Արաբական երկրներում արձանագրվող զարգացումների մասին հայկական մի շարք լրատվամիջոցներ, ինչպես տարածաշրջանային նմանօրինակ իրադարձությունների դեպքում, շարունակում են առնվազն ոչ ինքնուրույն լրատություն հրապարակել: Ավելի մանրամասնելու համար ասենք, որ միջազգային լրահոսի տրամադրածը ամբողջությամբ վերատպելով, խորքում այդ լրատվամիջոցները կամա-ակամա տվյալ պետության  փոխանցելիք պատգամները հայկական լսարանի հասանելիությունն են ապահովում:

Այս հաստատումը, անշուշտ, չի վերաբերում միայն հայկական զանգվածային լրատվամիջոցներին: Միջազգային լրատվամիջոցների արտադրությունը գրավել են համապատասխան շուկան եւ մշտապես կողմնորոշում են հանրային կարծիքը: Արհեստավարժ, լարված իրադարձության տարողությունը կարող է հազարներով բազմապատկվել կամ նույն չափերով շատ արագ մանրանալ կամ նույնիսկ ամբողջությամբ անուշադրության մատնվել:

Քաղաքականացված լրատվության պարզ տեսություն է սա, որը, թվում է, թե ներկա տեղեկատվական բաց համակարգում պիտի փոխի իր ուղղությունը եւ հաշվի առնի  առարկայական տեղեկատվության պահանջը:

Իրադարձությունների տարողության բազմապատկումն ու մանրացումը միայն քաղաքական ուղղվածությամբ դեպքերի լուսաբանմանը չեն միտված բնականաբար, այլ նախապատրաստում են հանրային կարծիքի ենթահողը` տվյալ պետության ձեռնարկելիք քայլերը ընկալելի դարձնելու առումով:

Եթե անհրաժեշտ է միջազգային միջամտությունը որոշող մի բանաձեւ, ուրեմն պետք է սփռել տիրող իրավիճակի ահավորությունը, հակամարդկայնությունը, աղետալի հավանական հետեւանքները: Այդպես էր, երբ  Իրաքի պատերազմի նախօրեին, անվերջ լուսաբանվում էր քիմիական, կենսաբանական եւ զանգվածային ոչնչացման զենքերը ռազմական միջամտությամբ չեզոքացնելու կոչված գործողությունների  անհետաձգելիության մասին:

Մյուս կողմը, տեղեկատվական հարձակումներից պաշտպանվելու իր հեւքի մեջ, իհարկե, ոչ նույն արհեստավարժությամբ, ցուցադրում, սփռում կամ արծարծում է, այս անգամ միայն ի´ր պետության քաղաքականությանը հարիր նկատածը: Արդյունքը լինում է այն, որ տեղեկատվության դաշտում  ստեղծված բեւեռացումը, բնականաբար, չի  ներկայացնում իրական պատկերը:

Անշուշտ, տեղեկատվական սեւ-սպիտակի այս խաղը միայն տագնապալի իրավիճակներին չի վերաբերում: Այն ընդհանուր է, եւ ներկա բաց համակարգին փոխանակ փորձելու իրական բնութագրումներ տալ, երկու կողմն էլ մեծ մասամբ բեւեռացածի արձագանգումներն են կատարում:

Խնդիրը բարդ է եւ այս սյունակներում անհնար է նույնիսկ ամփոփել նրա բնութագրիչները: Վերադառնանք հայկական տարածք: Անկախ ծայրահեղացված տեղեկատվությունները մաքրազտելու լրագրական պարտականությունից, հայկական լրատվամիջոցները ուղղակի խնդիր ունեն ազգային ոսպնյակից նաեւ մեկնաբանելու հարցերը: Բնականաբար, թե՛ Սիրիայի եւ թե՛ միջինարեւելյան երկրներին վերաբերող իրադարձությունները լուսաբանելու պահին անմիջականորեն միջազգային լրահոսի ազդեցության տակ ենք լինում, երբ խոսում ենք հայ գաղութներում ստեղծված խուճապի մասին, այդ երկրների հայաթափման եւ զանգվածային արտագաղթի մասին:

Կամ էլ, երբ մի լրատվամիջոց, երբ իբրեւ զգույշ եւ լոյալ կեցվածքով է մեկնաբանում մի հաստատում, թե  «սիրիահայ գաղութի դեպքում այս պահի դրությամբ որեւէ զանգվածային արտահոսք չի նկատվում», նախանշում է, որ ինքը արդեն հայտնվել է միջազգային տեղեկատվության անմիջական ազդեցության տակ:

Իհարկե, բացառված չէ, որ իրադարձությունների անվտանգության առումով լարվածության եւ քաղաքացիական ընդհարումների պարագայում նման մտահոգիչ իրավիճակներ ստեղծվեն ինչպես տեղի  ժողովուրդների, նաեւ մեզ համար: Այս հանգրվանում, սակայն, խուճապային կացության մասին բարձրաձայնելը ինքնին նպաստում է խուճապային իրավիճակի նախադրյալներ ստեղծելու աշխատանքում:

Առարկայական լրատվություն հրապարակելը դժվար իրականանալի աշխատանք է թվում մանավանդ տեղեկատվական հարթիչ գլանների ներկա համակարգում: Գերզգոնությունը ավելի քան հրամայական է այս պարագայում՝ լրատվությունը մաքրազտելու եւ, մանավանդ, նրա մեկնաբանությունը ազգային ոսպնյակից անցկացնելու համար:

ՇԱՀԱՆ ԳԱՆՏԱՀԱՐԵԱՆ

“Ազդակ”ի գլխավոր խմբագիր

Եղավ այն ինչ մենք կանխատեսել էինք. նախաքննական մարմինը փոխեց ՀԺ-ի լրագրող Հայկ Գևորգյանի խափանման միջոցը, վերացնելով անտրամաբանական որոշումը: Պարզապես ՀՀ Գլխավոր դատախազությունը խլեց  առաջնության դափնին ու չթողեց գործը դատարան հասնի: Բանն այն է որ նախաքննության նկատմաբ վերահսկողություն իրականացնող դատախազն է որոշում  կայացրել փոխել «Հայկական ժամանակ» օրաթերթի փոխխմբագիր Հայկ Գևորգյանի նկատմամբ ընտրված խափանման միջոցը՝ կալանքը փոխարինելով ստորագրությամբ քաղաքից չբացակայելու ստորագրությամբ։

Այսօր ժամը 11։30-ի մոտակայքում լրացավ  այն 72 ժամը, որի ավարտին ՀՀ Կենտրոն և Նորք Մարաշ վարչական համայնքների ընդհանուր իրավասության դատարանը պետք է վերահաստատեր կամ մերժեր Հայկ Գևորգյանի կալանավորման միջնորդությունը:

Դատախազի  որոշումը փոխեց դեպքերի ընթացքը.  Կենտրոն և Նորք Մարաշ վարչական համայնքների ընդհանուր իրավասության դատարանում նախատեսված դատը տեղի չի ունենա։

Շուտով Հայկ Գևորգյանը կլինի ազատության մեջ:

Քիչ առաջ «Նուբարաշեն» քրեակատարողական հիմնարկից ազատ արձակվեց «Հայկական ժամանակ» օրաթերթի փոխխմբագիր, լրագրող Հայկ Գևորգյանը։

Վերջինս համոզմունք հայտնեց, որ այս ամենը ուղղված է իր մասնագիտական գործունեության դեմ։ «Մեծ ներկայացումներ են սարքում և փորձում են ստեղծել «սուպերպոլիցեյսկիի» կերպար, և ուզում են ցույց տալ, թե ինչ է լինում այն մարդու հետ, ով ոստիկանապետի մասին բացասական բան է գրում։ Բայց ինչպես տեսնում եք, ողջ առողջ ձեր դիմաց կանգնած եմ»,- ասաց Գևորգյանը։ Սակայն, ըստ նրա, դա չի կարող խանգարել իր տեսածը գրելուն։ «Ես ընդհանրապես գրում եմ տնտեսական թեմաներով, բայց եթե սխալ բաներ նկատեմ, գրելու եմ»,- ասաց Գևորգյանը։

«Հայկական ժամանակի» լրագրողը չցանկացավ պատմել դեպքի մանրամասները՝ մտավախություն հայտնելով, որ ոստիկանությունը կարող է օգտվել իր պատմածներց։ «Ես կսպասեմ, կտեսնեմ դեպքի մանրամասներն ինչպես են ներկայացնում, հետո նոր ես կներկայացնեմ իմ տարբերակը»,- ասաց նա։

Գևորգյանը նաև ավելացրեց, որ ձերբակալության ժամանակ իր նկատմամբ բռնություն չի կիրառվել և ասաց որ նա բանտում անցկացրել է «երեք հրաշալի օր», շփվել ութ տարբեր տիպի մարդկանց հետ, սակայն, չունենալով թուղթ ու գրիչ, գրի չի առել նրանց մասին իր տպավորությունները, սակայն առաջիկայում նրանց մասին կգրի։

«Հայկական ժամանակ» օրաթերթի գլխավոր խմբագիր Նիկոլ Փաշինյանն այսօր հրավիրված մամուլի ասուլիսում նոր փաստեր ներկայացրեց, որոնք վերաբերում են թերթի թողարկման պատասխանատու Հայկ Գևորգյանի կալանավորման նախապատմությանը: Հայտարարության տեսքով ներկայացված փաստերն ապացուցում են, որ ոստիկանությունը Հայկ Գևորգյանի դեմ կանխամտածված և ծրագրված գործ է սարքել: Ստորև ներկայացնում ենք Փաշինյանի հրապարակած փաստերը.

«Հայկական ժամանակ» օրաթերթը ունի հիմնավոր փաստեր, ոստիկանական տեսանյությում բերվող պնդումները կեղծ և շինծու որակելու համար:

1.Ոստիկանության տեսանյութում սպիտակ խալաթով ինչ-որ անձնավորություն պնդում է, որ հիվանդ Աշոտ Ֆրանգուլյանին (տվյալ գործով «տուժող») «Սբ. Գրիգոր Լուսավորիչ» բժշկական կենտրոնում ախտորոշվել է գլխուղեղի ցնցում, աջ քունքային շրջանի փափուկ հյուսվածքների սալջարդ:

— «Հայկական ժամանակ» օրաթերթը ունի ձայնագրություն, որտեղ «տուժող» Աշոտ Ֆրանգուլյանը պատմում է, որ հունվարի 13-ին, Հայկ Գևորգյանի հետ խոսակցությունից հետո, ինքը նստել է «մոտակա բորդյուրին և գլուխը տվել է պատին»:

2. Ոստիկանության տեսանյութում սպիտակ խալաթով նույն անձնավորությունը պնդում է, որ Աշոտ Ֆրանգուլյանի մոտ ախտորոշվել է ձախ ստորին վերջույթի դրսային պճեղի ոչ լրիվ կոտրվածք, որը հաստատվել է ռենտգեն նկարահանումներով:

— «Հայկական ժամանակ» օրաթերթը ունի ձայնագրություն, որտեղ «տուժող» Աշոտ Ֆրանգուլյանը ներկայացնելով նախապես բեմադրված, բայց Հայկ Գևորգյանի զգոնության շնորհիվ չկայացած «վրաերթ-միջադեպի» իր վարկածը, ասում է, որ իրեն հպվել է Հայկ Գևորգյանի վարած «Նիվա» ավտոմեքենայի «շիթը», և «հարվածը» եղել է ոչ ուժեղ: «Նիվա» ավտոմեքենայի «շիթը» (պաշտպանիչ վահանակ) գետնից բարձր է մոտ կես մետր, իսկ մարդկանց պճեղը գետնից բարձր կարող է լինել առավելագույնը տասը սանտիմետր: Այս փաստը անառարկելիորեն ապացուցում է, որ Հայկ Գևորգյանի վարած ավտոմեքենան չէր «կարող» որևէ կերպ տուժողին պատճառել «ձախ ստորին վերջույթի դրսային պճեղի ոչ լրիվ կոտրվածք», առավելևս` ոչ շատ ուժեղ հարվածի պարագայում:

— Մեր խնդրանքով իրավիճակը մեկնաբանած մասնագետները տարակուսանք են հայտնել ոստիկանության տեսանյութի սպիտակ խալաթավոր անձի օգտագործած «ոչ լրիվ կոտրվածք» արտահայտության կապակցությամբ: Կոտրվածք կամ լինում է, կամ չի լինում:

— «Հայկական ժամանակ» օրաթերթը ունի աուդիոձայնագրություն, որտեղ «տուժող» Աշոտ Ֆրանգուլյանը, չորս օր «Սբ. Գրիգոր Լուսավորիչ» բժշկական կենտրոնում գտնվելուց հետո ասում է, որ որևէ կոտրվածք չունի:

— «Հայկական ժամանակ» օրաերթը ունի ձայնագրություն, որտեղ Աշոտ Ֆրանգուլյանն ասում է, որ Հայկ Գևորգյանի վարած ավտոմեքենան մեկ անգամ է իրեն դիպել:

3. Ոստիկանության տեսանյությում, ինչպես նաև այս ընթացքում հնչած ոստիկանական մեկնաբանություններում կա պնդում, թե մինչև Հայկ Գևորգյանին հայտնաբերելը ոստիկանությանը հայտնի չի եղել նրա ինքնությունը, մասնագիտական գործունեության բնույթը:

— «Հայկական ժամանակ» օրաթերթը ունի աուդիոձայնագրություն, որտեղ «տուժող» Աշոտ Ֆրանգուլյանը դեռ 2012թ. հունվարի 17-ին ասում է, թե լսել է, որ «այդ մարդը» (նկատի ունի Հ. Գևորգյանին) լրագրող է:

— ՀՀ ոստիկանության քննչական վարչության պետ Արսեն Այվազյանը, հունվարի 13-ի բրիֆինգում հայտարարել է, թե «Հայկ Գևորգյանի կողմից վրաերթ կատարելու հանգամանքը հիմնավորվել է հունվարի 23-ին կատարված լուսանկարով ճանաչման ներկայացնելու արձանագրությամբ»: Ոստիկանությունը դեռ պետք է պարզաբանի, թե վովա-պինկերտոնյան այդ ինչ մեթոդոլոգիայով է առաջնորդվում, որը կարողանում է ձեռքբերել անհայտ անձի լուսանկար, և դրանով իրականացնել ճանաչում:

— Վերը նշված փաստերը վկայում են, որ ի սկզբանե թե Աշոտ Ֆրանգուլյանը, թե ոստիկանությունը իմացել են, թե ով է նստած «Նիվա» մակնիշի ավտոմեքենայի ղեկին:

4. Ոստիկանական տեսանյութում խոսվում է, ոստիկանությանը հայհոյելու միջոցով մահամերձ վարկանիշ փրկելու ջանքի մասին:

ՀՀ ոստիկանությունը, այսպիսով, խոստովանում է, որ իրեն և իր ղեկավարին հայհոյելը կարող է կենդանացնել նույնիսկ մահամերձ վարկանիշեր: Սա, թերևս, ՀՀ ոստիկանության գործունեության և նրա պետին անձի լավագույն գնահատականն է: Ինչ վերաբերում է վարկանիշերին, ՀՀ ոստիկանության պետ Վովա Գասպարյանին խորհուրդ ենք տալիս մտահոգվել սեփական շեֆի վարկանիշով, որը կարծում ենք շատ փոքր է զիջում Հայկ Գևորգյանի գործով որպես «տուժող» անցնող Աշոտ Ֆրանգուլյանի վարկանիշին:

5. 2012 թվականի փետրվարի 3-ի իմ ասուլիսում հնչած մտքերի` ոստիկանական տեսանյութում առկա բրեժնևյան աղավաղումներին անդրադառնալը համարում եմ ավելորդ: Սրա վերաբերյալ յուրաքանչյուր ոք կարող է ինքնուրույն հետևություններ անել` իմ ասուլիսի ամբողջական տեսաձայնագրությունը դիտելով:

Փաստերը ներկայացնելուց հետո Նիկոլ Փաշինյանը հրապարակեց նաև Հայկ Գևորգյանի գործով որպես տուժող հանդես եկող Աշոտ Ֆրանգուլյանի աուդիո ձայնագրությունից մի քանի հատվածներ:

Սերժ Սարգսյանը մինչ Հայկ Գևորգյանի կալանավորման հարցով դատարանի որոշումը դեպքի առնչությամբ կարծիք չի հայտնի, սակայն հուսով է, որ որոշումն արագ կլինի: Այսօր Ծաղկաձորում, ի պատասխան հանրապետական կանանց բարձրացրած խնդրի, այս մասին նշել է հանրապետության ղեկավարը:

Ծաղկաձորյան ֆորումին հրավիրված լրատվամիջոցներից մեկի`Panorama.am-ի  փոխանցմամբ` մինչ հանդիպման մեկնարկը կին հանրապետականները նախագահի հետ փորձել են քննարկել օրվա հրատապ թեմաներից մեկը:
ՀՀԿ կանանց խորհրդի նախագահ Հերմինե Նաղդալյանը դիմել է երկրի ղեկավարին. «Պարո´ն Նախագահ, երեկ ստացանք լրագրող Հայկ Գևորգյանի ձերբակալության մասին տեղեկատվությունը, ինչի մասին ոստիկանությունը նաև համապատասխան մանրամասներ է հրապարակել:Մինչ այս հանդիպումը մենք` մի խումբ կին հանրապետականներով քննարկում էինք տեղի ունեցածը և որոշեցինք մեր տեսակետը հայտնել` այս պարագայում լրագրողին անազատության մեջ պահելու դեմ: Խնդրում ենք, որպեսզի համապատասխան իրավապահ կառույցները հաշվի առնեն նաև մեր կարծիքը այս հարցում, եթե հնարավոր է»:

Ի պատասխան, նախագահ Սարգսյանը նշել է. «Պետական մարմինները ամենօրյա որոշակի գործառույթներ են իրականացնում, այդ թվում` իրավախախտումների դեմ պայքարը և դրանք կատարած ենթադրյալ անձանց հայտնաբերումը: Այս գործունեությունն իր մեջ կարող է օբյեկտիվորեն պարունակել անձի իրավունքների սահմանափակումներ: Որպեսզի այդ սահմանափակումները չլինեն չհիմնավորված, գոյություն ունեն որոշակի վերահսկողական իրավական ընթացակարգեր, որոնց շրջանակներում մեկ մարմինը, տվյալ դեպքում` դատարանը, պետք է որոշի մյուսի` ոստիկանության գործողությունների, հիմնավորվածությունը: Նման խնդիրները ցանկացած իրավական պետությունում պետք է լուծվեն հենց այս ձևաչափով: Ինչ վերաբերում է կոնկրետ Հայկ Գևորգյանի դեպքին, ապա ես կարծիքս չեմ հրապարակի մինչ դատարանի կողմից որոշում կայացնելը, որը, հուսով եմ, հնարավորինս արագ կլինի»:

«Հայ ազգային կոնգրեսը» հայտարարություն է տարածել «Հայկական ժամանակ» օրաթերթի լրագրող Հայկ Գևորգյանի կալանավորման կապաակցությամբ, որը ներկայացնում ենք ստորև.

Փետրվարի 3-ին կալանավորվել է «Հայկական ժամանակ» օրաթերթի գլխավոր խմբագրի տեղակալ, ճանաչված լրագրող Հայկ Գևորգյանը:

«Ոստիկանության հիմնազուրկ բացատրություններն արդեն իսկ վկայում են, որ Հայկ Գևորգյանի նկատմամբ հարուցված քրեական գործը շինծու է: Իրականում նա ազատությունից զրկվել է բացառապես իր մասնագիտական գործունեության, այն է` իշխանությունների կատարած ապօրինությունները բացահայտելու և հանրության սեփականությունը դարձնելու պատճառով:

Հայ Ազգային Կոնգրեսը հայտարարում է, որ Սերժ Սարգսյանի վարչախումբը հերթական մարտահրավերն է նետել Հայաստանում խոսքի ազատությանը: Գիտակցելով սպասվող քաղաքական, հասարակական ակտիվ գործընթացների վտանգավոր բնույթն իր համար, ինչպես նաև առաջիկա ընտրություններում իշխող կուսակցության անխուսափելի պարտությունը` վարչախումբն արդեն իսկ լծվել է իր հակաժողովրդավար բնույթը մերկացնող քաղաքացիների, լրագրողների չեզոքացման օպերացիայի իրականացմանը: Մենք կոչ ենք անում Հայաստանի և միջազգային լրագրողական շրջանակներին` իրենց համախմբված բողոքը արտահայտել Հայկ Գևորգյանի կալանավորման կապակցությամբ և պահանջում ենք անհապաղ ազատ արձակել նրան»:

Հաղորդագրության մեջ նաև հայտնվում է, որ տեղի է ունեցել Հայ Ազգային Կոնգրեսի տարածքային գրասենյակների ղեկավարների խորհրդակցություն, որը վարել է Կոնգրեսի գրասենյակի համակարգող Լևոն Զուրաբյանը:

Խորհրդակցության ընթացքում քննարկվել են փետրվարի 17-ին նախատեսված հանրահավաքի նախապատրաստական աշխատանքները, ինչպես նաև մեծամասնական համակարգով թեկնածուների առաջադրման հարցերը:

«Արմենպրեսի» նախկին տնօրեն, Հայաստանում ճանաչված լրագրող և այժմ կալանքի տակ գտնվող Տիգրան Հակոբյանի պաշտպանական կողմը «մեծածավալ փաստաթուղթ» է ներկայացրել նախաքննական մարմին, որտեղ ներկայացված է` երբ, ինչի համար և ինչպես է ծախսվել գումարը, որը վատնելու համար էլ նա մեղադրվում է: Այդ մասին Panorama.am-ին տեղեկացրել է Տիգրան Հակոբյանի փաստաբան Հայկ Ալումյանը.

«Փաստաթղթում նշված է, թե գումարը երբ և ինչպես է ծախսվել: Այդ փաստաթուղթը մենք ներկայացրել ենք: Իմ պատշտպանյալը մանրակրկիտ ցուցմունքներ է տալիս ամեն լումայի վերաբերյալ, և մենք վստահ ենք, որ այդ հարցն ամբողջությամբ կսպառվի», -հավելեց փաստաբանը:

Նշենք, որ Տիգրան Հակոբյանը հասարակայնության հետ կապերի կառավարման ոլորտի ճանաչված մասնագետներից է, նախկինում զբաղեցրել է «Հայք» թերթի գլխավոր խմբագրի, Հայաստանի Հեռուստառադիոպետկոմի նախագահի, Արմենպրեսի տնօրենի պաշտոնները: Նա մեղադրվում է ավելի քան 184 մլն դրամ հափշտակելու, յուրացնելու մեջ, նրանց մեղադրանք է առաջադրվել Քրեական օրենսգրքի 179 հոդվածի 3-րդ մասի 1-ին կետի «խոշոր չափերով յուրացնելը կամ վատնելը» հատկանիշներով: Տիգրան Հակոբյանի հետ միասին նույն մեղադրանքն է առաջադրվել նաև Հայ Ազգային կոնգրեսի առաջնորդի մամլո խոսնակ Արման Մուսինյանի եղբորը՝ Վահան Մուսինյանին, որը այժմ հետախուզման մեջ է:

Տիգրան Հակոբյանը 2009-ի մարտից մինչև 2010թ. մայիսը աշխատել է «Ագրոհոլդինգ» ՍՊ ընկերությունում որպես տնօրեն: Վահան Մուսինյանն այնուհետև Տիգրան Հակոբյանի կողմից սեփականատերերին ներկայացվել է որպես գյուղատնտեսության ոլորտի բանիմաց մասնագետ և կարող է նպաստել, որպեսզի ընկերությունն առավել արդյունավետ կազմակերպի իր գործունեությունը: Դրանից հետո Վ. Մուսինյանը սկսել է գործարքների վերաբերյալ որոշակի գործունեություն իրականացնել, սակայն այդ գործարքներից ստացված ոչ բոլոր գումարներն են մուտք եղել ընկերության դրամարկղ:

Մասնավորապես 2009-ին մարտ-հունիս ամիսներին անասուների, դրանց մսի, կաթի վաճառքից ստացված գումարից 39 մլն դրամը ընկերության դրամարկղ մուտք չի եղել: Նախնական տեղեկություններով, գումարը յուրացրել են երկուսով: Բացի այդ, նույն տարվա ընթացքում սեփականատերերը 160 մլն դրամ կանխիկ գումար են տրամադրել համապատասխան ներդրումներ կատարելու համար, սակայն ընկերությունում մուտքագրվել է շուրջ 15 մլն դրամի ընդհանուր արժողությամբ գույք, այսինքն 145 մլն դրամը հափշտակվել է: Գործի քննությունը վարում է ոստիկանությունը:

«Ամբողջ գումարը, որ այսօր քրեական գործով մեղսագրում են Տիգրանին, մանրակրկիտ ձևով, ամենավերջին լուման նույնիսկ ներկայացրել ենք: Ընդ որում, դա նոր չէ, որ ներկայացնում ենք, այդ գումարը ամենայն մանրամասնությամբ ներկայացված է եղել գումարը փոխանցողներին: Հիմա ոչ մի բաց հարց չի կարող մնալ: Ամեն լումա հիմնավորված է», -փոխանցեց փաստաբան Ալումյանը:

Մեր հարցին, թե այս ամենի մեջ ինչ-որ ենթատեքստ տեսնո՞ւմ է պաշտպանական կողմը, ինչո՞ւ է Հակոբյանին նման մեղադրանք առաջադրվել, պաշտպանը պատասխանեց. «Ինչ-որ մարդիկ խորապես մոլորության մեջ են, և ես կուզեի մտածել, որ սա բարեխիղճ մոլորություն է: Հիմա Տիգրանը ցուցմունքներ է տալիս, եթե այդքանից հետո էլ կշարունակեն պնդել մեղադրանքը, ուրեմն այդտեղ ենթատեքստ կա, որովհետև այդ փաստաթղթին ծանոթանալուց հետո ոչ մի խնդիր մնալ չի կարող»:

Ավելի վաղ Panorama.am- ի  խմբագրություն է զանգահարել Տիգրան Հակոբյանի քրոջ ամուսինը` Արմեն Աբրահամյանը և ասել էր, որ Հակոբյանի «գործը շինծու է»: Նա կալանքի մեջ գտնվող Հակոբյանին ներկայացրել էր որպես լավ կառավարիչ: «Տիգրան Հակոբյանին նստացրել են, որովհետև Տիգրան Հակոբյանը մարդկանց լավ չի ճանաչում, մանավանդ իր ընկերներին, դասարանցիներին», -ասել էր նա:

Ինչ վերաբերում է Վահան Մուսինյանի` գործին առնչության մասին, ապա Ալումյանն ասաց, որ կան փաստաբանական էթիկայի կանոններ, որ «պաշտպանյալին պաշտպանելուց չենք կարող ուրիշին խորտակել»: «Ես չեմ կարող Մուսինյանի գործը մեկնաբանել, նրա գործը թող իր պաշտպանները մեկնաբանեն: Իսկ ինչ վերաբերում է Տիգրանին, ապա ամեն մի լուման մենք պատրաստ ենք մեկնաբանել», փոխանցեց պաշտպանը:

Panorama.am-ը գրում է, որ այսօր և նախկինում արված բազմաթիվ փորձերը կապվել Վահան Մուսինյանի եղբոր` Արման Մուսինյանի հետ, անհաջող են անցել, և նրանից մեկնաբանություն ստանալ չի հաջողվել: ՀԱԿ-ից մշտապես ասում էին. «Մուսինյանը դեռ չի եկել, որ գա կփոխանցենք զանգել եք» կամ «փորձեք մի փոքր ուշ, ինքը հաստատ գալու է»:

«Մենք արժեհամակարգի խնդիր ունենք: Ժամանակը շատ է առաջ վազել, բայց մենք նոր-նոր ողնաշար ենք շտկում», -ասում է Առաջնորդանիստ Ս. Սարգիս եկեղեցու հոգևոր հովիվ Տեր Շահե քահանա Հայրապետյանը, հավատալով, որ մեր հերոսը դեռ պետք է գա :

Սեպտեմբերի 23-ին Մեծ աղմուկով վնասազերծված զինված բանդայի պարագլուխ Արտյուշա Հակոբյանին կալանավորելուց հետո նրա եղբայրը և կինը` Մարինա Գեորգաձեն ևս կալանավորվեցին:

Ով է Մարինան և ինչ դերակատարություն ունի այս գործում:

Վրացուհի Մարինա Գեորգաձեն Արտուշ Հակոբյանի 2-րդ կինն է: Նախկինում Մարինան ամուսնացած է եղել ազգությամբ վրացի քրեական հեղինակության հետ: Ավելին` Արտուշի հայրը Գառնու լավաշ արտադրության սեփականատեր Սուրիկ Հակոբյանը երկար ժամանակ չի համակերպվել Մարինային իր հարսը համարելու մտքի հետ, դեմ լինելով նրա և որդու միությանը: Նա բոլորովին վերջերս է համակերպվել այդ իրողության հետ: Մարինան և Արտուշը այժմ դուստր ունեն, որը գտնվում է Վրաստանում Մարինայի մոր մոտ:

Մարինա Գեորգաձեն հասարակ կին չէ, նրան խարդախության մեղադրանքով Վրաստանի դատարանը մեղավոր է ճանաչել և նա մինչև այս ձերբակալությունը հետախուզման մեջ էր գտնվում նաև Վրաստանի իրավապահների կողմից:

Որոշ տեղեկություներով հենց նա է բանդայի իրական պարագլուխը. Հանցաշխարհի լեգենդ Կալինայի հայաստանյան հետևորդին` Մարինային, պահանջում են վրաց իրավապահները:

Բոլորովին վերջերս լրատվամիջոցներից մեկը, մի ծավալուն հրապարակում էր տպագրել Մարինայի հոգեկան օրհասական վիճակի մասին, նրան համարել  հոգեբուժարանի կոնտիգենտ, փաստաբանի նկարագրությունից ելնելով, եզրահանգել, որ Մարինային չպետք է հանձնեն վրացիներին: Ձեռքի հետ ուրվագծելով նաև հաջորդ քայլը` կալանավայրի փոխարեն Մարինային տեղավորել հոգեբուժարանում:

Ի պատասխան մեր հարցման, ՔԿՀ վարչությունից պատասխանեցին, որ Մարինայի մոտ ամեն ինչ նորմալ է և հոգեկան շեղման նշաններ նկատելի չեն, ինչպես որ ներկայացրել էր փաստաբանը: Իսկ Աբովյան ՔԿՀ-ի բժիշկը նման ախտորոշում չի տվել:

Տեղյակ աղբյուրները վստահեցնում են, որ հոգեբուժարանից  փախչելը կամ այն որպես միջոց օգտագործելը Հակոբյան ամուսինների համար նոր ճանապարհ չէ: Թե’ Արտուշը, թե’  Մարինան այդ ուղղին լավ գիտեն. Մարինան մեկ անգամ էլ Սևանի հոգեբուժարանում պառկելու անհրաժեշտություն է ունեցել: Իսկ  Արտուշը իր հերթական փախուստներից մեկի ժամանակ  հոգեբուժարանի  ողջ անձնակազմին քնացրել է քյաբաբի մեջ քնաբեր խառնելով ու հյուրասիրելով նրանց: Իհարկե, սա արտաքին կողմը պահելու, իրեն օգնողներին չմատնելու ժեստ էր ընդամենը, բայցևայնպես:

Առհասարակ այս հաստատությունները նման են մութ լաբիրինթոսի, որտեղ ամեն ինչ, ու բոլոր պահերին կարելի է գտնել: Այստեղ մեծ գումարներ են շրջանառվում: Արդյո՞ք ամենաթողություն է. հոգեբուժարանները իրենց մութ գործունեությունը ծավալում են կարծես անարգել. Համենայն դեպս մինչև վերջերս այդքան աղմկահարույց փաստերի բացահայտումից հետո էլ, ոչ ոք պատասխանատվություն չկրեց:

Բազմաթիվ պատմություններ կան կապված կոնկրետ հոգեբուժարանների հետ, իսկ դրանց ցուցակը գլխավորում է “Նուբարաշենը”: Այստեղ ծնվում ու մեռցվում են սահմռկեցուցիչ հանցագործություններ: Բանակ են զորակոչվում ու բանակից ազատվում հիվանդներն ու առողջները. Սակայն սա այլ խոսակցության թեմա է:

Այսօր էլ Մարինայի գործով հանրության մոտ կարծիք ձևավորելով հարցը տանելով դեպի հոգեբուժարան, փորձ է արվում խնդիր լուծել: Վրաստանն անդրդվելի է.  Հնարավոր չէ,  համեմատության եզրեր գտնել վրաց ու հայ իրավապահ համակարգի միջև, ուր մի քանի անգամ փախուստի մեջ եղած հանցագործը, որի գլխավորած բանդան այդ պահին աշխատում է, կարող է զենքը վրան գնալ դատախազի ծննդյան տարեդարձի: