Մայիսի 6-ին կայանալիք խորհրդարանական ընտրությունները դիտարկելու համար Կենտրոնական ընտրական հանձնաժողովում գրանցվել է 15 տեղական հասարակական կազմակերպությունում:

Ըստ Կենտրոնական ընտրական հանձնաժողովի պաշտոնական կայքի,  գրանցվել են հետևյալ կազմակերպությունները` «Գերագույն խորհուրդ-պատգամավորական ակումբ» — 5 դիտորդ , «Ընտրությունը քոնն է» — 3334 դիտորդ, «Հելսինկյան քաղաքացիական ասամբլեայի Վանաձորի գրասենյակ» — 27 դիտորդ, «Բռունցք» – 1246 դիտորդ, «Համահայկական երիտասարդական ասոցիացիա» — 1207 դիտորդ, «Համաչափ զարգացում համայնքային զարգացման» — 1028 դիտորդ, «Երիտասարդ դիվանագետների ակումբ» — 1535 դիտորդ, «Իրավակիրթ հասարակություն» — 585 դիտորդ, «Հիմնաքար» — 884 դիտորդ, «Հաղթանակի զավակներ» — 1173 դիտորդ, «Շենացնենք մեր գյուղը» — 1623 դիտորդ, «Կարողություն և զարգացում հանուն քաղաքացիական հասարակության» — 71 դիտորդ, «Ընտրական համակարգեր կենտրոն» — 27 դիտորդ, «Հայաստանի «Աթուռ» ասորական ասոցիացիա» — 11 դիտորդ, «Միջմշակութային երկխոսության, ժողովրդավարության և  խաղաղության երիտասարդական ակումբ» — 22 դիտորդ:

«Հրապարակ».  Երեկ Ազատության հրապարակում կազմակերպված ՀԱԿ հանրահավաքին մասնակցում էր դերասան, երգիծական հեռուստահաղորդումներից բոլորին հայտնի Հովհաննես Ազոյանը` Հովոն: Նա նույնիսկ հարթակ բարձրացավ և ջերմ բարևեց Խաչատուր Սուքիասյանին: Ազոյանը երևի որոշել է փորձել ընդդիմադիրի փշոտ ու դժվարություններով լեցուն դերը: Օրեր առաջ նա այցելել էր նաև Մաշտոցի պուրակ: Իսկ հեռուստատեսությունում չեն սիրում ակտիվ և հատկապես ընդդիմադիր հայացքներ ունեցողներին:

«Հայկական ժամանակ». Ի՞նչ հակասություններ էին առաջացել «Ազատ դեմոկրատներ» կուսակցությունում, ինչպե՞ս ստացվեց, որ նորաստեղծ այդ կուսակցության հիմնադիրներից ՀՀՇ վարչության նախկին նախագահ Արարատ Զուրաբյանը և Գառնիկ Գևորգյանը չհայտնվեցին «Ժառանգության» և «Ազատ դեմոկրատների» միասնական համամասնական ցուցակում, ի՞նչ են մտածում Զուրաբյանն ու Գևորգյանը, և ինչու՞ են բոլորն այս ամենի մասին համառորեն լռում:
Ըստ խիստ հավաստի տեղեկությունների, մինչև վերջին պահը «Ժառանգության» ու «Ագատ դեմոկրատների» միջև բանակցություններ են ընթացել ընտրություններին դաշինքով մասնակցելու ձևաչափի շուրջ: «Ավելին, ինչպես մեզ հաջողվեց պարզել, անգամ դաշինքի անունն է քննարկվել: Տարբերակները երկուսն են եղել` «Նոր Հայաստան» կամ «Րաֆֆի+»: «Ազատ դեմոկրատների» ներկայացուցիչները միայն մամուլից են տեղեկացել, որ որոշվել է ընտրություններին մասնակցել «Ժառանգության» ցուցակով: Այսինքն, որոշումը կայացվել է բոլորովին այլ մակարդակում, և դրա մասին իմացել է ընդամենը մի քանի հոգի: «Ժառանգության» ներկայացուցիչները դեռ մի քանի օր առաջ իմացել են, որ «Ազատ դեմոկրատները» մտնելու են իրենց ցուցակ, բայց «Ազատ դեմոկրատների» վարչության անդամները և հիմնադիր ներկայացուցիչները տեղյակ չեն եղել: Միասնական ցուցակի հրապարակումից հետո «Ազատ դեմոկրատների» վարչության անդամները, ըստ հավաստի տեղեկությունների, բացատրություն են պահանջել կուսակցության նախագահ Խաչատուր Քոքոբելյանից: Եղել է մեծ վեճ: Ինչպես հայտնում են մեր աղբյուրները, մասնավորապես Արարատ Զուրաբյանը և Գառնիկ Գևորգյանը շատ կտրուկ են դրել հարցը, որ այդ ձևաչափով ընտրություններին մասնակցել չի կարելի, ավելի լավ է` միայնակ գնալ և արժանապատիվ պարտություն կրել, քան մտնել Րաֆֆու ցուցակ: Բայց երբ հասկացել են, որ որոշումը վերջնական է, ու որևէ բան հնարավոր չէ փոխել, պահանջել են իրենց անունները հանել միասնական ցուցակից` դա համարելով անպատվաբեր: «Ազատ դեմոկրատների» վարչությունն այժմ, ըստ էության, պարալիզացված է: Արարատ Զուրաբյանը և Գառնիկ Գևորգյանը, թերևս, կլքեն կուսակցությունը, ըստ էության, այլ տարբերակ չկա էլ: Այսինքն, նորաստեղծ այդ կուսակցությունն արդեն լուրջ ճաքեր է տվել»,- գրել է թերթը:

«Ժամանակ». Թերթը գրում է, որ թիվ 19 ընտրատարածքում մեծամասնական ընտրակարգով պատգամավորի թեկնածու առաջադրված Հակոբ Հակոբյանը պատրաստվում է դիմել վարչական դատարան` բողոքարկելու ՀՀԿ-ի կողմից նույն ընտրատարածքում առաջադրված գեներալ- մայոր Սեդրակ Սարոյանի` վերջին 5 տարում Հայաստանում մշտապես բնակվելու վերաբերյալ տրամադրված տեղեկանքի իսկությունը: « Այդ մասին նա ասաց «Ժամանակ»-ի հետ զրույցում: Հիշեցնենք, որ թիվ 19 ԸԸՀ-ն նախօրեին Սեդրակ Սարոյանին գրանցել էր պատգամավորի թեկնածու»,- գրում է «Ժամանակ»-ը:

Այսօր խոշոր   ավտովթար է տեղի ունեցել Գեղարքունիքի մարզում։ ԻնչպեսTert.am–ին դեպքի վայրից հայտնել  է ֆոտոլրագրող Գագիկ Շամշյանը, ժամը 00.40–ի սահմաններում, Վարդենիսի կայազորային հոսպիտալից Ոստիկանության Վարդենիսի բաժին հայտնել են, որ ժամը 00.20–ի սահմաններում Վարդենիս–Մեծ Մասրիկ ավտոճանապարհի 3-րդ կիլոմետրին իրար են բախվել 32-ամյա Արսեն Բալասանյանի վարած «Մոսկվիչ–412» կիսաբեռնատար մակնիշի 06 ՕԼ 862 համարանիշի և 28-ամյա Վարդան Աբգարյանի վարած «ՎԱԶ–2106» մակնիշի 67 ՕՍ 480 համարանիշի ավտոմեքենաները։ Վթարի հետևանքով «ՎԱԶ–2106»–ի վարորդ Վ. Աբգարյանը տեղում մահացել է, իսկ նրա ուղևորներ Գյումրիի բնակիչ 32-ամյա Վարդան Թադևոսյանը, Շիրակի մարզի Ոսկեհասկ գյուղի բնակիչ 25-ամյա Կորյուն Հակոբյանը և «Մոսկվիչ–412»–ի վարորդ Ա. Բալասանյանը մարմնական վնասվածքներով տեղափոխվել են Վարդենիսի կայազորային հոսպիտալ։

Վթարի վայրում հավաքվածները Գագիկ Շամշյանին պատմել են, որ մահացածն ու բոլոր վիրավորները ՀՀ ՊՆ պայմանագրային զինծառայողներ են։ Վթարի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ հրամանատար Սերգեյ Հակոբյանի գլխավորությամբ։ Տեղում է նաև Ոստիկանության Վարդենիսի բաժնի օպերատիվ խումբը՝ քննիչ Գարիկ Երանոսյանի գլխավորությամբ։ Քանի որ վթարի ենթարկված բոլոր անձինք ՀՀ ՊՆ պայմանագրային զինծառայողներ են, դեպքի վայր հրավիրվեցին ՀՀ ՊՆ ՌՈ քննչական 5-րդ կայազորային բաժինը։ Նշված բաժնում փաստի առթիվ նյութեր են նախապատրաստվում։

«Առավոտ».  Թերթի գլխավոր խմբագիրն այսօրվա համարում գրում է. «Փողոցում մարդիկ ինձ կանգնեցնում, հարցնում են` ո՞ւմ տանք ձայնը: Այդ հարցն ինձ շփոթեցնում է` իմ խառնվածքով ես չափազանց հեռու եմ կոչեր անելուց և նույնիսկ խորհուրդներ տալ դժվարանում եմ: Գոռոզները, փրկիչներն ու առաքյալները մեր կյանքում այնքան շատ են, որ, հաստատ, այդ զանգվածում իմ կարիքը չկա: Ես վարվում եմ այս կամ այն կերպ, բայց գիտակցում եմ, որ դա իմ անձնական ընտրությունն է, և ոչ մեկին` ոչ կնոջս, ոչ երեխաներիս, ոչ այն մարդկանց, ում հետ աշխատում եմ, ոչ էլ, առավել ևս, մնացածներին չեմ քարոզում, չեմ համոզում ինձ ընդօրինակել: Ընտրությունները դրա մասնավոր դեպքն են, այստեղ էլ ես կարող եմ ասել, թե ես ինչպես եմ վարվելու` որևէ մեկին չպարտադրելով նույնն անել:
Ես քվեարկելու եմ բոլորի դեմ, այսինքն` ինչ-որ մի ձևով անվավեր եմ դարձնելու իմ քվեաթերթիկը: 2007-ին և 2008-ին ես ձայնս տվել եմ, համապատասխանաբար, «Ժառանգությանն» ու Լևոն Տեր-Պետրոսյանին: Այս ցիկլում ես նույնը չեմ անի` շարունակելով բարձր գնահատել Հայաստանի առաջին նախագահի հսկայական ավանդը պետության կայացման և Արցախի ազատագրման գործում: Ավելացնեմ նաև, որ ՀԱԿ-ի` իշխանության հասցեին քննադատության 70 տոկոսի հետ ես համաձայն եմ: Բայց այս պահին Կոնգրեսի քարոզչության հիմքում հետևյալ թեզն է` կամ կանգնում եք ժողովրդի, կամ էլ ավազակապետության կողքին, իսկ ժողովուրդը, բնականաբար, ՀԱԿ-ն է մարմնավորում: Հենց այդ թեզով են առաջնորդվում ՀԱԿ-ի պատանի և ոչ այնքան պատանի «խունվեյբինները»: Կարող եմ կրկնել Վլադիմիր Նաբոկովի խոսքը` բոլշեւիկների (իմա` հարթակային հռետորների) հետ իմ հակասությունները գեղագիտական են:
Բոլշևիկյան պարանոյայի չափաբաժինն ամենաքիչն է «Ժառանգության» մեջ: Սակայն այդ կուսակցության ցուցակում անսպասելիորեն հայտնվեցին մարդիկ, որոնք չափազանց հեռու են ազատականության, ժողովրդավարության և, որն ինձ համար էական է, լրագրության մասին իմ պատկերացումներից: Հօգուտ այդպիսի ցուցակի ես չեմ կարող քվեարկել:
Դուք կհարցնեք, թե ինչու քաղաքական ուժի որոշ մասի իմ բացասական ընկալումը ես տարածում եմ այդ ամբողջ ուժի վրա: Բացատրեմ: Պատկերացրեք, ֆուտբոլային թիմ, որտեղ կենտրոնական հարձակվողը և հենակետային կիսապաշտպանը, ենթադրենք, ռասիստներ են` նրանք պարբերաբար ագրեսիվ հայտարարություններ են անում սևամորթների հասցեին: Եթե այդ թիմի մարզիչը, ակումբի ղեկավարությունը հրապարակավ չեն դատապարտում նման հայտարարությունները, կարո՞ղ եմ ես եզրակացնել, որ ռասիզմը այդ թիմում խրախուսվում է:
Ի տարբերություն «Ժառանգության» և ՀԱԿ-ի` նախընտրական պայքարի մնացած մասնակիցներն ինձ համար ընդհանրապես մերժելի են և իմ ձայնը տալու առումով քննարկման առարկա չեն կարող լինել: Հենց դրա համար էլ ես քվեարկելու եմ բոլորի դեմ»:

1. Հայ Ազգային Կոնգրեսը, թերևս, Հայաստանի միակ քաղաքական ուժն է, որը հատուկ նախընտրական ծրագրով հանդես գալու կարիք չունի։ Քառամյա հետևողական հրապարակային գործունեության ընթացքում Կոնգրեսը թե՛ տեսական, թե՛ գործնական առումով հասարակությանը ներկայացել է որպես իշխանության իրական հակակշիռ հանդիսացող քաղաքական գործոն, որն իր առջև դրել ու հաջողությամբ լուծել է երկու գլխավոր խնդիր. առաջին՝ ավազակապետական վարչախմբի արատների ու հանցավորության լիակատար բացահայտումը, և երկրորդ՝ սահմանադրական կարգի վերականգնմանն ու երկրի սոցիալ-տնտեսական զարգացմանն ուղղված հիմնավոր այլընտրանքների առաջադրումը։

2. Վերջին չորս տարիներին (2008–2011 թթ.) վարչախմբի ապիկար ու հանցավոր գործունեության հետևանքով՝
* Ի դերև են ելել իշխող կուսակցության և գործող նախագահի նախընտրական բոլոր խոստումները.
* Հայաստանի համախառն ներքին արդյունքը և պետական բյուջեն նվազել են համապատասխանաբար 11.54 և 10.9 տոկոսով.
* Մեկ շնչին ընկնող ՀՆԱ-ի ցուցանիշով Հայաստանը աշխարհում զբաղեցրած 89 րդ տեղից նահանջել է 114-րդ տեղը.
* Երկրի արտաքին պարտքը 1.5 մլրդ դոլարից հասել է 3.8 մլրդ դոլարի.
* Գումարային գնաճը կազմել է 37.1%, իսկ պարենային ապրանքների ու կոմունալ ծառայությունների գներն աճել են 45.7%-ով.
* Դրամն արժեզրկվել է շուրջ 25%-ով. դրամի փոխարժեքի արհեստական պահպանման նպատակով երկրի միջազգային պահուստներից ծախսվել է ավելի քան 1 մլրդ դոլար.
* Կապիտալի արտահոսքը կազմել է շուրջ 5 մլրդ դոլար. մեկ շնչին ընկնող կապիտալի արտահանման տարեկան ծավալով (493 դոլար) Հայաստանը հավասարվել է աշխարհի ամենազարգացած երկրներին.
* Կոռուպցիայի ինդեքսով Հայաստանն աշխարհի երկրների շարքում 99-րդ տեղից տեղափոխվել է 129-րդ տեղը.
* Խորացել է տնտեսության մենաշնորհացման գործընթացը, և մանր ու միջին գործարարությունը հայտնվել է վերացման եզրին.
* Աղքատության վիճակագրական ցուցանիշը բարձրացել է 12%-ով, հասնելով 35%-ի.
* Պաշտոնական տվյալներով Հայաստանից արտագաղթել է 120.000 մարդ (մեկնողների և վերադարձողների թվի տարբերությունը).
* Հանցագործությունների և ծանր իրավախախտումների թիվը 8428-ից հասել է 16.572-ի.
* Գնդակահարվել է 10 անմեղ քաղաքացի, շուրջ 80 խաղաղ ցուցարարներ կրել են հրազենային և բեկորային վնասվածքներ, իսկ 100-ից ավելի քաղաքացիներ քաղաքական դրդապատճառներով հայտնվել են բանտերում.
* Խաղաղ պայմաններում զոհվել է ավելի քան 200 զինծառայող, որոնց մեծ մասը՝ բանակում տիրող արատավոր բարքերի և ոչ-կանոնադրային հարաբերությունների պատճառով.
* Քաղաքացիական օրենսգրքում 2010թ. կատարված փոփոխություններից հետո լրատվամիջոցների և անհատ լրագրողների նկատմամբ հարուցվել է մոտ մեկ տասնյակ դատական գործ.
* Պատգամավորների 58%-ը, կոպտորեն խախտելով ՀՀ Սահմանադրությունը, զբաղվել է ձեռնարկատիրական գործունեությամբ.
* Բյուջետային հիմնարկների հարյուրավոր աշխատակիցներ, ընդդիմադիր քաղաքական հայացքների համար, հեռացվել են աշխատանքից.
* Ավելի քան 100 անգամ Երևանի քաղաքային իշխանությունները ապօրինաբար մերժել են հանրահավաքների իրազեկման՝ ընդդիմության ներկայացրած դիմումները.
* Արտոնված հանրահավաքների օրերին իշխանությունները սիստեմատիկաբար փակել են Երևան մտնող մայրուղիները և խափանել հանրային տրանսպորտի աշխատանքը.
* և վերջապես, արտաքին քաղաքականության բնագավառում փակուղի են մտել Հայաստանի համար գերկենսական նշանակություն ունեցող խնդիրները՝ հայ–թուրքական հարաբերությունների և Ղարաբաղյան հակամարտության կարգավորման գործընթացները։

Քիչ թե շատ ժողովրդավարական որևէ երկրում նման խայտառակ ցուցանիշներ արձանագրած իշխանությունը ոչ միայն չէր համարձակվի մասնակցել ընտրությունների ու կրկին հայցել ժողովրդի վստահությունը, այլև վաղուց տապալված կլիներ, ինչպես, շատ ավելի անմեղ թերացումների համար համաշխարհային տնտեսական ճգնաժամի հետևանքով տապալվեցին տասնյակ ևրոպական կառավարություններ։ Այսպիսի ավազակաբարո իշխանություն և դաժան լուծ Հայաստանն իր ողջ պատմության ընթացքում չի տեսել։ Եթե հասարակությունը չգիտակցի այս ցնցող ճշմարտությունը, և գայթակղվելով ընտրակաշառքով, իր ձայնը տա իշխող կուսակցությանը, ապա կամա թե ակամա մասնակիցը կդառնա սեփական երկրի վերջնական կործանման, ու դրա համար իրենից բացի որևէ մեկին մեղադրելու իրավունք չի ունենա։

3. Երկրում տիրող իրական վիճակի բացահայտումն ու վարչախմբի մերկացումը համարելով իր գործունեության գլխավոր խնդիրներից մեկը, Կոնգրեսն, ինչպես արդեն նշվեց, դրան զուգահեռ, հսկայական աշխատանք է կատարել քաղաքական ու սոցիալ-տնտեսական բարեփոխումների այլընտրանքային ծրագրեր մշակելու և դրանք հասարակության սեփականությունը դարձնելու ուղղությամբ։ Քաղաքական, իրավական, սոցիալ-տնտեսական և կրթա-մշակութային բնագավառներում Հայ Ազգային Կոնգրեսի որդեգրած ռազմավարությունն արտացոլված է հետևյալ բովանդակալից մասնագիտական փաստաթղթերում (փակագծերում նշված է յուրաքանչյուր փաստաթղթի հրապարակման թվականը).

* «100 քայլ». Սոցիալ-տնտեսական քաղաքականության համակարգային վերափոխման ծրագիր (22.02.2010).
* Առողջության պահպանման քաղաքականության հիմնադրույթներ (01.07.2010).
* Կենսաթոշակային բարեփոխման ծրագիր (02.09.2010).
* ՀՀ հանրակրթության հեռանկարային զարգացման ծրագիր (15.04.2011).
* Մշակութային մանիֆեստ (27.12.2011).
* Ընտրական գործընթացի բարեփոխման պլատֆորմ (22.01.2012).
* Ազգային էկոլոգիական անվտանգության հայեցակարգ (21.02.2012).
* ՀՀ բարձրագույն կրթության և գիտության զարգացման հեռանկարային ծրագիր (21.03.2012)
* Դատա-իրավական բարեփոխումների հայեցակարգ (21.03.2012).
* Արդյունաբերության զարգացման ծրագիր (28.03.2012).
* Գյուղատնտեսության խթանմանն ուղղված հրատապ միջոցառումներ (29.03.2012).

Նշված փաստաթղթերում քայլ առ քայլ ներկայացված են իշխանության գալու պարագայում Հայ Ազգային Կոնգրեսի կոնկրետ անելիքները, բարեփոխումների ժամանակացույցը և նոր, ժողովրդավարական Հայաստանի կերտման իրատեսական հեռանկարը։ Հասկանալի լինելով, որ որևէ նախընտրական ծրագրում անհնար ու, թերևս, նաև ավելորդ է վերարծարծել վերոհիշյալ ծավալուն փաստաթղթերի ողջ բովանդակությունը, Հայ Ազգային Կոնգրեսը նպատակահարմար է համարում, դրա փոխարեն հասարակությանը հստակորեն ներկայացնել այն կոնկրետ քաղաքական ու օրենսդրական նախաձեռնությունները, որոնցով, սեփական ծանրակշիռ պատգամավորական խմբակցություն ձևավորելու պարագայում, պատրաստվում է հանդես գալ հաջորդ գումարման Ազգային Ժողովի առաջին իսկ նստաշրջաններում՝ այն է.

4. Հիմք ընդունելով այն իրողությունը, որ Սերժ Սարգսյանը ՀՀ նախագահի աթոռը զավթել է «Ընտրական օրենսգրքի» կոպտագույն խախտման, համատարած ընտրակեղծիքների, զանգվածային բռնությունների և խաղաղ ցուցարարների նկատմամբ իրականացրած սպանդի հետևանքով, անմիջապես բարձրացնել նրա պաշտոնանկության և քրեական պատասխանատվության ենթարկելու հարցը։

5. Ստեղծել լայն լիազորություններով օժտված անկողմնակալ պատգամավորական հանձնաժողովներ՝ 1999թ. հոկտեմբերի 27-ի ու 2008թ. մարտի 1-ի ոճրագործությունների ուսումնասիրման և իրավական հետևանքներ ենթադրող զեկույցների պատրաստման նպատակով։

6. Ընթացիկ բյուջեում անհրաժեշտ փոփոխություններ կատարելու միջոցով լուծել մարտի 1-ի զոհերի ընտանիքների և հրազենային ու բեկորային վնասվածքներ ստացած անձանց լիարժեք նյութական փոխհատուցման հարցը, եթե ոչ միանվագ, ապա գոնե մաս առ մաս, առաջիկա երկու տարվա կտրվածքով։

7. Հիմնավորապես վերանայել պաշտոնեական պարտավորություններում սիստեմատիկորեն թերացած, հետևողական անսկզբունքայնություն դրսևորած և հասարակության աչքում լիովին վարկաբեկված Սահմանադրական դատարանի կազմը, որն արդարադատության գերագույն ատյանի կոչմանը հակառակ, դարձել է ավազակապետության հլուհնազանդ կամակատարը կամ պարզ կցորդը։

8. ԽՍՀՄ խնայբանկերի ավանդները ձևակերպել որպես պետական պարտատոմսեր՝ դրանք աստիճանաբար մարելով համապատասխան ժամանակացույցով, այն էլ՝ կրկնակի ավելի մեծ չափով և կրկնակի ավելի արագ, քան նախատեսված է 2005 թվականին ընդունված օրենքով։

9. Արտագաղթի վնասները նվազեցնելու և ժողովրդագրական վիճակը քիչ թե շատ բարելավելու նպատակով երեխաների ծննդյան միանվագ նպաստը սահմանել 500.000 դրամ, երրորդ երեխայից սկսած՝ մայրերին վճարել 1 մլն, իսկ հինգերորդից սկսած՝ 1.5 մլն դրամ, ինչպես նաև 30%-ով երկարաձգել մայրերի վճարովի արձակուրդի տևողությունը։

10. Անցնել պետության կողմից առողջապահության հավաստագրային ֆինանսավորման, այսինքն՝ ֆինանսավորել ոչ թե առողջապահական հիմնարկները, այլ առողջական խնդիրներ ունեցող քաղաքացիներին, իսկ առողջապահության պետական ֆինանսավորումը նախատեսել ՀՆԱ-ի առնվազն 3%-ի չափով, ներկայիս 1.6%-ի փոխարեն։

11. Օրենքով սահմանել բարձրագույն կրթության պետական ֆինանսավորման նվազագույն շեմ՝ ՀՆԱ-ի առնվազն 1%-ի չափով։ 2013 թվականին ՀՆԱ-ի 1%-ին հասցնել նաև գիտության պետական ֆինանսավորումը, իսկ դրանից հետո յուրաքանչյուր տարի այն ավելացնել 0.25%-ով։

12. Արմատական փոփոխությունների ենթարկել «Ընտրական օրենսգիրքը», նրանում մասնավորապես ամրագրելով հետևյալ դրույթները. ընտրացուցակների բեռնաթափումը երկրից մշտապես բացակա շուրջ 500.000 քաղաքացիների անուններից, բազմակուսակցական ընտրական հանձնաժողովների փոխարինումը պետության կողմից ձևավորված հանձնաժողովներով, խորհրդարանական ընտրություններում ամբողջովին համամասնական ընտրակարգի կիրառումը, քվեարկության մասնակիցների մատների թանաքոտումը, ընտրատեղամասերում տեսախցիկների տեղադրումը, ընտրողների ստորագրած ցուցակների հրապարակայնության ապահովումը և այլն։

13. «Արտակարգ դրության իրավական ռեժիմի» մասին օրենքից հանել բանակի մասնակցությանը վերաբերող հակասահմանադրական դրույթը, երկրի ներքին կյանքում զինված ուժերի օգտագործումը սահմանափակելով բացառապես բնական աղետների հետևանքների վերացման ոլորտով։

14. «Հավաքների մասին» օրենքում վերացնել բյուրոկրատական կամայականությունների դուռ բացող երկիմաստ արտահայտություններն ու անհստակ ձևակերպումները, և խիստ պատասխանատվություն սահմանել հավաքների ազատության իրավունքը ոտնահարող պետական պաշտոնյաների նկատմամբ։

15. Գյուղատնտեսության խթանման և գյուղացիության վիճակի թեթևացման նպատակով ընդունել միջոցառումների համալիր փաթեթ, որը մասնավորապես կընդգրկի հետևյալ մոտեցումները. գյուղատնտեսության վարկավորման տարբերակված նորմատիվների սահմանում, պետության կողմից առ 01.04.2012թ. գյուղատնտեսական վարկերի տոկոսադրույքի և գյուղմթերքների արտադրության սուբսիդավորում, փոքր գյուղացիական տնտեսությունների խրախուսում, մեծածախ գյուղատնտեսական շուկաների ստեղծում, գյուղացիական տնտեսությունների կողմից մանրածախ շուկաների հիմնում, սերմացուի, թունաքիմիկատների, պարարտանյութերի նկատմամբ տարբերակված ԱԱՀ-ի կիրառում, գյուղացիների համար մասնագիտական պետական դասընթացների կազմակերպում և այլն։

16. Հրատապ միջոցառումների նույնպիսի մի փաթեթ անհրաժեշտ է ընդունել նաև արդյունաբերության զարգացման և արտադրության խթանման համար, նկատի ունենալով, մասնավորապես, նոր աշխատատեղեր ստեղծող ձեռնարկությունների համար հարկային արտոնությունների սահմանումը, հիմնական կապիտալում ներդրվող միջոցների հաշվառումը արտադրանքի ինքնարժեքի կազմում և դրանց ազատումը շահութահարկից, ինչպես նաև շահութահարկից կանխավճարներ կատարելու պրակտիկայի դադարեցումը և ներքին արտադրողի շահերի հավասարեցումը ներմուծողի նկատմամբ։

17. Հակամենաշնորհային օրենսդրության մեջ սահմանել դրույթ, որի համաձայն տնտեսական գործունեության ցանկացած ոլորտում որևէ ընկերության մասնաբաժինը, բացառությամբ բնական մենաշնորհներին վերաբերող դեպքերի, չի կարող գերազանցել շուկայի 33.33%-ը։

18. ՀՀ ոստիկանությունը, Ազգային անվտանգության ծառայությունը և Պետական եկամուտների կոմիտեն հանել ՀՀ կառավարությանն առընթեր մարմինների ցանկից և վերականգնել որպես նախարարություններ կառավարության կազմում նրանց նախկինում ունեցած կարգավիճակը։

19. Օրենսդրական փոփոխությունների միջոցով վերացնել ավելորդ վարչական օղակները և էապես կրճատել վերջին 14 տարիների ընթացքում անհարկի ուռճացած պետական ապարատը՝ մասնավորապես ՀՀ Նախագահի, կառավարության, ճյուղային նախարարությունների, մարզպետարանների և Ազգային Ժողովի աշխատակազմերը, սակայն ոչ թե նշված մարմինների շարքային աշխատողների, այլ բարձրաստիճան պաշտոնյաների թվի հաշվին, իսկ կրճատումների հետևանքով խնայված միջոցներն ուղղել կրթության, գիտության և մշակույթի ոլորտներ։

20. Հայ Ազգային Կոնգրեսի խորհրդարանական գործունեությունն, անշուշտ, չի սահմանափակվելու թվարկված նախաձեռնություններով. թեկուզ առաջնահերթ, դրանք ընդամենն ընդգրկում են նրա ծրագրերի միայն մի մասը։ Ազգային Ժողովում քաղաքական ուժերի բարեհաջող դասավորության պարագայում Կոնգրեսը մտադիր է հասնել իր ծրագրային փաստաթղթերում տեղ գտած բոլոր խնդիրների իրականացմանը։ Իսկ որպես զգուշացում. լինելով սկզբունքային ընդդիմություն, Կոնգրեսը դեմ է քվեարկելու այն բոլոր օրինագծերին, որոնցում հաշվի չեն առնվի իր առաջարկներն ու առարկությունները։

Հարկ եմ համարում նաև շեշտել, որ իմ ելույթի բոլոր դրույթները համաձայնեցված են «Հայ Ազգային Կոնգրես» դաշինքին մաս կազմող կուսակցությունների հետ, հետևաբար այն հանդիսանում է նրանց միասնական տեսակետը։

Հայկական շուկայում մարտի 29-ին հայտնաբերված չմակնշված ձուն եղել է ժամկետանց, որը Հայաստան է ներմուծվել «Աշոցք» ՍՊԸ-ի կողմից. Տեղեկացնում է Գյուղատնտեսության նախարարության սննդամթերքի անվտանգության պետական ծառայությունը:

Այսօր վերը նշված գերատեսչության հասարակայնության հետ կապերի բաժնի պետ Բաբկեն Պիպոյանը հաղորդագրություն է տարածել, որում մասնավորապես ասվում  է.Սույն թվականի մարտի 29-ին ՀՀ ԳՆ սննդամթերքի անվտանգության պետական ծառայությունը հաղորդագրություն էր տարածել, որով տեղեկացնում էր, որ  շուկայում հայտնաբերվել է չմակնշված և ժամկետանց  ձու:

Խնդրի վերաբերյալ իրականացված ուսումնասիրությունների արդյունքում պարզվել է, որ չմակնշված ձուն եղել է ժամկետն անցած և Հայաստանի Հանրապետություն է ներմուծվել ”Աշոցք” ՍՊԸ-ի կողմից: Այժմ Ծառայության կողմից  աշխատանքներ են կատարվում ձվի ամբողջ խմբաքանակի հայտնաբերման և  համապատասխան քայլեր իրականացնելու ուղղությամբ»:

Մեզ հետ զրույցում Բաբկեն Պիպոյանը տեղեկացրեց, որ չմակնշված ձվի առկայության առաջին ահազանգը ստացվել է Գյումրիից, ապա իրենց որոնման արդյունքում մի խմբաքանակ էլ հայտնաբերվել է նաև Երևանում: Այժմ աշխատանքները նոր խմբաքանակ գտնելու ուղղությամբ շարունակվում են:

ՍԱՊ ծառայությունը, ըստ Պիպոյանի չի տիրապետում  Աշոցք ՍՊԸ-ի մասին այլ տվյալների, քանի որ դա չի մտնում իրենց իրավասությունների շրջանակ. «Մենք չունենք պետռեգիստի տվյալները», — մեր հարցին, թե ո՞վ է ՍՊԸ-ի ղեկավարը, կամ ի՞նչ ընկերություն է այն, ասաց  Պիպոյանը:

Ասել է, թե` չգիտեն, ինչ գործառույթ ունի ձու ներկրած իրավախախտ ընկերությունը:

Մենք փորձեցինք հասկանալ, թե ինչ է իրենից ներկայացնում «Աշոցք» ՍՊԸ-ն, քանի որ ձու ներկրող ընկերությունները Հայաստանում մի քանիսն են և հայտնի են դաշտին քիչ թե շատ ծանոթներին:

Ըստ մեր հայտնաբերած  տեղեկության «ԱՇՈՑՔ» ՍՊԸ-ն  շինարարական ընկերություն է, որը հիմնադրվել է 2002 թվականին: Ընկերության տնօրենը Պետրոս Սահակյանն է: «ԱՇՈՑՔ» ՍՊԸ-ն իրականացնում է լայնածավալ գործունեություն Հայաստանի ամբողջ տարածքում, ինչպես նաև Լեռնային Ղարաբաղի Հանրապետությունում: Ընկերության գործունեության հիմնական ոլորտը կապիտալ շինարարությունն է: Որակյալ մասնագետներով համալրված աշխատակազմը կատարում է որակյալ, միջազգային չափանիշներին համապատասխան կառուցման, ջրամատակարարման համակարգերի բարելավման, հիմնանորոգման, էլեկտրամոնտաժային, ջեռուցման համակարգերի տեղադրման աշխատանքներ: Ընկերությունը համագործակցում է և կապեր ունի նաև արտերկրում, զբաղվում է տարբեր շինանյութերի, էլեկտրական գործիքների, սարքերի, սարքավորումների, ինչպես նաև շին. աշխատանքներն առավել արդյունավետ և բարձրորակ դարձնող այլ նյութերի ներմուծմամբ և հանդիսանում է մատակարար Հայաստանում:

Այս ընկերությունը գրանցված է Լեռնային Ղարաբաղում, սակայն գրասենյակ  ունի նաև Երևանում: Այն, դատելով համացանցում եղած տեղեկություններից , գտնվում է բավականին արտոնյալ դիրքերում. 2010-ին ՀՀ կառավարությունը հաստատել է Ասիական զարգացման բանկի ջրամատակարարման և ջրահեռացման ծրագրի շրջանակում անցկացված և ծրագրի կառավարման խորհրդի հավանությանն արժանացած «Ուջան, Արագածոտն, Նոր Եդեսիա, Կոշ, Դպրեւանք, Շամիրամ և Նոր Ամանոս գյուղերի ջրամատակարարման համակարգերի բարելավում» մրցույթի արդյունքները` հաղթող ճանաչելով «Աշոցք» և «Կապավոր» ՍՊԸ-ների կոնսորցիումը։

Ընկերության անունը շրջանառվել է նաև 2009 -2010 թվականին, Մասիսի խմելու ջրի խողովակների աշխատանքների հետ կապված, երբ  «Հայջրմուղկոյուղի» ՓԲԸ-ի հետ կասկածելի գործարքների արդյունքում ՍՊԸ-ն հայտնվել էր մամուլի էջերում:

Ինչևէ, մենք զանգահարեցինք  «Աշոցք ՍՊԸ»-ը փորձելով պարզել  ժամկետանց ձու ներկրող և շինմոնտաժային աշխատանքներ իրականացնող ընկերության կապը: Փոխտնօրենը,  որը ներկայացավ Սերգեյ անունով,  ասաց, թե Սննդի անվտանգության ծառայությունը գլուխը քարին է տալիս, իրենց մեղադրելով. «Ես հենց հիմա գնում են էնտեղ տեսնեմ էդ ինչեր են ասում»: Իսկ իրենց`բոլորովին այլ ոլորտում գործող ընկերության ձվի ներկրումով զբաղվելը, այսպես բացատրեց. «Մենք ձու ենք ներկրել բնակչության մասին մտածելով, ձուն ներկրվել է դեռևս Նոր տարուց առաջ, բաժանել ենք խանութներին, որ Նոր տարուն ձվի դեֆիցիտ չլինի , ինչպես նախորդ տարի, երբ ազգաբնակչությանը150 դրամով ձու էին վաճառում»: Պարզվում է «Աշոցքը» ձուն հանձնել է 30 դրամով, որը ըստ փոխտնօրենի վաճառվել վերջացել է վաղուց:

Իսկ Սննդի անվտանգության ծառայությունից վստահեցնում են, որ ժամկետանց և չմակնշված ձվեր իրենք հայտնաբերել են օրերս` վաճառքում: