Բախում Ծովակալ Իսակովի պողոտայում

Հուլիսի 25-ին ոստիկանության Մալաթիայի բաժնում հաղորդում է ստացվել, որ ժամը .16.00-ին 65-ամյա Խաչիկ Ս.-ի վարած թիվ 203 երթուղու «ԳԱԶել-32213» մակնիշի միկրոավտոբուսը, Ծովակալ Իսակովի պողոտայի թիվ 25 էլեկտրասյան մոտ բախվել է 53-ամյա Նորայր Գ.-ի վարած «Ֆորդ-Տրանզիտ» մակնիշի ավտոմեքենային, ինչի հետևանքով Խաչիկ Ս.-ի ուղևորուհի 50-ամյա Անուշ Պ.-ն մարմնական վնասվածքներով տեղափոխվել է թիվ 1 համալսարանական հիվանդանոց:

Վթար Աճառյան փողոցում

Հուլիսի 25-ին ոստիկանության Նոր Նորքի բաժնում հաղորդում է ստացվել, որ  ժամը 11.20-ին, 73-ամյա Կարապետ Ե.-ն իր վարած «ՎԱԶ-2121» մակնիշի ավտոմեքենայով Աճառյան փողոցի թիվ 35 էլեկտրասյան մոտ վրաերթի է ենթարկել 54-ամյա Երջանիկ Ս.-ին, որը մարմնական վնասվածքներով տեղափոխվել է «Սուրբ Գրիգոր Լուսավորիչ» բժշկական կենտրոն:

Պատահար Ռուբինյանց փողոցում

Հուլիսի 25-ին ոստիկանության Քանաքեռ-Զեյթունի բաժնում հաղորդում է ստացվել, որ  ժամը 21.00-ին անհայտ ավտոմեքենայի վարորդը Ռուբինյանց փողոցի թիվ 17/2 շենքի մոտ վրաերթի է ենթարկել 25-ամյա Վլադիմիր Ն.-ին, որը մարմնական վնասվածքներով տեղափոխվել է «Քանաքեռ-Զեյթուն» բժշկական կենտրոն:

Շրջվել ձորը

Հուլիսի 25-ին ոստիկանության Արտաշատի բաժնում հաղորդում է ստացվել, որ  ժամը 23.10-ի սահմաններում 37-ամյա Գեղամ Մ.-ի վարած «ՎԱԶ-2106» մակնիշի ավտոմեքենան Լանջազատ գյուղից Ազատի Ջրամբար տանող ճանապարհին բախվել է քարին և շրջվել ձորը, ինչի  հետևանքով ուղևորը` 17-ամյա Նվեր Հ.-ն, մարմնական վնասվածքներով տեղափոխվել է Արտաշատի հիվանդանոց:

Վրաերթ Հալաբյան փողոցում

Հուլիսի 25-ին, ժամը 10.30-ին, «ՎԱԶ-21150» մակնիշի ավտոմեքենայի վարորդը Հալաբյան փողոցի թիվ 37 շենքի մոտ վրաերթի է ենթարկել 51-ամյա  Աիդա Թ.-ին, ինչի հետևանքով նա մարմնական վնասվածքներով տեղափոխվել է «Արմենիա» բժշկական կենտրոն:

2 զոհ, 11 վիրավոր

Հուլիսի 25-ին ոստիկանության Նոյեմբերյանի բաժնում հաղորդում է ստացվել, որ ժամը 11.00-ին 26-ամյա Վահան Ե.-ի վարած «ԳԱԶ-66» մակնիշի ավտոմեքենան Բերդավանի «Սալկուտ» կոչվող սարամասում, սարալանջից իջնելիս շրջվել է, ինչի հետևանքով վարորդը և 10 ուղևորները մարմնական վնասվածքներով տեղափոխվել են հիվանդանոց, իսկ 37-ամյա Սրմեն Քարիմյանը և նորածին Սերգեյ Աբրահամյանը տեղում մահացել են:

Հանգամանքները պարզվում են:

Զենք‑զինամթերքի կամավոր հանձնում

Հուլիսի 25-ին, ժամը 16.50-ին,  ոստիկանության Երևան քաղաքի վարչության հերթապահ մաս է զանգահարել մի  քաղաքացի և հայտնել, որ զենք-զինամթերքը է թողել Նորքի 1-ին զանգվածի «Յանտար» խանութի դիմաց գտնվող գազի ճնշման կարգավորման կետի մոտ:

Մեկնած օպերատիվ խումբը նշված վայրում, պոլիեթիլենային տոպրակի մեջ, հայտնաբերել է ինքնաշեն թմբուկավոր ատրճանակ և 7.62 մմ տրամաչափի «կարաբին» տիպի հրացանի 20  փամփուշտ:

Հայտնաբերվածն ուղարկվել է փորձաքննության:

Կատարվում է հետաքննություն:

Հուլիսի 25-ին, ժամը 20.40-ին, ոստիկանության Երևան քաղաքի վարչության հերթապահ մասից ոստիկանության Քանաքեռ-Զեյթունի բաժնում հաղորդում է ստացվել, որ իրենց է զանգահարել անհայտ քաղաքացի և հայտնել, որ զենք է թողնում Զեյթունի գերեզմանատան աղբարկղի մոտ:

Մեկնած օպերատիվ խումբը նշված վայրում տեղադրված աղբամանների մոտ, կարմիր պոլիէթիլենային տոպրակի մեջ, հայտնաբերել է սպիտակ մետաղից պատրաստված թմբուկավոր ատրճանակ, ինքնաձիգի 2 դատարկ պահունակ, լուսաձայնային 1 նռնակ, 7.62 մմ տրամաչափի` 165 և 5.6 մմ տրամաչափի 8 փամփուշտ:

Հայտնաբերված զինամթերքն ուղարկվել է փորձաքննության:

Կատարվում է հետաքննություն:

Հուլիսի 25-ին, ժամը 14.25-ին, անհայտ քաղաքացուց ոստիկանության  մետրոպոլիտենի պահպանության բաժնում ահազանգ է ստացվել, որ զենք-զինամթերք ունի, ցանկանում է հանձնել և թողնում է Կ. Դեմիրճյանի անվան Երևանի մետրոպոլիտենի «Գործարանային» կայարանի մուտքի դռների մոտ գտնվող աղբարկղում:

Մեկնած օպերատիվ խումբը նշված վայրում, պոլիէթիլենային տոպրակի մեջ, հայտնաբերել է 5,6 մմ տրամաչափի «ՏՕԶ-8» տիպի ակոսավոր հրացան, «ՌԳԴ» տիպի 1 նռնակ` պայթուցիչով, 5.45 մմ տրամաչափի` 70 , 7.62 մմ տրամաչափի 116 փամփուշտ, ինքնաձիգի 1 պահունակ և 2 ժապավեն-պահունակներ:

Հայտնաբերվածն առգրավվել և ուղարկվել է փորձաքննության:

Կատարվում է հետաքննություն:

Կանեփանման թփեր

Հուլիսի 25-ին, ժամը 18.00-ին, ոստիկանության Սյունիքի մարզային վարչության ծառայողները Կապան քաղաքի Երկաթուղայինների փողոցում գտնվող 46-ամյա Վահե Ջ.-ին պատկանող այգուց բերման են ենթարկել վերջինիս և 40-ամյա Վարդան Թ.-ին:

Վարդան Թ.-ի ձեռքին եղել է 0,8 գ կանաչ կանեփանման խոնավ զանգված, որի վերաբերյալ վերջինս հայտնել է, որ հայտնաբերվածն ինքը քաղել է նշված այգուց, իր օգտագործման համար` Վահե Ջ.-ի համաձայնությամբ և մասնակցությամբ:

Զննությամբ նշված այգուց հայնաբերվել և արմատախիլ է արվել 666 գ ընդհանուր կշռով կանեփանման երեք թուփ:

Հայտնաբերվածն առգրավվել և ուղարկվել է փորձաքննության:

Կատարվում է հետաքննություն:

Մոսկվա‑Երևան չվերթով

Հուլիսի 26-ին, ժամը 04.00-ին, ոստիկանության քրեական հետախուզության գլխավոր վարչության և Կենտրոնական բաժնի ծառայողները Մոսկվա-Երևան թիվ 191 չվերթի ինքնաթիռով ՀՀ են տեղափոխել 32-ամյա  Արմեն Խ.-ին, որը 2010 թ. հոկտեմբերի 29-ից Կենտրոնական բաժնի կողմից հետախուզվում էր խարդախության մեղադրանքով:

Արմեն Խ.-ն կալանավորված է:

Երգչուհի Էմի Ուայնհաուսի թաղման արարողությունը տեղի կունենա այսօր:

Ըստ Associated Press-ի` ընտանիքի ցանկությամբ թաղման վայրն ու ժամը գաղտնի կմնան:

Սկանդալային հայտնի երգչուհի Էմի Ուայնհաուսին հուլիսի 23-ին մահացած են գտել հյուսիսային Լոնդոնում գտնվող իր բնակարանում:

Թե ինչից է մահացել 27-ամյա երգչուհին, նույնիսկ դիահերձումից հետո չի հստակվել: Մասնագետները պետք է հավելյալ տոքսիկոլոգիական փորձաքննություն կատարեն:

Բժիշկներն առավել հակված են այն վարկածին, որ նա մահացել է թմրանյութերի մեծ չափաբաժնի ընդունման հետևանքով: Չի բացառվում նաև, որ երգչուհին մահացել է ուժեղ ալկոհոլային թունավորման պատճառով: Իսկ թե որն է իրական պատճառը, կպարզվի մանրակրկիտ փորձաքննությունից հետո:

Ըստ Gazeta.ru կայքի, ԱՄՆ նախագահ Բարաք Օբաման և Կոնգրեսի խոսնակ Ջոն Բեյները հրատապ հեռուստաուղերձներով դիմել են ժողովրդին՝ երկրին սպառնացող դեֆոլտի կապակցությամբ. եթե պետպարտքի շեմը չբարձրացվի, ամերիկյան կառավարությունը դեֆոլտ կհայտարարի։

Ելույթները հեռարձակվել են ԱՄՆ-ի բոլոր հիմնական հեռուստաալիքների երեկոյան եթերում՝ խախտելով հեռուստածրագրերի ավանդական հերթականությունը։

Օբամայի պնդմամբ` դեֆոլտ հայտարարելու պարագայում պետությունը բավականաչափ գումար չի ունենա վճարումներ կատարելու համար: «Մենք չենք կարողանա կենսաթոշակն ու հաշմանդամության թոշակները վճարել, ինչպես նաև ի վիճակի չենք լինի հազարավոր ընկերությունների հետ կնքած կառավարական պայմանագրերով ամրագրված վճարումներն իրականացնել: Մենք խորը տնտեսական ճգնաժամ հրահրելու վտանգի առջև ենք կանգնած. Կոնգրեսը մեկ շաբաթ ունի անհրաժեշտ որոշում ընդունելու համար»,- հայտարարել է ԱՄՆ նախագահը։

Օբամայի ելույթից 5 րոպե անց ազգային հեռուստատեսությամբ հեռարձակվել է նաև խոսնակ Ջոն Բեյների ելույթը, ըստ որի` ԱՄՆ տնտեսության ներկա իրավիճակի պատասխանատուն Օբաման է։

Ավելի վաղ ԱՄՆ ֆինանսների նախարար Թիմ Հայթներն ասել էր, որ օգոստոսի 2-ին ԱՄՆ-ը դեֆոլտ կհայտարարի այն պատճառով, որ հանրապետականները չեն ցանկանում բարձրացնել պետպարտքի շեմը, և այդ դեպքում տնտեսական ոլորտում ստեղծված իրավիճակը կարող է հանգեցնել 1930-ականների ընկճախտի կրկնության, ինչպես նաև համաշխարհային խոշոր ճգնաժամի։

Լոռու նոր մարզպետի պաշտոնում կնշանակվի Ալավերդու քաղաքապետ Արթուր Նալբանդյանը: Տեղեկությունը հաստատվել է գրեթե պաշտոնական աղբյուրից: Նշանակման մասին կհայտարարվի առաջիկա հինգշաբթի օրը` հուլիսի 28-ին, կառավարության նիստում:

Հիշեցնենք որ, կառավարությունը հուլիսի 14-ին հավանություն էր տվել Լոռու մարզպետ Արամ Քոչարյանին պաշտոնից ազատելու առաջարկին: Մարզպետի պաշտոնանկությունը ուժի մեջ է մտնում 2011 թ. օգոստոսի 12-ից` նրա արձակուրդից վերադառնալուց հետո: Լոռու մարզպետի պաշտոնը, կոալիցիոն հուշագրով վերապահված է Հանրապետական կուսակցությանը:

Արթուր Նալբանդյանը Ալավերդու քաղաքապետն է 2005 թվականից: Քաղաքապետ է ընտրվել որպես անկուսակցական եւ ընտրվելուց հետո, անդամագրվել է Հանրապետական կուսակցությանը: Այժմ կուսակցության Թումանյանի տարածքային կազմակերպության ղեկավարն է: Նա մեր ունեցած տեղեկություններով բավականին «թափով» անձնավորություն է տարածաշրջանում, և հեղինակություն ունեցող մեկը, որի նշանակումը պայմանավորված է,առաջիկա ընտրություններում նրա ունեցած հեղինակային գործոնով:Հետաքրքիր է, Լոռին, որը հայտնի է իր կրիմինալ դրսևորումներով, այնուամենայնիվ չունեցավ ոստիկան- մարզպետ, ի տարբերություն Շիրակի, Գեղարքունիքի,Արարատի:

Երկրում ներքաղաքական ճգնաժամի հաղթահարմանն ուղղված՝ Հայ Ազգային Կոնգրես — Իշխանություններ երկխոսության օրակարգում «Հայաստանում լեգիտիմ իշխանության շուտափույթ ձեւավորման նպատակով արտահերթ նախագահական եւ խորհրդարանական ընտրությունների անցկացման եւ դրանց ազատության, արդարության եւ օրինականության ապահովման անհրաժեշտ միջոցառումների» քննարկման առաջարկ.

Ստեղծված քաղաքական եւ սոցիալ-տնտեսական ճգնաժամի նկարագիր

• Բռնություններով եւ հարյուր հազարավոր ձայներով կեղծված նախագահական ընտրությունները, այդ հիման վրա իշխանության ոչ լեգիտիմության իրողության համընդհանուր ճանաչումը, Մարտի 1-ի սպանդը եւ երեքուկես տարի անց մեղավորների չբացահատումը հանգեցրել են քաղաքական խորը ճգնաժամի:
• Ընտրական գործընթացի համակարգային արատներից մեկն է դարձել բազմակի քվեարկությամբ ձայների կեղծումը շուրջ 500000 այն մարդկանց անունով, որոնք ընդգրկված լինելով ընտրական ցուցակների մեջ, մշտապես բացակայում են Հայաստանից, ինչը ապահովում է գործող իշխանության հաղթանակը` ոչ մի կապ չունենալով ընտրության իրական արդյունքների հետ:
• Արդյունքում իշխանությունն իր հաղթանակի համար պարտական է մնում ոչ թե ժողովրդի աջակցությանը, այլ իր ապօրինի հաղթանակը ապահովող օլիգարխներին, քրեական տարրերին եւ իշխանությունը չարաշահող կեղծարար պետական պաշտոնյաներին:
• Որպես հետեւանք գործում է ժողովրդի առաջ ոչ հաշվետու եւ կոռումպացված կառավարություն: Իշխանության բոլոր թեւերի եւ պետական ինստիտուտների նկատմամբ առաջացել է ժողովրդի հավատի կորուստ, խորացել համատարած անվստահությունը։ Առկա է պետական իշխանության լեգիտիմության ճգնաժամ։
• Կառավարման բոլոր բնագավառներում ունենք ձախողում. կառավարությունը հաստատել է ապօրինի հարկային եւ մաքսային արտոնություններ, սպասարկում է ապօրինի մենաշնորհների տիրացած օլիգարխների շահերը, նպաստում նրանց հարստացմանը, անկարող է կանխել նրանց կամայականությունները, պայքարել մոլեգնող կոռուպցիայի դեմ։ Կառավարության որեւէ ծրագրի նկատմամբ բացակայում է ժողովրդի աջակցությունը։ Առկա է կառավարման եւ տնտեսական ճգնաժամ։
• Հետեւանքները. շարունակվում է տնտեսական անկումը, սոցիալական վիճակի վատթարացումը, համատարած դժգոհության աճը, աղետալի չափերի է հասել արտագաղթը։ Չկարգավորված ղարաբաղյան հակամարտության պայմաններում ռազմական բալանսը կայուն փոփոխվում է հօգուտ Ադրբեջանի, սպառնալով մեր ազգային անվտանգությանը:

ԼՈՒԾՈՒՄՆԵՐ

Երկիրն այս վիճակից հանելու եւ ներքաղաքական ճգնաժամի հաղթահարման միակ միջոցը Հայաստանում լեգիտիմ, ժողովրդի կողմից ընտրված եւ նրա կողմից վերահսկվող իշխանության ձեւավորումն է, որը կվերադարձնի հավատը պետական իշխանության ինստիտուտների նկատմամբ։ Ժողովրդի անվերապահ աջակցությունից օգտվող լեգիտիմ իշխանությունը միայն կկարողանա կազմաքանդել ապօրինի մենաշնորհների եւ մաքսային/ հարկային ապօրինի արտոնությունների վրա հիմնված արատավոր տնտեսական համակարգը, նպաստել նախաձեռնողականությանը, ստեղծել ազատ եւ արդար տնտեսական մրցակցության հիման վրա գործող արդյունավետ տնտեսական համակարգ։

Ելնելով վերոնշյալից, որպես քաղաքական եւ սոցիալ-տնտեսական ճգնաժամի հաղթահարման քայլեր՝ անհրաժեշտ ենք համարում.

1. Հոկտեմբերի կեսերին անցկացնել արտահերթ նախագահական ընտրություններ:
2. Անմիջապես հետո, սահմանված ժամկետների պահպանմամբ, անցկացնել արտահերթ խորհրդարանական ընտրություններ։
3. Նախապես ընդունել ընտրությունների օրինականության ապահովման հետեւյալ փաթեթը.

1. Կենտրոնական ընտրական եւ ստորադաս հանձնաժողովները  ձեւավորել պետության կողմից, որը ստանձնում է ընտրությունների պատասխանատվությունը` դառնալով ընտրական ողջ գործընթացի օրինականության երաշխավորը:
2. ԱԺ ընտրական համակարգից իսպառ բացառել մեծամասնական ընտրակարգը, եւ բոլոր 131 տեղերը համալրել համամասնական  ընտրակարգով:
3. Առնվազն հնգապատկել Հանրային  հեռուստատեսությամբ համապետական ընտրությունների համար նախատեսված անվճար եթերաժամի տեւողությունը, հաղորդումները հեռարձակել հիմնականում ժ. 20-24-ին։ Վճարովի եթերի համար վճարը սահմանել ոչ ավելի, քան բիզնես գովազդների համար։
4. Ստորագրված ցուցակները կախել՝ ծանոթանալ ցանկացողների համար մատչելի տեղում, վստահված անձանց եւ դիտորդներին, ըստ պահանջի, տրամադրել դրանց պատճենները:
5. Ապահովել քաղաքացիական վերահսկողության հնարավորություն զինվորական մասերում կազմվող ընտրողների ցուցակների նկատմամբ: Բազմակի քվեարկումը կանխելու նպատակով զինվորականների ընտրական ցուցակները տրամադրել ԿԸՀ-ին եւ հնարավորություն ընձեռել այնտեղ գրանցված վստահված անձանց ունենալ այդ ցուցակների ինչպես ամբողջական, այնպես էլ ըստ տեղամասերի տարանջատված թվային տվյալները։
6. Բազմակի քվեարկությունը  բացառելու նպատակով քվեարկության մասնակցած անձի ձեռքին թողնել թանաքի կայուն հետք:
7. Բոլոր տեղամասերում եւ դրանց մուտքի մոտ տեղադրել տեսախցիկներ, որոնք կտեսագրեն քվեարկության, ձայների հաշվարկման եւ արդյունքների ամփոփման ողջ ընթացքը: Վստահված անձի պահանջով տեսագրության պատճենը պետք է տրամադրվի նրան:
8. Ապահովել ԵԱՀԿ/ԺՀՄԻԳ 2000 դիտորդների հրավեր՝ յուրաքանչյուր տեղամասում մեկ արտասահմանյան դիտորդ։
9. Քարոզչության եւ իրական բազմակարծության ապահովման նպատակով հեռուստատեսության եւ ռադիոյի բնագավառում ստեղծել հեռարձակման արտոնագրերի շնորհման այնպիսի համակարգ, որը քաղաքական դաշտի ողջ ներկապնակին, այդ թվում նաեւ Հայ ազգային կոնգրեսին թույլ կտա ստանալ հեռարձակման արտոնագիր եւ օգտվել հավասար հնարավորություններից։

Երկխոսության արդյունավետության բարձրացման ուղղված միջոցառումներ

Հիշեցնում ենք Հայ Ազգային կոնգրեսի՝ 19.07.2011 թվականի իր հայտարարության մեջ արձանագրված պահանջները՝ որպես երկխոսության կողմերի հավասարության ու հասարակության լիակատար տեղեկատվություն ստանալու իրավունքի ապահովման անհրաժեշտ պայման.

1. Հանդիպումները կամ պետք է հեռարձակվեն ուղիղ եթերով, կամ էլ կողմերի քարոզչական հավասար հնարավորությունները ապահովելու նպատակով Կոնգրեսի պատվիրակությանը յուրաքանչյուր հանդիպումից հետո պետք է Հանրային հեռուստաընկերությամբ առնվազն կես ժամ ուղիղ եթեր տրամադրվի՝ իր տեսակետները հասարակությանը ներկայացնելու համար։
2. Պետք է վերացնել Հանրային հեռուստաընկերությամբ եւ մյուս հեռուստաալիքներով Հայ Ազգային Կոնգրեսի հանրահավաքների մասին իրազեկող նյութերի հեռարձակման արգելքը։
3. Պետք է դադարեցնել Կոնգրեսի հանրահավաքներից առաջ իրավապահ մարմինների կողմից բնակչության ահաբեկումը, տարաբնույթ խոչընդոտների հարուցումը, մասնավորապես հանրային եւ այլ տրանսպորտային միջոցների աշխատանքի կազմալուծումը։

Սրանով համարում ենք մեր առաջարկները ձեւակերպված եւ առաջարկում ենք այն դարձնել օրակարգի քննարկման առարկա։

ՀԱՎԵԼՎԱԾ 1.

ՀԱՅ ԱԶԳԱՅԻՆ ԿՈՆԳՐԵՍԻ ԿՈՂՄԻՑ 01.03.2011Թ. ԿԱԶՄԱԿԵՐՊՎԱԾ  ՀԱՆՐԱՀԱՎԱՔԻ ՊԱՀԱՆՋՆԵՐԸ

1. Մինչեւ ս.թ. մարտի 15-ը, այսինքն՝ մինչեւ Հայաստանի հարցով Եւրոխորհրդի համազեկուցողների երեւանյան այցը, ազատ արձակել իրենց քաղաքական հայացքների ու գործունեության համար դատապարտված անխտիր բոլոր բանտարկյալներին՝ Սասուն Միքայելյանին, Նիկոլ Փաշինյանին, Հարություն Ուռուտյանին, Արամ Բարեղամյանին, Սարգիս Հացպանյանին, Մուրադ Բոջոլյանին, Արա Հովհաննիսյանին, Շմավոն Գալստյանին եւ Ռոման Մնացականյանին.

2. Ստեղծել մարտի 1-ի իրադարձությունների ուսումնասիրման անկախ միջազգային հանձնաժողով կամ վերականգնել Փաստահավաք խումբը՝ նրա կազմը համալրելով միջազգային փորձագետներով եւ խնդիր դնելով կարճ ժամանակի ընթացքում լիովին բացահայտել ու դատական կարգով պատժի ենթարկել իշխանությունների կողմից կատարված այդ հրեշավոր ոճրագործության բոլոր մեղավորներին.

3. Լիարժեքորեն փոխհատուցել մարտի 1-ի ոճրագործությունից տուժած բոլոր քաղաքացիների նյութական վնասները՝ մասնավորապես սպանվածներից յուրաքանչյուրի ընտանիքին հատկացնելով 1 միլիոն դոլար, իսկ վիրավորներին՝ առնվազն 100,000 դոլար.
4. Դադարեցնել քաղաքացիներին հանրահավաքներից ու ընդհանրապես քաղաքական ակտիվությունից հեռու պահելու նպատակով կիրառվող ոստիկանական զգուշացումներն ու ահաբեկումները, իրազեկող խմբերի դեմ գործվող մշտական սադրանքներն ու բռնությունները, հանրահավաքների օրերին երկրի գլխավոր ճանապարհների շրջափակումները, եւ վերացնել Ազատության հրապարակում հանրահավաքների անցկացման վրա դրված անօրինական արգելքը.

5. Ի կատարումն Եվրադատարանի կողմից կայացված անբեկանելի վճռի՝ վերջապես վերականգնել «Ա1+» հեռուստաընկերության գործունեությունը, խիստ պատասխանատվության ենթարկել այդ վճիռը ոտնահարող բոլոր պաշտոնատար անձանց, եւ ընդհանրապես վերացնել պետության լիակատար վերահսկողությունը տեղեկատվության էլեկտրոնային միջոցների վրա.
6. Դադարեցնել իշխանությունների որդեգրած ռազմաշունչ ու հոխորտալից հռետորաբանությունը, եւ Ղարաբաղյան կարգավորման գործընթացը բնականոն հուն տեղափոխելու նպատակով անհապաղ վերականգնել բանակցությունների նախկին ձեւաչափը, որում, ԵԱՀԿ Բուդապեշտյան գագաթնաժողովի որոշմամբ, Լեռնային Ղարաբաղի Հանրապետությունը հանդես էր գալիս որպես հակամարտության լիիրավ կողմ.
7. Չեղյալ հայտարարել բացօթյա փողոցային առեւտրի արգելման, երեկոյան ժամը 8-ից հետո փոքր խանութների աշխատանքի դադարեցման եւ ավտոմեքենաների պարտադիր ապահովագրման վերաբերյալ ընդունված չարաբաստիկ որոշումները, ինչպես նաեւ վերականգնել ներմուծվող ապրանքների փոխադրավարձ-մաքսավճարների նախկին չափը.
8. Վերացնել անձնական օգտագործման (այլ ոչ թե վաճառքի) նպատակով ներմուծվող ավտոմեքենաների համար Ավելացված արժեքի հարկի անօրինական գանձումը, ինչը, գումարվելով մաքսավճարին ու բնապահպանական հարկին, սպառողի համար դառնում է անտանելի բեռ եւ հազարավոր մարդկանց ստիպում մեքենաները մաքսազերծել հարեւան Վրաստանում.
9. Հայաստանի Հանրապետության նվազագույն աշխատավարձը դարձնել 200 դոլար, գործազրկության նպաստը՝ դրա 50 տոկոսը (100 դոլար), իսկ միջին կենսաթոշակը՝ միջին աշխատավարձի 40 տոկոսը (112 դոլար). խոշոր ձեռնարկատերերի սիստեմատիկաբար չվճարվող հարկերը եւ բարձրագույն պետական պաշտոնյաների գրպաններում յուրաքանչյուր ամիս հայտնվող հսկայական գումարները լիուլի բավարար են այդ խնդիրները լուծելու համար.
10. Ազգային Ժողովի օրակարգից հանել ՀՀ Աշխատանքային օրենսգրքի 142-րդ հոդվածի վերաձեւակերպման առաջարկով քննարկման դրված օրինագիծը, որի համաձայն 6-օրյա աշխատանքային շաբաթ սահմանելու հարցը վերապահվում է գործատուի հայեցողությանը, ինչպես նաեւ համապատասխան փոփոխություն կատարել այդ օրենսգրքում, գործատուին պարտավորեցնելով մարդկանց աշխատանքից ազատելու պարագայում վճարել փոխհատուցում 3-ամսյա աշխատավարձի չափով.
11. Սահմանել կարեւորագույն գյուղմթերքների արտադրության պետական սուբսիդիաներ՝ նկատի ունենալով տվյալ տարում ձեւավորված մթերման շուկայական գինը, մշակման պայմանների գոտիականությունը եւ սահմանամերձ շրջանների հողերի ռազմավարական նշանակությունը. Կենտրոնական բանկի կողմից հաստատել փոխօգնության կարգով գյուղացիներին տրվող վարկերի մեղմացված տնտեսական նորմատիվներ՝ դրանց հիման վրա երկարաձգելով, վերակնքելով կամ դուրս գրելով առեւտրային բանկերի հանդեպ գոյացած ժամկետանց վարկային պարտավորությունները, իսկ նոր վարկեր տրամադրել ցածրացրած տոկոսադրույքով.
12. Հայտարարագրել եւ մամուլում հրապարակել Հայաստանի անկախության շրջանի բոլոր նախկին թե ներկա բարձրագույն պետական պաշտոնյաների ու նրանց ընտանիքների անդամների ունեցվածքն ու եկամուտները՝ սկսած նախագահներից, վարչապետներից, նախարարներից, փոխնախարարներից, մարզպետներից, քաղաքապետերից, ավարտած՝ դատավորներով, դատախազներով, գեներալներով եւ Ազգային Ժողովի (նախկինում՝ Գերագույն Խորհրդի) պատգամավորներով.
13. Տնտեսության կառավարման եւ օրինականության ապահովման բնագավառներում ցուցաբերած խայտառակ թերացումների, կամայականությունների կամ պարզապես մասնագիտական ապաշնորհության համար անմիջապես զբաղեցրած պաշտոններից հեռացնել՝ Հայաստանի Հանրապետության վարչապետ Տիգրան Սարգսյանին, փոխվարչապետ Արմեն Գեւորգյանին, Կենտրոնական բանկի նախագահ Արթուր Ջավադյանին, Պետեկամուտների կոմիտեի նախագահ Գագիկ Խաչատրյանին, Երեւանի քաղաքապետ Կարեն Կարապետյանին, ՀՀ գլխավոր դատախազ Աղվան Հովսեփյանին, Ազգային անվտանգության ծառայության տնօրեն Գորիկ Հակոբյանին, ՀՀ Ոստիկանության պետ Ալիկ Սարգսյանին, ՀՀ Հատուկ քննչական ծառայության պետ Անդրանիկ Միրզոյանին, Արդարադատության նախարարության քրեակատարողական վարչության պետ Հայկ Հարությունյանին.

14. Հանրահավաքը նաեւ անհրաժեշտ է համարում կոչ անել միջազգային կազմակերպություններին, Ամերիկայի Միացյալ Նահանգների եւ Եւրոմիության երկրների կառավարություններին՝ դադարեցնելու աշխարհաքաղաքական նկատառումներով Հայաստանի բռնապետական վարչախմբին ցուցաբերվող անվերապահ աջակցությունը, որը ոչ միայն ոչնչով չի նպաստում ժողովրդավարական բարեփոխումների իրականացմանը, այլեւ ավելի եւս ամրապնդելով ռեժիմի դիրքերը, վերջին հաշվով ուղղվում է ժողովրդի դեմ, ինչը միանգամայն ակնհայտ է դառնում արաբական երկրներում ներկայումս ընթացող իրադարձությունների լույսի ներքո, եւ ինչը խոստովանում են անգամ արեւմտյան քաղաքական գործիչներն ու անկախ վերլուծաբանները.
15. Նշված պահանջների կամ նրանց զգալի մասի կատարման պարագայում հանրահավաքը լիազորում է Հայ ազգային կոնգրեսին՝ գործնական երկխոսություն սկսել իշխանությունների հետ, օրակարգում ունենալով առաջիկա ամիսներին արտահերթ նախագահական եւ խորհրդարանական ընտրություններ անցկացնելու միակ հարցը»։

ՀԱՎԵԼՎԱԾ 2

Համաձայն Հայ ազգային Կոնգրեսի՝ 31.05.2011թ հանրահավաքում հնչած, նախկին քաղբանտարկյալ Սարգիս Հացպանյանին Հայաստանում կացության կարգավիճակ կամ քաղաքացիություն շնորհելու պահանջի, առաջարկում ենք առաջնահերթ քննարկել եւ լուծել այս հարցը։

Չինաստանի Նինբո քաղաքում ավարտվեց շախմատի աշխարհի թիմային առաջնությունը: Մեր հավաքականը` Լեւոն Արոնյան, Սերգեյ Մովսիսյան, Վլադիմիր Հակոբյան, Գաբրել Սարգսյան, Ռոբերտ Հովհաննիսյան կազմով, փայլուն անցկացրեց մրցաշարը` նվաճելով աշխարհի չեմպիոնի կոչումը:

Մեր հավաքականը առաջնությունում միակն էր, որ պարտություն չկրեց: Անցկացրած ինը խաղերից հինգում մեր տղաները հաղթանակ տարան, չորս խաղ ավարտեցին ոչ—ոքի:

Աշխահի առաջնության ամփոփիչ աղյուսակը հետեւյալ տեսքն ունի

1. Հայաստան- 14 միավոր
2. Չինաստան- 13 միավոր
3. Ուկրաինա- 12 միավոր
4. Ռուսատան- 10 միավոր
5. Հունգարիա- 10 միավոր
6. ԱՄՆ- 10 միավոր
7. Ադրբեջան- 9 միավոր
8. Հնդկաստան- 7 միավոր
9. Իսրայել- 5 միավոր
10. Եգիպտոս- 0 միավոր

Ըստ ռուսական Regnum գործակալության, Օսմանյան կայսրությունում իրականացված Հայոց ցեղասպանությանն առնչվող արխիվային փաստաթղթերի կեղծման և դրանցից ձերբազատվելու փորձերն արտացոլված են սկանդալային WikiLeaks կայքի հրապարակումներում։
Լիբանանյան «Ջումհուրիա» թերթը գրել է, որ 2004 թվականի հուլիսի 12-ին Ստամբուլում գտնվող ԱՄՆ հյուպատոսարանից Պետդեպարտամենտ է ուղարկվել N04ISTANBUL1074 հաղորդագրությունը, որում ներկայացված են անմիջականորեն այդ խնդրին առնչվող թուրք և օտարազգի պատմաբանների մեկնաբանություններն ու վկայությունները։ Հաղորդագրության մեջ նաև նշված է, որ հայ-թուրքական հաշտեցման ճանապարհին ընկած ամենամեծ խոչընդոտը Հայոց ցեղասպանության խնդիրն է և Թուրքիայի կողմից դրա ճանաչումը։

Հայկական սփյուռքը հավաքել է բազմաթիվ վկայություններ ու փաստաթղթեր, որոնք հաստատում են, որ «թուրքական կառավարությունը նախապես պլանավորել և 1915-1916 թվականներին ոչնչացրել է Օսմանյան կայսրությունում բնակվող ավելի քան 1 միլիոն հայերի»։

Իր հերթին Թուրքիան հրապարակել է տվյալ  իրադարձություններին առնչվող իր համար շահեկան մի շարք փաստաթղթեր, ըստ որոնց՝ մի քանի հարյուր հազար հայեր բռնագաղթեցվել են՝ ի պատասխան «բազմաթիվ թուրք-մուսուլմանների դաժան սպանությունների», որոնց հեղինակը եղել են «հայ զինյալները»: «Հայկական կողմը խնդիրներ չունի», քանի որ ի հավելումն հազարամյա պատմության ու հարուստ մշակութային ժառանգության, «1915 թվականի աղետալի իրադարձությունները հանդիսանում են ժամանակակից ինքնության կարևոր տարր»,- նշված է դիվանագիտական հաղորդագրության մեջ:

«Թուրքական ինքնության աջակցության» հարցում Թուրքիայի մոտեցումը ավելի բարդ իրավիճակում է:«Անգամ այսօր համարվում է, որ ինչպես պետության ցանկացած ներկայացուցչի, այնպես էլ փոփոխվող կառավարությունների կողմից հայերի նկատմամբ իրագործված որևէ սխալի ընդունումը կասկածի տակ կդնի երկրի սահմաններն ու մարդու իրավունքները, ինչպես նաև հայերի կողմից պահանջվող փոխհատուցման հարցում կթուլացնի Թուրքիայի դիրքորոշումը»։

Հայ և օտարազգի պատմաբանները մատնանշում են թուրքական կառավարության քաղաքականությունը, որը տասնամյակներ շարունակ ամեն գնով խոչընդոտում է ազատորեն սեփական արխիվներ ներթափանցելու գործընթացը:
Միչիգանի համալսարանի հայագիտության պրոֆեսոր Գևորգ Բարդակչյանը 1970-1980-ական թվականներին բազմիցս դիմել է ԱՄՆ պաշտոնատար անձանց՝ ընդգծելով, որ թուրքական արխիվների ղեկավարությունը բազմիցս հայտարարել է «չլիազորված և թշնամաբար տրամադրված օտարազգիների կողմից փաստաթղթերի կիրառման պաշտպանության անհրաժեշտության» մասին։ Սակայն, հետազոտողների վկայությամբ՝ «Հայկական հարցին» անմիջականորեն առնչվող ավելի քան 70 միլիոն փաստաթղթեր ինդեքսավորվել են, և թուրք չինովնիկները խոչընդոտում են դրանց ստացմանը։

Թուրքիայի Ազգային արխիվի գլխավոր տնօրեն, պրոֆեսոր Յուսուֆ Սարընայը ԱՄՆ հյուպատոսարանի դիվանագետներին հայտարարել է, որ արխիվ ներթափանցելու համար անհրաժեշտ է Թուրքիայի արտաքին գործերի նախարարության վիզան:
Թե՛ հայ, թե՛ այլազգի հետազոտողների մոտ հիմնավոր կասկածներ են առաջանում արխիվային փաստաթղթերի պահպանման ու ամբողջականության վերաբերյալ։ Մի շարք թուրք բարձրաստիճան զինվորականներ խոստովանում են, որ պատմական ճշմարտության կեղծման առաջին փորձը ձեռնարկվել է 1919 թվականին, իսկ արխիվից մի շարք կարևոր փաստաթղթեր հափշտակվել են 1918 թվականին՝ նախքան դաշնակից զորքերի կողմից Ստամբուլի օկուպացիան:

Ըստ Բերքթայի, կարևոր փաստաթղթերի երկրորդ «մաքրման» գործընթացն իրականացվել է այն ժամանակ, երբ Թուրգութ Օզալն արխիվները բացելու մտադրություն է հայտնել։ Վերջինս տվյալ ժամանակահատվածում արխիվում աշխատող Բերքթային պատմել է իր «հաջողությունների» մասին. «Ես իրոք պատառոտեցի հայերին»։

Այդ նույն համատեքստում արտահայտվել է նաև Թուրքիայում ԱՄՆ գիտահետազոտական ինստիտուտի տնօրեն Թոնի Գրինվուդը՝ ԱՄՆ հյուպատոսարանի պաշտոնատար անձանց տված հարցազրույցում։ Նա հայտարարել է, որ բարձրաստիճան զինվորականների խումբն արխիվում իրականացրած հետազոտության ժամանակ փաստաթղթերի ստուգում է անցկացրել։

Մի շարք թուրք պատմաբաններ վստահեցնում են, որ արխիվի ներսում ընթանում է «Հայկական հարցին» առնչվող փաստաթղթերի մաքրման անդադար գործընթաց։

Associated Press գործակալությունը տեղեկացրել է, որ  Արևելյան Աֆրիկայի երաշտի հետևանքով հումանիտար օգնության կենտրոնները լի են սովահար մարդկանցով: Որոշ լրատվամիջոցներ գրել են, որ բազմաթիվ կանայք ստիպված են լինում սովից մեռնող իրենց երեխաներին թողնել ճանապարհներին, քանի որ չեն կարողանում հասնել օգնության կենտրոններ:

Հռոմում կայացած արտակարգ համաժողովում ՄԱԿ-ի Պարենի համաշխարհային կազմակերպության ղեկավար Ժոզեթ Շիրանը հայտարարել է, որ երաշտի ու տարածաշրջանային հակամարտությունների հետևանքով 12 միլիոն մարդ սովի է մատնված:

Այս կազմակերպության ներկայացուցիչները նաև ասել են, որ հումանիտար օգնություն ցուցաբերելու համար իրենց անհրաժեշտ է լրացուցիչ 360 միլիոն դոլար: Համաշխարհային բանկը խոստացել է տրամադրել մոտ 500 միլիոն դոլար:

Անցեալ շաբաթ հայկական եւ յատկապէս հայաստանեան լրատուադաշտը ողողուեցաւ Սանահինի վանքին վերանորոգումը ահազանգող անհրաժեշտութեան առիթով ծաւալած քննարկումներով, մեկնաբանական յօդուածներով, սուր քննադատութիւններով: Հարցը արագօրէն տեղափոխուեցաւ ոչ պաշտօնական ելեկտրոնային դաշտ, եւ գրութիւններ, վերագրումներ, ստուգուած ու չստուգուած «տեղեկութիւն»ներ յագեցուցին այս անգամ պլոկներն ու ընկերային ցանցերը:
Այսօրուան բաց համակարգին, համացանցային հաղորդակցութեան, տեսակէտներ փոխանակելու, բանավէճեր կազմակերպելու ներկայ դրութիւնը բոլորին կարելիութիւն տուած է կարծիք յայտնելու, հաստատում կատարելու, իր տեսակէտներով հասանելի դառնալու զանգուածներուն:
Անհակակշռելի, անվերահսկելի ոլորտ է այս մէկը, ուր հասանելիութեան բազմապատկումը տեղի կ՛ունենայ կայծակնային արագութեամբ եւ ուր խիստ խնդրոյ առարկայ կը դառնայ հանրային կարծիքին վրայ ազդելու պաշտօնական եւ անպաշտօն հաղորդագրութիւններու եւ գրութիւններու տարողութիւններուն տարբերութիւնը:
Այսպէս է նաեւ, որ ցարդ զանգուածային լրատուամիջոցներու գծած սահմանները կը հատուին արագօրէն եւ այլընտրանքային լրատուամիջոցը կը գործէ արդիւնաւէտ եւ արագ: Այնքան մը, որ մամլոյ նշանաւոր ներկայացուցիչներ յատկապէս երիտասարդ ընթերցողին հասանելի դառնալու համար անհրաժեշտութիւնը կը զգան իրենց պաշտօնական կայքէջերուն առընթեր տեղ գրաւելու ընկերային ցանցերու վրայ: Օրուան օրինաչափ կշռոյթն ու եղանակը ասոնք են, որոնց հետ պէտք է քայլ պահել անկասկած:
Խնդիրը կը բարդանայ, երբ ելեկտրոնային այս տարածքներուն վրայ կը հատուին այն սահմանները, զորս մինչ այժմ տպագիր թէ ելեկտրոնային կամ այլ լրատուամիջոցներ  լռելեայն գծած էին իրենց հաղորդումներուն բովանդակութիւնները սահմանափակելու առումով: Ոչ անպայման «թապու» նիւթեր չարծարծելու մասին է խօսքը: Այլ` մեր ազգային ու հոգեւոր արժեհամակարգի բաղադրիչ-խորհրդանիշերուն մասին պատշաճութիւնները յարգելու:
Այդ արժեհամակարգին բաղադրամասերէն` հայոց բանակի պատահարները, «Եութիուպ»ի ճամբով ցուցադրուեցան համայն աշխարհին, նաե՛ւ մեր թշնամիներուն, եւ ոգի ի բռին շատեր շաբաթներով խոշորացոյցերը կեդրոնացուցած պահեցին հայոց սպայակազմին եւ հայ զինուորին բարոյալքումը շեփորելու համար: Սխալ չհասկցուինք: Պատահարները արդարացում չունէին: Յանցաւորները անպայման պատասխանատուութեան պիտի կանչուէին: Այսուհանդերձ համացանցի ճամբով տեսանիւթը տարածելը, պլոկներու ճամբով պաշտօնատարներու հրաժարական պահանջելը եւ բանակի մարտունակութիւնը կասկածի տակ առնելը նուազագոյն ըսելաձեւով առողջ ներշնչումներ չունին:
Համացանցի շուկայի սպառման այլ «ապրանք էր» հայրենի կրթակարգը, որուն վարկն ու հեղինակութիւնը կը հարուածուէին հիմք ունենալով ուսուցիչ-աշակերտ բռնութեան դէպք մը, որ կը ցուցադրուէր, կը տարածուէր, կը մեկնաբանուէր, կ՛ընդհանրացուէր: Հայ դպրոցը եւս բնականօրէն մեր ազգային ընդհանուր արժեհամակարգին մէկ կարեւոր բաժինն էր: Հարուածները  ուրեմն բանակին եւ դպրոցին ճամբով մեր արժեհամակարգին ուղղուած էին:
Այժմ` եկեղեցին: Անպայման, որ ոչ միայն Սանահինը, այլ նաեւ այլ վանքեր, հոգեւոր մշակոյթի գլուխ գործոցներ պէտք է արժանանան եկեղեցւոյ եւ պետութեան յատուկ հոգատարութեան: Այստեղ երկրորդ տեսակէտ չկայ: Խնդիրը այս հարցերը արծարծելու եղանակն է, սրտցաւութեան առընթեր չարախնդութիւն մտցնելն է, պատշաճութիւնները անցնելու երեւոյթն է, հայ հոգեւորականութեան հասցէին անպատկառ արտայայտուիլն է, հարցը շահարկելով կաթողիկոսի հրաժարական պահանջելն է:
Եւ եթէ բանակի հեղինակութիւնը հարուածած պահուն պլոկի կամ ընկերային ցանցի մասնակիցը պարտաւոր է մտածելու հակառակորդի խաղին ներքաշուած ըլլալուն մասին, ապա հայ եկեղեցին ա՛յս ոճով քննադատողը պիտի մտածէ, թէ մեր հոգեւոր ու բարոյական անվտանգութեան սպառնացող բազմաթիւ աղանդները ինչպէ՞ս կ՛օգտուին նման իրավիճակներէ:
Քննադատելի եւ սրբագրելի շատ խնդիրներ ունինք ազգովին: Այս իրականութիւնը պէտք չէ անտեսել: Կառուցողականութիւնը սակայն պարտադիր մօտեցում է եւ ցուցանիշ` մեր հաւաքական գիտակցութեան: Մանաւանդ համընդհանուր արժեհամակարգի խնդիրներու հրապարակային քննարկումներուն ընթացքին:

Շահան Գանտահարեան
«Ազդակ»ի գլխաւոր խմբագիր