ՀՀ Ազգային անվտանգության ծառայությունը տեղեկացնում է.

Ս.թ.   դեկտեմբերի 28-ին  Ազգային անվտանգության մարմինների կողմից կաշառք  ստանալու պահին ձերբակալվել է  Արարատ քաղաքի սոցիալական ծառայությունների  տրամադրման տարածքային  միավորման գլխավոր մասնագետ Արսեն Հովհաննեսյանը:   Քաղաքացի  <Ա>-ին`  օրենքով  սահմանված  կարգով  ամենամսյա  նպաստ  հատկացնելու դիմաց` վերջինս պահանջել  և ստացել է 50.000 դրամ գումար:

Փաստի առթիվ  հարուցված քրեական  գործի նախաքննությունը  կատարում է  ՀՀ ԱԱԾ Քննչական  վարչությունը:

ՀՀ ԱԱԾ Մամուլի կենտրոն

Ոստիկանապետի հրամանով ոստիկանության աշխատակիցներին տարեվերջյան պարգևատրում է հատկացվել 60 հազար դրամի չափով: Պահպանության պետական ծառայության աշխատակիցները, սակայն ստանալու են  20 հազար դրամ, ասել է թե` երեք անգամ պակաս գումար:

Այս փաստը, ի տարբերություն ՊՊԾ աշխատակիցների, ոստիկանության լրատվական վարչության պետ Աշոտ Ահարոնյանը տարօրինակ չհամարեց. Նա տեղեկացրեց, որ ՊՊԾ-ն ինքնաֆինանսավորվող հիմնարկ է և վարչությունն է իր հնարավորությունների սահմանում որոշել գումարի չափը:

Նա ասաց նաև, թե բոլոր ոստիկանները  չէ, որ 60 հազար դրամ են ստացել. միայն շարքայիններն են, որ առանց բացառության ստացել են 60 հազարական դրամ:

«Jose» համալիրի շուրջ տարաբնույթ խոսակցությունները չեն դադարում.

Օրերս ասացին, թե այն վաճառում են, նույնիսկ գինն էին նշել, մինչդեռ համալիրի տնօրենը հավատացնում է, որ այլոց խոսակցություններից է իմացել այդ մասին: Դեռ չի մարել աղմուկը աղմկահարույց պատմության, ակումբի տերերի ու ինչ որ միլիոնավոր դոլարների պարտքի հետ կապված:

Իր այցելությունները սանիկի համալիր չժխտեց նաև Նավասարդ սրբազանը: Հենց այն սանիկի, որը նրան «Բենթլի» էր նվիրել: Այստեղ կարելի է հաճախ տեսնել հանրածանոթ դեմքերի: Չնայած բարձր գներին համալիրը այցելուների խնդիր կարծես թե չունի:

Երեկ  «Jose» համալիրն իր այցելությամբ պատվել է նաև Երևանի քաղաքապետ Տարոն Մարգարյանը, ԿԳ նախարար Արմեն Աշոտյանի և էլի ինչ որ մարդկանց ընկերակցությամբ  մինչև ուշ գիշեր մնալով համալիրի սրահում:

Ֆլորենցիան շարունակում է մնալ ամենամոդայիկ ու ամենաթանկ համալիրը: Չնայած դրան միջոցառումները հաջորդում են մեկմեկու:

Ամանորի գիշերն այստեղ միայն մուտքն արժե 20 հազար դրամ:

Վաղը` դեկտեմբերի 27-ին,այստեղ իր Ամանորյա տոնն է նշելու Արմենիա հեռուստաընկերությունը:

Հիշեցնենք, որ տարեվերջին իր դստեր հարսանյաց հանդեսով սեփական` Ֆլորենցիա համալիրի բացումը կատարեց Երևանի նախկին քաղաքապետ Կարեն Կարապետյանը: Նորապսակների ոտքն էր խերով, թե Ֆլորենցիան իրոք գրավիչ է, բայց նման պահնաջարկը լավ եկամուտ է խոստանում տիրոջը: Այստեղ իր ծննդյան տարեդարձը տոնեց Ամենայն Հայոց Կաթողիկոսը, իր դստեր հարսանիքը կատարեց Երգի պետական թատրոնի ղեկավար Արթուր Գրիգորյանը, Արմնյուզն իր հոբելյանական տոնն անցկացրեց, օրեր առաջ դստեր նշանադրությունը ճոխ նշեց Օջախի Երեմը, աղջկան կնության տալով իր ընկերոջ` Լոնդոնում ուսանած որդուն:

Աշտարակ քաղաքում երեկ երեկոյան տեղի է ունեցել սպանության փորձ:

Մեր ունեցած տեղեկությամբ ավազակային հարձակում է տեղի ունեցել Աշտարակում ոսկու խանութի սեփականատեր, ոսկու բիզնեսով զբաղվող Գագիկ Շաբոյանի վրա:

Երեկ երեկոյան, ժամը 18.25-ին, անհայտ քաղաքացուց ոստիկանության Աշտարակի բաժնում ահազանգ է ստացվել, որ Լինչի փողոցում կրակոցի ձայներ են լսվում: Դեպքի վայր մեկնած օպերատիվ խումբը պարզել է, որ նույն օրը, ժամը 18.20-ի սահմաններում, Լինչի փողոցի թիվ 22 տան մոտ դարանակալած անհայտ անձը հարձակվել է իր տան դարպասը բացող Գագիկ Շաբոյանի վրա, չպարզված առարկայով հարվածներ հասցրել գլխին և մարմնին, պատճառել վնասվածքներ:

Աշտարակցիները պատմում են, թե սա առաջին դեպքը չէ, որ Գագիկ Շաբոյանի նկատմամբ հարձակումներ են տեղի ունենում: նախորդ դեպքերում էլ, ինչպես այս անգամ տուժել են կինը և հարազատները:

Այս անգամ 3 հոգի են հայտնվել հիվանդանոցում: Ըստ ոստիկանության`  հիվանդանոցից հաղորդում է ստացվել, որ իրենց մոտ բուժօգնության են դիմել «գլխուղեղի ցնցում» ախտորոշմամբ 39-ամյա Գագիկ Շաբոյանը, նրա եղբայրը  48-ամյա Հրանտ Շաբոյանը` «աջ կոնքի հրազենային վնասվածք» ախտորոշմամբ և Հրանտի 17-ամյա դուստրը Լիդան՝ «որովայնի հրազենային թափանցող վերք» ախտորոշմամբ:
Դեռևս չպարզված հրազենից Գագիկի հետ հաշիվներ ունեցող անձը երկու կրակոց է արձակվել նրա տան մոտ կայանված, Գագիկին պատկանող՝ «ՎԱԶ-2106» մակնիշի ավտոմեքենայից իջած և նրան օգնության շտապող եղբոր` Հրանտի, և նրա դստեր վրա ու պատճառելով հրազենային վնասվածքներ` դիմել է փախուստի:

Ի դեպ, ինչպես նախորդ անգամներն, այս անգամ էլ, հանցագործներին հաջողվել է փախչել:Աշտարակի բնակիչները կարծում են, որ հարձակման նպատակը հափշտակությունը չէ, այլ ավելի շուտ ինչ որ հաշիվներ` որոնք պարբերաբար, մի քանի անգամ Գագիկին ու նրա մերձավորներին գցել են նման պատմությունների մեջ, ու որ ամենահետաքրիրն է. նախորդ անգամները ևս  հարձակում գործող անձանց հաջողվել է փախչել, ապա նաև խույս տալ արդարադատությունից:

Ոստիկանության Արագածոտնի մարզային քննչական բաժնից տեղեկացնում են, որ փաստի առթիվ` ՀՀ քրեական օրենսգքրի 34 -104 հոդվածի 2-րդ մասի 1-ին կետի և 235 հոդվածի 1-ին մասի հատկանիշներով հարուցվել է քրեական գործ: Կատարվում է նախաքննություն: Այս պահի դրությամբ տուժողների վիճակը կայուն է:

Բազմաթիվ երկրներում խաղողը համարվում է հաջողության, առողջության, ընտանեկան բարօրության  խորհրդանիշը. Օրինակ Իսպանիայում և Պորտուգալիայում Ամանորի գիշերվա հետ կապված հետաքրքիր սովորույթ կա` ժամացույցի յուրաքանչյուր զարկի հետ միաժամանակ ընտանիքի բոլոր անդամները պետք է ուտեն խաղողի մեկական հատիկ և երազանք պահեն:

Տարվա 12 ամիսների համար նրանք ուտում են խաղողի 12 հատիկ և պահում 12 երազանք:Ու որ ամենակարևորն է, հավատում են դրանց:

Այսօր լրագրողների հետ հանդիպել էր Սննդի անվտանգության պետական ծառայության մամլո պատասխանատու Բաբկեն Պիպոյանը, տեղեկացնելու, որ կատարված  ուսումնասիրությունների արդյունքում, Երևանի Կոմիտասի և Գումի շուկաներում հայտնաբերվել են բազմաթիվ խախտումներ, այդ թվում` սատկած խոշոր եղջերավոր անասունների և ձիու մսի վաճառք:

Իհարկե, տուգանվել են. ըստ Պիպոյանի` առաջինի դեպքում 400 հազար դրամով, երկրորդ դեպքում` 300 հազարով, սակայն դրանից պատկերը չի փոխվում:  Ծառայությունը տեղեկացնում է, որ խախտումների համար ընդհանուր տուգանքի չափը գերազանցում է 2 մլն դրամը:

Գյումրեցիները Երևանցիների համեմատ առավել շահեկան վիճակում են. Այնտեղ, ըստ Պիպոյանի ձիու միս չի եղել.
«Տեղական շուկայում ուսումնասիրվել է սառեցված միսը, որն ունեցել է սերտիֆիկատ: Կենդանական ծագման ապրանքները մինչև ՀՀ մտնելը ստուգվում են` ապահովելու համար անվտանգությունը: Սառեցված ապրանքն ունի մեկ տարի պահպանման ժամկետ: Խնդիրն այն է, թե դա արդյո՞ք ժամկետի մեջ է, թե՞ ժամկետանց: Ավելի շատ խախտումներ են արձանագրվում այն դեպքերում, երբ սառեցված միսը փորձում են վաճառել որպես թարմ»,- ասել է Պիպոյանը:

Սառեցրած մսի ժամկետները պետք է ստուգել փաստաթղթերով, սակայն տեսչությունը չի կարող անցնել իր լիազորությունների սահմանը:

Ընդամենը կարող է բավարարվել խորհուրդ տալով` մսի թարմությունը ստուգեք միսը սեղմելով. «Որքան արագ է վերականգնվում միսը, այնքան թարմ է»:

Պիպոյանը կարևորում է քաղաքացու վերաբերմունքը. եթե նա չցանկանա, որ իրեն միս վաճառեն` խախտելով պահպանման կանոնները, ապա դա չի վաճառվի: Շատ տրամաբանական մոտեցում.

Նա անդրադարձավ նաև Նոր տարվա հետ կապված զեղչերին, ըստ բանախոսի դա պայմանավորված  է Ամանորի համար նախատեսված ներկրվող մեծ ծավալի ապրանքներով, որոնք չսպառվելով  դեկտեմբերին, հունվարին կարող են կուտակվելու խնդիր ունենալ ու որպեսզի ապրանքը չփչանա, կատարում են զեղչեր:

Ամանորյա ամենալայն սպառման ապրանքի` օղիների մասին Պիպոյանը մեղմ արտահայտվեց. Այս շուկայում ծառայությունը շուրջ վեց ամիս առաջ է ուսումնասիրություն կատարել, սակայն խնդիրը հայտնի է` Հայաստանում կան օղիներ, որոնք արտաքուստ միմյանց շատ նման են: ՏՄՊՊՀ-ն տուգանքի է ենթարկել Սամվել Ալեքսանյանի ընկերությանը: Սակայն չասաց, որ շարունակվում է  700 և 3000 դրամանոց նույնատիպ օղիների արտադրությունը: Տարբերակումը թողնելով  խմելուց հետո եղած ինքնազգացողությանը` որն անվտանգության տեսչության աշխատակցի համոզմամբ պետք է, որ տարբեր լինի:

Պարոն Վարչապետ,

Հայկական ԶԼՄ-ները արդեն ահազանգում են, որ «Փարիզյան սուրճի» սեփականատեր Վալերի–Աշխեն Գործունյանը հեռանում է Հայաստանից` վաճառելով իր ընկերությունը:

Ինչպես տեղեկանում ենք տիկին Գործունյանի կենդանի խոսքից, նա հեռանում է Հայաստանից` բիզնեսում ունեցած խնդիրների պատճառով, որովհետեւ մեր երկրում բիզնեսի գոյատեւման համար հարկավոր է «կռիշ» եւ որ Հայաստանում քաղաքացին, գործարարը պաշտպանված չեն։

Նրա ղեկավարած ընկերության հարկային պարտավորությունների հետ կապված գոյացել է մեծ պարտք, որը նա համաձայն է վճարել որոշակի ժամանակահատվածի ընթացքում, սակայն երկրիս բյուրոկրատիայի կողմից այդ հնարավորությունը չի տրվել նրան, և, պահանջվել է պարտքը վճարել «24 ժամվա ընթացքում»։

Եւս մեկ հայազգի գործարարը, ով 16 տարի շարունակ Հայաստանում է եւ իր հայրենիքում ներդրել է ոչ միայն փողեր, այլեւ իր կյանքի լավագույն տարիները, ըստ էության խոստովանում է այն անտանելի պայմանների մասին, որոնցում ոչ միայն հնարավոր չէ բիզնես զարգացնել, այլեւ ապրել ու մնալ:

Մի՞թե սա համաշխարհային մեծություն եւ ՀՀ դեսպան Շառլ Ազնավուրի ասած ներքին ցեղասպանության շարունակություն չէ, չնայած որ իշխանությունների ջանադրությամբ պետական լրատվամիջոցով ազդարարվեց, թե մեծն շանսոնյեի խոսքերը սխալ են թարգմանվել: Մի՞թե սա է Հայկական աշխարհը, որտեղից հեռանում են ոչ միայն այս հողի վրա հազարամյակներով ապրած, ստեղծագործած ու պայքարած մարդկանց ժառանգները, այլեւ հայրենադարձ մեր հայրենակիցները, ովքեր առանց ձեր «Արի տուն» կանչի եկել են, բայց սրտի կսկիծով հեռանում են այն ժամանակ երբ Ձեր կառավարությունն է «կանչում»:

Ձեր կառավարության նախարարները վերջին տարիներին ԱԺ-ում օրենքների ընդունման հիմնավորումները ներկայացնելիս անընդհատ շեշտում են բիզնես միջավայրի բարելավման նպատակը, բայց պարզվում է` դրան զուգահեռ գործարարները վկայում են այդ պայմանների վատթարացման մասին:

Խոսում եք հարկային ոլորտի բարեփոխումներից, բայց այդ բարեփոխումների հետեւանքը սա է, երբ մեր երկրիս հարկային մարմինն ու դատարանը փաստացի «անցանկալի անձի» համար երկիրը լքելու ժամանակ են տալիս նաեւ հայրենադարձ գործարարին:

Ձեր գլխավորած կառավարության ընդունած որոշման կատարողները այս օրերին Սյունիքի Քաջարան գյուղի բնակիչներին հորդորում են իրենց նախնիների գերեզմանները առնել ու տեղափոխվել սահմանապահ այդ գյուղից, որպեսզի կառավարության բարեհաճությունը վայելող պղնձամոլիբդենային կոմբինատը (որին 1 տարի առաջ վարկ էլ տվեցիք` ռուսական 500 միլիոն դոլարի պարտքից, որը մենք բոլորս ենք վճարելու) ազգային հարստությունը խտանյութի տեսքով կոպեկներով վաճառի օտարին:

Ձեզանից ոչ մեկ չի էլ հետարքրվում, թե մարդիկ ինչո՞ւ են հեռանում սեփական հայրենիքից: Ձեր իշխանության ներկայացուցիչներն անգամ արդարացնում ու հիմնավորում են դա, որպես ժամանակակակից գլոբալացվող աշխարհի օրինաչափություն, իսկ դուք էլ ժամանակին կատակեցիք այդ թեմայով:

Այս եւ համանուն բազմաթիվ քայլերով մի՞թե իսկապես իրականացնում եք պետության վախճանը, ինչի մասին գրել եք տարիներ առաջ:

Ի՞նչ եք պատրաստվում անել, որ Վալերի–Աշխեն Գործունյանը, նրա նմանները եւ մեր հայրենակիցները մնան Հայաստանում:

Համարեք, որ 24 ժամ ունի ոչ միայն Վալերի–Աշխեն Գործունյանը, այլեւ դուք:

Որովհետեւ եթե նա այդ 24 ժամվա ընթացքում չվճարի իր պարտքը, ապա դրանից հետո ոչ մեկին պետք չի լինի թե Ձեր օգնությունը, թե ձեր տեսությունը եւ թե ձեր կառավարումը:

Ստեփան Սաֆարյան

«Ժառանգություն» խմբակցության ղեկավար

Կյանքի ընթացքում ունեցած ապրումներն անհետ չեն կորչում:Դրանք կուտակվում են օրգանիզմում, հանգեցնում նյարդային համակարգի քայքայման և բացասաբար են ազդում մաշկի վրա:

Կյանքի արդի ռիթմը խիստ նյարդայնացնող է, անհնար է անտեսել գռգռիչ ազդակները: Չնայրդայնանալու համար անհրաժեշտ է խմել անանուխով թեյ և մերսել մաշկը:

Նախապես սառեցրեք երիցուկի և եղեսպակի թուրմը և առավոտյան սառցե բեկորը քսեք մաշկին: Արյան շրջանառությունը վայրկենապես կարգավորվում է, իսկ մաշկը` ձգվում է:

Նյարդային վիճակից կարելի է դուրս գալ նաև հոտավետ բույսեր տեղադրելով տան տարբեր անկյուններում: Կարելի է հաՃախ օգտագործել նաև ընկույզ ու անիսոնային պղպեղ:

Գեղարքունիքի մարզի հիվանդանոցներից լավագույնի համբավ ունի Հրազդանի հիվանդանոցը:

Սևանից ու շրջակա բնակավայրերից բուժման, ծննդաբերելու, բուժզննման, մի խոսքով բոլոր խնդիրներով մարդիկ գնում են Հրազդան:

Չնայած Սևանի հիվանդանոցի բուժղեկավարության ջանքերով պատկերը ահագին փոխվել է, սակայն Հրազդանի հիվանդանոցում թե, սարքավորումները թե, պայմանները անհամեմատ ավելի լավն են քան մյուսներինը:

Ինչով է դա պայմանավորված. մեր ունեցած տեղեկություններով Հրազդանի հիվանդանոցով հետաքրքված է ԱԺ նախկին նախագահ Հովիկ Աբրահամայանը: Նրա հովանավորությամբ է կադրերով ու անհրաժեշտ պարագաներով հարստացվում բուժհիմնարկը: Չենք ուզում հավատալ, որ մարզի մյուս հիվանդանոցների ներկայիս տխուր վիճակը պահապանվում է միտումնավոր, սակայն, որ Հրազդանի հիվանդանոցը, որի մասին նույնիսկ ասում են, թե` արդեն Աբրահամյանի սեփականությունն է, գտնվում է արտոնյալ վիճակում, ակնհայտ է:

Ելնելով ամենատարրական տրամաբանությունից, առաջնայինը պետք է լիներ Սևանի քաղաքային հիվանդանոցը. գտնվելով Ճամբարակ Գավառ, Մարտունի, Դիլիջան բնակավայրերի ճամփաբաժանում, այն կրում է վթարների ժամանակ առաջին բուժօգնության, ամռանը` նաև լճափնյա տարածքում միջադեպերի հետ կապված պատասխանատվության ու ծանրության ողջ բեռը:Սակայն հիվանդանոցին բավարար ուշադրություն այս էլ քանի տարի է, չի հատկացվում:

Հ.Գ.Այսօր ևս ժամը 17.31-ին Գավառ-Սևան ավտոճանապարհի 4-րդ կմ-ում ճանապարհատրանսպորտային պատահար է տեղի ունեցել.բախվել են ԳԱԶԵԼ- ը և էլի երկու ավտոմեքենաներ: Նախնական տվյալներով կա մեկ զոհ և երկու տուժած: