, Նեպալի Դաշնային Ժողովրդավարական Հանրապետությունում և Մալայզիայում Հայաստանի Հանրապետության արտակարգ և լիազոր դեսպանի պաշտոնից»:

Մեկ այլ հրամանագրով ՀՀ Նախագահը Հնդկաստանում ՀՀ արտակարգ և լիազոր դեսպան է նշանակել Արմեն Մարտիրոսյանին։

tert.am

2005 թվականից ի վեր` ՄԱԿ-ի Գլխավոր Ասամբլեայի որոշմամբ, ապրիլի 4-ը հայտարարվել է ականային վտանգի մասին իրազեկման և ականազերծման գործունեությանն աջակցելու միջազգային օր:

Աշխարհի բազմաթիվ երկրներում ականային վտանգը սպառնում է խաղաղ բնակչության և առաջին հերթին` երեխաների կյանքին, հաճախ դառնում է հաշմանդամության պատճառ: Ականապատ տարածքները պիտանի չեն ոչ գյուղատնտեսության, ոչ անասնապահության, ոչ հանքարդյունահանման և ոչ էլ տուրիզմի ու տնտեսության այլ ճյուղերի զարգացման համար, ուստի կամաց-կամաց լքվում և ժամանակի ընթացքում վերածվում են ամայի տարածքների:

Լուծումը միակն է. ականազերծում և պատերազմի պայթուցիկ մնացորդների վերացնում: Խնդիրը բավականին ժամանակատար է, ծախսատար և պահանջում է հետևողական բարեխիղճ աշխատանք: Ինչպես ամբողջ աշխարհում, այնպես էլ Հայաստանում ականային վտանգի վերացման պատասխանատվությունն իր ուսերին է վերցրել երկրի կառավարությունը: Կատարված հետազոտություններով Հայաստանի հանրապետության Տավուշի, Գեղարքունիքի, Վայոց Ձորի և Սյունիքի մարզերի 42 համայնքներում հայտնաբերվել և քարտեզագրվել են 131 վտանգավոր տարածքներ` 47մլն. քառ. մետր ընդհանուր մակերեսով: Ներկայումս ընթանում են տեխնիկական հետախուզման և ականազերծման աշխատանքներ, շարունակվում են ոչ-տեխնիկական հետազոտությունները: Ողջ գործընթացի համակարգումն ու որակի վերահսկողությունն իրականացնում է ՀՀ կառավարության որոշմամբ հիմնադրված հակաականային գործողությունների ազգային մարմինը` «Հումանիտար ականազերծման և փորձագիտական կենտրոն» ՊՈԱԿ-ը:

Ականազերծման աշխատանքներն իրականացվում են «ՀԱԼՕ թրասթ» կազմակերպության կողմից` ՀՀ ՊՆ ինժեներա-սակրավորային խաղաղապահ գումարտակի հետ համատեղ: Ի դեպ, այդ գումարտակը ներկայումս հանդիսանում է երկրի հումանիտար ականազերծման միակ ներուժը: Աշխատանքների ֆինանսական աջակցությունը տրամադրվել է ԱՄՆ պետդեպարտամենտի PM/WRA գրասենյակի կողմից: Հայաստանն աջակցում է դոնորների կողմից ֆինանսավորված աշխատանքներին բոլոր հնարավոր միջոցներով: Օրինակ՝ անցած տարի Հայաստանի ներդրումը ԱՄՆ պետդեպարտամենտի PM/WR-ի կողմից ֆինանսավորված ծրագրում կազմում է 75.000.000 ՀՀ դրամ (պրոֆեսիոնալ ականազերծողների, հանդերձանքի,տրանսպորտի, վառելանյութի տրամադրում և այլն): Այս ամենն արվում է, որպեսզի վստահ լինենք, որ մեր բնակիչները մեր երկրում կարող են անվտանգ տեղաշարժվել և հիմք ստեղծել զարգացման համար: Հայաստանը զարգացման կարիք ունի, իսկ զարգացումը հանգեցնում է կայունության, որն էլ հենց այն է, ինչ պետք է երկրին և համայնքներին:

Զինված ուժերի հակաօդային պաշտպանության և ավիացիոն ստորաբաժանումներն այսօր ի զորու են դիմակայելու և հետ մղելու հակառակորդի օդային հարձակումները: Հայկական զինուժի հակաօդային պաշտպանության համակարգը օրնիբուն հսկում է ՀՀ օդային սահմանները: Զորատեսակի կատարելագործման ուղիների, կատարված աշխատանքների, խնդրահարույց հարցերի ու առաջիկա անելիքների քննարկմանն էր նվիրված ապրիլի 3-ին ՀՀ ՊՆ վարչական համալիրում անցկացված խորհրդակցությունը:

Բացելով խորհրդակցությունը և ներկայացնելով օրակարգում տեղ գտած հարցերը` ՀՀ պաշտպանության նախարար Սեյրան Օհանյանը կարևորել է ՀՕՊ զորքերի դերակատարումը ազգային բանակի մարտունակության ապահովման համատեքստում:

Խորհրդակցության ընթացքում ՀՕՊ համակարգի ներկայիս վիճակի, 2014թ. մարտի 1-ից մինչ այս տարվա մարտի 1-ն ընկած ժամանակահատվածում իրականացված աշխատանքների, օդաչուական անձնակազմի մասնագիտական կարողությունների բարձրացմանն ուղղված ծրագրերի մասին հաշվետու զեկույցներով հանդես են եկել ԶՈւ մի շարք վարչությունների պետեր ու զորամասերի հրամանատարներ: Բանախոսները հանգամանալից անդրադարձել են մարտական հերթապահության, ենթակա ստորաբաժանումներում մարտական խնդիրների կատարման ու զորահավաքային պատրաստականության, անձնակազմի թռիչքային, պարաշյուտադեսանտային, ինժեներատեխնիկական պատրաստության, ռազմաավիացիոն տեխնիկայի շահագործման ու պահպանման հարցերին, այդ ուղղությամբ իրականացվող ընթացիկ և պլանային միջոցառումներին, ԶՈՒ պատրաստության պլանի համաձայն անցկացված հանկարծակի ստուգումներին: Առաջարկություններ են ներկայացվել հրատապ լուծում պահանջող խնդիրների, զինծառայողների և կուրսանտների սոցիալ-կենցաղային պայմանների առավել բարելավման վերաբերյալ

Ամփոփիչ զեկույցում ՀՀ ԶՈՒ ԳՇ պետի տեղակալ, գեներալ-լեյտենանտ Ստեփան Գալստյանը փաստել է, որ հաշվետու ժամանակահատվածում ընդհանուր առմամբ պատշաճ կերպով իրականացվել են ԶՈՒ պատրաստության պլանով նախատեսված բոլոր միջոցառումները և ենթակա ստորաբաժանումներն ունակ են կատարելու իրենց առջև դրված մարտական խնդիրները:

Խորհրդակցության ավարտին ի մի բերելով արծարծված հարցերը` ՀՀ պաշտպանության նախարար Սեյրան Օհանյանը հետագա անելիքների կազմակերպման և զորատեսակի մարտունակության առավել բարձրացման նպատակով տվել է համապատասխան հանձնարարականներ և ցուցումներ:

Շուտով փաստաբանները նոր հասարակական կազմակերպություն են գրանցելու, որը կոչվելու է Փաստաբանների ակումբ: Այն իր գոյության մասին պաշտոնապես հայտարարելու է ապրիլի 10-ին և միավորելու է մոտ 40-50 փաստաբանների: «Նոր ՀԿ-ն զբաղվելու է փաստաբանների առօրյա գործունեության ընթացքում ծագող խնդիրներով, փաստաբանների հոգսերով, նաև վերահսկելու է Փաստաբանների պալատի գործունեությունը,- ասաց Փաստաբանների ակումբի հիմնադիրներից Էդուարդ Չինարյանը:- Ստեղծվելու է Հանրային պալատի նման մի կառույց, որի անհրաժեշտությունը կա: Սա նաև պետք է, որ անհրաժեշտության դեպքում կարողանանք կառավարություն մտնել և օրենսդրական նախաձեռնություն ներկայացնել»: Այս փուլում մշակվում է կազմակերպության կանոնադրությունը: Փաստորեն, նոր ՀԿ-ն մասնակիորեն զբաղվելու է այն խնդիրներով, որոնցով զբաղվում է Փաստաբանների պալատը:

Գուցե ստեղծվում է ի հակակշիռ այս մարմնի: Մեր տեղեկություններով, փաստաբանների մի խումբ պատրաստվում է առաջիկայում դիմել Սահմանադրական դատարան, պահանջելով հակասահմանադրական ճանաչել «Փաստաբանության մասին» օրենքի այն դրույթները, որոնք մենաշնորհային կարգավիճակ են ապահովում Փաստաբանների պալատին, ապա նաև՝ պալատի կանոնադրությունը: Սակայն փաստաբանները խուսափում են այս մասին բաց և հրապարակավ խոսելուց:

Սյուզան Սիմոնյան

Նախագահ Սերժ Սարգսյանն այսօր ՀՀ գիտությունների ազգային ակադեմիայի նիստերի դահլիճում մասնակցել է Ակադեմիայի 2014թ. գիտական և գիտակազմակերպական գործունեության հիմնական արդյունքներին նվիրված տարեկան ընդհանուր ժողովին:

Բացման խոսքով հանդես է եկել ՀՀ ԳԱԱ նախագահ, ակադեմիկոս Ռադիկ Մարտիրոսյանը, ով զեկուցել է նաև Ակադեմիայի 2014թ. գիտական գործունեության հիմնական արդյունքները: ՀՀ ԳԱԱ 2014թ. գիտակազմակերպական գործունեության մասին զեկուցել է ՀՀ ԳԱԱ ակադեմիկոս-քարտուղար, թղթակից անդամ Հրանտ Մաթևոսյանը: Տարեկան ժողովում ներկայացվել է «Հայոց ցեղասպանության ճանաչման և հատուցման իրավաքաղաքական հիմնախնդիրները» զեկույցը՝ պատրաստված ՀՀ ԳԱԱ ակադեմիկոսներ Գագիկ Ղազինյանի, Աշոտ Մելքոնյանի և Ռուբեն Սաֆրաստյանի կողմից:

Կիպրոսում պաշտոնական այցով գտնվող ՀՀ Ազգային ժողովի նախագահ Գալուստ Սահակյանի գլխավորած պատվիրակությանը ապրիլի 2-ին ընդունել է Կիպրոսի Հանրապետության նախագահ Նիկոս Անաստասիադիսը:

Գալուստ Սահակյանն իր խոսքում կարեւորել է երկու երկրների միջեւ համագործակցության խթանումը մշակութային եւ գիտակրթական ոլորտներում: Խորհրդարանի ղեկավարը նշել է, որ Հայաստանի Հանրապետությունն առանձնակի կարեւորություն է տալիս տնտեսական կապերի զարգացմանը՝ ընդգծելով, որ առեւտրատնտեսական ոլորտում առկա ցուցանիշները չեն արտացոլում հայ-կիպրական համագործակցության իրական ներուժը: Գալուստ Սահակյանն այս առումով մեծապես կարեւորել է տվյալ ոլորտում նոր նախաձեռնությունների իրականացումը: Որպես համագործակցության հեռանկարային եւ շահավետ բնագավառներ` նա առանձնացրել է զբոսաշրջության եւ բանկային ոլորտները:

«Մենք շահագրգռված ենք խորացնել փոխգործակցությունը տվյալ ոլորտներում: Հայաստանի անդամակցությունը Եվրասիական տնտեսական միությանը նոր հնարավորություններ է ընձեռում Կիպրոսին եւ Հայաստանին առեւտրատնտեսական հարաբերությունների զարգացման համար»,- հավելել է Գալուստ Սահակյանը:

Դիմելով Կիպրոսի Հանրապետության նախագահին՝ ՀՀ խորհրդարանի ղեկավարը նշել է, որ Հայաստանը շարունակելու է ջանքեր գործադրել ցեղասպանությունների ճանաչման, դատապարտման եւ կանխարգելման գործում: Նա փաստել է, որ սույն թվականի մարտի 24-ին ՀՀ Ագգային ժողովը միաձայն ընդունել է Օսմանյան կայսրության կողմից Պոնտոսի հույների եւ ասորիների նկատմամբ իրականացված ցեղասպանությունը դատապարտող հայտարարություն: ԱԺ նախագահը բարձր է գնահատել Կիպրոսի՝ ցեղասպանությունների կանխմանը, ցեղասպանության ենթարկված ժողովուրդների իրավունքների վերականգնմանը եւ պատմական արդարության հաստատմանն ուղղված գործունեությունը:

Գալուստ Սահակյանն իր երախտագիտությունն է հայտնել Ներկայացուցիչների պալատի կողմից Հայոց ցեղասպանության ժխտումը քրեականացնող օրինագծի ընդունման համար:

Կիպրոսի նախագահը ՀՀ ԱԺ պատվիրակությանն ուղղված ողջույնի խոսքում նշել է, որ Կիպրոսը եղել է եւ մշտապես կմնա Հայաստանի եղբայրական երկիրը եւ իր ուժերը կգործադրի բարեկամ երկրին աջակցելու համար:

Նիկոս Անաստասիադիսը վերահաստատել է Հայոց ցեղասպանության 100-րդ տարելիցին նվիրված միջոցառումներին մասնակցելու իր որոշումը:

Կիպրոսի Հանրապետության նախագահն իր խոսքում նշել է, որ տեղյակ լինելով Ադրբեջանի կողմից իրականացվող սադրիչ գործողություններին՝ լիովին կիսում է ԼՂ հիմնախնդրին բացառապես խաղաղ ճանապարհով լուծում տալու Հայաստանի Հանրապետության մոտեցումը:

Այս տարվա առաջին երկու ամիսներին պետական եկամուտների թերակատարման պատճառներից մեկն այն է որ այդ երկրներից Հայաստան ներմուծվող ապրանքները մաքսազերծվում են ԵՏՄ անդամ այլ երկրներում, հիմնականում Բելառուսում և Ղազախստանում:

Եթե նախկինում երրորդ երկրներից ապրանքների մեծ մասը ծովով բերվում էր Վրաստան, հետո մաքսազերծվում Վրաստան-Հայաստան սահմանին, ապա ներկայումս Եվրոպայից դեպի ՀՀ ուղևորվող բեռների մի զգալի մասը մաքսազերծվում է Բելառուսում և Ղազախստանում ու ՀՀ հասնում մաքսազերծված վիճակում: Ներմուծողները խուսափում են ապրանքը ՀՀ մաքսատանը մաքսազերծելուց, քանի որ Բելառուսում և Ղազախստանում Հայաստան ուղևորվող բեռների մաքսազերծման ժամանակ են կիրառվում այսպես կոչված «հսկիչ գներ», ինչի շնորհիվ մաքսազերծումը ավելի էժան է ստացվում: Խնդիրն այն է, որ ՀՀ մաքսային մարմինները ապրանքները մաքսազերծում են ոչ թե իրենց իսկական գներով, այլ հենց մաքսայինի սահմանած «հսկիչ գներով»: Ասենք՝ եթե դուք 3000 դոլարով մեքենա եք գնել Եվրոպայում, ապա ՀՀ մաքսային ծառայաթյունը համարում է, որ դուք մեքենան գնել եք 5000 դոլարով, և հենց այդ գնից էլ հաշվարկում է ձեր վճարելիք մաքսատուրքը և ԱԱՀ-ն: Ղազախստանում և Բելառուսում նման ավանդույթ չկա, և ապրանքները մաքսազերծվում են ըստ ներմուծողի ներկայացրած հաշիվ-ապրանքագրերի:

Հայկական Ժամանակ

 Երեկ որոշում է կայացվել.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ Ո Ր Ո Շ ՈՒ Մ 2014 թվականի N -Ա « ԵՐԵՎԱՆԻ ԳԵՎՈՐԳ ԷՄԻՆԻ ԱՆՎԱՆ N 182 ԱՎԱԳ ԴՊՐՈՑ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆԸ «ԵՐԵՎԱՆԻ ԳԵՎՈՐԳ ԷՄԻՆԻ ԱՆՎԱՆ N182 ԱՎԱԳ ԴՊՐՈՑ» ՀԻՄՆԱԴՐԱՄԻ ՎԵՐԱԿԱԶՄԱՎՈՐԵԼՈՒ ՄԱՍԻՆ

Որն է այս որոշման իմաստը. ԿԳ նախարարության կայքը գրում է. Ներկայացնելով հարցի իրավական կողմը՝ ՀՀ ԿԳ նախարարը նշել է, որ դպրոցը Մայթ Աթոռի ենթակայությամբ դառնալու է հումանիտար ուղղվածությամբ նախամասնագիտական ավագ դպրոց.«Ե՛վ Մայթ Աթոռը, և՛ ՀՀ ԿԳՆ-ն  այս նախագծի հետ մեծ  հույսեր են կապում: Մենք ակնկալում ենք, որ Մայթ Աթոռի հոգածության ներքո դպրոցը նոր շենքային պայմաններ ու տեխնիկական հագեցվածություն կստանա, ինչպես նաև  նոր բովանդակություն՝  ապոհովելով կրթության ավելի բարձր որակ»:

Հարց է առաջանում. Մայր Աթոռը չէ՞ր կարող հանձն առնել բարելավել դպրոցի շենքային պայմանները, կամ լուծել հագեցվածության հարցը, առանց այն իր ենթակայության տակ վերցնելու:

Ինչ վերաբեվում է այն ԿԳ կայքի հրապարակմանը, թե՝ նախարարի խոսքով՝ «այդ կերպ  կապոհովվի կրթության ավելի բարձր որակ», վստահաբար պրն նախարարը այս առումով պետք է լիարժեք բացատրություն տա:

Առավել ևս, որ այս ձեռնարկումը նաև սահմանադրորեն վիճելի է:  

Վերընշված որոշումից մի հատված

Հիմք ընդունելով «Պետական ոչ առևտրային կազմակերպությունների մասին» Հայաստանի Հանրապետության օրենքի 24-րդ հոդվածի 1-ին մասը, Հայաստանի Հանրապետության քաղաքացիական օրենսգրքի 693 հոդվածի 2-րդ մասը և «Հիմնադրամների մասին» Հայաստանի Հանրապետության օրենքի 9-րդ հոդվածը` Հայաստանի Հանրապետության կառավարությունը ո ր ո շ ու մ է.

1. «Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպությունը(պետական գրանցման համարը՝ 273.210.03400) վերակազմավորել «Երևանի Գևորգ էմինի անվան ավագ դպրոց» հիմնադրամի (այսուհետ` դպրոց):

2. Հաստատել դպրոցի կանոնադրությունը` համաձայն N 1 հավելվածի:

3. Հայաստանի Հանրապետության անունից հանդես եկող պետական կառա- վարման մարմին սահմանել Հայաստանի Հանրապետության կրթության և գիտության նախարարությանը(այսուհետ՝ նախարարություն):

4. Դպրոցի տնօրենի ժամանակավոր պաշտոնակատար (այսուհետ` ժամանակավոր տնօրեն) նշանակել Ռուզաննա Շուրկայի Ալավերդյանին (ՀՀ քաղաքացի անձնագիր` թիվ AM 0785558 , տրված՝ 03. 07. 2012 թ., 011-ի կողմից):

5. Առաջարկել դպրոցի տնօրենի ժամանակավոր պաշտոնակատարին սույն որոշումն ուժի մեջ մտնելուց հետո երկամսյա ժամկետում Հայաստանի Հանրապետության օրենսդրությամբ սահմանված կարգով ապահովել դպրոցի պետական գրանցումը:

6.«Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպությանն ամրացված Երևան քաղաքի Կորի (Կրիվոյի) 55 հասցեում գտնվող 17763,1 հազ.դրամ ընդհանուր սկզբնական արժեքով ու 3312,7 քառ.մետր ընդհանուր մակերեսով ուսումնական մասնաշենքը, 39899,5 հազ.դրամ ընդհանուր սկզբնական արժեքով ու 12.7 քառ.մետր ընդհանուր մակերեսով կաթսայատունը և պետական սեփականություն հանդիսացող 0,2593 հա մակերեսով հողատարածքը հետ վերցնել և թողնել «Հայաստանի Հանրապետության կառավարությանն առընթեր պետական գույքի կառավարման վարչության աշխատակազմ» պետական կառավարչական հիմնարկի տնօրինությանը:

7. «Հայաստանի Հանրապետության կառավարությանն առընթեր պետական գույքի կառավարման վարչության աշխատակազմ» պետական կառավարչական հիմնարկի հաշվեկշռում հաշվառված սույն որոշման N2 հավելվածում նշված գույքն անժամկետ, անհատույց օգտագործման իրավունքով հանձնել «Երևանի Գևորգ էմինի անվան ավագ դպրոց» հիմնադրամին :

8. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշումն ուժի մեջ մտնելուց հետո եռամսյա ժամկետում դպրոցի հետ կնքել համաձայնագիր՝ կատարելով սույն որոշումից բխող փոփոխություններ, ներառել դրույթ, որ դպրոցն իրավունք ունի իրեն անհատույց օգտագործման իրավունքով հանձնված գույքը հիմնադրի անունից, լիազորված պետական մարմնի համաձայնությամբ հանձնելու վարձակալության, եթե դա արգելված չէ հիմնադրի որոշմամբ: Հանձնված գույքի վարձակալության ժամկետը մեկ տարուց ավել չի կարող սահմանվել՝ բացառությամբ հիմնադրի կողմից սահմանված դեպքերում: Հանձնված գույքի վարձակալության հանձնման արդյունքում ստացված եկամուտները դպրոցի սեփականությունն են,համաձայնագրի նոտարական վավերացումն և գույքային իրավունքների պետական գրանցումն իրականացնել դպրոցի միջոցների հաշվին:

9. Հայաստանի Հանրապետության կրթության և գիտության նախարարին`

1) սույն որոշումն ուժի մտնելուց հետո մեկամսյա ժամկետում՝

ա. ապահովել «Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպությանը սեփականության իրավունքով և անհատույց օգտագործման իրավունքով պատկանող գույքի, ինչպես նաև պարտավորությունների կազմի ճշտման գործընթացը,

բ. հաստատել «Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպության գույքի, այլ գույքային իրավունքների, ինչպես նաև պարտատերերին և պարտապաններին վերաբերող բոլոր (ներառյալ վիճարկվող) պարտավորությունների «Երևանի Գևորգ էմինի անվան N 182 ավագ դպրոց» հիմնադրամին փոխանցման ակտը.

2) դպրոցի պետական գրանցումից հետո եռամսյա ժամկետում՝

ա. Հայաստանի Հանրապետության վարչապետի հաստատմանը ներկայացնել դպրոցի հոգաբարձուների խորհրդի կազմը,

բ. ապահովել «Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպությանը սեփականության իրավունքով պատկանող գույքը, սեփականության իրավունքով դպրոցին փոխանցելու հանձնման-ընդունման գործընթացը։

10. Սահմանել, որ «Երևանի Գևորգ էմինի անվան N 182 ավագ դպրոց» հիմնադրամը «Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպության իրավահաջորդն է և նրան է անցնում վերակազմա- կերպված իրավաբանական անձի իրավունքներն ու պարտականությունները՝ փոխանցման ակտին համապատասխան:

Կ Ա Ն Ո Ն Ա Դ Ր ՈՒ Թ Յ ՈՒ Ն «ԵՐԵՎԱՆԻ ԳԵՎՈՐԳ էՄԻՆԻ ԱՆՎԱՆ N 182 ԱՎԱԳ ԴՊՐՈՑ» ՀԻՄՆԱԴՐԱՄԻ I. ԸՆԴՀԱՆՈՒՐ ԴՐՈՒՅԹՆԵՐ

1. «Երևանի Գևորգ էմինի անվան N 182 ավագ դպրոց» հիմնադրամը (այսուհետ` դպրոց) հիմնադրի որոշմամբ հիմնադրված և անդամություն չունեցող ոչ առևտրային կազմակերպություն է:

2. Դպրոցը «Երևանի Գևորգ էմինի անվան N 182 ավագ դպրոց» պետական ոչ առևտրային կազմակերպության(պետական գրանցման համարը՝ 273.210.03400) իրավահաջորդն է (փոխանցման ակտին համապատասխան):

3. Դպրոցնն իր գործունեությունն իրականացնում է Հայաստանի Հանրա- պետության սահմանադրությանը, Հայաստանի Հանրապետության քաղաքացիական օրենսգրքին, «Հիմնադրամների մասին» Հայաստանի Հանրապետության օրենքին, «Կրթության մասին» Հայաստանի Հանրապետության օրենքին, «Հանրակրթության մասին» Հայաստանի Հանրապետության օրենքին, այլ իրավական ակտերին և սույն կանոնադրությանը համապատասխան:

4. Դպրոցի հիմնադիրը Հայաստանի Հանրապետությունն է` ի դեմս Հայաստանի Հանրապետության կառավարության: Հայաստանի Հանրապետության անունից հանդես եկող պետական կառավարման մարմին է Հայաստանի Հանրապետության կրթության և գիտության նախարարությունը:

5. Դպրոցի անվանումն է`

1) հայերեն լրիվ` «Երևանի Գևորգ էմինի անվան N 182 ավագ դպրոց» հիմնադրամ.

2) հայերեն կրճատ`ԵՐN182 ԱԴՀ.

3) ռուսերեն լրիվ` «Ереванская старшая школа N 182 имени Геворга Эмина» фонд.

4) ռուսերեն կրճատ` ЕСТШ_Фонд N 182 ИМ ГЕВОРГА ЭМИНА

5) անգլերեն լրիվ` «Yerevan high school N 182 after Gevorg Emin» Foundation.

6) անգլերեն կրճատ` YHS_Foundation N 182 after Gevorg Emin։

6. Դպրոցի գտնվելու վայրն է` Հայաստանի Հանրապետություն, քաղ. Երևան, 0070, Կորի (Կրիվոյի)55:

 II. ԴՊՐՈՑԻ ԻՐԱՎԱԿԱՆ ԿԱՐԳԱՎԻՃԱԿԸ

7. Դպրոցը իրավաբանական անձ է, ստեղծված է համարվում պետական գրանցման պահից և գործում է անժամկետ:

8. Դպրոցը Հայաստանի Հանրապետությունում և դրանից դուրս կարող է ստեղծել մասնաճյուղեր և ներկայացուցչություններ, ինչպես նաև հիմնարկներ, որոնք գործում են հոգաբարձուների խորհրդի կողմից հաստատված կանոնա- դրություններին համապատասխան:

9. Դպրոցն որպես սեփականություն ունի առանձնացված գույք, որը հաշվառվում է ինքնուրույն հաշվեկշռում, կարող է իր անունից ձեռք բերել ու իրականացնել գույքային և անձնական ոչ գույքային իրավունքներ, կրել պարտականություններ, դատարանում հանդես գալ որպես հայցվոր կամ պատասխանող:

10. Դպրոցնն իրավունք ունի օրենքով սահմանված կարգով բացելու բանկա- յին հաշիվներ Հայաստանի Հանրապետության և օտարերկրյա պետությունների բանկերում Հայաստանի Հանրապետության դրամով և (կամ) արտարժույթով:

11. Դպրոցի գործունեության ընթացքում ստացված ամբողջ եկամուտը, ինչպես նաև ամբողջ գույքը պետք է օգտագործվի նրա կանոնադրական նպատակների լուծման համար:

12. Դպրոցն իր կանոնադրությանը համապատասխան իրականացնում է սեփականության իրավունքով իրեն պատկանող գույքի տնօրինումը, օգտագործումը և տիրապետումը:

13. Դպրոցն ունի դրոշմակնիք, ձևաթղթեր և անհատականացման այլ միջոցներ, ինչպես նաև կարող է ունենալ Հայաստանի Հանրապետության պետական զինանշանի պատկերով իր անվամբ կնիք:

14. Հիմնադիրը պատասխանատվություն չի կրում դպրոցի պարտավորությունների համար, իսկ դպրոցը պատասխանատվություն չի կրում իր հիմնադրի պարտավորությունների համար:

Ռուզան Ավոյան