Associated Press գործակալությունը տեղեկացնում է, որ ԱՄՆ պետքարտուղարությունը կոչ է արել երկրի քաղաքացիներին լինել հնարավորինս զգույշ, քանի որ «Ալ Քաիդայի» առաջնորդ Ուսամա բեն Լադենի սպանությունից հետո այդ խմբավորումը մտադիր է ահաբեկչական ակտեր իրականացնել Եվրոպայում, Մերձավոր Արևելքում, Աֆրիկայում և Ամերիկայում:

Պետքարտուղարության հայտարարության մեջ մասնավորապես նշված է, որ հարձակումներ են սպասվում այն քաղաքներում, որտեղ առավել շատ զբոսաշրջիկներ կան՝ Լոնդոն, Մադրիդ, Գլազգո և Նյու Յորք:

Քաղաքացիներին խորհուրդ է տրվել խուսափել մարդկանց մեծ կուտակումներից, տեղաշարժվել առավելապես ոտքով, քանի որ գրոհայինները պատրաստվում են հարձակվել նաև քաղաքային տրանսպորտի վրա:

Շրջվել է

Հուլիսի 26-ին ոստիկանության Գորիսի բաժնում հաղորդում է ստացվել, որ   ժամը  20.00-ին 42-ամյա Արմեն Բ.-ի վարած «ՅՈւՄԶ» մակնիշի տրակտորը, Տեղ գյուղի հարակից «Կարմիր խութ» կոչվող տարածքի դաշտամիջյան ճանապարհին շրջվել է: Վարորդը մարմնական վնասվածքներով տեղափոխվել է Գորիսի բժշկական կենտրոն:

Կատարվում է քննություն:

Բախվել է տրակտորին

Հուլիսի 26-ին ոստիկանության Մարտունու բաժնում հաղորդում է ստացվել, որ ժամը 15.30-ի սահմաններում 29-ամյա Խաչատուր Վ.-ի վարած «Մերսեդես-Բենց-300» մակնիշի ավտոմեքենան Մարտունի-Վարդենիս ճանապարհի 9-րդ կմ-ին բախվել է 39-ամյա Աշոտ Ա.-ի վարած «Տ 25» մակնիշի տրակտորին, ինչի հետևանքով վարորդները մարմնական վնասվածքներով տեղափոխվել են հիվանդանոց:

Կատարվում է քննություն:

Գլխով հարվածել է դիմապակուն

Հուլիսի 26-ին  ոստիկանության Մաշտոցի բաժնում հաղորդում է ստացվել, որ ժամը 09.30-ին 46-ամյա Շմավոն Վ.-ն Դավիթաշենի 4-րդ թաղամասի թիվ 46 շենքի մոտ արգելակել է իր վարած «ԳԱԶ-24» մակնիշի ավտոմեքենան, ինչի հետևանքով սրահում գտնվող որդին` 22-ամյա Ալբերտ Վ.-ն, գլխով հարվածել է դիմապակուն և բուժօգնության  դիմել «Էրեբունի» բժշկական կենտրոն

Արտաշատ-Երևան ճանապարհին

Հուլիսի 26-ին ոստիկանության Արտաշատի բաժնում հաղորդում է ստացվել, որ  ժամը 21.00-ի սահմաններում 41-ամյա Ավետիք Ա.-ի վարած  «Կումսո» մակնիշի  մոտոցիկլետը Արտաշատ-Երևան ճանապարհի Ազատավան գյուղի հատվածում բախվել է 29-ամյա Անդրանիկ  Ա.-ի  վարած «ԳԱԶ-2410» մակնիշի ավտոմեքենային, ինչի հետևանքով Ավետիք Ա.-ն մարմնական վնասվածքներով տեղափոխվել է հիվանդանոց:

Բախում Ծովակալ Իսակովի պողոտայում

Հուլիսի 26-ին ոստիկանության Մալաթիայի բաժնում հաղորդում է ստացվել, որ ժամը 19.00-ի սահմաններում Ծովակալ Իսակովի պողոտայում իրար են բախվել 24-ամյա Գարիկ Մ.-ի վարած «ՎԱԶ-2121» մակնիշի և 59-ամյա Հայկազ Փ.-ի վարած «ՎԱԶ-2106» մակնիշի ավտոմեքենաները: Գարիկ Մ.-ն մարմնական վնասվածքներով տեղափոխվել է «Արմենիա»  բժշկական կենտրոն:

Տեղափոխվել են հիվանդանոց

Հուլիսի 26-ին ոստիկանության Արաբկիրի բաժնում հաղորդում, է ստացվել, որ  ժամը 10.00-ի սահմաններում Բաղրամյան պողոտայի և Պռոշյան փողոցի խաչմերուկում իրար են բախվել 40-ամյա Կառլեն Մ.-ի վարած «Օպել Աստրա», 30-ամյա Արսեն Օ.-ի վարած  «Միցուբիշի» մակնիշի ավտոմեքենաները և 30-ամյա Արթուր Ս.-ի վարած «ԳԱԶ-32213» մակնիշի, 84 երթուղու միկրոավտոբուսը: Վթարի հետևանքով «ԳԱԶ-32213»-ի 3 ուղևորները մարմնական վնասվածքներով տեղափոխվել են թիվ 1 համալսարանական հիվանդանոց:

Հիվանդանոցի ճանապարհին մահացել է

Հուլիսի 26-ին ոստիկանության Արմավիրի բաժնում հաղորդում է ստացվել, որ  ժամը 20.00-ի սահմաններում 45-ամյա Անդրանիկ Ա.-ն իր վարած «Մերսեդես ՄԼ-320»  մակնիշի ավտոմեքենայով Արմավիր-Ջանֆիդա ճանապարհի 1-ին կմ-ին վրաերթի է ենթարկել 10-ամյա Ֆիրդուս Լյուդվիգյանին  և իր ավտոմեքենայով նրան տեղափոխել հիվանդանոց: Երեխան  հիվանդանոցի ճանապարհին մահացել է:

Կատարվում է նախաքննություն:

Ըստ ադրբեջանական Trend գործակալության` Թուրքիայի ԱԳ նախարարությունը դատապարտել է Հայաստանի նախագահ Սերժ Սարգսյանի այն հայտարարությունը, որը վերջինս արել է Ծաղկաձորում տեղի ունեցած հայերենի ու հայ գրականության 5-րդ օլիմպիադայի ժամանակ` ի պատասխան ուսանողի հարցի: Սերժ Սարգսյանի պատասխանը մասնավորապես շոշափել է Արևմտյան Հայաստանի հարցը։ Թուրքիայի ԱԳՆ-ի հայտարարության մեջ ասված է, որ պետական գործչի գլխավոր պարտականությունը սեփական հանրության և հատկապես երիտասարդության նախապատրաստումն է խաղաղության ու բարգավաճման. «Այդպիսի մոտեցումը, որը ժողովուրդների միջև խթանում է ատելություն ու թշնամություն, չափազանց անպատասխանատու պահվածք է ապագա սերունդների առջև։ Մենք բոլորս փորձում ենք տարածաշրջանում հաստատել խաղաղություն և բարգավաճում։ Սարգսյանի նմանատիպ հայտարարությունները չեն կարող ծառայել ստեղծագործական նպատակներին»։

Վարչապետ Տիգրան Սարգսյանն այսօր ընդունել է «Հանիել գրուպ» ընկերության պատվիրակությանը, որի կազմում ընդգրկված էին ընկերության «Եվրոդրեսս», «Հեսս Նատուռ» և հայաստանյան «ՎԿՍ Արմենիա» մասնաճյուղերի ներկայացուցիչները:
Կառավարության ղեկավարը ողջունել է ընկերության գործունեությունը մեր երկրում` ընդգծելով, որ Հայաստանը շահագրգռված է ներդրող ընկերությունների համար բարենպաստ պայմանների ստեղծման հարցում:
Շնորհակալություն հայտնելով ընդունելության համար` հյուրերը վարչապետին են ներկայացրել «Հանիել գրուպ» ընկերության կողմից Հայաստանում իրականացվող ծրագրերի ընթացքը, ինչպես նաև անդրադարձել հետագա անելիքներին: Մասնավորապես, քննարկվել են թեթև արդյունաբերության ոլորտում ներդրումային նոր ծրագրերի իրականացման հեռանկարները:
Ընկերության ներկայացուցիչները բարձր են գնահատել մարդկային ներուժի դերը ծրագրերի արդյունավետ իրականացման գործում: Այդ համատեքստում կարևորվել է մասնագետների վերապատրաստման ուղղությամբ քայլերի ձեռնարկումը:

«Հանիել գրուպ» ընկերությունը Հայաստանում ներդրումներ է իրականացնում «ՎԿՍ Արմենիա» ՍՊԸ-ի միջոցով: Մեր երկրում ընկերության գործունեությունն իրականացվում է եվրոպական չափանիշների հիման վրա, ունի որակյալ մասնագետներ և ապահովված է ժամանակակից տեխնոլոգիաներով: «ՎԿՍ Արմենիա» ՍՊԸ-ի հիմնական արտադրաշուկան Երևանն է, ինչպես նաև Վանաձորը: Ընկերության մասնաճյուղ է բացվել նաև Ամասիա քաղաքում:

Հուլիսի 26-ին ժամը 17.28-ին ստացված տեղեկատվության համա­ձայն` ժամը 16.04-ին դեղորայքային թունավորումով Երևան քաղաքի «Արմենիա» բժշկական կենտրոն է տեղափոխվել Երևան քա­ղաքի Արամ Խաչատրյան փողոցի թիվ 21 շենքի 7-րդ բնակարանի բնակիչ 1952թ. ծնված Իրինա Կարապետյանը, որը ստանալով առաջին բուժօգնություն` դուրս է գրվել:

Հուլիսի 26-ին ժամը 12.49-ին ահազանգ է ստացվել, որ Արագածոտնի մարզի Հնաբերդ գյուղի արհեստական ջրամբարում խեղդվել է պատանի և նրան դուրս բերելու համար անհրաժեշտ է փրկարարների օգնությունը:

Դեպքի վայր են մեկնել Արագածոտնի Մարզային փրկարարական վարչության փրկարար ջոկատը եւ        Փրկարարական ուժերի վարչության հատուկ փրկարար ջոկատի հրամանատար Ա. Մանուկյանը և մեկ ջրային փրկարար:

Ժամը 20.20-ին փրկարարների ուժերով ջրամբարից դուրս է բերվել և հանձնվել ոստիկանության աշխատակիցներին նույն գյուղի բնակիչ 1995թ. ծնված Միքայել Պետրոսյանի դին:

Մեքսիկացի ձեռնարկատեր Լուիս Գոնսալեսը դատապարտվել է 1955 տարվա ազատազրկման, հայտնում է vesti.ru-ն: Մոտ 800 հոգուց էժան մեքենաներ խոստանալով գումարներ կորզելու համար նա նաեւ պարտավորվել է տուժածներին վճարել 2.4 մլն դոլար: Այսպիսով, Գոնսալեսը համոզել էր մարդկանց վճարել 1.7-2.5 հազար դոլար, մեքենայի վրա ընկերության գովազդը վրան տեղադրելու պայմանով:
Միայն երեք տարի հետո են իր պատվիրատուները հասկացել, որ խաբվել են, եւ դատի տվել ձեռնարկատիրոջը:
Դատն ընթացել է 7 տարի: Բացի վերոնշյալ վճռից դատարանը նրան պարտավորեցրել է նաեւ վճարել 800 հազար դոլար ապօրինի ֆինանսական գործունեության համար:
Նշենք, որ համաձայն Մեքսիկայի օրենքների, ազատազրկման առավելագույն ժամկետը երկրում 60 տարի է:

Նախագահ Սերժ Սարգսյանի հրավերով հուլիսի 27-ին պաշտոնական այցով Հայաստան կժամանի Լեհաստանի նախագահ Բրոնիսլավ Կոմորովսկին, տիկնոջ՝ Աննա Կոմորովսկայայի հետ:

Ինչպես հայտնում են նախագահի մամուլի գրասենյակից, այցի ընթացքում Լեհաստանի նախագահը հանդիպումներ կունենա Հայաստանի Հանրապետության նախագահ Սերժ Սարգսյանի, Ազգային ժողովի նախագահ Հովիկ Աբրահամյանի, վարչապետ Տիգրան Սարգսյանի և Ն.Ս.Օ.Տ.Տ Գարեգին Բ Ամենայն Հայոց Կաթողիկոսի հետ:

Նախագահներ Սարգսյանի և Կոմորովսկու հանդիպումից հետո նախատեսվում է երկկողմ համագործակցության զարգացմանն ուղղված փաստաթղթերի ստորագրման արարողություն և երկու երկրների ղեկավարների համատեղ մամուլի ասուլիս:

Հայաստանում արդեն անցել է հանգստի ակտիվ սեզոնի կեսը: Մարդիկ փորձում են կազմակերպել իրենց հանգիստը` ով ինչպես հասկանում կամ կարողանում է: Հայերից շատերը հանգստանալու կուլտուրայի հետ կապված բարդույթներ ունեն. մեշ մասը գերադասում է ակտիվ հանգիստը: Երևանում գործում են բազմաթիվ տուրիստական գործակալություններ, որոնք ժամանակ չունեին սպառիչ պատասխանելու «ոչ պատվիրատուի» հարցերին: Այնուամենայնիվ, ասացին` ինչպես նախորդ տարի,  այս տարի ևս մեծ պահանջարկ ունեն Վրաստանի,Կիպրոսի, Թուրքիայի հանգստյան գոտիները:

Չգիտես ինչու, դժվարություններ են ծագել Հունաստան մեկնողների համար: Դեսպանատունը չի վավերացնում վիզան` ասացին տուրիստական  գործակալությունից: Մեկ այլ`«Ավանտտուր» տուրիստական գործակալությունն էլ տեղեկացրեց, որ ճիշտ է` Հունաստանի պահանջարկը մեծ է, սակայն հիմնականում մերժվում է, եթե տուրիստական խմբերով  չեն ներկայանում:

«Սանտուր» գործակալությունից էլ հավաստեցին, որ այս տարի ևս արտասահմանում հանգիստն անցկացնելն ավելի մատչելի է, քան Հայաստանում:

Եթե Ջերմուկում մեկօրյա հանգիստն արժե 30 հազար դրամ, ապա Վրաստանում` 6-7 հազար է: Հայաստանում գերադասում են հանգիստն անցկացնել Ծաղկաձորում, քանի որ ավելի մատչելի է` ի տարբերություն մյուս հանգստյան գոտիների:

«Ամենահանրահայտ լողափերը» ցանկի մեջ թուրքական լողափերը շարունակում են պահպանել իրենց բարձր վարկանիշը։
Եթե մերոնք գերադասում են աշխույժ հանգստի գոտիները, ապա աշխարհը ձգտում է խաղաղության, մարդիկ ընտրում են այնպիսի վայրեր, որտեղ հնարավորինս քիչ է աղմուկը, աժիոտաժը: Անդորրը գնահատելու առումով Եվրոպայի լավագույն լողափ է ճանաչվել Թուրքիայի հարավ-արևմտյան հատվածում գտնվող «Իզթուզու» լողափը։
Երկրորդ տեղում պորտուգալական «Մոնտե Գարդո» լողափն է, իսկ երրորդ տեղում` Հունաստանում գտնվող «Ստալիս» լողափը։

Հուլիսի 26-ին տեղի ունեցած մամուլի ասուլիսին «Սարդարապատ» նախաձեռնողական խմբի անդամ, ղարաբաղյան պատերազմի ազատամարտիկ Ժիրայր Սեֆիլյանը հայտարարեց,թե նա, ով խաղում է գործող վարչակազմի կանոններով, չի կարող ընդդիմություն համարվել. «Ժամանակը եկել է՝ գտնելու լուրջ և ազնիվ մարդիկ, որոնք պատրաստ են զոհաբերությունների, որոնց գործն ու խոսքն իրարից չի տարբերվում: Նման մարդկանցով պետք է իրականացվի այլընտրանքային ուժի ձևավորումը»

Իշխանություն-ընդդիմություն երկխոսության հարցում ըստ Սեֆիլյանի, գործընթացը ձեռնտու է  իշխող վարչակազմին։ Նահամոզված է, որ Սերժ Սարգսյանը երկխոսություն սկսելու Տեր-Պետրոսյանի առաջարկին արձագանքեց միայն այժմ եւ այն պատճառով, որ հույս ուներ, թե կհասնի ընդդիմադիր ընտրազանգվածի փոշիացման։ «Դա տեղի չունեցավ, իսկ ընտրությունների գնալ մոբիլիզացված ընդդիմադիր ընտրազանգվածի հետ հղի է խնդիրներով, ահա եւ երկխոսության որոշում կայացվեց»,- կարծում է Սեֆիլյանը։

Ըստ Սեֆիլյանի, երկխոսության ողջ գործընթացը բացառապես ի օգուտ իշխանությունների է։ «Ցավոք, Հայ ազգային կոնգրեսի մեր գործընկերները չլսեցին մեր կոչերը»,- ասաց Սեֆիլյանը՝շեշտելով, որ մոտ ապագայում տուժելու է ժողովուրդը, իսկ երկարաժամկետ հեռանակարում՝ քաղաքական այն գործիչներն, ովքեր «երկխոսության են գնացել ժողովրդի վրա կրակել համարձակված ռեժիմի հետ»: