ՀՀ տրանսպորտի և կապի նախարարության լրատվական ծառայությունից տեղեկացնում են, որ նոյեմբերի 29-ի, ժամը 13.00-ի դրությամբ, hանրապետության ողջ տարածքում առանց տեղումների եղանակ է:

Սաստիկ բքի և վատ տեսանելիության պատճառով փակվել է Բերդ-Ճամբարակ ճանապարհահատվածը:

Իրականացվում են մաքրման աշխատանքներ:

Հանրապետության մյուս բոլոր ճանապարհները երթևեկելի են:

Հայաստանի պաշտպանության նախարար Սեյրան Օհանյանն այսօր` նոյեմբերի 29-ին, ընդունել է ԵԱՀԿ Մինսկի խմբի համանախագահներ Բեռնար Ֆասիեին, Ռոբերտ Բրադկեին, Իգոր Պոպովին եւ ԵԱՀԿ գործող նախագահի անձնական ներկայացուցիչ Անջեյ Կասպրչիկին եւ նրանց ներկայացրել իրավիճակը շփման գծում:

ՊՆ մամուլի ծառայությունից  հայտնում են, որ Բեռնար Ֆասիեն ներկայացրել է Մինսկի խմբի ֆրանսիացի համանախագահի պաշտոնում իրեն փոխարինող Ժակ Ֆորին, ում Սեյրան Օհանյանը շնորհավորել եւ մաղթել է արգասաբեր աշխատանք:

Հանդիպման ընթացքում համանախագահները Հայաստանի պաշտպանության նախարարին են ներկայացրել ղարաբաղյան խնդրի կարգավորման շուրջ բանակցային գործընթացի ընթացքը եւ ընդգծել հրադադարի ռեժիմի պահպանման կարեւորությունը` միաժամանակ փաստելով, որ շփման գծում արձանագրվող միջադեպերը ցույց են տալիս, որ անհրաժեշտ է ներդնել միջադեպերի միջազգային հետաքննության գործուն մեխանիզմներ:

Պաշտպանության նախարար Սեյրան Օհանյանը ներկայացրել է իրադրությունը հայկական եւ ադրբեջանական զորքերի շփման գծում` նշելով, որ ադրբեջանական դիպուկահարների սադրանքները վտանգում են հակամարտության կողմերի միջեւ փոխվստահության մթնոլորտ ձեւավորելու Մինսկի խմբի համանախագահների ջանքները:

Նորվեգիայում այս տարի ունեցած երկու  ահաբեկչությունների հեղինակ Անդերս Բրեյվիկը առողջական վիճակի պատճառով չի կարող կանգնել դատարանի առաջ:

Հոգեբանական փորձաքննությունը հաստատել է, որ Բրեյվիկն անմեղսունակ է:

Ավելի վաղ հաղորդվում էր, որ հոգեբանները միասնական եզրակացության են եկել Բերյվիկի առողջական վիճակի հետ կապված:

Բրեյվիկի գործով դատավարությունը տեղի կունենա 2012-ի ապրիլի 16-ին:

Հիշեցնենք, որ Հուլիսի 22-ին Նորվեգիայում տեղի ունեցած կրկնակի ահաբեկչության զոհ է դարձել 77 մարդ:

վաղ հաղորդվում էր, որ հոգեբանները միասնական եզրակացության են եկել Բերյվիկի առողջական վիճակի հետ կապված:

Բրեյվիկի գործով դատավարությունը տեղի կունենա 2012-ի ապրիլի 16-ին:

Հիշեցնենք, որ Հուլիսի 22-ին Նորվեգիայում տեղի ունեցած կրկնակի ահաբեկչության զոհ է դարձել 77 մարդ:

Իրանում հակաբրիտանական ցույց կազմակերպած ուսանողները ներխուժել են Թեհրանում Մեծ Բրիտանիայի դեսպանատուն։

Ինչպես տեղեկացնում է Agence France-Presse գործակալությունը, ցուցարարներն իջեցրել են Մեծ Բրիտանիայի դրոշը և փոխարենը բարձրացրել Իրանի դրոշը։ Բացի այդ, ցուցարարները հանել են դեսպանատան պատից կախված Մեծ Բրիտանիայի թագուհի Ելիզավետա Երկրորդի լուսանկարը։

Այլ մանրամասներ առայժմ չեն հաղորդվում։

Հիշեցնենք, որ օրեր առաջ Իրանի խորհրդարանը կողմ է քվերակել Մեծ Բրիտանիայի հետ դիվանագիտական հարաբերությունները գործերի ժամանակավոր հավարտարմատարի մակարդակի իջեցնելուն: Որոշման համաձայն, որն ավելի ուշ հաստատել էր նաև Սահմանադրական խորհուրդը, Թեհրանում Մեծ Բրիտանիայի դեսպանը 2 շաբաթվա ընթացքում պետք է լքի Իրանի տարածքը:
Իրանի խորհրդարանը նման քայլով պատասխանել է Լոնդոնի` Իրանի դեմ ուղղված պատժամիջոցներին:

Հայաստանի ֆինանսական շուկայում ամերիկյան դոլարի փոխարժեքի անկման տեմպերը էապես արագացել են: Այսօր` նոյեմբերի 29-ին դոլարի միջին փոխարժեքը «ՆԱՍԴԱՔՕԷՄԷՔՍ Արմենիա» բորսայում կազմել է 381.92 դրամ` երեկվա 383 դրամի համեմատ:

Ընդ որում` դոլարը գործնականում պահանջարկ չի վայելում, վաճառվել է ընդամենը 750 հազ. դոլար:

Կանխիկ արտարժույթի շուկայում դոլարն էժանացել է 1 դրամով: Այսօր արդեն կարելի է փոխանակման կետերից դոլար գնել 383 դրամով, իսկ դոլարի առքը փոխանակման կետերն իրականացնում են 380 կամ 381 դրամով:

Հայ-ադրբեջանական սահմանագոտու Իջեւան-Ղազախ հատվածում` Կայան գյուղի մերձակայքում, նոյեմբերի 29-ին տեղի է ունեցել ԵԱՀԿ հերթական դիտարկումը:  Լեռնային Ղարաբաղի հանրապետության ԱԳՆ-ից հայտնեցին, որ հայաստանյան հատվածից դիտարկմանը մասնակցել են ԵԱՀԿ գործող նախագահի անձնական ներկայացուցիչ Անջեյ Կասպրչիկը, ԵԱՀԿ գործող նախագահի անձնական ներկայացուցչի գրասենյակի համակարգող Իմրե Պալատինուսը, դաշտային օգնականներ Խրիստո Խրիստովը եւ Մարիուս Պուոձինուսը:

Դիտարկման ընթացքում Հայաստանում գտնվող ԵԱՀԿ Մինսկի խմբի համանախագահները ոտքով հատել են հայ-ադրբեջանական սահմանագիծը:

Մինչ դիտարկումը Տավուշի մարզպետարանում կայացած բրիֆինգի ընթացքում քննարկվել են հայ-ադրբեջանական շփման գծում տիրող իրավիճակը, հրադադարի ռեժիմի խախտումներին եւ ադրբեջանական դիպուկահարների գործողություններին վերաբերող հարցեր:

Դիտարկումն անցել է առանց միջադեպերի:

Սյունիքի մարզում Մ-2 հանրապետական նշանակության ճանապարհի Ուժանիս — Եղվարդ հատվածում տեղի է ունեցել փլուզում: Եղվարդ գյուղից 1.3 կմ հեռավորության վրա տեղի է ունեցել հողային զանգվածի փլուզում` 14.7 մետր երկարությամբ:

ԱԻՆ –ի «Սեյսմիկ պաշտպանության հարավային ծառայության» աշխատակիցները շտապ գործուղվել են նշված գոտի:

Ճանապարհի երթևեկելի մասը դարձել է անանցանելի  ավտոտրանսպորտի համար:

Հաղորդվում է, որ Ճանապարհի ընդհանուր լայնությունը փլուզման գոտում մոտ 6.2 մետր է, իսկ փլուզումից հետո այն նեղացել է մինչև 4.7 մետր: Փլուզման հետևանքով հողային զանգվածի հետ տեղահանվել են ծառեր և թփեր:

Հայ-վրացական հարաբերությունները ոչ միայն բարեկամական են, այլեւ` պրագմատիկ: Այսօր` նոյեմբերի 29-ին, Թբիլիսիում հայտարարել է Վրաստանի նախագահ Միխայիլ Սահակաշվիլին` Հայաստանի նախագահ Սերժ Սարգսյանի հետ համատեղ ասուլիսում:

«Մեր հարաբերություններում որեւէ խնդիր չկա: Մեզ համար կենսականորեն կարեւոր է, որ Հայաստանը լինի ինքնուրույն, վստահ, ուժեղ երկիր, որը նաեւ Վրաստանը հուսալի գործընկերն է»,- ընդգծեց նա:

Վրաստանի նախագահը նաեւ նշեց, որ հայ-վրացական հարաբերությունների բարելավումն այս տարիներին բացառիկ է, այդօրինակ կոնտակտներ չեն եղել ոչ միայն ցարական շրջանում, այլեւ խորհրդային տարիներին: Միայն վերջին տարվա ընթացքում 600 հազար Հայաստանի քաղաքացիներ հատել են Վրաստանի սահմանը: Դա նշանակում է, որ Հայաստանի բնակչության զգալի մասը օգտվում է հայ-վրացական սահմանից:

Սահակաշվիլիի խոսքով, լուրջ քայլեր են ձեռնարկվում հայ-վրացական հարաբերությունները էլ ավելի բարելավելու նպատակով, եւ այդ նպատակին կծառայի Հայաստանի ԱԱԾ-ի եւ Վրաստանի ՆԳՆ-ի միջեւ ստորագրված «սահմանային համագործակցության մասին» փաստաթուղթը: Ըստ Վրաստանի նախագահի, այդ փաստաթուղթը լրջորեն կհեշտացնի հայ-վրացական հարաբերությունները, քանի որ սահմանակետում Հայաստանից եւ Վրաստանից եկողները ստիպված չեն լինի ժամերով սպասել: Այսուհետ նրանք կսպասեն շատ քիչ, ստիպված չեն լինի սահմանի երկու կողմերում էլ գումար վճարել, անգամ մեքենաներից դուրս չեն գա, բյուրոկրատիան:

Սահակաշվիլին բարեկամական հարաբերությունների մասին խոսելիս հիշեցրեց, որ օգոստոսյան պատերազմից հետո Հայաստանն առաջիններից էր որ ձեռք մեկնեց Վրաստանին:

Ըստ Սահակաշվիլիի հարաբերությունները թեւակոխել են որակական նոր փուլ:

«Հայ վրացական հարաբերություններում չկա որեւէ խնդիր, որը չկարողանանք լուծել, այդ հարաբերությունները կարելի է անվանել լավագույն բարեկամական հարաբերությունները, որ կարող են ունենալ երկու հարեւան երկրները»,- ասաց նա` ընդգծելով Հայաստանի նախագահ Սերժ Սարգսյանի ավանդը հարաբերությունների բարելավման գործում:

Սահակաշվիլին խոսել է միասնական տնտեսական տարածքի ստեղծման հնարավորության մասին` շեշտելով, որ դա նոր որակի հարաբերություններ ստեղծելու նախադրյալներ կստեղծի, եւ խնդիրներն ավելի հեշտ կլինի լուծել:

«Հայկական ժամանակ»-ը գրում է, որ Ազգային ժողովի փոխնախագահ է դառնալու Հանրապետական կուսակցության խոսնակ Էդուարդ Շարմազանովը։ Սույն որոշումը ՀՀԿ-ում արդեն հաստատված է, և փոխնախագահի ընտրությունը կայանալու է դեկտեմբերի 5-ի հերթական քառօրյայում։

Նույն օրը ԱԺ ՀՀԿ-ական փոխնախագահ Սամվել Նիկոյանը կդառնա ԱԺ նախագահ։ ԱԺ նախագահի և փոխնախագահի ընտրությունները լինելու են փակ, գաղտնի։ ՀՀ իրազեկ աղբյուրները հայտնում են, որ սույն որոշումները կայացվել են անցած հինգշաբթի անցկացված ՀՀԿ գործկոմի նիստի ժամանակ։ Ըստ նույն աղբյուրների՝ ԱԺ փոխնախագահի պաշտոնում քննարկվել է նաև ՀՀԿ-ական Հերմինե Նաղդալյանի թեկնածությունը։ Սերժ Սարգսյանը, սակայն, կտրականապես դեմ է արտահայտվել Նաղդալյանի թեկնածությանը, նշելով, թե՝ դեռ հարց է, նա հաջորդ խորհրդարանում ՀՀԿ-ի ցուցակում կլինի՞, թե՝ ոչ։