Ս.թ. մարտի 28-ին , ՀՀ Ազգային  անվտանգության ծառայության և Ոստիկանության կողմից իրականացված  համատեղ օպերատիվ–հետախուզական միջոցառումների արդյունքում բացահայտվել  է  պաշտոնատար  անձի կողմից  կաշառակերության դեպք:

Քաղաքացի Հ-ի նկատմամբ  քրեական հետապնդում չիրականացնելու  դիմաց նրանից 500 ԱՄՆ դոլար կաշառք  գումար  ստանալու պահին,  ձերբակալվել է Երևանի «Կենտրոն»  Ոստիկանության բաժնի, հետաքննչական  բաժանմունքի հետաքննիչ, ոստիկանության լեյտենանտ Արթուր Հովսեփյանը:

ՀՀ Ազգային անվտանգության ծառայության կողմից նախապատրաստվում  են նյութեր Ա. Հովսեփյանի  նկատմամբ ՀՀ Քր. Օր-ի 311 հոդվածի /կաշառք ստանալ/ հատկանիշներով քրեական գործ հարուցելու համար:

ՀՀ ԱԱԾ Մամուլի կենտրոն

Այսօր` մարտի 28-ի գիշերը մոտ  03.30-ի սահմաններում,  Բագրատունյաց պողոտայում` Երևանյան լճի կամրջի հարևանությամբ տեղի է ունեցել վթար. Հայկ Ա-ն, ՎԱԶ 2109 մակնիշի  ավտոմեքենայով ընդհարվել է մայթեզրի մոտ կայանված BYD մակնիշի ավտոմեքենային, որն էլ իր հերթին ընդհարվել է ՎԱԶ 2107 մակնիշին ավտոմեքենային: Այս մասին տեղեկացնում է Ճանպարհային ոստիկանությունը:

Ըստ ՃՈ-ի վթարի հետևանքով տուժել են 7 հոգի: Մասնավորապես` տուժել են ՎԱԶ 2109-ի վարորդը և ուղևորներ՝ 26-ամյա Էդգար Հ.-ն, 23-ամյա Քրիստինե Ս.-ն, 27-ամյա Լուսինե Բ.-ն: Վերջիններս մարմնական վնասվածքներով տեղափոխվել են Արմենիա բժշկական կենտրոն: Տուժողների մյուս մասն էլ  BYD-ի ուղևորներ 42-ամյա Արմենուհի Մ.-ն, 26-ամյա Լիլիթ Պ.-ն, 37-ամյա Քրիստինե Ս.-ն տեղափոխվել են Սուրբ Գրիգոր Լուսավորիչ բժշկական կենտրոն:

News.am –ի տեղեկություններով, վրաերթի ենթարկված կանայք մարմնավաճառներ են եղել:Սակայն ի պատասխան կայքի հարցին, բժշկական կենտրոնից հայտնել են, որ նրանք իրենց մոտ նշված են եղել որպես պարողներ և արդեն դուրս են գրվել հիվանդանոցից:  Վթարը տեղի է ունեցել հենց այն վայրում, որտեղ իրենց ծառայություններն են մատուցում մարմնավաճառները:

Հ.Գ. Թերևս Ոստիկանապետ Գասպարյանը անդրադառնա խնդրին ու նրան գոնե հաջողվի գտնել չարչրկված այս հարցի լուծումը: Ի վերջո քաղաքակիրթ երկրներում, որտեղ մարմանավաճառությունը արտոնված է, նրանց ոչ միայն պահում են հատուկ հսկողության տակ` բժշկական և այլն, այլև որոշ երկրներում ապակիների հետևում, ապահովելով նրանց անվտանգությունը:

Այսօր ՀՅԴ խմբակցության պատգամավոր Լիլիթ Գալստյանը   ներկայացրել է իր հարևանի պատմածը` Մեծամորում մի կուսակցությունը «բոմբոներկա» է բաժանում, մյուսը` ջեմ, իսկ տեղի բնակչությունը երկու կողմից էլ վերցնում է եւ ուրախանում: Բնակիչներից մեկն էլ նշել է, թե ինչ լավ է երեխայի ծնունդը կկարողանա անել մանկապարտեզում:

 Լիլիթ Գալստյանը համոզված է.«Մենք այլանդակում ենք հասարակությանը, մեր իրականությունը մոդեռնացմանն այլընտրանք չունի, քանի  որ այս արևելյան աղբով մեր երկրի ճակատագիրը վտանգված է»,-ասաց նա: Նրա կարծիքով ընտրություններից առաջ, նախ պետք է ճշտել, թե ինչ երկիր է ուզում դառնալ Հայաստանը, ուր ենք գնում, որտեղ է ՀՀ քաղաքացու շահը, այնինչ ստեղծված իրավիճակը որեւէ կապ չունի մոռենիզացված Հայաստանի հետ:

Լրագրողներին հետաքրքիր էր, որ ՀՅԴ-ն սոցիալիստական ուղղվածության կուսակցություն է, սակայն ցուցակում հայտնվել են գործարարներ, Գալստյանն արձագանքեց. «Գիտեք, երբ դու խոսում ես խաղի կանոնների մասին եւ քո ընկերները խաղի կանոնները չեն փոխում, ակամայից նաև դու ես հարկադրված քո խաղի կանոնը բերել այդտեղ: Եթե մեր ցուցակում կան գործարարներ, որոնք կհայտնվեն խորհրդարանում, վայր կդնեն իրենց գործարարությունը և կզբաղվեն օրենսդիր աշխատանքով»:

«Հայկական ժամանակ».  Կինոռեժիսոր Տիգրան Խզմալյան, ազատամարտիկ ժիրայր Սեֆիլյան, քաղաքագետ Մանվել Սարգսյան, իրավապաշտպան Ստեփան Դանիելյան. սրանք այն մարդիկ են, որ որոշել են սեփական ձեռքերով ապամոնտաժել Մաշտոցի պուրակի բուտիկները:
Այս որոշումը կայացվել է` ի կատարումն բնապահպան-ակտիվիստների ձևավորած քաղաքացիական դատարանի վճռի: Ապամոնտաժողների խումբը համալրված է նաև այլ անձանցով:

«ՀՀ քաղաքացիների ժողով» նախաձեռնությունը նամակ է գրել ՀՀ Ոստիկանապետ Վլադիմիր Գասպարյանին։ Խոսքը վերաբերվում է Մաշտոցի այգու շինարարությանը: Ակտիվիստները ոստիկանապետին տեղեկացնում են, որ մարտի 31-ին ժամը 13:00-ին Մաշտոցի պուրակում նախատեսում են ապամոնտաժել կառուցված տաղավարները: Նրանք պահանջում են ապամոնտաժման աշխատանքների ժամանակ ապահովել հասարակական կարգի պահպանությունը և աշխատանքներ իրականացնող անձանց անվտանգությունը և խոստանում չվնասել ապամոնտաժվող գույքը։

Նամակն ամբողջությամբ.
Հարգելի պարոն Գասպարյան,

2011թ դեկտեմբերի 15-ին Երևանի Քաղաքապետի կողմից «Կենտրոն-Կանաչապատում» ՓԲԸ-ին տրվել է Մաշտոցի Պուրակում (Մաշտոցի պողոտա 22/1 հասցեում) տաղավարների տեղադրման թույլտվություն:

Այդ որոշումը առաջացրել է Երևանի համայնքի բազմաթիվ անդամների արդար և ողջամիտ դժգոհությունը։ Բոլորի համար ակնհայտ է, որ վերջին տարիների ընթացքում տեղի է ունեցել Երևան քաղաքի հանրային նշանակության տարածքների զգալի մասնավորեցում՝ էապես նվազել են քաղաքի կանաչապատ գոտիները և վատթարացել է ճարտարապետական միջավայրը։

Մի շարք երիտասարդական քաղաքացիական նախաձեռնությունների միավորված ջանքերի շնորհիվ Մաշտոցի Պուրակում տաղավարների տեղադրման աշխատանքը կասեցված է, իսկ ՀՀ կառավարությունը որոշում է ընդունել, որ տաղավարները ենթակա են ապամոնտաժման երեք տարվա ընթացքում։

Իր որոշման մեջ կառավարությունը չի հիմնավորել տաղավարների ապամոնտաժման համար երեք տարի ժամկետ տրամադրելու պատճառը։ Դրա հետևանքով քաղաքացիների և Երևանի քաղաքապետի միջև առաջացած վեճը չի ստացել իր վերջնական լուծումը։

Չնայած Հայաստանի Սահմանադրությամբ նախատեսված և պետության միջազգային պարտավորություններից բխող նորմերի` հանրային իրավունքների պաշտպանությանը վերաբերող դատական նախադեպերը վկայում են, որ հասարակությունը լիովին մեկուսացվել է որոշումների կայացման գործընթացից և կայացված անօրինական որոշումները դատարանում բողոքարկելու հնարավորությունից: Հասարակության ձայնը խլացված է օրենսդրական ձևական սահմանափակումներով, մարդիկ զրկվել են արդարության կարևորագույն պահանջներից մեկի` լսված լինելու իրավունքից: Այն հարցերում, որտեղ արդարադատությունն այլևս մատչելի չէ հասարակությանը, յուրաքանչյուր քաղաքացի ստիպված է ձեռնարկել հանրային իրավունքների ինքնապաշտպանության համարժեք միջոցներ:

Սույն թվականի մարտի 17-ին երիտասարդական քաղաքացիական նախաձեռնությունների անդամները, ղեկավարվելով անմիջական ժողովրդավարության, իրավունքի գերակայության և սահմանադրականության սկզբունքներով, ձևավորել են «Քաղաքացիական արդար և անկախ դատարան»։ Իր հնարավորությունների սահմաններում այդ կոլեգիալ հանրային էքսպերտների մարմինը կատարել է վեճի առարկային վերաբերող փաստերի հետազոտություն և կազմել իրավական եզրակացություն։ Քաղաքացիների դատարանը պահանջել է Երևանի Քաղաքապետարանից 10-օրյա ժամկետում ապամոնտաժել Մաշտոցի Պուրակում տեղադրված տաղավարները և այգին բարեկարգել ու օգտագործել դրա նպատակային նշանակությանը համապատասխան: Երևանի Քաղաքապետը թողել է այդ պահանջը անպատասխան։

Սույն թվականի մարտի 27-ին գումարվել է Երևան քաղաքում բնակվող, Երևանի համայնքի անդամ, ՀՀ քաղաքացիների ժողով: Ժողովում մասնակցել են գիտության, մշակույթի, լրատվության, քաղաքագիտության ոլորտների գործիչներ, Արցախյան շարժման և պատերազմի մասնակիցներ։ Ժողովը բարձր է գնահատել երիտասարդության կողմից ցուցաբերած հետևողականությունը՝ հանրային շահերը և իրավունքները պաշտպանելու գործում և քննադատել է պաշտոնատար անձանց անկարողությունը՝ ընդունել ողջամիտ և օրինական որոշում առաջացած խնդիրը կարգավորելու համար։

Ընդունելով «Քաղաքացիական արդար և անկախ դատարանի» հեղինակությունը, վստահելով դրա անկախությանն ու անկողմնակալությանը, իրավական եզրակացության և վճռի հիմնավորվածությանը, հաշվի առնելով նաև բազմաթիվ այլ Էական նշանակություն ունեցող հանգամանքներ՝ ժողովի մասնակիցները որոշել են հայտնել իրենց պատրաստակամությունը՝ ապամոնտաժել Մաշտոցի պուրակում անօրինական կառուցված տաղավարները սեփական միջոցներով: «Կենտրոն-Կանաչապատում» ՓԲԸ-ի տնօրինությունը պատշաճ ծանուցվել է իրեն պատկանող, բայց անօրիական ձևով կառուցված տաղավարների ապամոնտաժման անհրաժեշտության վերաբերյալ:

Ուստի տեղեկացնում ենք Ձեզ, որ ս/թ մարտի 31-ին ժամը 13:00-ին Մաշտոցի Պուրակում նախատեսված է ապամոնտաժել անօրինական կառուցված տաղավարները: Ապամոնտաժման աշխատանքները կատարելու են հետևյալ անձինք.

1. Աբրահամյան Էմիլ

2. Դանիելյան Ստեփան

3. Խզմալյան Տիգրան

4. Կարապետյան Հարություն

5. Հովհաննիսյան Արմեն

6. Ղահրիյան Հայկազն

7. Ղուկասյան Անդրիաս

8. Շիկոնյան Կարեն

9. Սարկիսյան Մանվել

10. Սարոյան Սարո

Ապամոնտաժման աշխատանքներն իրականացնելու համար օգտագործվելու են հետևյալ գործիքները.

1. էլեկտրական սրիչ (բոլգարկա) RTR Rother N. S.N. ELS 101-0192-0732 — 1 (մեկ) հատ,

2. պտուտակահան STAREX — 12 (տասներկու) հատ,

3. հարթաշուրթ KLY-TEK 160mm — 5 (հինգ) հատ,

4. ճոպան կտրող գործիք STAREX – 2 (երկու) հատ,

5. դուր ORIENT — 2 (երկու) հատ,

6. ապակի բրնող գործիք SUCTIONCUP – 4 (չորս) հատ:

Ապոմոնտաժումը նախատեսված է իրականացնել կազմակերպված եղանակով, առանց հասարակակ կարգը խախտելու, մասնագիտական մեթոդներով և գործիքներով, առանց սեփականատիրոջ գույքին վնաս պատճառելու։ Հաշվի առնելով, որ ոստիկանությունը ներկա դրությամբ իրականացնում է Մաշտոցի Պուրակում տաղավարների պահպանությունը.

Պ Ա Հ Ա Ն Ջ ՈՒ Մ Ե Ն Ք

1. Ապահովել վերը նշված ՀՀ քաղաքացիների ազատ մոտեցումը տաղավարներին` դրանց ապամոնտաժման աշխատանքները կատարելու համար:
2. Ապամոնտաժման աշխատանքների ժամանակ ապահովել հասարակական կարգի պահպանությունը և աշխատանքներ իրականացնող անձանց անվտանգությունը:

Կից ներկայացնում ենք

1.«Քաղաքացիական արդար և անկախ դատարանի» վճիռը
2.«Կենտրոն-Կանանչապատում» ՓԲԸ -ին ուղղարկված նամակի պատճեն

Յուրաքանչյուր անցնող օրվա հետ բացահայտվում են Թուրքիայի վատ վարքագիծը քողարկելու Օբամայի վարչակազմի ամոթալի նոր դավադրությունները:

Նորագույն խայտառակությունը կապված է ԱՄՆ պետդեպարտամենտի` Աշխարհում կրոնի ազատության հարցերով ԱՄՆ հանձնաժողովի զեկույցի բովանդակությունը փոխելու քողարկված փորձի հետ: Զեկույցում Թուրքիայի կառավարությունը դատապարտվում էր քրիստոնյա փոքրամասնությունների կրոնական իրավունքները ոտնահարելու համար: Հանձնաժողովը ԱՄՆ Կոնգրեսի կողմից հիմնադրված անկախ, երկկուսակցական, դաշնային մարմին է, որը կարող է «առաջարկություններ անել կրոնական ազատության պաշտպանության վերաբերյալ` զերծ մնալով արտաքին քաղաքականության նկատառումներից», Հանձնաժողովի անդամներից մեկի համաձայն:

Մարտի 20-ին Հանձնաժողովը հրապարակեց մեծածավալ զեկույց, որում մանրամասնորեն նկարագրվում են «թուրքական կառավարության կողմից կրոնի կամ հավատքի ազատության նկատմամբ կիրառվող շարունակական և արտասովոր սահմանափակումները, որոնք բացասական են անդրադառնում Թուրքիայի բոլոր կրոնական համայնքների վրա և հատկապես սպառնում են երկրի ոչ մուսուլմանական կրոնական փոքրամասնություններին»:

Զեկույցում առաջարկվում էր, որ ԱՄՆ Կառավարությունը Թուրքիային համարի կրոնական ազատությունը ոտնահարող 16 վատագույն պետություններից մեկը՝ Բուրմայի, Չինաստանի, Եգիպտոսի, Էրիտրեայի, Իրանի, Իրաքի, Նիգերիայի, Հյուսիսային Կորեայի, Պակիստանի, Սաուդյան Արաբիայի, Սուդանի, Տաջիկստանի, Թուրքմենստանի, Ուզբեկստանի և Վիետնամի հետ միասին:

Հանձնաժողովի առաջարկությամբ` Թուրքիան կտրուկ զիջեց իր տեղը «վերահսկվող երկրների ցուցակից» և մտավ 16 «հատուկ մտահոգության առարկա երկրների» սև ցուցակի մեջ:

Ինչպես և ակնկալվում էր, թուրք պաշտոնատարները դիմեցին իրենց սովորական անարգական քարոզարշավին` ժխտելով Հանձնաժողովի հրապարակած արդյունքները: Առավել անհանգստացնող էին ԱՄՆ պետդեպարտամենտում թուրքասերների նենգ գործողությունները: Հանձնաժողովի ինն անդամներից մեկը` Նինա Շեան հրապարակել էր մի ահազանգող հոդված, որտեղ բացահայտում էր այն ծածուկ ճնշումները, որոնք Օբամայի վարչակազմը գործադրում էր Հանձնաժողովի վրա` Թուրքիայի դատապարտումը մեղմացնելու համար:

Տիկին Շեան Ամերիկայի խոշորագույն «Նեշնլ Ռեվյու» պարբերաթերթի իր հոդվածում հայտնեց, որ Պետքարտուղարի Մարդու իրավունքների հարցերով օգնական Մայքլ Պոսները, Օբամայի կողմից նշանակված հանձնաժողովի մեկ անդամի կողմից տեղեկանալով, որ Հանձնաժողովը 5 կողմ և 4 դեմ ձայներով որոշել է իր տարեկան զեկույցում Թուրքիային ընդգրկել սև ցուցակում, ստիպել է հանձնաժողովի մեկ այլ անդամին փոխել իր դիրքորոշումը հօգուտ Թուրքիայի: Մինչ այդ, զեկույցն արդեն հրապարակվել էր և շատ ուշ էր փոխել Հանձնաժողովի առաջարկությունը, որտեղ Թուրքիան նշվում էր որպես կրոնական ազատության հիմնական ոտնահարող։ Ինչպես և պահանջվում էր, զեկույցը ներկայացվել է նախագահ Օբամային, ԱՄՆ պետքարտուղար Քլինթոնին և ԱՄՆ կոնգրեսի ղեկավարներին։

Հետագայում պարզվեց, որ Քրքլենդ, Վաշինգտոնում Northwest համալսարանի նախագահ Դոն Արգուն հանձնաժողովի այն անդամն էր, ում ստիպել էին փոխել Թուրքիայի մասին իր դիրքորոշումը։ Հետաքրքիր է, որ զեկույցը հրապարակելուց երկու օր հետո Շեայի, Արգուի և հանձնաժողովի երեք այլ անդամների պաշտոնավարման ժամկետն ավարտվեց։

Թուրքիայի արտաքին գործերի նախարարությունը, կտրուկ արձագանքելով Հանձնաժողովի կողմից Թուրքիայի քննադատությանը, հայտարարեց զեկույցն «առոչինչ»։ Վաշինգտոնում Թուրքիայի դեսպան Նամիկ Թանը բնութագրեց զեկույցը որպես «քաղաքական դրդապատճառներով թելադրված»: Հանձնաժողովի նախագահ Լեոնարդ Լեոն  ուշադրություն չդարձրեց Թուրքիայի բողոքներին։ «Ինձ չի հետաքրքրում, թե ինչ է մտածում [Թուրքիայի] արտաքին գործերի նախարարը, քանի որ այս զեկույցը նրա համար չէ, այն ԱՄՆ պետական դեպարտամենտի համար է», ասաց Լեոն Թուրքիայի «Զեման» թերթին։

Ցավոք սրտի, ԱՄՆ պետդեպարտամենտի խոսնակը, EurasiaNet.org–ին տված իր հարցազրույցում, շարունակեց քողարկել Թուրքիայի վատ վարքագիծը` նշելով, որ «ԱՄՆ դեպարտամենտը չի սատարում Թուրքիայի «հատուկ մտահոգության առարկա երկրների սև ցուցակի» մեջ ներառումը, թեև կարծում է, որ կրոնական ազատությունը խթանելու հարցում Թուրքիան դեռ անելիքներ ունի»:

Հանձնաժողովի զեկույցը ներառում էր լուրջ մեղադրանքների մի երկար ցանկ, որով մեղադրվում էր Թուրքիայի կառավարությունը՝

* «խիստ կանոնակարգեր» կիրառելու, «կրոնական խմբերի լիիրավ իրավական կարգավիճակը մերժելու [և] բոլոր կրոնական համայնքների կրոնական ազատության իրավունքները խախտելու համար»,

*  «փոքրամասնությունների կրոնական համայնքների գործերին միջամտելու, հասարակական խտրականության և կրոնական փոքրամասնությունների նկատմամբ պատահական բռնությունների, կրոնական հանդերձանքի հարցում սահմանափակումներ մտցնելու և Թուրքիայի հասարակությունում ու մամուլում անտիսեմիտիզմի համար»,

*«ոչ մուսուլմանական համայնքներին հոգևորականներ կրթելու, կրոնական կրթություն առաջարկելու և պաշտամունքի վայրեր ունենալու ու պահպանելու իրավունքները մերժելու համար»,

—«Թուրքիայում ապրող կրոնական փոքրամասնությունների համայնքների կենսունակությանն ու գոյատևմանը սպառնացող» երկարաժամկետ քաղաքականություն վարելու համար,

* «հունական, հայկական և սիրիական ուղղափառ եկեղեցիների, հռոմեական կաթոլիկ և բողոքական եկեղեցիների ու հրեական համայնքի, ինչպես նաև Սուննի մուսուլմանական համայնքի և երկրի ամենամեծ փոքրամասնության` Ալևիների կրոնական ազատությունը սահմանափակելու համար»։

Զեկույցում հանգմանալից նկարագրվում են հայկական համայնքի նկատմամբ կիրառվող սահմանափակումները, ներառյալ նոր հոգևորականների պատրաստման Թուրքիայի կառավարության կողմից արգելումը և նրա միջամտությունը «Հայկական Պատրիարքության կրոնական առաջնորդության ընտրության գործընթացում»։

Հանձնաժողովն առաջարկել է, որ ԱՄՆ կառավարությունը ստիպի Թուրքիային «վերացնել Թուրքիայի քրեական օրենսգրքի 301–րդ հոդվածը, որը սահմանափակում է մտքի և խոսքի ազատությունը և բացասական ազդեցություն ունի կրոնի կամ հավատքի վրա»։ Զեկույցը նաև ընդունում է, որ «նույնիսկ 100 տարի առաջ տեղի ունեցած քրիստոնյաների ցեղասպանության վերաբերյալ քննարկում բացելը Թուրքիայում քրեորեն հետապնդվում է»։

Զավեշտալի է, որ Հարավային Կորեայում մարտի 26–ին Թուրքիայի վարչապետ Էրդողանի հետ հանդիպումից հետո նախագահ Օբաման հայտնեց մամուլին. «Ես շնորհավորեցի վարչապետին Թուրքիայում կրոնական փոքրամասնությունների իրավունքները պաշտպանելուն ուղղված նրա ջանքերի համար»։

Ամոթալի է, որ ԱՄՆ անսկզբունք պաշտոնատարները վերաբերվում են գերատեսչության տքնաջան հետազոտությանը և հիմնավորված առաջարկություններին նման արհամարհական ձևով։

Հարութ Սասունյան

«Կալիֆորինիա Կուրիեր» թերթի գլխավոր խմբագիր

Թարգմանիչ` Կարինե Գևորգյան

«Հայացք» թերթի տեղեկություններով,  վերջերս լուրեր են շրջանառվել, թե «Ջերմուկի Մայր գործարանը» վաճառվել է: «Սակայն ըստ մեր տեղեկությունների` գործարանը ոչ թե վաճառվել է, այլ շուրջ 1 ամիս առաջ տրվել է հավատարմագրային կառավարման:

Ըստ տեղեկությունների` գործարանի սեփականատեր, ամերիկահայ Կայծակ Զեթլյանը դրա ղեկավրումը վստահել է «Սպայկա» ընկերությանը, որը զբաղվում է մրգերի ու բանջարեղենի արտահանմամբ, հյութերի արտադրությամբ եւ այլն: Զեթլյանը այլ բիզնեսով զբաղվածության պատճառով է գործարանը հավատարմագրային կառավարման հանձնել:

Խոսակցություններ կան, որ «Ջերմուկի Մայր գործարանով» մինչ պայմանավորվածության ձեռքբերումը հետաքրքրված են եղել նաեւ Զանգեզոուրի պղնձամոլիբդենային կոմբինատի գլխավոր տնօրեն Մաքսիմ Հակոբյանը եւ Սաշիկ Սարգսյանը», գրում է թերթը:

Թե ինչ պայմանավորվածություններ կան կողմերի միջև` դեռ հստակ չէ: Սակայն գործարանի մի քանի հարյուր աշխատողներ այսօր մտավախություն ունեն առաջիկայում աշխատակազմում հնարավոր փոփոխությունների առումով: Կրճատումների մասին լուրջ խոսակցություններ թեպետ չեն եղել, սակայն աշխատակիցները մտահոգվում են, որ իրենք պարզապես կարող են փոխարինվել այլ մարդկանցով:

Այսօր «Ջերմուկ» հանքային ջրի բազմաթիվ արտադրողներ

««Օրինաց երկիր» կուսակցության համամասնական ընտրացուցակը բավական զավեշտալի տեսք ունի.այն գլխավորում է Արթուր Բաղդասարյանը, եզրափակում Արթուր Մարգարյանը:»,- գրում է «Ժողովուրդ» -ը: «Արթուր Բաղդասարյանին գիտեն բոլորը, իսկ ահա Արթուր Մարգարյանը ՀՀ ազգային անվտանգության խորհրդի աշխատակազմի վարորդն է եւ ՕԵԿ անդամ: Ստացվում է, որ 160 հազար անդամ ունեցող այդ կուսակցությունում իրականում կադրերի պակաս կա, ինչը լրացնում են վարորդների հաշվին: Նկատենք նաեւ, որ բացի վարորդներից, «Օրինաց Երկիր» կուսակցության ընտրացուցակում ընդգրկված են նաեւ այդ կուսակցության գործավարները, հրահանգիչները. մի խոսքով` ում տեսել, ցուցակ են տարել»,- գրում է թերթը:

Մամուլի կողմից հրապարակված ՀՀԿ համամասնական ցուցակի 76 տեղանոց նախնական ցուցակում Հայաստանի «ամենաերկարակյաց մարզպետ», 12 տարի պաշտոնավարող Արմեն Ղուլարյանը չկար: Սակայն այնուհետև հրապարակված ՀՀԿ պաշտոնական ցուցակում Տավուշի մարզպետ Արմեն Ղուլարյանը 65-րդ տեղում է:
«Առավոտի» թղթակիցը հավաստի աղբյուրներից տեղեկացել է, որ մարզպետի համար ՀՀԿ ղեկավարության մոտ մի ազդեցիկ միջնորդ բանակցություններ է վարել: Նա միջնորդություն անելիս կուսակցության ղեկավարությանը հզոր փաստարկ է ներկայացրել, ըստ որի` Տավուշի մարզպետին համամասնական ցուցակում ընդհանրապես չընդգրկելը կամ ցուցակի ստորին հորիզոնականներում տեղ տալը կարող է ընկճել Տավուշի մարզի հանրապետականներին, և դրա հետևանքով ՀՀԿ-ն մայիսի 6-ին Տավուշի մարզում կարող է քիչ ձայներ ստանալ:

«Ժողովուրդ»-թերթը գրում է, որ Սոցիալական ապահովության պետական հիմնադրամի նախկին պետ ՀՀԿ-ական Վազգեն Խաչիկյանը, որ հրաժարական էր տվել կենսաթոշակների ոլորտում բացահայտված յուրացումների արդյունում , ընդգրկված չէ ՀՀԿ համամասնական ցուցակում: «Իսկ չարաշահումների առիթով հարուցված քրեական գործը քննվում է: Ոստիկանության հասարակայնության հետ կապերի եւ լրատվության վարչությունից տեղեկացանք, որ Վազգեն Խաչիկյանն արդեն հարցաքննվել է այդ գործով, սակայն ամիսներ առաջ: Այժմ գործով նախաքննություն է ընթանում , իսկ թե մինչեւ երբ կտեւի այն, հայտնի չէ: Նկատենք, որ Խաչիկյանն այդ գործով այդպես էլ մեղադրյալի կարգավիճակ չի ստացել»: