Հոլանդացիների մեծամասնությունը հանդես է գալիս եվրոգոտուց դուրս գալու և իրենց ազգային արժույթին`գուլդենամին վերադառնալու նախաձեռնությամբ: Այս մասին հայտարարում է Reuters-ը`հղում կատարելով Maurice de Hond-ի հարցման արդյունքներին:
Հոլանդացի հարկատուները վրդովվում են այն բանի համար, որ ստիպված են վճարել եվրոգոտու ավելի շատ ծախսող անդամներին օգնելու համար:

Եթե մայիսին հոլանդացիների միայն 51 տոկոսն էր ցանկանում վերադառնալ իրենց ազգային արժույթին, ապա վերջին հարցման արդյունքում` այդ ցուցանիշը հասել է 58 տոկոսի:

Նիդեռլանդները եվրոգոտի է մտել մոտ 10 տարի առաջ`2002թ.:

ԱԻՆ-ից հայտնում են, որ նոյեմբերի 7-ին` ժամը 21.04-ին ահազանգ է ստացվել, որ Երևան քաղաքի Մյասնիկյան պողոտայի թիվ 40 հասցեում` Ջրաշխարհի մոտակայքում, այրվում է ավտոմեքենա: Դեպքի վայր է մեկնել մեկ մարտական հաշվարկ:

Հրդեհը մեկուսացվել է ժամը 21.17-ին, մարվել` 21.29-ին: Այրվել է Հ.Հովհաննիսյանին պատկանող «Օպել» մակնիշի 11 ՕՏ 257 պետհամարանիշի ավտոմեքենայի շարժիչի հատվածը:
Նոյեմբերի 08-ին` ժամը 01.18-ին ահազանգ է ստացվել, որ Կոտայքի մարզի Քանաքեռավան գյուղի 1-ին փողոցի թիվ 21 տան բակում այրվում է ավտոմեքենա: Դեպքի վայր է մեկնել մեկ մարտական հաշվարկ:

Հրդեհը մեկուսացվել է ժամը 01.44-ին, մարվել` 01.50-ին: Ամբողջությամբ այրվել է Ա.Խաչատրյանին պատկանող «Օպել» մակնիշի 26 ԼՍ 290 պետհամարանիշի ավտոմեքենան:

Նշելով, որ հայ-վրացական ավանդական և պատմականորեն արդարացված բարեկամական հարաբերությունները երկու ժողովուրդների միջև զարգանում են համագործակցության ոգով, Նախագահն ընդգծել է, որ երկկողմ կապերին հատուկ դինամիկա է հաղորդում բարձր մակարդակով կանոնավոր քաղաքական երկխոսությունը: Հանրապետության ղեկավարի խոսքով, դա հնարավորություն է տալիս օպերատիվորեն լուծել հայ-վրացական հարաբերություններին վերաբերող ցանկացած հարց:

Սերժ Սարգսյանը կարևորել է առաջիկայում տեղի ունենալիք միջկառավարական տնտեսական հանձնաժողովի նիստը, վստահություն հայտնելով, որ ինչպես նախկինում` այս դեպքում ևս այն զգալիորեն կխթանի Հայաստանի և Վրաստանի միջև տարբեր ոլորտներում համագործակցությունը:

Նախագահ Սերժ Սարգսյանը և Վրաստանի արտաքին գործերի նախարարը, ՀՀ Նախագահի Վրաստան կատարելիք պաշտոնական այցից առաջ, քննարկել են նաև այցի հետ կապված հարցեր: Նախարար Վաշաձեն նշել է, որ երկու երկրների արտաքին գործերի նախարարություններն աշխատում են այցը պատշաճ նախապատրաստելու ուղղությամբ և ընդգծել, որ ամեն ինչ կնախապատրաստվի երկու պետությունների միջև եղած հարաբերություններին հարիր մակարդակով:

Հայաստանի կառավարությունը ժողովրդին սխալ է ներկայացնում եկող տարվա բյուջեի նախագիծը: Այդ մասին, նոյեմբերի 8-ին, լրագրողների հետ հանդիպմանը հայտարարել է «Ժառանգություն» խմբակցության պատգամավոր Արմեն Մարտիրոսյանը` խիստ բացասաբար գնահատելով կառավարության վարմունքը:

«Կառավարությունն ասում է զարգացման բյուջե, բայց անգամ կայունացման չենք հասել, ուր մնաց զարգացման: Առանց աշխատավարձի բարձրացման մենք խնդիրներ կարող ենք ունենալ: Այս բյուջեն կարելի է անվանել՝ «եղունգ ունես գլուխդ քորի»,- նկատեց Մարտիրոսյանը:

Վերջինիս խոսքով շատ ավելի ազնիվ կլիներ, եթե կառավարությունը հետեւեր 90-ականների սկզբին Վազգեն Մանուկյանի գլխավորած կառավարությանը եւ ասեր, որ պահածոներ ավելի շատ պատրաստեն:

Ըստ պատգամավորի` Հայաստանը գտնվում է տնտեսական առումով շատ ծանր վիճակում եւ ճգնաժամի լուրջ վտանգի տակ: «Ճգնաժամի առաջին ալիքի ժամանակ մենք լուրջ պարտքեր վերցրինք, եթե կրկին ճգնաժամ լինի, անցանկալի իրավիճակում կլինենք, մոտ կլինենք Հունաստանին, որին դեֆոլտ է սպառնում»,- նշեց Արմեն Մարտիրոսյանը` հավելելով, որ, ցավոք, չի տեսնում անվտանգության բարձիկները նոր բյուջեում: «Սա անկարող բյուջե է, եւ սոցիալական որեւէ ուղղվածություն չի կարող ունենալ»,- բնութագրեց նա:

Ի դեպ, նրա խոսքով, առայժմ հայտնի չէ, թե ինչպես է բյուջեի 2012թ. նախագծին քվեարկելու «Ժառանգություն» խմբակցությունը: «Դեռ քննարկում չի եղել, թե ինչպես է քվեարկելու Ժառանգությունը: Մենք կտեսնենք, թե ինչ դրական քայլեր են արվում: Այս պահի դրությամբ, որեւէ դրական քայլ չենք տեսնում»,- ամփոփեց պատգամավորը:

ՀՀ կառավարությանն առընթեր պետեկամուտների կոմիտեն հրապարակել է Հայաստանի խոշորագույն հարկատուների ցանկը, որտեղ 2011-ի  9 ամսվա արդյունքներով առաջին տեղում Զանգեզուրի պղնձամոլիբդենային կոմբինատն է ` պետբյուջեին  վճարած  22.5 մլրդ դրամով:

Երկրորդ խոշորագույն հարկատուն «Հայռուսգազարդն» է`  մոտ 16 մլրդ դրամի հարկով:

3-րդ տեղում  12.2 մլրդ դրամով «Ղ-Տելեկոմն» է, որին  հաջորդում է Սամվել Ալեքսանյանին պատկանող «Ալեքս Գրիգը»` 11.9 մլրդ դրամ ցուցանիշով:

Հինգերորդ ցուցանիշը պատկանում է «Արմենթելին»` 9.7 մլրդ դրամ:

Վառելիքի ներմուծմամբ զբաղվող «Սիթի Պետրոլ Գրուպ» ընկերությունը, որն  9 ամսում վճարել է 7.8 մլրդ դրամ,  զբաղեցնում է 6-րդ հորիզոնականը:

7-րդ տեղում՝ «Հայաստանի էլեկտրական ցանցերն» է, իսկ «Ֆլեշը»,  7.2 մլրդ դրամ ցուցանիշով, 8-րդ հորիզոնականում է:

«Արմենիա միջազգային օդանավակայաններ» 5.5 մլրդ դրամ ցուցանիշով զբաղեցնում է 9-րդ հորիզոնականը:

Տասնյակը եզրափակում է «Հայկական ատոմակայանը»` 3.7 մլրդ դրամ:

asekose.am

Վրաստանի նախագահ Միխեիլ Սաակաշվիլին Քվարելի շրջանի աշակերտների հետ հանդիպման ժամանակ հայտարարել է, թե Վրաստանում Facebook սոցիալական ցանցն առաջ է անցել Odnoklassniki –ից, քանի որ Վրաստանն այլևս հետխորհրդային երկիր չէ։

«Одноклассники–ն ստեղծվել էր, որպեսզի իմանային և պարզեին, թե ինչ կարծրատիպեր են իշխում հետխորհրդային տարածքում, թե ինչը կարող է ազդել հետխորհրդային մարդու վրա, որպեսզի հնարավորինս շատ ինֆորմացիա ստանային այն մասին, թե ինչ է տեղի ունենում բոլոր հանրապետություններում։ Ի դեպ, դա (Одноклассники–ն) շատ մոդայիկ էր Վրաստանում, սակայն այժմ հաղթել է Facebook–ը, քանի որ մենք մեր մտածելակերպով այլևս հետխորհրդային երկիր չենք համարվում»,– ասել է Սաակաշվիլին։

Ճապոնիայի Արտաքին գործերի նախարարությունը վերացնում է վիզային ռեժիմը օտարեկրացիների համար, ովքեր ցանկանում են այցելել Իվատե, Միյագի և Ֆուկուսիմա պրեֆեկտուրաներ, որոնք տուժել են 2011թ. մարտի 11-ի երկրաշարժի և ցունամիի հետևանքով: Այս մասին հայտնում է NHK ճապոնական հեռուստաընկերությունը:

Նախարարության ներկայացուցչի խոսքով` անվճար վիզաները կտրամադրվեն նոյեմբերի 15-ից: Մեկանգամյա վիզան Ճապոնիա արժե 38 դոլար, իսկ մուլտի վիզան`76 դոլար:

Այժմ բոլոր օտարերկրացիները անվճար կկարողանան մուտք գործել երկիր` ներկայացնելով ինքնաթիռի տոմսը և հյուրանոցի ամրագրումը:

Ճապոնիայի Արտաքին գործերի նախարարությունը հույս ունի, որ նման քայլը կխթանի օտարերկրացիների այցելությունները այդ վայրեր և կօգնի վերականգնել տուժած շրջանները:

Ճապոնիայի Զբոսաշրջության վարչության տվյալով`այս տարի երկիր այցելած օտարերկրացիների թիվն անցած տարվա համեմատ նվազել է ավելի քան 30 տոկոսով:

Ոստիկանության Էրեբունու բաժնի պետի օպերատիվ գծով տեղակալ Միհրան Քեշիշյանի նկատմամբ Հայաստանի Հատուկ քննչական ծառայությունը հետախուզում է հայտարարել, քանի որ նա փախուստի մեջ է:

ՀՔԾ մամուլի ծառայությունից հայտնում են, որ ոստիկանության ԿՀԴՊ գլխավոր վարչությունում նախապատրաստված նյութերի հիման վրա քրեական գործ է հարուցվել միջնորդների միջոցով քաղաքացի Ք.Ա-ին քրեական պատասխանատվությունից ազատելու համար Երեւան քաղաքի վարչության Էրեբունու բաժնի պետիօպերատիվ գծով տեղակալ Միհրան Քեշիշյանին 13 հազար դոլար կաշառք տալու դեպքի առթիվ:

Գործով կատարվել  ու կատարվում են քննչական եւ օպերատիվ անհետաձգելի գործողություններ: Միհրան Քեշիշյանին որպես մեղադրյալ ներգրավելու որոշում է կայացվել, խափանման միջոց է կիրառվել կալանավորում եւ հայտարարվել է հետախուզում (վերջինս դիմել է փախուստի): Նախաքննությունը շարունակվում է: