Մարտի 13-ին՝ ժամը 15.30-ին, «Ախթալայի լեռնահարստացման կոմբինատ» ՓԲԸ-ից տեղե¬կություն է ստացվել, որ Ախթալայի կամրջի մոտ տեղի է ունեցել ավտոպատահար և անհրաժեշտ է փրկարարների օգնությունը:

Ըստ Արտակարգ իրավիճակների նախարարության հաղորդագրության՝ դեպքի վայր են մեկնել Լեռնափրկարար ծառայության Ախթալայի ջոկատի լեռնափրկարարները:

Դեռևս չպարզված հանգամանքներում կամրջի մոտակայքում ձորակն է ընկել «Ֆոլքսվագեն Գոլֆ» մակնիշի 21 ՕՍ 160 պ/հ ավտոմեքենան:

Լեռնափրկարարներն ավտոմեքենայից դուրս են բերել և Ալավերդու հիվանդանոց տեղափոխել մեքենայի վարորդ` 1988թ. ծնված Արթուր Շահկուլյանին և ուղևորներ` 1987թ. ծնված Ջոն Մանթաշյանին ու 1990 թ. ծնված Ռուբեն Հարությունյանին:

Ըստ բժիշկների` տուժածների վիճակը միջին ծանրության է:

Մարտի 14-ին առավելապես արևմտյան շրջաններում,  15-ին, 16-ին հանրապետության ողջ տարածքում, 17-ին արևելյան շրջաններում սպասվում են տեղումներ, 16-ին ամենուրեք ձյան տեսքով, 18-ին` առանց տեղումների եղանակ:  Ինչպես տեղեկացրեցին ՀՀ ԱԻՆ մամուլի գրասենյակից` քամին հարավ-արևմտյան   5-10 մ/վրկ, 15-17-ին  առանձին վայրերում` ուժգնացում 20-25 մ/վրկ,  լեռնային շրջաններում և լեռնանցքներում սպասվում է բուք, ճանապարհներին` մերկասառույց: Օդի ջերմաստիճանը 14-ին կբարձրանա 2-4, 15-ի ցերեկը, 16-17-ին, 18-ի գիշերը աստիճանաբար կնվազի ընդհանուր առմամբ 10-13 աստիճանով:  Երևանում`  Մարտի 14-ին, 17-ին  սպասվում է փոփոխական ամպամածություն, էական տեղումներ չեն սպասվում, 15-ին, 16-ին  ժամանակ առ ժամանակ սպասվում են տեղումներ, 16-ին` ձյուն, 18-ին` առանց տեղումների եղանակ:  15-17-ը հնարավոր է քամու ուժգնացում 15-20մ/վրկ:

Ինչպես տեղեկացնում էBBC-ն Շվեյցարիայի զբոսաշրջիկների ավտոբուսը բախվել է լեռնային թունելի պատին, ինչի հետևանքով Բելգիայի 30 քաղաքացի է մահացել, այդ թվում 22 երեխա: Դեպքը պատահել է Շվեյցարական Վալե գավառում, երեխաները լեռնադահուկային հանգստավայրում անցկացրած արձակուրդներից հետո տուն էին վերադառնում:  Ավտոբուսում 52 ուղևոր է եղել:
Դեպքի պատճառները ճշտվում են:

«Հայկական ժամանակ».Մալաթիա-Սեբաստիայում ծավալվող լուրերի համաձայն, օլիգարխ Սամվել Ալեքսանյանին պատկանող ձեռնարկությունների աշխատողներից պահանջում են որոշակի թվով անձնագրային տվյալներ ներկայացնել: Մասնավորապես, շարքային աշխատողներին` վաճառողներին կամ բանվորներին ասվել է, որ նրանցից յուրաքանչյուրը պետք է 35 հոգու անձնագրային տվյալ ներկայացնի: Անհրաժեշտ անձնագրային տվյալների թիվը, ըստ աշխատողի ունեցած դիրքի, բարձրանում է 100-ի, 200-ի և այսպես շարունակ: Ըստ նույն լուրերի, այս գործընթացը ղեկավարում է Սամվել Ալեքսանյանի կինը` Շողերինա Մկրտչյանը. նա է անձնագրային տվյալների «պլանները» սահմանում և վերահսկում, որպեսզի դրանք իրականացվեն:

Թեև պաշտոնապես դեռ չի մեկնարկել նախընտրական քարոզարշավը, սակայն մայրաքաղաքի Էրեբունի համայնքում Հանրապետական կուսակցությունն արդեն բացել է իր ընտրական շտաբները` տեղադրելով «Հավատանք, որ փոխենք» կարգախոսը, գրում է «Առավոտը»:

Աժ նախկին պատգամավոր Հակոբ Հակոբյանը (Ճոյտ), որը մտադիր է Աժ պատգամավորի թեկնածու առաջադրվել Արմավիրի թիվ 19 ընտրատարածքում, չի կարողացել ստանալ ՀՀԿ-ի աջակցությունը: ՀՀԿ-ն այստեղ սատարում է Սեյրան Սարոյանին:
Հակոբ Հակոբյանը, ահա, երեկ պատասխանելով թերթի թղթակցի հարցին` կուզեի՞ք Հանրապետական կուսակցությունը ձեզ սատարեր, պատասխանել է. «Կուսակցությունն ունի դրած սոցիալական խնդիր: Օրինակ, եթե վերցնենք «Փարոս» ծրագիրը: Տեսնո՞ւմ եք, պետությունն ում է օգնում` աղքատին, չունևորին, հո հարուստին չի՞ կարող աջակցել: …Հիմա էլ կարծում եմ, որ կուսակցությունը, ինչպես և պետությունը, առաջ է քաշել, որ այն անձինք, որոնք ժողովրդի կողմից մերժված են, նրանց կարողանա աջակցի, որպեսզի հետ վերադարձնի, ինտեգրի հասարակությանը, հակառակ դեպքում այդ մարդիկ վտանգավոր են դառնում հասարակության համար: Հիմա կուսակցությունը իմ պահով տեսնում է, որ ես դրա կարիքը չունեմ, հասարակության կողմից ես մերժված չեմ, գնում եմ ընտրությունների: Այնպես որ սոցիալական խնդիր է` ում կուզենան աջակցել, ում չեն ուզենա: …Դուք ե՞րբ եք դեղ խմում, երբ որ թույլ եք, հիվանդ եք…»:

«Չորրորդ ինքնիշխանություն». Թերթը գրում է, որ հետաքրքրվել է նախարար Արմեն Աշոտյանից` ո՞ւմ է պատրաստվում նշանակել Լեզվի պետական տեսչության պետ` Սերգո Երիցյանին, թե՞ Մարինե Հովյանին: «Վերջինս կատակով նկատեց, որ ֆեյսբուք սոցիալական ցանցում քվեարկություն է ընթանալու, որի արդյունքում էլ պարզ կդառնա, թե ով է հաղթողը: Իսկ ավելի լուրջ` նա ասել է, որ սահմանված ժամկետում կիմանանք, թե ում է տալու նախապատվությունը: Մեր տեղեկություններով, սակայն, նախկին ՕԵԿ-ական Սերգո Երիցյանն է վերստին նշանակվելու Լեզվի պետական տեսչության պետի պաշտոնում: Փաստորեն Աշոտյանը եւս չի կարողանում ձերբազատվել ՕԵԿ-ի «ժառանգությունից». Թերեւս մնում է եզրակացնել, որ որոշումը պարտադրված է շատ վերեւներից: Այնպես որ` շարունակեք լուրջ չվերաբերվել քաղծառայության մրցույթներին, որովհետեւ առանձնապես կարեւոր չէ` հաղթե՞լ եք այդ մրցույթում, թե՞ ոչ. կարեւորը` «թափով ծանոթի» առկայությունն է»,- գրում է «Չորրորդ ինքնիշխանություն»-ը:

Հայաստանի Ազգային ժողովի աշխատակազմի նախկին ղեկավար Գեղամ Ղարիբջանյան նշանակվել է Արաբական միացյալ էմիրություններում Հայաստանի դեսպան (նստավայրը` Աբու Դաբի):

Համապատասխան հրամանագիրը Հայաստանի նախագահ Սերժ Սարգսյանը ստորագրել է նախօրեին:

Նախագահի մամուլի գրասենյակից հայտնում են, որ Սերժ Սարգսյանի մեկ այլ հրամանագրով Վահագն Մելիքյանն ազատվել է ԱՄԷ-ում Հայաստանի դեսպանի պաշտոնից, նա համատեղության կարգով Բահրեյնի ու Քաթարի դեսպանի պաշտոններից:

Այսօր հրավիրված ասուլիսին «Նոր ժամանակներ» կուսակցության ղեկավար Արամ Կարապետյանը վերահաստատել է իր չառաջադրվելու որոշումը. «Մեր կուսակցությունը չի մասնակցելու ընտրություններին, իսկ ես ոչ համամասնականով, ոչ մեծամասնականով չեմ առաջադրվելու»:

Նրան լրացրել է ԱԺ պատգամավոր Մանվել Բադեյանը, գնահատելի և ազնիվ քայլ է համարել «Նոր ժամանակներ» կուսակցության ընտրություններին չմասնակցելը. «Պետք չէ գնալ ընտրություններին իմանալով, որ կպարտվեն», — ասել է նա:

Արամ Կարապետյանը բացատրել է իրադրությունը. «Բացատրություններն ինչպիսին էլ կլինեն, մեզ չեն հետաքրքրում: Մնացած կուսակցություններից ոչ մի բանով ավել կամ պակաս չենք: Մենք չենք ցանկանում վիճել փողի հետ, չինովնիկական իրավիճակի հետ»:

Նրանք համակարծիք էին նաև այն հարցում, որ Հայաստանում ընտրություններով որևէ բան փոխելն անհնար է և տնտեսական կտրուկ փոփոխություններ ընտրություններից հետո չեն կարող լինել: