Այսօր Քրեական գործերով վերաքննիչ դատարանն արդարացրեց «Շանթ» ընկերության  սեփականատեր Մանվել Ղարիբյանին, որի դեմ եղբայրը`Վարշամ- Յուրա Ղարիբյանը տարիներ շարունակ դատական գործեր է հարուցում` փորձելով քաշքշուկների միջոցով համատեղ բիզնեսում  իր կատարած ապօրինությունները կոծկել:

Այսօր դատարանը` (նախագահող դատավոր Սերժիկ Ավետիսյան ) ուժի մեջ թողեց Աջափնյակ և Դավթաշեն ընդհանուր իրավասության դատարանի կայացրած դատավճիռը և ՀՀ Քրեական օրենսգրքի 393 և 394  հոդվածների հիման վրա այն թողեց անփոփոխ, մերժելով մեղադրողի, և տուժող Վարշամ Ղարիբյանի պաշտպանների ներկայացրած վերաքննիչ բողոքները:

Դատավարությանը կրկին չէին ներկայացել տուժող Վ. Ղարիբյանն ու իր ներկայացուցիչներից մեկը` Ա. Շահբազյանը:

Հիշեցնենք, որ մեղադրանքի հիմքում կրտսեր եղբոր այն պնդումն էր, թե ավագը, եղբայրական կապերի օգտագործմամբ չարաշահելով իր վստահությունը, 2005թ. սեպտեմբեր — նոյեմբեր ամիսների ընթացքում «Շանթ Պլյուս» ՍՊ անունով կատարել է մի շարք գործարքներ և ձեռք բերել տրանսպորտային միջոցներ`(Կամազ 5511 մակնիշի և Մերսեդես Բենց 220-S-430)` վերջինիս պատճառելով 16.800.000 ՀՀ դրամ արժողությամբ գույքային վնաս` հափշտակելով Վարշամ Ղարիբյանի կողմից գնված ավտոմեքենաները:
Դատավարությունը, որ տևել է մեկ տարի ութ ամիս, իր վերաքննիչ փուլում ավարտելու կապակցությամբ  դատարանը դիմեց երկու կողմին էլ, թե արդյո՞ք որևէ ասելիք ունեն: Պարզվեց որ, մեղադրող դատախազ Ավագյանն ու Վարշամ Ղարիբյանի պաշտպան Շահվերդյանը որևէ առարկություն չունեին:

Իսկ ահա ամբաստանյալ համարվող Մանվել Ղարիբյանի պաշտպան Բագրատ Վարդանյանը դատարանին դիմեց ևս մեկ միջնորդությամբ. նա ներկայացրեց Կամազ 5511 մակնիշի ավտոմեքենայի ֆոտոներ, որոնք չկային քննվող գործերի մեջ և դրան կից երկու էջից բաղկացած արձանագրություն, որտեղ ասվում էր , թե Վարշամ Ղարիբյանը պետք է եղբորը վերադարձներ նկարում պատկերված ավտոմեքենան, այդպես էլ նա արել է, սակայն հետ վերադարձված ավտոմեքենան ամբողջովին թալանված վիճակում է, և այդ լուսանկարները հենց դա են ապացուցում:

Մեղադրող Ավագյանը, շտապեց առարկել թե այս գործի հետ նկարները որևէ կապ չունեն: Պաշտպան Շահվերդյանն էլ հավելեց, թե արձանագրության դեմ ոչինչ չունի ասելու, սակայն չկա հստակ ապացույց, որ այս լուսանկարները հենց այդ նույն ավտոմեքենայի լուսանկարներն են:

Դատարանը որոշեց միջնորդությունը բավարարել մասնակի, այն է` արձանագրությունը կցել գործին, իսկ լուսանկարները`ոչ:

Աննա Ալեքսանյան

Ադրբեջանական Trend լրատվական գործակալության փոխանցմամբ՝ 2012 թվականի սկզբին Ադրբեջանի պաշտպանության նախարար Սաֆար Աբիևն այցելելու է Իրան։ Այս մասին հայտարարել է Իրանում Ադրբեջանի ռազմական կցորդ Մեհման Սուլեյմանովը։

Վերջինիս խոսքերով՝ Սաֆար Աբիևն իր իրանցի գործընկեր Ահմադ Վահիդիի հետ հանդիպման ժամանակ քննարկելու է ռազմական ոլորտում ադրբեջանա-իրանական համագործակցության հարցը. «Ադրբեջանի ու Իրանի պաշտպանության նախարարներն ամեն տարի հանդիպում են միմյանց։ Այդ հանդիպումներն ուղղված են երկու երկրների փոխհարաբերությունների ընդլայնմանը, ինչը մասնավորապես վերաբերում է ռազմական ոլորտին։
Ադրբեջանի կառավարությունը շահագրգռված է բոլոր ոլորտներում, այդ թվում նաև ռազմական ոլորտում Իրանի հետ համագործակցության զարգացմամբ։ Ադրբեջանա-իրանական կապերի զարգացման համար առկա է մեծ պոտենցիալ, և երկու երկրները պետք է օգտվեն այդ հնարավորությունից»

Հայ առաքելական եկեղեցին դեկտեմբերի 3-ին, տոնախմբելու է սուրբ Թադեոս եւ սուրբ Բարդուղիմեոս առաքյալների հիշատակը:

Տոնի առիթով, դեկտեմբերի 2-ին, երեկոյան ժամերգությանը եւ նախատոնակին, Սուրբ Էջմիածնի Մայր Տաճար կբերվեն Մայր Աթոռի Գանձատանը պահվող սուրբ Թադեոս եւ Բարդուղիմեոս առաքյալների մասունքները:

Դեկտեմբերի 3-ին, Մայր Տաճարում կմատուցվի սուրբ պատարագ: Այս ընթացքում հոգեւորաց դասն ու հավատացյալ ժողովուրդը հնարավորություն կունենան իրենց խոնարհումը բերել առաքյալների մասունքներին:Այս մասին տեղեկացնում է Մայր Աթոռը:

ՀՀ Ազգային Ժողովի մշտական հանձնաժողովներից ու պատգամավորներից, 2012 թ. բյուջեի նախագծում փոփոխություն կատարելու վերաբերյալ Հայաստանի կառավարությունը ստացել է մոտ 500 առաջարկություն, որոնցից 135-ը լրիվ կամ մասնակի ընդունվել են:

Այսօր կառավարության նիստի ընթացքում տեղեկացրեց ՀՀ ֆինանսների նախարար Վաչե Գաբրիելյանը, նշելով, որ առաջարկներ են ստացել բոլոր քաղաքական կուսակցություններից ու խմբավորումներից:

Ըստ Վ. Գաբրիելյանի` պատգամավորները ներկայացրել են եկամտային մասն ավելացնելու 1.1 տրլն դրամի առաջարկություն, որոնք սակայն հիմնավորված չեն եղել և մերժվել են: Չնայած նրան, որ մերժվել են բոլոր այն առաջարկները, որոնք վերաբերում են բյուջեի եկամտային մասի ավելացմանը, փոխարժեքի փոփոխության հետ կապված` 1.6 մլրդ դրամի ավելացում բյուջեի եկամտային մասում կատարվել է:

Այսպիսով` կառավարությունը պետական բյուջեն խորհրդարանի հաստատմանը կներկայացնի հետեւյալ հիմնական ցուցանիշներով. եկամուտներ` 911.6 մլրդ դրամ, ծախսեր` 1 տրլն 41.1 մլրդ դրամ, դեֆիցիտ` 132.5 մլրդ դրամ:

Նշենք, որ 1.6 մլրդ դրամով ավելացվել է նաեւ բյուջեի ծախսային մասը:

Այսօր երեկոյան Ազգային Ժողովի նոր նախագահի եւ փոխնախագահի թեկնածությունները քննարկվելու նպատակով կուսակցության գործադիր մարմնի եւ խորհրդի նիստեր է գումարելու Հայաստանի հանրապետական կուսակցությունը: Նիստը նախագահելու է Սերժ Սարգսյանը:

ՀՀԿ-ում որոշում է կայացվել, Սամվել Նիկոյանը կգլխավորի խորհրդարանը, իսկ փոխնախագահ է նշանակվելու ՀՀԿ խմբակցության քարտուղար Էդուարդ Շարմազանովը:

«Վարկած» մամուլի ակումբում այսօր ասուլիսի մասնակից ՁԻԱՀ- ի կանխարգելման հանրապետական կենտրոնի Համաճարակային հսկման բաժնի պետ Արշակ Պապոյանն ասաց, թե` որ մեր հանրապետությունում   քաղաքացիների շրջանում դեկտեմբերի մեկի դրությամբ կա գրանցված 1136 ՄԻԱՎ վարակի դեպք, ընդ որում դրանցից 165-ը  գրանցվել է այս տարվա 11 ամիսների ընթացքում,  ապա պարզաբանեց, որ դա չի նշանակում, թե այդ մարդիկ այս տարի են վարակվել, պարզապես նրանց հիվանդ լինելու փաստը  այս տարի է արձանագրվել:

Նա տեղեկացրեց, որ  գրանցվել է հիվանդների 20 մահ: Նոր արձանագրված դեպքերի մոտ 57 տոկոսը  հիմնականում  25 — 39 տարիքային սահմաններում է, որոնցից 70 տոկոսն արական սեռի ներկայացուցիչների մոտ է հայտնաբերվել:

Կենտրոնի ներկայացուցիչները հիշեցրեցին, որ  վարակը հիմնականում փոխանցվում է թմրամիջոցների ներարկային օգտագործման միջոցով  և հետերոսեքսուալ սեռական ճանապարհով:

Հաշվի առնելով այն, որ  հիվանդությունն ունի երկարատև գաղտնի շրջան, մարդիկ կարող են 8 -10 տարի իրենց առողջ զգալ և անգամ չիմանալ, որ իրենք վարակված են։

Պապոյանն ասաց, ներկայացվող թիվը չի կարող արտացոլել հիվանդության ամբողջական պատկերը, և ոչ միայն մեր երկրում. բացի արձանագրված դեպքերից, միշտ կան  որոշակի թվով մարդիկ, ովքեր կարող են  վարակված լինել և չիմանալ  այդ մասին, ուստի բացի արձանագրված թվերից, կան հաշվարկային տվյալներ,  ըստ որոնց` ՄԻԱՎ-ով ապրող մարդկանց թիվը հասնում 2500-ի: «Սակայն ՄԻԱՎ-ով վարակվելու դեպքում հարցը միայն գիտելիքին չի վերաբերվում, փորձը ցույց է տալիս, որ հաճախ մարդիկ իրազեկված լինելով, այնուամենայնիվ չեն դրսևորում առավել անվտանգ վարքագիծ»,-ասաց Պապոյանը:

ՁԻԱՀ- ի կանխարգելման հանրապետական կենտրոնի «Ձիահի դեմ պայքարի» բաժնի վարիչ Ժաննետա Պետրոսյանն էլ նշեց, որ վերջին 3 — 4 տարիների ընթացքում արձանագրվող դեպքերի թիվն ավելացել է.  այդ ժամանակահատվածում մեզ մոտ արձանագրվել է եղած դեպքերի կեսից ավելին, և դա պայմանավորված է  նրանով, որ  զգալիորեն ընդլայնվել են բնակչության տարբեր խմբերի համար ՄԻԱՎ-ի վերաբերյալ խորհրդատվությունը, հետազոտությունների թիվը: Այսօր հետազոտվում է հղիների գրեթե 95 տոկոսը, այսինքն` բարելավվել է  ախտորոշման հետ կապված հարցերը:

Ամբողջ աշխարհում 2010-ի համեմատ, նոր դեպքերի թիվը զգալիորեն նվազել է: Աշխարհի մակարդակով նվազել է նաև մահացությունը և ՄԱԻՎ-ով տառապող մարդկանց թիվն այսօր  հաշվվում է 34 միլիոն:

Իհարկե, շատ ավելի արդյունավետ տարբերակ կլիներ, եթե կիրառվեր թեստային տարբերակով ախտորոշումը, սակայն դեռևս նման մեթոդ չի կիրառվում, և ոչ միայն մեզանում:

«Մեր կառավարությունը  համապատասխան ֆինանսական միջոցներ  չի տրամադրում»-, իր հերթին,  անդրադառանլով ՁԻԱՀ-ի հիմնախնդիրներին, ասաց «Հանրային տեղեկատվություն և գիտելիքի կարիք» ՀԿ-ի նախագահ Մամիկոն Հովսեփյանը:

Ըստ նրա հիմնական ֆինանսավորումը կատարում է համաշխարհային բանկը, ինչպես նաև դեղեր է տրամադրում: Իսկ այս տարի մեր երկրում ավելացել է հիվանդների քանակը, սակայն ֆինանսավորումը մնացել է նույնը:

ՀՀ կառավարությունն այսօր հավանություն տվեց պատգամավոր Վիկտոր Դալլաքյանի օրենսդրական նախաձեռնությանը` մանկապիղծների նկատմամբ որպես պատիժ կիրառել ամլացումը: Սակայն այն պետք է լինի կամավոր սկզբունքով:

Ըստ ամլացման մասին կարգի մանկապիղծը նախ պետք է կրի իր պատիժը, որից հետո պետք է հատուկ փորձաքննություն անցնի: Եթե փորձաքննությունը եզրակացնի, որ նա վտանգ է ներկայացնում հանրության համար, ապա կալանավանյրից դուրս գալուց հետո պետք է կամ հարկադիր բուժում անցնի, կամ ամլացվի: Ամլացումը պետք է լինի քիմիական եղանակով հիվանդին հորմոններ ներարկելու միջոցով:

Իսկ լրագրողների հետ ճեպազրույցում այսօր ՀՀ արդարադատության նախարար Հրայր Թովմասյանն ասաց, որ Հայաստանում մանկապղծության աճ կա: «Միգուցե նախկինում քողարկված է եղել հանցագործության այս տեսակը, փորձել են թաքցնել եւ ծնողները, եւ երեխաները: Սակայն հրապարակայնությանը զուգահեռ նման տիպի հանցագործությունները դառնում են հանրության սեփականություն: Չեմ բացառում, որ աճը դրա հետ կապված լինի` այսինքն իրական աճ չունենանք, սակայն իրազեկվածության աստիճանն ավելի բարձր լինի»,- ասաց Հ. Թովմասյանը:

Դարձյալ մեկ դատական հայց է սպասվում բարի համբավի արատավորման թեմայով. այսօր «Լև գրուպ» իրավաբանական ընկերության տնօրեն Լևոն Բաղդասարյանն լրագրողների հետ հանդիպմանը հայտարարեց, որ «Արմֆուդ» ֆիրմային հասցրած վնասը փոխհատուցելու պահանջով առաջիկա օրերին դիմելու են դատարան:

««Արմֆուդ» ընկերության արտադրած կաթի մեջ ստաֆիլակոկ չկա, և հարցի շուրջ բարձրացրած աղմուկը վնասել է ընկերության հեղինակությանը»,- ասաց նա:

«Սույն թ.-ի նոյեմբերի 4-ին հեռուստատեսության տարբեր ալիքներով ՀՀ գյուղնախարարության համապատասխան ստորաբաժանման անունից հանրությանը տեղեկացվեց, թե իբր քաղաքացու կողմից իրենց ներկայացված, խանութից գնված կաթի մեջ հայտնաբերվել է «ստաֆիլոկոկ» բակտերինա, որը պատկանում է «Արմֆուդ» ֆիրմային անվանումը կրող «Էյ-էս.Բի սոֆտ» ընկերությանը: Այդ հայտարարությունից անմիջապես հետո նույն փորձարարական լաբորատորիային, ինչպես նաև այլ լաբորատորիաներին են ուղարկվել «Արմֆուդի» կաթի նմուշները, ինչպես հում, այնպես էլ պաստելիազացված վիճակում: Տեղեկացնում եմ Ձեզ և ներկաներին եմ տրամադրում փորձարկման արձանագրությունները, համաձայն որի՝ կաթի մեջ բացակայում է «ստաֆիլոկոկ» բակտերիան»,- «Լեվ գրուպի» տնօրենը:

«Արմֆուդ» ընկերության տնօրեն Բորիս Սողոմոնյանի կարծիքով Սննդամթերքի անվտնագության պետական տեսչության պետ Աբրահամ Բախչագուլյանին պետք էր շոու սարքել. «Բախչագուլյանի 100 օրը լրանում էր, և նա պետք է ցույց տար, թե ինչ-որ բաներ է անում»,– հայտարարեց տնօրենը: Սակայն չհստակեցրեց թե ինչո՞ւ է ընտրվել հենց իրենց ընկերությունը:

Բաղդասարյանը համակարծիք էր տնօրենի հետ. հայտարարությունը վնասել է ընկերության բարի համբավը և ընդամենը շոու է «Արմֆուդ»-ին շուկայից դուրս մղելու համար: Չնայած իրենց հայտարարություններին «Լեվ գրուպի» տնօրենը չժխտեց, որ արտադրության մեջ կարող են լինել բազմաթիվ բացթողումներ: Ասել կուզի`չոփ եղել է, բայց գերան են սարքել:

«ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը 2013թ. Հայաստանում կայանալիք նախագահական ընտրություններին մասնակցելու քաղաքական հավակնություններ չունի: Ի պատասխան մամուլի հրապարակունմերի «ՎիվաՍել-ՄՏՍ»-ի մամուլի ծառայությունը հաղորդագրություն է  տարածել.

«CNews» լրատվամիջոցը, նոյեմբերի 29-ին հրապարակել է «ՄՏՍ ընկերությունը Հայաստանի պոտենցիալ նախագահին վարկավորել է 90 միլիոն ամերիկյան դոլար գումարով» վերնագրով հոդված, որով տարածվել է կեղծ տեղեկատվություն` հղում կատարելով «շուկայի մասնակիցներին» եւ «մրցակիցներից մեկի ներքին աղբյուրին»:

Հոդվածում, մասնավորապես, նշվում է, իբրեւ թե «Ղ-Տելեկոմ» Ընկերության («ՎիվաՍել-ՄՏՍ» ապրանքային նշան) գլխավոր տնօրեն Ռալֆ Յիրիկյանը 2013թ. Հայաստանում կայանալիք նախագահական ընտրություններին մասնակցելու քաղաքական հավակնություններ ունի, եւ այդ նպատակով «Մոբիլնիե Տելեսիստեմի» ընկերությունը (ՄՏՍ) նրան ֆինանսական աջակցություն է ցուցաբերում: Բացի այդ, հոդվածում նշվում է, թե իբր Ընկերության կողմից բարեգործական գործունեության իրականացման համար օգտագործվող միջոցների աղբյուր կարող են հանդիսանալ Լիբանանի հայկական համայնքի կողմից հավաքված միջոցները:

Կարելի է միայն ենթադրել, թե ովքեր են կեղծ տեղեկատվությունը տարածող «շուկայի մասնակիցները» եւ «մրցակիցներից մեկի ներքին աղբյուրը», եւ թե հատկապես ինչ նպատակներ են նրանք հետապնդում: Ենթադրյալ մրցակիցների նմանատիպ գործողություններն անպարկեշտ են, անազնիվ եւ միանգամայն անընդունելի:

Անգամ առանց վերոհիշյալ տեղեկատվությունը մանրամասն վերլուծելու` հարկ ենք համարում նշել, որ Հայաստանի Հանրապետության Սահմանադրության համաձայն, Նախագահի թեկնածու կարող է լինել վերջին 10 տարում Հայաստանի քաղաքացիություն ունեցող, հանրապետությունում մշտապես բնակվող եւ ընտրական իրավունք ունեցող ֆիզիկական անձը: Ռալֆ Յիրիկյանը ոչ միայն չունի որեւէ քաղաքական պաշտոնի ընտրվելու կամ նշանակվելու քաղաքական հավակնություն, ինչի համար նա հստակ հայտարարել է բազմիցս, այլեւ չի համապատասխանում թեկնածու առաջադրվելու համար պահանջվող չափանիշներից եւ ոչ մեկին:

Ինչ վերաբերում է Ընկերության սոցիալական գործունեությանը, ապա այն իրականացվում է բացառապես Ընկերության միջոցների հաշվին՝ կորպորատիվ սոցիալական պատասխանատվության հաստատված ծրագրի շրջանակներում: Ընկերությունը հպարտ է Հայաստանում գործարար մտածելակերպի նոր մշակույթի ներդրման եւ կորպորատիվ սոցիալական պատասխանատվության խոշոր ծրագրերի իրականացման առաջամարտիկը լինելու համար: Ցավալի է, որ նման նախաձեռնությունները կարող են դառնալ էժանագին եւ անհարիր շահարկումների առարկա»: