ԼՂՀ պաշտպանության բանակի մամուլի ծառայությունը հայտարարում է, որ ՊԲ-ում սպայակազմի կողմից զինվորին պարբերաբար ծեծի ենթարկելու մասին մոր ահազանգը չի համապատասխանում իրականությանը:

«ԼՂՀ պաշտպանության բանակի զորամասերից մեկում ծառայող իր որդուն սպայական անձնակազմի կողմից պարբերաբար ծեծի ենթարկելու մասին ՀՀ մարդու իրավունքների պաշտպանին հասցեագրված քաղաքացի Կարինե Կիրակոսյանի դիմումի առիթով, ԼՂՀ ԶՈՒ ռազմաիրավապահ մարմինները՝ ԼՂՀ մարդու իրավունքների պաշտպանի աշխատակազմի ներկայացուցիչների հետ համատեղ անցկացրել են համակողմանի հետաքննություն, որի արդյունքում պարզվել է, որ Կարինե Կիրակոսյանի դիմում-բողոքն անհիմն է եւ չի համապատասխանում իրականությանը»,-ասված է ԼՂՀ ՊԲ լրատվության եւ քարոզչության բաժնի տարածած հաղորդագրության մեջ:

Փետրվարի 16-ին արտգործնախարար Էդվարդ Նալբանդյան Վիեննայում մասնակցել է Աֆղանստանից թմրամիջոցների ապօրինի շրջանառության դեմ պայքարին նվիրված Փարիզյան պակտի նախարարական երրորդ համաժողովին, որին ներկա են եղել և ելույթներով հանդես եկել ՄԱԿ-ի գլխավոր քարտուղար Բան Կի-Մունը, շուրջ հինգ տասնյակ երկրների բարձրաստիճան պատվիրակություններ: Այս մասին տեղեկացնում է ՀՀ Արտաքին գործերի նախարարության լրատվական ծառայությունը։

Ռուսաստանի, Ֆրանսիայի և Ավստրիայի արտգործնախարարներ Սերգեյ Լավրովի, Ալեն Ժյուպեի և Միխայել Շպինդելեգերի նախագահությամբ տեղի ունեցած նիստին ելույթ է ունեցել նաև Էդվարդ Նալբանդյանը:
Իր խոսքում Հայաստանի արտգործնախարարը ներկայացրել է թմրադեղերի ապօրինի շրջանառության դեմ միջազգային հանրության պայքարում Հայաստանի ներդրումը և վերահաստատել ՀՀ վճռականությունը շարունակելու ակտիվորեն աջակցել միջազգային ջանքերին, ներառյալ Փարիզի պակտին և այլ միջազգային նախաձեռնություններին, որոնց նպատակն է նվազեցնել և արմատախիլ անել թմրամիջոցների ապօրինի արտադրությունը, առևտուրն ու թրաֆիքինգը:
Վիեննայում Էդվարդ Նալբանդյանի օրակարգը հագեցած է եղել նաև երկկողմ հանդիպումներով:

Արտգործնախարար Էդվարդ Նալբանդյանը հանդիպում է ունեցել ԵԱՀԿ գլխավոր քարտուղար Լամբերտո Զանյերի հետ:
Հանդիպմանը զրուցակիցները հանգամանալից քննարկել են ղարաբաղյան հիմնախնդրի կարգավորման գործընթացի վերջին զարգացումները: Այս ենթատեքստում ԵԱՀԿ գլխավոր քարտուղարը մտահոգություն է հայտնել շփման գծում լարվածության պահպանման կապակցությամբ և կարևորել միջադեպերի քննության մեխանիզմի ստեղծումը:
Հայաստանի ԱԳՆ ղեկավարն ու ԵԱՀԿ գլխավոր քարտուղարը անդրադարձել են նաև Հայաստանում կայանալիք խորհրդարանական ընտրությունների նախապատրաստական աշխատանքներին:

Վիեննայում Էդվարդ Նալբանդյանը հանդիպում է ունեցել նաև իր ռուսաստանցի գործընկերոջ` Սերգեյ Լավրովի հետ:
Նախարարների հանդիպմանն անդրադարձ է արվել երկկողմ օրակարգի հարցերին, միջազգային և տարածաշրջանային զարգացումներին:
Էդվարդ Նալբանդյանն ու Սերգեյ Լավրովը քննարկել են երկու երկրների միջև իրավապայմանագրային դաշտի կատարելագործմանն առնչվող հարցեր: Հայաստանի ԱԳ նախարարը վերահաստատել է Ռուսաստանի իր գործընկերոջն ուղղված Երևան այցելելու հրավերը:

Վիեննայում հանդիպում է կայացել նաև ԵԱՀԿ մշտական խորհրդի նախագահ դեսպան Իոն Օ’լիին:
Նախարար Նալբանդյանը Հայաստանի աջակցությունն է հայտնել ԵԱՀԿ-ում Իռլանդիայի նախագահության առաջնահերթությունների իրականացմանը:
Էդվարդ Նալբանդյանն ու դեսպան Օ’լին անդրադարձել են Իռլանդիայի արտգործնախարար, ԵԱՀԿ գործող նախագահ Իէմոն Գիլմորի` Հայաստան նախատեսվող այցին:
Հանդիպման օրակարգում էր նաև արցախյան հիմնախնդրի կարգավորման գործընթացը: Այս առնչությամբ դեսպան Օ’լին վերահաստատեց ԵԱՀԿ նախագահության աջակցությունը Մինսկի խմբի համանախագահների կողմից գործադրվող ջանքերին:

Էդվարդ Նալբանդյանը հանդիպել է Ավստրիայի փոխվարչապետ, Եվրոպական և արտաքին գործերի նախարար Միխայիլ Շպինդելեգերի հետ:
Հայաստանի և Ավստրիայի արտաքին քաղաքական գերատեսչությունների ղեկավարները քննարկել են այս տարի նախատեսվող Ավստրիայի Նախագահի Հայաստան կատարելիք այցի նախապատրաստական աշխատանքները:
Նախարարներ Նալբանդյանն ու Շպինդելեգերը բովանդակալից զրույց են ունեցել տարբեր բնագավառներում երկկողմ համագործակցության ընդլայնման ուղիների, եվրոպական կառույցների և միջազգային կազմակերպությունների շրջանակներում փոխգործակցության սերտացման վերաբերյալ, մտքեր են փոխանակել միջազգային օրակարգի և տարածաշրջանային խնդիրների շուրջ:
Հայաստանի ԱԳ նախարարի հաջորդ հանդիպումը Չերնոգորիայի արտգործնախարար Միլան Ռոչենի հետ է եղել:
Հանդիպման օրակարգում են եղել երկու երկրների միջև իրավապայմանագրային դաշտի ընդլայնման, տնտեսական փոխգործակցության զարգացման, ապակենտրոնացված համագործակցության, Չերնոգորիայի ԱԳ նախարարի Երևան կատարելիք այցին առնչվող հարցեր:
Վիեննայում Էդվարդ Նալբանդյանը ծավալուն հարցազրույց է տվել Ավստրիայի առաջատար Der Standart թերթին:
Նույն օրը, ավարտելով այցելությունը, Էդվարդ Նալբանդյանը վերադարձել է Երևան:

Հանրապետության տարածքին է մոտենում արևմտյան մի հզոր ցիկլոն, որը մեզ կհասնի Փետրվարի 18-ին և առատ ձյան պատճառ կդառնա: Իսկ մինչ այդ այս գիշեր ձյունը կպահպանվի հանրապետության արևմտյան մասերում, փետրվարի 17-ին կդիտվի տեղումների դադար` ցերեկն առանց էական տեղումների եղանակ, կարճատև թույլ տեղումներ հնարավոր են միայն առանձին վայրերում: Օդի ջերմաստիճանն էապես չի փոխվի:Առանձին վայրերում հնարավոր է քամու ուժգնացում մինչև 22մ/վրկ, լեռներում և լեռնանցքներում կդիտվի բուք, ցածր տեսանելիություն, ձյան բերվածքների հետևանքով` ավտոճանապարհներին մերկասառույց, տեղ-տեղ հնարավոր է նաև մառախուղ:

Երևանում այս գիշեր դեռևս հնարավոր է թույլ ձյուն, փետրվարի 17-ին կդիտվի առանց էական տեղումների եղանակ: Հնարավոր է մառախուղ և ցածր տեսանելիություն, ուշադրություն` մերկասառույց: Քամի 10-15մ/վրկ: Գիշերը կլինի -6-8, ցերեկը -1+1, երեկոյան -2-4: Առատ տեղումներ են սպասվում փետրվարի 18-ին:

Հայաստանի երիտասարդական հիմնադրամը հանդես է գալիս Անահիտ աստվածուհու արձանի մասունքները Բրիտանական թանգարանից Հայաստան վերադարձնելու նախաձեռնությամբ։ Այդ կապակցությամբ հիմնադրամը ստորագրահավաք է սկսում:

Հայաստանում Միացյալ թագավորության դեսպաններ տիկին Քեթրին Ջեյն Լիչին եւ պարոն Ջոնաթան Ջեյմս Էյվսին հասցեագրված ուղերձի տեքստում մասնավորապես ասված է. «Մենք՝ ներքոստորագրյալներս, հանդես ենք գալիս հայկական մշակութային եւ պատմական արժեքները հայրենիք վերադարձնելու նախաձեռնությամբ։ Աշխարհի թանգարաններում այսօր պահպանվում եւ ցուցադրվում են բազմաթիվ ստեղծագործություններ, որոնք հայկական մշակույթի նմուշներ են։ Մշակութային այդ արժեքների թվում են Բրիտանական թանգարանում պահպանվող Անահիտ աստվածուհու բրոնզաձույլ գլուխը եւ ձեռքերը։ Մենք կոչ ենք անում Հայաստանին վերադարձնել մշակութային այդ մասունքները, քանի որ արվեստի եւ պատմական արժեքները պետք է պահպանվեն ու ցուցադրվեն այն երկրում, որտեղ ստեղծվել են եւ որի պատմության կրողներն են»։

Դեսպաններին հղված ուղերձում երախտիքի խոսք է ասվում Մեծ Բրիտանիային՝ հայկական մշակութային ժառանգությունը թուրքական վանդալիզմից փրկելու եւ պահպանելու համար։ «Սակայն պատմական արդարությունը պահանջում է, որպեսզի Անահիտ աստվածուհու արձանի մասունքները հայրենադարձվեն եւ հանգրվանեն ծագման երկրում։ Համոզված ենք՝ Մեծ Բրիտանիան կհարգի մեր նախաձեռնությունը եւ կվերադարձնի Անահիտ աստվածուհու արձանի մասունքները»,- ասված է ուղերձում։

Նշենք, որ այս ոլորտի շատ հայ մասնագետներ պնդում են, որ շատ ավելի նախընտրելի է, որ Անահիտ աստվածուհու արձանը մնա բրիտանական թանգարանում, սակայն պետք է նշվի, որ այն հայկական է:

«Վաշինգտոնը հրապարակեց հետխորհրդային տարածաշրջանի երկրների համար 2013թ. նախատեսվող օգնության չափի վերաբերյալ տվյալները: Սեփական խնդիրների պատճառով ԱՄՆ-ի կողմից կենտրոնասիական և հարավկովկասյան երկրների սուբսիդավորումն անցած տարիների համեմատությամբ, ընդհանուր առմամբ, կրճատվել է: Կրճատումը, սակայն, գրեթե չի անդրադարձել ռազմական ոլորտում հատկացվող օգնության ծավալներին. Վաշինգտոնն ընդամենը փորձել է հավասարեցնել երկու տարածաշրջանների երկրների թվային ցուցանիշները,- «Հայերը հիասթափված են Վաշինգտոնից» (ռուսական «Նեզավիսիմայա գազետա» պարբերականում) վերտառությամբ հոդվածում գրում է Յուրի Ռոկսը և հավելում,-Բացառություն է արվել միայն Վրաստանի համար. նա 14,4 մլն դոլար ռազմական օգնություն կստանա, ինչն ավելին է, քան մյուս երկրների համար նախատեսված օգնության չափը միասին վերցված»:

Հոդվածագիրն ընդգծում է, որ Թբիլիսին, իր նկատմամբ արված բացառության համար, պարզապես ցնծում է: «Վրաստանի իշխանությունների համար նման բացառությունն արտաքին քաղաքականության հավատարմության ապացույց է և այն մասին է վկայում, որ ռազմական քարոզարշավներում Վաշինգտոնին հնարավորության սահմաններում մատուցված դաշնակցային ծառայություններն աննկատ չեն մնում»,-գրում է Ռոկսը և հավելում, որ Թբիլիսիի ցնծությունն էլ ավելի մեծացրեց Հարավային Կովկասի և Կենտրոնական Ասիայի հարցերով ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ափաթուրայի` Հայաստանի հեռուստաալիքներից մեկով արած այն հայտարարությունը, թե ՆԱՏՕ-ին Վրաստանի անդամակցելու հարցը «լուծված է»:

«ԱՄՆ-ից 1,5 մլն դոլար ռազմական օգնություն ստանալու մասին տեղեկությունը լավ ընդունվեց նաև Տաշքենդում….: Ամերիկյան գանձարանից նույնչափ օգնություն, EurasiaNet հրատարակության տվյալներով, կստանան նաև Ղրղըզստանը և Տաջիկստանը, մի քիչ ավելի շատ` 1,8 մլն դոլար, Ղազախստանը և 685 000 դոլար Թուրքմենստանը»,- ասված է հոդվածում:

Ռոկսն այնուհետ  գրում է, որ ԱՄՆ-ը, հաշվի առնելով հարավկովկասյան տարածաշրջանում առկա պայթյունավտանգ իրադրությունը, ինչպես նաև ցույց տալու համար, որ Վաշինգտոնը չեզոք դիրքորոշում ունի ղարաբաղյան հարցում, որոշել է այս տարի հավասարեցնել Հայաստանին և Ադրբեջանին հատկացվող ռազմական օգնության չափը (2,7 մլն դոլար առաջարկելով):

«Ադրբեջանի համար, որի բյուջեն մոտենում է 2 մլրդ դոլարի նշագծին, Վաշինգտոնի օգնությունը կարելի է խորհրդանշական համարել, ինչը, սակայն, չես ասի Հայաստանի մասին: Չնայած, որ հայկական կողմը, շնորհակալություն հայտնելով, նշեց, որ ռազմական կառույցների վիճակը երբեք ամերիկյան ֆինանսական օգնության տրամադրման հանգամանքով պայմանավորված չի եղել, որոշակի հիասթափությունն ակնհայտ է: Առավել ևս որ Վաշինգտոնը, կրճատելով հետխորհրդային երկրներին հատկացվող օգնության չափը, հիշեց նաև Հայաստանի տարածաշրջանային մեկ այլ «ընկերոջ»`  Թուրքիայի մասին` Միջազգային ռազմական կրթության և ուսուցման ծրագրի շրջանակում նրան 3,6 մլն դոլար առաջարկելով»,-ասված է հոդվածում:

Հոդվածագիրը նշում է, թե Թուրքիայի համար ԱՄՆ-ի կողմից հատկացված գումարն «այդքան էլ էական չէ», և այդ ժեստը, հավանաբար, պետք է դիտարկել որպես ԱՄՆ-ի կողմից Անկարային ուղղված կոչ մոռանալու երկկողմ հարաբերությունների մեջ փոխադարձ դժգոհություն և հակասությունների տարրեր մտցրած մի շարք գործոնների մասին:

Ռոկսն այնուհետ ընդգծում է, որ հայկական կողմի հիասթափությունը հատկապես «դրսևորվեց» Ամերիկայի Հայ դատի հանձնախմբի տարածած հայտարարություններում: ««Հայ դատի» վաշինգտոնյան գրասենյակի ղեկավար Արամ Համբարյանը մամուլի ասուլիսի ժամանակ ցավով նշել էր, որ Օբաման չի շտապում կատարել նախընտրական քարոզարշավի ժամանակ ԱՄՆ-ի հայ համայնքին տված խոստումները. բացի այն, որ նա «մոռացել է» ցեղասպանության հարցի մասին, նա նաև կրճատում է ֆինանսական օգնության չափը,-գրում է հոդվածագիրը և մեջբերում Արամ Համբարյանի խոսքերը. «Մենք արդեն առանց զարմանքի հերթական անգամ փաստում ենք, որ Օբաման ևս մեկ անգամ փորձում է կրճատել Հայաստանի տնտեսական օգնության չափը` չնայած Թուրքիայի և Ադրբեջանի շրջափակումից բխող կործանիչ հետևանքներին և Աֆղանաստանում, Իրաքում, Կոսվոյում ամերիկյան առաքելություններին Հայաստանի աջակցությանը»:

Թերթ.am

Այսօր Վարդանանց տոնն է. Չգիտես ինչու Երևանում որոշել էին այդ տոնը նշել ոչ միայն երթի տեսքով այլև, այն դարձրել էին բացարձակ կուսակցական տո

Տիգրան Սարգսյանն ու Տարոն Մարգարյանը գլխավորում էին Վարդանանց տոնին նվիրված երթը, որ կազմակերպել էին երիտասարդ հանրապետականները, ՀՀԿ-ական Կարեն Ավագյանի գլխավորությամբ:

«Ֆեյսբուք» սոցցանցում տոնի հետ կապված բողոքներ էլ էին շրջանառվում թե`ուսանողներին ստիպողաբար էին տարել քայլերթի:

Վարդանաց տոնի մասին գրեց Բեյրությում ապրող իմ ընկերներից մեկը. Գաղտնիք չէ, որ սփյուռքի գաղթօջախներում մեր ազգայյին տոներն առավել հարգի են ու նշվում են ըստ պատշաճի. Առավոտյան Բեյրութի հայկական եկեղեցում ժողովրդին հարիսա են բաժանել, ապա տոնախմբություն  է եղել: «Ժողովուրդը գառներ էր նվիրաբերում եկեղեցուն, որոնք հետո ամբողջ գիշեր եփվում ու հետո բաժանվում է իրենց: Երեխեքը եկեղեցու սրահում Վարդանաց հետ կապված երգեր են երգում»,- պատմեց իմ բերյութաբնակ բարեկամը:

Մեզանում, եկեղեցու տոնախմբումը տոն չդարձավ. հոգևոր դասը ևս դուրս եկավ երթի, ժողովրդին հանդիպեց փողոցում, դե իսկ հարիսայի ու գառների մասին խոսելն ավելորդ է: Մարդկանց մեծ մասը վաղուց է մոռացել գառան մսի համը, ուր մնաց նվիրաբերի եկեղեցուն:

Մամուլում  հրապարակում է եղել այն մասին, որ իշխանությանը մոտ կանգնած աղբյուրները փոխանցում են, թե «Հայկական ժամանակ» թերթի լրագրող Հայկ Գևորգյանի խափանման միջոցը փոխելուց հետո կտրուկ փչացել են ՀՀ գլխավոր դատախազ Աղվան Հովսեփյանի և ոստիկանապետ Վովա Գասպարյանի հարաբերությունները: Ոստիկանապետը վիրավորված է Աղվան Հովսեփյանից, քանի որ համարում է, որ նա իր մեջքի հետևում ինտրիգներ է սարքել, որոնց հետևանքով ընկել է իր վարկանիշը նախագահի և ժողովրդի մոտ: Բանն այն է, որ Վովա Գասպարյանի ենթակաները կալանավորել էին Հայկին, իսկ Աղվան Հովսեփյանի ենթական վերացրեց կալանքի որոշումը:

Սա իհարկե մոտ է տրամաբանությանը, սակայն ճշմարտությունը չէ. բանն այն է, որ ոստիկանապետի և գլխավոր դատախազի հարաբերությունը երբեք էլ ջերմ չեն եղել. ավելին Գասպարյանը ժամանակին աշխատել է այն քննչական խմբում, որը ղեկավարել է Աղվան Հովսեփյանը: Սակայն Հայկ Գևորգյանի դեպքում, հարցը միանշանակ լուծվել ու լուծվելու էր Բաղրամայն 26-ում: Այնպես որ նրանց հարաբերություններում ենթատեքստ փնտրելն այս գործի հետ կապված, լուրջ չէ:

Արդեն մի քանի օր է մայրաքաղաքի Խորենացի փողոցի «Մետաքս» թաղամասի բազմաբնակարան շենքերի բնակիչները հայտնվել են կատաստրոֆիկ վիճակում.

Օրվա մեջ մի քանի անգամ, 5 — 10 -15 րոպեով անջատվում- միանում են շենքերի հոսանքը: Ու դա տեղի է ունենում ժամը 11:00 -12:00 -ի սահմաններում: Միգուցե նաև դրանից հետո, սակայն այդ ժամանակ արդեն աշխատանքային ժամ է ու ականատեսի վկայություն  չեմ կարող տալ, չնայած թաղամասում մարդիկ դժգոհում են նաև տարբեր ժամերի հովհարային անջատումներից:

Ավելորդ է ասել, որ տատանումների պատճառով բնակարանում առկա տեխնիկան վնասվում է,տարվա այս եղանակին խնդիրներ առաջացնելով մարդկանց համար, սակայն ամենատխուրը ջեռուցման համակարգի խնդիրն է: Անցյալ տարի ճիշտ նույնպիսի տատանումների պատճառով շարքից դուրս եկավ մեր քաղաքային հեռախոսը, վարդակին միացրած հեռախոսների էլսնուցիչները  և այլն, իսկ որ ամենակարևորն է` խափանվեց ջեռուցման համակարգը, որը կարգավորելու համար վարպետը մեզանից մի պատկառելի գումար ուզեց: Ճիշտ է,  ինչ որ փոխհատուցման համակարգ է մշակված,  սակայն այնքան թերի ու դանդաղ է գործում, որ պարզապես չես էլ ուզում օգտվել դրանից, իսկ ձմռանը ջեռուցման կաթսայի վնասման դեպքում, դա պարզապես անհնար է:

Ժամանակները փոխվել են, ու մարդիկ` այս դեպքում նորոգող վարպետներն այն վիճակում են, որ առիթը բաց չեն թողնում գումար աշխատելու, իսկ սառնամանիքն ու փչացած կաթսան հենց այդ առիթն է:

Ինչևէ, փորձեցինք Էլցանցի տեղամասից  ճշտել իրավիճակը. Այստեղ ասացին, որ տատանումը բարձրավոլտ է և իրենք պատասխանատու չեն. ավելին` իրենք ևս խնդիր ունեն կապված բնակչության բազմաթիվ ահազանգերի հետ:

էլցանցերի կենտոնական մասնաճյուղի տնօրեն Երջանիկ Էլիզբարյանը տեղում չէր, պատասխանատուն ասաց, որ իրենք են անջատում – միացնում հոսանքը, քանի որ սխեմա են փոխում, ու դա անում են, քանի որ անջատում են մեկ կայանը և սնուցումը միացնում մյուսին, որ բնակիչները անլույս չմնան: Իսկ արդյունքում 5- 10- 15 րոպե տևող անջատումներն էլ հավանաբար ոչ սրտացավորեն կամ ոչ վարպետորեն միացնելու արդյունքում է լինում:

«Հիմա ես ձեզ ոնց բացատրեմ, որ սխեմա ենք փոխում»,- ասաց զրուցակիցս: Պարզ չէ, արդյո՞ք սխեմա փոխելու ամենահարմար ժամանակն է հիմա, սակայն մի բան հաստատ է, որ ձմեռվա կեսին փչացած սարքավորումների տերերին ոչ մի բացատրություն ու սխեմա ցրտից ու սթրեսից չի փրկի: