Վերջերս Արեւմտյան Հայաստանի Վան քաղաքում հայկական «Ակունք» ազգագրական համույթը մասնակցեց քաղաքի օրվան նվիրված փառատոնին: Փառատոնը պետք է տեւեր 3 օր: Առաջին 2 օրն անցել է նախատեսվածի պես, իսկ 3-րդ օրը հայկական պատվիրակությունը հյուրանոցի իրենց սենյակներից ականատես է եղել թուրք-քրդական բախումներին, ծեծ ու ջարդին, կրակոցներին ու գոռոցներին, ինչի պատճառով փառատոնի փակումը չի կայացել: Այս մասին հուլիսի 27-ի ասուլիսում հայտնեցին ԱԺ պատգամավոր Արագած Ախոյանն ու «Ակունք»-ի ներկայացուցիչները:

«Դա իշխանության եւ քրդերի միջեւ տարաձայնությունների արդյունք էր, եւ հայերը որեւէ կապ չունեին: Տարածաշրջանում ցանկացած միջոցառում` լինի մշակութային, քաղաքական, թե հասարակական, քրդերն անպայման օգտագործում են իրենց բաղձալի նպատակները ներկայացնելու համար, ինչը իհարկե ձեռք չի տալիս իշանություններին: Նրանց միջեւ բախումները սովորական բան են դարձել»,- հայտարարեց Ա.Ախոյանը:

Պատգամավորի խոսքերով, Վանի քրդական ղեկավարությունը իրենց շատ լավ է ընդունել: Նա դա կապեց քրդերի` կորցրածի արժեքը հասկանալու հետ: «Իրենք հասկացել են, որ առանց հայերի չեն կարող, հասկացել են, թե ինչ նշանակություն ուներ հայերի ներկայությունը իրենց բնակեցրած տարածքներում»,- ասաց Ա.Ախոյանը` հավելելով, որ Վանի քաղաքապետը նույնիսկ առաջարկել է միասին հայկական մշակույթի կենտրոն ստեղծել Վանում: Վանի քաղաքապետին եւ պատգամավորներին հետ հանդիպելիս, Ա.Ախոյանը քննարկել է նաեւ հայկական հուշարձանների խնդիրները: Նրա խոսքերով, քուրդ պաշտոնյաները առաջարկել են հաջորդ անգամ միասին շրջել Վանում, լսել հայերի առաջարկությունները եւ փորձել դրանցից նվազագույնը գոնե կատարել: Քաղաքապետը խոստացել է անպայման պահպանել Վարագավանքը:

Վանի փառատոնին մասնակցելու հրավերը Ա.Ախոյանը ստացել է իր անձնական կապերի միջոցով եւ ՙԱկունքին՚  առաջարկել է ներկայացնել Հայաստանը: ՙԱկունքը՚, թեեւ հուլիսի 19-ին համերգ ուներ Առնո Բաբաջանյան համերգասրահում, բայց ընդունել է առաջարկը եւ համերգի նույն գիշերն էլ, Ա.Ախոյանի ֆինանսավորմամբ, մեկնել է Վան: Թեեւ փառատոնն իրենից մրցույթ չէր ներկայացնում, բայց հայերի մասնակցությունը, պատգամավորի խոսքերով, շատ կարեւոր էր պատմական հայրենիքում կազմակերպված միջոցառմանը, մանավանդ որ փառատոնին բազմաթիվ երկրների ներկայացուցիչներ էին մասնակցում: «Մեզ համար կարեւորը հայկական շունչը այնտեղ տարածելն էր: ՙԱկունքի՚ քայլքը վանում խնկարկության պես մի բան էր»,- նշեց նա:

Նախագահ Սերժ Սարգսյանն այսօր ընդունել է «Հանիել գրուպ» ընկերության պատվիրակությանը, որի կազմում ընդգրկված են «Եվրոդրեսս», «Հեսս Նատուռ», «ՎԿՍ» և հայաստանյան «ՎԿՍ Արմենիա» մասնաճյուղերի ներկայացուցիչները:

Նախագահը ողջունել է «Հանիել գրուպ»-ի գործունեությունը մեր երկրում, նշելով, որ օրեր առաջ է ներկա գտնվել ընկերության Ամասիայի նորակառույց կարի ֆաբրիկայի բացման արարողությանը և կարևորում է ինչպես մայրաքաղաքում, այնպես էլ մարզերում ներդրումային ծրագրերի իրագործումը: Հանրապետության ղեկավարն ընդգծել է, որ պետական քաղաքականության շրջանակում գործարար միջավայրի բարելավման և ներդրումների խրախուսման ուղղությամբ զգալի աշխատանք է իրականացվել, և այսուհետ էլ երկրի տնտեսության զարգացմանն ու նոր աշխատատեղերի բացմանն ուղղված այդ քաղաքականությունը շարունակվելու է:

Երկուստեք հեռանկարային են համարվել Հայաստանում տեքստիլ արդյունաբերության ոլորտում ներդրումները, կարևորվել է մասնագետների վերապատրաստման, որակավորման բարձրացման ուղղությամբ աշխատանքը: Նախագահ Սերժ Սարգսյանը և «Հանիել գրուպ» ընկերության ներկայացուցիչները քննարկել են տեքստիլ արդյունաբերության ոլորտում համաշխարհային շուկայում տեղի ունեցող ներկա զարգացումներն ու կառուցվածքային տեղաշարժերը, դիտարկել` Հայաստանի շուկայական դիրքավորման հնարավորությունները:

«Հանիել գրուպ»-ի ներկայացուցիչները շնորհակալություն են հայտնել Հանրապետության ղեկավարին` մեր երկրում իրենց ծրագրերին աջակցության պատրաստակամության համար և ընդգծել, որ ընկերությունը Հայաստանում համագործակցության և առաջընթացի ամուր հիմքեր է տեսնում, որը հեռանկարային զարգացման ծրագրերի իրագործման լավ հնարավորություն է:

Մեր տարածաշրջանի երկրների ղեկավարներին բնորոշ է կոնյուկտուրային տուրք տալու, պոպուլիստական հայտարարություններով հանդես գալու վարքագիծը: Հատկապես արտաքին քաղաքական հարաբերություններին վերաբերող հարցերում նրանք շատ հաճախ տեղի են տալիս հասարակական տրամադրություններին` ժողովուրդներին ոչ ստանդարտ լուծումների նախապատրաստելու փոխարեն:

ԼՂ կարգավորման գործընթացի, հայ-թուրքական հարաբերությունների հետ կապված հարցերում Հայաստանի նախագահ Սերժ Սարգսյանը նույնպես հաճախ է փոխում մոտեցումները` խաղաղության կողմնակցից մինչև կարծր դիրքորոշման տիրույթում:

Ծաղկաձորում հուլիսի 23-ին Սերժ Սարգսյանը պատասխանել էր Հայոց լեզվի, գրականության և հայագիտական գիտելիքների համահայկական 5-րդ օլիմպիադայի մասնակիցներին հետաքրքրող հարցերին։

Մասնակիցներից մեկը նախագահին ուղղեց հետևյալ հարցը. «…Մեզ սպասվում է ապագա, որը հիշեցնելու է Բաթումի պայմանագի՞րը, որի ժամանակ մի գերմանացի դիվանագետի վկայությամբ՝ մեզ Սևանում լողանալու տեղ թողեցին, սակայն չորանալու տեղ չթողեցին, թե՞ ապագա, որը մեզ կվերադարձնի Արևմտյան Հայաստանը` Արարատով հանդերձ»:

Ըստ իս, Սերժ Սարգսյանը այդ հարցին տվեց հնարավորինս չքաղաքականացված, զուսպ պատասխան: «Այդ ամբողջը կախված է քեզնից և քո սերնդից: Իմ սերունդը, կարծում եմ, իր առջև դրած պարտականությունը կատարեց, երբ 90-ական թվականների սկզբներին անհրաժեշտ էր մեր հայրենիքի հատվածներից մեկը` Ղարաբաղը պաշտպանել թշնամիներից, մենք կարողացանք դա անել: Եվ ես սա ասում եմ ոչ նրա համար, որ որևէ մեկին կշտամբեմ: Ուզում եմ ասել, որ յուրաքանչյուր սերունդ իր պարտականությունն ունի, և այդ պարտականությունը պետք է կարողանա կատարել ու՝ լավ կատարել: Եթե դու և քո հասակակիցները ջանք ու եռանդ չխնայեք, եթե ձեզնից ավագներն ու ձեզնից կրտսերները ձեզ նման վարվեն՝ մենք ունենալու ենք աշխարհի լավագույն երկրներից մեկը: Հավատա, որ շատ դեպքերում հողի չափերով չէ երկրի կշիռը որոշվում. երկիրը պետք է լինի ժամանակակից, երկիրը պետք է լինի անվտանգ, լինի բարեկեցիկ, և սրանք այն պայմաններն են, որոնք հնարավորություն են տալիս ցանկացած ժողովրդի նստել աշխարհի հայտնի, ուժեղ, ճանաչված ժողովուրդների կողքին: Բոլորս մեր պարտքը պետք է կատարենք, բոլորս պետք է լինենք ակտիվ, պետք է լինենք աշխատասեր, կարողանանք բարիք ստեղծել: Իսկ մենք դրան կարող ենք հասնել, շատ հանգիստ կարող ենք հասնել, և մեկ անգամ չէ, որ պատմության ընթացքում հասել ենք դրան: Ես դրանում չեմ կասկածում և ուզում եմ, որպեսզի դու էլ չկասկածես: Մենք մի ժողովուրդ ենք, որ, այո՛, փյունիկի պես միշտ հառնում ենք»,- ասել էր Սերժ Սարգսյանը:

Ըստ այդմ, Սարգսյանն այս պատասխանով երկու շեշտադրում է կատարել.

1. շեշտել է, որ իր սերունդը հաղթանակ է տարել մեզ պարտադրված ղարաբաղյան պատերազմում,
2. «Հավատա, որ շատ դեպքերում հողի չափերով չէ երկրի կշիռը որոշվում. երկիրը պետք է լինի ժամանակակից, երկիրը պետք է լինի անվտանգ, լինի բարեկեցիկ, և սրանք այն պայմաններն են, որոնք հնարավորություն են տալիս ցանկացած ժողովրդի նստել աշխարհի հայտնի, ուժեղ, ճանաչված ժողովուրդների կողքին» նախադասությամբ ձևակերպել է ուժեղ պետության իր պատկերացումը` ակնարկելով, որ Հայաստանը տարածքային հավակնություններ չունի Թուրքիայի հանդեպ: Գոնե նման խնդիր ձևակերպված չէ մեր արտաքին քաղաքականության օրակարգում:

Ըստ այդմ, բավականին զարմանալի էր այս ելույթի առթիվ Թուրքիայի ԱԳՆ-ի տարածած բավականին կոշտ հայտարարությունը: «Պետական գործիչների հիմնական գործը պետք է լինի այն, որ նրանք իրենց հանրության և հատկապես երիտասարդ սերնդի համար պատրաստեն խաղաղությամբ և բարօրությամբ լեցուն ապագա: Սակայն դրան բոլորովին հակառակ մոտեցմամբ ժողովուրդների միջև թշնամանք և ատելություն սերմանելու ձևով երիտասարդներին և ապագա սերունդներին խորհուրդներ տալը ծայրաստիճան անպատասխանատու գործելաոճ է»,- նշվում է Թուրքիայի արտաքին քաղաքական գերատեսչության հայտարարության մեջ: Հայտարարությունում նշվում է նաև, թե այն ժամանակ, երբ տարածաշրջանում խաղաղության հաստատմանն ուղղված փնտրտուքները թափ են հավաքում, Սերժ Սարգսյանի հայտարարությունները վկայում են այն մասին, որ նա խաղաղության համար աշխատելու նպատակ չունի:

Այնպիսի տպավորություն է, որ Անկարան շահագրգռված չէ հայ-թուրքական հարաբերությունների կարգավորմամբ և առիթի էր սպասում` պատասխանատվությունը հայակական կողմի վրա գցելու համար: Համենայնդեպս, թուրքերի արձագանքը բացարձակապես ադեկվատ չէր նախագահ Սարգսյանի ելութի տոնայնությանը:

Այսօր լրագրողների հետ հանդիպմանը նախկին վարչապետ, ՀԱԿ ներկայացուցիչ Հրանտ Բագրատյանը պնդեց, որ Հայաստանում ընդհանրապես տնտեսություն ու տնտեսական վիճակ չկա:

«Տիգրան Սարգսյանի կառավարությունն ունիկալ կառավարություն է՝ խաղաղության պայմաններում տնտեսությունը կրճատել են: Եթե նրա փոխարեն լրագրողներից մեկի կոշիկը վարչապետ նշանակեն կամ ինչ-որ քրեական հեղինակության, Հայաստանի տնտեսությունն ավելի լավ կզարգանա»,- վստահեցրեց Բագրատյանը և հավելեց, որ Հայաստանի բյուջեն 3 մլրդ դոլարից իջել է 2 մլրդ դոլարի։

Ըստ Բագրատյանի` երբ իրենք 1998 թվականին հանձնում էին իշխանությունը, 1 շնչին բաժին ընկնող ՀՆԱ-ով աշխարհում զբաղեցնում էինք 85-րդ տեղը, Ռոբերտ Քոչարյանի նախագահության ժամանակ իջանք 110-րդ տեղը, իսկ հիմա` 144-րդ տեղում ենք:
Նախկին վարչապետը նաև ընդգծեց, որ կիսամյակի տվյալներով գնաճը եղել է 9.9%, իրականում չեն գրել 10%, որ երկնիշ չլինի, բյուջեի եկամուտներն աճել են 7%-ով, ինչը նշանակում է, որ բյուջեն նվազել է 3%-ով. «Այս տարվա բյուջեն կկատարվի հանգիստ, որովհետև բյուջե չեն ընդունել։ Բյուջե են ընդունել ու մեզ ու ձեզ մատուցել են, բայց որն ավելի ցածր է, քան 2009-2010-ի համար ընդունված բյուջեն։ Այ էդքան խելոք են իրանք, պարզապես մտածել են՝ գյուղից մարդ չկա, ո՞վ է հասկանալու»։

Բագրատյանը նաև վստահեցրեց, որ Սերժ Սարգսյանը նույնպես ոչինչ չի հասկանում տնտեսությունից և ակնհայտորեն խնդիրներ ունի մտավոր ունակությունների առումով:

Կառավարությունում այսօր տեղի է ունեցել Հայաստանի Հանրապետության փոքր և միջին ձեռնարկատիրության զարգացման խորհրդի անդրանիկ նիստը` վարչապետ, խորհրդի նախագահ Տիգրան Սարգսյանի գլխավորությամբ: Խորհրդի կազմում ընդգրկվել են պետական մարմինների, գործարար համայնքի, միջազգային կազմակերպությունների, ինչպես նաև  ոլորտի շահերը ներկայացնող հասարակական կազմակերպությունների ներկայացուցիչներ:

Ողջունելով ներկաներին` Տիգրան Սարգսյանը նշել է. «Փոքր և միջին բիզնեսի զարգացումը մեզ համար ունի տնտեսական, քաղաքական և սոցիալական լուրջ բովանդակություն: Հայաստանի Հանրապետության կառավարության համար փոքր և միջին բիզնեսի զարգացումը մշտապես դիտարկվել է որպես գերակա խնդիր: Այս 3 տարիների ընթացքում մենք ձեռնարկել ենք միջոցառումներ, որոնց նպատակն է եղել ստեղծել բարենպաստ պայմաններ փոքր և միջին բիզնեսի զարգացման համար: Փոքր և միջին բիզնեսի զարգացումը նաև նպատակ ունի ստեղծել Հայաստանի Հանրապետությունում միջին խավ, որը կունենա էական դերակատարություն քաղաքական, տնտեսական բարեփոխումների համար: Գաղտնիք չէ, որ հենց միջին խավն է, որ հանդիսանում է ցանկացած հասարակության կարևորագույն շարժիչ ուժը: Մարդիկ, ովքեր պատասխանատվություն են ստանձնում իրենց տնտեսական ապագայի համար, ինքնուրույնաբար կայացնում են տնտեսական որոշումներ և հանդիսանում են պատասխանատու քաղաքացի երկրի համար: Համաշխարհային փորձը ցույց է տալիս, որ բարեփոխումների հիմնական շարժիչ ուժը եղել է և մնում է միջին խավը: Քաղաքացիական հասարակության ձևավորման տեսակետից նույնպես մենք գտնում ենք, որ առանց փոքր և միջին բիզնեսի հնարավոր չէ ունենալ լուրջ հաջողություններ: Չնայած այն միջոցառումների, որ իրականացվել են վերջին 3 տարիների ընթացքում, դեռևս առկա են բազմաթիվ խնդիրներ, խոչընդոտներ փոքր և միջին բիզնեսի զարգացման համար և համագործակցության այս ձևաչափը, որ մենք ստեղծում ենք, հնարավորություն է տալու մեզ մշտապես լինելով երկխոսության մեջ, ժամանակին բացահայտել խնդիրները և գտնել լուծումներ այդ խնդիրներին, ընդ որում, այնպիսի լուծումներ, որոնք ընդունելի լինեն նաև փոքր և միջին բիզնեսի համար: Մենք ձեզ հետ միասին պետք է ձևավորենք աշխատանքների օրակարգ, մշտապես այդ օրակարգը պետք է թարմացվի առաջին հերթին փոքր և միջին բիզնեսի ներկայացուցիչների կողմից:

Մի կողմից` մենք պետք է հստակ պատկերացնենք այն ռազմավարությունը, որն ընկած է լինելու մեր քաղաքականության ներքո և այդ ռազմավարությունը պետք է անպայման ձեզ հետ համաձայնեցված լինի, հասկանալի: Մյուս կողմից` այդ ռազմավարությունն իրականացնելու ընթացքում մենք պետք է կարողանանք օպերատիվ հարցեր քննարկել ձեզ հետ, և այդ օպերատիվ հարցերը մեզ հնարավորություն են տալու պատկերացնել, թե իրական իրավիճակն ինչպիսին է և ինչ հոգսերով են ապրում փոքր և միջին բիզնեսի ներկայացուցիչները: Համագործակցության այսպիսի ձևաչափեր` խորհուրդներ, մենք ունենք մի քանի ոլորտներում` տեղեկատվական տեխնոլոգիաների, բիզնես-միջավայրի բարելավման և այլն, և այսպիսի ձևաչափերն իրենց արդարացնում են: Այն հանգամանքը, որ խորհուրդը ղեկավարում է Հայաստանի Հանրապետության վարչապետը, հնարավորություն է տալիս որոշ խնդիրներ լուծելու համար օպերատիվ ձևավորել միջգերատեսչական աշխատանքային խմբեր, տալ հստակ հանձնարարականներ, այդ միջգերատեսչական աշխատանքային խմբերում ընդգրկել նաև բիզնեսի ներկայացուցիչներին, որպեսզի լուծումները լինեն հավասարակշռված և հաշվի առնեն բոլորի շահերը:

Հաշվի առնելով, որ այս դրական փորձն առկա է, համոզված եմ, որ նաև մեր նորաստեղծ` փոքր և միջին բիզնեսի զարգացման հարցերով զբաղվող խորհուրդը դրական արդյունքներ կտա: Ցանկանում եմ շնորհակալություն հայտնել խորհրդի անդամներին, որոնք ներկայացնում են ոչ պետական հատվածը, որ համաձայնվել են ընդգրկվել խորհրդի կազմի մեջ և մեզ հետ միասին կատարել այս չափազանց կարևոր և պատասխանատու առաքելությունը»,- ասել է Տիգրան Սարգսյանը:

Անցնելով օրակարագային հարցերին` խորհուրդը հաստատել է իր աշխատակարգը և կառուցվածքը, ապա խորհրդի քարտուղար, ՀՀ էկոնոմիկայի նախարարի առաջին տեղակալ Կարինե Մինասյանը ներկայացրել է խորհրդի գործարար համայնքը ներկայացնող անդամներին:

Այնուհետև խորհրդի անդամները բարձրացրել են ոլորտին առնչվող մի քանի մի շարք խնդիրներ, որոնց վերաբերյալ տրվել են պարզաբանումներ` համապատասխան գերատեսչությունների կողմից:

Ամփոփելով խորհրդի առաջին նիստի աշխատանքները` վարչապետն ընդգծել է, որ ակնկալվում է խորհրդի անդամների ակտիվ աշխատանքը: «Մեզ համար չափազանց կարևոր է, որպեսզի մեր քննարկումներն այս ձևաչափով չսահմանափակվեն: Մեր  քննարկումների ոգին և տրամաբանությունը դուք պետք է փոխանցեք ձեր կազմակերպությունների անդամներին, շահագրգիռ այլ մարմիներին, քանի որ լրջագույն խնդիր է տեղեկատվության ներկայացումը: Շատ հաճախ մենք տեսնում ենք, որ մարդիկ տեղեկացված չեն այս կամ այն նորմի, օրենքի վերաբերյալ: Ուստի խորհուրդը լինելու է այն խողովակը, որի  միջոցով շահագրգիռ մարմիններն ու  անձինք տեղյակ կպահվեն նորմատիվային և այլ փոխությունների մասին»,— դիմելով ներկաներին` ասել է վարչապետը:

Նշենք, որ նախատեսվում է հիմնել խորհրդի կայքէջը և էլեկտրոնային հասցեն, որի միջոցով շահագրգիռ մարմինները հնարավորություն կունենան ներկայացնել իրենց մտահոգող խնդիրներն ու առաջարկությունները` փոքր և միջին ձեռնարկատիրության զարգացման նպատակով:

Թուրքիայի Կոնյա նահանգում տեղական ժամանակով ժամը 12.58-ին 5 բալ ուժգնությամբ երկրաշարժ է տեղի ունեցել, հայտնում է TRT-Russian լրատվականը: Էպիկենտրոնը գտնվում էր 5 կմ խորությամբ, սակայն զգացվում էր նաեւ կողքի մի քանի նահանգներում:

Ըստ հաղորդագրության մի քանի շենքի պատեր են ճաքել: Նախնական տվյալներով, զոհեր չկան:

Եգիպտական լրատվամիջոցները տեղեկացնում են,  որ երկրի նախկին նախագահ Հոսնի Մուբարաքը, ով հաջորդ շաբաթ պետք է կանգներ դատարանի առաջ, տեղափոխվել է հիվանդանոց:

Վերջին տվյալների  համաձայն Մուբարաքը իրեն թույլ է զգում եւ հրաժարվում է սննդից:

Հայտարարությունը տարածվել է այն բանից հետո, երբ սկսեցին լուրեր շրջանառվել, թե Մուբարաքը մահացել է:

Այս տարվա փետրվարին Եգիպտոսում տեղի ունեցած իշխանափոխությունից հետո Մուբարաքը պարբերաբար առողջական խնդիրներ է ունենում: Շատ եգիպտացիների համոզմամբ` երկրի նախկին առաջնորդը ցանկանում է այդ ձեւով խուսափել պատասխանատվությունից:

Հանձնում են կամավոր

Հուլիսի 26-ին, ժամը 17.30-ին, ոստիկանության Երևան քաղաքի վարչության հերթապահ մաս անհայտ քաղաքացուց հաղորդում է ստացվել, որ Հալաբյան փողոցից Հրազդանի կիրճ տանող ճանապարհին` փոքր կամրջի տակ, զենք-զինամթերք է թողնում:

Մեկնած օպերատիվ խումբը նշված վայրում պոլիէթիլային պարկի մեջ հայտնաբերել է թմբուկավոր  ատրճանակ, մեկնարկային  ատրճանակ, «Ֆ-1» տիպի  նռնակ,  նռնակի 2 պայթուցիչ, «ԱԿՍ» տիպի ինքնաձիգի  պահունակ, գնդացրի 2 ժապավեն և տարբեր տրամաչափի 172 փամփուշտ:

Հայտնաբերվածն ուղարկվել է փորձաքննության:

Կատարվում է հետաքննություն:

 

Հուլիսի 26-ին, ժամը 19.15-ին, անհայտ քաղաքացուց ոստիկանության Չարբախի բաժանմունք ահազանգ է ստացվել, որ զենք-զինամթերք է թողնում Արարատյան փողոցի թիվ 90 հասցեում գտնվող կամրջի տակ:

Մեկնած օպերատիվ խումբը նշված վայրում հայտնաբերել է «ՏՕԶ» տիպի 5,6 մմ տրամաչափի հրացան, «Ֆ-1» տիպի  նռնակ` առանց պայթուցիչի և «ՈւԶՌԳ» տիպի  պայթուցիչ:

Հայտնաբերվածն ուղարկվել է դատաձգաբանական և պայթունատեխնիկական փորձաքննության:

Կատարվում է հետաքննություն:

 

Բացատրական աշխատանքների շնորհիվ, հուլիսի 26-ին, ժամը 10.30-ին, ոստիկանության Նոր Նորքի բաժին է ներկայացել ԵԿՄ անդամ, ԼՂՀ  ինքնապաշպանական մարտերի մասնակից 54-ամյա Աբրահամ Կ.-ն և կամավոր հանձնել ինքնաշեն  հրացան և տարբեր տրամաչափի 146 փամփուշտներ` հայտարարելով, որ հանձնված զենքն-զինամթերքը նույն օրը, ժամը 09.30-ին, պատահաբար հայտնաբերել է իրենց շենքի խորդանոցում, մաքրման աշխատանքներ կատարելիս և մտաբերել է, որ դրանք իր հետ բերել է դեռևս 1990-1993 թթ., ԼՂՀ ինքնապաշտպանական մարտերին մասնակցելու ընթացքում և մոռացել է դրանց գոյության մասին:

Ներկայացվածն ուղարկվել է փորձաքննության:

Կատարվում է հետաքննություն:

Հուլիսի 26-ին, ժամը 20.20-ին,  ոստիկանության Վայքի բաժին է ներկայացել 45-ամյա Մարկոս Հ.-ն,  կամավոր հանձնել  տարբեր տրամաչափի 87 փամփուշտ և հայտարարել, որ  նշված զինամթերքը ձեռք է բերել 1990-1992 թթ. Բարձրունի գյուղի ինքնապաշտպանական մարտերին մասնակցելու ժամանակ:

Նշանակվել է դատաձգաբանական փորձաքննություն:

Կատարվում է հետաքննություն:

Բերման են ենթարկվել

Հուլիսի 26-ին, ժամը 22.30-ին, ոստիկանության Քանաքեռ-Զեյթունի բաժնի ծառայողները Քանաքեռի 11-րդ փողոցի 1-ին նրբանցքի թիվ 1 տնից  բերման են ենթարկել նախկինում դատված, 35-ամյա Ալեքսանդր Ծ.-ին, որը ս/թ մայիսի 23-ից հետախուզվում էր ծեծի մեղադրանքով:

Հուլիսի 26-ին, ժամը 17.25-ին, ոստիկանության Վաղարշապատի բաժնի և կազմակերպված հանցավորության դեմ պայքարի գլխավոր վարչության ծառայողները ԱՄԷ-Երևան չվերթի ինքնաթիռի ժամանումից հետո, «Զվարթնոց» օդանավակայանի ժամանման սրահից բերման են ենթարկել 35-ամյա Գայանե Ա.-ին, որը 2009 թ. հունիսի 12-ից հետախուզվում էր պոռնկությամբ զբաղվելուն նպաստելու մեղադրանքով:

Գայանե Ա.-ն  կալանավորված է:

Հուլիսի 26-ին, ժամը 09.00-ին, ոստիկանության Վաղարշապատի բաժնի ծառայողները Զվարթնոց թաղամասի թիվ 8 շենքի մոտից  բերման են ենթարկել 20-ամյա Մամիկոն Ս.-ին, որը ս/թ հուլիսի 25-ից  հետախուզվում էր գողության մեղադրանքով:

Մամիկոն Ս.-ն կալանավորված է:

 

Հուլիսի 26-ին, ժամը 18.45-ին, ոստիկանության Վաղարշապատի բաժնի ծառայողները  Երևան քաղաքի Գարեգին Նժդեհի հրապարակից բերման են ենթարկել 44-ամյա Աշոտ Ս.-ին, որը 2010 թ. նոյեմբերի 3-ից հետախուզվում էր խարդախության  մեղադրանքով:

Աշոտ Ս.-ն կալանավորված է:

 

Ոստիկանության Վանաձորի բաժնի ծառայողների բացատրական աշխատանքների շնորհիվ, հուլիսի 26-ին, ժամը 11.00-ին, բաժին է ներկայացել 35-ամյա Աբգար Դ.-ն, որը 2009 թ. հունվարի 23-ից Ուկրաինայի Զապորոժիեի մարզի ՆԳ վարչության կողմից հետախուզվում էր  կողոպուտի և խարդախության մեղադրանքներով:

Աբգար Դ.-ն  ձերբակալված է:

Կաշառք վերցնելու փաստով

ՀՀ ոստիկանության կազմակերպված հանցավորության դեմ պայքարի գլխավոր վարչության  ծառայողների ձեռնարկած միջոցառումների արդյունքում ս/թ հուլիսի 26-ին 57-ամյա Կոլյա Խ.-ն  ԿՀԴՊ ԳՎ-ում հաղորդում է տվել, որ կնոջը` Ալիսա Ա.-ին պատկանող, Երևանի Մառի փողոցի 13 շենքում գտնվող հասարակական նշանակության տարածքի գործառնական նշանակությունը որպես բնակելի տարածքի փոխելու համար, ս/թ հուլիսի 26-ին Երևանի Նոր Նորքի վարչական շրջանի քաղաքաշինության և հողօգտագործման բաժնի պետ, 51-ամյա  Հովիկ  Ա.-ն իրենից պահանջել և ստացել է 1.500 ԱՄՆ դոլար կաշառք:

Հովիկ  Ա.-ն բերման է ենթարկվել, և կատարված հետաքննության ընթացքում բացահայտվել է նրա կողմից իր աշխատասենյակում 1.500 ԱՄՆ դոլար կաշառք վերցնելու փաստը: Նշված գումարից 600 ԱՄՆ դոլարը նա ներկայացրել է:  Մնացած 900 ԱՄՆ դոլարը հայտնաբերվել է Հովիկ  Ա.-ի աշխատասեղանի դարակում:

Քննությունը շարունակվում է:

Ծերանոցներում ապրող թոշակառուների գեղեցկության մրցույթ է անցկացվել Ալաբամա նահանգում: Այս պատվավոր տիտղոսի համար պայքարել են ծերանոցների 75 բնակչուհիներ ողջ նահանգից:  Յուրաքանչյուր մասնակից հանդես է եկել իր ծերանոցի անունից: Եզրափակիչ փուլ են հասել 10 տատիկներ, որոնք ներկայացել են ժյուրիին և պատմել իրենց կյանքի պատմությունը:

Հաղթող է ճանաչվել 100-ամյա Ֆելմա Շրիմշայթերը, որն ապրում է Անդալուսիա փոքրիկ քաղաքում: Ֆելմա տատիկը ժյուրիի անդամներին գերել է իր կյանքի պատմությամբ: Նա պատմել է իր ճամփորդությունների մասին ԱՄՆ բոլոր նահանգներում, Կանադայում և Եվրոպայի մեծ մասում:

Հուլիսի սկզբին որպես «Արժանապատիվ տրանսպորտ» քաղաքացիական նախաձեռնության ներկայացուցիչ գրավոր հարցում էի մուտք արել Երեւանի քաղաքապետարան: Մի քանի օր անց ինձ զանգահարեցին Տրանսպորտի վարչությունից եւ ասացին, որ իմ պահանջած տեղեկատվությունը մեծ ծավալի է եւ ինչպես օրենքն է նախատեսում, ես պետք է վճարեմ փաստաթղթերի պատճենահանման գումարը:

Հայտնեցի, որ պատրաստ եմ կատարել օրենքի պահանջը: Քաղաքապետարանն իմ դիմումը մակագրել էր «Երեւանտրանս» ՓԲԸ-ին, ինձ էլ տեղեկացրել էին, որ պետք է այնտեղ վճարում կատարեմ եւ ստանամ իմ փնտրած տեղեկատվությունը, այն է` Երեւանը սպասարկող երթուղային տաքսիների չվացուցակները, որը հնարավորություն կտա պարզել, թե հանրությանը սպասարկող տրանսպորտը որքանով է հետեւում սահմանված ժամանակացույցին:

Երեք օր անց այցելեցի «Երեւանտրանս» ՓԲԸ:

Դիմումս տեղ էր հասել, սակայն մնացել էր գրանցամատյանում, քանի որ պատասխանատու պաշտոնյան այն չէր էլ վերցրել: Իմ ներկայությամբ ոմն Դադասյան կամ Դադայան, ով չներկայացավ, թե ինքն ով է, կարդած դիմումս, ապա ասաց, թե իրենք չեն պատասխանելու դիմումին: Ինձ էլ խորհուրդ տվեց զանգահարել քաղաքապետարան եւ նրանցից պահանջել տեղեկատվությունը, քանի որ դիմումս այնտեղ եմ մուտքագրել:

Զանգահարեցի քաղաքապետարան, ասացին, թե ինձ գրավոր պատասխան են ուղարկել փոստով, իսկ երբ պարզեցին, որ ես չեմ ստացել, ասացին, որ մոտենամ «Մեկ պատուհան» կոչվող բաժնին եւ այնտեղից ստանամ: Տրանսպորտի վարչության պետի ստորագրությամբ գրավոր պատասխանի բովանդակությունը նույնն էր, ինչ ինձ հեռախոսով էին ասել. «Դուք կարող եք դիմել «Երեւանտրանս» ՓԲ ընկերությանը` 30-օրյա ժամկետում ստանալու պահանջվող տեղեկատվությունը»:

Հենց քաղաքապետարանից զանգահարեցի Տրանսպորտի վարչության պետին: Հեռախոսին պատասխանող կինը պարզեց, թե ինչու եմ զանգահարել եւ ասաց, թե պետք է կատարողին զանգեմ-տեղեկացնեմ, նա էլ կմոտենա պետին:

Ամբողջ օրը փորձեցի հեռախոսով կապվել իմ հարցման պատասխան գրությունը կազմած Կարեն Հակոբյանի հետ, սակայն ապարդյուն:

Աշխատանքային օրվա վերջին զանգահարեցի Տեղեկատվության եւ հասարակայնության վարչության պետին, որպեսզի նրանից պարզեմ, թե նման իրավիճակում ես ումից կարող եմ տեղեկատվություն ստանալ:

Վարչության պետ Արթուր Գեւորգյանը հենց սկզբից ոչ բարեհամբույր էր խոսում ինձ հետ, ես ստիպված եղա նրան ավելի քան 3 անգամ խնդրել, որպեսզի ինձ «Դուք»-ով դիմի, քանի որ ինքս էլ նրան այդպես էի դիմում:

«Երիտասարդ, դու քանի տարեկա՞ն ես»,- վարչության պետի հարցադրումը եւս հարգալից չէր: Պատասխանեցի, որ հարգանքը տարիքով չեն չափում եւ որ ցանկացած քաղաքացու հետ պետք է հարգալից վերաբերվել:

Սակայն չինովնիկը ոչ մի կերպ չհամակերպվեց այն մտքին, որ «իր տղայի տարիքի երիտասարդի հետ» պետք է «Դուք»-ով խոսի: Իսկ երբ արդեն պահանջեցի, որ ինձ «Դուք»-ով դիմի, Արթուր Գեւորգյանը պարզապես սկսեց գոռալ: Նա ավելի ու ավելի էր ձայնը բարձրացնում, ես էլ` նրան համաչափ:

Երբ ասացի, որ ցանկանում եմ ձայնագրել մեր հեռախոսազրույցը, չինովնիկը մի փոքր հանդարտվեց եւ կրկնեց այն, ինչ հենց սկզբից էր ասում` իրենց վարչությունը կապ չունի «Մեկ պատուհան»-ում մուտքագրված դիմումների հետ:

Այստեղ էական էր ոչ թե պատասխանը, այլ թե ինչպես այն մատուցվեց ՀՀ քաղաքացուն, որը տեղեկատվություն էր փնտրում:

Տեսնե՞ս Արթուր Գեւորգյանը պարզել է Երեւանի քաղաքապետի տարիքը: Եթե պարզվի, որ Կարեն Կարապետյանը նրա կրտսեր եղբոր տարիքին է, գո՞ւցե նրան էլ «դու»-ով դիմի:

Բոլոր միջին եւ ցածր կալիբրի չինովնիկներին, ի դեմս Երեւանի քաղաքապետարանի Տեղեկատվության եւ հասարակայնության վարչության պետի, ցանկանում եմ հիշեցնել, որ իրենք աշխատավարձ են ստանում ՀՀ քաղաքացիների հարկերից գոյացող պետական բյուջեից, ուստի եւ պարտավոր են հարգալից սպասարկել հասարակությանը:

ՀԳ – Հիշեցնեմ, որ Արթուր Գեւորգյանն ընդգրկվել էր Ինֆորմացիայի ազատության կենտրոնի եռամսյակային «Սեւ ցուցակում», քանի որ նրա ղեկավարած վարչությանն ուղղված իմ գրավոր հարցումը մնացել էր անպատասխան: Վարչության պետը ծանր էր տարել` տեսնելով իր անունը սեւ ցուցակում եւ հավանաբար մինչեւ մեր զրույցը լավ հիշում էր, որ այդտեղ է հայտնվել Արման Ղարիբյանի «շնորհիվ»:

ՀՀ քաղաքացի

Արման Ղարիբյան

Լուսանկարում` հարգարժան Արթուր Գեւորգյանն է