Նախագահ Սերժ Սարգսյանը ստորագրել է Ազգային ժողովի ընդունած «ՀՀ ջրային օրենսգրքում փոփոխություններ և լրացումներ կատարելու մասին», «Տեղական ինքնակառավարման մասին» ՀՀ օրենքում լրացում կատարելու մասին, «Ջրօգտագործողների ընկերությունների և ջրօգտագործողների ընկերությունների միությունների մասին» ՀՀ օրենքում փոփոխություններ և լրացումներ կատարելու մասին ՀՀ օրենքները:

Հայաստանի ոստիկանապետ, գեներալ-լեյտենանտ Վլադիմիր Գասպարյանը ոստիկանության քննչական գլխավոր վարչության հատկապես կարեւորագույն գործերով քննության վարչության պետ է նշանակել Վահագն Հարությունյանին:

Վերջինս մինչ այս աշխատում էր Հատուկ քննչական ծառայությունում որպես ՀԿԳ ավագ քննիչ, իսկ2008թ. մարտի 1-ից հետո քննչական խմբի ղեկավարն էր:

Նշենք, որ Վլադիմիր Գասպարյանը նախօրեին պաշտոնանկ էր արել եւ կադրերի ռեզերվ ուղարկվել քննչական գլխավոր վարչության հատկապես կարեւոր գործերով վարչության պետ Կարեն Կարապետյանին:

Նշենք նաև,  որ Վահագն Հարությունյանը Սահմանադրական դատարանի  փոխնախագահ Առուշան Հակոբյանի  փեսան է:

Հայաստանի ազգային հավաքականը փետրվարի 29-ին Թուրքիայում ընկերական հանդիպում կանցկացնի Բելառուսի հավաքականի հետ: Բելառուսի ֆուտբոլի ֆեդերացիայի փոխնախագահ Սերգեյ Սաֆարյանը հայտնել է, որ Հայաստանի թիմի հետ ձեռք է բերվել սկզբունքային պայմանավորվածություն: Բելառուսի հավաքականը փետրվարին ուսումնամարզական հավաք է անցկացնելու Թուրքիայում, հաղորդում է football.by-ը:

«Հետաքրքիր շրջան ենք ապրում, երբ իշխանությունը լրջագույն ճաքեր է տալիս: Չեմ կարծում, որ նոր նշանակումները երկրի արդյունավետ կառավարման հետ են կապված, այլ Սերժ Սարգսյանը փորձում է ազատվել քոչարյանական կադրերից», — այսօր լրագրողների հետ հանդիպմանը ասաց  ՍԴՀԿ ատենապետ Լյուդմիլա Սարգսյանը:

Իշխանական հանցագործ բուրգը, ըստ նրա, անում է ամեն ինչ, որ առանց ցնցումների պահի այդ բուրգը, բայց դա նրան չի հաջողվի. «Պարտադրանքով գործընկեր չես պահի: Եթե Հովիկ Աբրահամյանը հրաժարական է տալիս` իջեցնելով իր ստատուսը, ակնհայտ է, որ այդ հրաժարականը նրան պարտադրվել է, մանավանդ հայտնի էլ չէ` նոր տեղում նա կարող է կարևոր դերակատարում ունենալ, թե ոչ»,- ասաց Լյուդմիլա Սարգսյանը` կանխատեսելով, որ դեռ լուրջ հրաժարականների ենք ականատես լինելու:

Իջևանի ընտրությունները, ըստ նրա, ցույց տվեցին, որ ՀՀԿ-ն լրջորեն իր դիրքերը զիջում է, կարևոր չէ, թե որ քաղաքական ուժին, մանավանդ որ լուրեր են տարածվում, որ ՀՀԿ-ի երեկվա նիստում վեր է հանվել Տավուշի մարզպետի հարցը, և հնարավոր է` նրան էլ պարտադրված լինի հրաժարական:

«Այսօր Սերժ Սարգսյանը շատ կուզեր, որ արտահերթ խորհրդարանական ընտրություններ անցկացվեին, եթե կարողանար ԲՀԿ-ից իրեն սատարելու խոստումներ կորզել, քանի որ նա գիտակցում է` որքան ժամանակը ձգվում է` այնքան ՀՀԿ-ն թուլացնում է իր դիրքերը: Ինչպես ասում են` գյուղացի Համբոյի տունը կռիվ էր ընկել, և ի վերջո կարծում եմ, Գիքորը մահանալու է»,- նկատեց Լյուդմիլա Սարգսյանը:

Նրա խոսքով անպատժելիություն է այն, որ Գագիկ Բեգլարյանին ուզում են «ռեաբիլիտացիա» անել, Հովիկ Աբրահամյանն էլ իշխանության համար «շտրաֆնոյ բատալյոն է», ուզում են դաստիարակել ու հասկացնել, որ եթե չենթարկվի, այդտեղից էլ հեռու է գնալու: Այն հարցին` հնարավո՞ր է` ՀԱԿ-ն իր շարքերն ընդունի Հովիկ Աբրահամյանին, եթե վերջինս ցանկանա, մանավանդ որ անցյալում, նա ՀՀՇ անդամ է եղել, Լուդմիլա Սարգսյանն ասաց. «Բացառվում է, քանի որ ՀՀՇ-ն արդեն մաքրվել է»:

Անդրադառնալով վերջին աղմկալի իրադարձություններին նա ասաց. «Իշխանությունները անդադար խոսում են եվրոպական արժեքներին ինտեգրվելու մասին, բայց որոնք են այդ արժեքները` կրիմինալը, ամենաթողությունն ու թալա՞նը: Ամենաթողությունն այն աստիճանի է հասել, որ նույնիսկ հրապարակային են հանցանք կատարում, քանի որ գիտեն, որ չեն պատժվելու»,- այսօր լրագրողների հետ հանդիպմանն ասաց ՍԴՀԿ ատենապետ Լյուդմիլա Սարգսյանը` նկատի ունենալով Սյունիքի մարզպետին, որը, ըստ գործարար Սիլվա Համբարձումյանի, հարձակվել է իր վրա: «Նա միշտ էլ ջրից չոր է դուրս եկել, նա ինձ համար տղամարդ չի»,- ասա նա` ավելորդ համարելով այն խոսակցությունները, թե նման դեպք չի եղել:

«Հաստատ գիտեմ, որ եղել է, նախ դա նկարահանվել է, և հետո այնտեղ իմ աղջիկն է աշխատում, և նման բան եղել է»,- ասաց ՍԴՀԿ ատենապետը:

«Պատերազմի տարիներին տնտեսական աճ ստացած կառավարության հրաժարականն էին պահանջում՝ անընդունելի համարելով ժողովրդի կենսապայմանների վատացումը, իսկ մեր ֆինանսների նախարարն ասումա՝ բա որ Պորտուգալիայի գյուղերում բերքը լավ չլինի, ո՞նց բյուջեն կկատարեմ: Սա հանրությանը ձեռ առնել է: Բացարձակ պատկերացում տնտեսության մասին չունի, մտածում է միայն իր հետույքն ապահովագրելու մասին»,-այսօր լրագրողների հետ հանդիպման ժամանակ ասաց ՀՀ նախկին վարչապետ Հրատն Բագրատյանը`ավելացնելով . «Երկու օր առաջ գյուղատնտեսության նախարարության պատասխանատու ներկայացուցիչը հայտարարեց, որ գյուղատնտեսությունում աճը եղել է 15 տոկոս, այսինք 15 տոկոս ֆիզիկապես ավելի մթերք է արտադրվել՝ պարոն Բախշյանի հայտարարությունն է: Երկրի բնակչությունն այս տասը ամսում 3 տոկոսով պակասել է: Ոնց կարող է մթերքի ծավալի ավելացման և բնակչության պակասելու հետ մեկտեղ բերքի գները բարձրանային 14 տոկոսով: Ես կոչ եմ անում ՀՀ նախագահին և ՀՀԿ-ին աշխատանքից վտարել ԿԲ տնօրենին, վարչապետին և ֆինանսների նախարարին»,- ասաց նա:

Նրա խոսքով՝ ազգային եկամտի օգտագործման հաշվի մեջ հարուստների տեսակարար կշիռը շարունակելու է ավելանալ: 2012-ը բերքառատ տարի է լինելու հարուստների համար: Աղքատացումը շարունակվելու է:

Նա համոզված է, որ եկող տարի ոչ թե տասը տոկոսով բարձրանալու, այլ հինգ տոկոսով նվազելու են կենսաթոշակները. «Թոշակները կբարձրանան տասը տոկոս, բայց չէ՞ որ գներն էլ տասնհինգ տոկոս կավելանա, իսկ թոշակառուներին հենց պարենի գնաճն է վերաբերում: Այսինքն ՀՀԿ-ն գալիս է և ասում է թոշակառուներին, որ հինգ տոկոս վատ կապրեն»,- ասաց նա:

«Երեկ չէ առաջին օրը փոխանակ վարչապետը վերլուծեր տնտեսական վիճակը, ինչ զարգացումներ են սպասվում, և ազնվորեն ասեր, թե ինչ հարցեր են լուծվելու այդ բյուջեով, փոխարենը տեղի ունեցավ մի ելույթ, որտեղ նորից լսեցինք թիրախների մասին, ռիսկերի ապահովագրման մասին: Ի դեպ ասեմ, որ էս տերմինալոգիան, որը հաճախ օգտագործվում է ֆինանսների նախարարի և Կենտրոնական բանկի կողմից, պրիմիտիվ տերմինաբանություն է, որևէ կոմերցիոն բանկի վարկային աշխատողին բնորոշ»:

Նրա խոսքով՝ ազգային եկամտի օգտագործման հաշվի մեջ հարուստների տեսակարար կշիռը շարունակելու է ավելանալ: 2012-ը բերքառատ տարի է լինելու հարուստների համար: Աղքատացումը շարունակվելու է:

«Այն տպավորությունն ունեմ, որ վարչապետը և Կենտրոնական բանկի նախագահը «թիրախ, սոցիալական ռիսկերի ապահովագրություն, լիկվիդայնություն» բառերից այն կողմ ոչինչ չգիտեն: Հասարակ մակրոտնտեսական տրամաբանությամբ հենց հարուստներն են մի քիչ ավելի լավ ապրելու, որովհետև ունենալու են ավելի շատ եկամուտ, քան գնաճն է»,- նշեց Բագրատյանը:

Գերմանիան, Մեծ Բրիտանիան և Ֆրանսիան կոչ են արել Միավորված ազգերի կազմակերպությանը բանաձև ընդունել Սիրիայի դեմ` խստորեն դատապարտելով սիրիական վարչակարգի գործողությունները և պահանջելով անմիջապես դադարեցնել բռնությունը:

Ինչպես հաղորդում է Deutche-Welle-ն, ՄԱԿ-ում Գերմանիայի մշտական ներկայացուցիչ Պետեր Վիթթինգը հայտնել է, որ իրենց առաջարկը լայն աջակցություն է ստացել:

Երեկ արաբական երկրները վերջնագրի կարգով պահանջեցին Սիրիայի իշխանություններից անմիջապես դադարեցնել արյունահեղությունը և երկիր թողել օտարերկրյա դիտորդների: Եթե առաջիկա երեք օրերի ընթացքում դա տեղի չունենա, Արաբական երկրների լիգան պատրաստվում է Սիրիայի դեմ կիրառել տնտեսական և դիվանագիտական պատժամիջոցներ:

Վաղը` Նոյեմբերի 18-ին, ժամը 12:00‑ին, «Վարկած» ակումբի հյուրն է լինելու քաղաքագետ Հմայակ Հովհաննիսյանը:
Թեման` Ներքաղաքական զարգացումները.

Արարատի մարզում, նոյեմբերի 16-ին, հրդեհ է բռնկվել Արարատ քաղաքի Խանջյան փողոցի թիվ 26 շենքի մոտակայքում գտնվող խանութում (ճշտված` կարի արտադրամասում):

Հայաստանի ԱԻՆ փրկարար ծառայությունից հայտնում են, որ հրդեհը մեկուսացվել էր  ժամը 08.40-ին: Այսօր ստացված տեղեկատվությամբ, հրդեհը մարվել է ժամը 09.03-ին:

Այրվել են Ա. Պողոսյանին պատկանող արտադրամասի երեսապատումը` 30 քմ մակերեսով, 3 կարի մեքենա, 1 բազմոց, 1 սեղան, 2 խմ փայտ:

Տոնի պատմությունը սկիզբ է առել Չեխոսլովակիայում։ 1939թ. հոկտեմբերի 28-ին Պրահայի ուսանողները և դասախոսները դուրս էին եկել ցույցի՝ նշելու Չեխոսլովակիայի կազմավորման տարեդարձը։ Ֆաշիստ զավթիչների կողմից ցույցը դաժանաբար ճնշվեց, որի ժամանակ սպանվեց ուսանող Յան Օպլետալը։ Յանի թաղման օրը՝ նոյեմբերի 15-ը, նույնպես վերածվեց բողոքի մեծ ցույցի, ինչի ժամանակ տասնյակ ցուցարարներ ձերբակալվեցին։

Նոյեմբերի 17-ի վաղ առավոտյան ֆաշիստական ուժերը շրջափակեցին ուսանողական հանրակացարանները, ձերբակալվեց ավելի քան 1200 ուսանող։ Ուսանողական շարժման 9 ակտիվիստներ գնդակահարվեցին։ Հիտլերի հրամանով Չեխոսլովակիայի բոլոր բարձրագույն ուսումնական հաստատությունները փակվեցին մինչև պատերազմի ավարտը։

Հետագայում արդեն Ուսանողների համաշխարհային կոնգրեսը Նոյեմբերի 17-ը հռչակեց որպես Ուսանողների միջազգային օր։

Հայաստանի երիտասարդական հիմնադրամը շնորհավորում է բոլոր ուսանողներին միջազգային օրվա առթիվ։ Պետության զարգացման գործընթացում մեծապես կարևորվում է ուսանողների դերը, քանի որ բանիմաց, կիրթ ու բարձր արժեքների վրա հիմնված ուսանողներն են մեր երկրի ապագան։ Առանց ուսանողների մասնակցության, առանց նրանց ուժի ու եռանդի անհնար կլինի արդյունավետ լուծում տալ պետության առաջ ծառացած շատ խնդիրների։ Հայաստանի երիտասարդական հիմնադրամն իր ծրագրերով ու գործունեությամբ մշտապես աջակցելու է ուսանողներին՝ նրանց ներուժն ու կարողությունները ներգրավելով բազմաթիվ խնդիրների լուծման գործում։

Այսօր` նոյեմբերի 17-ի ժամը 07.00-ի դրությամբ, ձնաբքի եւ մերկասառույցի պատճառով անանցանելի է Գեղարքունիքի մարզի Սոթք գյուղից դեպի Քարվաճառ տանող ավտոճանապարհը: