«Եվրանեսթ»-ի խորհրդարանական վեհաժողովի հայկական պատվիրակությունը այսօր մեկնել է Բաքու՝ մասնակցելու այնտեղ ապրիլի 2-ից 4-ը կայանալիք «Եվրանեսթ»-ի լիագումար նիստին:   Պատվիրակության կազմում են՝ Վահան Հովհաննիսյանը, Արտակ Զաքարյանը, Արա Նռանյանը, Լիլիթ Գալստյանը, Հովհաննես Սահակյանը, Արամ Սաֆարյանը, Նաիրա Զոհրաբյանը, Ստեփան Սաֆարյանը, Խաչիկ Հարությունյանը, Մանվել Բադեյանը:

Ի սկզբանե հայտարարվել էր, որ անվտանգության նկատառումներից ելնելով, գուցե հայկական պատվիրակության ոչ ամբողջական կազմը մեկնի Բաքու և , մասնավորապես, կին-պատվիրակները’ ԲՀԿ-ական Նաիրա Զոհրաբյանն ու ՀՅԴ-ական Լիլիթ Գալստյանը չմասնակցեն ապրիլին կայանալիք նիստին: Սակայն հետագայում որոշում կայացվեց, որ կմեկնի ամբողջական կազմը’ բացառելու հակահայկական քարոզչությունն ու հատկապես’ դրա տոնայնությունը քննարկվող ու ընդունվելիք բանաձևերում:

Ստամբուլում 91 տարեկանում մահացել է Օսմանյան դինաստիայի ամենատարեց ժառանգորդուհին՝ Նեսիլշահ Սուլթանը։ (ծնված 1921 փետրվարի 4)։

Նեսիլշահ Սուլթանի հայրը հանդիսացել է օսմանյան վերջին խալիֆ Աբդուլմեջիդի որդի Շեհզադե Օմեր Ֆարուք Էֆենդին, մայրը՝ օսմանյան վերջին փադիշահ Մեհմեդ Վահիդետտինի դուստրը։

Նեսիլշահ Սուլթանը 1940-ին ամուսնացել էԵգիպտոսի արքայազն Մուհամեդ Աբդուլմունիմի հետ։  Այնուհետ ամուսնու հետ տեղափոխվել է Ֆրանսիա, իսկ 1963-ից վերադարձել Թուրքիա։

Մարտի 31-ին, ժամը 14.00-ին, Սարալանջի նորակառույց ճանապարհին իրար են բախվել   «ՎԱԶ-21144»  և   «ՎԱԶ-2121»  մակնիշի ավտոմեքենաներ, ինչի հետևանքով «ՎԱԶ-21144»-ի վարորդը՝ 1978 թ. ծնված

Գուրգեն Ավդալյանը,  տեղում մահացել է, իսկ «ՎԱԶ-2121»-ի վարորդը և 3 ուղևորները մարմնական վնասվածքներով տեղափոխվել են հիվանդանոց:

1967 թ-ից ամեն տարի ապրիլի 2-ին`  դանիացի գրող-հեքիաթագիր Հանս Քրիստիան Անդեսենի ծննդյան օրը նշվում է Մանկական գրքերի տոնը:

Մանկական գրքերի տոնը նշվում է Միջազգային խորհրդի նախաձեռնությամբ` խրախուսելու սերը դեպի ընթերցանությունը, մեկ անգամ եւս ուշադրություն դարձնելով  մանանակ գրքերին եւ ընդգծելու  դրանց հսկայական դերը նոր սերնդի հոգեւոր եւ ինտելեկտուալ ձեւավորման գործում:

Տոնի ավանդույթն այսպիսին է. ամեն տարի հրավիրվում է հայտնի մանկագիրներից մեկը, ում հանձնարարվում է գրել Հաղորդագրություն մանկական աշխարհից: Բայցի այդ հրավիրվում է նաեւ մեկ հայտնի նկարիչ, ով նկարում է պաստառ` նվիրված Մանկակն գրքերի տոնին:

Այսօր  երկօրյա պաշտոնական այցով Հայաստան կայցելի ՌԴ ԱԳ նախարար Սերգեյ Լավրովը, այս մասին տեղեկանում ենք ԱԳՆ հաղորդագրությունից:

Այցը նվիրված է Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 20-ամյակին:

Հայաստանի Հանրապետության արտգործնախարար Էդվարդ Նալբանդյանի և Ռուսաստանի Դաշնության ԱԳ նախարար Սերգեյ Լավրովի հանդիպումը տեղի կունենա ապրիլի 2-ին Հանդիպումից հետո երկու արտգործնախարարները հանդես կգան համատեղ մամուլի ասւլիսով։

Սերգեյ Լավրովը կայցելի Ծիծեռնակաբերդ, որտեղ հարգանքի տուրք կմատուցի Հայոց ցեղասպանության զոհերի հիշատակին:

Ապրիլի 1-ին ԱՄՆ-ում կայացավ ամենամյա«Ոսկե մորի» մրցանակաբաշխությունը, որը մրցանակներ է շնորհում տարվա վատագույն ֆիլմերին: Սովորաբար այս մրցանակաբաշխությունն անցկացվում է «Օսկարից» առաջ, սակայն այս տարի որոշվեց անցկացնել ապրիլի 1-ին, որն ԱՄՆ-ում նշում են որպես հիմարի օր:Այս տարի մրցանակաբաշխության «ֆավորիտը» «Այդքան տարբեր երկվորյակները» (Jack and Jill) ֆիլմն էր, որը միանգամից 10 մորու արժանացավ: Ֆիլմում երկու կերպար մարմնավորած Ադամ Սենդլերը ստացավ «Վատագույն դերասան և դերասանուհի» մրցանակը: Ռեժիսորը մրցանակ ստացավ վատագույն բեմադրության, իսկ դերասաններ Ալ Պաչինոն և Դեւիդ Սպեյդը`  երկրորդ պլանի վատագույն դերասանի համար:

Կենտրոնական ընտրական հանձնաժողովը ապրիլի 1-ի արտահերթ նիստում գրանցեց Ազգային ժողովի մայիսի 6-ի ընտրություններում համամասնական ընտրակարգով առաջադրված 9 քաղաքական ուժերի` ներկայիս գումարման ԱԺ-ում ներկայացված Հայաստանի Հանրապետական, «Բարգավաճ Հայաստան», «Օրինաց երկիր», Հայ Յեղափոխական Դաշնակցություն, «Ժառանգություն», ինչպես նաև Հայաստանի Դեմոկրատական, Կոմունիստական և «Միավորված հայեր» կուսակցությունների և արմատական ընդդիմության` «Հայ ազգային կոնգրես» ընտրական դաշինքի, ընտրական ցուցակները:

ԿԸՀ անդամների կողմից առարկություններ եղան միայն «Հայ ազգային կոնգրես» ընտրական դաշինքի ցուցակում ընդգրկված մեկ և «Օրինաց երկիր» կուսակցության ընտրական ցուցակում ընդգրկված երկու անձանց գրանցման հարցում: Արդյունքում` ԿԸՀ-ի միաձայն որոշումներով մերժվեց այդ անձանց գրանցումը:

Ինչպես և սպասելի էր, մերժվեց ՀԱԿ-ի ընտրական ցուցակում ընդգրկված անկուսակցական, ԱԺ նախկին պատգամավոր Խաչատուր Սուքիասյանի թեկնածության գրանցումը նույն հիմնավորմամբ, ինչ Երևանի թ.10 ԸԸՀ-ում, որտեղ նա առաջադրված էր մեծամասնական ընտրակարգով: Հիշեցնենք, որ, ըստ ոստիկանության տված ճշգրտված տեղեկանքի, Խ.Սուքիասյանը վերջին 5 տարում մշտապես չի բնակվել Հայաստանում, ինչը, Ընտրական օրենսգրքի համաձայն, գրանցման անհրաժեշտ պայմանններից է:

ԿԸՀ-ն մերժեց նաև ՕԵԿ-ի ցուցակից Արամ Հարությունյանի (ցուցակի 59-րդ հորիզոնական) և Հակոբ Թոսունյանի (176-րդ) գրանցումը` ներկայացված փաստաթղթերը թերի լինելու և ԿԸՀ-ի զգուշացումից հետո Ընտրական օրենսգրքով սահմանված 48 ժամում թերությունը չվերացնելու հիմքով: Մասնավորապես, առաջինի դեպքում թեկնածուի կողմից ներկայացված անձնագրի սերիան ու համարը չէին համապատասխանում ՀՀ ոստիկանության անձնագրային և վիզաների վարչության կողմից տրամադրված տվյալներին: Երկրորդ դեպքում` թեկնածուի վերջին 5 տարում ՀՀ-ում մշտապես բնակվելու և ՀՀ քաղաքացի հանդիսանալու, այլ երկրի քաղաքացիություն չունենալու մասին Ոստիկանության համապատասխան վարչության Քաջարանի տարածքային ստարաբաժանման կողմից տրված տեղեկանքը կնքված չլինելու պատճառով:

ԿԸՀ նախագահ Տիգրան Մուկուչյանը նիստում նաև հրապարակեց տարբեր կուսակցությունների ընտրական ցուցակներում նախապես ընդգրկված մի շարք քաղաքացիների դիմումները, ըստ որոնց նրանք հանձնաժողովին խնդրել են իրենց չգրանցել որպես թեկնածու, այլ կերպ ասած, ինքնաբացարկ են հայտնել:

Ըստ այդմ, «Բարգավաճ Հայաստան» կուսակցության ցուցակից նման խնդրանքով դիմել են Գեղարքունիքի և Վայոց Ձորի մարզպետներ Նվեր Պողոսյանը և Սերգեյ Բագրատյանը (ցուցակում համապատասխանաբար 60-րդ և 62-րդ), ՀՀԿ-ից` ՀՀ կառավարության աշխատակազմի ղեկավար Դավիթ Սարգսյանը (55-րդ), Սոցիալական ապահովության պետական ծառայության պետ Արտեմ Ասատրյանը (80-րդ) և Երևանի Աջափնյակ վարչական շրջանի ղեկավարի տեղակալ Արմեն Բաղդասարյանը (229-րդ), ՕԵԿ-ից` գյուղատնտեսության նախկին նախարար Գերասիմ Ալավերդյանը (117-րդ), «Միավորված հայեր» կուսակցությունից` Տեռնոպոլի ազգային տնտեսագիտական համալսարանի Երևանի մասնաճյուղի դասախոս Տելեմակ Աֆրիկյանը (23-րդ):

Արդյունքում, հաշվի առնելով ԿԸՀ-ի կողմից 3 թեկնածուների գրանցումը մերժելու մասին որոշումները և վերոհիշյալ թեկնածուների դիմումները, գրանցումից հետո ՀՀԿ-ի և ՕԵԿ-ի ընտրական ցուցակներում ընդգրկվածների թվաքանակները նվազեցին երեքով, ԲՀԿ-ինը` երկուսով, ՀԱԿ-ի և «Միավորված հայեր» կուսակցության ցուցակները` մեկականով:

Այսպիսով` Հայաստանի Հանրապետական կուսակցության ընտրական ցուցակում ընդգրկված է 250 թեկնածու: Ցուցակը գլխավորում է ՀՀ նախագահ, ՀՀԿ առաջնորդ Սերժ Սարգսյանը: Երկրորդը և երրորդը համապատասխանաբար ՀՀԿ փոխնախագահներ, կուսակցության նախընտրական շտաբի ղեկավար, ԱԺ նախկին նախագահ Հովիկ Աբրահամյանն ու վարչապետ Տիգրան Սարգսյանն են:

«Բարգավաճ Հայաստան» կուսակցության ընտրական ցուցակում ընդգրկված է 163 թեկնածու: Ցուցակը գլխավորում է ԲՀԿ առաջնորդ և կուսակցության խորհրդարանական խմբակցության ղեկավար Գագիկ Ծառուկյանը: Երկրորդը և երրորդը համապատասխանաբար ԲՀԿ-ականներ, ՀՀ նախկին արտգործնախարար Վարդան Օսկանյանն ու ՀՀ քաղաքաշինության նախարար Վարդան Վարդանյանն են:

«Օրինաց երկիր» կուսակցության համամասնական ցուցակում ընդգրկված է 175 թեկնածու: Ցուցակը գլխավորում է ՕԵԿ նախագահ, Հայաստանի Անվտանգության խորհրդի քարտուղար Արթուր Բաղդասարյանը: Երկրորդը և երրորդը համապատասխանաբար ՕԵԿ փոխնախագահներ, կուսակցության խորհրդարանական խմբակցության ղեկավար Հեղինե Բիշարյանը և ՀՀ արտակարգ իրավիճակների նախարար Արմեն Երիցյանը:

Հայ Յեղափոխական Դաշնակցության համամասնական ցուցակում ընդգրկված է 85 թեկնածու: Ցուցակը գլխավորում է ՀՅԴ Բյուրոյի անդամ, ՀՅԴ խորհրդարանական խմբակցության ղեկավար Վահան Հովհաննիսյանը: Երկրորդը և երրորդը համապատասխանաբար դաշնակցական պատգամավորներ Արմեն Ռուստամյանն ու Արտյուշ Շահբազյանն են:

«Ժառանգության» կողմից, «Ազատ դեմոկրատներ» կուսակցության հետ համատեղ ներկայացված, համամասնական ցուցակում ընդգրկված է 73 թեկնածու: Ցուցակը գլխավորում է «Ժառանգություն» կուսակցության հիմնադիր նախագահ և «Ժառանգություն» խորհրդարանական խմբակցության ղեկավար Րաֆֆի Հովհաննիսյանը: Երկրորդը և երրորդը համապատասխանաբար «Ազատ դեմոկրատներ» կուսակցության նախագահ Խաչատուր Քոքոբելյանն ու ԱԺ «Ժառանգություն» խմբակցության անդամ Զարուհի Փոստանջյանն են:

Հայ ազգային կոնգրեսի համամասնական ցուցակում ընդգրկված է 122 թեկնածու: Ցուցակը գլխավորում է ՀՀ առաջին նախագահ, ՀԱԿ առաջնորդ Լևոն Տեր-Պետրոսյանը: Երկրորդը և երրորդը համապատասխանաբար Հայաստանի Ժողովրդական կուսակցության նախագահ Ստեփան Դեմիրճյանն ու «Հանրապետություն» կուսակցության Քաղաքական խորհրդի նախագահ
Արամ Զ. Սարգսյանն են:

Հայաստանի Դեմոկրատական կուսակցության ընտրական ցուցակում ընդգրկված է 45 թեկնածու: Ցուցակը գլխավորում է ՀԴԿ նախագահ Արամ Սարգսյանը: Երկրորդը և երրորդը համապատասխանաբար անկուսակցական Լենսեր Աղալովյանն ու ՀԴԿ անդամ Արմեն Հովսեփյանն են:

ՀԿԿ-ի ընտրական ցուցակում ընդգրկված է 75 թեկնածու: Ցուցակը գլխավորում է ՀԿԿ Կենտկոմի առաջին քարտուղար Ռուբեն Թովմասյանը: Երկրորդը և երրորդը համապատասխանաբար Հայաստանի առաջադիմական միացյալ կոմունիստական կուսակցության նախագահ Վազգեն Սաֆարյանը ու ՀԿԿ Երևանի քաղկոմի առաջին քարտուղար Տաճատ Սարգսյանն են:

«Միավորված հայեր» կուսակցության ցուցակում ընդգրկված է 28 թեկնածու: Ցուցակը գլխավորում է ՄՀԿ Քաղաքական խորհրդի և վարչության նախագահ Ռուբեն Ավագյանը: Հաջորդ երկուսը ՄՀԿ-ական Գուրգեն Հովսեփյանն ու Գայանե Անդրեասյանն են:

Ապրիլի 8-ից պաշտոնապես կմեկնարկի նախընտրական քարոզարշավը: Այն կավարտվի մայիսի 4-ի ժամը 24.00-ին:

Ադրբեջանում  զինծառայող է ինքնասպան  եղել: Միջադեպը տեղի է ունեցել Ֆիզուլու շրջանի զորամասում:
1992 թվականին ծնված Էլմիր Ադիլօղլու Քերիմովն ինքնաձիգի օգնությամբ ինքնասպան է եղել: Նախնական տեղեկություններով՝ Քերիմովն այդ քայլին գնացել է ընտանեկան խնդիրներից առաջացած սթրեսի պատճառով:
Ադրբեջանի պաշտպանության նախարարության մամլո ծառայության փոխղեկավար Թեյմուր Աբդուլաևը հաստատել է զինծառայողի կորուստը:

1897թ. այս օրը ծնվել է  Սողոմոն Թեհլերյանը: Նա Հայոց ցեղասպանության վերապրող և ազգային հերոս է, որ գնդակահարել է երիտթուրքորի ներքին գործերի նախարար և Հայոց Ցեղասպանության գլխավոր կազմակերպիչ, Թալեաթ Փաշային։

Սողոմոն Թեհլերյանը ծնվել է 1896 թվականին Բագառիճում՝ Արևմտյան Հայաստանում, ուր ստացել է իր նախնական կրթությունը։ Ապա ուսումը շարունակել է Երզնկայի Կենտրոնական ուսումնարանում, որն ավարտել է 1912 թվականին և 1913-ին փոխադրվել է Սերբիա։

Առաջին Համաշխարհային Պատերազմը սկսվելուն պես նա մեկնել է Հայաստան, ուր մասնակցել է կամավորական շարժմանը՝ Անդրանիկի գնդում։ 1915 թվականին Թեհլերյանը վերապրել է ցեղասպանությունը, ինչը շատ մեծ ազդեցություն է ունեցել նրա կյանքում։

1921 թվականին Թեհլերյանը մասնակցել է Դաշնակցության Նեմեսիս գործողությանը՝ առաջադրանք ստանալով սպանել Եղեռնի գլխավոր կազկակեպչին՝ Թալեաթ փաշային։ Նույն տարվա մարտի 15-ին Բեռլինի Շառլոտենբուրգ թաղամասի Հայդենբուրգ փողոցում Սողոմոն Թեհլերյանը գնդակահարում է Թալեաթին և ձերբակալվում: Սակայն 1921թ. հունիսի 2-ին գերմանական դատարանը անպարտ է ճանաչում Սողոմոն Թեհլերյանին։ Վերջինս պաշտպանվում էր երեք դատախազների կողմից, որոնցից մեկը բժիշկ Թեոդոր Նիեմեյերն էր՝ օրենսդրության պրոֆեսոր Քիլի համալսարանից։

Արդարացված Թեհլերյանը երկար տարիներ ապրել է Հարավսլավիայի մայրաքաղաք Բելգրադի Դալմատինսկա փողոցի թիվ 78 տանը։ 1945-ից հետո բնակություն է հաստատել ԱՄՆ-ի Ֆրեզնո քաղաքում, որտեղ էլ մահացել է 1960 թ. մայիսի 23-ին։ Ի հիշատակ Թեհլերյանի՝ հուշարձան է կանգնեցվել Ֆրեզնոյում, Թալինի շրջանի Մաստարա գյուղում և Երևանում։

Տյումենի Ռոշչինո օդանավակայանից մոտ 3 կիլոմետր հեռավորության վրա վթարվել է ATR-72 մակնիշի` Տյումեն-Սուրգուտ չվերթն իրականացնող ինքնաթիռը:

ՌԴ Արտակարգ իրավիճակների նախարարության տեղեկություններով` զոհվել է ինքնաթիռում եղած 43 անձից 32-ը, կենդանի է մնացել ևս 11 մարդ, որոնց առողջական վիճակը ծայրահեղ ծանր է: Այլ տուժածների ճակատագիրը դեռ անհայտ է: Զոհերի թվում կան երեխաներ:

Օպերատիվ շտաբում հաղորդել են, որ օդանավի ինքնագրիչ «սև արկղերը» արդեն հայտնաբերվել են: